Taano ta Dapat Nindong Papagdanayon an Saindong Integridad?

“Hokoman mo ako, O Jehova, . . . oyon sa sakong integridad.”​—SAL. 7:8.

1, 2. Ano an nagkapirang ordinaryo na sanang situwasyon na nag-aatubang nin mga kadepisilan sa pagpapadanay nin integridad nin sarong Kristiano?

IMAHINARA an tolong situwasyon: Sarong aking lalaki an inoolog-olog kan nagkapira sa saiyang mga kaeskuela. Hinihingoa nindang paanggoton sia, tibaad tanganing sia magraway o makipag-iwal. Sia daw mabalos, o pupugolan daw nia an saiyang sadiri asin mahale na sana? Sarong agom na lalaki na solong nasa harong an nagsisiyasat sa Internet. Luminataw sa komputer nia an paisi manongod sa sarong malaswang Web site. Masusugotan daw sia asin bubukasan an site na iyan, o sisiertohon daw niang likayan iyan? Sarong Kristiana an nakikipag-olay sa sarong sadit na grupo kan an pag-orolay nagin negatibo asin nagin nakakadanyar na tsismis manongod sa sarong tugang na babae sa kongregasyon. Mapartisipar daw sia dian, o pagmamaigotan daw niang liwaton an pinag-oolayan?

² Minsan ngani magkakalaen an mga situwasyon na iyan, may sarong bagay na magkaparareho iyan. Kalabot sa gabos na situwasyon na iyan an maigot na paghihingoang papagdanayon an integridad bilang Kristiano. Naiisip daw nindo an sadiri nindong integridad mantang inaatubang nindo an saindong mga kahaditan, pangangaipo, asin pasohan sa buhay? Sa aroaldaw, iniisip nin mga tawo an manongod sa saindang itsura, saindang salud, mga kadepisilan sa paghanapbuhay, marahay asin maraot na mga nangyayari sa saindang pakikipagkatood, tibaad pati romantikong relasyon. Tibaad dakulang atension pa ngani an itao niato sa siring na mga kahaditan. Pero, ano nanggad an mahalaga ki Jehova mantang sinisiyasat nia an satong puso? (Sal. 139:23, 24) An satong integridad.

3. Si Jehova nagtatao sa sato nin anong pribilehio, asin ano an pag-oolayan niato sa artikulong ini?

³ Si Jehova, an Paratao nin “lambang marahay na balaog asin lambang sangkap na regalo,” nagtatao sa sato nin laen-laen na regalo. (Sant. 1:17) Huli sa saiya, igwa kita nin regalo na arog kan hawak, isip, marahay na salud, asin laen-laen na abilidad. (1 Cor. 4:7) Minsan siring, dai nanggad kita pinipirit ni Jehova na magpaheling nin integridad. Tinotogotan nia kita na magdesisyon para sa sadiri niato kun baga papataluboon niato an kualidad na ini. (Deut. 30:19) Kun siring, kaipuhan na siyasaton niato kun ano an integridad. Pag-oolayan man niato an tolong dahelan kun taano ta biyo nanggad na mahalaga an kualidad na ini.

Ano an Integridad?

4. Ano an kalabot sa integridad, asin ano an manonodan niato sa ley ni Jehova mapadapit sa mga atang na hayop?

⁴ Para sa dakol na tawo, garo baga bakong malinaw an ideya ninda sa kun ano an integridad. Halimbawa, kun ipinaghahambog kan mga politiko an saindang integridad, sa parate garo baga an boot nindang sabihon iyo an pagkaonesto. Mahalaga an kualidad na iyan, alagad kabtang sana iyan nin integridad. Siring kan pagkagamit sa Biblia, kalabot sa integridad an pagigin kompleto asin pagigin marahay sa moral. An mga terminong Hebreo na may koneksion sa “integridad” hale sa orihinal na termino na nangangahulogan nin pagigin marahay, bilog, o daing sala. An saro sa mga terminong ini ginagamit mapadapit sa mga atang na idodolot ki Jehova. Aakoon nia an hayop na iaatang solamente kun iyan daing depekto, o bilog. (Basahon an Levitico 22:19, 20.) Biyong kinondenar ni Jehova an mga dai nag-iintindi kan saiyang instruksion paagi sa pagdolot nin atang na mga hayop na pilay, may helang, o buta.​—Mal. 1:6-8.

5, 6. (a) Anong mga halimbawa an nagpapaheling na parate niatong pinapahalagahan kun ano an bilog, o kompleto? (b) Kun dapit sa bakong sangkap na mga tawo, an integridad daw nangangahulogan nin pagkasangkap? Ipaliwanag.

⁵ Bako nang bago an ideya nin paghanap asin pagpahalaga sa kun ano an bilog o kompleto. Halimbawa, imahinaron na an sarong nangongolekta nin libro nakakua nin mahalagang marhay na libro pakalihis nin halawig na paghanap, alagad nadiskobre nia na iyan  kulang palan nin nagkapirang mahalagang marhay na pahina. Huli sa pagkadesganar, tibaad ibalik nia iyan sa istante. O imahinaron an sarong babae na naglalakawlakaw sa may baybayon, na nangongolekta nin nagkapira sa mga buskay na iinanod sa gilid. Huling sia naaakit sa pagkalaenlaen asin gayon kan mga linalang na ini, kun minsan sia minaduko tanganing siyasaton an saro kaiyan. Arin kan mga iyan an kukuanon nia? An mga bilog asin daing tipak. Kaagid kaiyan, an Dios naghahanap nin mga tawo na igwa kan kualidad na ini na pagigin bilog o pagigin kompleto.​—2 Cron. 16:9.

⁶ Pero, tibaad mag-isip-isip kamo kun baga an integridad nangangaipo nin pagkasangkap. Huling naapektaran kita nin kasalan asin pagkabakong sangkap, tibaad may tendensia kitang mag-isip na kita medyo kaagid kan bakong kompletong libro o may tipak na buskay. Iyan daw kun beses an namamatean nindo? Makakasierto kita na dai inaasahan ni Jehova na kita sangkap sa absolutong paagi. Nungka niang inaasahan an labi pa sa kaya niatong gibohon. * (Sal. 103:14; Sant. 3:2) Minsan siring, talagang inaasahan nia na papagdadanayon niato an satong integridad. Kun siring, igwa daw nin pagkakalaen an pagkasangkap asin an integridad? Igwa. Sa pag-ilustrar: Namomotan nin sarong hoben na lalaki an sarong hoben na babae na gusto niang magin agom. Siempre, bakong madonong na aasahan nia na sangkap an babae. Pero, madonong na aasahan nia na bilog na puso siang mamomotan kaini, na an boot sabihon, sa saiya sana ini may romantikong pagkamoot. Sa kaagid na paagi, si Jehova “sarong Dios na naghahagad nin dai nababangang debosyon.” (Ex. 20:5) Inaasahan nia na minsan ngani kita bakong sangkap, mamomotan niato sia nin bilog na puso, na sa saiya sana nagtatao nin pagsamba.

7, 8. (a) Nagtao si Jesus nin anong halimbawa mapadapit sa integridad? (b) Sono sa Kasuratan, ano an kahulogan nin integridad?

⁷ Tibaad magirumdoman niato an simbag ni Jesus kan hapoton sia kun ano an pinakaimportante sa gabos na ley. (Basahon an Marcos 12:28-30.) Dai sana itinao ni Jesus an simbag; namuhay sia oyon dian. Nagtao sia nin pinakanangongorog na halimbawa sa pagkamoot ki Jehova sa bilog niang isip, puso, kalag, asin kosog. Ipinaheling nia na an integridad ipinapahayag, bakong paagi sa mga tataramon sana, kundi sa positibong mga gibo na resulta nin dalisay na mga motibo. Kaipuhan na sumunod kita sa mga lakad ni Jesus tanganing magdanay kita na may integridad.​—1 Ped. 2:21.

⁸ Kun siring, sono sa Kasuratan ini an kahulogan kan satong integridad: bilog na pusong debosyon sa sarong langitnon na Persona, si Jehova Dios, asin sa saiyang ihinayag na kabotan asin katuyohan. An pagdadanay na may integridad nangangahulogan na sa satong pangaroaldaw na buhay, an orog sa gabos na hihingoahon niato iyo an paogmahon si Jehova Dios. An mga ipinapaorog niato sa buhay iyo an mga bagay na pinakaimportante sa saiya. Pag-olayan niato an tolong dahelan kun taano ta importanteng marhay ini.

1. An Satong Integridad Asin an Isyu nin Soberaniya

9. Paano an satong personal na integridad konektado sa isyu nin unibersal na soberaniya?

⁹ An soberaniya ni Jehova dai nakadepende sa integridad niato. An saiyang soberaniya makatanosan, daing sagkod, asin unibersal. Pirme iyan na magigin siring kaiyan, ano man an sabihon o gibohon nin siisay man na linalang. Minsan siring, an soberaniya nin Dios pinakaraot nin grabe sa kalangitan asin digdi sa daga. Huli kaini, an saiyang pamamahala kaipuhan na mabindikar​—mapatunayan na tama, makatanosan, asin mamomoton—​sa atubangan kan gabos na madonong na linalang. Bilang Mga Saksi ni Jehova, gustong-gusto niatong ipakipag-olay sa siisay man na mahinanyog an manongod sa unibersal na soberaniya nin Dios. Pero, paano kita mismo makakapanindogan sa isyung iyan? Paano niato ipinapaheling na pinili niato si Jehova bilang sato mismong Soberano? Paagi sa pagdadanay na may integridad.

10. Ano an akusasyon ni Satanas mapadapit sa integridad nin mga tawo, asin paano mo iyan sisimbagon?

¹⁰ Isip-isipon kun paano kalabot an saindong integridad. Sa pundamental, hinihingako ni Satanas na mayong tawo na maninindogan para sa soberaniya nin Dios, na mayo nin siisay man na maglilingkod ki Jehova huli sa bakong maimot na pagkamoot. Sa atubangan kan kadakoldakol na nagkakatiripon na espiritung linalang, an Diablo nagsabi ki Jehova: “Kublit para sa kublit, asin an gabos na sadiri nin tawo itatao nia para sa saiyang kalag.” (Job 2:4) Mangnohon na an mapagduhaging pagtaram ni Satanas bako sanang  patama sa matanos na si Job kundi sinabi nia iyan para sa bilog na katawohan. Huli kaiyan, inapod kan Biblia si Satanas na “an paraakusar sa satong mga tugang.” (Kap. 12:10) Dinuhagi nia si Jehova paagi sa pagsabi na an mga Kristiano​—pati ika—​dai magdadanay na maimbod. Sinasabi ni Satanas na matraydor ka ki Jehova tanganing iligtas an sadiri mong buhay. Ano an saboot mo sa siring na mga akusasyon sa saimo? Bako daw na maoogma ka na magkaoportunidad na patunayan na putikon si Satanas? Paagi sa saimong pagdadanay na may integridad, magigibo mo nanggad iyan.

11, 12. (a) Anong mga halimbawa an nag-iilustrar na igwa nin koneksion sa isyu nin personal na integridad an satong mga desisyon dapit sa mga bagay sa aroaldaw? (b) Taano ta sarong pribilehio an pagdadanay na may integridad?

¹¹ Sa siring, biyong importante an saindong gawe-gawe asin mga pagpili sa aroaldaw huli sa isyu kan saindong integridad. Estudyaran giraray niato an tolong situwasyon na nasambitan sa enotan. Paano ninda papagdadanayon an saindang integridad? An aking lalaki na inoolog-olog kan saiyang mga kaeskuela nasusugotan na gayong magbalos sa sainda, alagad nagirumdoman nia an konsehong ini: “Dai kamo magbalos, mga namomotan, kundi magtao nin lugar sa grabeng kaanggotan; huli ta nasusurat: ‘Sako an pagbalos; ako an mabalos, sabi ni Jehova.’” (Roma 12:19) Sia huminale na sana. Puedeng helingon kan agom na lalaki na naggagamit nin Internet an mga bagay na nakakapukaw sa sekso, alagad nagirumdoman nia an prinsipyo na maheheling sa mga tataramon ni Job: “Nakipagtipan ako sa sakuyang mga mata. Kaya paano ako makakapaheling nin atension sa sarong birhen?” (Job 31:1) Kaagid kaiyan, nagsayuma an lalaki na magheling sa malaswang mga retrato o pasaleng iyan, na linilikayan an siring na mga bagay na garo iyan hilo. Nagpugol an babaeng nakikipag-olay sa sarong grupo na dian puede siang makadangog nin kadikit na nakakadanyar na tsismis, na ginigirumdom an instruksion na: “An lambang saro sa sato magpanigo sa saiyang kapwa sa kun ano an marahay para sa pagpakosog sa saiya.” (Roma 15:2) Dai nakakaparigon an tsismis na puede nia kutanang sabihon sa iba. Iyan dai magtatao nin marahay na impresyon sa saiyang tugang na Kristiana; ni makakapaogma man iyan sa saiyang Ama. Kaya kinontrol nia an saiyang dila asin liniwat an pinag-oolayan.

 ¹² Sa kada saro sa mga situwasyon na iyan, an Kristiano naggigibo nin pagpili na, garo man sana, nagsasabi: ‘Si Jehova an Namamahala sa sako. Pagmamaigotan kong gibohon an nakakapaogma sa saiya sa bagay na ini.’ Kun naggigibo nin personal na mga pagpili asin desisyon, pinagmamaigotan man daw nindong gibohon iyan? Kun iyo, talagang kinukuyog nindo an nakakaogmang mga tataramon na nakasurat sa Talinhaga 27:11: “Magpakadonong ka, aki ko, asin pagayagayaha an sakong puso, tanganing makasimbag ako sa saiya na nagduduhagi sa sako.” Kanigoan na pribilehio niato na pagayagayahon an puso nin Dios! Bako daw na bawi nanggad an gabos niatong paghihingoa na papagdanayon an satong integridad?

2. An Basehan Para sa Paghokom nin Dios

13. Paano an mga tataramon ni Job asin David nagpapaheling na an integridad iyo an basehan kan paghokom sa sato ni Jehova?

¹³ Naheheling niato na huli sa integridad nakakapanindogan kita para sa soberaniya ni Jehova. Sa siring, iyan an basehan kan paghokom sa sato nin Dios. Nasasabotan na marhay ni Job an katotoohan na ini. (Basahon an Job 31:6.) Aram ni Job na tinitimbang nin Dios an gabos na tawo sa “eksaktong timbangan,” na ginagamit an Saiyang sangkap na pamantayan nin hustisya tanganing madeterminaran an satong integridad. Siring man, si David nagsabi: “Si Jehova mismo an matao nin hatol sa mga tawo. Hokoman mo ako, O Jehova, oyon sa sakong katanosan asin oyon sa sakong integridad na yaon sa sako. . . . Asin binabalo nin Dios, bilang matanos, an satong puso asin mga bato.” (Sal. 7:8, 9) Aram niato na puedeng helingon nin Dios an kairairaromi kan pagkatawong nasa laog, an piguratibong “puso asin mga bato.” Pero, kaipuhan niatong girumdomon kun ano an hineheling nia. Siring kan sinabi ni David, hohokoman kita ni Jehova oyon sa satong integridad.

14. Taano ta maninigo na nungka niatong paghonaon na huli sa satong pagkabakong sangkap asin pagigin makasalan dai na kita makakapagpadanay nin integridad?

¹⁴ Imahinara na sinisiyasat ni Jehova Dios an binilyon na puso nin katawohan ngonyan. (1 Cron. 28:9) Gurano kaparate na nakakanompong sia nin saro na nagpapadanay nin integridad bilang Kristiano? Medyo bihira nanggad iyan! Minsan siring, maninigo na dai niato paghonaon na kita biyong may depekto na huli kaiyan dai na kita makakapagpadanay nin integridad. Sa kabaliktaran, may marahay kitang dahelan na magtiwala, siring kan ginibo ni David asin Job, na manonompongan kita ni Jehova na nagpapadanay nin integridad, minsan ngani kita bakong sangkap. Girumdomon, an pagkasangkap bakong garantiya na kita makakapagpadanay kan satong integridad. Tolo sanang sangkap na tawo an nabuhay sa dagang ini, asin nasudya an duwa, si Adan asin Eva, sa pagpadanay nin integridad. Pero, minilyon na bakong sangkap na tawo an nagin mapanggana sa paggibo kaiyan. Puede man kamong magin mapanggana.

3. Mahalagang Marhay sa Satong Paglaom

15. Paano ipinaheling ni David na an integridad mahalagang marhay sa satong paglaom sa ngapit?

¹⁵ Huling an integridad iyo an basehan kan paghokom ni Jehova sa sato, mahalagang marhay iyan sa satong paglaom sa ngapit. Aram ni David na totoo ini. (Basahon an Salmo 41:12.) Pinahalagahan nia an paglaom na kamtan an paborableng atension nin Dios sagkod lamang. Arog kan tunay na mga Kristiano ngonyan, naglaom si David na mabuhay sagkod lamang, na padagos na orog pang minadayupot ki Jehova Dios mantang naglilingkod sa saiya. Aram ni David na kaipuhan niang papagdanayon an saiyang integridad tanganing maheling nia an kaotoban kan paglaom na iyan. Siring man, kita sinusuportaran, tinotokdoan, ginigiyahan, asin binebendisyonan ni Jehova mantang pinapagdadanay niato an satong integridad.

16, 17. (a) Taano ta desidido kamo na pirmeng papagdanayon an saindong integridad? (b) Anong mga hapot an ipapaliwanag sa sunod na artikulo?

¹⁶ Mahalagang marhay an paglaom sa kaogmahan niato sa presente. Puedeng itao kaiyan sa sato an kagayagayahan na kaipuhan niato tanganing mapangganahan an masakit na mga panahon. An paglaom puedeng makaprotehir man sa satong kaisipan. Tandaan, an paglaom iinaagid kan Biblia sa sarong helmet. (1 Tes. 5:8) Kun paanong pinoprotehiran nin helmet an payo nin soldados na nasa ralaban, pinoprotehiran  man nin paglaom an satong isip sa negatibo asin mandatang mga kaisipan, na pinapalakop ni Satanas sa naghihingagdan saka daan nang kinaban na ini. Tunay nanggad, mayo nin kahulogan an buhay kun mayo kita nin paglaom. Kaipuhan na sadiosan niatong siyasaton an satong sadiri, na maingat na kinokonsiderar an kamugtakan kan sato mismong integridad asin an paglaom na konektado dian. Dai paglingawan na paagi sa pagdadanay na may integridad, sinusuportaran nindo an soberaniya ni Jehova asin pinoprotehiran nindo an mahalagang marhay na paglaom sa ngapit. Logod na pirme nindong papagdanayon an saindong integridad!

¹⁷ Mantang an integridad importanteng marhay, kaipuhan niatong estudyaran an nagkapira pang hapot. Paano kita magkakaigwa nin integridad? Paano niato iyan mapagdadanay? Asin ano an puedeng gibohon kun may saro na dai nagpadanay kaiyan sa laog nin sarong panahon? Ipapaliwanag sa sunod na artikulo an mga hapot na ini.

[Nota sa Ibaba]

Ano an Isisimbag Nindo?

• Ano an integridad?

• Paano an integridad konektado sa isyu nin unibersal na soberaniya?

• Paano an integridad nagtatao nin basehan para sa satong paglaom?

[Mga Hapot Para sa Pag-adal]

[Mga Ritrato sa pahina 5]

An pangaroaldaw na buhay nag-aatubang nin dakol na kadepisilan sa satong integridad