Ika-125 Gradwasyon sa Gilead

An mga Misyonero Dinagka na Magin Arog ni Jeremias

“AN KLASENG ini nin Gilead sarong makasaysayan na pangyayari,” an ipinahayag ni Geoffrey Jackson kan Namamahalang Grupo. Nagpahayag sia sa 6,156 katawo na nag-atender sa gradwasyon kan ika-125 klase kan Paadalan sa Biblia kan Watchtower sa Gilead kan Setyembre 13, 2008. Labing 8,000 na misyonero, kaiba an 56 na naggradwar sa klaseng ini, an ikinadestino na kan Paadalan nin Gilead sagkod sa “kaporoporohi kan daga”!​—Gibo 1:8.

Si Tugang na Jackson, tsirman kan programa sa gradwasyon, naghapot, “Makakatabang daw an kredibilidad na umoswag an saindong ministeryo?” Dangan nagsambit sia nin apat na bagay na makakatabang na magkaigwa nin kredibilidad: pagkaigwa nin tamang saboot, pagpaheling nin marahay na halimbawa, marigon na pagbasar sa Tataramon nin Dios kan itinotokdo, asin pagkonsentrar sa pagpamidbid kan ngaran ni Jehova.

Tinokar ni David Schafer, na naglilingkod sa Komite sa Pagtotokdo, an temang “Masasabotan daw Nindo an Gabos na Bagay?” Sinierto nia sa mga estudyante sa Gilead na puede nindang ‘masabotan an gabos na bagay’ na kaipuhan tanganing makapaglingkod bilang misyonero kun padagos nindang hahanapon si Jehova asin mapakumbabang mimidbidon “an maimbod asin mapagmansay na oripon.”​—Tal. 28:5; Mat. 24:45.

Sunod, si John E. Barr kan Namamahalang Grupo nagpahayag kan temang “Dai Pagtogotan an Ano Man na Isuhay Kamo sa Pagkamoot nin Dios.” An sa amang konseho ni Tugang na Barr nakahale sa ano man na tibaad pagkahandal kan mga naggradwar asin kan mga magurang ninda manongod sa mga bagay na tibaad mapaatubang sa bagong mga misyonero sa madedestinohan sa sainda. “Kita dapat na nasa pagkamoot nin Dios na saro nanggad na ligtas asin may kaginhawahan na kamugtakan sa satong buhay,” an paliwanag nia. Mayo nin ano man na makakapasuhay sa mga misyonero sa pagkamoot nin Dios apuera na sana kun isusuhay ninda an saindang sadiri sa Dios.

Dinagka ni Sam Roberson kan Departamento sa Teokratikong mga Paadalan an mga nagdadangog na magin angay sa “pinakamarahay na gubing.” Paagi sa pag-adal sa mga nagibo ni Jesus asin pag-aplikar kaiyan sa saindang sadiri, ‘ikakasulog kan mga naggradwar an Kagurangnan na Jesu-Cristo.’ (Roma 13:14) Sunod, itinampok ni William Samuelson, paraataman kan Departamento sa Teokratikong mga Paadalan, kun ano an nagpapagin kagalanggalang sa sarong tawo. Nagigin kagalanggalang an saro bakong segun sa pagmansay nin tawo kundi segun sa pagmansay nin Dios.

Ininterbio ni Michael Burnett, saro sa mga instruktor, an mga estudyante mapadapit sa saindang mga eksperyensia sa paglilingkod sa langtad. Minsan ngani an kadaklan na estudyante iinasignar sa parate nang marhay na nahuhulitan na teritoryo mantang sinda nasa Paadalan nin Gilead sa Patterson, Nueva York, sinda nakanompong nin mga interesado. Ininterbio ni Gerald Grizzle kan Opisina nin Kombension an tolong tugang na nag-aadal sa Paadalan Para sa mga Miembro nin Komite kan Sangang Opisina. An saindang mga komento nakatabang na andamon an mga naggradwar sa Gilead sa maeeksperyensiahan ninda sa ibang nasyon na madedestinohan sa sainda.

An temang “Magin Arog ni Jeremias” ipinahayag ni David Splane kan Namamahalang Grupo, na naggradwar  sa ika-42 na klase. Minsan ngani nahandal si Jeremias manongod sa saiyang asignasyon, pinakosog sia ni Jehova. (Jer. 1:7, 8) Iyo man an gigibohon nin Dios sa bagong mga misyonero. “Kun may problema kamo sa sarong tawo,” an sabi ni Tugang na Splane, “magtukaw asin magsurat nin sampulong kualidad na pinapahalagahan nindong marhay sa tawong iyan. Asin kun dai kamo makasurat nin sampulo, nangangahulogan iyan na dai pa nindo midbid na marhay an tawong iyan.”

Mapagsakripisyo si Jeremias. Kan gusto nia nang magpondo, sia namibi, asin si Jehova yaon sa saiya. (Jer. 20:11) “Kun nanluluya an saindong boot,” an sabi ni Tugang na Splane, “ipakipag-olay iyan ki Jehova. Mapapangalas kamo sa kun paano kamo tatabangan ni Jehova.”

Sa pagtatapos kan programa sa gradwasyon, pinagirumdom kan tsirman an mga nagdadangog na nakanood an mga naggradwar nin nagkapirang paagi na makakatabang sa sainda na magkaigwa nin kredibilidad. Mantang nagpapatotoo sinda sa mga madedestinohan sa sainda, an kredibilidad ninda makakatabang na magin mas mapuersa an saindang patotoo.​—Isa. 43:8-12.

[Kahon sa pahina 22]

ESTADISTIKA KAN KLASE

Bilang nin mga nasyon na irinepresentar: 6

Bilang nin mga nasyon na dinestinohan: 21

Total na bilang nin mga estudyante: 56

Promedyong edad: 32.9

Promedyong taon sa katotoohan: 17.4

Promedyong taon sa bilog na panahon na ministeryo: 13

[Ritrato sa pahina 23]

Ika-125 na Naggradwar na Klase kan Paadalan sa Biblia kan Watchtower sa Gilead

Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.