Uya! An Inooyonan na Lingkod ni Jehova

“Uya! An sakong lingkod, . . . na inooyonan kan sakong kalag!”​—ISA. 42:1.

1. An banwaan ni Jehova dinadagka na gibohon an ano, nangorogna mantang nagdadangadang an Memorial, asin taano?

MANTANG nagdadangadang an panahon nin paggirumdom sa kagadanan ni Cristo, an banwaan nin Dios dinadagka na sunodon an hatol ni apostol Pablo na ‘magheling nin maingat sa Pangenot na Ahente asin Parasangkap kan satong pagtubod, si Jesus.’ Si Pablo nagsabi pa: “Iyo, horophoropa nindo nin marhay an saro na nagtagal nin siring na panlilibak nin mga parakasala tumang sa saindang sadiring ikakarahay, tanganing dai kamo mapagal asin manluya an saindong kalag.” (Heb. 12:2, 3) An pagheling nin maingat sa maimbod na pamumuhay ni Cristo, na suminagkod sa pag-atang nia kan saiyang sadiri, makakatabang sa linahidan na mga Kristiano sagkod sa kairiba nindang ibang karnero na padagos na maimbod na maglingkod ki Jehova asin dai ‘manluya an saindang kalag.’​—Ikomparar an Galacia 6:9.

2. Ano an manonodan niato sa mga hula ni Isaias na may koneksion sa Aki nin Dios?

² Paagi ki propeta Isaias, si Jehova nagpasabong nin sunod-sunod na hula na direktang may koneksion sa Aki nia. An mga hulang ini makakatabang sa sato na ‘magheling nin maingat sa Pangenot na Ahente asin Parasangkap kan satong pagtubod,’ si Cristo Jesus. * Iyan nagtataong liwanag dapit sa personalidad nia, mga pagsakit nia, asin pagpamuraway sa saiya bilang satong Hade saka Parabalukat. Papararomon kaiyan an satong pakasabot dapit sa Memorial, na gigirumdomon niato sa taon na ini sa Huebes, Abril 9, pakasolnop kan saldang.

Ipinamidbid Kun Siisay an Lingkod

3, 4. (a) Ano an pinapanongdan kan terminong “lingkod” sa libro nin Isaias? (b) Paano ipinapamidbid mismo kan Biblia kun siisay an Lingkod na sinambit sa Isaias kapitulo 42, 49, 50, 52, asin 53?

³ An terminong “lingkod” minalataw nin dakol na beses sa libro nin Isaias. Kun minsan, iyan ipinapanongod sa propeta mismo. (Isa. 20:3; 44:26) Kun beses, iyan ipinapanongod sa bilog na nasyon nin Israel, o Jacob. (Isa. 41:8, 9; 44:1, 2, 21) Alagad, kumusta man an lataw na mga hula mapadapit sa Lingkod na nakasurat sa Isaias kapitulo 42, 49, 50, 52, asin 53? Malinaw na ipinapamidbid sa sato kan Kristianong Griegong Kasuratan kun siisay an Lingkod ni Jehova na ilinaladawan sa mga kapitulong iyan. Interesante nanggad, an saro sa mga hulang ini binabasa kan opisyal na Etiope na sinambit sa libro nin Gibo kan an ebanghelisador na si Felipe giyahan kan espiritu tanganing dolokon sia. Pakabasa kan teksto sa Biblia na maheheling niato ngonyan sa Isaias 53:7, 8, an opisyal nakiolay ki Felipe: “Nakikiolay ako sa saimo, Manongod kiisay sinasabi ini kan propeta? Manongod sa saiya mismo  o manongod sa ibang tawo?” Tolos-tolos na ipinaliwanag ni Felipe na si Isaias nagtaram manongod sa Mesiyas, si Jesus.​—Gibo 8:26-35.

⁴ Kan omboy pa si Jesus, ipinahayag kan matanos na tawong si Simeon paagi sa kapangyarihan kan banal na espiritu na “an aking si Jesus” magigin “sarong liwanag para sa paghale kan tahob sa mga nasyon,” na ihinula sa Isaias 42:6 asin 49:6. (Luc. 2:25-32) Apuera kaini, ihinula sa Isaias 50:6-9 an makasusupog na pagtratar ki Jesus kan banggi na sia bistahon. (Mat. 26:67; Luc. 22:63) Pakalihis kan Pentecostes 33 C.E., malinaw na ipinamidbid ni apostol Pedro si Jesus bilang an “Lingkod” ni Jehova. (Isa. 52:13; 53:11; basahon an Gibo 3:13, 26.) Ano an manonodan niato sa Mesiyanikong mga hulang ini?

Tinotokdoan ni Jehova an Lingkod Nia

5. Anong pagtotokdo an inako kan Lingkod?

⁵ An saro sa mga hula ni Isaias manongod sa Lingkod nin Dios nagtatao nin liwanag dapit sa dayupot na relasyon ni Jehova asin kan panganay na Aki nia durante kan buhay kan Aki bago nagin tawo. (Basahon an Isaias 50:4-9.) Ihinayag kan Lingkod mismo na padagos siang tinotokdoan ni Jehova, na nagsasabi: “Pinupukaw nia an sakong talinga tanganing makadangog siring kan mga tinokdoan [“mga disipulo,” nota sa ibaba].” (Isa. 50:4) Durante kan bilog na panahon na iyan, an Lingkod ni Jehova naghinanyog sa Ama nia asin nakanood sa Saiya, na nagin mapagpasakop na disipulo. Saro nanggad na daing kaparehong pribilehio na matokdoan kan Kaglalang kan uniberso!

6. Paano ipinaheling kan Lingkod an sangkap na pagpasakop nia sa saiyang Ama?

⁶ Sa hulang ini, an Lingkod nagtataram dapit sa Ama nia bilang “an Soberanong Kagurangnan na Jehova.” Ipinapaheling kaini na nanodan kan Lingkod an pundamental na katotoohan dapit sa unibersal na soberaniya ni Jehova. Bilang pagpaheling kan sangkap na pagpasakop nia sa saiyang Ama, sia nagsabi: “An Soberanong Kagurangnan na Jehova mismo iyo an nagbukas kan sakong talinga, asin ako, sa sakong kabtang, dai nagin rebelde. Dai ako suminalingoy sa ibong.” (Isa. 50:5) Sia ‘yaon kaidto sa kataed ni Jehova bilang pangenot na trabahador’ sa paglalang kan pisikal na uniberso asin nin tawo. An “pangenot na trabahador” na ini ‘maogma sa atubangan ni Jehova sa gabos na panahon, na naoogma sa mabungang daga kan saiyang kinaban, asin an mga bagay na ikinakaogma kan Aki nin Dios yaon sa mga aki nin mga tawo.’​—Tal. 8:22-31.

7. Ano an nagpapaheling na an Lingkod may kompiansa sa suporta kan Ama nia durante kan mga pagbalo sa saiya?

⁷ An pagtotokdo na ini na inako kan Lingkod asin an kaogmahan nia sa katawohan iyo an nag-andam sa saiya kan sia magdigdi sa daga asin mapaatubang sa grabeng pagtumang. Padagos niang ikinaogmang marhay na gibohon an kabotan kan Ama nia, dawa kun napapaatubang sa makuring persekusyon. (Sal. 40:8; Mat. 26:42; Juan 6:38) Durante kan gabos na pagbalo ki Jesus sa daga, may kompiansa sia na yaon sa saiya an pag-oyon asin pagsuportar kan Ama nia. Siring kan sinabi sa hula ni Isaias, si Jesus nakapagsabi: “An Saro na nagpapahayag sako na matanos nasa harani. Siisay an puedeng makipaglaban sa sako? . . . Uya! An Soberanong Kagurangnan na Jehova mismo an matabang sa sako.” (Isa. 50:8, 9) Tunay nanggad na tinabangan ni Jehova an maimbod na Lingkod nia sa bilog na ministeryo kaini sa daga, na ipinapaheling nin saro pang hula ni Isaias.

An Ministeryo kan Lingkod Digdi sa Daga

8. Ano an nagpapatunay na si Jesus an “pinili” ni Jehova, na ihinula sa Isaias 42:1?

⁸ Sinasabi kan rekord sa Biblia an nangyari kan si Jesus bautismohan kan 29 C.E.: “An banal na espiritu . . . naghilig sa saiya, asin may tingog na naghale sa langit: ‘Ika an sakuyang Aki, an namomotan; inoyonan taka.’” (Luc. 3:21, 22) Sa siring, malinaw nanggad na ipinamidbid ni Jehova kun siisay an “pinili” nia, na sinambit sa hula ni Isaias. (Basahon an Isaias 42:1-7.) Durante kan ministeryo ni Jesus sa daga, inotob nia sa pambihirang paagi an hulang ini. Sa pagkasaysay ni Mateo sa Ebanghelyo, kinotar nia an mga tataramon na yaon sa Isaias 42:1-4 asin ipinanongod iyan ki Jesus.​—Mat. 12:15-21.

9, 10. (a) Paano inotob ni Jesus an Isaias 42:3 durante kan ministeryo nia? (b) Paano ‘pinangyari ni Cristo na magkaigwa nin hustisya’ mientras na sia nasa daga, asin noarin nia ‘eestablisaron an hustisya sa daga’?

⁹ An ordinaryong mga Judio hinahamak kaidto kan Judiong mga namomoon sa relihion. (Juan 7:47-49) An mga tawo tinatratar nin maringis asin  puedeng ikomparar sa ‘ronot nang mga gaho’ o ‘mga linong mitsa’ na madali nang maparong an laad. Minsan siring, si Jesus nagpaheling nin pagmalasakit sa mga dukha asin nagsasakit nin makuri. (Mat. 9:35, 36) Nagtao sia sa sainda nin maboot na pangagda, na nagsasabi: “Madia kamo sa sako, kamo gabos na nagpapagal asin nagagabatan, asin papaginhawahon ko kamo.” (Mat. 11:28) Apuera kaini, ‘pinangyari ni Jesus na magkaigwa nin hustisya’ paagi sa pagtokdo kan mga pamantayan ni Jehova dapit sa tama asin sala. (Isa. 42:3) Ipinaheling pa nia na an Ley nin Dios kaipuhan na iaplikar na may pagkarasonable asin pagkaherak. (Mat. 23:23) Ipinaheling man ni Jesus an hustisya paagi sa paghuhulit na mayong diskriminasyon sa mga mayaman sagkod dukha.​—Mat. 11:5; Luc. 18:18-23.

¹⁰ Ihinula man ni Isaias na an “pinili” ni Jehova an ‘maestablisar kan hustisya sa daga.’ (Isa. 42:4) Bilang Hade kan Mesiyanikong Kahadean, gigibohon nia ini sa dai na mahahaloy kun laglagon na nia an gabos na politikal na kahadean asin salidahan iyan kan saiya mismong matanos na pamamahala. Poponan nia an sarong bagong kinaban, na dian “magdadanay an katanosan.”​—2 Ped. 3:13; Dan. 2:44.

An “Liwanag” Asin an “Tipan”

11. Sa anong paagi na si Jesus an “liwanag kan mga nasyon” kan enot na siglo, asin paano na sia siring kaiyan sagkod sa presenteng panahon?

¹¹ Bilang kaotoban kan Isaias 42:6, si Jesus nagin nanggad an “liwanag kan mga nasyon.” Durante kan ministeryo nia sa daga, sa pangenot nagtao sia nin espirituwal na liwanag sa mga Judio. (Mat. 15:24; Gibo 3:26) Alagad si Jesus nagsabi: “Ako iyo an liwanag kan kinaban.” (Juan 8:12) Sia nagin liwanag sa mga Judio sagkod sa mga nasyon bako sanang paagi sa pagtao nin espirituwal na kaliwanagan, kundi paagi man sa pagdolot kan sangkap na buhay nia bilang tawo, na pantubos para sa bilog na katawohan. (Mat. 20:28) Pakatapos kan saiyang pagkabuhay liwat, isinugo nia an saiyang mga disipulo na magin mga saksi nia “sagkod sa kaporoporohi kan daga.” (Gibo 1:8) Durante kan ministeryo ni Pablo asin Bernabe, kinotar ninda an pananaram na “liwanag kan mga nasyon” asin ipinanongod iyan sa paghuhulit ninda sa mga bakong Judio. (Gibo 13:46-48; ikomparar an Isaias 49:6.) An gibohon na iyan ipinapadagos pa man giraray mantang ipinapalakop kan linahidan na mga tugang ni Jesus digdi sa daga asin kan kairiba ninda an espirituwal na liwanag saka tinatabangan an mga tawo na magtubod ki Jesus, an “liwanag kan mga nasyon.”

12. Paano itinao ni Jehova an Lingkod nia “bilang tipan kan banwaan”?

¹² Sa hula man sanang iyan, sinabi ni Jehova sa piniling Lingkod nia: “Iingatan taka asin itatao taka bilang tipan kan banwaan.” (Isa. 42:6) Daing ontok na hiningoa ni Satanas na gadanon si Jesus asin olangon sia na taposon an ministeryo nia sa daga, alagad iningatan ni Jehova si Jesus sagkod kan itinalaan na panahon na sia magadan. (Mat. 2:13; Juan 7:30) Dangan binuhay liwat ni Jehova si Jesus asin itinao sia bilang “tipan,” o panuga, sa mga tawo sa daga. An solemneng panuga na iyan nagtao nin garantiya na an maimbod na Lingkod nin Dios magpapadagos bilang “liwanag kan mga nasyon,” na pinapatalingkas an mga nasa espirituwal na kadikloman.​—Basahon an Isaias 49:8, 9. *

13. Sa anong paagi kinalda ni Jesus an “mga nagtutukaw sa kadikloman” durante kan ministeryo nia sa daga, asin paano nia padagos na ginigibo iyan?

 ¹³ Kaoyon kan panugang ini, an piniling Lingkod ni Jehova an ‘mabuklat sa mga matang buta,’ ‘mapaluwas kan bilanggo sa bartolina,’ asin makalda sa “mga nagtutukaw sa kadikloman.” (Isa. 42:7) Durante kan ministeryo ni Jesus sa daga, ginibo nia ini paagi sa pagbuyagyag kan falsong mga tradisyon sa relihion asin paghuhulit kan maogmang bareta kan Kahadean. (Mat. 15:3; Luc. 8:1) Sa siring, kinalda nia hale sa espirituwal na kaoripnan an mga Judio na nagin disipulo nia. (Juan 8:31, 32) Kaagid kaiyan, kinakalda ni Jesus sa espirituwal an minilyon na bakong Judio. Isinugo nia an saiyang mga parasunod na ‘paduman asin gumibo nin mga disipulo sa mga tawo kan gabos na nasyon,’ na nanunuga na sia makakaiba kan mga parasunod nia “sagkod sa pagtatapos kan sistema nin mga bagay.” (Mat. 28:19, 20) Gikan sa langitnon na kamugtakan ni Cristo Jesus, dinidirehiran nia an paghuhulit na lakop sa kinaban.

Ilinangkaw ni Jehova an “Lingkod”

14, 15. Taano asin paano ilinangkaw ni Jehova an Lingkod nia?

¹⁴ Sa saro pang hula mapadapit sa Mesiyanikong Lingkod nia, si Jehova nagsabi: “Uya! An sakuyang lingkod mahirong may pakarorop. Sia mamumugtak sa halangkaw na katongdan asin ilalangkaw nanggad patin papamurawayon na marhay nanggad.” (Isa. 52:13) Huli sa maimbod na pagpasakop kan Aki nia sa Saiyang soberaniya asin sa kaimbodan kaini sa ibong kan pinakagrabeng pagbalo, ilinangkaw sia ni Jehova.

¹⁵ Si apostol Pedro nagsurat dapit ki Jesus: “Sia nasa too nin Dios, huli ta sia nagduman sa langit; asin an mga anghel asin mga autoridad patin mga kapangyarihan ipinasakop na sa saiya.” (1 Ped. 3:22) Kaagid kaiyan, si apostol Pablo nagsurat: “Sia nagpakumbaba asin nagin makinuyog sagkod sa kagadanan, iyo, kagadanan sa hariging pasakitan. Sa rason man mismong ini ilinangkaw sia nin Dios sa superyor na posisyon asin may kabootan na itinao sa saiya an ngaran na halangkaw kisa sa lambang ibang ngaran, tanganing sa ngaran ni Jesus lumuhod an lambang tuhod kan mga nasa langit asin sa daga asin mga nasa irarom kan daga, asin an lambang dila hayag na magmidbid na si Jesu-Cristo iyo an Kagurangnan para sa kamurawayan nin Dios na Ama.”​—Fil. 2:8-11.

16. Paano si Jesus ‘pinamuraway na marhay nanggad’ kan 1914, asin ano an ginigibo nia poon kaidto?

¹⁶ Kan 1914, orog pa nganing ilinangkaw ni Jehova si Jesus. Sia ‘pinamuraway na marhay nanggad’ kan patukawon sia ni Jehova sa trono bilang Hade kan Mesiyanikong Kahadean. (Sal. 2:6; Dan. 7:13, 14) Poon kaidto, si Cristo nagpoon nang ‘mandaog sa tahaw kan mga kaiwal nia.’ (Sal.  110:2) Dinaog nguna nia si Satanas asin an saiyang mga demonyo, saka iinapon sinda sa palibot kan daga. (Kap. 12:7-12) Dangan, sa pag-akto bilang an Ciro na Orog na Dakula, kinalda ni Cristo sa pamumugol kan “Dakulang Babilonya” an natatada kan linahidan na mga tugang nia digdi sa daga. (Kap. 18:2; Isa. 44:28) Dinidirehiran nia an pambilog na kinaban na paghuhulit na nagreresulta sa pagtipon sa “mga natatada” kan espirituwal na mga tugang nia dangan sa minilyon na ‘ibang karnero,’ an maimbod na kairiba kan “sadangoton na aripompon.”​—Kap. 12:17; Juan 10:16; Luc. 12:32.

17. Sagkod sa puntong ini, ano an nanodan niato paagi sa pag-estudyar sa mga hula ni Isaias mapadapit sa “lingkod”?

¹⁷ An pag-estudyar sa pambihirang mga hulang ini sa libro nin Isaias seguradong nagpapararom kan pag-apresyar niato sa satong Hade asin Parabalukat, si Cristo Jesus. An pagpasakop nia bilang aki durante kan saiyang ministeryo sa daga nagpapaheling kan pagtotokdo na inako nia mantang kaiba kan saiyang Ama bago sia magdigdi sa daga. Sia mismo an nagin “liwanag kan mga nasyon” paagi sa saiya mismong ministeryo asin sa paghuhulit na dinidirehiran nia sagkod sa mismong panahon na ini. Siring sa sunod na manonodan niato, saro pang hula mapadapit sa Mesiyanikong Lingkod an naghahayag na sia magsasakit asin magdodolot kan buhay nia para sa satong kapakinabangan, mga bagay na maninigo niatong ‘horophoropon nin marhay’ mantang nagdadangadang an Memorial kan kagadanan nia.​—Heb. 12:2, 3.

[Mga Nota sa Ibaba]

Bilang Repaso

• Siisay an “lingkod” na sinambit sa mga hula ni Isaias, asin paano niato iyan naaraman?

• Anong pagtotokdo gikan ki Jehova an inako kan Lingkod?

• Paanong si Jesus an “liwanag kan mga nasyon”?

• Paano ilinangkaw an Lingkod?

[Mga Hapot Para sa Pag-adal]

[Ritrato sa pahina 21]

Malinaw nanggad na ipinamidbid ni Felipe na an “lingkod” na sinambit ni Isaias iyo si Jesus, an Mesiyas

[Ritrato sa pahina 23]

Bilang an piniling Lingkod ni Jehova, si Jesus nagpaheling nin pagmalasakit sa mga dukha asin nagsasakit nin makuri

[Ritrato sa pahina 24]

Si Jesus pinamuraway kan Ama nia asin pinatukaw sa trono bilang Hade kan Mesiyanikong Kahadean