Mga Hoben—Ipaheling an Saindong Pag-oswag
Mga Hoben—Ipaheling an Saindong Pag-oswag
“Pensaron mo an mga bagay na ini; magin lubos an atension mo dian, tanganing an saimong pag-oswag maheling kan gabos na tawo.”—1 TIM. 4:15.
1. Ano an mawot nin Dios para sa mga hoben?
‘MAGGAYAGAYA ka hoben, sa saimong pagkahoben, asin an saimong puso pagiboha nin karahayan sa saimo sa mga aldaw kan saimong pagkahoben.’ (Ecl. 11:9) Iyan an isinurat kan madonong na si Hadeng Salomon kan suanoy na Israel. An Ginikanan kan mensaheng ini, si Jehova Dios, gusto nanggad na magin maogma kamong mga hoben. Apuera kaiyan, gusto ni Jehova na an kagayagayahan nindo magpadagos nin lampas pa sa panahon nin pagkahoben. Minsan siring, sa mga panahon na iyan nin pagkahoben, an saro parateng nakakagibo nin seryosong mga sala na puedeng makaapektar sa saiyang kaogmahan sa ngapit. Dawa an maimbod na si Job nagmondo huling kaipuhan niang atubangon ‘an mga resulta kan mga sala nia kan hoben pa sia.’ (Job 13:26) Durante kan pagkatinedyer asin pagigin hoben na adulto, an sarong hoben na Kristiano sa parate kaipuhan na gumibo nin magagabat na desisyon. An salang paghusgar puedeng magwalat nin mga kakologan sa emosyon asin magresulta sa mga problema na puedeng makaapektar sa bilog niang buhay.—Ecl. 11:10.
2. Anong hatol kan Biblia an maninigong iaplikar nin mga hoben tanganing dai makagibo nin seryosong mga sala?
2 An mga hoben kaipuhan na gumamit nin marahay na paghusgar. Isip-isipa an sadol na itinao ni apostol Pablo sa mga taga Corinto. Sia nagsurat: “Dai kamo magin saradit na aki sa mga kakayahan nin pagsabot . . . Magin maygurang [kamo] sa mga kakayahan nin pagsabot.” (1 Cor. 14:20) Paagi sa paghimate sa hatol na magkaigwa kan kakayahan na mag-isip asin mangatanosan na siring sa maygurang na tawo, matatabangan an mga hoben na dai makagibo nin seryosong mga sala.
3. Ano an magigibo nindo tanganing magin maygurang?
3 Kun ika sarong hoben, girumdoma na kaipuhan an paghihingoa tanganing magin maygurang. Sinabi ni Pablo ki Timoteo: “Dai noarin man pagtogotan na basangbasangon nin siisay man an saimong pagkahoben. Sa kabaliktaran, sa mga maimbod magin arogan ka sa pagtaram, sa gawe-gawe, sa pagkamoot, sa pagtubod, sa kabinian. . . . Padagos kang magmaigot sa pampublikong pagbasa, sa pagsadol, sa pagtotokdo. . . . Pensaron mo an mga bagay na ini; magin lubos an atension mo dian, tanganing an saimong pag-oswag maheling kan gabos na tawo.” (1 Tim. 4:12-15) An Kristianong mga hoben kaipuhan na umoswag asin ipaheling sa iba an saindang pag-oswag.
Ano an Pag-oswag?
4. Ano an kalabot sa pag-oswag sa espirituwal?
4 An pag-oswag nangangahulogan nin “pagbago tanganing magin mas marahay.” Sinadol ni Pablo si Timoteo na padagos na magmaigot tanganing umoswag sa pagtaram, gawe-gawe, pagkamoot, pagtubod, asin kabinian, saka sa paagi nin pag-otob nia sa saiyang ministeryo. Kaipuhan siang magmaigot na magin arogan an saiyang pamumuhay. Huli kaini, si Timoteo kaipuhan na padagos na umoswag sa espirituwal.
5, 6. (a) Kasuarin nagpoon na maheling an pag-oswag ni Timoteo? (b) Kun mapadapit sa pag-oswag, paano maaarog nin mga hoben ngonyan si Timoteo?
5 Kan isurat ni Pablo an hatol na ini kaidtong pag-oltanan kan 61 asin 64 C.E., si Timoteo saro nang eksperyensiadong magurang sa kongregasyon. Sia bakong nagpopoon pa sanang umoswag sa espirituwal. Kan 49 o 50 C.E., kan si Timoteo posibleng nasa huring mga taon nin pagkatinedyer o labi pa sanang 20 anyos, “marahay an patotoo sa saiya kan mga tugang sa Listra asin Iconio,” na nakaheling kan saiyang pag-oswag sa espirituwal. (Gibo 16:1-5) Kan panahon na iyan, iiniba ni Pablo si Timoteo sa saiyang pagbiahe bilang misyonero. Pakatapos na maheling an orog pang pag-oswag ni Timoteo sa laog nin nagkapirang bulan, isinugo sia ni Pablo sa Tesalonica tanganing rangahon asin parigonon an mga Kristiano sa siudad na iyan. (Basahon an 1 Tesalonica 3:1-3, 6.) Malinaw nanggad, nagpoon si Timoteo na ipaheling sa iba an saiyang pag-oswag kan sia hoben pa.
6 Kamong mga hoben sa kongregasyon, maghingoa na pataluboon an kinakaipuhan na espirituwal na mga kualidad ngonyan, tanganing maheling nin malinaw an saindong pag-oswag sa Kristianong pamumuhay asin sa saindong kakayahan na magtokdo kan mga katotoohan sa Biblia. Poon sa edad na 12, si Jesus “nagpadagos na umoswag sa kadonongan.” (Luc. 2:52) Kun siring, siyasaton niato kun paano nindo ikakapaheling an saindong pag-oswag sa tolong kabtang kan saindong buhay: (1) kun napapaatubang kamo sa mga problema, (2) mantang nag-aandam kamo sa pag-agom, asin (3) mantang nagmamaigot kamo na magin “marahay na ministro.”—1 Tim. 4:6.
Atubangon an mga Problema Paagi sa Pagkaigwa nin “Toltol na Isip”
7. Paano nakakaapektar sa mga hoben an mga problema?
7 An 17 anyos na Kristianang si Carol nagsabi, “Kun beses, ako nasasakitan sa emosyon asin pagal-pagal sa pisikal saka isip kaya habo ko nang magmata pagkaaga.” * Taano ta sia nasasakitan na gayo? Kan dies anyos si Carol, nalaglag an saindang pamilya huli sa diborsio, asin kinaipuhan siang mag-istar sa saiyang ina na nagsikwal na sa mga pamantayan kan Biblia sa moral. Arog ni Carol, tibaad napapaatubang kamo sa nagkapirang situwasyon na nakakatension nin labi-labi asin kakadikit an posibilidad na magrahay iyan.
8. Anong mga problema an pinagmaigotan na labanan ni Timoteo?
8 Mantang nag-ooswag sa espirituwal si Timoteo, pinagmaigotan man niang labanan an masakit na mga kamugtakan. Halimbawa, sia ‘parateng nagkakahelang’ huli sa diperensia sa tulak. (1 Tim. 5:23) Kan isugo sia ni Pablo sa Corinto tanganing asikasohon an nagkapirang problema huli sa mga indibiduwal na nagkukuestion sa autoridad kan apostol, sinadol ni Pablo an kongregasyon na makikooperar, tanganing si Timoteo ‘dai magkaigwa nin ikakatakot’ sa sainda. (1 Cor. 4:17; 16:10, 11) Minalataw na si Timoteo masusupgon, o maluya an boot.
9. Ano an toltol na isip, asin ano an kalaenan kaiyan sa espiritu nin pagkamatalaw?
9 Tanganing tabangan si Timoteo, paghaloyhaloy pinagirumdom sia ni Pablo: “An Dios nagtao sa sato bakong nin espiritu nin pagkamatalaw, kundi nin puersa asin nin pagkamoot patin nin toltol na isip.” (2 Tim. 1:7) Kalabot sa “toltol na isip” an kakayahan na mag-isip asin mangatanosan sa madonong na paagi. Kaiba dian an kakayahan na atubangon an aktuwal na situwasyon—dawa dai kutana nindo gusto iyan. An nagkapirang hoben na bakong maygurang nagpapaheling nin espiritu nin pagkamatalaw asin nagpoprobar na mahale sa isip an nakakatension na mga situwasyon paagi sa sobrang pagtorog o pagheling nin mga programa sa TV, pagdroga o pagpangana sa inomon na de alkohol, parateng pag-atender sa mga parti, o seksuwal na imoralidad. An mga Kristiano sinasadol “na isikwal an pagkabakong diosnon asin an kinabanon na mga mawot asin mamuhay na may toltol na isip asin katanosan patin diosnon na debosyon sa tahaw kan presenteng sistemang ini nin mga bagay.”—Tito 2:12.
10, 11. Paano an pagkaigwa nin toltol na isip nakakatabang sa sato na magkaigwa nin espirituwal na kosog?
10 Sinasadol kan Biblia an “mga hoben na lalaki na magin toltol an isip.” (Tito 2:6) An paghimate sa sadol na ini nangangahulogan na may pamibi nindong aatubangon an mga problema asin magsasarig kamo sa kosog na itinatao nin Dios. (Basahon an 1 Pedro 4:7.) Sa siring, magkakaigwa kamo nin odok sa pusong pagsarig sa “kosog na itinatao nin Dios.”—1 Ped. 4:11.
11 An toltol na isip asin pamibi an nakatabang ki Carol. “An paninindogan ko na dai ako oyon sa imoral na pamumuhay kan sakong ina an saro sa pinakamasakit na kaipuhan kong gibohon kasuarin man,” an sabi nia. “Alagad talagang nakatabang sa sako an pamibi. Aram ko na kaibanan ko si Jehova, kaya dai na ako natatakot.” Girumdomon na puede kamong madalisay asin mapakosog paagi sa mga problema. (Sal. 105:17-19; Lam. 3:27) Ano man an problema nindo, nungka kamong babayaan nin Dios. ‘Kamo talagang tatabangan nia.’—Isa. 41:10.
Pag-andam Para sa Mapangganang Pag-agom
12. Taano ta maninigong iaplikar nin sarong Kristiano na nagpaplano nang mag-agom an prinsipyo na yaon sa Talinhaga 20:25?
12 An nagkapirang hoben na adulto naghihidaling mag-agom, na naniniwala na iyan an solusyon sa kamondoan, kapungawan, pagkalangkag, asin mga problema sa pamilya. Minsan siring, seryosong bagay an sumpaan sa kasal. An nagkapira kan mga panahon kan Biblia pabiglabiglang naggibo nin sagrado, o banal, na sumpa na dai maingat na inaanalisar an kalabot dian. (Basahon an Talinhaga 20:25.) Kun beses, dai seryosong pinag-iisipan nin mga hoben na adulto an mga paninimbagan na kalabot sa pag-agom. Paghaloyhaloy, naaaraman ninda na orog pa an kalabot kisa sa narealisar ninda.
13. Anong mga hapot an maninigong isip-isipon kan mga nagpaplano nang makipag-ilusyon, asin anong nakakatabang na sadol an makukua ninda?
13 Kaya, bago makipag-ilusyon, hapota an saimong sadiri: ‘Taano ta gusto ko nang mag-agom? Ano an mga inaasahan ko? Sia daw an tama na magin agom ko? Talaga daw na andam na ako para sa mga paninimbagan nin may agom?’ Tanganing tabangan ka na gumibo nin may pakarorop na pagsiyasat, “an maimbod asin mapagmansay na oripon” nagpublikar nin espesipikong marhay na mga artikulo. * (Mat. 24:45-47) Mansayon an siring na impormasyon bilang sadol na itinatao sa saimo ni Jehova. Maingat na turotimbangon an sinasabi dian asin iaplikar iyan. Nungkang magin “siring sa kabayo o mula na mayo nin pakasabot.” (Sal. 32:8, 9) Magin maygurang sa saimong pakasabot sa mga paninimbagan na kalabot sa pag-agom. Kun naniniwala ka na andam ka nang makipag-ilusyon, pirmeng girumdomon na magin “arogan . . . sa kabinian.”—1 Tim. 4:12.
14. Paano makakatabang sa saindo an pag-oswag sa espirituwal kun kamo may agom na?
14 An espirituwal na pagkamaygurang nakakakontribwir man sa kapangganahan pakatapos kan kasal. An maygurang na Kristiano nagmamaigot na makaabot “sa pagdakula na kasokol kan kalubosan kan Cristo.” (Efe. 4:11-14) Sia nagmamaigot na marhay na magkaigwa kan arog-Cristong personalidad. Bilang satong Arogan, “an Cristo dai nagpanigo sa saiyang sadiri.” (Roma 15:3) Kun an mag-agom parehong naghahanap, bakong kan sadiri nindang karahayan, kundi kan karahayan kan agom ninda, magigin matoninong asin nakakaranga an buhay pampamilya. (1 Cor. 10:24) An agom na lalaki mapaheling nin mapagsakripisyong pagkamoot, asin an agom na babae magigin determinadong magpasakop sa saiyang agom arog ni Jesus sa saiyang Payo.—1 Cor. 11:3; Efe. 5:25.
“Lubos Mong Otobon an Saimong Ministeryo”
15, 16. Paano nindo ikakapaheling an saindong pag-oswag sa ministeryo?
15 Sa pagdara kan atension sa mahalagang asignasyon ni Timoteo, si Pablo nagsurat: “Ako solemneng nagboboot sa saimo sa atubangan nin Dios asin ni Cristo Jesus, . . . ihulit mo an tataramon, gibohon iyan na may pagkaapurado.” Sinabi pa nia: “Gibohon mo an gibohon nin sarong ebanghelisador, lubos mong otobon an saimong ministeryo.” (2 Tim. 4:1, 2, 5) Tanganing maotob an pagboot na ini, si Timoteo kaipuhan na ‘magkakan kan mga tataramon kan pagtubod.’—Basahon an 1 Timoteo 4:6.
16 Paano kamo puedeng ‘magkakan kan mga tataramon kan pagtubod’? Si Pablo nagsurat: “Padagos kang magmaigot sa pampublikong pagbasa, sa pagsadol, sa pagtotokdo. Pensaron mo an mga bagay na ini; magin lubos an atension mo dian.” (1 Tim. 4:13, 15) An pag-oswag nangangaipo nin mahigos na personal na pag-adal. An pananaram na ‘magin lubos an atension’ nagtatao kan ideya nin pagigin sibot na marhay sa sarong gibohon. Kumusta an saindong ugale sa pag-adal? Lubos daw an saindong atension sa “harararom na bagay nin Dios”? (1 Cor. 2:10) O kadikiton sanang paghihingoa an ginigibo nindo? Paagi sa paghorophorop sa pinag-aadalan nindo, mapapahiro an saindong puso.—Basahon an Talinhaga 2:1-5.
17, 18. (a) Anong mga kakayahan an maninigo nindong pagmaigotan na paoswagon? (b) Paano makakatabang sa saindo sa ministeryo an pagkaigwa kan kaisipan na kapareho kan ki Timoteo?
17 An hoben na payunir na si Michelle nagsabi: “Tanganing magin tunay na epektibo sa ministeryo, igwa ako nin marahay na iskedyul para sa personal na pag-adal, asin regular ako sa mga pagtiripon. Bilang resulta kaini, pirme akong nag-ooswag sa espirituwal.” An pagpapayunir tunay nanggad na makakatabang sa saindo na paoswagon an kakayahan nindo sa paggamit kan Biblia sa ministeryo asin umoswag sa espirituwal. Magmaigot na magin matibay magbasa asin magtao nin makahulogan na mga komento sa Kristianong mga pagtiripon. Bilang hoben na maygurang sa espirituwal, maninigo nindong andamon na magin nakakapagtokdo an saindong kabtang sa Teokratikong Paadalan sa Pagmiministro, na sinusunod an nakaasignar na reperensia.
18 ‘An paggibo kan gibohon nin sarong ebanghelisador’ nangangahulogan nin paghihingoa na magin orog na epektibo sa saindong ministeryo asin pagtabang sa iba na magkamit nin kaligtasan. Nangangaipo ini nin pagkaigwa kan “abilidad sa pagtotokdo.” (2 Tim. 4:2) Paagi sa pakikikabtang sa ministeryo kaiba an mga eksperyensiado sa gibohon na ini, makakanood kamo sa saindang mga paagi nin pagtotokdo, arog ki Timoteo na nakanood sa pag-ibaiba ki Pablo. (1 Cor. 4:17) Mapadapit sa mga tinabangan ni Pablo, sinabi nia na bako sanang itinao nia sa sainda an maogmang bareta kundi itinao man nia an saiya ‘mismong kalag,’ o ginamit nia an saiya mismong buhay sa pagtabang sa sainda, huling sinda namotan niang marhay. (1 Tes. 2:8) Tanganing maarog an halimbawa ni Pablo sa ministeryo, dapat kamong magkaigwa kan kaisipan na siring kan ki Timoteo, na tunay na nagmakolog sa iba asin ‘naglingkod sa pagpalakop kan maogmang bareta.’ (Basahon an Filipos 2:19-23.) Ipinapaheling daw nindo sa saindong ministeryo an espiritung ini nin pagigin mapagsakripisyo?
An Pag-oswag Nagtatao nin Tunay na Pagkakontento
19, 20. Taano ta nagtatao nin kagayagayahan an pag-oswag sa espirituwal?
19 An pag-oswag sa espirituwal nangangaipo nin paghihingoa. Alagad paagi sa mapasensiang pagpaoswag kan saindong mga abilidad sa pagtotokdo, pag-abot nin panahon magkakapribilehio kamo na tabangan ‘an dakol na yumaman’ sa espirituwal, asin sinda magigin saindong “kagayagayahan o korona nin labi-labing paggayagaya.” (2 Cor. 6:10; 1 Tes. 2:19) “Orog kisa kasuarin pa man, ginagamit ko an panahon ko sa pagtabang sa iba,” an paliwanag ni Fred na sarong bilog na panahon na ministro. “Totoo nanggad na igwang orog na kaogmahan sa pagtao kisa sa pag-ako.”
20 Mapadapit sa kagayagayahan asin pagkakontento na naeksperyensiahan nia huli sa pag-oswag sa espirituwal, an hoben na payunir na si Daphne nagsabi: “Nagkaigwa ako nin mas dayupot nanggad na relasyon ki Jehova mantang namimidbid ko sia bilang Persona. Kun pinapaogma mo si Jehova sa pinakalubos na makakaya mo, marahayon an saimong pagmate—talagang kontento!” Minsan ngani an pag-oswag sa espirituwal tibaad dai pirmeng naririsa nin mga tawo, iyan pirmeng naheheling asin pinapahalagahan ni Jehova. (Heb. 4:13) Daing duda, kamong mga hoben na Kristiano makakatao nin kamurawayan asin kaomawan sa satong langitnon na Ama. Padagos na pagayagayahon an saiyang puso mantang tunay na ipinapaheling nindo an saindong pag-oswag.—Tal. 27:11.
[Mga Nota sa Ibaba]
^ par. 7 Sinalidahan an nagkapirang ngaran.
^ par. 13 “Is This Person Right for Me?” sa librong Questions Young People Ask—Answers That Work, Volume 2; “An Giya nin Dios sa Pagpili nin Aagomon,” sa An Torrengbantayan na Mayo 15, 2001; asin “How Wise Is a Teenage Marriage?” sa Awake! na Setyembre 22, 1983.
Ano an Nanodan Nindo?
• Ano an kalabot sa pag-oswag sa espirituwal?
• Paano nindo ikakapaheling an saindong pag-oswag . . .
kun napapaatubang sa mga problema?
sa pag-andam sa pag-agom?
sa ministeryo?
[Mga Hapot Para sa Pag-adal]
[Ritrato sa pahina 15]
An pamibi makakatabang sa saimo na atubangon an mga problema
[Ritrato sa pahina 16]
Paano mapapaoswag nin hoben na mga parahayag an epektibong mga paagi nin pagtotokdo?