Pahalagahan an Daing Kaparehong Papel ni Jesus sa Katuyohan nin Dios

“Ako iyo an dalan asin an katotoohan patin an buhay. Mayo nin makakaduman sa Ama kundi paagi sa sako.”​—JUAN 14:6.

1, 2. Taano ta maninigo kitang magin interesado na siyasaton an daing kaparehong papel ni Jesus sa katuyohan nin Dios?

SA BILOG na nakaaging mga panahon, dakol na tawo an naghihingoa nanggad na magin laen sa mga nakapalibot sa sainda, alagad dikit sana an nakakagibo kaiyan. Mas dikit pa nganing tawo an tamang makakapagsabi na sinda daing kapareho sa pambihirang mga paagi. Pero, si Jesu-Cristo, an Aki nin Dios, daing kapareho sa dakol na paagi.

² Taano ta maninigo kitang magin interesado sa daing kaparehong papel ni Jesus? Huling kalabot an sato mismong relasyon sa satong langitnon na Ama, si Jehova! Si Jesus nagsabi: “Ako iyo an dalan asin an katotoohan patin an buhay. Mayo nin makakaduman sa Ama kundi paagi sa sako.” (Juan 14:6; 17:3) Siyasaton niato an nagkapira sa mga paagi na si Jesus daing kapareho. An paggibo kaiyan mapatalubo sa satong pagpahalaga sa saiyang papel sa katuyohan nin Dios.

An “Bugtong na Aki”

3, 4. (a) Taano ta masasabi niato na si Jesus daing kapareho sa saiyang papel bilang an bugtong na Aki? (b) Paanong daing kapareho an papel ni Jesus sa paglalang?

³ Si Jesus bako sanang “aki nin Dios.” Iyan an apod ni Satanas ki Jesus mientras na sinusugotan nia ini. (Mat. 4:3, 6) Si Jesus angay na apodon na an “bugtong na Aki nin Dios.” (Juan 3:16, 18) An termino sa Griego na trinadusir na “bugtong” tinawan nin kahulogan na “sasarong klase, solamente,” o “daing kapareho.” Si Jehova igwa nin ginatos na milyon na espiritung aki. Kun siring, sa anong paagi na si Jesus “sasarong klase” sana?

⁴ Si Jesus daing kapareho huling sia sana an direktang linalang kan saiyang Ama. Sia an panganay na Aki. Sa katunayan, sia “an panganay sa gabos na linalang.” (Col. 1:15) Sia “an kapinonan kan paglalang nin Dios.” (Kap. 3:14) Dai man nin kapareho an papel kan bugtong na Aki sa paglalang. Bako sia an Kaglalang, o Kagtugdas, nin paglalang. Alagad ginamit sia ni Jehova bilang an instrumento, o kasangkapan, sa paglalang kan gabos na iba pang bagay. (Basahon an Juan 1:3.) Si apostol Pablo nagsurat: “Para sa sato igwa talaga nin sarong Dios, an Ama, na sa saiya gikan an gabos na bagay, asin kita nabubuhay para sa saiya; asin igwa nin sarong Kagurangnan, si Jesu-Cristo, na huli sa saiya an gabos na bagay nag-eeksister, asin kita nabubuhay huli sa saiya.”​—1 Cor. 8:6.

5. Paano itinatampok kan Kasuratan an pagigin daing kapareho ni Jesus?

⁵ Minsan siring, orog pa an kalabot sa pagigin daing kapareho ni Jesus. Ipinapanongod sa saiya kan Kasuratan an dakol na titulo o ngaran na nagtatampok kan saiyang daing kaparehong papel sa katuyohan nin Dios. Siyasaton niato ngonyan an lima pa sa mga ini na iinaplikar ki Jesus sa Kristianong Griegong Kasuratan.

“An Tataramon”

6. Taano ta angay na apodon si Jesus na “an Tataramon”?

⁶ Basahon an Juan 1:14. Taano ta si Jesus inaapod na “an Tataramon,” o Logos? An titulong ini nagsasabi kan katongdan na ginigibo nia poon kan mag-eksister an iba pang linalang na may intelihensia. Ginamit ni Jehova an saiyang Aki tanganing magpaabot nin impormasyon asin mga instruksion sa iba pang espiritung aki, kun paanong ginamit ngani nin Dios an Aking iyan tanganing ipaabot an Saiyang mensahe sa mga tawo digdi sa daga. An katunayan na si Jesus iyo an Tataramon, o Representante sa Pagtaram nin Dios, maheheling sa sinabi ni Cristo sa mga Judiong nagdadangog sa saiya: “An sakong  itinotokdo bakong sa sako, kundi sa saiya na nagsugo sa sako. Kun an siisay man nagmamawot na gumibo kan Saiyang kabotan, maaaraman nia mapadapit sa katokdoan kun baga iyan gikan sa Dios o ako nagtataram hale sa sakong sadiri.” (Juan 7:16, 17) Si Jesus padagos na igwa kan titulong “An Tataramon nin Dios” dawa pakatapos niang magbalik sa langitnon na kamurawayan.​—Kap. 19:11, 13, 16.

7. Paano niato maaarog an kapakumbabaan na ipinapaheling ni Jesus sa saiyang papel bilang “an Tataramon”?

⁷ Isip-isipa na sana an ipinapakahulogan kan titulong ini. Minsan ngani si Jesus an pinakamadonong sa gabos na linalang ni Jehova, sia dai nananarig sa sadiri niang kadonongan. Sia nagtataram sono sa itinotokdo sa saiya kan saiyang Ama. Pirme niang dinadara an atension ki Jehova imbes na sa saiyang sadiri. (Juan 12:50) Marahayon nanggad na halimbawa na dapat niatong arogon! Kita man pinagkatiwalaan nin mahalagang marhay na pribilehio na ‘magpahayag kan maogmang bareta dapit sa marahay na mga bagay.’ (Roma 10:15) An pag-apresyar sa halimbawa nin kapakumbabaan ni Jesus maninigong magpahiro sa sato na likayan an pagtaram sa sadiri niatong kabotan. Kun mapadapit sa pagpaabot kan nagliligtas-buhay na mensahe na nasa Kasuratan, habo niatong “maglihis sa mga bagay na nasusurat.”​—1 Cor. 4:6.

‘An Amen’

8, 9. (a) Ano an kahulogan kan terminong “amen,” asin taano ta si Jesus inaapod na ‘an Amen’? (b) Paano inotob ni Jesus an saiyang papel bilang ‘an Amen’?

⁸ Basahon an Kapahayagan 3:14. Taano ta si Jesus inaapod na ‘an Amen’? An termino na trinadusir na “amen” transliterasyon nin sarong termino sa Hebreo na nangangahulogan na “mangyari logod,” o “iyo nanggad.” An pinagkuanan kaiyan na orihinal na termino sa Hebreo nangangahulogan na “magin maimbod” o “mapagtitiwalaan.” Ginagamit an termino man sanang ini tanganing iladawan an kaimbodan ni Jehova. (Deut. 7:9; Isa. 49:7) Kaya, sa anong paagi na si Jesus daing kapareho kun sia inaapod na ‘an Amen’? Mangnohon kun paano minasimbag an 2 Corinto 1:19, 20: “An Aki nin Dios, si Cristo Jesus, na ihinulit sa saindo . . . , dai nagin Iyo pero Dai, kundi an Iyo nagigin Iyo sa saiyang kamugtakan. Huli ta minsan gurano kadakol kan panuga nin Dios, an mga iyan nagin Iyo paagi sa saiya. Kun siring, paagi man sa saiya na an ‘Amen’ sinasabi sa Dios para sa kamurawayan.”

⁹ Si Jesus iyo ‘an Amen’ sa gabos na panuga nin Dios. An kaotoban kan gabos na panuga ni Jehova Dios pinatunayan asin pinagin posible kan saiyang daing depektong pamumuhay digdi sa daga, kaiba kan saiyang kagadanan bilang atang. Paagi sa pagdadanay na maimbod, pinatunayan man ni Jesus na sala an paghihingako ni Satanas, na nakasurat sa libro nin Job, na an Dios nenegaran kan Saiyang mga lingkod kun an mga ini makaeksperyensia nin kakulangan nin mga pangangaipo sa buhay, pagsakit, asin pagbalo. (Job 1:6-12; 2:2-7) Sa gabos na linalang nin Dios, an panganay na Aki an makakatao kan pinakadai mapagdududahan na simbag sa akusasyon na iyan. Dugang pa, itinao ni Jesus an pinakamarahay na ebidensia na nagsusuportar sa lado kan saiyang Ama dapit sa orog na dakulang isyu kan pagigin may deretso ni Jehova bilang soberano kan uniberso.

10. Paano niato maaarog si Jesus sa saiyang daing kaparehong papel bilang ‘an Amen’?

¹⁰ Paano niato maaarog si Jesus sa saiyang daing kaparehong papel bilang ‘an Amen’? Paagi sa pagdadanay na maimbod ki Jehova asin pagsuportar sa saiyang unibersal na soberaniya. Sa paggibo kaiyan, hinihimate niato nin positibo an kahagadan na nakasurat sa Talinhaga 27:11: “Magpakadonong ka, aki ko, asin pagayagayaha an sakong puso, tanganing makasimbag ako sa saiya na nagduduhagi sa sako.”

“An Parapangoltanan nin Bagong Tipan”

11, 12. Paanong daing kapareho an papel ni Jesus bilang Parapangoltanan?

¹¹ Basahon an 1 Timoteo 2:5, 6. Si Jesus an “sarong parapangoltanan sa tahaw nin Dios asin nin mga tawo.” Sia “an parapangoltanan nin bagong tipan.” (Heb. 9:15; 12:24) Minsan siring, si Moises inapod man na parapangoltanan​—an parapangoltanan kan tipan nin Ley. (Gal. 3:19) Kun siring, paanong daing kapareho an papel ni Jesus bilang Parapangoltanan?

¹² An termino sa orihinal na lenguahe na trinadusir na “parapangoltanan” sarong legal na termino. Pinapanongdan kaiyan si Jesus bilang legal na Parapangoltanan (o, sa sarong paagi, sarong abogado) kan bagong tipan na pinagin posible an pagkamundag nin bagong nasyon, an “Israel nin Dios.” (Gal. 6:16) An nasyon na ini kompuesto nin mga Kristiano na linahidan nin espiritu, na minabilog sa langitnon  na “sa hadeng grupo nin mga saserdote.” (1 Ped. 2:9; Ex. 19:6) An tipan nin Ley, na si Moises an parapangoltanan, dai nakagibo nin nasyon na siring kaiyan.

13. Ano an kalabot sa papel ni Jesus bilang Parapangoltanan?

¹³ Ano an kalabot sa papel ni Jesus bilang Parapangoltanan? Bueno, an halaga kan dugo ni Jesus gagamiton ni Jehova sa mga dinadara sa bagong tipan. Sa paaging ini, sinda ibinibilang ni Jehova na may katanosan sa legal na paagi. (Roma 3:24; Heb. 9:15) Dangan, puede sindang darahon nin Dios sa bagong tipan na nagtatao sa sainda nin oportunidad na magin langitnon na mga hade asin saserdote! Bilang saindang Parapangoltanan, tinatabangan sinda ni Jesus sa pagpapadanay nin malinig na kamugtakan sa atubangan nin Dios.​—Heb. 2:16.

14. Taano ta an gabos na Kristiano, ano man an saindang paglaom, maninigo na magpahalaga nanggad sa papel ni Jesus bilang Parapangoltanan?

¹⁴ Kumusta man an mga dai kaiba sa bagong tipan, an mga naglalaom na mabuhay sagkod lamang digdi sa daga, bakong sa langit? Minsan ngani sinda bakong partisipante sa bagong tipan, sinda makikinabang dian. Sinda nag-aako nin kapatawadan sa saindang mga kasalan asin ipinapahayag na matanos bilang mga katood nin Dios. (Sant. 2:23; 1 Juan 2:1, 2) Baga man kita igwa nin langitnon na paglaom o daganon na paglaom, an lambang saro sa sato may marahay na dahelan na pahalagahan an papel ni Jesus bilang an Parapangoltanan kan bagong tipan.

“Halangkaw na Saserdote”

15. Paanong an papel ni Jesus bilang Halangkaw na Saserdote laen sa papel kan gabos na iba pang lalaki na naglingkod bilang halangkaw na saserdote?

¹⁵ Dakol na lalaki an naglingkod bilang halangkaw na saserdote kaidto, pero daing kapareho nanggad an papel ni Jesus bilang Halangkaw na Saserdote. Taano man? Si Pablo nagpaliwanag: “Dai nia kaipuhan sa aroaldaw, siring sa ginigibo kan mga halangkaw na saserdoteng idto, na magdolot nin mga atang, enot para sa saiyang mga kasalan dangan para sa mga kasalan kan banwaan: (huli ta ini ginibo nia nin sararoan sana kan idolot nia an saiyang sadiri;) huli ta an Ley nagnonombra nin mga tawong may kaluyahan na magin mga halangkaw na saserdote, alagad an tataramon kan sinumpaan na huramento na nagdatong pakalihis kan Ley nagnonombra nin sarong Aki, na sinangkap sagkod lamang.”​—Heb. 7:27, 28. *

16. Taano ta daing kapareho nanggad an atang ni Jesus?

¹⁶ Si Jesus sangkap na tawo kaidto, an eksaktong kapantay ni Adan bago ini nagkasala. (1 Cor. 15:45) Bilang siring, si Jesus an solamenteng tawo na nasa kamugtakan na magdolot nin sangkap asin kompletong atang​—an klase nin atang na dai na kaipuhan otrohon. Sa irarom kan Ley ni Moises, an mga atang idinodolot aroaldaw. Minsan siring, an gabos na siring na atang asin paglilingkod nin mga saserdote anino sana kan gigibohon ni Jesus. (Heb. 8:5; 10:1) Kaya, huli sa pagigin epektibo asin pagkapermanente kaiyan, daing kapareho an katongdan ni Jesus bilang Halangkaw na Saserdote.

17. Taano ta maninigo niatong pahalagahan an papel ni Jesus bilang satong Halangkaw na Saserdote, asin paano niato magigibo iyan?

¹⁷ Kaipuhan niato an mga paglilingkod ni Jesus bilang Halangkaw na Saserdote tanganing tabangan kita na magkaigwa nin matanos na kamugtakan sa pagheling nin Dios. Asin marahayon nanggad an satong Halangkaw na Saserdote! “An satong halangkaw na saserdote, bakong saro na dai makakapakidamay sa satong mga kaluyahan,” an isinurat ni Pablo, “kundi saro na nabalo na sa gabos na bagay arog niato, alagad dai nin kasalan.” (Heb. 4:15) Tunay nanggad, an pagpahalaga sa katunayan na ini maninigong magpahiro sa sato na ‘dai na mabuhay para sa satong sadiri, kundi para sa saiya na nagadan para sa sato.’​—2 Cor. 5:14, 15; Luc. 9:23.

An Ihinulang “Banhi”

18. Anong hula an itinaram pakatapos na magkasala si Adan, asin ano an ihinayag paghaloyhaloy mapadapit sa hulang ini?

¹⁸ Duman sa Eden, kan garo baga nawara na nin  katawohan an gabos na bagay​—an malinig na kamugtakan sa atubangan nin Dios, buhay na daing katapusan, kaogmahan, asin Paraiso—​ihinula ni Jehova Dios an sarong Paraligtas. An sarong ini inapod na an “banhi.” (Gen. 3:15) An misteryong Banhi na ini nagin tema nin dakol na hula sa Biblia sa bilog na nakaaging mga panahon. Sia magikan ki Abraham, Isaac, asin Jacob. Siring man, sia magikan sa linahe ni Hadeng David.​—Gen. 21:12; 22:16-18; 28:14; 2 Sam. 7:12-16.

19, 20. (a) Siisay an ipinanugang Banhi? (b) Taano ta masasabi na bako sanang si Jesus an kaiba sa ihinulang banhi?

¹⁹ Siisay an ipinanugang Banhi na ini? An simbag sa hapot na ini makukua sa Galacia 3:16. (Basahon.) Minsan siring, sa huring kabtang kan kapitulo man sanang iyan, sinabi pa ni apostol Pablo sa linahidan na mga Kristiano: “Dugang pa, kun kamo ki Cristo, kamo talagang banhi ni Abraham, mga paramana mapadapit sa sarong panuga.” (Gal. 3:29) Paanong si Cristo iyo an ipinanugang Banhi, asin taano man ta may iba pang kairiba?

²⁰ Hinihingako nin minilyon na sinda naggikan ki Abraham, asin may mga nag-aakto pa ngani bilang mga propeta. May mga relihion na nagtatao nin dakulang importansia sa paghihingako na an saindang mga propeta naggikan ki Abraham. Alagad an gabos daw na ini iyo an ipinanugang Banhi? Dai. Siring kan sinabi ni apostol Pablo paagi sa pagpasabong, bakong gabos na naggikan ki Abraham makakapagsabi na sinda an ipinanugang Banhi. An mga naggikan sa ibang mga aki ni Abraham dai ginamit tanganing bendisyonan an katawohan. An banhi na gagamiton sa pagbendisyon magigin paagi sana ki Isaac. (Heb. 11:18) Sa katapustapusi, saro sanang tawo, si Jesu-Cristo​—na dokumentado sa Biblia an kasaysayan nin linahe bilang naggikan ki Abraham—​an pangenot na kabtang kan ipinanugang banhi na iyan. * An gabos na iba pa na paghaloyhaloy nagin sekondaryong kabtang kan banhi ni Abraham nagin siring huling sinda “ki Cristo.” Iyo, tunay na daing  kapareho an papel ni Jesus sa pag-otob kan hulang ini.

21. Ano an hinahangaan nindo manongod sa paagi nin pag-otob ni Jesus sa saiyang daing kaparehong papel sa katuyohan ni Jehova?

²¹ Ano an nanodan niato sa halipot na repasong ini dapit sa daing kaparehong papel ni Jesus sa katuyohan ni Jehova? Poon kan sia lalangon, an bugtong na Aki nin Dios nagin daing kapareho nanggad, asin sasarong klase. Minsan siring, an daing kapareho na Aking ini nin Dios na nagin si Jesus pirmeng mapakumbabang naglilingkod kaoyon kan kabotan kan saiyang Ama, na nungkang naghahanap nin kamurawayan para sa saiyang sadiri. (Juan 5:41; 8:50) Marahayon nanggad na halimbawa para sa sato ngonyan! Arog ni Jesus, logod na magin pasohan niato na “gibohon an gabos na bagay sa ikakamuraway nin Dios.”​—1 Cor. 10:31.

[Mga Nota sa Ibaba]

Nagigirumdoman daw Nindo?

• Paagi sa saiyang mga titulo o ngaran, ano an nanodan nindo manongod sa daing kaparehong papel ni Jesus? (Helingon an kahon.)

• Paano nindo maaarog an halimbawa kan daing kaparehong Aki ni Jehova?

[Mga Hapot Para sa Pag-adal]

[Kahon/​Ritrato sa pahina 15]

Nagkapirang Titulo na Naghahayag kan Daing Kaparehong Papel ni Jesus sa Katuyohan nin Dios

▪ An Bugtong na Aki. (Juan 1:3) Si Jesus sana an direktang linalang kan saiyang Ama.

▪ An Tataramon. (Juan 1:14) Ginagamit ni Jehova an saiyang Aki bilang Representante sa Pagtaram tanganing magpaabot nin impormasyon asin mga instruksion sa iba pang linalang.

▪ An Amen. (Kap. 3:14) An kaotoban kan mga panuga ni Jehova Dios pinatunayan asin pinagin posible kan daing depektong pamumuhay ni Jesus digdi sa daga, kaiba kan saiyang kagadanan bilang atang.

▪ An Parapangoltanan kan Bagong Tipan. (1 Tim. 2:5, 6) Bilang legal na Parapangoltanan, pinagin posible ni Jesus na mamundag an sarong bagong nasyon, an “Israel nin Dios,” na kompuesto nin mga Kristiano na mabilog sa langitnon na “sa hadeng grupo nin mga saserdote.”​—Gal. 6:16; 1 Ped. 2:9.

▪ An Halangkaw na Saserdote. (Heb. 7:27, 28) Si Jesus an solamenteng tawo na nasa kamugtakan na magdolot nin sangkap na atang, saro na dai na kaipuhan otrohon. Kaya nia kitang linigan sa kasalan asin patalingkason sa epekto kaiyan na kagadanan.

▪ An Ipinanugang Banhi. (Gen. 3:15) An pangenot na kabtang kan ipinanugang banhi na iyan saro sanang tawo, si Jesu-Cristo. “Ki Cristo” an gabos na iba pa, na kan huri nagin sekondaryong kabtang kan banhi ni Abraham.​—Gal. 3:29.