Ituruhok an Saindong mga Mata sa Premyo
Ituruhok an Saindong mga Mata sa Premyo
“Pinagmamaigotan kong makaabot sa pasohan para sa [premyo].”—FIL. 3:14.
1. Anong premyo an iinalok ki apostol Pablo?
SI APOSTOL Pablo, na midbid man bilang Saulo nin Tarso, hale sa prominenteng pamilya. Sia tinokdoan kan bantog na paratokdo nin Ley na si Gamaliel sa relihion kan saiyang mga apoon. (Gibo 22:3) Kaidto, magkakaigwa kutana si Pablo kan ibinibilang na marahay na karera; pero binayaan nia an saiyang relihion asin nagin Kristiano. Sa siring, linaoman nia an iinalok sa saiya na premyong buhay na daing sagkod—an pagigin imortal na hade asin saserdote sa langitnon na Kahadean nin Dios. An Kahadean na iyan mamamahala sa sarong paraisong daga.—Mat. 6:10; Kap. 7:4; 20:6.
2, 3. Gurano kadakula kan pagpahalaga ni Pablo sa premyong langitnon na buhay?
2 Sa pagpaheling kun gurano kadakula kan pagpahalaga ni Pablo sa premyong iyan, sia nagsabi: “An mga bagay na pakinabang para sa sako, ibinilang ko ini na kawaran huli sa Cristo. Tara, sa bagay na iyan, tunay nanggad na ibinibilang ko man an gabos na bagay na kawaran huli sa daing kaagid na halaga kan kaaraman manongod ki Cristo Jesus na sakong Kagurangnan. Huli sa saiya inako ko an pagkawara kan gabos na bagay asin ibinibilang ko iyan na dakol na tapok.” (Fil. 3:7, 8) An mga bagay na ibinibilang kan kadaklan na tawo na importante—posisyon, kayamanan, karera, pagigin midbid—ibinilang ni Pablo na tapok pagkatapos na manodan nia an katotoohan manongod sa katuyohan ni Jehova para sa katawohan.
3 Poon kaidto, an talagang importante ki Pablo iyo an mahalagang marhay na kaaraman manongod ki Jehova asin ki Cristo, na dapit dian sinabi ni Jesus sa pamibi sa Dios: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) An odok na pagmawot ni Pablo na makamtan an buhay na daing sagkod risang-risa sa mga tataramon nia na nakasurat sa Filipos 3:14: “Pinagmamaigotan kong makaabot sa pasohan para sa premyong langitnon na pag-apod nin Dios paagi ki Cristo Jesus.” Iyo, an saiyang mga mata nakaturuhok sa premyong buhay na daing sagkod sa kalangitan bilang kabtang kan Kahadean na gobyerno nin Dios.
Mabuhay Sagkod Lamang sa Daga
4, 5. Anong premyo an iinaalok sa minilyon na naggigibo kan kabotan nin Dios ngonyan?
4 Para sa dakulang mayoriya kan mga gustong gibohon an kabotan nin Dios, an premyo na maninigong pagmaigotan na makamtan iyo an buhay na daing sagkod sa bagong kinaban nin Dios. (Sal. 37:11, 29) Pinatunayan ni Jesus na segurado an paglaom na ini. Sia nagsabi: “Maogma an mga mahoyo, huli ta mamanahon ninda an daga.” (Mat. 5:5) Si Jesus mismo an pangenot na magmamana kan daga niato, na ipinaparisa kan Salmo 2:8, asin magkakaigwa sia nin 144,000 na kairibang mamamahala sa langit. (Dan. 7:13, 14, 22, 27) An mga arog-karnero na talagang maistar sa daga ‘magmamana’ kan daganon na rona kan Kahadean na ‘inandam para sa sainda poon pa kan pagkaestablisar kan kinaban.’ (Mat. 25:34, 46) Asin ginagarantiyahan kita na maootob an gabos na ini huli ta an Dios, na nanunuga kaiyan, “dai makakapagputik.” (Tito 1:2) Puede man kitang magkaigwa nin kompiansa sa kaotoban kan mga panuga nin Dios na arog kan ki Josue kan sabihon nia sa mga Israelita: “Mayo ni sarong tataramon sa gabos na marahay na tataramon na isinabi sa saindo ni Jehova na saindong Dios an nasudya. Iyan gabos naotob para sa saindo. Mayo ni sarong tataramon sa mga iyan an nasudya.”—Jos. 23:14.
5 An buhay sa bagong kinaban nin Dios dai magigin nakakadesganar siring ngonyan. Magigin laen nanggad iyan: mayo na nin guerra, krimen, kadukhaan, inhustisya, helang, asin kagadanan. Sa panahon na iyan, an mga tawo magkakaigwa nin sangkap na salud asin maistar sa sarong daga na ginibong paraiso. An buhay na iyan magigin nakakakontento na labi pa sa pinakamamawot na mga pangarap niato. Iyo, sa panahon na iyan kada aldaw magkakaigwa nin labi-labi nanggad na kaogmahan. Makangangalas nanggad na premyo iyan!
6, 7. (a) Paano ipinaheling ni Jesus kun ano an malalaoman niato na mangyayari sa bagong kinaban nin Dios? (b) Paanong dawa an mga gadan matatawan nin bagong kapinonan?
6 Kan si Jesus nasa daga, tinawan sia nin Dios nin kapangyarihan paagi sa banal na espiritu Nia tanganing ipaheling an klase kan marahayon na mga bagay na mangyayari sa bilog na daga sa bagong kinaban. Halimbawa, sinabihan ni Jesus na maglakaw an sarong lalaki na 38 nang taon na paralisado. An Biblia nagsasabi na an lalaki naglakaw. (Basahon an Juan 5:5-9.) Sa saro pang pangyayari, si Jesus nakanupar nin “sarong lalaking buta poon kan mamundag” asin pinaomayan sia. Pagkatapos kaiyan, hinapot an dating buta manongod sa Saro na nagpaomay sa saiya, asin sia nagsimbag: “Poon pa kan suanoy dai pa noarin man nadangog na an siisay man nakapabuklat sa mata nin saro na namundag na buta. Kun an tawong ini bakong gikan sa Dios, mayo sia nin ano man na magigibo.” (Juan 9:1, 6, 7, 32, 33) Kaya ni Jesus na gibohon an gabos na ini ta sia tinawan nin Dios nin kapangyarihan. Saen man si Jesus magduman, “pinaomayan nia an mga nangangaipo nin pagpaomay.”—Luc. 9:11.
7 Bako sanang kaya ni Jesus na paomayan an mga may helang asin kimay kundi kaya man niang buhayon an mga gadan. Bilang halimbawa, sarong 12 anyos na daragita an nagadan, na huli kaiyan grabe an kamondoan kan mga magurang nia. Alagad si Jesus nagsabi: “Daragita, ako nagsasabi sa saimo, Bangon!” Asin buminangon sia! Naiimahinar daw nindo an reaksion kan mga magurang asin kan iba pa na yaon duman? (Basahon an Marcos 5:38-42.) Sa bagong kinaban nin Dios, magkakaigwa nin “labi-labi kadakulang kaogmahan” kun buhayon na liwat an binilyon, huli ta “magkakaigwa nin pagkabuhay liwat an mga matanos sagkod an mga bakong matanos.” (Gibo 24:15; Juan 5:28, 29) An mga ini tatawan nin bagong kapinonan sa buhay na may oportunidad na mabuhay poon sa panahon na iyan padagos, sagkod lamang pa ngani.
8, 9. (a) Durante kan Milenyal na Paghade ni Cristo, ano an mangyayari sa kasalan na minana ki Adan? (b) Ano an magigin basehan kan paghokom sa mga gadan?
8 An mga binuhay liwat magkakaigwa nin oportunidad na magkamit nin buhay na daing sagkod. Dai sinda hohokoman basado sa mga kasalan na nagibo ninda bago sinda nagadan. (Roma 6:7) Durante kan Milenyal na Paghade ni Cristo, mantang iinaaplikar an mga pakinabang kan atang na pantubos, an makinuyog na mga sakop kan Kahadean luway-luway na magigin sangkap, na sa kahurihurihi magigin biyong talingkas sa gabos na epekto kan kasalan ni Adan. (Roma 8:21) “Totoong hahalonon [ni Jehova] an kagadanan sagkod lamang, asin papahidon nanggad kan Soberanong Kagurangnan na Jehova an mga luha sa gabos na lalawgon.” (Isa. 25:8) An Tataramon nin Dios nagsasabi man na ‘may mga rolyong bibikladon,’ na nagpaparisa na an mga nabubuhay sa panahon na iyan tatawan nin bagong impormasyon. (Kap. 20:12) Mantang an daga ginigibong paraiso, “an katanosan iyo nanggad an manonodan kan mga nag-eerok sa mabungang daga.”—Isa. 26:9.
9 An mga binuhay liwat hohokoman, bakong basado sa kasalan na minana ki Adan, kundi sa kun ano an gusto nindang gibohon. An Kapahayagan 20:12 nagsasabi: “Hinokoman an mga gadan sono sa mga bagay na nakasurat sa mga rolyo segun sa saindang mga gibo,” an boot sabihon, an mga ginibo ninda pagkabuhaya liwat sa sainda. Marahayon nanggad na halimbawa kan hustisya, pagkaherak, asin pagkamoot ni Jehova! Saro pa, an makamomondong mga bagay na nangyari sa nakaaging buhay ninda sa daan na kinaban na ini “dai na magigirumdoman, ni masabong pa iyan sa puso.” (Isa. 65:17) Huli sa nakakaparigon na bagong impormasyon na makukua asin sa buhay na pano nin makaoogmang mga bagay, dai na sinda mapupurisaw huli sa makamomondong mga bagay kan nakaagi. An nakaaging mga eksperyensiang iyan malilingawan na ninda. (Kap. 21:4) Magigin totoo man iyan sa “dakulang kadaklan,” na makakaligtas sa Armagedon.—Kap. 7:9, 10, 14.
10. (a) Ano an magigin kamugtakan nin buhay sa bagong kinaban nin Dios? (b) Ano an puede mong gibohon na makakatabang sa saimo na ituruhok an saimong mga mata sa premyo?
10 Sa bagong kinaban nin Dios, an mga tawo mabubuhay na dai na magkakahelang giraray o magagadan. “Mayo nin nag-eerok na masabi: ‘Naghehelang ako.’” (Isa. 33:24) Sa kahurihurihi, an mga nag-eerok sa bagong daga mamata kada aga na may sangkap na salud, na naoogmang marhay sa saro na naman na marahayon na aldaw. Lalaoman ninda an nakakakontentong gibohon asin an pakikiasosyar sa iba na may pagmakolog sa sainda. An siring na buhay marahayon nanggad na premyo! Bilang suhestion, taano ta dai nindo buklaton an saindong Biblia sa mga hula sa Isaias 33:24 asin 35:5-7? Probaran na imahinaron na yaon ka sa kamugtakan na iyan. Makakatabang iyan sa saimo na ituruhok an saimong mga mata sa premyo.
Dai Na Pagturuhok sa Premyo
11. Iladawan an marahayon na kapinonan kan paghade ni Salomon.
11 Oras na maaraman niato an manongod sa premyo, kaipuhan na magmaigot nanggad kita na mapagdanay an satong mga mata na nakaturuhok dian, huli ta may posibilidad na dai na kita magturuhok dian. Halimbawa, kan si Salomon magin hade sa suanoy na Israel, sia mapakumbabang namibi sa Dios na logod tawan sia nin pakasabot asin pakabatid tanganing mahokoman nia sa tamang paagi an Saiyang banwaan. (Basahon an 1 Hade 3:6-12.) Bilang resulta, an Biblia nagsasabi, “an Dios padagos na nagtao ki Salomon nin dakulaon na kadonongan asin pakasabot.” Sa katunayan, “an kadonongan ni Salomon orog na dakula kisa sa kadonongan kan gabos na taga Subangan asin kisa sa bilog na kadonongan nin Egipto.”—1 Ha. 4:29-32.
12. Anong patanid an itinao ni Jehova sa magigin mga hade sa Israel?
12 Minsan siring, bago kaidto nagpatanid na si Jehova na an siisay man na magin hade ‘dai maninigong magpadakol nin kabayo’ asin na “dai man sia maninigong magpadakol nin agom, tanganing an saiyang puso dai sumuhay.” (Deut. 17:14-17) An pagpadakol kan saiyang mga kabayo magpapaheling na an hade nagsasarig sa puersa militar tanganing protehiran an nasyon imbes na magsarig ki Jehova, an Protektor. Asin an pagpadakol nin agom magigin peligroso huling an nagkapira sa sainda puedeng hale sa nakapalibot na paganong mga nasyon na may falsong pagsamba, asin an mga agom na iyan puedeng patalikodon an hade sa tunay na pagsamba ki Jehova.
13. Paanong si Salomon dai na nagturuhok sa itinao sa saiya?
13 Dai hinimate ni Salomon an mga patanid na iyan. Imbes, ginibo nia an espesipikong sinabi ni Jehova na dai maninigong gibohon nin mga hade. Nagtipon sia nin rinibong kabayo asin parakabayo. (1 Ha. 4:26) Nagkaigwa man sia nin 700 na agom asin 300 na kasaroan, na dakol sa sainda an hale sa kaharaning mga nasyon na pagano. ‘Ikiniling kan mga ini an saiyang puso na sumunod sa ibang mga dios; asin an saiyang puso dai nagin bilog ki Jehova.’ Si Salomon nakikabtang sa makababaldeng falsong pagsamba, kan mga nasyon na pagano, na iinintrodusir sa saiya kan mga agom nia na taga ibang nasyon. Bilang resulta, si Jehova nagsabi na ‘sierto nanggad na papasingon nia ki Salomon an kahadean.’—1 Ha. 11:1-6, 11.
14. Ano an nagin resulta kan kasumbikalan ni Salomon asin kan nasyon nin Israel?
14 Si Salomon dai na nagturuhok sa mahalagang marhay na pribilehio nia na magrepresentar sa tunay na Dios. An hade biyong nakikabtang sa falsong pagsamba. Pag-abot nin panahon, an bilog na nasyon nagin apostata, na nagresulta sa pagkalaglag kaiyan kan 607 B.C.E. Minsan ngani kan huri ibinalik kan mga Judio an tunay na pagsamba, pakalihis nin mga siglo si Jesus napahirong magsabi: “An kahadean nin Dios hahaleon sa saindo asin itatao sa sarong nasyon na nagluluwas nin mga bunga kaiyan.” Iyan mismo an nangyari. Si Jesus nagsabi: “Uya! An saindong harong pinabayaan na sa saindo.” (Mat. 21:43; 23:37, 38) Bilang resulta kan pagigin bakong maimbod kan nasyon, nawara kaiyan an dakulaon na pribilehio na magrepresentar sa tunay na Dios. Kan 70 C.E., linaglag kan mga hukbo nin Roma an Jerusalem saka an templo, asin dakol sa natadang mga Judio an nagin mga oripon.
15. Magtao nin mga halimbawa nin mga tawong dai na nagturuhok sa kun ano talaga an importante.
15 Si Judas Iscariote saro sa 12 apostol ni Jesus. Nadangog ni Judas an marahayon na mga katokdoan ni Jesus asin naheling nia an mga milagro na ginibo kaini sa tabang kan banal na espiritu nin Dios. Pero, dai iningatan ni Judas an puso nia. Ipinagkatiwala sa saiya an kahon nin kuarta na sadiri ni Jesus asin kan 12 apostol. Alagad “sia parahabon asin yaon sa saiya an kahon nin kuarta patin kinukua nia an kuarta na ilinalaog dian.” (Juan 12:6) Sia nagin mahanab na gayo kaya sa kahurihurihi nagpakana sia na ipasaloib si Jesus sa parasaginsagin na mga poon na saserdote sa kantidad na 30 pidasong pirak. (Mat. 26:14-16) An saro pang dai na nagturuhok iyo si Demas, na kaibaiba ni apostol Pablo. Dai iningatan ni Demas an puso nia. Si Pablo nagsabi: “Binayaan ako ni Demas ta namotan nia an presenteng sistema nin mga bagay.”—2 Tim. 4:10; basahon an Talinhaga 4:23.
Sarong Leksion Para sa Lambang Saro sa Sato
16, 17. (a) Gurano kamapuersa an pagtumang na napapaatubang sa sato? (b) Ano an makakatabang sa sato na malabanan an ano man na iatubang sa sato ni Satanas?
16 An gabos na lingkod nin Dios maninigong isapuso an mga halimbawa na nasa Biblia, huli ta sinabi sa sato: “Ngonyan an mga bagay na ini nangyari sa sainda bilang mga halimbawa, asin an mga iyan isinurat para sa pagpatanid sa sato na inabotan kan mga katapusan kan mga sistema nin mga bagay.” (1 Cor. 10:11) Ngonyan, nabubuhay kita sa huring mga aldaw kan presenteng maraot na sistemang ini nin mga bagay.—2 Tim. 3:1, 13.
17 Aram ni Satanas na Diablo, an “dios kan sistemang ini nin mga bagay,” na “halipot na sana an saiyang panahon” na natatada. (2 Cor. 4:4; Kap. 12:12) Gigibohon nia an gabos niang makakaya na tentaran an mga lingkod ni Jehova tanganing raoton an integridad ninda bilang mga Kristiano. Kontrolado ni Satanas an kinaban na ini, kaiba an mga nagpapalakop kan propaganda kaiyan. Minsan siring, an banwaan ni Jehova may sarong bagay na orog nanggad na mapuersa—“an puersa na labi sa ordinaryo.” (2 Cor. 4:7) Makakasarig kita sa puersang ini hale sa Dios na tabangan kitang labanan an ano man na iatubang sa sato ni Satanas. Sa siring, sinasadol kita na mamibi nin daing ontok, na may kompiansa na si Jehova “matao nin banal na espiritu sa mga naghahagad sa saiya.”—Luc. 11:13.
18. Ano an maninigong magin saboot niato sa presenteng kinaban na ini?
18 Pinapakosog man kita kan kaaraman na sa dai na mahahaloy lalaglagon an bilog na sistema ni Satanas, alagad makakaligtas an tunay na mga Kristiano. “An kinaban malihis sana asin siring man an mawot kaiyan, alagad an naggigibo kan kabotan nin Dios magdadanay sagkod lamang.” (1 Juan 2:17) Huli kaini, bako nanggad na madonong na an saro sa mga lingkod nin Dios mag-isip na igwa nin ano man sa presenteng sistemang ini nin mga bagay na may mas nagdadanay na halaga kisa sa relasyon nia ki Jehova! An kinaban na ini na kontrolado ni Satanas garo nalulunod na barko. Itinao ni Jehova an Kristianong kongregasyon na garo “lantsa-salbabida” para sa maimbod na mga lingkod nia. Mantang pasiring sinda sa bagong kinaban, makakasarig sinda sa panugang ini: “An mga paragibo nin maraot mismo popohoon, alagad an mga naglalaom ki Jehova iyo an mga makakasadiri kan daga.” (Sal. 37:9) Huli kaini, papagdanayon na nakaturuhok an saindong mga mata sa marahayon na premyong ini!
Nagigirumdoman daw Nindo?
• Ano an nagin saboot ni Pablo manongod sa premyo na iinalok sa saiya?
• Ano an magigin basehan kan paghokom sa mga mabubuhay sagkod lamang sa daga?
• Ano an madonong na gibohon mo ngonyan?
[Mga Hapot Para sa Pag-adal]
[Ritrato sa pahina 12, 13]
Naiimahinar mo daw an saimong sadiri na nagkakamit kan premyo kun binabasa mo an mga pagkasaysay sa Biblia?