Tabangan Sindang Magbalik Tolos-Tolos!

“Siisay pa an samong dudumanan? Yaon sa saimo an mga tataramon nin buhay na daing katapusan.”​—JUAN 6:68.

1. Ano an sinabi ni Pedro kan si Jesus bayaan nin dakol na disipulo?

SARONG beses, si Jesu-Cristo binayaan nin dakol na disipulo na naghabo sa saro sa saiyang mga katokdoan. “Kamo, gusto man nindong maghale?” an ihinapot nia sa saiyang mga apostol. Si Pedro nagsimbag: “Kagurangnan, siisay pa an samong dudumanan? Yaon sa saimo an mga tataramon nin buhay na daing katapusan.” (Juan 6:51-69) Mayo na nin iba pang madudumanan. Kan panahon na idto, an Judaismo mayo kan “mga tataramon nin buhay na daing katapusan,” asin an siring na mga tataramon siertong mayo ngonyan sa Dakulang Babilonya, an pambilog na kinaban na imperyo nin falsong relihion. Para sa siisay man na napapasuway sa aripompon nin Dios alagad gustong paogmahon si Jehova, “oras na tanganing magmata” asin magbalik sa aripompon.​—Roma 13:11, King James Version.

2. Ano an maninigong girumdomon mapadapit sa kompidensial o hudisyal na mga bagay?

² Nagpaheling si Jehova nin pagmakolog sa nalagalag na mga karnero nin Israel. (Basahon an Ezequiel 34:15, 16.) Kaagid kaiyan, an Kristianong kamagurangan igwa nin pagmawot asin obligasyon na tabangan an sarong arog-karnero na napapasuway sa aripompon. Kun mag-asignar sinda nin sarong parahayag tanganing adalan sa Biblia an sarong inaktibo na nagmamawot nin tabang, ano an maninigong gibohon kun maaraman kan nagkokondukta sa pag-adal na may nagibong magabat na kasalan an inaktibong ini? Imbes na magtao nin hatol manongod sa ano man na hudisyal o kompidensial na bagay, maninigong isuherir kan parahayag na iyan na makipag-olay sa kamagurangan an inaktibo. Kun dai nia gibohon iyan, an parahayag mismo an maninigong mag-impormar sa kamagurangan.​—Lev. 5:1; Gal. 6:1.

3. Ano an nagin reaksion kan tawong may 100 na karnero kan manompongan nia an saro na nalagalag?

³ Sa naenot na artikulo, sinambit an ilustrasyon ni Jesus manongod sa sarong tawo na igwa nin 100 na  karnero. Kan an saro mapasuway sa aripompon, binayaan nia an 99 asin hinanap nia an nalagalag na karnero. Naggayagaya nanggad an tawong iyan kan manompongan nia an karnero! (Luc. 15:4-7) Igwa man kita nin kaparehong kagayagayahan kun nagbabalik an saro sa mga karnero nin Dios na napapasuway sa aripompon. Huling an kamagurangan asin iba pang miembro kan kongregasyon motibado nin pagkamoot, posibleng dinadalaw ninda an inaktibong iyan. Gusto man nindang maheling an tawong iyan na magbalik sa aripompon asin mag-ako kan suporta, proteksion, saka bendisyon nin Dios. (Deut. 33:27; Sal. 91:14; Tal. 10:22) Kun igwa sinda nin oportunidad na tumabang sa bagay na ini, ano an puede nindang gibohon?

4. Ano an puede niatong masabotan sa Galacia 6:2, 5?

⁴ Tibaad puede nindang dagkahon an saro na magbalik sa kongregasyon paagi sa maboot na pagpaheling sa saiya na namomotan ni Jehova an Saiyang mga karnero asin an hinahagad Nia sana iyo an kaya niatong gibohon. Kaiba digdi an pag-adal sa Kasuratan, pag-atender sa Kristianong mga pagtiripon, asin paghuhulit kan maogmang bareta kan Kahadean. Tibaad angay na basahon an Galacia 6:2, 5 asin sambiton na an mga Kristiano puedeng tumabang na pasanon an pagabat sa lambang saro, alagad “an lambang saro magpapasan kan saiyang sadiring pasan” na espirituwal na paninimbagan. Mayo nin siisay man na puedeng magmaimbod sa Dios para sa sato.

Nakakaapektar daw sa Sainda an “mga Kahaditan sa Buhay”?

5, 6. (a) Taano ta mahalaga na kita maingat na maghinanyog sa mga saboot na ipinapahayag nin inaktibong mga kapagtubod? (b) Paano nindo puedeng tabangan an mga inaktibo na maheling na nakakadanyar sa sainda an dai pakikiasosyar sa banwaan nin Dios?

⁵ Tanganing maaraman kun paano tatabangan an inaktibong mga kapagtubod, an kamagurangan asin iba pang maygurang na parahayag kaipuhan na maingat na maghinanyog mientras na ipinapahayag nin siring na mga indibiduwal an saindang mga saboot. Ipamugtak na, bilang sarong magurang sa kongregasyon, nagsosongko ka sa sarong mag-agom na dai na nag-aatender sa mga pagtiripon huling nakakaapektar sa sainda an “mga kahaditan sa buhay.” (Luc. 21:34) An mga problema sa pinansial o nadugangan na mga paninimbagan sa pamilya tibaad nagin dahelan na sinda luway-luway na nagin inaktibo sa espirituwal. Tibaad namamatean ninda na kaipuhan nindang makaginhawa, alagad puede mong sabihon na bakong solusyon an pagsuway kan sadiri. (Basahon an Talinhaga 18:1.) Puede mo sindang hapoton sa mataktikang paagi: “Mas maogma ka daw poon kan dai ka na nag-aatender sa mga pagtiripon? Nagrahay daw an saimong buhay pampamilya? Igwa ka pa daw nin kagayagayahan sa pagtitiwala ki Jehova?”​—Neh. 8:10.

⁶ An paghorophorop sa siring na mga hapot tibaad makatabang sa mga inaktibo na maheling na an dai ninda pakikiasosyar sa kongregasyon nagin dahelan na magluya an saindang espirituwalidad asin mainaan an saindang kaogmahan. (Mat. 5:3; Heb. 10:24, 25) Tibaad posibleng tabangan sinda na masabotan na an dai ninda paghulit kan maogmang bareta nagigin dahelan kan pagkawara kan saindang kagayagayahan. (Mat. 28:19, 20) Kun siring, ano an madonong nindang gibohon?

7. Puede niatong dagkahon an mga napapasuway sa aripompon na gibohon an ano?

 ⁷ Si Jesus nagsabi: “Tawan nin atension an saindong sadiri na an saindong puso dai noarin man mapagabatan nin sobrang pagkakan asin makosog na pag-inom patin mga kahaditan sa buhay . . . Magpuka kamo, kun siring, na sa gabos na panahon nagngangayongayo na magin kamong mapanggana sa pagdulag sa gabos na bagay na ini na nakatalagang mangyari.” (Luc. 21:34-36) An mga napapasuway sa aripompon alagad gustong magkaigwa kan kaogmahan na dating yaon sa sainda puedeng dagkahon na mamibi na logod itao sa sainda an banal na espiritu asin tabangan sinda nin Dios saka humiro sinda kaoyon kan saindang mga pamibi.​—Luc. 11:13.

Nasingkog daw Sinda?

8, 9. Paano an sarong magurang sa kongregasyon puedeng mangatanosan sa saro na nasingkog?

⁸ Huling an mga tawo bakong sangkap, nangyayari an personal na dai pagkakaoyon, asin ini tibaad makasingkog sa saro. May mga nasisingkog kun an sarong iginagalang na indibiduwal sa kongregasyon guminawe sa bakong diosnon na paagi. Kun an sarong inaktibo naaapektaran sa siring na paagi, puedeng sabihon kan nagsosongkong magurang sa kongregasyon na si Jehova dai nagpapasingkog sa siisay man. Kaya taano ta puputolon nin siisay man an saiyang relasyon sa Dios asin sa Saiyang banwaan? Imbes, bako daw na an saro maninigong padagos na maglingkod sa Dios, na may kompiansa na aram kan “Hokom sa bilog na daga” an nangyari asin aasikasohon Nia an mga bagay-bagay sa tamang paagi? (Gen. 18:25; Col. 3:23-25) Kun an saro literal na masingkog asin mapukan, dai nia tutuyohon na magdanay sa arog kaiyan na kamugtakan na dai man lamang nagmamaigot na bumuhat.

⁹ Sa paghihingoang magtao nin espirituwal na tabang, puedeng sambiton nin sarong magurang sa kongregasyon na sa pag-agi nin panahon, naheling nin nagkapira na an nakapasingkog sa sainda garo baga bako nang gayong mahalaga. Sa katunayan, tibaad mayo na an singkogan na iyan. Kun an inaktibo nasingkog huling sia dinisiplina, an mapagngayongayong paghorophorop tibaad magpangyari sa saiya na magkongklusyon na minsan paano sia mismo napasala asin dai nia kutana maninigong tinogotan na masingkog sia kan disiplinang iyan.​—Sal. 119:165; Heb. 12:5-13.

An Problema daw Mapadapit sa Sarong Katokdoan?

10, 11. Anong pangangatanosan an tibaad magin epektibo sa pagmamaigot na tabangan an saro na nagkaigwa nin laen na pakasabot sa sarong katokdoan sa Biblia?

¹⁰ An nagkapira tibaad nagbaya sa aripompon nin Dios huling dai sinda oyon sa sarong sono sa Kasuratan na katokdoan. “Nalingawan” kan mga Israelitang pinatalingkas sa pagkaoripon sa Egipto ‘an mga ginibo nin Dios’ para sa sainda asin “dai ninda hinalat an saiyang hatol.” (Sal. 106:13) Tibaad makatabang an pagpagirumdom sa sarong inaktibo na an “maimbod asin mapagmansay na oripon” nagtatao nin marahayon na espirituwal na kakanon. (Mat. 24:45) Iyan an paagi kun paano enot na nanodan kan inaktibong iyan an katotoohan. Kaya taano ta dai sia magin determinado na maglakaw giraray sa katotoohan?​—2 Juan 4.

¹¹ Kun naghihingoang tabangan an mga napapasuway sa aripompon nin Dios, puedeng sambiton kan magurang sa kongregasyon an mga disipulo na nagbaya ki Jesus huling hinaboan kan mga ini an saro sa saiyang mga katokdoan. (Juan 6:53, 66) Huli sa dai na ninda pakikiasosyar ki Cristo asin sa saiyang maimbod na mga parasunod, nawara ninda an saindang espirituwalidad saka kagayagayahan. An mga nagpondo daw sa pakikiasosyar sa Kristianong kongregasyon nakakua nin iba pang lugar na igwa nin abundang espirituwal na kakanon? Dai, huling mayo man!

May Kalabot daw na Salang Paggawe?

12, 13. Kun an saro na napapasuway sa aripompon nag-admitir na may nagibo siang magabat na kasalan, paano sia puedeng tabangan?

¹² May mga indibiduwal na nagpondo na sa paghuhulit asin pag-atender sa mga pagtiripon huling nakagibo sinda nin magabat na kasalan. Tibaad iniisip ninda na ititiwalag sinda kun itutuga ninda sa kamagurangan an saindang maraot na ginibo. Alagad dai sinda hahaleon sa kongregasyon kun sinda nagpondo na sa bakong sono sa Kasuratan na gibo asin tunay na nagsosolsol. (2 Cor. 7:10, 11) Imbes, sinda maogmang aakoon giraray, asin an kamagurangan matao sa sainda kan espirituwal na tabang na kaipuhan ninda.

¹³ Kun ika sarong maygurang na parahayag na inasignaran na tumabang sa sarong inaktibo, ano an maninigo mong gibohon kun sabihon nia sa saimo na may nagibo siang magabat na kasalan? Siring sa  nasabi na, imbes na orog ka pang mapalabot sa situwasyon na iyan, isuherir sa saiya na dumolok sa kamagurangan. Kun habo niang gibohon iyan, ikakapaheling mo an saimong pagmakolog para sa ngaran ni Jehova asin sa espirituwal na ikakarahay kan kongregasyon paagi sa paghiro kaoyon kan paggiya nin Dios mapadapit sa siring na mga bagay. (Basahon an Levitico 5:1.) Aram kan kamagurangan kun paano tatabangan an siisay man na nagmamawot na magbalik asin mamuhay kaoyon kan kabotan nin Dios. Tibaad kaipuhan an mamomoton na disiplina. (Heb. 12:7-11) Kun an tawong iyan nag-admitir na nagkasala sia sa Dios, nagpondo na sa paggibo nin maraot, asin tunay na nagsosolsol, tatabangan sia kan kamagurangan, asin puede siang mag-ako kan pagpapatawad ni Jehova.​—Isa. 1:18; 55:7; Sant. 5:13-16.

Nagtao nin Kagayagayahan an Pagbalik nin Sarong Aki

14. Sa sadiri nindong tataramon, isaysay an ilustrasyon ni Jesus mapadapit sa gastador na aki.

¹⁴ Kun naghihingoang tabangan an sarong karnero na napapasuway, puedeng sambiton kan inasignaran na tumabang an ilustrasyon ni Jesus na nakasurat sa Lucas 15:11-24. Sa parabolang iyan, minalgastar nin sarong hoben na lalaki an saiyang mana paagi sa mapagpalabilabing pamumuhay. Pag-abot nin panahon, ikinasurang nia nanggad an saiyang maraot na pamumuhay. Huling gutom asin grabe an kapungawan, sia nagdesisyon na magbalik sa saindang harong! Kan sia harayo pa, naheling sia kan saiyang ama, nagdalagan ini asin kinugos sia, mapagpadangat siang hinadokan kaini, saka naggayagaya nanggad ini. An paghorophorop sa ilustrasyon na ini puedeng makamotibar sa sarong napaparayo na magbalik sa aripompon. Huling an sistemang ini nin mga bagay madali nang laglagon, sia maninigong ‘magbalik’ tolos-tolos.

15. Taano ta may nagkapira na napaparayo sa kongregasyon?

¹⁵ An kadaklan na napaparayo sa kongregasyon bakong eksaktong kapareho kan gastador na aki. Kun dapit sa nagkapira, an pagrayo luway-luway na nangyayari, kun paanong an sarong baroto na inaanod-anod luway-luway na napaparayo sa daga. An iba nagagabatan na gayo huli sa mga kahaditan kaya napapabayaan na ninda an espirituwal na mga bagay. An iba pa tinotogotan an saindang sadiri na masingkog sa sarong miembro kan kongregasyon, o sinda minahale huling dai sinda oyon sa sarong sono sa Kasuratan na katokdoan. May pira na naimbuelto sa gawe-gawe na bakong sono sa Kasuratan. Minsan siring, an mga puntong iprinesentar na may koneksion sa kada saro sa mga situwasyon na ini puedeng makatabang sa saindo na tabangan na magbalik an mga nagbaya sa aripompon huli sa mga ini o sa iba pang dahelan bago magin huri an gabos.

“Maogmang Pagbalik, Aki Ko!”

16-18. (a) Paano tinabangan nin sarong magurang sa kongregasyon an sarong tugang na nagin inaktibo sa laog nin dakol na taon? (b) Taano ta nagin inaktibo an tugang na ini, paano sia natabangan, asin paano sia inako kan kongregasyon?

¹⁶ An sarong Kristianong magurang sa kongregasyon nagsabi: “An samong lokal na grupo nin kamagurangan interesadong marhay sa pagsongko sa mga inaktibo. Naisip ko an sarong tugang na lalaki na inadalan ko sa Biblia asin tinabangan ko na makaaram kan katotoohan. Sia nagin inaktibo sa laog nin mga 25 taon asin nag-aagi nin masakit na gayong situwasyon, kaya ipinaliwanag ko kun paano makakatabang  sa saiya an pag-aplikar kan espirituwal na mga prinsipyo sa Biblia. Pakalihis nin pirang panahon, sia nagpoon nang mag-atender sa Kingdom Hall asin nag-oyon na konduktahan sia nin personal na pag-adal sa Biblia tanganing tabangan sia na pakosogon an saiyang desisyon na magbalik sa aripompon.”

¹⁷ Taano ta nagin inaktibo an tugang na ini? Inadmitir nia: “Nagpoon akong magtao nin orog na atension sa kinabanon na mga pasohan kisa sa espirituwal na mga bagay. Dangan nagpondo ako sa pag-adal, paghuhulit, asin pag-atender sa mga pagtiripon. Pagkatapos, naaraman ko na sana na dai na ako nakikiasosyar sa Kristianong kongregasyon. Alagad natabangan akong magbalik huli sa personal asin sinserong interes na ipinaheling kan magurang sa kongregasyon.” Nagin nang magian an mga problema kan tugang na ini pagkatapos niang mag-ako nin personal na pag-adal sa Biblia. Sia nagsabi, “Napag-isip-isip ko na an mayo sa sakong buhay iyo an pagkamoot asin paggiya ni Jehova saka kan saiyang organisasyon.”

¹⁸ Paano inako sa kongregasyon an tugang na ini? Sia nagsabi: “An pagmate ko kapareho ako kan gastador na aki na sinabi ni Jesu-Cristo. Sa katunayan, an saro sa samong may edad nang mga tugang na babae, na yaon na sa kongregasyon 30 taon na an nakaagi asin maimbod pa man giraray na naglilingkod, nagsabi sa sako, ‘Maogmang pagbalik, Aki ko!’ Talagang napahiro kaiyan an sakong puso. Totoo nanggad na yaon na giraray ako sa kongregasyon. Asin gusto kong ipahayag an sakong sinserong pag-apresyar sa pagkamoot, mainit na pakikiiba, pasensia, asin interes na ipinaheling sa sako kan magurang na iyan sa kongregasyon asin kan bilog na kongregasyon. An saindang pagkamoot ki Jehova asin sa kapwa totoo nanggad na nakatabang sa sako na magbalik sa aripompon.”

Dagkahon Sinda na Humiro Na Ngonyan!

19, 20. Paano nindo madadagka an mga inaktibo na magbalik tolos-tolos sa aripompon, asin paano nindo ikakapaheling sa sainda na bakong sobra an inaasahan nin Dios sa sato?

¹⁹ Nabubuhay kita sa huring mga aldaw, asin madali na an katapusan kan presenteng sistema nin mga bagay. Kun siring, dagkahon an mga inaktibo na mag-atender sa Kristianong mga pagtiripon. Dagkahon sinda na pumoon nang mag-atender tolos-tolos. Ipagirumdom sa sainda na si Satanas nagmamaigot na raoton an saindang relasyon sa Dios asin impluwensiahan sindang mag-isip na puede sindang makaginhawa sa mga pasan sa buhay paagi sa pagbaya sa tunay na pagsamba. Puede nindong siertohon sa sainda na makakamtan sana ninda an tunay na pakaginhawa paagi sa pagigin maimbod na mga parasunod ni Jesus.​—Basahon an Mateo 11:28-30.

²⁰ Ipagirumdom sa mga inaktibo na inaasahan nin Dios na gigibohon niato an satong makakaya. Kan may magkritika sa tugang ni Lazaro na si Maria huling linahidan kaini si Jesus nin mamahalon na ungguento dai nahaloy bago sia magadan, si Jesus nagsabi: “Pabayae sia nindo. . . . Ginibo nia an saiyang makakayanan.” (Mar. 14:6-8) Inomaw ni Jesus an daing sukat na babaeng balo na nagtao nin saditon na kontribusyon sa templo. Ginibo man nia an saiyang makakayanan. (Luc. 21:1-4) An kadaklan sa sato kayang mag-atender sa Kristianong mga pagtiripon asin makikabtang sa paghuhulit kan Kahadean. Paagi sa tabang ni Jehova, an mga bagay man na iyan kayang gibohon nin dakol sa mga inaktibo ngonyan.

21, 22. Ano an puede nindong siertohon sa mga nagbabalik ki Jehova?

²¹ Kun an sarong arog-karnero na napapasuway sa aripompon nag-aalangan na maheling giraray an saiyang mga tugang sa kongregasyon, puede nindong ipagirumdom sa saiya an kagayagayahan na nangyari kan magpuli an gastador na aki. An mga nagbabalik sa kongregasyon nagigin dahelan man nin siring kaiyan na kagayagayahan. Dagkahon sinda na humiro na ngonyan tanganing tumangon an Diablo asin rumani sa Dios.​—Sant. 4:7, 8.

²² Sarong magayagayang pag-ako an naghahalat sa mga nagbabalik ki Jehova. (Lam. 3:40) An saindang nakaaging mga eksperyensia sa paglilingkod sa Dios daing duda na nagtao sa sainda nin dakulang kagayagayahan. Dakol na bendisyon sa ngapit an naghahalat sa mga mabalik tolos-tolos sa aripompon!

Ano an Isisimbag Nindo?

• Paano nindo puedeng tabangan an sarong Kristiano na nasingkog asin nagin inaktibo?

• Anong pangangatanosan an tibaad makatabang sa saro na nagbaya sa aripompon nin Dios huli sa personal na pagmansay mapadapit sa sarong katokdoan?

• Paano puedeng tabangan an saro na nag-aalangan na magbalik sa kongregasyon?

[Mga Hapot Para sa Pag-adal]

[Ritrato sa pahina 13]

Maingat na maghinanyog mientras na ipinapahayag nin inaktibong kapagtubod an saiyang mga saboot

[Ritrato sa pahina 15]

An paghorophorop sa ilustrasyon ni Jesus dapit sa gastador na aki puedeng magpahiro sa nagkapira na magbalik sa aripompon