An Lingkod ni Jehova​—‘Tinusok Huli sa Satong Paglapas’

“Tinusok sia huli sa satong paglapas; rinonot sia huli sa satong mga sala. . . . Huli kan saiyang mga lugad naomayan kita.”​—ISA. 53:5.

1. Ano an maninigo niatong girumdomon kun sineselebrar niato an Memorial, asin anong hula an matabang sa sato na gibohon iyan?

SINESELEBRAR niato an Memorial tanganing girumdomon an kagadanan ni Cristo asin an gabos na nagibo kan saiyang kagadanan saka pagkabuhay liwat. Ipinapagirumdom sa sato kan Memorial an dapit sa pagbindikar kan soberaniya ni Jehova, pagpakangbanal kan ngaran nia, asin pagkaotob kan katuyohan nia, kaiba an pagliligtas sa katawohan. Apuera sa nakasurat sa Isaias 53:3-12, tibaad mayo na nin ibang hula sa Biblia na mas marahay na naglaladawan kan atang ni Cristo asin kan nagigibo kaiyan. Ihinula ni Isaias an mga pagsakit kan Lingkod asin nagtao sia nin espesipikong mga detalye manongod sa kagadanan ni Cristo saka sa mga bendisyon na magigin resulta kan kagadanan nia para sa saiyang linahidan na mga tugang patin sa “ibang mga karnero” nia.​—Juan 10:16.

2. Prueba nin ano an hula ni Isaias, asin ano an magigin epekto kaiyan sa sato?

² Pitong siglo bago mamundag si Jesus sa daga, pinasabngan ni Jehova si Isaias na ihula na an piniling Lingkod Nia magigin maimbod dawa baloon nin lubos. An mismong bagay na ini prueba kan lubos na kompiansa ni Jehova sa kaimbodan kan Aki nia. Mantang sinisiyasat niato an hulang ini, an satong puso mapapano nin pagpasalamat asin an satong pagtubod mapapakosog.

“Dinuhagi” Asin Ibinilang “na Daing Halaga”

3. Taano ta an mga Judio maninigo kutanang maogmang nag-ako ki Jesus, alagad paano ninda sia trinatar?

³ Basahon an Isaias 53:3. Imahinara na sana  kun ano an nagin kahulogan para sa bugtong na Aki nin Dios na isakripisyo an kagayagayahan nin paglilingkod na kaiba kan Ama nia asin magdigdi sa daga tanganing itao an buhay nia bilang atang tanganing iligtas an katawohan sa kasalan saka kagadanan! (Fil. 2:5-8) An katuyohan kan atang nia iyo na magtao nin tunay na kapatawadan nin mga kasalan, na ipinanganino sana kan pagdolot nin mga atang na hayop segun sa Ley ni Moises. (Heb. 10:1-4) Bako daw na sia maninigo kutanang maogmang inako asin tinawan nin onra, kisiera kan mga Judio, na naghahalat sa ipinanugang Mesiyas? (Juan 6:14) Imbes, an Cristo “dinuhagi” kan mga Judio, asin ‘ibinilang ninda sia na daing halaga,’ na ihinula ni Isaias. Si apostol Juan nagsurat: “Sia nagduman sa saiyang sadiring harong, alagad dai sia inako kan saiyang sadiring banwaan.” (Juan 1:11) Sinabi ni apostol Pedro sa mga Judio: “An Dios kan satong mga apoon . . . nagpamuraway kan saiyang Lingkod, si Jesus, na saindong itinao asin pinaindahan, sa saindong kabtang, sa atubangan ni Pilato, kan magdesisyon ini na butasan sia. Iyo, pinaindahan nindo an sarong iyan na banal asin matanos.”​—Gibo 3:13, 14.

4. Paano si Jesus nagkaigwa nin pakaaram dapit sa helang?

⁴ Ihinula man ni Isaias na si Jesus itinalaga na magkaigwa nin “pakaaram dapit sa helang.” Durante kan ministeryo nia, may beses na si Jesus napagal nanggad, alagad mayo nin nagpaparisa na sia nagkahelang. (Juan 4:6) Minsan siring, talagang nagkaigwa sia nin pakaaram dapit sa mga helang kan mga hinulitan nia. Naherak sia sa sainda asin pinaomayan nia an dakol. (Mar. 1:32-34) Sa siring, inotob ni Jesus an hula na nagsasabi: “Totoong gayo na an satong mga helang iyo an saiyang pinasan; asin kun manongod sa satong mga kakologan, tinios nia iyan.”​—Isa. 53:4a; Mat. 8:16, 17.

Garo “Linugad nin Dios”

5. Paano minansay nin dakol sa mga Judio an kagadanan ni Jesus, asin taano ta nakadagdag ini sa pagsakit nia?

⁵ Basahon an Isaias 53:4b. Dai nasabotan kan dakol sa mga katemporanyo ni Jesus an dahelan kan pagsakit asin kagadanan nia. Naniwala sinda na pinapadusahan sia nin Dios, na garo baga sia dinadamat nin makangingiring helang. (Mat. 27:38-44) Si Jesus inakusaran kan mga Judio nin paglanghad. (Mar. 14:61-64; Juan 10:33) Siempre, si Jesus bakong parakasala ni paralanghad man. Alagad huli sa dakulang pagkamoot nia sa saiyang Ama, an mismong ideya na sia magagadan na inakusaran nin paglanghad siertong nakadagdag sa pagsakit nia bilang Lingkod ni Jehova. Minsan siring, andam siang magpasakop sa kabotan ni Jehova.​—Mat. 26:39.

6, 7. Sa anong paagi ‘rinonot’ ni Jehova an maimbod na Lingkod nia, asin taano ta nagtao ini nin ‘kaogmahan’ sa Dios?

⁶ Madali niatong masabotan an sinabi kan hula ni Isaias na si Cristo mamansayon nin iba na “linugad nin Dios,” alagad depisil na masabotan an sinabi kan hula na: “Si Jehova mismo naogma sa pagronot sa saiya.” (Isa. 53:10) Mantang sinabi man ni Jehova: “Uya! An sakong lingkod, . . . an sakong pinili, na inooyonan kan sakong kalag,” paano si Jehova posibleng ‘magin maogma sa pagronot sa saiya’? (Isa. 42:1) Sa anong paagi puedeng sabihon na ini nagtao nin kagayagayahan ki Jehova?

⁷ Tanganing masabotan an kabtang na ini kan hula, maninigo niatong girumdomon na kan kinuestion ni Satanas an soberaniya ni Jehova, ibinugtak nia sa pagduda an kaimbodan kan gabos na lingkod nin Dios sa langit asin sa daga. (Job 1:9-11; 2:3-5) Paagi sa pagdanay ni Jesus na maimbod sagkod sa kagadanan, itinao nia an sangkap na  simbag sa kuestion ni Satanas. Sa siring, minsan ngani itinogot ni Jehova na si Cristo gadanon kan mga kaiwal nia, mayong duda na nakolgan an boot ni Jehova kan maheling nia na ginagadan an piniling Lingkod nia. Minsan siring, naogma nanggad si Jehova kan maheling nia an lubos na kaimbodan kan Aki nia. (Tal. 27:11) Apuera kaini, an pakaaram ni Jehova kan mga pakinabang na itatao kan kagadanan kan Aki nia sa nagsosolsol na mga tawo nagtao sa saiya nin dakulang kagayagayahan.​—Luc. 15:7.

‘Tinusok Huli sa Satong Paglapas’

8, 9. (a) Paano si Jesus ‘tinusok huli sa satong paglapas’? (b) Paano ini pinatunayan ni Pedro?

⁸ Basahon an Isaias 53:6. Siring sa nalagalag na mga karnero, an makasalan na mga tawo naglalagawlagaw, na naghihingoang makalda sa helang asin kagadanan na minana ki Adan. (1 Ped. 2:25) Huling bakong sangkap, mayo ni saro sa mga naggikan ki Adan an makakabalukat sa nawara ni Adan. (Sal. 49:7) Minsan siring, huli sa dakulang pagkamoot nia, ‘pinangyari ni Jehova mismo na an sala niato gabos makanuparan kan sarong iyan,’ an saiyang namomotan na Aki asin piniling Lingkod. Paagi sa pag-oyon na ‘tusokon huli sa satong paglapas’ asin ‘ronoton huli sa satong mga sala,’ dinara ni Cristo an satong mga kasalan sa hariging pasakitan asin nagadan para sa sato.

⁹ Si apostol Pedro nagsurat: “Sa dalan na ini kamo inapod, huli ta minsan si Cristo nagsakit para sa saindo, na winalatan kamo nin modelo tanganing sunodon nindo nin estrikto an saiyang mga lakad. Sia mismo an nagdara kan satong mga kasalan sa saiyang sadiring hawak duman sa harigi, tanganing kita mahalean nin mga kasalan asin mabuhay na may katanosan.” Dangan, sa pagkotar sa hula ni Isaias, sinabi pa ni Pedro: “Asin ‘huli kan saiyang mga labod kamo nagkaoromayan.’” (1 Ped. 2:21, 24; Isa. 53:5) Binukasan kaini an dalan para sa mga parakasala na makipag-ulian sa Dios, siring kan sinabi pa ni Pedro: “Si Cristo nagadan nin sararoan sana mapadapit sa mga kasalan, sarong matanos para sa mga bakong matanos, tanganing magiyahan nia kamo sa Dios.”​—1 Ped. 3:18.

‘Dinara Siring sa Sarong Kordero Pasiring sa Bunoan’

10. (a) Paano si Jesus ilinadawan ni Juan na Bautisador? (b) Taano ta nagin angay an mga tataramon ni Juan?

¹⁰ Basahon an Isaias 53:7, 8. Kan maheling ni Juan na Bautisador na nagdadangadang si Jesus, sia nagkagsing: “Uya, an Kordero nin Dios na naghahale kan kasalan kan kinaban!” (Juan 1:29) Sa pagtaram dapit ki Jesus bilang Kordero, tibaad an nasa isip ni Juan iyo an mga tataramon ni Isaias: “Sia dinadara siring sa sarong kordero pasiring sa bunoan.” (Isa. 53:7, nota sa ibaba) “Pinabolos nia an saiyang kalag sagkod sa mismong kagadanan,” an ihinula ni Isaias. (Isa. 53:12) Interesante nanggad, kan bangging ponan ni Jesus an Memorial kan kagadanan nia, sia nagtao nin sarong kopa nin arak sa 11 maimbod na apostol asin nagsabi: “Ini nangangahulogan kan sakong ‘dugo kan tipan,’ na papaboloson para sa dakol para sa kapatawadan nin mga kasalan.”​—Mat. 26:28.

11, 12. (a) An pagigin andam ni Isaac na idolot nag-iilustrar nin ano manongod sa atang ni Cristo? (b) Kun sineselebrar niato an Memorial, ano an maninigo niatong girumdomon manongod sa Orog na Dakulang Abraham, si Jehova?

¹¹ Si Jesus, arog ni Isaac kan suanoy, nagin andam na idolot bilang atang sa altar kan kabotan ni Jehova para sa saiya. (Gen. 22:1, 2, 9-13; Heb. 10:5-10) Minsan ngani si Isaac gikan sa boot na nag-oyon na iatang, si Abraham an nagprobar na idolot an atang. (Heb. 11:17) Kaagid kaiyan, gikan sa boot na inako ni Jesus na sia magagadan, alagad si Jehova an Autor kan areglo kan pantubos. An pag-atang sa Aki nia kapahayagan kan hararom na pagkamoot nin Dios sa katawohan.

¹² Si Jesus mismo nagsabi: “An Dios namoot na gayo sa kinaban kaya itinao nia an saiyang Aking bugtong, tanganing an lambang nagtutubod sa saiya dai malaglag kundi magkaigwa nin buhay na daing katapusan.” (Juan 3:16) Si apostol Pablo nagsurat: “Ipinapamidbid nin Dios an saiya mismong pagkamoot sa sato sa paagi na, mantang kita mga parakasala pa, si Cristo nagadan para sa sato.” (Roma 5:8) Kun siring, minsan ngani tinatawan niato nin onra si Cristo paagi sa paggirumdom sa kagadanan nia, dai niato noarin man maninigong paglingawan na an nagpagin posible kan areglo sa pag-atang iyo an Orog na Dakulang  Abraham, si Jehova. Sineselebrar niato an Memorial para sa kaomawan nia.

An Lingkod Nagtatao nin “Matanos na Kamugtakan sa Dakol”

13, 14. Paano an Lingkod ni Jehova nagtatao “nin matanos na kamugtakan sa dakol”?

¹³ Basahon an Isaias 53:11, 12. Dapit sa piniling Lingkod ni Jehova, sia nagsabi: “An sarong matanos, an sakong lingkod, magtatao nin matanos na kamugtakan sa dakol na tawo.” Sa anong paagi? An katapusan kan bersikulo 12 nagtatao sa sato nin giya sa simbag. ‘Asin sia [an Lingkod] nangoltanan para sa mga paralapas.’ An gabos na naggikan ki Adan namundag na parakasala, “mga paralapas,” asin kun siring nag-aako kan “ibinabayad nin kasalan,” na iyo an kagadanan. (Roma 5:12; 6:23) Kaipuhan an pakipag-ulian sa pag-oltanan ni Jehova asin nin makasalan na mga tawo. An kapitulo 53 kan hula ni Isaias may magayon na paglaladawan kun paano si Jesus “nangoltanan” para sa makasalan na katawohan, na nagsasabi: “An padusa na nanonongod sa satong katoninongan nasa saiya, asin nin huli kan saiyang mga lugad naomayan kita.”​—Isa. 53:5.

¹⁴ Paagi sa pagdara nia mismo kan satong mga kasalan asin pagkagadan para sa sato, si Cristo nagtao “nin matanos na kamugtakan sa dakol na tawo.” Si Pablo nagsurat: “Pinagmarahay nin Dios na dian sa saiya [ki Cristo] mamugtak an bilog na kapanoan, asin paagi sa saiya papangyarihon na makipag-ulian giraray sa saiya an gabos na ibang bagay paagi sa pakikipagkatoninongan paagi sa dugo na saiyang pinabolos sa hariging pasakitan, baga man sinda mga bagay digdi sa daga o mga bagay sa kalangitan.”​—Col. 1:19, 20.

15. (a) Sairisay an “mga bagay sa kalangitan” na nasambitan ni Pablo? (b) Sairisay sana an tinawan nin deretso na magkakan asin mag-inom kan mga emblema sa Memorial, asin taano?

¹⁵ An “mga bagay sa kalangitan” na ipinakipag-ulian ki Jehova paagi sa pinabolos na dugo ni Cristo iyo an linahidan na mga Kristiano, na inapod tanganing maghade sa kalangitan kaiba ni Cristo. An mga Kristiano na “may kabtang sa langitnon na pag-apod” ipinahayag na “matanos para sa buhay.” (Heb. 3:1; Roma 5:1, 18) Dangan, pinaniaki sinda ni Jehova bilang espirituwal na mga aki. An banal na espiritu nagpapatotoo sa sainda na sinda “kaibang mga paramana ni Cristo,” na inapod na magin mga hade asin saserdote sa langitnon na Kahadean nia. (Roma 8:15-17; Kap. 5:9, 10) Sinda nagin kabtang kan espirituwal na Israel, an “Israel nin Dios,” asin sinda dinara sa “bagong tipan.” (Jer. 31:31-34; Gal. 6:16) Bilang mga miembro kan bagong tipan, sinda tinawan nin deretso na magkakan asin mag-inom kan mga emblema sa Memorial, kaiba an kopa nin mapulang arak, na dapit dian si Jesus nagsabi: “An kopang ini nangangahulogan kan bagong tipan paagi sa sakong dugo, na papaboloson para sa saindo.”​—Luc. 22:20.

16. Ano an “mga bagay digdi sa daga,” asin sa anong paagi sinda tinatawan nin matanos na kamugtakan sa atubangan ni Jehova?

¹⁶ An “mga bagay digdi sa daga” iyo an ibang mga karnero ni Cristo, na may paglaom na mabuhay sagkod lamang sa daga. An piniling Lingkod ni Jehova nagtatao man sa mga ini nin matanos na kamugtakan sa atubangan ni Jehova. Huling may pagtubod sinda sa atang na pantubos ni Cristo asin sa siring “linabahan ninda an saindang haralabang gubing asin pinaputi iyan sa dugo kan Kordero,” sinda ipinapahayag ni Jehova na matanos, bako bilang espirituwal na mga aki, kundi bilang  mga katood nia, na tinatawan sinda kan makangangalas na oportunidad na makaligtas sa “dakulang kahorasaan.” (Kap. 7:9, 10, 14; Sant. 2:23) Huling bakong kabtang kan bagong tipan asin kun siring mayo kan paglaom na mabuhay sa langit, an ibang mga karnerong ini dai nagkakakan asin dai nag-iinom kan mga emblema sa Memorial alagad nag-aatender bilang magalang na mga nagmamasid.

An Gabos na Pagpasalamat Para ki Jehova Asin sa Inooyonan na Lingkod Nia!

17. Paanong an pag-estudyar kan mga hula sa Isaias na nakasentro sa Lingkod nakatabang sa sato na andamon an satong isip para sa Memorial?

¹⁷ An pagsiyasat sa mga hula sa Isaias na nakasentro sa Lingkod nagin marahayon na paagi na andamon an satong isip para sa Memorial kan kagadanan ni Cristo. Tinatabangan kita kaiyan na ‘magheling nin maingat sa Pangenot na Ahente asin Parasangkap kan satong pagtubod.’ (Heb. 12:2) Nanodan niato na an Aki nin Dios bakong rebelde. Bakong arog ni Satanas, sia naoogmang marhay sa pagigin tinokdoan ni Jehova, na minimidbid Sia bilang an Soberanong Kagurangnan. Nasabotan niato na durante kan ministeryo ni Jesus sa daga, sia nagpaheling nin pagmalasakit sa mga tawo na hinulitan nia, na pinaomayan an dakol sa sainda sa pisikal sagkod espirituwal. Sa siring, ipinaheling nia an gigibohon nia bilang Mesiyanikong Hade sa bagong sistema nin mga bagay kun ‘establisaron na nia an hustisya sa daga.’ (Isa. 42:4) Bilang “liwanag kan mga nasyon,” an kaigotan na ipinaheling nia sa paghuhulit kan Kahadean nagpapagirumdom sa mga parasunod nia na maigot na ihulit an maogmang bareta sa bilog na daga.​—Isa. 42:6.

18. Taano ta huli sa hula ni Isaias an satong puso napapano nin pagpasalamat ki Jehova asin sa maimbod na Lingkod nia?

¹⁸ An hula ni Isaias nagpapararom man kan satong pakasabot sa dakulang sakripisyo na ginibo ni Jehova kan sugoon nia na magdigdi sa daga an namomotan niang Aki tanganing magsakit asin magadan para sa sato. Si Jehova naogmang marhay, bako sa pakaheling sa Aki nia na nagsasakit, kundi sa pakamasid sa lubos na kaimbodan ni Jesus sagkod sa mismong kagadanan. Kita maninigo man na maogmang marhay arog ni Jehova, na minimidbid an gabos na ginibo ni Jesus tanganing patunayan na si Satanas putikon asin pakangbanalon an ngaran ni Jehova, sa siring ibinibindikar an pagigin may deretso kan Saiyang soberaniya. Dugang pa, dinara mismo ni Cristo an satong mga kasalan asin nagadan para sa sato. Paagi kaiyan, pinagin posible nia na magkaigwa nin matanos na kamugtakan sa atubangan ni Jehova an sadangoton na aripompon nin saiyang linahidan na mga tugang asin an ibang mga karnero. Mantang kita matiripon para sa Memorial, mapano logod an satong puso nin pagpasalamat ki Jehova asin sa maimbod na Lingkod nia.

Bilang Repaso

• Sa anong paagi na si Jehova “naogma” sa “pagronot” sa Aki nia?

• Paano si Jesus ‘tinusok huli sa satong paglapas’?

• Paano an Lingkod ‘nagtao nin matanos na kamugtakan sa dakol’?

• Paano an pag-adal kan mga hula mapadapit sa Lingkod iinandam an saindong isip asin puso para sa Memorial?

[Mga Hapot Para sa Pag-adal]

[Ritrato sa pahina 26]

“Sia dinuhagi, asin ibinilang niato sia na daing halaga”

[Ritrato sa pahina 28]

“Pinabolos nia an saiyang kalag sagkod sa mismong kagadanan”

[Ritrato sa pahina 29]

An “ibang mga karnero” nag-aatender sa Memorial bilang magalang na mga nagmamasid