Haen Kamo Dapat Pag-abot kan Katapusan?

KUN taposon na ni Jehova sa Armagedon an presenteng maraot na sistema nin mga bagay, ano an mangyayari sa mga tanos? An Talinhaga 2:21, 22 nagsisimbag: “An mga tanos iyo an mag-eerok sa daga, asin an mga daing katuyawan iyo an matatada dian. Kun dapit sa mga maraot, sinda popohoon sa mismong daga; asin kun manongod sa mga madaya, sinda hahaleon dian.”

Pero, paano matatada sa daga an mga daing katuyawan? Magkakaigwa daw sinda nin lugar na pailihan? Haen dapat an mga tanos pag-abot kan katapusan? An apat na pagkasaysay sa Kasuratan dapit sa pagkaligtas nagtatao nin liwanag sa mga bagay na ini.

Kan Panahon na Mahalaga an Lugar

Mapadapit sa pagkaligtas kan mga patriarkang si Noe asin Lot, mababasa niato sa 2 Pedro 2:5-7: “Dai [an Dios] nag-alangan sa pagkastigo sa suanoy na kinaban, alagad ilinigtas si Noe, sarong parahulit nin katanosan, kaibanan nin pito pa kan magpaabot sia nin delubyo sa sarong kinaban nin mga tawong bakong diosnon; asin sa paggibo sa siudad nin Sodoma asin Gomorra na magin abo kinondenar nia sinda, na nagtatao nin panalmingan para sa mga bakong diosnon dapit sa mga bagay na maabot; asin ilinigtas nia an matanos na si Lot, na napupurisaw na gayo sa pagpangana kan mga makisuway sa ley sa malaswang gawe-gawe.”

Paano si Noe nakaligtas sa Baha? Sinabihan nin Dios si Noe: “Aram ko na katapusan na kan gabos na laman, huli ta an daga pano nin kadahasan huli sa sainda; asin uya lalaglagon ko sinda kaibahan kan daga. Gumibo ka para sa saimo nin sarong arka hale sa kahoy nin madugtang poon nin kahoy.” (Gen. 6:13, 14) Ginibo ni Noe an arka siring sa ipinagboot sa saiya ni Jehova. Pitong aldaw bago magpoon an Baha, sinabihan sia ni Jehova na palaogon sa arka an mga hayop asin maglaog sia dian kaiba kan bilog niang pamilya. Sa ikapitong aldaw, sinerahan an pinto pagkalaog nia, “asin padagos na nag-oran nin makosog sa ibabaw kan daga sa laog nin kuarentang aldaw asin kuarentang banggi.” (Gen. 7:1-4, 11, 12, 16) Si Noe asin an saiyang pamilya “nakaligtas sa tubig.” (1 Ped. 3:20) An saindang pagkaligtas nakadepende sa pagigin yaon ninda sa arka. Mayo nang ibang lugar sa daga na puede sindang magin ligtas.—Gen. 7:19, 20.

Sa kamugtakan ni Lot, medyo laen an mga instruksion. Sinabi sa saiya kan duwang anghel an lugar na dapat mayo sia. “Gabos na sadiri mong tawo na yaon sa siudad [nin Sodoma],” an sabi kan duwang anghel ki Lot, “iluwas mo digdi! Huli ta lalaglagon niamo an lugar na ini.” Dapat sindang “dumulag . . . pasiring sa mabukid na rehion.”—Gen. 19:12, 13, 17.

An mga eksperyensia ni Noe asin Lot nagpapatunay na “si Jehova tataong magligtas sa mga tawong may diosnon na debosyon hale sa pagbalo, alagad tataong magtagama kan mga tawong bakong matanos para sa aldaw nin paghokom.” (2 Ped. 2:9) Sa duwang kamugtakan na ini, nagin mahalaga an lugar sa pagkaligtas ninda. Kinaipuhan ni Noe na maglaog sa arka; kinaipuhan ni Lot na magluwas sa Sodoma. Alagad pirme daw na arog kaini an kamugtakan? Makakaya daw ni Jehova na iligtas an mga matanos minsan haen sinda, na dai na sinda kaipuhan na magbalyo nin lugar? Tanganing masimbag an hapot na iyan, mangnohon an duwa pang pagkasaysay dapit sa pagkaligtas.

Pirme daw na Mahalaga an Lugar?

Bago ni Jehova dinestroso nin grabe an Egipto paagi sa pagpaabot kan ikasampulong damat kan panahon ni Moises, pinagbotan Nia an mga Israelita na an dugo kan hayop sa Paskua ilahid sa may itaas kan pinto asin sa mag-ibong na hamba kan  saindang harong. Taano? Tanganing ‘kun si Jehova mag-agi na may katuyohan na paabotan nin damat an mga Egipcio asin maheling nia an dugo sa may itaas kan pinto asin sa mag-ibong na hamba, lilihisan nia an pintong iyan asin dai nia papalaogon sa harong ninda an kalaglagan na mapaabot nin damat sa sainda.’ Kan banggi man sanang iyan, “ginadan ni Jehova an gabos na panganay sa daga nin Egipto, poon sa panganay ni Faraon na nakatukaw sa saiyang trono sagkod sa panganay kan bihag na nasa bilanggoan, asin an gabos na panganay nin hayop.” Nakaligtas an mga panganay kan mga Israelita na dai kaipuhan nin siisay man na magbalyo nin lugar.—Ex. 12:22, 23, 29.

Estudyare man an nangyari ki Rahab, sarong patotot na nag-iistar sa siudad nin Jerico. Madali nang ponan kan mga Israelita an pagsakop ninda sa Dagang Panuga. Kan masabotan ni Rahab na an Jerico siertong lalaglagon, sinabihan nia an duwang Israelitang espiya na grabe an pagkatakot kan siudad sa padangadang nang mga Israelita. Itinago nia an mga espiya asin pinasumpa nia sinda na kun sakopon na an Jerico, makakaligtas sia asin an bilog niang pamilya. Ininstruksionan kan mga espiya si Rahab na tiponon an pamilya nia sa laog kan saiyang harong, na yaon sa may lanob kan siudad. An paghale sa harong mangangahulogan nin kalaglagan kaiba kan iba pa sa siudad. (Jos. 2:8-13, 15, 18, 19) Minsan siring, kan huri sinabi ni Jehova ki Josue na “an lanob kan siudad matutumpag.” (Jos. 6:5) An sinabi kan mga espiya na ligtas na lugar, ngonyan garo baga namemeligro na. Paano makakaligtas si Rahab asin an saiyang pamilya?

Kan mag-abot na an panahon tanganing sakopon an Jerico, an mga Israelita nagkururahaw asin nagpatanog nin mga amodyong. “Nangyari na kan madangog tolos kan banwaan [nin Israel] an tanog kan amodyong asin an banwaan nagkurahaw nin makosog na kurahaw sa dakulang guerra,” an sabi sa Josue 6:20, “dangan an lanob nagpoon na matumpag.” An natutumpag na lanob dai na makokontrol nin mga tawo. Pero, sa milagrosong paagi, an pagtumpag kan lanob kan siudad puminondo sa harong ni Rahab. Pinagbotan ni Josue an duwang espiya: “Maglaog kamo sa harong kan babae, an patotot, asin iluwas nindo an babae asin an gabos na tawo na nasa saiya, arog kan isinumpa nindo sa saiya.” (Jos. 6:22) Nakaligtas an gabos na yaon sa harong ni Rahab.

Ano an Pinakamahalaga?

Ano an manonodan niato sa pagkaligtas ni Noe, Lot, kan mga Israelita kan panahon ni Moises, asin ni Rahab? Paano an mga pagkasaysay na ini nakakatabang sa sato na madeterminaran kun haen kita dapat pag-abot kan katapusan kan presenteng maraot na sistema nin mga bagay?

Totoo, nakaligtas si Noe huli ta yaon sia sa arka. Alagad taano ta yaon sia duman? Bako daw na iyan huli ta sia may pagtubod asin makinuyog? “Ginibo ni Noe an segun sa gabos na ipinagboot sa saiya nin Dios,” an sabi kan Biblia. “Siring nanggad an ginibo nia.” (Gen. 6:22; Heb.  11:7) Kumusta man kita? Ginigibo daw niato an gabos na ipinagboot sa sato nin Dios? Si Noe ‘saro man na parahulit nin katanosan.’ (2 Ped. 2:5) Arog nia, maigot man daw kitang naghuhulit, dawa kun an mga tawo sa satong teritoryo dai naghihimate?

Paagi sa pagdulag hale sa Sodoma, si Lot dai nakaiba sa mga nalaglag. Nakaligtas sia huli ta sia matanos sa pagheling nin Dios asin napurisaw na gayo sa malaswang gawe-gawe kan makisuway sa ley na mga tawo sa Sodoma asin Gomorra. An malaswang gawe-gawe daw na lakop ngonyan talagang nakakapapurisaw sa sato? O iyan daw ordinaryo na sana sa sato kaya dai na niato ikinakapurisaw iyan? Ginigibo daw niato an satong pinakamakakaya na manompongan na “daing digta asin dai nin kanawayan patin nasa katoninongan”?—2 Ped. 3:14.

Para sa mga Israelita sa Egipto asin ki Rahab sa Jerico, an pagkaligtas nakadepende sa pagdadanay ninda sa saindang harong. Kaipuhan digdi an pagtubod asin pagkuyog. (Heb. 11:28, 30, 31) Imahinara kun paano siertong binantayan kan lambang Israelitang pamilya an saindang panganay kan ‘magpoon nang magtangis nin grabe’ an sunod-sunod na pamilya nin mga Egipcio. (Ex. 12:30) Imahinara kun paano siertong ruminaning marhay si Rahab sa saiyang mga kapamilya kan mamatean nia na parani nang parani an tanog kan nagkakaturumpag na mga lanob kan Jerico. Kinaipuhan nia an tunay na pagtubod tanganing magdanay na makinuyog asin dai maghale sa harong na iyan.

Dai na mahahaloy, tataposon na an maraot na kinaban ni Satanas. Dai pa niato aram kun paano poprotehiran ni Jehova an saiyang banwaan sa makangingirhat na ‘aldaw kan kaanggotan nia.’ (Sof. 2:3) Minsan siring, haen man kita asin ano man an situwasyon niato sa panahon na iyan, makakasierto kita na an kaligtasan niato madepende sa satong pagtubod ki Jehova asin pagkuyog sa saiya. Mientras tanto, maninigo na pataluboon niato an tamang saboot sa inaapod kan hula ni Isaias na ‘panglaog na mga kuarto’ niato.

“Lumaog Ka sa Panglaog Mong mga Kuarto”

“Lakaw, banwaan ko, lumaog ka sa panglaog mong mga kuarto, dangan serahan mo an saimong mga pinto,” an sabi sa Isaias 26:20. “Magtago ka nin kadikit sanang panahon sagkod na makalihis an pagdenunsiar.” An hulang ini puedeng nagkaigwa nin enot na kaotoban kaidtong 539 B.C.E. kan sakopon kan mga Medo asin Persiano an Babilonya. Sa paglaog sa Babilonya, minalataw na pinagbotan ni Ciro na Persiano an gabos na magdanay na nasa laog huling pinagbotan nia an saiyang mga soldados na gadanon an siisay man na manompongan na nasa luwas.

Sa satong panahon, an ‘panglaog na mga kuarto’ kan hulang ini puedeng konektadong marhay sa labing 100,000 na kongregasyon nin Mga Saksi ni Jehova sa bilog na kinaban. An siring na mga kongregasyon may mahalagang papel sa satong buhay. Iyan padagos na magigin mahalaga sagkod sa “dakulang kahorasaan.” (Kap. 7:14) Pinagbotan an banwaan nin Dios na maglaog sa saindang ‘panglaog na mga kuarto’ asin magtago “sagkod na makalihis an pagdenunsiar.” Mahalagang marhay na mapatalubo asin mapagdanay niato an nakakapakosog na saboot sa kongregasyon asin magin determinadong marhay na magdanay na dayupot dian. Puede niatong isapuso an sadol ni Pablo: “Konsideraron niato an lambang saro tanganing mandagka sa pagkamoot asin sa marahay na mga gibo, na dai pagpabayaan an satong pagtorotiripon, siring kan kaugalean nin nagkapira, kundi na magparinigonan nin boot, asin lalo na ta naheheling [niato] na an aldaw naghaharani na.”—Heb. 10:24, 25.

[Mga Ritrato sa pahina 7]

Ano an manonodan niato sa mga pagliligtas na ginibo ni Jehova kaidto?

[Ritrato sa pahina 8]

Sa presenteng mga panahon, ano an posibleng pinanonongdan kan ‘panglaog na mga kuarto’?