Nangengenot daw Kamo sa Pagtao nin Onra?

“Sa pagtao nin onra sa lambang saro mangenot kamo.”​—ROMA 12:10.

1. Ano an bako nang kaugalean sa dakol na parte kan kinaban?

SA NAGKAPIRANG parte kan kinaban, kaugalean nin mga aki na magtao nin onra sa mga adulto, sa kadaklan na kamugtakan, paagi sa magalang na pagluhod kun sinda kaiba kan mga ini. Sa siring, bako sindang mas halangkaw na helingon kisa sa mga matua sa sainda. Sa mga komunidad na ini, ibinibilang man na mayong paggalang an aki kun sia minatalikod sa sarong adulto. Minsan ngani an paggalang ipinapaheling sa laen-laen na paagi sa manlaenlaen na kultura, an siring na pagpaheling nin paggalang nagpapagirumdom sa sato kan Ley ni Moises. Kaiba digdi an pagboot na: “Maninigo na tumindog ka [bilang paggalang] sa atubangan nin may uban, asin dapat na magtao ka nin konsiderasyon sa pagkatawo nin gurang.” (Lev. 19:32) Makamomondo, sa dakol na lugar bako nang kaugalean an pagtao nin onra sa iba. Sa katunayan, maheheling ngonyan sa gabos na lugar an kawaran nin paggalang.

2. Sairisay an sinasabi kan Tataramon nin Dios na tawan niato nin onra?

² An Tataramon nin Dios nagtatao nin halangkaw na pagpahalaga sa pagtao nin onra. Sinasabi kaiyan sa sato na tawan nin onra si Jehova asin si Jesus. (Juan 5:23) Pinagbobotan man kita na magtao nin onra sa mga kapamilya asin kapagtubod saka sa nagkapira na nasa luwas kan kongregasyon. (Roma 12:10; Efe. 6:1, 2; 1 Ped. 2:17) Ano an nagkapirang paagi na kita nagtatao nin onra ki Jehova? Paano kita nagtatao nin onra, o hararom na paggalang, sa satong Kristianong mga tugang? Pag-olayan niato an mga ini asin an nagkapirang konektadong hapot.

Tawan nin Onra si Jehova Asin an Saiyang Ngaran

3. Ano an sarong mahalagang paagi nin pagtao nin onra ki Jehova?

³ An sarong mahalagang paagi nin pagtao nin onra ki Jehova iyo an pagpaheling nin tamang paggalang sa saiyang ngaran. Total, kita “sarong banwaan para sa saiyang ngaran.” (Gibo 15:14) Talagang sarong onra an pagdara kan ngaran kan makakamhan sa gabos na Dios, si Jehova. Si propeta Miqueas nagsabi: “An gabos na banwaan, kun para sa sainda, maglalakaw an lambang saro sa ngaran kan saiyang dios; alagad, kun para sa sato, kita maglalakaw sa ngaran ni Jehova na satong Dios sagkod sa panahon na daing talaan, sagkod lamang pa ngani.” (Miq. 4:5) Kita ‘naglalakaw sa ngaran ni Jehova’ paagi sa pagmamaigot na mamuhay aroaldaw sa paagi na nagtatao nin marahay na impresyon sa ngaran na dinadara niato. Siring kan ipinagirumdom ni Pablo sa mga Kristiano sa Roma, kun kita dai namumuhay kaoyon kan maogmang bareta na ihinuhulit niato, an ngaran nin Dios ‘nalalanghadan’ o natatawan nin maraot na dangog.​—Roma 2:21-24.

4. Paano nindo minamansay an pribilehio na magpatotoo manongod ki Jehova?

⁴ Tinatawan man niato nin onra si Jehova paagi sa satong paghuhulit. Kan nakaagi, an mga miembro kan nasyon nin Israel inimbitaran ni Jehova na magin saiyang mga saksi, alagad dai ninda inotob an katongdan na iyan. (Isa. 43:1-12) Sa parate, sinda nagrerebelde ki Jehova asin ‘pinapakolog ninda an boot pati kan Banal kan Israel.’ (Sal. 78:40, 41) Sa kahurihurihi, lubos na nawara kan nasyon na iyan an pag-oyon ni Jehova. Pero, nagpapasalamat kita ngonyan huli sa pribilehio na magpatotoo manongod ki Jehova asin magpamidbid kan saiyang ngaran. Ginigibo niato iyan huling kita namomoot sa saiya asin nagmamawot na pakangbanalon an saiyang ngaran. Paano niato mahihimong dai maghulit mantang aram niato an katotoohan manongod sa satong langitnon na Ama asin an saiyang mga katuyohan? An saboot niato kapareho kan saboot ni apostol Pablo kan sia magsabi: “Iyan kaipuhan na gibohon ko. Sa katotoohan, herak man sa sako kun dai ako magpahayag kan maogmang bareta!”​—1 Cor. 9:16.

5. Paano an pagkaigwa nin pagtubod ki Jehova konektado sa pagkaigwa nin paggalang sa saiya?

 ⁵ An salmistang si David nagsabi: “An mga nakakamidbid sa saimong ngaran magtitiwala sa saimo, ta dai mo nanggad babayaan an mga naghahanap sa saimo, O Jehova.” (Sal. 9:10) Kun talagang midbid niato si Jehova asin iginagalang niato kun ano an irinerepresentar kan saiyang ngaran, magtitiwala kita sa saiya siring kan ginibo kan maimbod na mga lingkod nia kan suanoy. An pagkaigwa kan tiwala asin pagtubod na ini ki Jehova saro pang paagi nin pagtao nin onra sa saiya. Mangnohon kun paano ipinapaheling kan Tataramon nin Dios an koneksion kan pagtitiwala ki Jehova asin kan paggalang sa saiya. Kan an suanoy na Israel dai magtiwala sa Saiya, naghapot si Jehova ki Moises: “Sagkod noarin ako papahelingan nin dai paggalang kan banwaan na ini, asin sagkod noarin sinda dai matubod sa sako sa gabos na tanda na ginibo ko sa tahaw ninda?” (Bil. 14:11) Totoo man an kabaliktaran kaiyan. Kun nagtitiwala kita ki Jehova na poprotehiran asin tatabangan nia kita dawa durante nin mga pagbalo, ipinapaheling niato na iginagalang niato sia.

6. Ano an nagmomotibar sa sato na magpaheling nin hararom na paggalang ki Jehova?

⁶ Sinabi ni Jesus na an paggalang ki Jehova dapat na gikan sa puso. Kan nakikipag-olay sa mga bakong sinsero an pagsamba, kinotar ni Jesus an sinabi ni Jehova: “An banwaan na ini nagtataong onra sa sako paagi sa saindang mga ngabil, pero an saindang puso harayoon sa sako.” (Mat. 15:8) An sinserong paggalang ki Jehova naggigikan sa odok sa pusong pagkamoot sa saiya. (1 Juan 5:3) Asin isinasaisip man niato an panuga ni Jehova: “An mga nagtataong onra sa sako tatawan ko nin onra.”​—1 Sam. 2:30.

An mga Nangengenot Nagpapaheling nin Paggalang sa Iba

7. (a) Taano ta an mga tugang na lalaki na igwa nin mga katongdan na may paninimbagan maninigong magtao nin onra sa mga pinangangatamanan ninda? (b) Paano nagpaheling si Pablo nin paggalang sa mga kapagtubod?

⁷ Sinadol ni apostol Pablo an mga kapagtubod: “Sa pagtao nin onra sa lambang saro mangenot kamo.” (Roma 12:10) An mga tugang na lalaki na igwa nin mga katongdan na may paninimbagan sa kongregasyon maninigong magpaheling nin halimbawa​—“mangenot”—​sa pagtao nin onra sa mga pinangangatamanan ninda. Mapadapit dian, an mga may magabat na paninimbagan marahay na sumunod sa halimbawa na itinao ni Pablo. (Basahon an 1 Tesalonica 2:7, 8.) Aram kan mga tugang sa mga kongregasyon na sinongko ni Pablo na nungka niang hahagadon sa sainda na gibohon an mga bagay na sia mismo habong gumibo kaiyan. Nagpaheling si Pablo nin paggalang sa mga kapagtubod, asin huli kaiyan sia iginalang ninda. Kan si Pablo magsabi: “Kun siring, nakikimaherak ako sa saindo, magin kamong mga paraarog sa sako,” makakasierto kita na dakol an nagin andam na maghimate huli sa marahay na halimbawa nia.​—1 Cor. 4:16.

8. (a) Ano an sarong mahalagang paagi na dian nagpaheling si Jesus nin paggalang sa saiyang mga disipulo? (b) Paano maaarog nin mga paraataman ngonyan an halimbawa ni Jesus?

⁸ An saro pang paagi na dian an sarong responsableng tugang na lalaki nagpapaheling nin paggalang sa mga pinangangatamanan nia iyo an pagtao sa sainda nin mga dahelan kan mga kahagadan nia o kan mga instruksion na itinatao nia. Paagi sa paggibo kaiyan, inaarog nia si Jesus. Halimbawa, kan sinasabihan an saiyang mga disipulo na mamibi na logod dakol pang paraani an isobol sa anihon, sinabi ni Jesus sa sainda an dahelan kaiyan. Sia nagsabi: “An anihon mahiwas, alagad an mga paraani kakadikit. Kun siring, makimaherak kamo sa Kagurangnan kan anihon na magsobol nin mga paraani sa saiyang anihon.” (Mat. 9:37, 38) Kaagid kaiyan, kan sabihon nia sa saiyang mga disipulo na “magdanay kamong mapagbantay,” nagtao sia sa sainda nin dahelan. Sia nagsabi: “Huli ta dai nindo aram kun sa anong aldaw madatong an saindong Kagurangnan.” (Mat. 24:42) Paorootrong sinabi ni Jesus sa saiyang mga disipulo bako sanang kun ano an maninigo nindang gibohon kundi patin kun taano ta maninigo nindang gibohon iyan. Sa paaging iyan, sia nagpaheling nin paggalang asin nagtao nin dignidad sa sainda. Marahayon nanggad iyan na halimbawa na dapat arogon nin Kristianong mga paraataman!

Igalang an Kongregasyon ni Jehova Asin an Pagdirehir Kaiyan

9. Siisay pa an tinatawan niato nin onra kun nagpapaheling kita nin paggalang sa pambilog na kinaban na Kristianong kongregasyon asin sa mga representante kaiyan? Ipaliwanag.

⁹ Tanganing matawan nin onra si Jehova, kaipuhan man niatong tawan nin onra an pambilog na kinaban na Kristianong kongregasyon, kaiba an mga representante kaiyan. Kun hinihimate ta an sono sa  Kasuratan na hatol kan grupong maimbod na oripon, nagpapaheling kita nin paggalang sa areglo ni Jehova. Sa Kristianong kongregasyon kan enot na siglo, naheling ni apostol Juan an pangangaipo na sagweon an mga nagpaheling nin kadaihan nin paggalang sa mga ninombrahan. (Basahon an 3 Juan 9-11.) Ipinapaheling kan mga tataramon ni Juan na bako sanang indibiduwal na mga paraataman an dai iginalang kundi patin an saindang pagtotokdo asin pagdirehir. Marahay sana ta an kadaklan na Kristiano bakong arog kaiyan. Kan buhay pa an mga apostol, an kasararoan nin magturugang sa kabilogan malinaw na nagpaheling nin paggalang sa mga nangengenot.​—Fil. 2:12.

10, 11. Ipaliwanag basado sa Kasuratan kun taano ta tama na may nagkapira na tinawan nin autoridad sa Kristianong kongregasyon.

¹⁰ Nangangatanosan an nagkapira na mantang sinabihan ni Jesus an saiyang mga disipulo na “kamo gabos magturugang,” dai maninigong magkaigwa nin mga katongdan na may autoridad sa Kristianong kongregasyon. (Mat. 23:8) Minsan siring, an Hebreo sagkod Griegong Kasuratan igwa nin dakol na halimbawa nin mga lalaki na tinawan nin Dios nin autoridad. An kasaysayan kan mga patriarka, hokom, asin hade sa suanoy na mga Hebreo nagtatao nin igong prueba na si Jehova nagtatao nin pagdirehir paagi sa representanteng mga tawo. Kan an mga tawo dai magtao nin tamang onra sa nombradong mga indibiduwal, dinisiplina sinda ni Jehova.​—2 Ha. 1:2-17; 2:19, 23, 24.

¹¹ Sa kaagid na paagi, minidbid nin mga Kristiano kan enot na siglo an autoridad kan mga apostol. (Gibo 2:42) Halimbawa, si Pablo nagtao nin pagdirehir sa saiyang mga tugang. (1 Cor. 16:1; 1 Tes. 4:2) Minsan siring, sia man gikan sa boot na nagpasakop sa mga may autoridad sa saiya. (Gibo 15:22; Gal. 2:9, 10) Tunay nanggad, si Pablo igwa nin tamang pagmansay dapit sa autoridad sa Kristianong kongregasyon.

12. Anong duwang aspekto kan leksion mapadapit sa autoridad an manonodan niato sa mga halimbawa sa Biblia?

¹² May duwang aspekto an leksion na manonodan niato digdi. Enot, sono sa Kasuratan na an “maimbod asin mapagmansay na oripon,” paagi sa Namamahalang Grupo kaiyan, magnombra nin mga lalaki para sa mga katongdan na may paninimbagan, asin ninonombrahan an nagkapirang lalaki tanganing magkaigwa an mga ini nin autoridad sa iba pang ninombrahan na lalaki. (Mat. 24:45-47; 1 Ped. 5:1-3) Ikaduwa, gabos kita, kaiba an ninombrahan na mga lalaki, maninigong magtao nin onra sa mga may autoridad sa sato. Kun siring, ano an nagkapirang praktikal na paagi na makakatao kita nin onra sa mga may katongdan nin pangangataman sa pambilog na kinaban na Kristianong kongregasyon?

Pagpaheling nin Paggalang sa Nagbibiaheng mga Paraataman

13. Paano kita makakapaheling nin paggalang sa mga representante kan Kristianong kongregasyon sa presenteng panahon?

¹³ Si Pablo nagsabi: “Kami nakikimaherak sa saindo, mga tugang, na magkaigwa kamo nin paggalang sa mga nagpapagal dian sa saindo asin namamayo sa saindo sa Kagurangnan asin naghahatol sa saindo; asin may pagkamoot na tawan nindo sinda nin orog kisa sa ekstraordinaryong konsiderasyon dahel sa saindang gibohon. Magin mapagpatoninong sa lambang saro.” (1 Tes. 5:12, 13) An nagbibiaheng mga paraataman kabilang nanggad sa “mga nagpapagal.” Kun siring, tawan niato sinda nin “orog kisa sa ekstraordinaryong konsiderasyon.” An sarong paagi na magigibo iyan iyo an bilog na pusong paghimate sa saindang hatol asin pagparigon sa boot. Kun an siring na paraataman nagpapaabot sa sato nin pagdirehir hale sa grupong maimbod na oripon, an  “kadonongan hale sa itaas” mapahiro sa sato na magin “andam na magkuyog.”​—Sant. 3:17.

14. Paano an kongregasyon nagtatao nin prueba nin odok sa pusong paggalang sa nagbibiaheng mga paraataman, asin ano an resulta?

¹⁴ Pero, paano kun dinidirehiran kita na gibohon an mga bagay sa paagi na iba man sa kinatodan niato? Kun beses, tanganing ikapaheling an paggalang, tibaad kaipuhan na likayan niato an tendensia na kumontra paagi sa pag-isip nin arog baga kan, “Dai niamo ginigibo an arog kaiyan digdi” o, “Tibaad epektibo iyan sa ibang lugar alagad sa kongregasyon niamo dai iyan puede.” Imbes, pinagmamaigotan niato na sumunod sa pagdirehir. An makakatabang sa sato na sumunod dian iyo an pirmeng pagsaisip na an kongregasyon sadiri ni Jehova asin na si Jesus an Payo kaiyan. Kun an pagdirehir kan nagbibiaheng paraataman inaako na may kagayagayahan asin sinusunod kan kongregasyon, iyan prueba nin odok sa pusong paggalang. Tinawan ni Pablo nin komendasyon an mga tugang sa Corinto huli sa magalang nindang pagkuyog sa pagdirehir na itinao kan nagsosongkong magurang sa kongregasyon, si Tito. (2 Cor. 7:13-16) Ngonyan, makakasierto man kita na an pagigin andam niato na iaplikar an paggiya na inaako hale sa nagbibiaheng mga paraataman nakakakontribwir nin dakula sa kagayagayahan na naeeksperyensiahan niato sa satong paghuhulit.​—Basahon an 2 Corinto 13:11.

“Tawan nin Onra an Gabos na Klase nin Tawo”

15. Ano an nagkapirang paagi na nagpapaheling kita nin paggalang sa mga kapagtubod?

¹⁵ Si Pablo nagsurat: “Dai mo pagtatsaran nin labi-labi an sarong gurang na lalaki. Kundi pakiolayan mo sia siring sa ama, an hoben na mga lalaki siring sa mga tugang na lalaki, an gurang na mga babae siring sa mga ina, an hoben na mga babae siring sa mga tugang na babae sa bilog na kabinian. Tawan mo nin onra an mga babaeng balo na balo man nanggad.” (1 Tim. 5:1-3) Iyo, sinasadol kita kan Tataramon nin Dios na tawan nin onra an gabos na nasa Kristianong kongregasyon. Pero, paano kun ika asin an sarong tugang sa kongregasyon igwa nin personal na dai pagkaintindihan? Iyan daw makakaolang sa saimo na gibohon an saimong obligasyon na igalang an kapwa mo Kristiano? O puede mo daw na bagohon an saimong saboot paagi sa pagmidbid sa marahay na mga kualidad kan lingkod na iyan nin Dios? Nangorognang maninigo na papagdanayon kan mga may autoridad an magalang na pagmansay sa saindang mga tugang​—na nungkang “nagpapakangkagurangnan . . . sa aripompon.” (1 Ped. 5:3) Sa katunayan, sa Kristianong kongregasyon, na midbid huli sa odok sa pusong pagkamoot na ipinapaheling kan mga miembro kaiyan, igwa kita nin dakol na oportunidad na magtao nin onra sa lambang saro.​—Basahon an Juan 13:34, 35.

16, 17. (a) Taano ta mahalaga na magpaheling nin paggalang bako sanang sa mga hinuhulitan niato kundi patin sa mga nagtutumang? (b) Paano niato ‘tinatawan nin onra an gabos na klase nin tawo’?

 ¹⁶ Siempre, nagpapaheling kita nin paggalang bako sanang sa mga kabtang kan Kristianong kongregasyon. Si Pablo nagsurat sa mga Kristiano kan panahon nia: “Mantang igwa kita nin marahayrahay na panahon para dian, gumibo kita kan marahay sa gabos.” (Gal. 6:10) Totoo, puedeng magin masakit an pag-aplikar kan prinsipyong iyan kun bakong maboot an pagtratar sa sato nin sarong katrabaho o kaklase. Sa siring kaiyan na kamugtakan, kaipuhan niatong girumdomon an mga tataramon na: “Dai ka mag-init dahel sa mga paragibo nin maraot.” (Sal. 37:1) An pag-aplikar kan siring na hatol makakatabang sa sato na magin magalang dawa sa mga nagtutumang. Siring man, mantang nakikikabtang kita sa pampublikong ministeryo, an mapakumbabang pagmansay niato sa satong sadiri makakatabang sa sato na simbagon na may “mahoyong boot asin hararom na paggalang” an gabos na tawo. (1 Ped. 3:15) Dawa an satong itsura asin gubing puedeng magparisa na iginagalang niato an satong mga hinuhulitan.

¹⁷ Iyo, baga man kita nakikiiba sa mga kapagtubod niato o sa mga nasa luwas kan kongregasyon, boot niatong pagmaigotan na iaplikar an konseho na: “Tawan nin onra an gabos na klase nin tawo, mamoot kamo sa bilog na kasararoan nin mga tugang, matakot kamo sa Dios, tawan nin onra an hade.”​—1 Ped. 2:17.

Ano an Isisimbag Nindo?

Paano kamo makakapaheling nin tamang paggalang:

• Ki Jehova?

• Sa kamagurangan sa kongregasyon asin nagbibiaheng mga paraataman?

• Sa kada miembro kan kongregasyon?

• Sa mga hinuhulitan nindo?

[Mga Hapot Para sa Pag-adal]

[Ritrato sa pahina 23]

Iginalang nin mga Kristiano kan enot na siglo an pangangataman kan namamahalang grupo

[Ritrato sa pahina 24]

An kamagurangan sa gabos na nasyon nagtataong onra sa nagbibiaheng mga paraataman, na ninombrahan kan Namamahalang Grupo