“Iyo Ini an Dalan. Maglakaw Kamo Dian”
“Iyo Ini an Dalan. Maglakaw Kamo Dian”
An Estorya ni Emilia Pederson
Isinaysay ni Ruth E. Pappas
AN SAKONG ina, si Emilia Pederson, namundag kan 1878. Minsan ngani nagin maestra sia, an gusto nia talaga iyo na gamiton an saiyang buhay sa pagtabang sa mga tawo na rumani sa Dios. An ebidensia kan kamawotan na iyan ni Nanay iyo an sarong dakulaon na maleta na yaon sa samong harong sa sadit na banwaan nin Jasper, Minnesota, E.U.A. Nagkaigwa sia kaiyan huling gusto niang gamiton iyan sa pagdara kan saiyang mga rogaring sa Tsina, na duman gusto niang maglingkod bilang misyonera. Alagad, kan magadan an saiyang ina, kinaipuhan niang lingawan an saiyang mga plano asin magdanay sa harong tanganing asikasohon an saiyang mga tugang na nguhod sa saiya. Kan 1907, nagpakasal sia ki Theodore Holien. Namundag ako kan Disyembre 2, 1925—an kangudhan sa pitong aki.
May mga hapot si Nanay sa Biblia na maigot niang hinanap an simbag. An sarong hapot nia iyo an mapadapit sa katokdoan na an impierno sarong lugar nin pagpasakit sa kalayo para sa mga maraot. Hinapot nia an sarong nagbibisitang superbisor kan Iglesia Luterano kun saen nia makukua an nagsusuportar na teksto sa Biblia para sa katokdoan na ini. An superbisor garo man sana nagsabi sa saiya na bakong mahalaga kun ano an sinasabi kan Biblia—an impierno nin pagpasakit sa kalayo kaipuhan na itokdo.
Napanigoan an Saiyang Espirituwal na Pagkagutom
Dai nahaloy pagkatapos kan 1900, an tugang ni Nanay, si Emma, nagpasiring sa Northfield, Minnesota, tanganing mag-adal nin musika. Nag-istar sia sa harong ni Milius Christianson, an saiyang maestro, na an agom sarong Estudyante sa Biblia, na apod kaidto sa Mga Saksi ni Jehova. Nasabi ni Emma na may tugang sia na debotong parabasa kan Biblia. Dai nahaloy, sinuratan ni Mrs. Christianson si Nanay, na sinisimbag an mga hapot ni Nanay sa Biblia.
Sarong aldaw, sarong Estudyante sa Biblia na an ngaran Lora Oathout an nag-abot sakay nin tren hale sa Sioux Falls, South Dakota, tanganing maghulit sa Jasper. Pinag-adalan ni Nanay an mga literatura sa Biblia na inako nia, asin kan 1915, pinonan na niang isabi sa iba an mga katotoohan sa Biblia asin idistribwir an mga literaturang itinao ni Lora.
Kan 1916, naaraman ni Nanay na maduman si Charles Taze Russell sa kombension sa Sioux City, Iowa. Gusto niang mag-atender. Kan panahon na iyan, lima na an aki ni Nanay, asin si Marvin, an nguhod, limang bulan pa sana. Minsan siring, nagtren sia nin mga 160 kilometros, kaiba an gabos niang aki, pasiring sa Sioux City tanganing mag-atender sa kombension. Nadangog nia an mga pahayag ni Tugang na Russell, nagheling sia kan “Photo-Drama of Creation,” asin nabautismohan sia. Pagpuli sa harong, nagsurat sia nin sarong artikulo manongod sa kombension, na ipinublikar sa Jasper Journal.
Kan 1922, kabilang si Nanay sa mga 18,000 na nag-atender kan kombension sa Cedar Point, Ohio. Pagkatapos kan kombension na iyan, dai sia noarin Isa. 30:21.
man uminontok sa pagpaisi manongod sa Kahadean nin Dios. Garo man sana sinasadol nia kami na maghimate sa konseho: “Iyo ini an dalan. Maglakaw kamo dian.”—Bunga kan Ministeryo Dapit sa Kahadean
Sa enot na mga taon kan dekada nin 1920, an sakong mga magurang nagbalyo sa ibang harong sa luwas nin Jasper. Igwa si Tatay nin asensadong negosyo asin dakulang pamilya na dapat suportaran. Daing gayo pinag-adalan ni Tatay an Biblia arog kan ginibo ni Nanay, alagad bilog na puso niang sinuportaran an paghuhulit asin maogma niang inaako sa samong harong an nagbibiaheng mga ministro, na inaapod kaidtong mga pilgrim. Sa parate, kun an saro sa nagbibiaheng mga tugang nagpapahayag sa samong harong, mga sanggatos o labi pa an nag-aatender—na nagsusurusoan sa samong sala, komedor, asin kuarto.
Kan ako mga siete anyos na, an sakong inaon na si Lettie nag-apod sa telepono asin nagsabi na an saiyang mga kataed, si Ed Larson asin an agom kaini, gustong mag-adal nin Biblia. Inako tolos ninda an mga katotoohan sa Biblia asin kan huri inimbitaran ninda na umiba sa pag-adal an saro pang kataed, si Martha Van Daalen, na may walong aki. Si Martha asin an bilog niang pamilya nagin man mga Estudyante sa Biblia. *
Kan panahon na iyan, si Gordon Kammerud, sarong hoben na nakaistar mga pira sanang milya an rayo sa samo, nagpoon na magtrabaho ki Tatay. Si Gordon pinatanidan: “Mag-ingat ka sa mga aking babae kan among ta. Ibang klase an saindang relihion.” Minsan siring, nagpoon si Gordon na mag-adal kan Biblia asin dai nahaloy nakombensir na nanompongan na nia an katotoohan. Pakalihis nin tolong bulan, sia nabautismohan. An saiyang mga magurang nagtubod man, asin an mga pamilya mi—an mga Holien, Kammerud, asin Van Daalen—nagin dayupot na magkakatood.
Napakosog kan mga Kombension
Naparigon na marhay an boot ni Nanay kan kombension sa Cedar Point kaya habo niang may malipasan siang arin man na kombension. Kaya an nagigirumdoman ko sa sakong pagkaaki iyo an mga pagbiahe nin harayo tanganing makaatender sa mga pagtiripon na idto. Importante an kombension sa Columbus, Ohio, kan 1931, huli ta kaidto inako an ngaran na Mga Saksi ni Jehova. (Isa. 43:10-12) Malinaw ko man na nagigirumdoman an kombension sa Washington, D.C., kan 1935, na duman ipinamidbid paagi sa sarong historikong pahayag an “dakulang kaburunyogan,” o “dakulang kadaklan,” na sinasambit sa Kapahayagan. (Kap. 7:9; King James Version) Kaiba an sakong mga tugang na si Lilian asin Eunice sa labing 800 na nabautismohan duman.
An samong pamilya nagbiahe pasiring sa mga kombension sa Columbus, Ohio, kan 1937; Seattle, Washington, kan 1938; asin Siudad nin Nueva York kan 1939. Nag-iba sa samo an pamilyang Van Daalen saka Kammerud patin iba pa, asin nagkamping kami mantang nasa dalan. Nagpakasal si Eunice ki
Leo Van Daalen kan 1940, asin nagpayunir sinda. Kan taon man sanang iyan, nagpakasal si Lilian ki Gordon Kammerud, asin nagpayunir man sinda.Espesyal an kombension kan 1941 na ginibo sa St. Louis, Missouri. Rinibong hoben duman an nag-ako kan librong Children. An kombension na iyan sarong panahon nin dakulang pagbabago para sa sako. Dai nahaloy pakatapos kaiyan, kan Setyembre 1, 1941, nagpayunir ako kaiba kan sakong tugang na si Marvin asin kan saiyang agom, si Joyce. Kinse anyos ako kaidto.
Sa samong agrikultural na komunidad, depisil para sa mga tugang na makaatender gabos sa kombension huli ta sa parate ginigibo an mga ini durante nin tig-anihan. Kaya pagkatapos kan mga kombension, rinerepaso mi iyan sa likod kan samong harong para sa kapakinabangan kan mga dai nakaatender. Maogmang mga pagtiripon ini.
Gilead Asin mga Destino sa Ibang Nasyon
Kan Pebrero 1943, inestablisar an Paadalan sa Gilead tanganing sanayon an mga payunir para sa pagmimisyonero. Kaiba sa enot na klase an anom na miembro kan pamilyang Van Daalen—an magturugang na si Emil, Arthur, Homer, asin Leo; an saindang pinsan, si Donald; saka an agom ni Leo, na sakong tugang, si Eunice. An kaogmahan mi may kasalak na kamondoan kan magpaaram sinda, huling dai mi aram kun noarin mi sinda maheheling giraray. Pagkagradwar, sinda gabos na anom idinestino sa Puerto Rico, na kan panahon na idto, mayo pang sarong dosena an Saksi duman.
Pakalihis nin sarong taon, si Lilian asin Gordon saka si Marvin asin Joyce nag-adal sa ikatolong klase kan Gilead. Idinestino man sinda sa Puerto Rico. Dangan, kan Setyembre 1944, sa edad na 18, nag-adal ako sa ikaapat na klase kan Gilead. Pagkagradwar kan Pebrero 1945, nag-iba ako sa sakong mga tugang sa Puerto Rico. Sarong bagong eksperyensia nanggad iyan para sa sako! Minsan ngani depisil pag-adalan an lenguaheng Kastila, dai nahaloy an nagkapira sa samo nagkokondukta na nin tiglalabing 20 pag-adal sa Biblia. Binendisyonan ni Jehova an gibohon. Ngonyan, igwa na nin mga 25,000 na Saksi sa Puerto Rico!
Nangyari an mga Trahedya sa Pamilya Mi
Si Leo asin Eunice nagdanay sa Puerto Rico pagkatapos na mamundag an saindang aki, si Mark, kan 1950. Kan 1952 plinano nindang magbakasyon tanganing dalawon an mga paryente sa samong lugar. Kan Abril 11, nagbiahe sinda sakay nin eroplano. Makaturotriste, dai nahaloy pagkatapos na maglayog an eroplano, iyan buminagsak sa kadagatan. Si Leo asin Eunice nagadan. An dos anyos na si Mark nakuang naglalatawlataw sa kadagatan. Isinalya sia sa barsang salbabida nin sarong nakaligtas saka ginibo sa saiya an artipisyal na pagpahangos—asin sia nabuhay. *
Pakalihis nin limang taon, kan Marso 7, 1957, pasiring kaidto sa Kingdom Hall si Nanay asin Tatay kan an goma kan saindang lunadan kuminupos. Mantang riniribayan ni Tatay an goma sa may gilid kan tinampo, sia nabunggo nin kotse asin nagadan tolos. Mga 600 an nag-atender sa pahayag sa lobong, asin sarong marahayon na patotoo an ikinatao sa komunidad, na dian iginagalang na marhay si Tatay.
Bagong mga Destino
Kan madali nang magadan si Tatay, nadestino ako sa Argentina. Kan Agosto 1957, nag-abot ako sa siudad nin Mendoza sa mga bulod na nasa ibaba kan Kabukidan nin Andes. Kan 1958, si George Pappas, sarong naggradwar sa ika-30 klase kan Gilead, idinestino sa Argentina. Nagin dayupot na magkatood kami ni George, asin ikinasal kami kan Abril 1960. Kan 1961, nagadan si Nanay sa edad na 83. Sia
maimbod na naglakaw sa dalan nin tunay na pagsamba asin nakatabang sa kadakol pang iba na gibohon man iyan.Sa laog nin sampulong taon, naglingkod kami ni George kaiba an iba pang misyonero sa manlaenlaen na erokan nin mga misyonero. Dangan pitong taon kami sa gibohon sa sirkito. Kan 1975 nagbalik kami sa Estados Unidos tanganing tabangan an mga kapamilya mi na may helang. Kan 1980 inimbitaran an sakong agom sa gibohon sa sirkito sa langtad na Kastila an lenguahe. Kaidto, sa Estados Unidos, mga 600 an kongregasyon na Kastila an lenguahe. Sa laog nin 26 na taon, sinongko mi an dakol sa mga ini asin naheling mi na nagdakol an mga kongregasyon sagkod na maglabi nang 3,000.
Naglakaw Sinda sa “Dalan”
Ipinaggayagaya man ni Nanay na maheling na naglaog sa bilog na panahon na ministeryo an mas hoben na mga kapamilya nia. Halimbawa, si Carol, na aki kan matua kong tugang na si Ester, nagpoon na magpayunir kan 1953. Nagpakasal sia ki Dennis Trumbore, asin poon kaidto magkaibanan sinda sa bilog na panahon na ministeryo. An saro pang aki ni Ester, si Lois, nagpakasal ki Wendell Jensen. Nag-adal sinda sa ika-41 klase kan Gilead asin nagmisyonero nin 15 taon sa Nigeria. Si Mark, na an mga magurang nagadan sa pagbagsak kan eroplano, inampon asin pinadakula kan tugang ni Leo na si Ruth La Londe, asin kan saiyang agom, si Curtiss. Si Mark asin an saiyang agom, si Lavonne, nagpayunir sa laog nin dakol na taon asin pinadakula ninda an saindang apat na aki oyon sa “dalan.”—Isa. 30:21.
Si Orlen, an solamenteng tugang ko na buhay pa, mga 95 anyos na. Maimbod pa siang naglilingkod ki Jehova. Kami ni George magayagaya pang nagpapadagos sa bilog na panahon na ministeryo.
An Nawalat ni Nanay
Ngonyan yaon na sa sako an saro sa mga rogaring na pinapahalagahan na marhay ni Nanay—an saiyang lamesa. Regalo iyan ni Tatay sa saiya kan sinda ikasal. Sa saro sa mga sulong-sulong kaiyan yaon an saiyang lumang scrapbook, na igwa nin mga surat asin ipinublikar na mga artikulo sa diaryo na sinurat nia asin nagtao nin marahayon na patotoo dapit sa Kahadean. An nagkapira sa mga ini kaidto pang enot na mga taon nin 1900. Yaon man sa lamesa an iningatan na mga surat hale sa mga aki ni Nanay na misyonero. Ikinakaogma ko nanggad na basahon iyan nin paorootro! Asin an mga surat nia sa samo pirmeng nakakaparigon na marhay asin pano nin positibong mga saboot. Dai noarin man naotob ni Nanay an saiyang kamawotan na magin misyonera. Minsan siring, may kaigotan sia para sa pagmimisyonero na nagpahiro sa puso kan iba sa mga henerasyon na nagsunod sa saiya. Hinahalat ko nanggad an pag-iribaiba mi giraray bilang dakulang pamilya kaiba si Nanay asin Tatay sa paraisong daga!—Kap. 21:3, 4.
[Mga Nota sa Ibaba]
^ par. 13 Helingon an The Watchtower na Hunyo 15, 1983, pahina 27-30, para sa estorya nin buhay ni Emil H. Van Daalen.
^ par. 24 Helingon an Awake! na Hunyo 22, 1952, pahina 3-4.
[Ritrato sa pahina 17]
Si Emilia Pederson
[Ritrato sa pahina 18]
1916: Si Nanay, Tatay (karga si Marvin); sa ibaba, poon sa wala patoo: si Orlen, Ester, Lilian, asin Mildred
[Ritrato sa pahina 19]
Si Leo asin Eunice, kan madali na sindang magadan
[Ritrato sa pahina 20]
1950: Poon sa wala patoo, sa itaas: si Ester, Mildred, Lilian, Eunice, asin Ruth; sa ibaba: si Orlen, Nanay, Tatay, asin Marvin
[Ritrato sa pahina 20]
Si George asin Ruth Pappas sa gibohon sa sirkito, kan 2001