Mga Hapot Hale sa mga Parabasa

Sa Nehemias 8:10, sinabihan an mga Judio na ‘magkakan kan matatabang bagay,’ dawa ngani an Ley sa Levitico 3:17 nagsasabi: “Dai kamo dapat na magkakan nin ano man na taba.” Paano pag-ooyonon an mga pananaram na ini?

Sa orihinal na lenguahe, an termino na trinadusir na “matatabang bagay” sa Nehemias 8:10 laen man sa termino na trinadusir na “taba” sa Levitico 3:17. An Hebreong termino na cheʹlev, na trinadusir na “taba” sa Levitico 3:17, nanonongod sa taba magsalang nin mga hayop o nin mga tawo. (Lev. 3:3; Hok. 3:22) Ipinapaheling kan konteksto kan bersikulo 17 na an mga Israelita dai dapat magkakan kan mga taba na yaon sa palibot kan mga bituka asin bato nin mga hayop na iaatang, ni kan taba sa piad kaiyan huling “an gabos na taba ki Jehova.” (Lev. 3:14-16) Kaya dai dapat kakanon an taba sa hawak nin mga hayop na idodolot ki Jehova.

Sa ibong na lado, mash·man·nimʹ  an termino na trinadusir na “matatabang bagay” sa Nehemias 8:10, asin digdi sana naglataw an tataramon na ini sa Hebreong Kasuratan. Kinua iyan sa berbo na sha·menʹ, na nangangahulogan na “magin mataba, magtaba.” An pundamental na ideya kan grupo nin mga termino na konektado sa berbong ini garo baga nanonongod sa kaginhawahan asin marahay na kamugtakan. (Ikomparar an Isaias 25:6.) An saro sa mga termino na pinakaparateng kinukua sa berbong ini iyo an nombre na sheʹmen, na sa parate tinatradusir na ‘lana,’ na kaiba sa pananaram na ‘lana nin oliba.’ (Deut. 8:8; Lev. 24:2) Arog kan pagkagamit sa Nehemias 8:10, minalataw na an mash·man·nimʹ  nanonongod sa kakanon na linuto sa dakol na lana asin tibaad kaiba pa ngani dian an karne na may kadikit na taba alagad bakong mga purong taba nin hayop.

Minsan ngani pinagbawalan an mga Israelita na magkakan nin mga taba nin hayop, puede sindang magkakan nin manamit asin masiram na kakanon. An nagkapirang kakanon, arog kan keyk na gibo hale sa grano, linuto bakong sa taba nin hayop kundi sa lana nin gulay, na sa parate lana nin oliba. (Lev. 2:7) Huli kaini, an Insight on the Scriptures nagpapaliwanag na an “matatabang bagay” na sinambit digdi “nanonongod sa manamit na mga kabtang, mga bagay na bakong maniwang o alang, kundi matagok, kaiba na an masisiram na mga kakanon na linuto sa mga lana nin gulay.”

Siempre, isinasaisip nin mga Kristiano na an pagbawal na magkakan nin taba kabtang kan Ley. Bako sindang sakop kan ley, pati na kan mga kahagadan kaiyan may koneksion sa mga atang na hayop.​—Roma 3:20; 7:4, 6; 10:4; Col. 2:16, 17.