An mga Sinabi daw ni Jesus Nakakaimpluwensia sa mga Pamibi Nindo?

“Kan matapos ni Jesus an mga sinabi niang ini, an resulta iyo na an mga kadaklan nagngalas nin labi-labi sa saiyang paagi nin pagtotokdo.”​—MAT. 7:28.

1, 2. Taano ta an mga kadaklan nagngaralas sa paagi nin pagtotokdo ni Jesus?

DAPAT niatong tubodon an mga sinabi kan bugtong na Aki nin Dios, si Jesu-Cristo, asin iaplikar iyan sa satong buhay. Tunay nanggad na mayong iba na makakapareho sa paagi nin pagpahayag nia. Iyo, an mga tawo nagngalas sa paagi nin pagtotokdo nia sa Sermon sa Bukid!​—Basahon an Mateo 7:28, 29.

² An Aki ni Jehova dai nagtokdo na siring kan mga eskriba, na ibinasar an haralawigon na diskurso ninda sa mga katokdoan nin bakong sangkap na mga tawo. Si Cristo nagtokdo “bilang sarong tawo na igwa nin autoridad” huling an itinaram nia gikan sa Dios. (Juan 12:50) Kaya helingon niato kun paano puede asin maninigo na makaimpluwensia sa satong mga pamibi an iba pang sinabi ni Jesus sa Sermon sa Bukid.

Nungkang Mamibi Siring kan mga Parasaginsagin

3. Itao an pinakapunto kan mga tataramon ni Jesus na nakasurat sa Mateo 6:5.

³ An pamibi mahalagang kabtang nin tunay na pagsamba, asin dapat kitang mamibi nin regular ki Jehova. Alagad an mga pamibi niato maninigong maimpluwensiahan kan mga sinabi ni Jesus sa Sermon sa Bukid. Sia nagsabi: “Kun kamo namimibi, dai kamo mag-arog sa mga parasaginsagin; huli ta gusto nindang mamibi na nagtitindog sa mga sinagoga asin sa mga kanto kan mahiwas na mga tinampo tanganing maheling nin mga tawo. Totoong ako nagsasabi sa saindo, Nakakamtan na ninda an bilog na balos sa sainda.”​—Mat. 6:5.

4-6. (a) Taano ta gusto kan mga Fariseo na mamibi na “nagtitindog sa mga sinagoga asin sa mga kanto kan mahiwas na mga tinampo”? (b) Paanong an siring na mga parasaginsagin ‘nagkakamit na kan bilog na balos sa sainda’?

⁴ Kun namimibi, dai dapat arogon kan mga disipulo ni Jesus an “mga parasaginsagin” na arog baga kan nagpapakangmatanos na mga Fariseo, na pagsaginsagin sana an pagpaheling sa publiko nin debosyon. (Mat. 23:13-32) An mga parasaginsagin na iyan gustong mamibi na “nagtitindog sa mga sinagoga asin sa mga kanto kan mahiwas na mga tinampo.” Taano? Tanganing “maheling nin mga tawo.” An mga Judio kan enot na siglo parateng namimibi bilang kongregasyon durante kan oras nin pagdolot kan tinotong na mga dolot sa templo (mga alas nuebe nin aga asin alas tres nin hapon). Dakol na nag-iistar sa Jerusalem an namimibi kaiba nin kadaklan nin mga parasamba sa mga patyo kan templo. Sa luwas kan siudad na iyan, an debotong mga Judio parateng namimibi nin duwang beses kada aldaw mantang “nagtitindog sa mga sinagoga.”​—Ikomparar an Lucas 18:11, 13.

⁵ Huling an kadaklan na tawo bakong harani sa templo o sa sarong sinagoga para sa mga pamibi na  nasambitan pa sana, puede sindang mamibi saen man na lugar sinda sa mga oras na iyan. An nagkapira gustong maabotan nin mga oras nin pamibi mantang sinda yaon “sa mga kanto kan mahiwas na mga tinampo.” Gusto nindang “maheling [sinda] nin mga tawo” na nag-aagi sa mga krosing na iyan. An mga nagsasagin na banal ‘namimibi nin haralawig bilang pagsaginsagin’ tanganing hangaan kan mga nagmamasid. (Luc. 20:47) Bako iyan an maninigong magin saboot niato.

⁶ Ipinahayag ni Jesus na an siring na mga parasaginsagin ‘nagkakamit na kan bilog na balos sa sainda.’ Dakula an pagmawot ninda na magkamit nin pagmidbid asin pag-omaw hale sa kapwa​—asin iyan na sana an makakamtan ninda. Iyan an magigin bilog na balos sa sainda, huling dai sisimbagon ni Jehova an mapagsaginsagin na mga pamibi ninda. Sa ibong na lado, sisimbagon nin Dios an mga pamibi kan tunay na mga parasunod ni Cristo, na ipinapaheling kan dugang pang sinabi ni Jesus dapit sa temang ini.

7. Ano an boot sabihon kan hatol na mamibi sa satong “pribadong kuarto”?

⁷ “Minsan siring, ika, kun ika namimibi, lumaog ka sa saimong pribadong kuarto asin, pakasera kan saimong pinto, mamibi ka sa saimong Ama na nasa hilom; dangan an saimong Ama na nagheheling sa hilom an mabalos sa saimo.” (Mat. 6:6) An konseho ni Jesus na mamibi sa pribadong kuarto pakasera kan pinto dai nangahulogan na dai puedeng irepresentar nin saro sa pamibi an kongregasyon. Dai ineengganyar kan hatol na ini an pampublikong pamimibi tanganing makua kan namimibi an atension nin iba asin kamtan an pag-omaw ninda. Maninigo niatong girumdomon ini kun may pribilehio kitang irepresentar sa pampublikong pamibi an banwaan nin Dios. Sunodon man niato an dugang pang konseho ni Jesus mapadapit sa pamibi.

8. Segun sa Mateo 6:7, anong salang paagi nin pamimibi an maninigo niatong likayan?

⁸ “Kun namimibi, dai pagparaorootrohon an iyo man sanang mga bagay, arog kan ginigibo kan mga tawo kan mga nasyon, huli ta hinohona ninda na dadangogon sinda huli sa paggamit ninda nin dakol na tataramon.” (Mat. 6:7) Sa siring, sinambit ni Jesus an saro pang salang paagi nin pamimibi​—an pag-orootro. Dai nia boot sabihon na nungka na maninigo niatong otrohon sa pamibi an odok sa pusong mga pakiolay asin kapahayagan nin pagpasalamat. Sa hardin nin Getsemani kan banggi bago si Jesus magadan, paorootro niang ginamit sa pamibi “an iyo man sanang tataramon.”​—Mar. 14:32-39.

9, 10. Sa anong paagi na kita dai maninigong mamibi nin paorootro?

⁹ Magigin sala para sa sato na arogon an paorootrong mga pamibi nin “mga tawo kan mga nasyon.” ‘Inoorootro’ ninda an tinuom na mga frase na kaiba an dakol na tataramon na dai man kaipuhan. Dai nakatabang sa mga parasamba ki Baal an pag-apod sa ngaran kan falsong dios na iyan “poon aga sagkod udto, na sinasabi: ‘O Baal, simbaga kami!’” (1 Ha. 18:26) Minilyon ngonyan an namimibi nin haralawigon asin paorootro, na sala na naghohona na sinda “dadangogon.” Alagad tinatabangan kita ni Jesus na masabotan na an ‘paggamit nin dakol na tataramon’ sa haralaba asin paorootrong pamibi mayo nin halaga sa pagheling ni Jehova. Si Jesus nagsabi pa:

¹⁰ “Kaya, dai kamo magin arog ninda, huli ta aram na nin Dios na saindong Ama an mga kaipuhan nindo bago pa nindo iyan hagadon sa saiya.” (Mat. 6:8) Dakol na Judiong namomoon sa relihion an nagin arog kan mga Hentil huli sa paggamit nin haralawigon nanggad na pamibi. An odok sa pusong pamibi na kaiba an pag-omaw, pagpasalamat, asin pakimaherak mahalagang kabtang nin tunay na pagsamba. (Fil. 4:6) Pero, magigin sala para sa sato na orootrohon an iyo man sanang mga bagay, na naghohona na kaipuhan an pag-orootro tanganing sabihon sa Dios an manongod sa mga pangangaipo niato. Kun kita namimibi, maninigo niatong girumdomon na kita nakikiolay sa Saro na ‘nakakaaram na kan satong kaipuhan bago pa niato iyan hagadon sa saiya.’

11. Ano an maninigo niatong girumdomon kun may pribilehio kitang magrepresentar sa pampublikong pamibi?

¹¹ An mga sinabi ni Jesus manongod sa mga pamibi na dai inaako maninigong magpagirumdom sa sato na an Dios dai mapapahanga paagi sa hararom na pananaram asin maarteng mga tataramon. Maninigo man niatong masabotan na an pampublikong pamibi bakong okasyon tanganing magmaigot na pahangaon an mga naghihinanyog o papag-isipon sinda kun gurano kahaloy bago kita magsabing “Amen.” An paggamit sa pamibi tanganing gumibo nin mga paisi o magtao nin hatol sa mga nagdadangog magigin bako man na kaoyon  kan kahulogan kan mga sinabi ni Jesus sa Sermon sa Bukid.

Tinotokdoan Kita ni Jesus Kun Paano Mamibi

12. Paano nindo ipapaliwanag an kahulogan kan kahagadan na “pakangbanalon logod an saimong ngaran”?

¹² Minsan ngani nagpatanid si Jesus tumang sa salang paagi nin paggamit sa dakulang pribilehio nin pamibi, talagang tinokdoan nia an saiyang mga disipulo kun paano mamibi. (Basahon an Mateo 6:9-13.) An modelong pamibi dai dapat na tuomon tanganing orootrohon. Imbes, iyan nagtatao nin arogan para sa sato mismong mga pamibi. Halimbawa, inenot ni Jesus an Dios paagi sa pambukas na mga tataramon na: “Ama niamo na nasa langit, pakangbanalon logod an saimong ngaran.” (Mat. 6:9) Angay sana na sa pamibi apodon niato si Jehova na “Ama niamo,” huling sia an satong Kaglalang, na nag-eerok ‘sa langit,’ na harayo nanggad sa daga. (Deut. 32:6; 2 Cron. 6:21; Gibo 17:24, 28) An paggamit kan plural na terminong “niamo” maninigong magpagirumdom sa sato na an mga kapagtubod niato igwa man nin dayupot na relasyon sa Dios. An pananaram na “pakangbanalon logod an saimong ngaran” sarong pakimaherak na si Jehova humiro tanganing pakangbanalon an sadiri nia paagi sa paghale kan gabos na katuyawan sa ngaran nia poon pa kan pagrebelde sa Eden. Bilang simbag sa pamibing iyan, hahaleon ni Jehova an karatan sa daga, sa siring pinapakangbanal an sadiri nia.​—Ezeq. 36:23.

13. (a) Paano maootob an kahagadan na “dumatong logod an kahadean mo”? (b) Ano an kalabot sa paggibo kan kabotan nin Dios sa daga?

¹³ “Dumatong logod an kahadean mo. Gibohon logod an kabotan mo, kun paano sa langit, siring man sa daga.” (Mat. 6:10) May koneksion sa kahagadan na ini sa modelong pamibi, maninigo niatong girumdomon na an “kahadean” iyo an langitnon na Mesiyanikong gobyerno na pinamamahalaan ni Cristo asin kan binuhay liwat na “mga banal” na kaiba nia. (Dan. 7:13, 14, 18; Isa. 9:6, 7) An pamibi na “dumatong” iyan sarong kahagadan na an Kahadean nin Dios humiro tumang sa gabos na nasa daga na nagkokontra sa pamamahala nin Dios. Iyan madali nang mangyari, bilang pag-andam para sa pangglobong paraiso na igwa nin katanosan, katoninongan, asin prosperidad. (Sal. 72:1-15; Dan. 2:44; 2 Ped. 3:13) An kabotan ni Jehova ginigibo na sa langit, asin an kahagadan na gibohon iyan sa daga sarong pakiolay na gibohon nin Dios an mga katuyohan nia sa planeta niato, kaiba an paghale sa mga nagtutumang sa saiya ngonyan siring kan ginibo nia kan suanoy na mga panahon.​—Basahon an Salmo 83:1, 2, 13-18.

14. Taano ta angay na hagadon na itao an ‘satong tinapay para sa aldaw na ini’?

¹⁴ “Itao mo samo ngonyan an samong tinapay para sa aldaw na ini.” (Mat. 6:11; Luc. 11:3) Paagi sa kahagadan na ini sa pamibi, hinahagad niato sa Dios na itao an kaipuhan na kakanon “para sa aldaw na ini.” Ipinapaheling kaini na nagtutubod kita na kayang itao ni Jehova an mga pangangaipo niato sa aroaldaw. Iyan bakong pamibi tanganing  magkaigwa nin probisyon na sobra sa kinakaipuhan. An kahagadan na ini para sa aroaldaw na mga pangangaipo niato puedeng magpagirumdom sa sato na pinagbotan nin Dios an mga Israelita na magtipon nin manna na ‘igo para sa lambang saro sa kada aldaw.’​—Ex. 16:4.

15. Ipaliwanag an kahulogan kan kahagadan na “ipatawad mo sa samo an samong mga utang, siring na kami man nagpatawad sa mga may utang sa samo.”

¹⁵ An sunod na kahagadan sa modelong pamibi dinadara an satong atension sa sarong bagay na kaipuhan niatong gibohon. Si Jesus nagsabi: “Ipatawad mo sa samo an samong mga utang, siring na kami man nagpatawad sa mga may utang sa samo.” (Mat. 6:12) Ipinapaheling kan Ebanghelyo ni Lucas na an “mga utang” na ini “mga kasalan.” (Luc. 11:4) Malalaoman sana niato an pagpatawad ni Jehova kun ‘pinatawad na’ niato an mga nagkasala sa sato. (Basahon an Mateo 6:14, 15.) Maninigo na lubos niatong patawadon an iba.​—Efe. 4:32; Col. 3:13.

16. Paano niato sasaboton an mga kahagadan na kita dai darahon sa sugot asin iligtas sa saro na marigsok?

¹⁶ “Dai mo kami darahon sa sugot, kundi iligtas mo kami sa saro na marigsok.” (Mat. 6:13) Paano niato sasaboton an duwang magkakonektar na kahagadan na ini sa modelong pamibi ni Jesus? Sarong bagay an sierto: Dai kita sinusugotan ni Jehova na gumibo nin kasalan. (Basahon an Santiago 1:13.) Si Satanas​—an “saro na marigsok”—​iyo talaga an “Parasugot.” (Mat. 4:3) Minsan siring, sinasabi kan Biblia na ginigibo nin Dios an mga bagay na itinotogot sana nia. (Rut 1:20, 21; Ecl. 11:5) Kun siring, an pananaram na “dai mo kami darahon sa sugot” sarong pakimaherak na dai itogot ni Jehova na kita madaog kun kita sinusugotan na sumuway sa saiya. Ultimo, an pakiolay na “iligtas mo kami sa saro na marigsok” sarong kahagadan na dai itogot ni Jehova na kita madaog ni Satanas. Asin makakasarig kita na ‘dai itotogot nin Dios na kita masugotan nin labi sa makakaya niato.’​—Basahon an 1 Corinto 10:13.

‘Padagos na Maghagad, Maghanap, Asin Magtuktok’

17, 18. Ano an boot sabihon kan ‘padagos na maghagad, maghanap, asin magtuktok’?

¹⁷ Sinadol ni apostol Pablo an mga kapagtubod: “Magmaigot kamo sa pamimibi.” (Roma 12:12) Si Jesus nagtao man nin kaagid na pagboot kan sia magsabi: “Padagos na maghagad, asin itatao iyan sa saindo; padagos na maghanap, asin makakakua kamo; padagos na magtuktok, asin bubukasan iyan sa saindo. Huli ta an gabos na naghahagad nagkakamit, asin an gabos na naghahanap nakakakua, asin sa gabos na nagtutuktok iyan bubukasan.” (Mat. 7:7, 8) Angay na “padagos na maghagad” nin ano man na bagay na kaoyon kan kabotan nin Dios. Kaoyon kan mga tataramon ni Jesus, si apostol Juan nagsurat: “Iyo ini an satong mapapanarigan mapadapit sa [Dios], na, minsan ano an satong hagadon segun sa saiyang kabotan, dinadangog nia kita.”​—1 Juan 5:14.

¹⁸ An hatol ni Jesus na ‘padagos na maghagad asin maghanap’ nangangahulogan na maninigo kitang mamibi nin maigot asin dai magpondo. Kaipuhan man na kita “padagos na magtuktok” tanganing makalaog sa Kahadean asin mag-ako kan mga bendisyon, pakinabang, asin balos kaiyan. Alagad makakasarig daw kita na sisimbagon nin Dios an satong mga pamibi? Iyo, makakasarig kita kun maimbod kita ki Jehova, huling si Cristo nagsabi: “An gabos na naghahagad nagkakamit, asin an gabos na naghahanap nakakakua, asin sa gabos na nagtutuktok iyan bubukasan.” An dakol na naeksperyensiahan kan mga lingkod ni Jehova prueba na an Dios totoo nanggad na iyo an “Paradangog nin pamibi.”​—Sal. 65:2.

19, 20. Segun sa mga tataramon ni Jesus na nakasurat sa Mateo 7:9-11, paanong si Jehova kaagid nin sarong mamomoton na ama?

¹⁹ Iinagid ni Jesus an Dios sa sarong mamomoton na ama na nagtatao nin marahay na mga bagay sa mga aki nia. Imahinara na kamo presente kaidto sa  Sermon sa Bukid asin nadangog nindo na si Jesus nagsabi: “Siisay na tawo sa saindo na hinahagadan nin tinapay kan saiyang aki​—dai nia sia tatawan nin gapo, bako daw? O, tibaad, mahagad sia nin sira—​dai nia sia tatawan nin halas, bako daw? Kun siring, kun kamo, minsan ngani maraot, tataong magtao nin marahay na mga regalo sa saindong mga aki, gurano pa daw an saindong Ama na nasa kalangitan na dai matao nin marahay na mga bagay sa mga naghahagad sa saiya?”​—Mat. 7:9-11.

²⁰ Dawa ngani an sarong tawong ama minsan paano “maraot” huli sa minanang kasalan, sia igwa nin natural na kapadangatan sa aki nia. Dai nia dadayaon an aki nia kundi magmamaigot sia na tawan ini nin “marahay na mga regalo.” Huling igwa nin siring sa amang pagmalasakit sa sato, an satong mamomoton na langitnon na Ama nagtatao nin “marahay na mga bagay,” siring baga kan saiyang banal na espiritu. (Luc. 11:13) Puede kitang pakosogon kaiyan na gumibo nin inaakong paglilingkod ki Jehova, an Paratao nin “lambang marahay na balaog asin lambang sangkap na regalo.”​—Sant. 1:17.

Padagos na Makinabang sa mga Sinabi ni Jesus

21, 22. Ano an pambihira manongod sa Sermon sa Bukid, asin ano an saboot nindo manongod sa mga sinabing ini ni Jesus?

²¹ Tunay nanggad na an Sermon sa Bukid an pinakanangongorog na diskurso na itinao kasuarin man sa daga. Iyan pambihira huli sa espirituwal na kahulogan asin pagkaklaro kaiyan. Siring kan ipinapaheling kan mga puntong hale dian na nasa seryeng ini nin mga artikulo, makikinabang kita nin dakula kun iinaaplikar niato an hatol na yaon sa sermon na ini. An mga sinabing ini ni Jesus makakapaoswag sa satong buhay ngonyan asin makakatao sa sato kan paglaom na maogmang ngapit.

²² Sa mga artikulong ini, siniyasat niato an pira sana sa mahahalagang marhay na leksion sa Sermon ni Jesus sa Bukid. Bakong makangangalas na an mga nagdangog sa diskurso nia “nagngalas nin labi-labi sa saiyang paagi nin pagtotokdo.” (Mat. 7:28) Daing duda na iyan man an magigin reaksion niato kun an satong isip asin puso papanoon niato kan mga bagay na ini saka kan iba pang daing kaagid sa halaga na mga sinabi kan Dakulang Paratokdo, si Jesu-Cristo.

Ano an Isisimbag Nindo?

• Ano an sinabi ni Jesus manongod sa mapagsaginsagin na mga pamibi?

• Taano ta maninigo niatong likayan an paorootrong mga tataramon kun kita namimibi?

• Anong mga kahagadan an yaon sa modelong pamibi ni Jesus?

• Paano kita puedeng ‘padagos na maghagad, maghanap, asin magtuktok’?

[Mga Hapot Para sa Pag-adal]

[Ritrato sa pahina 15]

Kinondenar ni Jesus an mga parasaginsagin na namimibi tangani sanang maheling asin madangog nin mga tawo

[Ritrato sa pahina 17]

Aram daw nindo kun taano ta angay na mamibi na itao sa sato an satong tinapay sa aroaldaw?