“Magin Puka”
“Magin Puka”
“Harani na an katapusan kan gabos na bagay. . . . Magin puka sa pagpamibi.”—1 PED. 4:7.
1. Ano an pinakatema kan pagtotokdo ni Jesus?
KAN si Jesu-Cristo nasa daga, an pinakatema kan pagtotokdo nia iyo an Kahadean nin Dios. Paagi sa Kahadean na iyan, papatunayan ni Jehova an saiyang pagigin soberano sa uniberso asin papakangbanalon nia an saiyang ngaran. Huli kaini, tinokdoan ni Jesus an mga disipulo nia na mamibi sa Dios: “Dumatong logod an kahadean mo. Gibohon logod an kabotan mo, kun paano sa langit, siring man sa daga.” (Mat. 4:17; 6:9, 10) Madali na nanggad na taposon kan gobyernong Kahadean na iyan an kinaban ni Satanas dangan gigiyahan kaiyan an paggibo kan kabotan nin Dios sa bilog na daga. Siring kan ihinula ni Daniel, an Kahadean nin Dios an “maronot asin matapos kan gabos na kahadean na ini [sa presenteng panahon], asin iyan mismo magdadanay sagkod sa mga panahon na daing talaan.”—Dan. 2:44.
2. (a) Paano maaaraman kan mga parasunod ni Jesus na sia presente na, na may kapangyarihan sa Kahadean? (b) Ano pa an ipaparisa kan tanda?
2 Huling an pagdatong kan Kahadean nin Dios mahalagang marhay sa mga parasunod ni Jesus, hinapot sia ninda: “Ano an magigin tanda kan saimong presensia asin kan pagtatapos kan sistema nin mga bagay?” (Mat. 24:3) Magkakaigwa nin naheheling na tanda huli sa bagay na an presensia ni Cristo na may kapangyarihan sa Kahadean dai maheheling kan mga nasa daga. An tandang iyan magigin kompuesto nin laen-laen na aspekto na ihinula sa Kasuratan. Huli kaiyan, nababatid kan mga parasunod ni Jesus na nabubuhay sa panahon na iyan na sia nagpoon nang mamahala sa langit. Magigin tanda man iyan kan kapinonan kan peryodo nin panahon na inapod sa Biblia na “huring mga aldaw” kan maraot na sistema nin mga bagay na nangingibabaw ngonyan sa daga.—2 Tim. 3:1-5, 13; Mat. 24:7-14.
Magin Puka sa Huring mga Aldaw
3. Taano ta kaipuhan kan mga Kristiano na magin puka?
3 Si apostol Pedro nagsurat: “Harani na an katapusan kan gabos na bagay. Magin toltol an isip, kun siring, asin magin puka sa pagpamibi.” (1 Ped. 4:7) Kaipuhan kan mga parasunod ni Jesus na magin puka, mapagbantay sa mga pangyayari sa kinaban na nagpaparisa na sia presente na, na may kapangyarihan sa Kahadean. Asin an pagpuka ninda orog na magigin apurado mantang nagdadangadang an katapusan kan presenteng maraot na sistema nin mga bagay. Sinabi ni Jesus sa mga disipulo nia: “Magdanay kamong mapagbantay, ta dai nindo aram kun noarin madatong an kagurangnan kan harong [tanganing hokoman an kinaban ni Satanas].”—Mar. 13:35, 36.
4. Ipaheling an kalaenan kan saboot nin mga tawo na kabtang kan kinaban ni Satanas asin nin mga lingkod ni Jehova. (Iiba an kahon.)
4 An mga tawo sa pangkagabsan kontrolado ni Satanas, asin dai sinda nagin mapagbantay kun dapit sa kahulogan kan mga pangyayari sa kinaban. Dai ninda nababatid an presensia ni Cristo na may kapangyarihan sa Kahadean. Alagad an tunay na mga parasunod ni Cristo nagin puka asin nabatid ninda an tunay na kahulogan kan nangyari kan nakaaging siglo. Poon kan 1925, aram kan Mga Saksi ni Jehova na an Guerra Mundial I asin an suminunod na mga pangyayari siertong ebidensia na an presensia ni Cristo, na may kapangyarihan sa langitnon na Kahadean, nagpoon kan 1914. Sa siring, nagpoon na an huring mga aldaw kan maraot na sistemang ini nin mga bagay na kontrolado ni Satanas. Dakol na mapagmasid na tawo, minsan ngani dai nakakaaram kan kahulogan, an nakakarisa kan pambihirang pagkakalaen kan peryodo bago an Guerra Mundial I asin kan peryodo pagkatapos kaiyan.—Helingon an kahon na “Nagpoon an Panahon nin Kariribokan.”
5. Taano ta mahalagang marhay na kita padagos na magin puka?
5 Sa laog nin haros sarong siglo na ngonyan, an makatatakot na mga nangyayari sa bilog na kinaban nagpapatotoo na kita nabubuhay na sa huring mga aldaw. Kakadikit na nanggad an panahon na natatada bago itao ni Jehova ki Cristo an pagboot na pangenotan an makapangyarihan na mga hukbo nin mga anghel tumang sa kinaban ni Satanas. (Kap. 19:11-21) Sinabihan an tunay na mga Kristiano na magdanay na mapagbantay. Huli kaini, importanteng padagos na gibohon iyan mantang hinahalat niato an katapusan kan sistemang ini. (Mat. 24:42) Dapat kitang magdanay na mapagbantay, asin sa paggiya ni Cristo, dapat na maotob niato an sarong espesipikong gibohon sa bilog na daga.
Sarong Gibohon na Lakop sa Daga
6, 7. Paano nag-ooswag an paghuhulit kan Kahadean durante kan huring mga aldaw?
6 An gibohon na dapat otobon kan mga lingkod ni Jehova ihinula bilang kabtang kan tanda na kompuesto nin laen-laen na aspekto na nagpaparisa na yaon na kita sa huring mga aldaw kan presenteng maraot na sistemang ini nin mga bagay. Ilinadawan ni Jesus an gibohon na ini na lakop sa globo kan saro-saro niang sambiton an manlaenlaen na mangyayari sa panahon kan katapusan. Kaiba sa hula nia an makahulogan na mga tataramon na ini: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”—Mat. 24:14.
7 Isip-isipa an nagkapirang detalye na konektado sa aspektong iyan kan hula ni Jesus. An bilang nin mga tawo na nagbabalangibog kan maogmang bareta kadikiton kan magpoon an huring mga aldaw kan 1914. Ngonyan, an bilang na iyan nagdakol nang marhay. Igwa na nin labing 7,000,000 na Saksi ni Jehova na naghuhulit sa bilog na daga, na inorganisar sa labing 100,000 na kongregasyon. May dugang pang 10,000,000 katawo na nakipagtipon sa Mga Saksi ni Jehova kan 2008 sa okasyon kan Memorial kan kagadanan ni Cristo. Iyan dakulang pag-oswag sa bilang nin mga nag-atender kisa sa sinundan na taon.
8. Taano ta an pagtumang dai nakakaolang sa pagigin mapanggana kan paghuhulit niato?
8 Kanigoan kadakulang patotoo manongod sa Kahadean nin Dios an itinatao sa gabos na nasyon bago dumatong an katapusan kan sistemang ini! Iyan sa ibong kan katunayan na si Satanas an “dios kan sistemang ini nin mga bagay.” (2 Cor. 4:4) Iniimpluwensiahan nia an gabos na elemento kan politika, relihion, asin komersio kan kinaban na ini saka an mga nagpapalakop kan propaganda kaiyan. Kun siring, ano an dahelan kan makangangalas na kapangganahan kan pagpatotoo? Huli iyan sa pagsuportar ni Jehova. Sa siring, an paghuhulit kan Kahadean makangangalas na nagpapadagos sa ibong kan mga pagprobar ni Satanas na papondohon iyan.
9. Taano ta puedeng apodon na milagro an espirituwal na abundansia niato?
9 An kapangganahan kan paghuhulit kan Kahadean asin an pag-oswag saka espirituwal na abundansia kan banwaan ni Jehova puedeng sabihon na milagro. Kun mayo an pagsuportar nin Dios, na kaiba an saiyang paggiya asin pagprotehir sa banwaan nia, dai magigin posible an paghuhulit. (Basahon an Mateo 19:26.) Makakasierto kita na paagi sa banal na espiritu nin Dios na nagpupunsionar sa puso kan mga tawong puka asin andam na maglingkod, an paghuhulit na ini magigin mapanggana sagkod na matapos ini, “dangan madatong an katapusan.” An panahon na iyan marikas na nagdadangadang.
An “Dakulang Kahorasaan”
10. Paano ilinadawan ni Jesus an nagdadangadang na dakulang kahorasaan?
10 An katapusan kan maraot na sistemang ini madatong paagi sa inaapod na “dakulang kahorasaan.” (Kap. 7:14) Dai sinasabi sa sato kan Biblia kun gurano iyan kalawig, alagad si Jesus nagsabi: “Dangan magkakaigwa nin dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.” (Mat. 24:21) Kun iniisip-isip niato an kahorasaan na naeksperyensiahan na kan kinaban na ini, siring kan Guerra Mundial II na kinakarkulong 50 sagkod 60 milyones katawo an nagadan, an nagdadangadang na dakulang kahorasaan talagang magigin grabe nanggad. Masagkod iyan sa ralaban nin Armagedon. Iyan an panahon na bubutasan ni Jehova an saiyang mga hukbong manggagadan tanganing laglagon an gabos na tada kan sistema ni Satanas sa daga.—Kap. 16:14, 16.
11, 12. Anong pangyayari an magigin tanda kan kapinonan kan dakulang kahorasaan?
11 An hula sa Biblia dai nagtatao nin petsa kun noarin mapoon an enot na kabtang kan dakulang kahorasaan, pero sinasabi nanggad kaiyan sa sato kun anong pambihirang pangyayari an magigin tanda kan pagpoon kaiyan. An pangyayaring iyan iyo an paglaglag sa gabos na falsong relihion, na isasagibo kan politikal na mga kapangyarihan. Sa mga hula sa Biblia na nasa Kapahayagan kapitulo 17 asin 18, iinaagid an falsong relihion sa sarong patotot na imoral na nakidorog sa politikal na mga sistema sa daga. Ipinapaheling kan Kapahayagan 17:16 na madali nang dumatong an panahon na an politikal na mga elementong ini “maoongis sa patotot asin lalaglagon patin huhubaan sia, asin uuboson ninda an saiyang laman asin biyo siang sosoloon sa kalayo.”
12 Kun dumatong na an panahon tanganing mangyari iyan, ‘ipapasabong nin Dios sa puso ninda [an politikal na mga namamahala] na gibohon an saiyang kaisipan’ na laglagon an gabos na falsong relihion. (Kap. 17:17) Kaya an paglaglag na ini puedeng sabihon na hale sa Dios. Iyan an paghokom nia sa mapagsaginsagin na relihion na sa halawig nanggad na panahon nagtokdo nin mga doktrina na sarongat sa kabotan nin Dios asin na nagpersegir sa mga lingkod nia. Dai inaasahan kan kinaban sa pangkagabsan an nagdadangadang na pagkalaglag na ini kan falsong relihion. Alagad inaasahan iyan kan maimbod na mga lingkod ni Jehova. Asin sa bilog na huring mga aldaw na ini, sinasabi ninda sa mga tawo an manongod dian.
13. Ano an nagpaparisa na mangyayari nin marikas an katapusan kan falsong relihion?
13 An mga tawo mabibigla nin grabe kun maheling ninda an pagkalaglag kan falsong relihion. Ipinapaheling kan hula sa Biblia na dawa an nagkapira sa “mga hade sa daga” magsasabi mapadapit sa pagkalaglag na iyan: “Sayang, sayang, . . . huli ta sa sarong oras nagdatong an paghokom sa saimo!” (Kap. 18:9, 10, 16, 19) Ipinapaheling kan pagkagamit sa Biblia kan mga tataramon na “sarong oras” na garo baga magigin marikas an pangyayaring ini.
14. Kun salakayon na kan mga kaiwal ni Jehova an mga lingkod nia, paano mahiro an Dios?
14 Nasasabotan niato na dai mahahaloy pagkatapos na laglagon an falsong relihion, sasalakayon an mga lingkod ni Jehova, na nagbabalangibog kan saiyang mga mensahe nin paghokom. (Ezeq. 38:14-16) Kun magpoon na an pagsalakay na iyan, kaipuhan na atubangon kan mga minasalakay si Jehova, na nanunugang poprotehiran an maimbod na banwaan nia. Si Jehova nagsasabi: “Sa sakuyang init, sa laad kan sakong labi-labing kaanggotan, ako kaipuhan na magtaram. . . . Asin kaipuhan na makaaram sinda na ako si Jehova.” (Basahon an Ezequiel 38:18-23.) Sinasabi nin Dios sa saiyang Tataramon: “An nagtitikwil sa saindo [maimbod na mga lingkod nia] nagtitikwil sa sakong mata.” (Zac. 2:8) Kaya kun ponan na kan saiyang mga kaiwal an lakop sa globong pananalakay ninda sa mga lingkod nia, mahiro na si Jehova. Sia magibo nin aksion na masagkod sa pangultimong kabtang kan dakulang kahorasaan—an Armagedon. Sa pagboot ni Cristo, lubos na gigibohon kan makapangyarihan na mga hukbo nin mga anghel an paghokom ni Jehova sa kinaban ni Satanas.
Kun Ano an Maninigong Magin Epekto sa Sato
15. Ano an maninigong magin epekto sa sato kan pakaaram na harani na an katapusan kan sistemang ini?
15 Ano an maninigong magin epekto sa sato kan pakaaram na marikas na nagdadangadang an katapusan kan maraot na sistemang ini? Si apostol Pedro nagsurat: “Mantang an gabos na bagay na ini tutunawon nin siring, isipon kun dapat na magin anong klaseng tawo kamo sa banal na mga gawe asin gibo nin diosnon na debosyon!” (2 Ped. 3:11) Idinodoon kan mga tataramon na iyan na kaipuhan na magbantay na marhay tanganing masierto na an paggawe niato kaoyon kan mga kahagadan nin Dios asin na kaiba sa buhay niato an mga gibo nin diosnon na debosyon, na nagpapaheling kan satong pagkamoot ki Jehova. Kaiba sa siring na mga gibo an paggibo kan pinakamakakaya niato sa paghuhulit kan maogmang bareta kan Kahadean bago dumatong an katapusan. Isinurat man ni Pedro: “Harani na an katapusan kan gabos na bagay. . . . Magin puka sa pagpamibi.” (1 Ped. 4:7) Kita minadayupot ki Jehova asin nagpapaheling kan satong pagkamoot sa saiya paagi sa danay na pamimibi sa saiya, na hinahagad na logod giyahan nia kita paagi sa saiyang banal na espiritu asin pambilog na kinaban na kongregasyon.
16. Taano ta kaipuhan na maingat na sunodon niato an hatol nin Dios?
16 Sa peligrosong mga panahon na ini, kaipuhan na maingat na sunodon niato an hatol kan Tataramon nin Dios: “Magmaan kamong marhay na an saindong paglakaw bakong bilang mga mangmang kundi bilang mga madonong, na tinutubos an angay na panahon para sa saindong sadiri, huli ta an mga aldaw maraot.” (Efe. 5:15, 16) An karatan mas dakol ngonyan kisa sa arin man na panahon sa kasaysayan. Si Satanas naggigibo nin dakol na bagay tanganing olangon an mga tawo sa paggibo kan kabotan ni Jehova o tangani sanang irayo an atension ninda. Bilang mga lingkod nin Dios, aram niato ini, asin habo niatong togotan an ano man na bagay na magpaluya kan kaimbodan niato sa Dios. Aram man niato kun ano an madali nang mangyari, asin nagsasarig kita ki Jehova asin sa mga katuyohan nia.—Basahon an 1 Juan 2:15-17.
17. Iladawan an magigin reaksion kan mga makakaligtas sa Armagedon kun mangyari na an pagbuhay liwat.
17 Maootob an marahayon na ipinanuga nin Dios na ibalik an buhay kan mga gadan, huli ta “magkakaigwa nin pagkabuhay liwat an mga matanos sagkod an mga bakong matanos.” (Gibo 24:15) Mangnohon kun paano idinoon an panugang iyan: “Magkakaigwa nin pagkabuhay liwat”! Mayong duda manongod dian, huli ta si Jehova an nagsabi kaiyan! An Isaias 26:19 nanunuga: “An saimong mga gadan magkakaburuhay. . . . Pagmata kamo asin kurahaw kamo sa kagayagayahan, kamong mga nag-eerok sa kabokabo! . . . Minsan an mga daing kosog sa kagadanan papangyayarihon mismo kan daga na mamundag.” An mga tataramon na iyan nagkaigwa nin enot na kaotoban kan magbalik an suanoy na banwaan nin Dios sa dagang tinuboan ninda, na nagtatao sa sato nin kompiansa sa nagdadangadang na literal na kaotoban sa bagong kinaban. Magkakaigwa nanggad nin dakulang kagayagayahan kun makaibanan na giraray kan mga binuhay liwat an mga namomotan ninda! Iyo, harani na an katapusan kan kinaban ni Satanas, asin harani na man an bagong kinaban nin Dios. Mahalagang marhay nanggad na kita magdanay na puka!
Nagigirumdoman daw Nindo?
• Ano an pinakatema kan pagtotokdo ni Jesus?
• Gurano kalakop an paghuhulit kan Kahadean ngonyan?
• Taano ta mahalagang marhay na magin puka?
• Ano an nanompongan nindo na nakakaparigon sa boot manongod sa panuga na nasa Gibo 24:15?
[Mga Hapot Para sa Pag-adal]
[Kahon/Ritrato sa pahina 16, 17]
NAGPOON AN PANAHON NIN KARIRIBOKAN
The Age of Turbulence: Adventures in a New World (An Panahon nin Kariribokan: Mga Abentura sa Sarong Bagong Kinaban) an titulo nin sarong libro kan 2007 na isinurat ni Alan Greenspan. Sa laog nin haros 20 taon, sia an tsirman kan Federal Reserve Board kan Estados Unidos, na iyo an nagdidirehir sa bilog na sentral na sistema nin pagbabangko sa nasyon na iyan. Itinatampok ni Greenspan an risang-risa na pagkakalaen kan situwasyon sa kinaban bago 1914 asin pagkatapos kaiyan:
“Paagi sa gabos na pagkasaysay sa panahon bago 1914, an kinaban bago kaiyan garo baga dagos-dagos na nagigin mas sibilisado saka nag-ooswag sa kultura asin teknolohiya; an sosyedad nin tawo garo baga makakaabot sa pagigin sangkap. Tinapos kan ikadesinuebeng siglo an maraoton na pagnegosyo nin mga oripon. An mga kadahasan na bakong makatawo garo baga naiinaan na. . . . Nagin marikas an lakop sa globong pag-oswag sa teknolohiya sa bilog na ikadesinuebeng siglo, na huli kaiyan nagkaigwa nin mga tren, telepono, ilaw na de koryente, sinehan, auto, asin kombenyenteng mga kasangkapan sa harong na dakolon kun sasambiton. An siensia medikal, mas marahay na kakanon, asin lakop na pagdistribwir nin malinig na tubig na puedeng inomon nakapalangkaw sa linalaoman na lawig nin buhay . . . An gabos naghona na an siring na pag-oswag dagos-dagos na.”
Alagad . . . “An Guerra Mundial I mas nakakaraot sa pagigin sibilisado saka sa pag-oswag sa kultura asin teknolohiya kisa sa mas mapanglaglag nanggad sa pisikal na Guerra Mundial II. . . . Dai ko mahale sa sakong isip an mga taon bago an Guerra Mundial I, kan an pag-oswag nin katawohan garo baga daing olang asin daing limite. Ngonyan an satong pagmansay sa ngapit biyong laen sa nakaaging siglo alagad iyan tibaad medyo mas kaoyon kan totoong situwasyon. Magkakaigwa daw nin dakula asin nagdadanay na epekto sa sosyedad nin tawo ngonyan an grabeng takot, pag-init kan globo (global warming), o nagkokosog na impluwensia kan ordinaryong mga tawo, siring kan epekto kan Guerra Mundial I sa sosyedad nin tawo kan panahon na nangyari iyan? Mayo nin makakasimbag kaiyan na may pagkasegurado.”
Nagirumdoman ni Greenspan kan sia estudyante pa, an sinabi kan Propesor nin Ekonomiya na si Benjamin M. Anderson (1886-1949): “An mga nasa edad na na nakakagirumdom asin nakakasabot sa mga kamugtakan kan kinaban bago an Guerra Mundial I ginigirumdom iyan na may dakulang panganugon. Igwa nin pakamate nin seguridad kaidto na dai pa noarin man namatean.”—Economics and the Public Welfare.
Nagkaigwa nin kaparehong kongklusyon sa librong A World Undone, ni G. J. Meyer, na ipinublikar kan 2006. Mababasa niato: “Pirmeng sinasabi na huli sa mga pangyayari sa kasaysayan ‘nabago an gabos na bagay.’ Sa nangyari kan Dakulang Guerra [1914-1918], ini talagang nagin totoo kaidto. Talagang binago nanggad kan guerra an gabos na bagay: bako sanang an mga linderos (border), bako sanang an mga gobyerno asin an kaaabtan kan mga nasyon, kundi an pagmansay kan mga tawo dapit sa kinaban asin sa sadiri ninda poon kaidto. Iyan nagin garo siwang sa panahon, na permanenteng pinuputol an koneksion kan kinaban pagkatapos kan guerra sa gabos na nangyari bago kaiyan.”
[Ritrato sa pahina 18]
Sa Armagedon, bubutasan ni Jehova an makapangyarihan na mga hukbo nin mga anghel