An Tataramon ni Jehova Buhay

Tampok na mga Kabtang sa Libro nin Kapahayagan​—I

MIENTRAS na nakabilanggo an gurang nang si apostol Juan sa isla nin Patmos, nag-ako sia nin 16 na sunod-sunod na bisyon. Naheling nia sa mga ini kun ano an ginigibo ni Jehova Dios asin ni Jesu-Cristo durante kan aldaw kan Kagurangnan​—an peryodo na minapoon sa pagkaestablisar kan Kahadean nin Dios kan 1914 asin minasagkod sa katapusan kan Milenyal na Paghade ni Cristo. Sarong nakakaogmang pagkasaysay dapit sa mga bisyon na ini an libro nin Kapahayagan, na isinurat ni Juan kan mga 96 C.E.

Estudyaran niato ngonyan an tampok na mga kabtang kan Kapahayagan 1:1–12:17, na nagtotokar sa enot na pitong bisyon na inako ni Juan. Interesante para sa sato an mga bisyon na ini huli ta nanonongod ini sa kun ano an nangyayari sa kinaban ngonyan asin ipinapaheling kaini kun paano si Jehova mahiro sa harani nang ngapit. An mga nagbabasa na may pagtubod sa pagkasaysay kan mga bisyon na ini tunay nanggad na nararanga asin napaparigon an boot.​—Heb. 4:12.

TINANGKAS “KAN KORDERO” AN ANOM SA PITONG TATAK

(Kap. 1:1–7:17)

Enot, naheling ni Juan an pinamuraway na si Jesu-Cristo asin nag-ako si Juan nin sunod-sunod na mensahe na dapat niang ‘isurat sa sarong rolyo asin ipadara sa pitong kongregasyon.’ (Kap. 1:10, 11) An sunod iyo an bisyon dapit sa sarong trono duman sa langit. Sa toong kamot kan Saro na nakatukaw sa trono yaon an sarong rolyo na serado nin pitong tatak. An saro na ibinibilang na “maninigo na magbiklad kan rolyo” mayong iba kundi “an Leon na gikan sa tribo ni Juda,” o “an sarong kordero . . . na may pitong sungay asin pitong mata.”​—Kap. 4:2; 5:1, 2, 5, 6.

Ihinahayag kan ikatolong bisyon kun ano an nangyayari mantang sunod-sunod na tinatangkas “kan Kordero” an enot na anom na tatak. Sa pagtangkas kan ikaanom na tatak, naglinog nin makosog asin nag-abot an dakulang aldaw nin grabeng kaanggotan. (Kap. 6:1, 12, 17) Alagad sa suminunod na bisyon ipinaheling an ‘apat na anghel na pinupugolan an apat na doros kan daga’ sagkod na matapos an pagtatak sa 144,000. “Sarong dakulang kadaklan” kan mga dai natatakan an naheling “na nagtitindog sa atubangan kan trono asin sa atubangan kan Kordero.”​—Kap. 7:1, 9.

Mga Hapot sa Kasuratan na Sinimbag:

1:4; 3:1; 4:5; 5:6​—Ano an ipinaparisa kan pananaram na “pitong espiritu”? An numerong pito nangangahulogan nin pagkakompleto sa punto de vista nin Dios. Sa siring, an mensahe sa “pitong kongregasyon” sa katapustapusi aplikado sa bilog na banwaan nin Dios na nagtitiripon sa labing 100,000 na kongregasyon sa bilog na daga. (Kap. 1:11, 20) Huling an banal na espiritu itinatao segun sa kun ano an kaipuhan na maotob kan paghiro kaiyan, an pananaram na “pitong espiritu” nagpaparisa kan pagigin lubos kan paghiro kaiyan sa pagtao nin pakasabot asin bendisyon sa mga nagtatao nin atension sa hula. An paagi nin pagtokar kan libro nin Kapahayagan garo baga basado sa serye nin mampitopito. An numerong pito digdi nagrerepresentar sa pagkakompleto, asin tunay nanggad, an libro nagtotokar sa ‘pagtapos,’ o pagkompleto, sa “sagradong hilom nin Dios.”​—Kap. 10:7.

1:8, 17​—Kiisay nanonongod an mga titulong “an Alfa asin an Omega” saka “an Enot asin an Huri”? An titulong “an Alfa asin an Omega” nanonongod ki Jehova, asin idinodoon kaiyan na mayo nin ibang makapangyarihan sa gabos na Dios bago sia asin na dai na magkakaigwa pagkatapos nia. Sia “an kapinonan asin an katapusan.” (Kap. 21:6; 22:13) Minsan ngani inaapod si Jehova sa Kapahayagan 22:13 na “an enot asin an huri,” sa bagay na mayo nin siisay man bago o pagkatapos sa saiya, an konteksto sa enot na kapitulo kan Kapahayagan nagpapaheling na an titulo duman na “an Enot  asin an Huri” nanonongod ki Jesu-Cristo. Sia an enot na tawong binuhay liwat sa imortal na espiritung buhay asin an huring tawo na binuhay mismo ni Jehova sa siring man kaiyan na buhay.​—Col. 1:18.

2:7​—Ano an “paraiso nin Dios”? Huling para sa linahidan na mga Kristiano an mga tataramon na ini, an paraiso na sinasabi digdi siertong nanonongod sa arog-paraisong langitnon na rona​—an mismong presensia nin Dios. Babalosan an maimbod na mga linahidan paagi sa pagkakan sa “kahoy nin buhay.” Mag-aako sinda nin imortalidad.​—1 Cor. 15:53.

3:7​—Kasuarin inako ni Jesus an “liabe ni David,” asin paano nia ginagamit an liabeng iyan? Kan si Jesus bautismohan kan 29 C.E., sia nagin Designadong Hade sa linahe ni David. Minsan siring, inako sana ni Jesus an liabe ni David kan 33 C.E., kan ilinangkaw sia sa too nin Dios sa langit. Duman nia minana an gabos na deretso kan Kahadean ni David. Poon kaidto, ginagamit ni Jesus an liabeng iyan tanganing magbukas nin mga oportunidad asin pribilehio na konektado sa Kahadean. Kan 1919, “an liabe kan dinastiya ni David” ibinugtak ni Jesus sa abaga kan “maimbod asin mapagmansay na oripon” paagi sa pagnombra sa grupong oripon na iyan “na mamahala sa gabos niang rogaring.”​—Isa. 22:22; Mat. 24:45, 47.

3:12​—Ano an ‘bagong ngaran’ ni Jesus? An ngaran na ini konektado sa bagong katongdan asin mga pribilehio ni Jesus. (Fil. 2:9-11) Mantang mayo nin ibang nakakaaram kan ngaran na iyan sa paaging aram iyan ni Jesus, isinusurat iyan ni Jesus sa saiyang maimbod na mga tugang sa langitnon na rona, na pinapagin dayupot sinda sa saiya. (Kap. 19:12) Ihinihiras pa ngani nia sa sainda an saiyang mga pribilehio.

Mga Leksion Para sa Sato:

1:3. Huling “harani na an itinalaan na panahon” para sa pagsagibo kan mga paghokom nin Dios sa kinaban ni Satanas, kaipuhan nang marhay na masabotan an mensahe kan libro nin Kapahayagan asin humiro oyon dian.

3:17, 18. Tanganing magin mayaman sa espirituwal, kaipuhan niatong bumakal ki Jesus nin “bulawan na dinalisay sa kalayo.” An boot sabihon, maninigo kitang maghingoa na magin mayaman sa marahay na mga gibo. (1 Tim. 6:17-19) Kaipuhan man niatong magsulog “nin puting pang-ibabaw na mga gubing,” na naghahayag kan satong midbidan bilang mga parasunod ni Cristo, asin gamiton an “panglahid sa mata,” siring kan konsehong ipinupublikar sa magasin na Torrengbantayan, tanganing magkamit kita nin espirituwal na pakabatid.​—Kap. 19:8.

7:13, 14. Irinerepresentar kan 24 kamagurangan an 144,000 sa saindang langitnon na kamurawayan, na duman naglilingkod sinda bako sanang bilang mga hade kundi bilang mga saserdote man. An mga saserdote sa suanoy na Israel, na inorganisar ni Hadeng David sa 24 grupo, nagserbing ladawan ninda. Ihinayag ki Juan kan saro sa kamagurangan an midbidan kan dakulang kadaklan. Kun siring, an pagbuhay liwat sa linahidan na mga Kristiano siertong nagpoon bago kan 1935. Taano? Huli ta sa taon na iyan ipinaaram sa linahidan na mga lingkod nin Dios sa daga an tamang midbidan kan dakulang kadaklan.​—Luc. 22:28-30; Kap. 4:4; 7:9.

AN PAGTANGKAS SA IKAPITONG TATAK NAGRESULTA SA PITONG TANOG NIN TRUMPETA

(Kap. 8:1–12:17)

Tinangkas kan Kordero an ikapitong tatak. Pitong anghel an nag-ako nin pitong trumpeta. Anom sa mga anghel an nagpatanog kan saindang mga trumpeta, na ibinabareta an mga mensahe nin paghokom sa “ikatolong kabtang” kan katawohan​—an Kakristianohan. (Kap. 8:1, 2, 7-12; 9:15, 18) Ini an naheling ni Juan sa ikalimang bisyon. Sa pagpartisipar sa sunod na bisyon, kinakan ni Juan an sadit na rolyo asin sinokol nia an santuaryo kan templo. Pagkatapos na patanogon an ikapitong trumpeta, may makokosog na tingog na nag-anunsiar: “An kahadean kan kinaban nagin nang kahadean kan satong Kagurangnan asin kan saiyang Cristo.”​—Kap. 10:10; 11:1, 15.

Idinetalye kan ikapitong bisyon an sinabi sa Kapahayagan 11:15, 17. Dakulang tanda an naheling sa langit. An langitnon na babae nangaki nin sarong aking lalaki, sarong lalaki. An Diablo pinalayas sa langit. Huling grabe an kaanggotan nia sa langitnon na babae, naghale sia ‘tanganing makiguerra sa mga natatada kan banhi kan babae.’​—Kap. 12:1, 5, 9, 17.

 Mga Hapot sa Kasuratan na Sinimbag:

8:1-5​—Taano ta nagsilensio sa langit, asin ano an iinapon sa daga pagkatapos kaiyan? Simbolikong nagsilensio sa langit tanganing madangog “an mga pamibi kan mga banal” sa daga. Ini nangyari kan katapusan kan enot na guerra mundial. Dai nagsakat sa langit an linahidan na mga Kristiano sa katapusan kan Mga Panahon kan mga Hentil, arog kan linalaoman nin dakol na mangyayari sa sainda. Masakit na mga panahon an naeksperyensiahan ninda durante kan guerra. Kaya ngonyan odok sindang namibi para sa paggiya. Bilang simbag sa saindang mga pamibi, iinapon sa daga kan anghel an simbolikong kalayo na nagpalaad sa linahidan na mga Kristiano sa espirituwal. Minsan ngani kadikit sana sinda, pinonan ninda an pambilog na kinaban na kampanya nin paghuhulit na nagin dahelan na an Kahadean nin Dios magin naglalaad na isyu, na sa siring na paagi nagsosolo sinda nin kalayo sa Kakristianohan. Makosogon na mga patanid hale sa Biblia an ibinalangibog, nagsisilyab na katotoohan sono sa Kasuratan an ipinaaram, asin an rona nin falsong relihion natanyog sagkod sa pundasyon kaiyan, kun paanong natatanyog nin linog an mga edipisyo.

8:6-12; 9:1, 13; 11:15​—Kasuarin nag-andam an pitong anghel na patanogon an saindang trumpeta, asin kasuarin saka paano pinatanog an trumpeta? An pagtao nin paggiya sa buminagsik giraray na mga miembro kan grupong Juan sa daga poon 1919 sagkod 1922 kaiba sa pag-andam na patanogon an pitong trumpeta. Kaidto, an siring na mga linahidan nagin sibot sa pag-organisar liwat kan pampublikong ministeryo asin sa pagpatindog nin mga pasilidad sa pagpublikar. (Kap. 12:13, 14) Irinerepresentar kan pagpatanog sa mga trumpeta an daing takot na proklamasyon kan banwaan nin Dios, sa tabang kan mga anghel, manongod sa mga paghokom ni Jehova sa kinaban ni Satanas. Maririsa na nagpoon ini sa kombension sa Cedar Point, Ohio kan 1922 asin nagpapadagos sagkod pa sa dakulang kahorasaan.

8:13; 9:12; 11:14​—Sa anong paagi na mga “herak man” an pangultimong tolong tanog nin trumpeta? Mantang an enot na apat na tanog nin trumpeta mga proklamasyon na nagbubuyagyag sa gadan na kamugtakan sa espirituwal kan Kakristianohan, an huring tolo mga herak man sa bagay na konektado iyan sa espesipikong mga pangyayari. An ikalimang tanog konektado sa pagkatalingkas kan banwaan nin Dios sa “bûngaw” nin pagigin daing maginibo kan 1919 asin konektado sa daing ontok na paghuhulit ninda, na nagin arog sa nagpapasakit na damat sa Kakristianohan. (Kap. 9:1) An ikaanom nanonongod sa kadarudakulaing pagsalakay nin kabalyeriya sa kasaysayan asin nanonongod sa pambilog na kinaban na kampanya nin paghuhulit na nagpoon kan 1922. An pangultimong tanog konektado sa pagkamundag kan Mesiyanikong Kahadean.

Mga Leksion Para sa Sato:

9:10, 19. Igwa nin malanit na mensahe an may autoridad asin basado sa Biblia na mga pananaram na yaon sa mga publikasyon kan “maimbod asin mapagmansay na oripon.” (Mat. 24:45) An mensaheng ini katimbang kan mga ikog nin mga doron na may “sugod na agid sa mga amamatak” asin kan mga kabayo nin kabalyeriya, na an mga “ikog agid sa mga halas.” Taano? Huli ta an mga publikasyon na ini nagpapatanid dapit sa “aldaw nin pamamalos” ni Jehova. (Isa. 61:2) Magin kitang makosog an boot asin maigot sa pagdistribwir kaiyan.

9:20, 21. Dakol na tawong mahoyo, na nakaistar sa inaapod na mga nasyon na bakong Kristiano, an naghihimate sa mensaheng ibinabalangibog niato. Minsan siring, dai niato linalaoman an lagdoan na pagkakombertir kan mga tawo na nasa luwas kan rona nin Kakristianohan, na inaapod na “an natatada sa mga tawo.” Pero, nagmamaigot kita sa ministeryo.

12:15, 16. “An daga”​—mga elemento na nasa mismong sistema ni Satanas, o an mga namamahalang kapangyarihan sa manlaenlaen na nasyon​—nagsusuportar sa katalingkasan sa pagsamba. Poon kan dekada nin 1940, an mga kapangyarihan na iyan “hinalon an salog [nin persekusyon] na ibinuga kan dragon hale sa ngoso kaiyan.” Tunay nanggad, kun bobooton ni Jehova, kaya niang impluwensiahan an mga autoridad sa gobyerno na gibohon an saiyang kabotan. Kun siring, an Talinhaga 21:1 tamang nagsasabi: “An puso nin hade garo mga sapa nin tubig sa kamot ni Jehova. Pinapabolos nia iyan saen man nia iyan boot na paboloson.” Ini maninigong magpakosog kan satong pagtubod sa Dios.