Kun Paano Makakanompong nin Kagayagayahan sa Balaog na Pagigin Daing Agom

“ASIN sinda nagpakasal asin nabuhay na maogma sagkod lamang.” Sa mga tataramon na ini natatapos an dakol na estoryang pang-aki. An romantikong mga pelikula asin nobela sa parate nagpapaabot nin kaagid na mensahe—na an pag-agom nangangahulogan nin kaogmahan sa katapustapusi! Dugang pa, an kadaklan na kultura nakakaimpluwensiang gayo na mag-agom an mga hoben na adulto. “Ipinapamate sa saindo nin mga tawo na para sa sarong babae, an solamenteng pasohan iyo an magpaagom,” an sabi ni Debby kan sia mga 25 anyos na. “Ipinapasabot ninda an ideya na an buhay nagpopoon pagkatapos na mag-agom.”

An sarong espirituwal na tawo mayo kan siring na hayakpit na pagmansay. Minsan ngani ordinaryo na sana sa mga Israelita an pag-agom, an Biblia may sinasambit na daing agom na mga babae asin lalaki na nagkaigwa nin nakakakontentong marhay na buhay. Ngonyan, an nagkapirang Kristiano pinipili an buhay na daing agom, mantang an dakol na iba pa nagdadanay na daing agom huli sa mga kamugtakan. Ano man an rason sa pagigin daing agom ninda, an mahalagang hapot pareho pa man giraray: Paano an sarong Kristiano magigin mapanggana sa pagigin daing agom?

Si Jesus mismo dai nag-agom, na masasabotan nanggad huli sa asignasyon na itinao sa saiya. Sinabihan nia an saiyang mga disipulo na an nagkapira sa saiyang mga parasunod ‘tatawan man nin lugar’ an pagigin daing agom. (Mat. 19:10-12) Sa siring, ipinaparisa ni Jesus na tanganing magin mapanggana sa pagigin daing agom, kaipuhan niatong akoon, o tawan nin lugar, sa satong isip asin puso an paaging ini nin pamumuhay.

An hatol daw ni Jesus aplikado sana sa saro na tuyong pinili an bilog na buhay na pagigin daing agom tanganing lubos na makakonsentrar sa teokratikong mga asignasyon? (1 Cor. 7:34, 35) Dai man. Estudyare an situwasyon nin sarong Kristiano na tibaad gustong mag-agom alagad sa presente dai pa nakakanompong nin angay na magigin agom. “Dai pa sana nahahaloy, bigla akong inalok nin sarong katrabaho na bakong Saksi na magpakasal sa saiya,” an sabi ni Ana, sarong daing agom na Kristiana na mga labi nang 30 anyos. “Medyo naogma man ako, alagad tolos kong linabanan an pagmateng iyan huli ta an gusto kong magin agom iyo sana idtong mas magpapadayupot sa sako ki Jehova.”

An pagmawot na magpaagom sa saro na ‘nasa Kagurangnan’ nakatabang sa dakol na Kristianang arog ni Ana na malikayan na magpaagom sa bakong kapagtubod. * (1 Cor. 7:39; 2 Cor. 6:14) Huli sa paggalang sa hatol nin Dios, tinatawan ninda nin lugar an pagigin daing agom, kisiera sa laog nin pirang panahon. Paano ninda mapangganang magigibo ini?

Makanood na an Helingon Iyo an Positibo

Sa pangenot, an kakayahan na akoon an sarong situwasyon na tibaad garo baga bako an gusto niato nakadepende sa satong saboot. “Ikinakaogma ko an mga bagay na yaon sa sako, asin dai ko pinapangarap an mga bagay na mayo sa sako,” an sabi ni Carmen, daing agom na Kristiana na mga labi nang 40 anyos. Totoo, tibaad may mga panahon na kita mamondo asin desganado. Alagad an pakaaram na an siring na mga bagay naeeksperyensiahan man kan dakol na iba pa sa  bilog na kasararoan nin magturugang sa kinaban nakakapakosog sa sato na magpadagos na may kompiansa. Tinatabangan ni Jehova an dakol na magin mapanggana sa pagigin daing agom asin makaya an iba pang mga kadepisilan.—1 Ped. 5:9, 10.

An dakol na tugang na Kristiano may naheling na positibong mga aspekto sa pagigin daing agom. “Sa heling ko an sekreto sa kaogmahan iyo an kakayahan na ikaogma an positibong mga aspekto ano man an situwasyon mo,” an sabi ni Ester, daing agom na Kristiana na mga 35 anyos na. “Naniniwala ako na mag-agom man ako o dai, kun eenoton ko an intereses kan Kahadean, dai ni Jehova isasayuma sa sako an ano man na marahay,” an sabi man ni Carmen. (Sal. 84:11) “Tibaad dai nangyari an eksaktong plinano ko sa sakong buhay, alagad maogma ako asin magdadanay akong arog kaiyan.”

Mga Halimbawa sa Biblia nin Pagigin Daing Agom

Bakong plano kan aking babae ni Jefte na magdanay na daing agom. Alagad huli sa panuga kan saiyang ama obligado sia na maglingkod sa santuaryo poon sa saiyang pagkahoben. Daing duda na nagbago an saiyang personal na mga plano huli sa dai inaasahan na asignasyon na ini, asin siertong kontra ini sa natural na namamatean nia. Nagmondo sia nin duwang bulan kan masabotan nia na dai sia puedeng mag-agom asin magkapamilya. Minsan siring, inako nia an saiyang bagong situwasyon asin gikan sa boot siang naglingkod sa bilog niang buhay. Taon-taon siang kinokomendaran kan ibang mga babaeng Israelita huli sa saiyang pagigin mapagsakripisyo.—Hok. 11:36-40.

An nagkapirang kapon sa pisikal durante kan panahon ni Isaias tibaad nadesganar manongod sa saindang kamugtakan. Dai sinasabi kan Biblia an dahelan kan pagigin kapon ninda. Huling arog sinda kaiyan, dai sinda puedeng magin tunay na miembro kan kongregasyon nin Israel, ni sinda man makakaagom asin magkakaaki. (Deut. 23:1) Pero, nasabotan ni Jehova an saindang namamatean, asin kinomendaran nia an saindang bilog na kalag na pagkuyog sa saiyang tipan. Sinabi nia sa sainda na magkakaigwa sinda nin “girumdoman” asin nin “ngaran sagkod sa panahon na daing talaan” sa saiyang harong. Sa ibang pagtaram, an maimbod na mga kapon na ini magkakaigwa kan seguradong paglaom na magkamit nin buhay na daing katapusan sa Mesiyanikong pamamahala ni Jesus. Dai sinda noarin man lilingawan ni Jehova.—Isa. 56:3-5.

An mga kamugtakan ni Jeremias laen na marhay. Pagkatapos na sugoon si Jeremias bilang propeta, ininstruksionan sia nin Dios na magdanay na daing agom huli sa masakit na mga panahon na kinabubuhayan nia asin huli sa klase kan saiyang asignasyon. “Dai ka mag-agom,” an sabi ni Jehova, “asin dai ka magkaigwa nin mga aking lalaki asin aking babae sa lugar na ini.” (Jer. 16:1-4) Dai ihinahayag kan Biblia kun ano an personal na namatean ni Jeremias manongod sa mga instruksion na ini, alagad talagang sinisierto kaiyan sa sato na sia sarong tawo na ikinaogmang marhay an tataramon ni Jehova. (Jer. 15:16) Kan suminunod na mga taon, kan matagalan ni Jeremias an makatatakot na 18 bulan na pagsalikop sa Jerusalem, daing duda na nasabotan nia na madonong an pagkuyog sa pagboot ni Jehova na magdanay na daing agom.—Lam. 4:4, 10.

Mga Paagi na Mapaoswag an Kalidad kan Saindong Buhay

An nasambitan sa enotan na mga karakter sa Biblia mga daing agom, alagad sinda nagkamit kan suporta ni Jehova asin nagkonsentrar sa paglilingkod sa saiya. Siring man ngonyan, an makahulogan na aktibidad may dakulang magigibo tanganing mapaoswag an kalidad kan satong buhay. Ihinula kan Biblia na an mga babaeng nagsasabi kan maogmang bareta magigin sarong dakulang hukbo. (Sal. 68:11) Kaiba sa dakulang hukbong ini an rinibong daing agom na Kristiana. Mantang nagbubunga an saindang ministeryo, dakol an binendisyonan na  magkaigwa nin espirituwal na mga aking lalaki asin babae.—Mar. 10:29, 30; 1 Tes. 2:7, 8.

“An pagpapayunir nagtatao nin direksion sa sakong buhay,” an paliwanag ni Loli pagkatapos nin 14 taon sa siring na paglilingkod. “Bilang daing agom na Kristiana, ginigibo kong sibot an sakong buhay, na nakakatabang sa sako na malikayan an kamondoan. Sa katapusan kan kada aldaw, kontento ako huli ta naheheling ko na talagang nakakatabang sa mga tawo an sakong ministeryo. Nagtatao ini sa sako nin dakulang kagayagayahan.”

Dakol na Kristiana an nakanood nin bagong lenguahe asin pinahiwas an saindang ministeryo paagi sa paghuhulit sa mga tawo na iba an lenguahe. “Sa siudad na iniistaran ko, rinibo an taga ibang nasyon,” an sabi ni Ana, na nasambitan sa enotan. Ikinaogma nia an paghuhulit sa mga tawong nagtataram nin Pranses. “An pakanood nin lenguahe na magagamit ko tanganing makikomunikar sa dakol sa sainda nagbukas nin bagong langtad nin gibohon asin ginibong interesanteng marhay an sakong paghuhulit.”

Huling an pagigin daing agom nangangahulogan nin mas kadikit na obligasyon, inaprobetsaran nin nagkapira an saindang kamugtakan tanganing maglingkod sa lugar na mas dakula an pangangaipo. “Naniniwala nanggad ako na mientras na mas dakol an ginigibo nindo sa paglilingkod ki Jehova, mas madali man na magkaigwa nin dayupot na mga katood asin makamateng namomotan,” an sabi ni Lidiana, daing agom na Kristiana na mga 35 anyos na asin naglilingkod sa ibang lugar na mas dakula an pangangaipo. “Dakol an nagin dayupot kong katood na laen-laen an pinaghalean saka nasyonalidad, asin an mga pakikikatood na ini nagpaoswag na marhay sa kalidad kan sakong buhay.”

Nasambitan kan Biblia si Felipe na ebanghelisador na igwa nin apat na aking babae na daing agom, asin naghuhurula sinda. (Gibo 21:8, 9) Seguradong nagpaheling sinda nin kaigotan na arog kan sa saindang ama. Posible daw na ginamit ninda an saindang balaog na paghula para sa kapakinabangan nin mga kapwa Kristiano sa Cesarea? (1 Cor. 14:1, 3) Ngonyan, an dakol na daing agom na Kristiana nakakaparigon man sa iba paagi sa saindang regular na pag-atender asin pakikikabtang sa Kristianong mga pagtiripon.

Sa ibong na lado, si Lidia sarong Kristiana kaidto sa Filipos na kinomendaran kan Biblia huli sa pagigin mapag-istimar nia. (Gibo 16:14, 15, 40) Si Lidia—na daing agom o balo gayod—nagin matinao kaya nagkaigwa sia nin kapakipakinabang na pakiibaiba sa nagbibiaheng mga paraataman, arog baga ni Pablo, Silas, asin Lucas. An siring na pagigin matinao nagbubunga nin kaagid na mga bendisyon ngonyan.

Pagpanigo sa Pangangaipo na Mamotan

Apuera sa pagkaigwa nin makahulogan na gibohon na makakapano sa satong buhay, gabos kita igwa nin pangangaipo na mamotan asin padangaton. Paano mapapanigoan nin mga daing agom an pangangaipong iyan? Enot, si Jehova pirmeng yaon tanganing kamotan, pakosogon, asin hinanyogon kita. Kun minsan namamatean ni Hadeng David na sia “nagsosolosolo asin nasasakitan,” pero aram nia na pirme siang makakadolok ki Jehova para sa suporta. (Sal. 25:16; 55:22) “Enkaso bayaan ako kan sakong sadiring ama asin kan sakong sadiring ina, si Jehova mismo an maampon sa sako,” an isinurat nia. (Sal. 27:10) Inaagda ni Jehova an gabos niang lingkod na rumani sa saiya asin magin dayupot na mga katood nia.—Sal. 25:14; Sant. 2:23; 4:8.

Dugang pa, sa laog kan pambilog na kinaban na kasararoan nin magturugang, makakanompong man kita nin espirituwal na mga ama, ina, tugang na lalaki, asin tugang na babae na an pagkamoot makakapaoswag sa kalidad kan satong buhay. (Mat. 19:29; 1 Ped. 2:17) Dakol na daing agom na Kristiano an nakakamate nin dakulang pagkakontento sa pagsunod sa halimbawa ni Dorcas, na “pano nin marahay na mga gibo asin mga balaog nin pagkaherak.” (Gibo 9:36, 39) “Saen man ako magduman,  naghahanap ako nin tunay na mga katood sa kongregasyon na mamomotan ako asin susuportaran ako kun ako mamondo,” an paliwanag ni Loli. “Tanganing pakosogon an siring na mga pakikikatood, pinagmamaigotan ko na magpaheling nin pagkamoot asin interes sa iba. Naglingkod ako sa walong manlaenlaen na kongregasyon, asin pirme akong nakakanompong nin tunay na mga katood. Sa parate mga Kristiana sinda na bako kong kaedad—kun minsan sinda garo ko na mga lola o kun minsan mga tinedyer.” Sa lambang kongregasyon, may mga nangangaipo nin pagpadangat asin kaibaiba. An pagkaigwa nin sinserong interes sa mga iyan puedeng makatabang sa sainda nin dakula asin makapanigo sa satong pagmawot na mamoot asin mamotan.—Luc. 6:38.

An Dios Dai Makakalingaw

Ipinaparisa kan Biblia na an gabos na Kristiano dapat na gumibo nin mga pagsasakripisyo huli sa masakit na mga panahon na kinabubuhayan niato. (1 Cor. 7:29-31) An mga nagdadanay na daing agom huli sa saindang determinasyon na kuyogon an pagboot nin Dios na mag-agom basta sa Kagurangnan tunay nanggad na maninigo sa espesyal na paggalang asin konsiderasyon. (Mat. 19:12) Minsan siring, an kaomaw-omaw na sakripisyong ini dai nangangahulogan na dai na sinda puedeng magin tunay na maogma.

“Igwa ako nin nakakakontentong buhay na nakadepende sa sakong relasyon ki Jehova asin sa paglilingkod ko sa saiya,” an sabi ni Lidiana. “May midbid akong mga may agom, an iba maogma asin an iba bako. An katunayan na ini an nakakakombensir sa sako na an sakong kaogmahan dai nakadepende sa kun baga maagom ako o dai.” Arog kan ipinarisa ni Jesus, an kaogmahan sa pangenot nakadepende sa pagtao asin paglilingkod, sarong bagay na magigibo nin gabos na Kristiano.—Juan 13:14-17; Gibo 20:35.

Daing duda, an pinakadahelan nin paggayagaya niato iyo an pakaaram na bebendisyonan kita ni Jehova sa ano man na sakripisyo niato sa paggibo kan saiyang kabotan. Sinisierto sa sato kan Biblia: “An Dios bakong maraot tanganing malingawan an saindong gibo asin an pagkamoot na ipinaheling nindo para sa saiyang ngaran.”—Heb. 6:10.

[Nota sa Ibaba]

[Blurb sa pahina 25]

“Ikinakaogma ko an mga bagay na yaon sa sako, asin dai ko pinapangarap an mga bagay na mayo sa sako.”—Carmen

[Ritrato sa pahina 26]

Si Loli asin Lidiana magayagayang naglilingkod sa lugar na mas dakula an pangangaipo

[Ritrato sa pahina 27]

Inaagda nin Dios an gabos niang lingkod na rumani sa saiya