Kamo daw “Mayordomo kan Dai Na Kutana Maninigong Kabootan nin Dios”?

“Sa pagkamoot na sa magturugang magkaigwa kamo nin mamomoton na kapadangatan sa lambang saro. Sa pagtao nin onra sa lambang saro mangenot kamo.”​—ROMA 12:10.

1. Anong mga pag-asegurar an manonompongan niato sa Tataramon nin Dios?

PAOROOTRO kitang inaasegurar kan Tataramon nin Dios na tatabangan kita ni Jehova kun nanluluya an satong boot o nalugadan an puso niato. Halimbawa, mangnohon an nakakarangang mga tataramon na ini: “Si Jehova nagtatabang sa gabos na napupukan, asin binabangon an gabos na napapalaob.” “Pinapaomayan nia an mga nalugadan an puso, asin binobogkosan an saindang makolog na mga kabtang.” (Sal. 145:14; 147:3) Dugang pa, an satong langitnon na Ama mismo nagsabi: “Ako, si Jehova na saimong Dios, nagkakapot sa saimong toong kamot, an Saro na nagsasabi sa saimo, ‘Dai ka matakot. Ako mismo an matabang sa saimo.’”​—Isa. 41:13.

2. Paano si Jehova nagtatao nin tabang sa mga lingkod nia?

² Pero, paano si Jehova, na nag-eerok sa dai naheheling na kalangitan, ‘nagkakapot sa satong kamot’? Paano nia ‘kita binabangon kun kita napapalaob’ huli sa kamondoan? Si Jehova Dios nagtatao nin siring na tabang sa manlaenlaen na paagi. Halimbawa, nagtatao sia sa banwaan nia nin “puersa na labi sa ordinaryo” paagi sa saiyang banal na espiritu. (2 Cor. 4:7; Juan 14:16, 17) An mga lingkod nin Dios nakakamate man nin nakakaparigon sa boot na puersa kan mensahe na yaon sa ipinasabong na Tataramon nin Dios, an Biblia. (Heb. 4:12) Igwa pa daw nin ibang paagi na kita pinapakosog ni Jehova? Makukua niato an simbag sa libro kan Enot na Pedro.

An “Dai na Kutana Maninigong Kabootan nin Dios na Ipinapahayag sa Manlaenlaen na Paagi”

3. (a) Anong mga tataramon manongod sa mga pagbalo an itinao ni apostol Pedro? (b) Ano an tinotokar sa huring kabtang kan enot na surat ni Pedro?

³ Sa pagsurat ni apostol Pedro sa mga nagturubod na linahidan nin espiritu, sia nagsabi na igwa sinda nin marahay na dahelan na magin magayagaya huli ta dakulang balos an naghahalat sa sainda. Dangan sinabi pa nia: “Minsan sa madali sana ngonyan, na kun mangyari, kamo nagmondo huli sa manlaenlaen na pagbalo.” (1 Ped. 1:1-6) Mangnohon an terminong “manlaenlaen.” Isinusuherir kaiyan na magigin manlaenlaen an mga pagbalo. Minsan siring, bako sanang sagkod dian an sinabi ni Pedro, na pinapabayaan an mga tugang nia na mag-isip-isip kun makakaya ninda an siring na manlaenlaen na pagbalo. Imbes, idinoon ni Pedro na makakasierto an mga Kristiano na tatabangan sinda ni Jehova na makaya an kada pagbalo na napapaatubang sa sainda, ano man na klase iyan. Itinao an pag-asegurar na iyan sa huring kabtang kan surat ni Pedro, na dian tinotokar kan apostol an mga bagay na konektado sa “katapusan kan gabos na bagay.”​—1 Ped. 4:7.

4. Taano ta nakakaranga sa sato an mga tataramon sa 1 Pedro 4:10?

⁴ Si Pedro nagsabi: “Kaoyon sa sokol nin balaog na naako kan lambang saro, gamiton iyan sa paglilingkod sa lambang saro bilang marahay na mga mayordomo kan dai na kutana maninigong kabootan nin Dios na ipinapahayag sa manlaenlaen na paagi.” (1 Ped. 4:10) Ginamit giraray ni Pedro an terminong “manlaenlaen.” Sia garo man sana nagsasabi, ‘An mga pagbalo dakol asin laen-laen na klase, alagad an mga kapahayagan kan dai na kutana maninigong kabootan nin Dios dakol asin laen-laen man na klase.’ Taano ta nakakaranga an mga tataramon na iyan? Ipinaparisa kaiyan na ano man na klase an pagbalo sa sato, pirmeng igwa nin makakatabang na kapahayagan kan dai na kutana maninigong kabootan nin Dios. Pero, narisa daw nindo sa mga tataramon ni Pedro kun paano nanggad ipinapahayag sa sato an dai na kutana maninigong kabootan ni Jehova? Paagi sa mga kapwa Kristiano.

 “Paglilingkod sa Lambang Saro”

5. (a) Ano an maninigong gibohon kan lambang Kristiano? (b) Anong mga hapot an minalataw?

⁵ Sa pakikipag-olay ni Pedro sa gabos na miembro kan Kristianong kongregasyon, sia nagsabi: “Orog sa gabos, magkaigwa nin malaad na pagkamoot sa lambang saro.” Dangan sinabi pa nia: “Kaoyon sa sokol nin balaog na naako kan lambang saro, gamiton iyan sa paglilingkod sa lambang saro.” (1 Ped. 4:8, 10) Huli kaini, an lambang saro sa kongregasyon dapat na igwa nin kabtang sa pagparigon sa mga kapwa Kristiano. Ipinamahala sa sato an sarong bagay na mahalagang rogaring ni Jehova, asin may paninimbagan kita na ihiras iyan sa iba. Kaya, kun siring, ano an ipinagkatiwala sa sato? Sinabi ni Pedro na iyan sarong “balaog.” Ano an balaog na iyan? Paano niato ‘iyan ginagamit sa paglilingkod sa lambang saro’?

6. Ano an nagkapira sa mga balaog na ipinagkatiwala sa mga Kristiano?

⁶ An Tataramon nin Dios nagsasabi: “An lambang marahay na balaog asin lambang sangkap na regalo hale sa itaas.” (Sant. 1:17) Sa katunayan, an gabos na balaog na ipinagkakatiwala ni Jehova sa banwaan nia kapahayagan kan saiyang dai na kutana maninigong kabootan. An sarong pambihirang balaog na itinatao sa sato ni Jehova iyo an banal na espiritu. An balaog na iyan nagpapangyari na mapatalubo niato an diosnon na mga kualidad na siring kan pagkamoot, karahayan, asin kahoyoan. An siring na mga kualidad nagpapahiro man sa sato na magpaheling nin odok sa pusong kapadangatan sa mga kapagtubod asin gikan sa boot na tabangan sinda. An tunay na kadonongan asin kaaraman kabilang man sa marahay na mga balaog na naaako niato sa tabang kan banal na espiritu. (1 Cor. 2:10-16; Gal. 5:22, 23) Sa katunayan, an gabos niatong kosog, kakayahan, asin talento puedeng mansayon bilang mga balaog na dapat gamiton sa pag-omaw asin pagtao nin onra sa langitnon na Ama niato. Igwa kita kan itinao nin Dios na paninimbagan na gamiton an mga kakayahan asin kualidad niato tanganing ipaabot sa satong mga kapagtubod an mga kapahayagan kan dai na kutana maninigong kabootan nin Dios.

“Gamiton Iyan sa Paglilingkod”​—Paano?

7. (a) Ano an ipinaparisa kan pananaram na “kaoyon sa sokol”? (b) Ano an mga maninigo niatong ihapot sa satong sadiri, asin taano?

⁷ Mapadapit sa mga balaog na naako niato, si Pedro nagsasabi man: “Kaoyon sa sokol nin balaog na naako kan lambang saro, gamiton iyan.” An pananaram na “kaoyon sa sokol” nagpaparisa na an mga kualidad asin kakayahan puedeng nagkakalaenlaen bako sanang sa klase kundi patin sa kun sagkod saen iyan magagamit. Dawa siring, sinasadol an lambang saro na “gamiton iyan [an boot sabihon, ano man na partikular na balaog na naako nia] sa paglilingkod sa lambang saro.” Dugang pa, sarong pagboot an pananaram na “gamiton iyan . . . bilang marahay na mga mayordomo.” Huli kaini, maninigo niatong ihapot sa satong sadiri: ‘Talaga daw na ginagamit ko  an mga balaog na ipinagkatiwala sa sako tanganing pakosogon an sakong mga kapagtubod?’ (Ikomparar an 1 Timoteo 5:9, 10.) ‘O ginagamit ko daw an mga kakayahan na naako ko ki Jehova prinsipalmente para sa sadiri kong kapakinabangan​—tibaad tanganing magkaigwa nin kayamanan o posisyon sa sosyedad?’ (1 Cor. 4:7) Kun gagamiton niato an satong mga balaog “sa paglilingkod sa lambang saro,” mapapaogma niato si Jehova.​—Tal. 19:17; basahon an Hebreo 13:16.

8, 9. (a) Ano an nagkapirang paagi na an mga Kristiano sa bilog na kinaban naglilingkod para sa mga kapagtubod? (b) Paano nagtitinarabangan an mga tugang sa kongregasyon nindo?

⁸ Nasasambitan kan Tataramon nin Dios an manlaenlaen na paagi na naglingkod sa lambang saro an mga Kristiano kan enot na siglo. (Basahon an Roma 15:25, 26; 2 Timoteo 1:16-18.) Siring man ngonyan, bilog na pusong isinasagibo kan tunay na mga Kristiano an pagboot na gamiton an balaog nin saro para sa mga kapagtubod. Isip-isipa an nagkapira sa mga paagi na ginigibo iyan.

⁹ Dakol na tugang na lalaki an naggagamit nin dakol na oras kada bulan sa pag-andam kan mga kabtang sa pagtiripon. Sa mga pagtiripon, kun ipinapahayag ninda an nagkapira sa espirituwal na mga impormasyon na nanompongan ninda durante kan saindang pag-adal sa Biblia, an may pakarorop na mga tataramon ninda nakakamotibar na magtagal an gabos na nasa kongregasyon. (1 Tim. 5:17) Dakol na tugang an midbid huli sa saindang mainit na pakikiiba asin pagmalasakit sa mga kapagtubod. (Roma 12:15) An nagkapira regular na nagsosongko sa mga nagmomondo nin makuri asin namimibi kaiba ninda. (1 Tes. 5:14) An iba nagtatao nin panahon na magsurat nin nagkapirang odok sa pusong tataramon nin pagparigon sa boot sa mga kapwa Kristiano na napapaatubang sa pagbalo. An iba pa may kabootan na tinatabangan an mga may pisikal na mga limitasyon na mag-atender sa mga pagtiripon kan kongregasyon. Rinibong Saksi an nakikikabtang sa gibohon na pag-ayuda, na tinatabangan an mga kapagtubod sa pagtogdok liwat kan mga harong na naraot nin mga kalamidad. An mamomoton na kapadangatan asin praktikal na tabang na itinatao kan siring na mapagmakolog na mga tugang gabos kapahayagan kan “dai na kutana maninigong kabootan nin Dios na ipinapahayag sa manlaenlaen na paagi.”​—Basahon an 1 Pedro 4:11.

Arin an Mas Importante?

10. (a) Interesado si Pablo sa anong duwang aspekto kan saiyang paglilingkod sa Dios? (b) Paano niato inaarog si Pablo ngonyan?

¹⁰ Pinagkatiwalaan an mga lingkod nin Dios bako sanang nin balaog na gagamiton para sa mga kapagtubod ninda kundi nin mensahe man na ipapaabot sa saindang kapwa. Aram ni apostol Pablo an duwang aspektong ini kan saiyang paglilingkod ki Jehova. Nagsurat sia sa kongregasyon sa Efeso mapadapit sa “pagigin mayordomo kan dai na kutana maninigong kabootan nin Dios” na itinao sa saiya para sa kapakinabangan ninda. (Efe. 3:2) Pero, sia nagsabi man: “Kami napatunayan na nin Dios na angay na pagkatiwalaan kan maogmang bareta.” (1 Tes. 2:4) Arog ni Pablo, aram man niato na ipinagkatiwala sa sato an asignasyon na maglingkod bilang mga parahulit kan Kahadean nin Dios. Paagi sa maigot na pakikikabtang sa paghuhulit, nagmamaigot kitang arogon an halimbawa na itinao ni Pablo bilang dai napapagal na parabalangibog kan maogmang bareta. (Gibo 20:20, 21; 1 Cor. 11:1) Aram niato na an paghuhulit kan mensahe kan Kahadean puedeng makapagligtas nin buhay. Minsan siring, kadungan kaiyan, nagmamaigot man kita na arogon si Pablo paagi sa paghanap nin mga oportunidad na ‘makatao nin espirituwal na balaog’ sa mga kapagtubod.​—Basahon an Roma 1:11, 12; 10:13-15.

11. Paano niato maninigong mansayon an satong mga asignasyon na maghulit asin magparigon sa satong mga tugang?

¹¹ Arin sa duwang Kristianong aktibidad na ini an mas importante? An paghapot nin siring kaiyan medyo kaagid sa paghapot manongod sa sarong gamgam, Arin sa duwang pakpak kaiyan an mas importante? Risang-risa an simbag. Kaipuhan nin gamgam an duwang pakpak nia tanganing makalayog. Siring man, kaipuhan niatong makikabtang sa duwang aspekto kan satong paglilingkod sa Dios tanganing masunod niato an gabos na kahagadan sa sato bilang mga Kristiano. Sa siring, imbes na mansayon na magkalaen an satong asignasyon na maghulit kan maogmang bareta asin magparigon sa mga kapagtubod, minamansay niato iyan siring kan pagmansay ni apostol Pedro asin Pablo​—bilang magkakomplementong mga paninimbagan. Sa anong paagi?

12. Paano kita naglilingkod bilang instrumento sa kamot ni Jehova?

¹² Bilang mga ebanghelisador, ginagamit niato an  ano man na abilidad niato sa pagtotokdo sa pagmamaigot na mapahiro an puso kan satong mga kapwa paagi sa nakakaparigon sa boot na mensahe kan Kahadean nin Dios. Sa paaging iyan, linalaoman niato na matabangan sinda na magin mga disipulo ni Cristo. Minsan siring, ginagamit man niato an ano man na kakayahan asin iba pang balaog niato sa pagmamaigot na pakosogon an boot kan satong mga kapagtubod paagi sa nakakaparigon sa boot na mga tataramon asin nakakatabang na mga gibo​—mga kapahayagan kan dai na kutana maninigong kabootan nin Dios. (Tal. 3:27; 12:25) Sa paaging iyan, linalaoman niato na matabangan sinda na magdanay bilang mga disipulo ni Cristo. Sa duwang aktibidad na iyan​—an paghuhulit sa publiko asin “paglilingkod sa lambang saro”—​may marahayon na pribilehio kita na maglingkod bilang instrumento sa kamot ni Jehova.​—Gal. 6:10.

“Magkaigwa Kamo nin Mamomoton na Kapadangatan sa Lambang Saro”

13. Ano an mangyayari kun dai kita ‘maglilingkod sa lambang saro’?

¹³ Sinadol ni Pablo an mga kapagtubod nia: “Sa pagkamoot na sa magturugang magkaigwa kamo nin mamomoton na kapadangatan sa lambang saro. Sa pagtao nin onra sa lambang saro mangenot kamo.” (Roma 12:10) Sa katunayan, an pagkaigwa nin kapadangatan sa mga tugang niato nagtutulod sa sato na maglingkod nin bilog na puso bilang mga mayordomo kan dai na kutana maninigong kabootan nin Dios. Aram niato na kun magigin mapanggana si Satanas na olangon kita sa “paglilingkod sa lambang saro,” mapapaluya nia an pagkasararo niato. (Col. 3:14) Dangan, an kawaran nin pagkasararo maresulta sa kawaran nin kaigotan sa paghuhulit. Aram na marhay ni Satanas na kaipuhan niang danyaran an saro sana sa satong mga pakpak, sabi ngani, tanganing dai kita makalayog.

14. Siisay an nakikinabang sa satong “paglilingkod sa lambang saro”? Magtao nin halimbawa.

¹⁴ An “paglilingkod sa lambang saro” nagtatao nin pakinabang bako sanang sa mga nag-aako kan dai na kutana maninigong kabootan nin Dios kundi patin sa mga nagpapahayag kaiyan. (Tal. 11:25) Kuanon niatong halimbawa si Ryan asin Roni, mag-agom na taga Illinois, E.U.A. Kan maaraman ninda na naraot kan Bagyong Katrina an ginatos na harong kan mga kapwa Saksi, pinahiro sinda kan sa magturugang na pagkamoot na magpondo sa trabaho ninda, butasan an apartment ninda, magbakal nin segunda manong harong na de rueda, hirahayon iyan, asin magbiahe nin 1,400 na kilometro pasiring sa Louisiana. Nag-istar sinda duman nin labing sangtaon na itinatao an saindang panahon, kosog, asin materyal na mga rogaring tanganing tabangan an mga tugang ninda. “An pakikikabtang sa gibohon na pag-ayuda orog na pinadayupot ako sa Dios,” an sabi ni Ryan, na 29 anyos. “Naheling ko kun paano inaasikaso ni Jehova an banwaan nia.” Sinabi pa  ni Ryan: “An paglilingkod kaiba kan mas may edad nang mga tugang dakol an itinokdo sa sako manongod sa kun paano aasikasohon an mga tugang. Naaraman ko man na, para sa samong mga mas hoben, dakol an magigibo mi sa organisasyon ni Jehova.” Si Roni na 25 anyos nagsabi: “Nagpapasalamat ako na nagkaigwa ako nin kabtang sa pagtabang sa iba. Mas maogma ako kisa kasuarin man sa sakong buhay. Aram ko na sa maabot na mga taon, padagos akong makikinabang sa marahayon na eksperyensiang ini.”

15. Ano an marahay na mga dahelan niato na padagos na maglingkod bilang mga mayordomo kan dai na kutana maninigong kabootan nin Dios?

¹⁵ Tunay nanggad, an pagsunod sa mga pagboot nin Dios na maghulit kan maogmang bareta asin magparigon sa mga kapagtubod nagtatao nin mga bendisyon sa gabos. An mga tinatabangan niato napapakosog sa espirituwal, mantang kita nakakaeksperyensia nin odok sa pusong kagayagayahan na minagikan sana sa pagtao. (Gibo 20:35) An kongregasyon sa kabilogan nagigin dayupot an pag-iribaiba mantang an lambang miembro mamomoton na nagpapaheling nin interes sa iba. Apuera kaini, an pagkamoot asin kapadangatan na ipinapaheling niato sa lambang saro malinaw na nagpapamidbid sa sato bilang tunay na mga Kristiano. Si Jesus nagsabi: “Paagi kaini an gabos makakaaram na kamo an sakong mga disipulo, kun kamo nagkakaminorootmootan.” (Juan 13:35) Orog sa gabos, natatawan nin onra an satong mapagmakolog na Ama, si Jehova, mantang an kamawotan nia na pakosogon an mga nagkakaipo nin tabang nababanaag sa saiyang mga lingkod sa daga. Kun siring, may marahay na mga dahelan nanggad kita na gamiton an balaog niato “sa paglilingkod sa lambang saro bilang marahay na mga mayordomo kan dai na kutana maninigong kabootan nin Dios”! Padagos daw nindong gigibohon iyan?​—Basahon an Hebreo 6:10.

Nagigirumdoman daw Nindo?

• Sa anong mga paagi pinapakosog ni Jehova an mga lingkod nia?

• Ano an ipinagkatiwala sa sato?

• Ano an nagkapirang paagi na makakapaglingkod kita sa satong mga kapagtubod?

• Ano an mapahiro sa sato na padagos na gamiton an balaog niato “sa paglilingkod sa lambang saro”?

[Mga Hapot Para sa Pag-adal]

[Mga Ritrato sa pahina 13]

Ginagamit mo daw an saimong “balaog” tanganing maglingkod sa iba o tanganing panigoan an saimong sadiri?

[Mga Ritrato sa pahina 15]

Kita naghuhulit kan maogmang bareta sa iba asin nagtatabang sa mga kapwa Kristiano

[Ritrato sa pahina 16]

An mga nagtatabang sa pag-ayuda maninigong tawan nin komendasyon huli sa pagigin mapagsakripisyo ninda