An Maimbod na Mayordomo Asin an Namamahalang Grupo Kaiyan
An Maimbod na Mayordomo Asin an Namamahalang Grupo Kaiyan
“Siisay man nanggad an maimbod na mayordomo, an sarong mapagmansay, na nonombrahan kan saiyang kagurangnan na mamahala sa saiyang grupo nin mga katabang tanganing padagos na magtao sa sainda nin kakanon sa tamang panahon?”—LUC. 12:42.
1, 2. Anong mahalagang hapot an pinalataw ni Jesus kan sinasabi nia an may laen-laen na kabtang na tanda kan huring mga aldaw?
KAN sinasabi ni Jesus an may laen-laen na kabtang na tanda kan huring mga aldaw, pinalataw nia an hapot na ini: “Siisay man nanggad an maimbod asin mapagmansay na oripon na ninombrahan kan saiyang kagurangnan na mamahala sa saiyang mga lingkod sa harong, tanganing magtao sa sainda kan saindang kakanon sa tamang panahon?” Dangan sinabi ni Jesus na an oripon na ini babalosan huli sa saiyang kaimbodan paagi sa pagnombra sa saiya na mamahala sa gabos na rogaring kan Kagurangnan.—Mat. 24:45-47.
2 Nagkapirang bulan bago kaini, si Jesus nagtao nin kaagid na hapot. (Basahon an Lucas 12:42-44.) An oripon inapod niang “mayordomo” asin an “mga lingkod sa harong” inapod nia na “saiyang grupo nin mga katabang.” An mayordomo iyo an nagpapalakaw sa harong asin inasignaran na mamahala sa mga lingkod dian. Pero, an mayordomo saro man na lingkod. Siisay an oripon, o mayordomong ini, asin paano sia nagtatao nin “kakanon sa tamang panahon”? Mahalagang marhay para sa sato gabos na mamidbid an pinakapaagihan na ginagamit sa pagtao nin espirituwal na kakanon.
3. (a) Paano prinobaran kan mga komentarista nin Kakristianohan na ipaliwanag an sinabi ni Jesus manongod sa “oripon”? (b) Siisay an “mayordomo,” o “oripon,” asin siisay an “mga katabang,” o “mga lingkod sa harong”?
3 Sa parate, an mga tataramon na ini ni Jesus minamansay kan mga komentarista nin Kakristianohan na nanonongod sa mga igwa nin katongdan na may paninimbagan sa naghihingakong mga Kristiano. Alagad si Jesus, an “kagurangnan” sa ilustrasyon, dai nagsabi na magkakaigwa nin dakol na oripon na yaon sa manlaenlaen na sekta nin Kakristianohan. Imbes, sia malinaw na nagsabi na magkakaigwa nin saro sanang “mayordomo,” o “oripon,” na nonombrahan nia na mamahala sa gabos na rogaring nia. Kaya siring kan parateng ipinapaliwanag kan magasin na ini, an mayordomo seguradong nagrerepresentar sa “sadangoton na aripompon” nin linahidan na mga disipulo bilang sarong grupo. Sa konteksto kan Ebanghelyo ni Lucas, naenot nang sinambit ni Jesus an mga ini. (Luc. 12:32) An “grupo nin mga katabang,” o “mga lingkod sa harong,” nanonongod sa grupo man sanang ini alagad idinodoon kaiyan an saindang papel bilang mga indibiduwal. Minalataw an sarong hapot na nakakapukaw nin interes, An lambang indibiduwal na miembro daw kan grupong oripon na ini igwa nin papel sa pagtao nin espirituwal na kakanon sa tamang panahon? An simbag magigin malinaw kun maingat niatong sisiyasaton an sinasabi kan Kasuratan.
An Lingkod ni Jehova sa Nakaaging mga Panahon
4. Ano an apod ni Jehova sa suanoy na nasyon nin Israel, asin ano an mahalagang mangnohon manongod sa nasyon na iyan?
4 An banwaan ni Jehova, an suanoy na nasyon nin Israel, inapod nia bilang lingkod na kompuesto nin grupo nin mga indibiduwal. “‘Kamo [plural] an sakong mga saksi [plural],’ an sabi ni Jehova, ‘an sakong lingkod [singular] na sakong pinili.’” (Isa. 43:10) An gabos na miembro kan nasyon na ini kaiba sa lingkod na iyan na kompuesto nin grupo nin mga indibiduwal. Minsan siring, mahalagang mangnohon na an mga saserdote sana kaiba an mga Levita na bakong saserdote an may paninimbagan sa pagtotokdo sa nasyon.—2 Cron. 35:3; Mal. 2:7.
5. Oyon ki Jesus, anong dakulang pagbabago an mangyayari?
5 An nasyon nin Israel daw an oripon na sinabi ni Jesus? Bako. Aram niato iyan huli sa sinabi ni Jesus sa mga Judio kan panahon nia: “An kahadean nin Dios hahaleon sa saindo asin itatao sa sarong nasyon na nagluluwas nin mga bunga kaiyan.” (Mat. 21:43) Malinaw nanggad, may mangyayaring pagbabago. Gagamiton ni Jehova an sarong bagong nasyon. Minsan siring, kun mapadapit sa espirituwal na pagtotokdo, an gibohon kan oripon sa ilustrasyon ni Jesus kapareho nanggad kan sa “lingkod” nin Dios sa suanoy na Israel.
An Paglataw kan Maimbod na Oripon
6. Anong bagong nasyon an nagpoon na mag-eksister kan Pentecostes 33 C.E., asin sairisay an nagin kabtang kaiyan?
6 An bagong nasyon, an “Israel nin Dios,” kompuesto nin espirituwal na mga Israelita. (Gal. 6:16; Roma 2:28, 29; 9:6) Iyan nagpoon na mag-eksister kan ibubo an espiritu nin Dios kan Pentecostes 33 C.E. Pakatapos kaiyan, an gabos na Kristiano na linahidan nin espiritu nagin kabtang kan nasyon na naglilingkod ngonyan bilang grupong oripon na ninombrahan kan Kagurangnan, si Jesu-Cristo. An lambang miembro kan nasyon na iyan isinugo na maghulit kan maogmang bareta asin gumibo nin mga disipulo. (Mat. 28:19, 20) Alagad kalabot daw an lambang miembro kan grupong iyan sa pagtao nin espirituwal na kakanon sa tamang panahon? Helingon niato kun paano sinisimbag kan Kasuratan an hapot na ini.
7. Kan primero, ano an pangenot na gibohon kan mga apostol, asin kan huri paano nadagdagan an gibohon na iyan?
7 Kan nombrahan ni Jesus an saiyang 12 apostol, kalabot sa pangenot na gibohon ninda an pagigin isinugo na maghulit kan maogmang bareta sa iba. (Basahon an Marcos 3:13-15.) An asignasyon na ini kaoyon kan pundamental na kahulogan kan Griegong termino na apostolos, na kinua sa berbo na an simpleng kahulogan “isugo.” Minsan siring, sa pag-agi nin panahon asin kan madali nang maestablisar an Kristianong kongregasyon, an papel nin sarong apostol nagin “katongdan nin pangangataman.”—Gibo 1:20-26.
8, 9. (a) Ano an pangenot na inasikaso kan 12 apostol? (b) Sairisay pa an tinawan nin dagdag na mga paninimbagan, na kinompirmar kan namamahalang grupo?
8 Ano an pangenot na inasikaso kan 12 apostol? An simbag maheheling sa mga pangyayari pakatapos kan aldaw nin Pentecostes. Kan magkaigwa nin pagpasuruhay manongod sa aroaldaw na pagwaras nin kakanon sa mga balo, tinipon kan 12 apostol an mga disipulo asin nagsabi: “Dai nakakaogma sa samo na pabayaan an tataramon nin Dios tanganing magwaras nin kakanon sa mga lamesa.” (Basahon an Gibo 6:1-6.) Dangan, an mga apostol nagnombra nin ibang tugang na mga lalaki na may kualipikasyon sa espirituwal na asikasohon an “mahalagang gibong” ini tanganing ikadusay kan mga apostol an saindang sadiri “sa ministeryo kan tataramon.” An areglong ini nagresulta sa mga bendisyon ni Jehova mantang “an tataramon nin Dios padagos na nagtalubo, asin an bilang kan mga disipulo padagos na nagdakol na marhay sa Jerusalem.” (Gibo 6:7) Kaya an mga apostol an may pangenot na paninimbagan sa pagpakakan sa espirituwal.—Gibo 2:42.
9 Pag-abot nin panahon, an iba pinagkatiwalaan nin magabat na mga paninimbagan. Sa paggiya kan banal na espiritu, si Pablo asin Bernabe isinugo kan kongregasyon sa Antioquia bilang mga misyonero. Sinda inapod man na mga apostol, minsan ngani dai sinda kaiba sa orihinal na 12. (Gibo 13:1-3; 14:14; Gal. 1:19) Paghaloyhaloy, kinompirmar kan namamahalang grupo sa Jerusalem an pagnombra sa sainda. (Gal. 2:7-10) Dai nahaloy pakatapos kaiyan, si Pablo nagkaigwa nin kabtang sa pagtao nin espirituwal na kakanon. Ginibo nia an saiyang enot na ipinasabong na surat.
10. Kan enot na siglo, an gabos daw na Kristiano na linahidan nin espiritu kalabot sa pag-andam nin espirituwal na kakanon? Ipaliwanag.
10 Minsan siring, an gabos daw na Kristiano na linahidan nin espiritu kalabot sa pagdirehir kan paghuhulit asin sa pag-andam nin espirituwal na kakanon? Dai. Sinasabi sa sato ni apostol Pablo: “Bakong gabos mga apostol, bako daw? Bakong gabos mga propeta, bako daw? Bakong gabos mga paratokdo, bako daw? Bakong gabos naggigibo nin makapangyarihan na mga gibo, bako daw?” (1 Cor. 12:29) Minsan ngani an gabos na Kristiano na pinaniaki sa espiritu nakikikabtang sa paghuhulit, limitadong marhay na bilang sana—walo sanang lalaki—an ginamit tanganing isurat an 27 libro kan Kristianong Griegong Kasuratan.
An Maimbod na Oripon sa Presenteng mga Panahon
11. Anong ‘mga rogaring’ an ibinugtak sa pangangataman kan oripon?
11 Malinaw na ipinaparisa kan mga tataramon ni Jesus sa Mateo 24:45 na magkakaigwa pa man giraray nin grupong maimbod asin mapagmansay na oripon na nabubuhay sa daga durante kan panahon kan katapusan. Sa Kapahayagan 12:17, sinda inaapod na “mga natatada” kan banhi kan babae. Bilang grupo, an natatadang ini ninombrahan na mamahala sa gabos na rogaring ni Cristo digdi sa daga. An ‘mga rogaring’ na ibinugtak sa pangangataman kan maimbod na mayordomo iyo an intereses kan Kagurangnan digdi sa daga, kaiba an daganon na mga sakop kan Kahadean asin an mga pasilidad na ginagamit sa paghuhulit kan maogmang bareta.
12, 13. Paano naaaraman nin sarong Kristiano na sia igwa kan langitnon na pag-apod?
12 Paano naaaraman nin sarong Kristiano kun sia igwa kan langitnon na paglaom asin kaiba sa natatadang ini nin espirituwal na mga Israelita? An simbag yaon sa mga tataramon ni apostol Pablo sa mga kaiba nia sa iyo man sanang langitnon na paglaom: “An gabos na ginigiyahan kan espiritu nin Dios, ini an mga aki nin Dios. Huli ta kamo dai nag-ako nin espiritu nin kaoripnan na ginigikanan giraray nin takot, kundi kamo nag-ako nin espiritu nin pag-ampon bilang mga aki, na paagi sa espiritung ini kita nagkukurahaw: ‘Abba, Ama!’ An espiritu mismo nagpapatotoo kaiba kan satong espiritu na kita mga aki nin Dios. Kun siring, kun kita mga aki, kita man mga paramana: mga paramana nanggad nin Dios, alagad kaibang mga paramana ni Cristo, basta kita iribang magsakit tangani na kita man iribang mapamuraway.”—Roma 8:14-17.
13 Sa simpleng pagtaram, an mga indibiduwal na ini linahidan nin banal na espiritu nin Dios asin nag-ako nin langitnon na “pag-apod,” o “imbitasyon.” (Heb. 3:1; nota sa ibaba) An personal na imbitasyon na ini gikan sa Dios. Dangan, sinda tolos na minahimate na mayong pagduda o takot na akoon an pagpaniaki na ini bilang mga aki nin Dios. (Basahon an 1 Juan 2:20, 21.) Kaya bako sinda mismo an nagdedesisyon na magkaigwa kan paglaom na ini, kundi ibinubugtak ni Jehova sa sainda an saiyang tatak, o banal na espiritu.—2 Cor. 1:21, 22; 1 Ped. 1:3, 4.
An Tamang Pagmansay
14. Paano minamansay kan mga linahidan an pag-apod sa sainda?
14 Paano maninigong mansayon kan mga linahidan na ini an saindang sadiri mantang hinahalat ninda an saindang langitnon na balos? Nasasabotan ninda na minsan ngani nag-ako sinda nin marahayon na imbitasyon, iyan imbitasyon sana. Sinda dapat na magdanay na maimbod sagkod sa kagadanan tanganing makamtan an premyong ini. May kapakumbabaan na sinasabi man ninda an mga tataramon ni Pablo: “Mga tugang, dai ko pa ibinibilang an sakong sadiri na nakapangapot na dian; alagad igwa nin sarong bagay manongod dian: Linilingawan ko an mga bagay na nasa hudian asin pinipirit kong aboton an mga bagay na nasa enotan, pinagmamaigotan kong makaabot sa pasohan para sa premyong langitnon na pag-apod nin Dios paagi ki Cristo Jesus.” (Fil. 3:13, 14) Dapat na gibohon kan linahidan na mga natatada an saindang pinakamakakaya na ‘maglakaw nin angay sa pag-apod na iinapod sa sainda, na igwa nin lubos na kababaan nin isip,’ na ginigibo iyan na “may takot asin pagtakig.”—Efe. 4:1, 2; Fil. 2:12; 1 Tes. 2:12.
15. Paano maninigong mansayon nin mga Kristiano an mga nagkakakan asin nag-iinom kan mga emblema sa Memorial, asin paano minamansay nin mga linahidan an saindang sadiri?
15 Sa ibong na lado, paano maninigong mansayon nin ibang Kristiano an saro na naniniwala na sia linahidan asin nagpoon nang magkakan asin mag-inom kan mga emblema sa Memorial? Sia dai maninigong husgaran. Sia asin si Jehova sana an nakakaaram kan bagay na iyan. (Roma 14:12) Minsan siring, an mga Kristiano na talagang linahidan dai naghahagad nin espesyal na atension. Dai sinda naniniwala na huling linahidan sinda igwa na sinda nin espesyal na pakarorop na labi kisa sa pakarorop na puedeng yaon sa nagkapirang eksperyensiadong miembro kan “dakulang kadaklan.” (Kap. 7:9) Dai sinda naniniwala na siertong mas dakol na banal na espiritu an yaon sa sainda kisa sa kairiba ninda na “ibang mga karnero.” (Juan 10:16) Dai sinda nag-aasa nin espesyal na tratamiento; ni naniniwala sinda na huli sa pagkakan asin pag-inom kan mga emblema mas halangkaw na sinda sa nombradong kamagurangan sa kongregasyon.
16-18. (a) An gabos daw na linahidan kalabot sa paghayag nin bagong espirituwal na mga katotoohan? Iilustrar. (b) Taano ta dai kaipuhan kan Namamahalang Grupo na konsultahon an gabos na naniniwalang sinda linahidan?
16 An gabos daw na linahidan na ini sa bilog na daga kabtang nin sarong global network na sa sarong paagi kalabot sa paghayag nin bagong espirituwal na mga katotoohan? Dai. Minsan ngani bilang sarong grupo paninimbagan kan grupong oripon na pakakanon an espirituwal na pamilya, bakong parareho an paninimbagan o asignasyon kan gabos na indibiduwal na miembro kan grupong oripon. (Basahon an 1 Corinto 12:14-18.) Siring sa nasabi na, kan enot na siglo, gabos sinda kalabot sa mahalagang marhay na paghuhulit. Alagad limitadong marhay na bilang sana an ginamit tanganing isurat an mga libro kan Biblia asin direhiran an Kristianong kongregasyon.
17 Sa pag-ilustrar: Kun beses, sinasabi kan Kasuratan na an “kongregasyon” naggigibo nin aksion sa pag-asikaso sa hudisyal na mga bagay. (Mat. 18:17) Pero sa katunayan, an kamagurangan sana an naggigibo kan aksion na ini sa katongdan ninda bilang mga representante kan kongregasyon. Dai kinokontak kan kamagurangan an gabos na miembro kan kongregasyon tanganing hagadon an saindang manlaenlaen na opinyon bago sinda gumibo nin desisyon. Sa teokratikong paagi, ginigibo ninda an katongdan na iinasignar sa sainda; sinda nagseserbi bilang representante kan bilog na kongregasyon.
18 Kaagid kaiyan, ngonyan sarong limitadong kabilangan nin linahidan na mga lalaki an may paninimbagan bilang representante kan grupong oripon. Sinda an minakompuesto kan Namamahalang Grupo kan Mga Saksi ni Jehova. An mga lalaking ini na linahidan nin espiritu an nagdidirehir sa gibohon na pang-Kahadean asin sa programa nin espirituwal na pagpakakan. Pero arog kan enot na siglo, dai kinokonsulta kan Namamahalang Grupo an lambang indibiduwal na miembro kan grupong oripon bago maggibo nin mga desisyon. (Basahon an Gibo 16:4, 5.) Minsan siring, an gabos na linahidan na Saksi kalabot nanggad sa mahalagang marhay na pag-ani na ginigibo ngonyan. “An maimbod asin mapagmansay na oripon” sarong grupo, alagad bilang mga indibiduwal, sinda igwa nin manlaenlaen na asignasyon.—1 Cor. 12:19-26.
19, 20. Ano an timbang na pagmansay kan dakulang kadaklan dapit sa “maimbod asin mapagmansay na oripon” saka sa Namamahalang Grupo kaiyan?
19 Ano an maninigong magin epekto kan mga katunayan na nasambitan sa enotan sa padakol nang padakol na dakulang kadaklan na may paglaom na mabuhay sagkod lamang sa daga? Bilang kabtang kan mga rogaring kan Hade, sinda maogma na makipagtabangan nin lubos sa mga areglong ginigibo kan Namamahalang Grupo, na nagseserbing representante kan “maimbod asin mapagmansay na oripon.” Pinapahalagahan kan mga miembro kan dakulang kadaklan an espirituwal na kakanon na ginigibo paagi sa pagdirehir kan Namamahalang Grupo. Alagad kadungan kaiyan, minsan ngani iginagalang kan mga miembro kan dakulang kadaklan an oripon bilang sarong grupo, sinda nag-iingat na dai ilangkaw an siisay man na indibiduwal na naniniwala na sia kabtang kan oripon na iyan. Mayo nin siisay man na Kristiano na tunay na linahidan kan espiritu nin Dios an magmamawot o mag-aasa nin siring na tratamiento.—Gibo 10:25, 26; 14:14, 15.
20 Baga man kita “mga lingkod sa harong,” na kabtang kan linahidan na mga natatada, o kita mga miembro kan dakulang kadaklan, magin determinasyon niato na lubos na makipagtabangan sa maimbod na mayordomo asin sa Namamahalang Grupo kaiyan. Logod na an lambang saro sa sato ‘magdanay na mapagbantay’ asin magin maimbod sagkod sa katapusan.—Mat. 24:13, 42.
Nagigirumdoman daw Nindo?
• Siisay “an maimbod asin mapagmansay na oripon,” asin siisay an mga lingkod sa harong?
• Paano naaaraman nin saro na sia igwa kan langitnon na pag-apod?
• Siisay an may pangenot na paninimbagan sa pag-andam nin bagong espirituwal na kakanon?
• Paano maninigong mansayon nin saro sa mga linahidan an saiyang sadiri?
[Mga Hapot Para sa Pag-adal]
[Ritrato sa pahina 23]
Ngonyan, an Namamahalang Grupo nagseserbing representante kan grupong maimbod asin mapagmansay na oripon. Igwa nin kaparehong areglo kan enot na siglo