Makanompong nin Kagayagayahan sa Paggibo nin mga Disipulo

“Kun siring, paduman kamo asin gumibo kamo nin mga disipulo.”​—MAT. 28:19.

1-3. (a) Ano an namamatean nin dakol manongod sa oportunidad na magkondukta nin mga pag-adal sa Biblia? (b) Anong mga hapot an pag-oolayan niato?

“ONSENG semana ko nang kinokonduktahan nin pag-adal sa Biblia an sarong pamilya na taga Pakistan,” an isinurat nin sarong Kristiana sa Estados Unidos na naglilingkod sa sarong grupo na Hindi an tataramon. “Natural sana,” an sabi pa nia, “kami nagin magkakatood. Napapaluha ako kun naiisip ko an pamilyang ini na madali nang magbalik sa Pakistan. Napapaluha ako bako sanang huli sa kapungawan ta dai ko na sinda makakaibaiba kundi huli man sa kagayagayahan na naeksperyensiahan ko mantang tinotokdoan ko sinda manongod ki Jehova.”

² Arog kan Kristianang ini, naeksperyensiahan na daw nindo an kagayagayahan huli sa pagkondukta nin pag-adal sa Biblia sa sarong tawo? Si Jesus asin an mga disipulo nia kan enot na siglo nakanompong nin dakulang kagayagayahan sa paggibo nin mga disipulo. Kan an 70 disipulo na sinanay ni Jesus magbuelta na may magayagayang bareta, si Jesus mismo “naggayagaya nin labi-labi sa banal na espiritu.” (Luc. 10:17-21) Siring man, dakol ngonyan an nakakanompong nin dakulang kagayagayahan sa paggibo nin mga disipulo. Sa katunayan, kan 2007, an mahigos asin maogmang mga parahayag nagkondukta nin promedyong anom may kabangang milyon na pag-adal sa Biblia kada bulan!

³ Pero, may mga parahayag na dai pa nakapagkondukta nin pag-adal sa Biblia. An iba tibaad dai  nakapagkondukta nin pag-adal sa Biblia kan nakaagi pa sanang mga taon. Anong mga kadepisilan an puedeng mapaatubang sa sato mantang naghihingoa kitang magkondukta nin pag-adal sa Biblia? Paano niato puedeng mapangganahan an mga kadepisilan na iyan? Asin anong mga balos an maaako ta kun ginigibo niato an gabos niatong makakaya tanganing kuyogon an pagboot ni Jesus: “Kun siring, paduman kamo asin gumibo kamo nin mga disipulo”?​—Mat. 28:19.

Mga Kadepisilan na Puedeng Makahale kan Satong Kagayagayahan

4, 5. (a) Paano naghihimate an dakol na tawo sa nagkapirang parte kan kinaban? (b) Anong mga kadepisilan an napapaatubang sa mga parahayag sa nagkapira pang lugar?

⁴ Sa nagkapirang parte kan kinaban, gustong-gusto kan mga tawo na akoon an mga babasahon niato asin gustong-gusto nindang adalan niato sinda sa Biblia. Sarong mag-agom na taga Australia na temporaryong naglilingkod sa Zambia an nagsurat: “Totoo an mga estorya. An Zambia mabungang marhay na teritoryo. Pambihira nanggad an paghuhulit sa tinampo! Dinodolok kami kan mga tawo, na an nagkapira naghahagad pa ngani nin partikular na mga isyu kan mga magasin.” Sa sarong nakaagi pa sanang taon, an mga tugang sa Zambia nagkondukta nin labing 200,000 na pag-adal sa Biblia​—an boot sabihon, sa promedyo, an kada parahayag igwa nin labi sa sarong inaadalan sa Biblia.

⁵ Minsan siring, sa iba pang mga lugar, tibaad nasasakitan an mga parahayag na magpasakamot nin mga babasahon asin regular na magkondukta nin mga pag-adal sa Biblia. Taano? Sa parate, an mga tawo mayo sa harong kun minatuktok an parahayag, mantang an mga nasa harong tibaad indiperente manongod sa relihion. Tibaad nagdakula sinda sa pamilya na bakong relihioso o tibaad nababalde sinda sa pagsaginsagin na risang-risa sa falsong relihion. Dakol na tawo an nalugadan sa espirituwal​—na inanitan asin ilinagalag kan falsong mga pastor. (Mat. 9:36) Siempre, an mga siring kaiyan tibaad nagigin mapagmaan sa pakikipag-olay manongod sa Biblia.

6. Anong mga limitasyon an tibaad inaatubang nin nagkapira?

⁶ An nagkapirang maimbod na parahayag napapaatubang sa laen na kadepisilan na puedeng makahale kan kagayagayahan ninda. Minsan ngani dati sindang aktibong marhay sa paggibo nin mga disipulo, nakakaolang sa sainda ngonyan an maluyang salud o mga limitasyon nin paggurang. Isip-isipon man an nagkapirang limitasyon sa satong sadiri na tibaad kita man sana an naggigibo. Halimbawa, nakakamate daw kamo na bako kamong kualipikado na magkondukta nin pag-adal sa Biblia? Tibaad an pagmate nindo arog kan ki Moises kan sugoon sia ni Jehova na makipag-olay ki Faraon. Si Moises nagsabi: “Dispensara ako, Jehova, alagad bako akong matibay magtaram, poon man kasuodma ni poon pa bago kaiyan.” (Ex. 4:10) Konektadong marhay sa pakamate nin kadaihan nin kakayahan an pagkatakot na dai magin mapanggana. Tibaad mahadit kita na an saro dai magigin disipulo huli ta bako kitang matibayon magtokdo. Tanganing dai maeksperyensiahan iyan, tibaad magdesisyon kita na dai na sana kita magkondukta nin pag-adal sa Biblia. Paano niato mapapangganahan an mga kadepisilan na nasambitan pa sana?

Andamon an Saindong Puso

7. Ano an nagmotibar ki Jesus sa ministeryo nia?

⁷ An enot na lakdang iyo na andamon niato an satong puso. Si Jesus nagsabi: ‘Gikan sa kapanoan kan puso an ngoso nagtataram.’ (Luc. 6:45) An nagmotibar ki Jesus sa ministeryo nia iyo an odok sa pusong pagmakolog sa ikakarahay nin iba. Halimbawa, kan maobserbaran nia an maluyang kamugtakan sa espirituwal kan mga kapwa Judio, “naherak sia sa sainda.” Sinabihan nia an saiyang mga disipulo: “An anihon mahiwas . . . Makimaherak kamo sa Kagurangnan kan anihon na magsobol nin mga paraani sa saiyang anihon.”​—Mat. 9:36-38.

8. (a) Ano an marahay niatong pag-isipan? (b) Ano an manonodan niato sa mga komento nin sarong inaadalan sa Biblia?

⁸ Mantang nakikikabtang kita sa paggibo nin mga disipulo, marahay na odok niatong pag-isipan kun gurano nanggad kita nakinabang huli ta may tawong nagtao sa sato nin panahon tanganing adalan kita sa Biblia. Isip-isipon man an mga tawo na manunuparan niato sa ministeryo asin kun paano sinda makikinabang sa pagdangog sa dara niatong mensahe. Sarong babae an nagsurat sa sangang opisina kan nasyon na iniistaran nia: “Gusto kong sabihon sa saindo na pinapasalamatan ko nanggad an mga Saksi na nagtotokdo sa sako sa harong ko. Aram ko na kun beses nasusuya sinda sa sako huli ta kadakol akong hapot asin pirme sindang minalampas sa oras huli sa  sako. Alagad sinda mapasensia sa sako asin gustong-gusto nindang itokdo kun ano an nanodan ninda. Nagpapasalamat ako ki Jehova asin ki Jesus huling nagin kabtang kan buhay ko an mga tawong ini.”

9. Sa ano nagkonsentrar si Jesus, asin paano niato sia maaarog?

⁹ Siempre, bakong gabos naghimate sa paghihingoa ni Jesus na tabangan sinda. (Mat. 23:37) May mga nagsunod sa saiya sa kadikit na panahon alagad ta hinaboan an saiyang mga katokdoan asin “dai na naglakaw kaiba nia.” (Juan 6:66) Minsan siring, dai tinogotan ni Jesus an negatibong reaksion nin nagkapira na makapamate sa saiya na daing halaga an mensahe nia. Minsan ngani an kadaklan kan banhing isinabwag ni Jesus dai nagbunga, nagkonsentrar sia sa marahay na ginigibo nia. Naheling nia na an mga oma maputi na tanganing anihon asin nagkaigwa sia nin dakulang kagayagayahan sa pagtabang sa pag-aning iyan. (Basahon an Juan 4:35, 36.) Imbes na an naheheling sana niato iyo an tagiltil na daga sa pag-oltanan kan mga poon nin tipasi, puede man daw kitang magkonsentrar sa potensial na pag-ani sa teritoryo na iinasignar sa sato? Siyasaton niato kun paano niato mapagdadanay an siring na positibong saboot.

Magsabwag na May Katuyohan na Mag-ani

10, 11. Ano an puede nindong gibohon tanganing mapagdanay an kagayagayahan nindo?

¹⁰ An sarong paraoma nagsasabwag nin banhi na may katuyohan na mag-ani. Kaagid kaiyan, kaipuhan niatong maghulit na may katuyohan na makapoon nin mga pag-adal sa Biblia. Pero, paano kun regular kamong nasa ministeryo sa langtad alagad pira sanang tawo an nasa harong o garo baga dai na nindo natatagboan giraray an saindong mga dinadalaw liwat? Nakakapanluya ini sa boot. Maninigo na daw kamong umontok sa ministeryong pagharongharong? Dai nanggad! Sagkod ngonyan, dakol na tawo an nakakaolay sa kaenot-enote sa paaging ini nin paghuhulit na probado na sa halawig na panahon.

¹¹ Minsan siring, tanganing mapagdanay an kagayagayahan nindo, puede daw nindong dagdagan an saindong mga paagi nin paghuhulit, na tibaad  iiniiba an iba pang paagi na mahulitan an mga tawo? Halimbawa, naprobaran na daw nindong maghulit sa mga tawo sa tinampo o sa pinagtatrabahohan ninda? Puede daw nindong makaolay an mga tawo paagi sa telepono o makua an mga numero nin telepono kan mga nahulitan na nindo kan mensahe kan Kahadean tanganing maapodan nindo sinda? Paagi sa pagmamaigot asin pagigin madaling makibagay sa gibohon nindo sa ministeryo, makakaeksperyensia kamo nin kagayagayahan sa pakanompong nin mga indibiduwal na mahimate sa mensahe kan Kahadean.

Pag-atubang sa Pagkaindiperente

12. Ano an puede niatong gibohon kun dakol na tawo sa teritoryo niato an garo baga indiperente?

¹² Paano kun dakol na tawo sa teritoryo nindo an indiperente manongod sa relihion? Puede daw nindong ibagay an paagi nin pagdolok nindo tanganing mapukaw an interes ninda? Nagsurat si apostol Pablo sa mga kapagtubod sa Corinto: “Sa mga Judio ako nagin siring sa Judio . . . Sa mga dai nin ley ako nagin siring sa dai nin ley, minsan ngani ako bakong dai nin ley sa Dios.” Ano an motibo ni Pablo? “Ako nagin gabos na bagay sa gabos na klase nin tawo,” an sabi nia, “tanganing sa gabos na paagi ikaligtas ko an nagkapira.” (1 Cor. 9:20-22) Makakakua man daw kita nin mga tema na magigin interesante sa mga nasa teritoryo niato? Gustong paoswagon nin dakol na bakong relihiosong tawo an kualidad kan relasyon ninda sa laog kan pamilya. Tibaad naghahanap man sinda nin katuyohan sa buhay. Puede daw niatong iatubang sa siring na mga tawo an mensahe kan Kahadean sa paagi na magugustohan ninda?

13, 14. Paano niato madudugangan an kagayagayahan niato sa paggibo nin mga disipulo?

¹³ An nagdadakol na parahayag nadugangan an kagayagayahan huli sa paggibo nin mga disipulo, dawa sa mga lugar na an mayoriya kan mga tawo garo baga indiperente. Paano? Paagi sa pag-adal nin ibang lenguahe. Naaraman nin sarong mag-agom na labi nang 60 anyos na rinibong Intsik na estudyante, kaiba an pamilya ninda, an nakaistar sa teritoryo na iinasignar sa kongregasyon ninda. “Huli kaini, nadagka kami na mag-adal nin Intsik,” an sabi kan agom na lalaki. “Minsan ngani nangangahulogan ini nin paggamit nin oras aroaldaw sa pag-adal kan lenguahe,” an sabi pa nia, “nagresulta iyan sa dakol na pag-adal sa Biblia sa mga Intsik sa samong lugar.”

¹⁴ Dawa kun dai kamo makakapag-adal nin ibang lenguahe, magagamit nindo nin epektibo an pulyetong Good News for People of All Nations kun nakakanupar kamo nin mga tawong iba an lenguahe. Sa parate, puede man kamong makakua nin mga babasahon sa lenguahe kan mga tawo na nanunuparan nindo. Totoo, kaipuhan an dagdag na panahon asin paghihingoa tanganing makipagkomunikar sa mga tawong iba an lenguahe asin kultura. Alagad girumdomon an prinsipyo na yaon sa Tataramon nin Dios: “An nagtatanom nin abunda mag-aani man nin abunda.”​—2 Cor. 9:6.

Kalabot an Bilog na Kongregasyon

15, 16. (a) Taano ta an paggibo nin mga disipulo paghihingoa kan bilog na kongregasyon? (b) Ano an papel kan mga may edad na?

¹⁵ Minsan siring, an paggibo nin mga disipulo dai nakadepende sa paghihingoa nin saro sanang indibiduwal. Imbes, iyan paghihingoa kan bilog na kongregasyon. Taano? Si Jesus nagsabi: “Paagi kaini an gabos makakaaram na kamo an sakong mga disipulo, kun kamo nagkakaminorootmootan.” (Juan 13:35) Asin sa katunayan, kun nag-aatender sa mga pagtiripon an mga inaadalan sa Biblia, sa parate naghahanga sinda sa mamomoton na kamugtakan sa mga pagtiripon niato. An sarong inaadalan sa Biblia nagsurat: “Ikinakaogma kong marhay an pag-atender sa mga pagtiripon. Inaako nanggad ako kan mga tawo dian!” Sinabi ni Jesus na an mga nagigin parasunod nia puedeng tumangon kan literal na pamilya ninda. (Basahon an Mateo 10:35-37.) Minsan siring, nanuga sia na sa kongregasyon, makakakua sinda nin kadakol na espirituwal na ‘tugang na lalaki asin tugang na babae asin ina asin aki.’​—Mar. 10:30.

¹⁶ Nangorognang igwa nin mahalagang marhay na papel an satong may edad nang mga tugang sa pagtabang na umoswag an mga inaadalan sa Biblia. Sa anong paagi? Dawa kun dai na kaya kan nagkapirang may edad na na sinda mismo an magkondukta nin pag-adal sa Biblia, an nakakaparigon na mga komento ninda sa mga pagtiripon kan kongregasyon nakakapakosog sa pagtubod kan gabos na nakakadangog kaiyan. An saindang rekord nin paglakaw “sa dalan nin katanosan” nakakadugang sa kagayonan kan kongregasyon asin nakakadagka sa mga sadiosan an puso na lumaog sa organisasyon nin Dios.​—Tal. 16:31.

 Pagdaog sa Satong mga Pagkatakot

17. Ano an magigibo niato tanganing madaog an pakamate nin kadaihan nin kakayahan?

¹⁷ Paano kun pinaglalabanan nindo an pakamate nin kadaihan nin kakayahan? Girumdomon na tinabangan ni Jehova si Moises paagi sa pagtao sa saiya nin banal na espiritu asin nin kaibaiba, an tugang niang si Aaron. (Ex. 4:10-17) Nanuga si Jesus na susuportaran kan espiritu nin Dios an paghuhulit niato. (Gibo 1:8) Apuera kaini, nagsugo si Jesus nin mga trabahador tanganing maghulit nin manduwaduwa. (Luc. 10:1) Kun siring, kun nadedepisilan kamo na magkondukta nin pag-adal sa Biblia, mamibi na logod itao sa saindo kan espiritu nin Dios an kadonongan dangan maghanap nin kaibaiba sa paghuhulit, na makakatao sa saindo nin kompiansa asin na an eksperyensia puedeng makatabang sa saindo. Nakakapakosog sa pagtubod an paggirumdom na pinili ni Jehova na gamiton an ordinaryong mga tawo​—“an mga maluya sa kinaban”—​tanganing mahaman an pambihirang gibohon na ini.​—1 Cor. 1:26-29.

18. Paano niato madadaog an pagkatakot na dai magin mapanggana?

¹⁸ Paano niato madadaog an pagkatakot na dai magin mapanggana? Marahay na girumdomon niato na an paggibo nin disipulo bakong arog kan pagluto nin kakanon na kun baga magigin mapanggana iyan o dai, sa pangenot, nakadepende sa sarong tawo​—an paraluto. Imbes, kalabot sa paggibo nin mga disipulo an kisiera tolo na nagtitinarabangan. Si Jehova an naggigibo kan pinakaimportanteng kabtang, an pagdagka sa indibiduwal na rumani sa saiya. (Juan 6:44) Kita asin an ibang miembro kan kongregasyon naggigibo kan pinakamakakaya niato na gamiton an abilidad sa pagtotokdo tanganing tabangan na umoswag an inaadalan sa Biblia. (Basahon an 2 Timoteo 2:15.) Asin kaipuhan na humiro an inaadalan sa Biblia kaoyon kan nanonodan nia. (Mat. 7:24-27) Kun an saro magpondo sa saiyang pag-adal sa Biblia, tibaad madesganar kita. Linalaoman niato na an mga inaadalan sa Biblia magibo nin tamang pagpili, alagad an lambang indibiduwal dapat na ‘manimbag sa Dios para sa saiyang sadiri.’​—Roma 14:12.

Ano an mga Balos?

19-21. (a) Anong mga pakinabang an naaako niato sa pagkondukta nin mga pag-adal sa Biblia? (b) Ano an pagmansay ni Jehova sa gabos na nakikikabtang sa paghuhulit?

¹⁹ An pagkondukta nin mga pag-adal sa Biblia nagpapangyari na kita makakonsentrar sa paghanap nguna kan Kahadean. Itinutudok man kaiyan nin mas hararom sa isip asin puso niato an mga katotoohan na nasa Tataramon nin Dios. Taano man? An sarong payunir na an ngaran Barak nagpaliwanag: “An pagkondukta nin mga pag-adal sa Biblia nagtutulod sa saindo na magin mas marahay na estudyante kan Tataramon nin Dios. Naaraman ko na dapat kong parigonon an sakong makosog na paniniwala bago ako epektibong makapagtokdo sa iba.”

²⁰ Kun dai kamo nagkokondukta nin pag-adal sa Biblia, nangangahulogan daw iyan na daing halaga sa Dios an paglilingkod nindo? Siempre dai! Pinapahalagahan na marhay ni Jehova an mga paghihingoa niato na omawon sia. An gabos na nakikikabtang sa paghuhulit “mga kapwa trabahador nin Dios.” Minsan siring, an pagkondukta nin pag-adal sa Biblia nagtatao nin dugang pang kagayagayahan mantang naheheling niato kun paano pinapatalubo nin Dios an banhi na itinanom niato. (1 Cor. 3:6, 9) “Mantang naheheling nindo na nag-ooswag an inaadalan sa Biblia,” an sabi ni Amy na sarong payunir, “nakakamate kamo nin dakulaon na pagpasalamat ki Jehova sa pagtogot na gamiton kamo tanganing matawan an tawong iyan nin marahayon na regalo​—an oportunidad na mamidbid si Jehova asin umako nin buhay na daing katapusan.”

²¹ An paggibo kan pinakamakakaya niato na makapoon asin makapagkondukta nin mga pag-adal sa Biblia matabang sa sato na magdanay na nakakonsentrar sa paglilingkod sa Dios ngonyan asin mapakosog sa paglaom niato na makaligtas pasiring sa bagong kinaban. Sa pagsuportar ni Jehova, makakatabang man kita na iligtas an mga naghihinanyog sa sato. (Basahon an 1 Timoteo 4:16.) Sarong dahelan nanggad iyan nin kagayagayahan!

Nagigirumdoman daw Nindo?

• Anong mga kadepisilan an puedeng makaolang sa nagkapira sa pagkondukta nin mga pag-adal sa Biblia?

• Ano an puede niatong gibohon kun dakol na tawo sa satong teritoryo an garo baga indiperente?

• Anong mga balos an naaako niato sa pagkondukta nin pag-adal sa Biblia?

[Mga Hapot Para sa Pag-adal]

[Mga Ritrato sa pahina 9]

Dinadagdagan daw nindo an saindong mga paagi nin paghuhulit tanganing makanompong nin mga indibiduwal na sadiosan an puso?