Labanan “an Espiritu kan Kinaban”
Labanan “an Espiritu kan Kinaban”
“Inako niato, bakong an espiritu kan kinaban, kundi an espiritu na gikan sa Dios.”—1 COR. 2:12.
1, 2. (a) Kan nakaagi, taano ta nagbubugtak nin mga canary sa mga minahan sa Britania? (b) Anong peligro an napapaatubang sa mga Kristiano?
KAN taon 1911, an mga autoridad sa Britania nagpasar nin ley na ginibo tanganing iligtas an buhay kan mga minero nin karbon. Inobligar an lambang minahan na magkaigwa nin duwang gamgam na canary. Sa anong katuyohan? Kun biglang magkaigwa nin kasolo sa minahan, dadarahon kan mga paraligtas an mga canary sa irarom kan daga. An saradit na gamgam na ini sensitibo sa nakakahilong mga gas, siring baga nin carbon monoxide. Kun magin kontaminado an aire, an mga gamgam na iyan mapaheling nin mga tanda nin pagsakit, na nahuhulog pa ngani sa tugdonan kaiyan. Mahalagang marhay an patienot na patanid na ini. An carbon monoxide sarong gas na mayo nin kolor asin parong, na nakakagadan paagi sa pag-olang sa mga pulang selula nin dugo na magdara nin oksiheno sa hawak. Kun dai maaraman kan mga paraligtas an dapit sa peligrong iyan, sinda puedeng madismayo dangan magadan na dai man lamang ninda naaaraman na nahihilo na sinda.
2 Sa espirituwal na paagi, an mga Kristiano napapaatubang sa situwasyon na kaagid kan mga minero. Paano? Kan itao ni Jesus sa saiyang mga disipulo an asignasyon na ihulit an maogmang bareta sa bilog na kinaban, aram nia na isinusugo nia sinda sa sarong peligrosong kapalibotan, saro na dominado ni Satanas asin kan espiritu kan kinaban. (Mat. 10:16; 1 Juan 5:19) Nahahadit na gayo si Jesus manongod sa saiyang mga disipulo kaya kan banggi bago sia magadan, namibi sia sa saiyang Ama: “Ako nakikimaherak sa saimo, bako na haleon sinda sa kinaban, kundi na bantayan sinda huli sa saro na marigsok.”—Juan 17:15.
3, 4. Anong patanid an itinao ni Jesus sa saiyang mga disipulo, asin taano ta maninigo kitang magin interesado dian?
3 Pinatanidan ni Jesus an saiyang mga parasunod manongod sa peligro nin garo man sana nakakagadan na espirituwal na pagtorog. An saiyang mga tataramon igwa nin espesyal na kahulogan para sa sato, mantang nabubuhay kita durante kan pagtatapos kan sistema nin mga bagay. Sinadol nia an saiyang mga disipulo: ‘Magpuka kamo tanganing magin mapanggana kamo sa pagdulag sa gabos na bagay na ini na nakatalagang mangyari, asin sa pagtindog sa atubangan kan Aki nin tawo.’ (Luc. 21:34-36) Pero, nakakaogma na si Jesus nanuga man na itatao kan saiyang Ama an banal na espiritu tanganing ipagirumdom sa sainda an mga bagay na saindang nanodan asin tabangan sinda na magdanay na puka saka magin makosog.—Juan 14:26.
4 Kumusta man kita ngonyan? Puede man daw kitang mag-ako kan banal na espiritung iyan tanganing tumabang sa sato? Kun iyo, ano an dapat niatong gibohon tanganing mag-ako kita kaiyan? Ano an espiritu kan kinaban, asin paano iyan naghihiro? Asin paano niato mapangganang malalabanan an espiritu kan kinaban na ini?—Basahon an 1 Corinto 2:12.
An Banal na Espiritu o an Espiritu kan Kinaban?
5, 6. Ano an puedeng gibohon sa sato kan banal na espiritu, alagad ano an dapat niatong gibohon tanganing mag-ako kaiyan?
5 An probisyon na banal na espiritu bako sanang kan enot na siglo itinao. Madali man iyan na maako ngonyan, asin an espiritu nin Dios puedeng magtao sa sato kan kosog na gibohon an tama saka magpakosog sa sato sa paglilingkod sa saiya. (Roma 12:11; Fil. 4:13) Mapapatalubo man kaiyan sa sato an mapagpadangat na mga kualidad, siring baga nin pagkamoot, kabootan, asin karahayan, na mga kabtang kan “mga bunga kan espiritu.” (Gal. 5:22, 23) Minsan siring, dai ipinipirit ni Jehova Dios an saiyang banal na espiritu sa mga habong mag-ako kaiyan.
6 Kun siring, rasonable na ihapot niato, ‘Ano an puede kong gibohon tanganing mag-ako nin banal na espiritu?’ Bueno, ipinapaheling kan Biblia na may nagkapirang bagay na puede niatong gibohon. An sarong simple asin mahalagang lakdang iyo na hagadon iyan sa Dios. (Basahon an Lucas 11:13.) An saro pang kapakipakinabang na lakdang iyo na pag-adalan asin iaplikar an hatol sa Tataramon nin Dios na ipinasabong kan espiritu. (2 Tim. 3:16) Siempre, bakong gabos na tawo na basta sana nagbabasa kan Biblia nag-aako kan espiritu nin Dios. Alagad kun pinag-aadalan nin sarong sinserong Kristiano an Tataramon nin Dios, masasabotan nia an mga saboot asin punto de vista na ipinapahayag sa ipinasabong na Tataramon na iyan. Mahalaga man na marhay na akoon niato na ninombrahan ni Jehova si Jesus bilang Saiyang representante asin na itinatao nin Dios an saiyang espiritu paagi sa sarong iyan. (Col. 2:6) Huli kaiyan, gusto niatong ioyon an satong buhay sa halimbawa asin mga katokdoan ni Jesus. (1 Ped. 2:21) Mantang orog kitang nagmamaigot na magin arog ni Cristo, orog man kitang mag-aako nin banal na espiritu.
7. Paano iniimpluwensiahan kan espiritu kan kinaban an mga tawo?
7 Sa kabaliktaran, iniimpluwensiahan kan espiritu kan kinaban an mga tawo na ipabanaag an personalidad ni Satanas. (Basahon an Efeso 2:1-3.) An espiritu kan kinaban naghihiro sa nagkapirang paagi. Siring sa maheheling sa gabos na lugar ngonyan, dinadagka kaiyan an pagrebelde sa mga pamantayan nin Dios. Pinapalakop kaiyan an “mawot kan laman asin an mawot kan mga mata asin an pagpaabaw-abaw kan kaya sa buhay.” (1 Juan 2:16) Nagigin dahelan iyan nin mga gibo kan laman, siring baga nin pakikisaro, idolatriya, espiritismo, pag-imon, mga pagputok nin kaanggotan, asin pagburat. (Gal. 5:19-21) Asin pinapalakop kaiyan an mga tataramon nin mga apostata na naglalapas sa kun ano an banal. (2 Tim. 2:14-18) Siempre, mantang an sarong tawo orog na nagpapaimpluwensia sa espiritu kan kinaban, orog man siang nagigin arog ni Satanas.
8. Anong pagpili an napapaatubang sa sato gabos?
8 Imposibleng mabuhay kita sa sarong lugar na mayo nin ano man na nakakaimpluwensia sa espirituwal. An lambang indibiduwal dapat na pumili kun ano an totogotan niang magkontrol sa saiyang buhay—an banal na espiritu o an espiritu kan kinaban. An mga dominado ngonyan kan espiritu kan kinaban puedeng makabutas sa impluwensia kaiyan asin togotan an banal na espiritu na giyahan an saindang buhay. Minsan siring, posible man na mangyari an kabaliktaran kaiyan. An mga tawong ginigiyahan kan banal na espiritu sa laog nin sarong peryodo nin panahon puedeng masiod kan espiritu kan kinaban. (Fil. 3:18, 19) Pag-olayan niato kun paano ta malalabanan an espiritu kan kinaban.
Midbidon an Patienot na Nagpapatanid na mga Tanda
9-11. Ano an nagkapirang nagpapatanid na tanda na nagpapaheling na posibleng naiimpluwensiahan na kita kan espiritu kan kinaban?
9 An mga minero nin karbon sa Britania na sinambit sa enotan naggamit nin mga canary tanganing magtao nin patienot na patanid kun baga igwa nin nakakahilong gas. Kun maheling nin sarong minero na an gamgam nahulog sa tugdonan kaiyan, aram nia na kaipuhan niang humiro nin marikas tanganing makaligtas. Sa espirituwal na paagi, ano an nagkapirang patienot na nagpapatanid na mga tanda na nagpapaheling na kita naiimpluwensiahan na kan espiritu kan kinaban?
10 Kan enot niatong manodan an mga katotoohan na yaon sa Tataramon nin Dios dangan idinusay an satong buhay ki Jehova, gustong-gusto gayod niatong binabasa an Biblia. Posibleng marhay na kita parateng namimibi nin odok sa puso. Asin kita naoogmang marhay na mag-atender sa mga pagtiripon kan kongregasyon, na minamansay an kada pagtiripon na gikanan nin espirituwal na karepreskohan, siring sa sarong oasis para sa sarong tawong paha. Iyan nakatabang sa sato na makabutas sa espiritu kan kinaban asin padagos na makalikay dian.
11 Pinagmamaigotan pa daw niatong basahon an Biblia aroaldaw? (Sal. 1:2) Dayaday daw kitang namimibi nin odok sa puso? Pinapahalagahan daw niato an mga pagtiripon kan kongregasyon, na inaatenderan an gabos na iyan kada semana? (Sal. 84:10) O nawara na daw niato an nagkapira sa marahay na mga ugaleng ini? Siempre, tibaad dakol an satong paninimbagan na nangangaipo kan satong panahon saka kosog, asin puedeng magin depisil an pagpapadanay nin marahay na espirituwal na kaugalean. Alagad kun an nagkapira sa satong marahay na mga ugale naapektaran na sa pag-agi nin panahon, posible daw na naiimpluwensiahan na kita kan espiritu kan kinaban? Magibo daw kita ngonyan nin maigot na paghihingoa na ibalik an marahay na mga ugale niato kan enot?
“Dai Noarin Man Mapagabatan”
12. Anong sadol an itinao ni Jesus sa saiyang mga disipulo, asin taano?
12 Ano pa an puede niatong gibohon tanganing malabanan an espiritu kan kinaban? Kan sadolon ni Jesus an saiyang mga disipulo na “magpuka,” pinatanidan pa sana nia sinda dapit sa nagkapirang espesipikong peligro. “Tawan nin atension an saindong sadiri,” an sabi nia, “na an saindong puso dai noarin man mapagabatan nin sobrang pagkakan asin makosog na pag-inom patin mga kahaditan sa buhay, asin bigla na sana na abotan kamo kan aldaw na iyan na siring sa sarong siod.”—Luc. 21:34, 35.
13, 14. Anong mga hapot manongod sa pagkakan asin pag-inom an angay na ihapot niato sa satong sadiri?
13 Isip-isipa an patanid na iyan. Kinondenar daw ni Jesus an pag-ogma huli sa kakanon asin inomon? Dai! Aram nia an mga tataramon ni Salomon: “Namidbid ko na mayong orog karahay para sa [mga aki nin katawohan] kisa maggayagaya asin gumibo nin marahay sa panahon kan pagkabuhay nin saro; asin siring man na an lambang tawo kumakan asin uminom nanggad patin makaheling nin karahayan para sa gabos niang kahigosan. Iyan an balaog nin Dios.” (Ecl. 3:12, 13) Pero, aram ni Jesus na an espiritu kan kinaban nagpapalakop nin kawaran nin pagpupugol sa sadiri sa mga bagay na iyan.
14 Paano niato masesegurado na dai nahihilo kan espiritu kan kinaban an satong pag-iisip mapadapit sa mga peligro nin sobrang pagkakan o makosog na pag-inom? Puede niatong hapoton an satong sadiri: ‘Ano an reaksion ko kun nababasa ko sa Biblia o sa satong mga publikasyon an hatol manongod sa pagpagutid? An tendensia ko daw mansayon na bakong mahalaga o sobra man an konsehong ini, na tibaad nananarahotan o nangangatanosan para sa sakong gawe-gawe? * Ano an sakong punto de vista sa sadol manongod sa inomon na de alkohol, sa paggamit kaiyan—kun talagang gagamiton—nin tama sana asin sa paglikay nanggad sa “pagburat”? Pinapasadit ko daw an halaga kan siring na sadol, na nagsasaboot na iyan bakong aplikado sa sako huli sa sarong dahelan? Kun an iba nagpapahayag nin pagmakolog manongod sa sakong pag-inom, ako daw nananarahotan o naaanggot? Dinadagka ko daw an iba na pasaditon an halaga kan siring na hatol kan Biblia?’ Iyo, an saboot nin sarong tawo nagpaparisa kun baga sia naiimpluwensiahan na kan espiritu kan kinaban.—Ikomparar an Roma 13:11-14.
Likayan na Maolang nin Kahaditan
15. Nagpatanid si Jesus dapit sa anong tendensia nin tawo?
15 An pagkontrol sa kahaditan kalabot sa saro pang mahalagang marhay na lakdang sa paglaban sa espiritu kan kinaban. Aram ni Jesus na bilang bakong sangkap na mga linalang, kita may tendensia na mahadit manongod sa satong pangaroaldaw na mga pangangaipo. Mamomoton niang sinabi sa saiyang mga disipulo: “Dai na kamo magparahadit.” (Mat. 6:25) Natural sana na interesado kita manongod sa mahalagang mga isyu, siring baga nin pagpaogma sa Dios, pag-asikaso sa Kristianong mga paninimbagan, asin pagtao kan mga pangangaipo kan satong pamilya. (1 Cor. 7:32-34) Kun siring, ano an manonodan niato sa patanid ni Jesus?
16. Ano an epekto kan espiritu kan kinaban sa dakol na tawo?
16 An espiritu kan kinaban, na nagtatao nin importansia sa pagpaabaw-abaw kan kaya sa buhay, nagigin dahelan na an dakol na tawo magkaigwa nin salang paghadit. Gusto kitang papaniwalaon kan kinaban na an kuarta katimbang nin seguridad asin na an kahalagahan nin sarong tawo nasosokol, bakong paagi sa saiyang espirituwal na mga kualidad, kundi paagi sa kadakolan asin kalidad kan saiyang mga rogaring. An mga nadaya kan propagandang ini mapaoripon tanganing magkamit nin kayamanan asin sinda pirmeng nagpaparaisip na magkaigwa kan pinakabago, pinakadakula, asin pinakamodernong mga produkto. (Tal. 18:11) An siring na biribid na punto de vista dapit sa materyal na mga bagay nagigin dahelan nin mga kahaditan na nakakaolang sa espirituwal na pagtalubo nin saro.—Basahon an Mateo 13:18, 22.
17. Paano niato malilikayan na maolang nin kahaditan?
17 Malilikayan niato na maolang nin kahaditan kun kukuyogon niato an pagboot ni Jesus: ‘Kun siring, padagos na hanapon nguna an kahadean asin an katanosan nin Dios.’ Inaasegurar sa sato ni Jesus na kun ginigibo niato ini, an mga bagay na talagang kaipuhan niato idadagdag sa sato. (Mat. 6:33) Paano niato ikakapaheling na nagtutubod kita sa panugang ini? An sarong paagi iyo na hanapon nguna an katanosan nin Dios—pagsunod sa mga pamantayan nin Dios sa kun ano an tama mapadapit sa pinansial na mga bagay. Halimbawa, dai niato pinapalsipikar an satong deklarasyon sa pagbuhis asin dai kita nagtataram nin dawa “sadit” na mga kaputikan dapit sa satong mga transaksion sa negosyo. Ginigibo niato an bilog niatong makakaya na otobon an satong pinansial na mga obligasyon, na an satong “Iyo mangahulogan nin Iyo” kun dapit sa pagbayad nin mga utang. (Mat. 5:37; Sal. 37:21) An siring na pagkasadiosan tibaad dai man magpayaman sa sarong tawo, alagad nagbubunga iyan nin pag-oyon nin Dios, malinig na konsensia, asin iniinaan nanggad kaiyan an kahaditan.
18. Anong marahay na halimbawa an itinao ni Jesus sa sato, asin paano kita makikinabang sa pag-arog sa saiya?
18 Kalabot sa paghanap nguna kan Kahadean an pag-aram kun ano an mas mahalaga sa satong buhay. Isip-isipa an halimbawa ni Jesus. Kun beses, sia nagsusulot nin marahay na klase nin gubing. (Juan 19:23) Ikinaogma nia an kakanon asin arak mantang kaiba an marahay na mga katood. (Mat. 11:18, 19) Alagad an mga rogaring asin aling-alingan garo rikado o mga panimpla sa saiyang buhay, bakong an kakanon mismo. An kakanon ni Jesus iyo an paggibo kan kabotan ni Jehova. (Juan 4:34-36) Nakakakontentong marhay an buhay kun inaarog niato an halimbawa ni Jesus! Igwa kita kan kagayagayahan na tabangan an mga inaapi na mag-ako nin karangahan gikan sa Kasuratan. Nakakamtan niato an pagkamoot asin suporta kan kongregasyon. Asin napapagayagaya niato an puso ni Jehova. Kun aram niato an mas mahalaga sa satong buhay, an mga rogaring asin kaorogmahan bakong mga kagurangnan niato. Imbes, iyan satong mga lingkod, o mga kasangkapan, na nakakatabang sa sato na sambahon si Jehova. Asin mantang mas aktibo kita sa gibohon na nagsusuportar sa Kahadean nin Dios, mas harayo man an posibilidad na madaog kita kan espiritu kan kinaban.
Padagos na ‘Isipon an Dapit sa Espiritu’
19-21. Paano niato padagos na ‘iisipon an dapit sa espiritu,’ asin taano ta maninigo niatong gibohon iyan?
19 An paghorophorop naeenot sa mga paghiro. An sinasabi nin dakol na tawo na pabiglabiglang mga paghiro sa parate minomotibar nin makalaman na kaisipan. Huli kaini, ipinagirumdom sa sato ni apostol Pablo an pangangaipo na ingatan an satong kaisipan. Sia nagsurat: “An mga oyon sa laman itinuturuhok an saindang isip sa mga bagay kan laman, alagad an mga oyon sa espiritu sa mga bagay kan espiritu.”—Roma 8:5.
20 Ano an puede niatong gibohon tanganing an satong kaisipan—asin sa siring an satong mga paghiro—dai madominar kan espiritu kan kinaban? Dapat kitang magbugtak nin garo saraan sa satong isip, na pinagmamaigotan na olangon an propaganda kan kinaban sagkod sa mapupuede. Halimbawa, kun nagpipili nin aling-alingan, dai niato tinotogotan an satong isip na madigtaan nin mga programa na nagpapamuraway sa imoralidad o kadahasan. Nasasabotan niato na an banal, o malinig, na espiritu nin Dios dai maerok sa maating isip. (Sal. 11:5; 2 Cor. 6:15-18) Dugang pa, dinadagka niato an espiritu nin Dios na lumaog sa satong isip paagi sa regular na pagbasa sa Biblia, pamimibi, paghorophorop, asin pag-atender sa mga pagtiripon. Asin kita naggigibo na kaibanan kan espiritung iyan mantang kita regular na nagpapartisipar sa Kristianong paghuhulit.
21 Tunay nanggad, dapat niatong labanan an espiritu kan kinaban asin an mga mawot kan laman na pinapalakop kaiyan. Alagad bawi man an pagmamaigot niatong gibohon iyan huling, arog kan sinabi ni Pablo, “an pagparaisip dapit sa laman nangangahulogan nin kagadanan, alagad an pagparaisip dapit sa espiritu nangangahulogan nin buhay asin katoninongan.”—Roma 8:6.
[Nota sa Ibaba]
^ par. 14 An pagpagutid sarong aktitud nin isip, na maheheling paagi sa mahanab o labi-labi na pagpangana. Sa siring, iyan nadedeterminaran, bakong paagi sa kadakulaan nin hawak nin saro, kundi paagi sa saiyang aktitud dapit sa kakanon. An sarong tawo tibaad bako man na mataba, o tibaad maniwang pa ngani, alagad ta sarong parapagutid. Sa ibong na lado, sa nagkapirang kamugtakan, an sobrang timbang epekto nin sarong kamatean, o an erensia puedeng kalabot sa pagigin sobrang mataba. An sarong mayor na isyu iyo na kun baga an sarong tawo, ano man an saiyang timbang, labi-labi kahanab kun mapadapit sa pagkakan.—Helingon an “Mga Hapot Hale sa mga Parabasa” sa isyu kan An Torrengbantayan na Nobyembre 1, 2004.
Nagigirumdoman daw Nindo?
• Tanganing mag-ako nin banal na espiritu, ano an maninigo niatong gibohon?
• Ano an nagkapirang paagi na tibaad maapektaran kita kan espiritu kan kinaban?
• Paano niato malalabanan an espiritu kan kinaban?
[Mga Hapot Para sa Pag-adal]
[Ritrato sa pahina 21]
Bago magduman sa pinagtatrabahohan o sa eskuelahan, mamibi na logod tawan kamo nin banal na espiritu
[Mga Ritrato sa pahina 23]
Dapat niatong papagdanayon na malinig an satong isip, marahay an satong mga gibo sa negosyo, asin tama sana an satong mga ugale