An “Nagliliwanag na mga Mata” ni Jehova Nagsisiyasat sa Gabos

‘An nagliliwanag na mga mata ni Jehova nagsisiyasat sa mga aki nin mga tawo.’​—SAL. 11:4.

1. Sa anong klase nin mga tawo kita naoogmang makiiba?

ANO an saboot nindo manongod sa mga tawo na may tunay na interes sa saindo? Nagtatao sinda nin sadiosan na opinyon kun hinahagad nindo iyan sa sainda. Kun kaipuhan nindo nin tabang, andam sindang itao iyan sa saindo. Kun kaipuhan nindo nin hatol, mamomoton nindang itinatao iyan sa saindo. (Sal. 141:5; Gal. 6:1) Bako daw na naoogma kamo na makaibanan an siring na mga tawo? Bueno, arog nanggad kaiyan si Jehova asin an saiyang Aki. Sa katunayan, an saindang interes sa saindo nakakalabi sa interes sa saindo nin siisay man na tawo, asin an saindang motibo biyong bakong maimot; gusto nindang tabangan kamo na “makapangapot nin marigon sa tunay na buhay.”​—1 Tim. 6:19; Kap. 3:19.

2. Gurano kainteresado si Jehova sa saiyang mga lingkod?

² Ipinahayag kan salmistang si David an rarom kan interes ni Jehova sa sato kan sia magsabi: ‘An mga mata ni Jehova nagmamasid, an saiya mismong nagliliwanag na mga mata nagsisiyasat sa mga aki nin mga tawo.’ (Sal. 11:4) Iyo, dai sana kita hineheling nin Dios; sinisiyasat nia kita. Si David nagsurat man: “Siniyasat mo an sakong puso, ika nagsiyasat sa banggi . . . Madidiskobre mo na dai ako nagpakana.” (Sal. 17:3) Malinaw nanggad, aram ni David an rarom kan interes ni Jehova sa saiya. Aram nia na makokolgan nia an boot ni Jehova asin mapapaanggot nia ini kun sia magpapatalubo nin makasalan na kaisipan o mapagpakanang puso. Tunay daw si Jehova para sa saindo kun paanong sia tunay para ki David?

Hineheling ni Jehova an Puso

3. Paano si Jehova nagpapaheling nin timbang na saboot dapit sa satong mga pagkabakong sangkap?

³ Si Jehova pangenot na interesado sa panlaog na pagkatawo​—kun ano talaga an nasa puso niato. (Sal. 19:14; 26:2) Huling mamomoton, dai sia nagkokonsentrar sa saradit na pagkukulang. Halimbawa, kan an agom ni Abraham na si Sara dai magtaram nin totoo sa sarong anghel na nagsulot nin pisikal na hawak, malinaw na naheling kan anghel na si Sara natakot asin nasupog, kaya magian na pagsagwe sana an itinao nia digdi. (Gen. 18:12-15) Kan ipahayag kan patriarkang si Job na an ‘saiyang sadiring kalag matanos imbes na an Dios,’ binendisyonan pa man giraray sia ni Jehova, na nakakaaram na si Job nagsakit nin grabe sa kamot ni Satanas. (Job 32:2; 42:12) Kaagid kaiyan, dai nakolgan an boot ni Jehova kan an babaeng balo sa Sarepta magtaram nin prangka ki propeta Elias. Nasabotan nin Dios na nagmomondo nin makuri an babae huli sa pagkagadan kan solong aki kaini.​—1 Ha. 17:8-24.

4, 5. Paano si Jehova nagpaheling nin pagkamaugayon sa paagi nin pagtratar nia ki Abimelec?

⁴ Huling sinisiyasat ni Jehova an puso, nagpapaheling sia nin konsiderasyon dawa sa mga daing pagtubod. Isip-isipa an pagtratar nia ki Abimelec, na hade nin Gerar na sarong siudad kan mga Filisteo. Mantang dai aram ni Abimelec na si Abraham asin Sara mag-agom, kinua nia si Sara tanganing magin sadiri niang agom. Minsan siring, bago madorogan ni Abimelec si Sara, sinabi sa saiya ni Jehova paagi sa pangatorogan: “Naaaraman ko man na sa pagkasadiosan kan saimong puso ginibo mo ini, asin ika pinupugolan ko man na magkasala tumang sa sako. Iyan an dahelan na dai taka tinogotan na duotan sia. Alagad ngonyan ibalik mo an agom kan lalaki, huli ta an lalaki sarong propeta, asin sia mangayongayo para sa saimo. Sa siring padagos kang mabuhay.”​—Gen. 20:1-7.

⁵ Daing duwa-duwa na puede kutanang maisog na trinatar ni Jehova si Abimelec, na sarong parasamba sa falsong mga dios. Alagad naheling nin Dios na an tawong iyan huminiro na may pagkasadiosan sa situwasyon na ini. Huling may pagkamaugayon na kinonsiderar ni Jehova an bagay na  ini, sinabi nia sa hadeng iyan kun paano magkakamit nin kapatawadan asin ‘padagos na mabuhay.’ Bako daw na iyan an klase nin Dios na gusto nindong sambahon?

6. Sa anong mga paagi inarog ni Jesus an saiyang Ama?

⁶ Sangkap na inarog ni Jesus an saiyang Ama, asin sia nagkonsentrar sa marahay na mga kualidad kan saiyang mga disipulo saka daing pag-alangan niang pinatawad an saindang mga sala. (Mar. 10:35-45; 14:66-72; Luc. 22:31, 32; Juan 15:15) An saboot ni Jesus kaoyon kan saiyang mga tataramon na yaon sa Juan 3:17: “An Dios nagsugo kan saiyang Aki sa kinaban, bakong tanganing sia maghokom sa kinaban, kundi tanganing ikaligtas an kinaban paagi sa saiya.” Iyo, hararom asin dai nagbabago an pagkamoot ni Jehova asin ni Jesus sa sato. Maheheling iyan sa saindang kamawotan na kita magkamit nin buhay. (Job 14:15) Ipinapaheling kan siring na pagkamoot kun taano ta sinisiyasat kita ni Jehova, kun paano nia kita minamansay, asin kun paano sia minahiro basado sa naheheling nia.​—Basahon an 1 Juan 4:8, 19.

Sinisiyasat Paagi sa mga Mata nin Pagkamoot

7. Ano an motibo ni Jehova sa pagsiyasat sa sato?

⁷ Kun siring, sala nanggad na isipon na si Jehova garo sarong pulis na nasa langit na nag-aabang tanganing dakopon kita sa akto nin pagkakasala! Si Satanas iyo an nanunuya asin nag-aakusar sa sato. (Kap. 12:10) Nagsasahot pa ngani sia na igwa daa kita nin maraot na mga motibo dawa mayo man! (Job 1:9-11; 2:4, 5) Mapadapit sa Dios, an salmista nagsurat: “Kun mga sala an saimong binabantayan, O Jah, O Jehova, siisay an makakatindog?” (Sal. 130:3) An ipinaparisang simbag dian iyo na, Mayo nanggad! (Ecl. 7:20) Imbes, maheherakon asin maboot kitang binabantayan ni Jehova siring sa sarong may pagmakolog na magurang, na gustong protehiran sa kapahamakan an saiyang namomotan na mga aki. Pirme nia kitang pinapatanidan dapit sa satong mga pagkabakong sangkap asin kaluyahan tanganing kita makalikay sa kapahamakan.​—Sal. 103:10-14; Mat. 26:41.

8. Paano tinotokdoan asin dinidisiplina ni Jehova an saiyang mga lingkod?

⁸ An pagkamoot nin Dios ipinapahayag paagi sa pagtotokdo asin disiplina na itinatao kan Kasuratan sagkod kan espirituwal na kakanon na hale sa “maimbod asin mapagmansay na oripon.” (Mat. 24:45; Heb. 12:5, 6) Si Jehova nagtatao man nin tabang paagi sa Kristianong kongregasyon asin sa “balaog na mga lalaki” kaiyan. (Efe. 4:8) Dugang pa, hineheling ni Jehova an satong reaksion sa saiyang sa amang pagpatuod, asin hinihingoa niang tabangan kita nin orog pa. Sinasabi kan Salmo 32:8: “Papangyayarihon ko na ika magkaigwa nin pakarorop asin totokdoan taka sa dalan na maninigo mong lakawan. Magtatao ako nin sadol mantang ako nakaturuhok sa saimo.” Kun siring, mahalaga nanggad na pirme kitang maghinanyog ki Jehova! Kaipuhan kitang magdanay na mapakumbaba sa atubangan nia, na minimidbid na sia an satong mamomoton na Paratokdo asin Ama.​—Basahon an Mateo 18:4.

9. Anong mga ugale an maninigo niatong likayan, asin taano?

⁹ Sa ibong na lado, nungka logod kitang mapatagas nin pagigin orgolyoso, kawaran nin pagtubod, o kan “mapandayang kapangyarihan nin kasalan.” (Heb. 3:13; Sant. 4:6) Sa parate, an mga ugaleng ini nagpopoon kun an saro nagpapatalubo nin nakakaraot na mga kaisipan o kamawotan. Tibaad ngani umabot sia sa punto na isinisikwal na nia an angay na hatol sono sa Kasuratan. Mas maraot pa dian, sia tibaad magin matagason na sa saiyang maraot na ugale o pamumuhay na huli kaiyan ginigibo nia an saiyang sadiri na kaiwal nin Dios​—sarong makatatakot  nanggad na situwasyon! (Tal. 1:22-31) Isip-isipa an halimbawa ni Cain, an panganay ni Adan asin Eva.

Naheheling ni Jehova an Gabos Asin Minahiro Sia Oyon Dian

10. Taano ta dai inoyonan ni Jehova an dolot ni Cain, asin ano an reaksion ni Cain?

¹⁰ Kan si Cain asin Abel parehong magdolot ki Jehova, Sia interesado bako sana sa saindang dolot kundi sa sainda man na motibo. Bilang resulta, ipinahayag nin Dios an saiyang pag-oyon sa dolot ni Abel, na idinolot na may pagtubod, alagad dai Nia inoyonan an dolot ni Cain, na minsan paano nagpaheling nin kawaran nin pagtubod. (Gen. 4:4, 5; Heb. 11:4) Imbes na makanood sa pangyayaring iyan asin liwaton an saiyang ugale, si Cain naanggot na gayo sa saiyang tugang.​—Gen. 4:6.

11. Paano si Cain nagpaheling nin madayang puso, asin ano an leksion kaini para sato?

¹¹ Naheling ni Jehova an peligrosong ugaleng ini, asin sia makonsiderasyon na nagtaram ki Cain, na sinasabi na kun magibo ini nin marahay, mag-aako ini nin pag-omaw. Makamomondo, binaliwala ni Cain an hatol kan saiyang Kaglalang asin ginadan nia an saiyang tugang. An maraot na puso ni Cain orog pang naheling sa daing galang na pagsimbag nia sa hapot nin Dios: “Haen si Abel na tugang mo?” Si Cain nagsimbag: “Inda. Ano ako parabantay kan sakong tugang?” (Gen. 4:7-9) Puedeng magin madaya nanggad an puso​—sagkod pa ngani sa punto nin dai paggalang sa direktang hatol nin Dios! (Jer. 17:9) Kun siring, logod na kita makanood sa siring na mga pagkasaysay asin magin listo na isikwal an salang mga kaisipan patin kamawotan. (Basahon an Santiago 1:14, 15.) Kun tinatawan kita nin hatol na sono sa Kasuratan, logod na pasalamatan asin mansayon niato iyan na ebidensia kan pagkamoot ni Jehova.

Mayo nin Hilom na Kasalan

12. Ano an reaksion ni Jehova sa maraot na gibo?

¹² May mga naghohona na kun mayo nin nakakaheling sa sainda sa paggibo nin sala, makakalibre sinda sa padusa. (Sal. 19:12) Sa sarong paagi, mayo nin masasabi na hilom na kasalan. “An gabos na bagay huba asin hayag na marhay sa mga mata kan satong papaninimbagan.” (Heb. 4:13) Si Jehova sarong Hokom na nagsisiyasat kan satong kairairaroming mga motibo, asin an saiyang reaksion sa maraot na gibo nagpapabanaag nin sangkap na hustisya. Sia “Dios na maheherakon asin maugayon, maluway sa pagkaanggot asin abunda sa mamomoton na kabootan asin katotoohan.” Pero, sa mga habong magsolsol, sia “mayo nanggad [nin] papalibrehon sa padusa” kun an mga tawo ‘tuyong naggigibo nin kasalan’ o nagpapaheling nin tuso asin mapagpakana na ugale. (Ex. 34:6, 7; Heb. 10:26) An katotoohan na ini maheheling sa pagtratar ni Jehova ki Acan asin ki Ananias patin Safira.

13. Paano an salang kaisipan nagin dahelan kan maraot na paggawe ni Acan?

¹³ Direktang binalga ni Acan an pagboot nin Dios paagi sa pagkua nia nin sinamsaman sa siudad nin Jerico asin pagtago kaiyan sa saiyang tolda, na posibleng marhay na may pakipagkasapakat kan saiyang pamilya. Kan mahayag an kasalan ni Acan, ipinaheling nia na nasabotan nia an pagigin seryoso kan saiyang ginibo, huling sia nagsabi: “Ako nagkasala ki Jehova.” (Jos. 7:20) Arog ni Cain, si Acan nagpatalubo nin maraot na puso. Sa nangyari ki Acan, may mayor na kabtang an kahanaban, asin nagin dahelan iyan na sia magin madaya. Mantang ki Jehova an mga sinamsam sa Jerico, si Acan talagang naghabon sa Dios, asin ini an nagin dahelan kan kagadanan nia asin kan saiyang pamilya.​—Jos. 7:25.

14, 15. Taano ta si Ananias asin Safira maninigo sa dai pag-oyon nin Dios, asin ano an leksion kaini para sa sato?

¹⁴ Si Ananias asin an saiyang agom, si Safira, mga miembro kan enot na Kristianong kongregasyon sa Jerusalem. Kasunod kan Pentecostes nin 33 C.E., inareglo na magkaigwa nin pondo para sa pag-asikaso sa pisikal na mga pangangaipo kan  bagong mga nagturubod na yaon pa sa Jerusalem asin hale sa hararayong kadagaan. Napapagdanay an pondong iyan paagi sa boluntad na mga kontribusyon. Si Ananias nagpabakal nin daga asin idinonar nia sa pondong iyan an sarong kabtang kan kabaklan. Minsan siring, nagsagin sia na idinonar nia an bilog na kabaklan kan daga, asin lubos na aram ini kan saiyang agom. Mayong duda, an mag-agom na ini gustong magkamit nin espesyal na onra sa kongregasyon. Alagad madaya an saindang gibo. Sa milagrosong paagi, an pandadayang iyan ihinayag ni Jehova ki apostol Pedro, na iyo an nakipag-olay ki Ananias dapit sa sala kaini. Pagkatapos tolos kaiyan, si Ananias natumba asin nagadan. Dai nahaloy pagkatapos kaiyan, si Safira nagadan man.​—Gibo 5:1-11.

¹⁵ Si Ananias asin Safira bakong biktima nin biglaan sanang kaluyahan. Sinda nagpakana asin nagputik paagi sa pagprobar na dayaon an mga apostol. Mas maraot pa, sinda ‘nagputik sa banal na espiritu asin sa Dios.’ Malinaw nanggad na ipinapaheling kan paghiro ni Jehova na andam niang protehiran an kongregasyon tumang sa mga parasaginsagin. Totoo nanggad, “makangingirhat na bagay an mahulog sa mga kamot kan nabubuhay na Dios”!​—Heb. 10:31.

Papagdanayon an Integridad sa Gabos na Panahon

16. (a) Paano si Satanas nagmamaigot na gibohon na maraot an banwaan nin Dios? (b) Anong mga paagi an ginagamit kan Diablo tanganing gibohon na maraot an mga tawo sa saimong lugar?

¹⁶ Ginigibo ni Satanas an saiyang pinakamakakaya tanganing gibohon kitang maraot asin mawara niato an pag-oyon ni Jehova. (Kap. 12:12, 17) An maraot na mga intension kan Diablo malinaw nanggad na maheheling sa kinaban na ini, na bangkag sa imoral na sekso asin kadahasan. An pornograpiya madali na sanang makua ngonyan paagi sa mga komputer o iba pang elektronikong kagamitan. Nungka logod kitang magpadaog sa mga pagsalakay ni Satanas. Imbes, logod na an satong saboot magin arog kan ki salmistang David, na nagsurat: “Ako magawe na may pakamansay sa paaging daing sala. . . . Malakaw ako sa integridad kan sakong puso sa laog kan sakong harong.”​—Sal. 101:2.

17. (a) Taano ta pag-abot nin panahon ihinahayag ni Jehova an natatagong mga kasalan? (b) Ano an maninigong magin determinasyon niato?

¹⁷ Ngonyan, dai milagrosong ihinahayag ni Jehova an magabat na kasalan asin madayang gawe-gawe siring kan ginigibo nia kun beses kan nakaagi. Pero, naheheling nia an gabos asin ihinahayag nia an natatagong mga bagay sa saiya mismong itinalaan na panahon asin paagi. Si Pablo nagsabi: “An mga kasalan nin nagkapira nahahayag sa dakol, na nagdadara tolos nin silot, alagad kun dapit sa iba an saindang mga kasalan nahahayag man sa huri.” (1 Tim. 5:24) An pangenot na motibo ni Jehova sa paghayag nia kan maraot na mga gibo iyo an pagkamoot. Namomotan nia an kongregasyon asin gusto niang protehiran an kadalisayan kaiyan. Dugang pa, nagpapaheling sia nin pagkaherak sa mga tawong nagkasala alagad tunay nang nagsosolsol ngonyan. (Tal. 28:13) Kaya magmaigot kita na papagdanayon an bilog na  puso para sa Dios asin isikwal an gabos na nakakaraot na impluwensia.

Papagdanayon an Bilog na Puso

18. Ano an gusto ni Hadeng David na magin saboot kan saiyang aki dapit sa Dios?

¹⁸ Sa saiyang aking si Salomon, si Hadeng David nagsabi: “Midbida an Dios kan saimong ama asin maglingkod ka sa saiya na may bilog na puso asin may nakakaogmang marhay na kalag; huli ta an gabos na puso sinisiyasat ni Jehova, asin an gabos na tendensia kan mga kaisipan saiyang namamansayan.” (1 Cron. 28:9) Gusto ni David na orog pa kisa sa paniniwala sana sa Dios an ipaheling kan saiyang aki. Gusto niang pahalagahan ni Salomon an rarom kan interes ni Jehova sa Saiyang mga lingkod. Pinapahalagahan daw nindo si Jehova sa siring kaiyan na paagi?

19, 20. Segun sa Salmo 19:7-11, ano an nakatabang ki David na dumayupot sa Dios, asin paano niato maaarog si David?

¹⁹ Aram ni Jehova na madadagka na rumani sa saiya an mga tawo na may tamang tendensia, asin na an kaaraman dapit sa saiyang magayon na mga kualidad mapaogma sa saindang puso. Huli kaini, gusto ni Jehova na mamidbid niato sia asin maaraman niato an saiyang marahayon na personalidad. Paano niato gigibohon iyan? Paagi sa pag-adal kan saiyang Tataramon asin pakaeksperyensia kan mga bendisyon nia sa satong buhay.​—Tal. 10:22; Juan 14:9.

²⁰ Mapag-apresyar asin mapagngayongayo daw nindong binabasa an Tataramon nin Dios aroaldaw? Naheheling daw nindo an kahalagahan kan pamumuhay sono sa mga prinsipyo sa Biblia? (Basahon an Salmo 19:7-11.) Kun iyo, padagos na matalubo an saindong pagtubod ki Jehova asin an pagkamoot nindo sa saiya. Asin sia man orog pang madayupot sa saindo, na garo baga naglalakaw na kinakapotan an saindong kamot. (Isa. 42:6; Sant. 4:8) Iyo, papatunayan ni Jehova an saiyang pagkamoot sa saindo paagi sa pagbendisyon asin pagprotehir sa saindo sa espirituwal mantang naglalakaw kamo sa piot na dalan pasiring sa buhay.​—Sal. 91:1, 2; Mat. 7:13, 14.

Ano an Isisimbag Nindo?

• Taano ta sinisiyasat kita ni Jehova?

• Ano an dahelan na an nagkapira nagin kaiwal nin Dios?

• Paano niato ikakapaheling na si Jehova tunay para sa sato?

• Paano kita makakapagpadanay nin bilog na puso sa Dios?

[Mga Hapot Para sa Pag-adal]

[Ritrato sa pahina 4]

Paano kita binabantayan ni Jehova siring sa sarong may pagmakolog na ama?

[Ritrato sa pahina 5]

Anong leksion an manonodan niato sa halimbawa ni Ananias?

[Ritrato sa pahina 6]

Ano an makakatabang sa sato na padagos na maglingkod ki Jehova na may bilog na puso?