Togotan an mga Sinabi ni Jesus na Magkaigwa nin Epekto sa Saboot Nindo
Togotan an mga Sinabi ni Jesus na Magkaigwa nin Epekto sa Saboot Nindo
“An sinugo nin Dios nagtataram kan mga sinabi nin Dios.”—JUAN 3:34.
1, 2. Sa ano puedeng iagid an mga tataramon ni Jesus sa Sermon sa Bukid, asin taano ta masasabi niato na nakabasar iyan sa “mga sinabi nin Dios”?
AN SARO sa aram ngonyan na pinakadakulang sinapsap na mga brilyante iyo an 530-karat na Star of Africa. Iyan sarong mahalagang marhay nanggad na bato! Minsan siring, mas mahalagang marhay nanggad an espirituwal na mga kayamanan na yaon sa Sermon ni Jesus sa Bukid. Bakong makangangalas iyan huling si Jehova an Gikanan kan mga sinabi ni Cristo! Sa pagtaram manongod ki Jesus, an Biblia nagsasabi: “An sinugo nin Dios nagtataram kan mga sinabi nin Dios.”—Juan 3:34-36.
2 Minsan ngani posibleng mayo pang kabangang oras an lawig kan Sermon sa Bukid, igwa iyan nin 21 kotasyon hale sa walong libro kan Hebreong Kasuratan. Kaya marigon iyan na nakabasar sa “mga sinabi nin Dios.” Helingon niato ngonyan kun paano ta ikakaaplikar an nagkapira sa dakol na sinabing iyan, na daing kaagid sa halaga, na yaon sa pambihirang sermon na ini kan namomotan na marhay na Aki nin Dios.
“Makipagkatoninongan Ka Nguna sa Saimong Tugang”
3. Pagkatapos na patanidan ni Jesus an mga disipulo nia manongod sa mga epekto nin grabeng kaanggotan, anong hatol an itinao nia?
3 Bilang mga Kristiano, kita maogma asin mapagpatoninong huling yaon sa sato an banal na espiritu nin Dios, asin kaiba sa bunga kaiyan an kagayagayahan asin katoninongan. (Gal. 5:22, 23) Habo ni Jesus na mawara an katoninongan asin kaogmahan kan mga disipulo nia, kaya pinatanidan nia sinda manongod sa nakakagadan na mga epekto nin nagpapadagos na grabeng kaanggotan. (Basahon an Mateo 5:21, 22.) Sunod niang sinabi: “Kun siring, kun dinadara mo an saimong regalo sa altar asin dian saimong magirumdoman na an saimong tugang igwa nin tumang sa saimo, bayaan mo nguna an saimong regalo dian sa atubangan kan altar, asin maghale ka; makipagkatoninongan ka nguna sa saimong tugang, dangan, kun nakabalik ka na, idolot mo na an saimong regalo.”—Mat. 5:23, 24.
4, 5. (a) Ano an “regalo” na nasambitan sa mga tataramon ni Jesus na nakasurat sa Mateo 5:23, 24? (b) Gurano kahalaga na makipagkatoninongan sa tugang na nakolgan an boot?
4 An “regalo” na nasambitan ni Jesus iyo an ano man na dolot na ipinepresentar kaidto sa templo sa Jerusalem. Halimbawa, mahalaga an mga atang na hayop huli ta kaidto kabtang iyan kan pagsamba ki Jehova kan banwaan nia. Minsan siring, idinoon ni Jesus an sarong bagay na mas mahalaga—an pakipagkatoninongan sa tugang na nakolgan an boot bago magdolot nin regalo sa Dios.
5 An boot sabihon kan “makipagkatoninongan ka” iyo na ‘makipag-ulian.’ Kaya, anong leksion an makukua niato sa sinabing ini ni Jesus? Daing duwa-duwa na an paagi nin pagtratar niato sa iba igwa nin direktang koneksion sa relasyon niato ki Jehova. (1 Juan 4:20) Tunay nanggad, an mga dolot sa Dios kan suanoy na mga panahon daing halaga kun an saro na naggigibo kaiyan dai tinatratar nin tama an kapwa nia.—Basahon an Miqueas 6:6-8.
Mahalaga an Kapakumbabaan
6, 7. Taano ta kaipuhan an kapakumbabaan kun naghihingoang ikabalik an matoninong na relasyon sa sarong tugang na nakolgan niato an boot?
6 An pakikipagkatoninongan sa tugang na nakolgan niato an boot posibleng marhay na makabalo sa kapakumbabaan niato. An mapakumbabang mga tawo dai nakikiargumento o nakikidiskutir sa mga kapagtubod sa paghihingoang patunayan an hinohonang mga deretso. Maresulta iyan sa nakakadanyar na kamugtakan—saro na kapareho kan nangyari kaidto sa mga Kristiano sa suanoy na Corinto. Mapadapit sa situwasyon na iyan, itinao ni apostol Pablo an nakakapukaw sa isip na puntong ini: “Nangangahulogan nin biyong kadaogan nindo na kamo nag-aarasuntohan. Taano ta dai na sana nindo pabayaan na kamo pagkasalaan? Taano ta dai na sana nindo pabayaan na kamo dayaon?”—1 Cor. 6:7.
7 Dai sinabi ni Jesus na maninigo kitang magpasiring sa tugang niato tangani sanang kombensiron sia na tama kita asin sala sia. An obheto niato maninigo na tanganing ikabalik an matoninong na relasyon. Tanganing makipagkatoninongan, dapat na sadiosan niatong sabihon kun ano an namamatean niato. Kaipuhan man niatong admitiron na nakolgan niato an boot nin iba. Asin kun kita an may sala, siertong bobooton niatong maghagad nin dispensasyon sa mapakumbabang paagi.
‘Kun an Too Mong Mata Nagpapasingkog sa Saimo’
8. Itao an pinakapunto kan mga tataramon ni Jesus na nakasurat sa Mateo 5:29, 30.
8 Sa Sermon ni Jesus sa Bukid, nagtao sia nin madonong na hatol dapit sa moralidad. Aram nia na an bakong sangkap na mga kabtang kan hawak niato puedeng magkaigwa nin peligrosong impluwensia sa sato. Huli kaiyan, si Jesus nagsabi: “Ngonyan, kun Mat. 5:29, 30.
an toong mata mong iyan nagpapasingkog sa saimo, hulwata iyan asin tapoka iyan. Huli ta orog pang kapakipakinabang para sa saimo na mawara sa saimo an sarong kabtang kan saimong hawak kisa sa bilog mong hawak an iapon sa Gehenna. Siring man, kun an saimong toong kamot nagpapasingkog sa saimo, putola iyan asin tapoka iyan. Huli ta orog pang kapakipakinabang para sa saimo na mawara sa saimo an sarong kabtang kan saimong hawak kisa sa bilog mong hawak an humugpa sa Gehenna.”—9. Paano an “mata” o “kamot” niato ‘makakapasingkog’ sa sato?
9 An “mata” na nasambitan ni Jesus nagrerepresentar sa kakayahan o abilidad na isentro an satong atension sa sarong bagay, asin an “kamot” nagrerepresentar sa ginigibo kan satong mga kamot. Kun dai kita mag-iingat, an mga kabtang na ini kan hawak tibaad ‘makapasingkog’ sa sato asin makapapondo sa sato sa ‘paglakaw na kaibanan nin Dios.’ (Gen. 5:22; 6:9) Kun siring, kun nasusugotan kitang makisuway ki Jehova, kaipuhan na gumibo kita nin mapuersang aksion, na piguratibong hinuhulwat an mata o pinuputol an kamot.
10, 11. Ano an makakatabang sa sato na makalikay sa seksuwal na imoralidad?
10 Paano niato mapupugolan an satong mga mata na mabangkag sa imoral na mga bagay? “Nakipagtipan ako sa sakuyang mga mata,” an sabi kan matatakton sa Dios na si Job. “Kaya paano ako makakapaheling nin atension sa sarong birhen?” (Job 31:1) Si Job sarong may agom na lalaki na determinadong dai maglapas sa moral na mga ley nin Dios. Iyan an maninigong magin saboot niato baga man kita may agom o daing agom. Tanganing makalikay sa seksuwal na imoralidad, kaipuhan kitang giyahan kan banal na espiritu nin Dios, na nakakatabang sa mga namomoot sa Dios na ipaheling an pagpupugol sa sadiri.—Gal. 5:22-25.
11 Tanganing makalikay sa seksuwal na imoralidad, tibaad marahay na ihapot sa satong sadiri, ‘Tinotogotan ko daw an sakong mga mata na pukawon an sakong pagmawot sa imoral na mga bagay na madaling makukua sa mga libro, telebisyon, o Internet?’ Girumdomon man niato an mga tataramon na ini ni disipulo Santiago: “An lambang saro nababalo paagi sa pagkabutong asin pagkaakit sa saiya kan saiyang sadiring kamawotan. Dangan an kamawotan, kun iyan nangidam na, nangangaki nin kasalan; an kasalan man, kun iyan ikasagibo na, nagbubunga nin kagadanan.” (Sant. 1:14, 15) Sa katunayan, kun an siisay man na indibiduwal na nagdusay sa Dios “nagpaparaheling sa” saro na bakong kasekso na may imoral na mga motibo, kaipuhan na gumibo sia nin darakulang pagbabago na ikakakomparar sa paghulwat sa mata asin pagtapok kaiyan.—Basahon an Mateo 5:27, 28.
12. Anong hatol ni Pablo an makakatabang sa sato tanganing malabanan an imoral na mga pagmawot?
12 Mantang an salang paggamit sa mga kamot niato puedeng magresulta sa grabeng mga pagbalga sa moral na mga pamantayan ni Jehova, dapat na magin marigon an determinasyon niato na magdanay na malinig sa moral. Kun siring, maninigong himateon niato an hatol ni Pablo: “Gadanon nindo . . . an mga kabtang kan saindong hawak na yaon sa ibabaw kan daga kun dapit sa pakikisaro, pagkamaati, seksuwal na horot, nakakadanyar na pagmawot, asin kaaraan, na idolatriya.” (Col. 3:5) Idinodoon kan terminong “gadanon” an mapuersang paghiro na dapat gibohon tanganing malabanan an imoral na mga pagmawot kan laman.
13, 14. Taano ta mahalagang marhay na likayan an imoral na mga kaisipan asin gibo?
13 Tanganing ikasalbar an buhay nin sarong tawo, posibleng marhay na matogot sia na putolon paagi sa operasyon an sarong kalamias nia. An piguratibong ‘pagtapok’ sa mata asin kamot mahalagang marhay sa sato tanganing makalikay kita sa imoral na kaisipan asin mga gibo na puedeng magsapeligro kan espirituwalidad niato. An pagpapadanay na malinig sa mental, moral, asin espirituwal an solamenteng paagi tanganing makadulag sa daing katapusan na pagkalaglag na isinisimbolisar kan Gehenna.
14 Huli sa minanang kasalan asin pagkabakong sangkap, kaipuhan an paghihingoa sa pagpapadanay nin moral na kalinigan. “Linalanog ko an sakong hawak asin inooripon iyan,” an sabi ni Pablo, “tanganing, pakatapos na ako makapaghulit sa iba, ako mismo dai isikwal sa ano man na paagi.” (1 Cor. 9:27) Kun siring, magin determinado kitang iaplikar an hatol ni Jesus dapit sa moralidad, na dai noarin man tinotogotan an satong sadiri na gumawe sa paagi na nagpapaheling nin kawaran nin pagpasalamat sa saiyang atang na pantubos.—Mat. 20:28; Heb. 6:4-6.
“Magin Matinao”
15, 16. (a) Paano si Jesus nagtao nin halimbawa sa pagtao? (b) Ano an boot sabihon kan mga tataramon ni Jesus na nakasurat sa Lucas 6:38?
15 An mga sinabi asin an nakakalabi sa gabos na halimbawa ni Jesus nagpapaoswag sa pagigin matinao. Ipinaheling nia an dakulang pagkabuka an palad paagi sa pagdigdi sa daga para sa kapakinabangan kan bakong sangkap na katawohan. (Basahon an 2 Corinto 8:9.) Gikan sa boot na binutasan ni Jesus an langitnon na kamurawayan tanganing magin tawo asin itinao an saiyang buhay para sa makasalan na mga tawo, na an nagkapira sa sainda magkakamit nin kayamanan sa langit bilang kaiba niang mga paramana sa Kahadean. (Roma 8:16, 17) Asin siertong inengganyar ni Jesus an pagigin buka an palad kan sabihon nia:
16 “Magin matinao, asin an mga tawo magtatao sa saindo. Iuula ninda sa saindong paa an marahay na takad, dusok, ginugo asin naglilipwas. Huli ta sa takadan na itinatakad nindo, iyan man sana an itatakad ninda sa saindo.” (Luc. 6:38) An ‘pag-ula sa paa’ nanonongod sa sarong kostumbre nin nagkapirang paratinda na pinapano an pang-itaas na gubing nin parabakal, na an halakbang na katiklopan kan gubing na iyan nahahagkosan asin puedeng bugtakan nin mga bagay-bagay. An sato mismong gikan sa boot na pagigin buka an palad puedeng magresulta sa pakaresibi man niato nin marahay na takad, tibaad kun kita nangangaipo.—Ecl. 11:2.
17. Paano nagtao si Jehova nin pangenot na halimbawa sa pagtao, asin anong klaseng pagtao an makakapagpagayagaya sa sato?
17 Namomotan asin binabalosan ni Jehova an mga maogmang nagtatao. Sia mismo nagtao nin pangenot na halimbawa, na itinao an bugtong na Aki nia “tanganing an lambang nagtutubod sa saiya dai malaglag kundi magkaigwa nin buhay na daing katapusan.” (Juan 3:16) Si Pablo nagsurat: “An nagtatanom nin abunda mag-aani man nin abunda. Gibohon kan lambang saro an oyon sa napagdesisyonan nia sa saiyang puso, na bakong maraot sa boot o napipiritan, huli ta an Dios namomoot sa maogmang paratao.” (2 Cor. 9:6, 7) An pagtao kan satong panahon, kosog, asin materyal na kayamanan tanganing suportaran an tunay na pagsamba siertong magtatao sa sato nin kagayagayahan asin nagsosopay na balos.—Basahon an Talinhaga 19:17; Lucas 16:9.
“Dai Ka Magpatanog nin Trumpeta sa Enotan Mo”
18. Sa anong mga kamugtakan na ‘mayo kita nin magigin balos’ hale sa satong langitnon na Ama?
18 “Mag-ingat kamo na dai paggibohon an saindong katanosan sa atubangan nin mga tawo tanganing maheling ninda; ta kun dai mayo kamo nin magigin balos sa saindong Ama na yaon sa kalangitan.” (Mat. 6:1) An boot sabihon ni Jesus sa terminong “katanosan” iyo an paggawe na kaoyon kan kabotan nin Dios. Dai nia boot sabihon na an diosnon na mga gibo maninigo na nungkang gibohon sa publiko, huli ta sinabihan nia an saiyang mga disipulo na ‘pasirangon an saindang liwanag sa atubangan nin mga tawo.’ (Mat. 5:14-16) Alagad ‘mayo kita nin magigin balos’ hale sa satong langitnon na Ama kun ginigibo niato an mga bagay “tanganing maheling” asin hangaan, arog kan mga aktor na nagpapasale sa entablado sa sarong teatro. Kun igwa kita nin siring na mga motibo, dai niato makakamit an dayupot na relasyon sa Dios o an daing sagkod na mga bendisyon sa pamamahala kan Kahadean.
19, 20. (a) Ano an boot sabihon ni Jesus kan sia magsabi na dai “magpatanog nin trumpeta” kun nagtatao nin “mga regalo nin pagkaherak”? (b) Paano niato dai ipinapaisi sa walang kamot an ginigibo kan toong kamot niato?
19 Kun kita igwa nin tamang saboot, susunodon niato an konseho ni Jesus: “Huli kaini kun ika nagtatao nin mga regalo nin pagkaherak, dai ka magpatanog nin trumpeta sa enotan mo, arog kan ginigibo kan mga parasaginsagin sa mga sinagoga asin sa mga tinampo, tangani sindang omawon nin mga tawo. Totoong ako nagsasabi sa saindo, Nakakamtan na ninda an bilog na balos sa sainda.” (Mat. 6:2) An “mga regalo nin pagkaherak” iyo an mga donasyon para sa pagsuportar sa mga daing sukat. (Basahon an Isaias 58:6, 7.) Si Jesus asin an mga apostol nia igwa nin komun na pondo na magagamit sa pagtabang sa mga dukha. (Juan 12:5-8; 13:29) Mantang an paglimos dai man literal na may naeenot na mga tanog nin trumpeta, minalataw na ginamit ni Jesus an pasobrang pagtaram (hyperbole) kan sabihon nia na dai kita maninigong “magpatanog nin trumpeta” sa enotan niato kun kita nagtatao nin “mga regalo nin pagkaherak.” Dai niato maninigong ipaisi an siring na pagtao, arog kan ginibo kan Judiong mga Fariseo. Inapod sinda ni Jesus na mga parasaginsagin huling ipinapaisi ninda “sa mga sinagoga asin sa mga tinampo” an saindang mga donasyon bilang limos. An mga parasaginsagin na idto ‘nagkakamit na kan bilog na balos sa sainda.’ An pag-omaw kan mga tawo asin posibleng an pagtukaw sa sinagoga, sa enotan na mga tukawan, kaiba kan bantog na mga rabi iyo sana an balos na makukua ninda, huli ta mayo nang itatao si Jehova sa sainda. (Mat. 23:6) Pero, paano dapat gumawe an mga disipulo ni Cristo? Sinabi ni Jesus sa sainda—asin sa sato:
20 “Alagad ika, kun nagtatao nin mga regalo nin pagkaherak, dai na makaisi an saimong walang kamot kan ginigibo kan saimong too, tanganing an saimong mga regalo nin pagkaherak mahilom; dangan an saimong Ama na nagheheling sa hilom mabalos saimo.” (Mat. 6:3, 4) An satong mga kamot sa parate nagtitinabangan. Kun siring, an dai pagpaisi sa walang kamot kan ginigibo kan toong kamot nangangahulogan na dai niato ipinapaisi an satong mga paglimos, dawa sa mga dayupot sa sato, na siring kan pagigin harani kan walang kamot sa toong kamot niato.
21. Ano an kaiba sa balos na hale sa Saro na “nagheheling sa hilom”?
21 Kun dai niato ipinaghahambog an satong paglimos, magigin hilom an satong “mga regalo nin pagkaherak.” Dangan babalosan kita kan satong Ama, “na nagheheling sa hilom.” Huling an satong langitnon na Ama nag-eerok sa kalangitan asin dai naheheling kan mga mata nin tawo, nagdadanay sia “sa hilom” kun para sa katawohan. (Juan 1:18) Kaiba sa balos na hale sa saro na “nagheheling sa hilom” an pagkaigwa niato nin dayupot na relasyon ki Jehova, pagpatawad sa mga kasalan niato, asin pagtao sa sato nin buhay na daing sagkod. (Tal. 3:32; Juan 17:3; Efe. 1:7) Mas marahay nanggad iyan kisa sa pag-ako nin pag-omaw hale sa mga tawo!
Mahalagang Marhay na mga Sinabi na Dapat Pahalagahan
22, 23. Taano ta maninigo niatong pahalagahan an mga sinabi ni Jesus?
22 An Sermon sa Bukid tunay nanggad na pano nin espirituwal na kayamanan na igwa nin dakol na magayon na aspekto. Daing duda na igwa iyan nin daing kaagid sa halagang mga tataramon na puedeng magtao sa sato nin kagayagayahan dawa sa maribok na kinaban na ini. Iyo, kita magigin maogma kun papahalagahan niato an mga sinabi ni Jesus asin totogotan na magkaigwa iyan nin epekto sa satong saboot asin pamumuhay.
23 Bebendisyonan an gabos na “nagdadangog” asin “naggigibo” kan itinokdo ni Jesus. (Basahon an Mateo 7:24, 25.) Kaya magin determinado kitang sumunod sa hatol ni Jesus. Eestudyaran an dugang pa sa saiyang mga sinabi sa Sermon sa Bukid sa ultimong artikulo kan seryeng ini.
Ano an Isisimbag Nindo?
• Taano ta mahalaga na makipagkatoninongan sa tugang na nakolgan an boot?
• Paano kita makakalikay na masingkog kan “toong mata” niato?
• Ano an maninigong magin saboot niato kun dapit sa pagtao?
[Mga Hapot Para sa Pag-adal]
[Ritrato sa pahina 11]
Marahayon nanggad na “makipagkatoninongan ka” sa kapagtubod na nakolgan mo an boot!
[Mga Ritrato sa pahina 12, 13]
Binebendisyonan ni Jehova an mga maogmang nagtatao