An mga Banhi nin Katotoohan Nakaabot sa Harayong mga Rehion

AN Republika nin Tuva sa Rusya yaon sa pinakatimog na sagkodan nin Siberia, na sa timog asin sirangan kaiyan yaon an Mongolia. An dakol na tawo sa Tuva nag-iistar sa harayong mga komunidad na depisil mapaabotan kan mensahe kan Kahadean. Minsan siring, dai pa sana nahahaloy, sarong grupo nin mga tawo hale sa nagkapirang harayong parte kan Tuva an nagbiahe pasiring sa Kyzyl, an kabisera kaiyan, tanganing mag-atender nin seminar. Naaraman ni Maria, na payunir sa Kyzyl, an manongod sa pag-abot ninda, asin narealisar nia na bihirang oportunidad ini na ikahulit sa sainda an maogmang bareta.

Isinaysay ni Maria an nangyari: “An eskuelahan na pinagtatrabahohan ko bilang maestra nag-iskedyul nin seminar dapit sa kun paano aatubangon an pag-abuso sa kemikal na mga bagay. Mga 50 katawo hale sa pinakahararayong rehion kan Tuva an maatender. Kaiba sa grupo an mga paratokdo, sikologo, inspektor sa institusyon na nag-aasikaso sa kapakanan nin mga aki, asin iba pa.” An miting na ini nagtao ki Maria nin oportunidad na maghulit, alagad dai ini nagin pasil sa saiya. Ipinaliwanag nia: “Masusupgon talaga ako, asin nasasakitan ako na magpatotoo nin impormal. Minsan siring, namibi ako ki Jehova na logod tawan ako nin kosog nin boot na mapangganahan an pagkatakot ko asin magamit ko an oportunidad na ini na magpatotoo.” Nagin mapanggana daw sia?

Sinabi pa ni Maria: “May nakua akong magasin na Awake! na nagpapaliwanag dapit sa mga phobia. ‘Tibaad magin interesado dian an sarong sikologo,’ an inisip ko, kaya dinara ko an magasin sa eskuelahan. Kan aldaw na iyan, saro sa mga maestra na nag-aatender sa seminar an nagduman sa opisina ko, asin iinalok ko sa saiya an magasin. Maogma niang inako iyan. Sa katunayan, sinabi nia na sia mismo nagkaigwa nin phobia. Kan suminunod na aldaw, dinarahan ko sia kan librong Questions Young People Ask—Answers That Work, Volume 1. Maogma man nia na inako iyan. Huli sa positibo niang reaksion naisip ko na tibaad magkainteres man an ibang mga maestra sa publikasyon na iyan. Kaya nagdara ako sa eskuelahan nin sarong karton nin mga librong Young People Ask asin iba pang publikasyon.” Dai nahaloy, naubos na an laog kan karton. Isinaysay ni Maria an nangyari: “An nagkapirang katrabaho kan maestra na tinawan ko kan librong Young People Ask nagduman sa opisina ko asin naghapot, ‘Saen sinda nagdidistribwir kan mga libro?’ ” Nakaduman sinda sa tamang lugar!

Sabado an huring aldaw kan seminar. Si Maria mayong laog sa trabaho sa aldaw na iyan, kaya nagbugtak sia nin mga literatura sa nagkapirang lamesa sa saiyang opisina. Sa sinusuratan na board, nagsurat sia: “Namomotan na mga Paratokdo! Puede kamong kumua nin literatura para sa saindo asin sa mga kabisto nindo. An marahayon na mga publikasyon na ini makakatabang sa saindo na magin mapanggana sa trabaho nindo asin papakosogon kaini an saindong pamilya.” Ano an resulta? “Nagduman ako sa sakong opisina kan aldaw na idto asin naheling ko na mayo na an kadaklan sa mga literatura. Tolos-tolos akong nagkua nin bagong suplay nin mga libro asin magasin.” Sa katapusan kan seminar, nakapasakamot si Maria nin 380 magasin, 173 na libro, asin 34 brosyur. Kan an mga nag-atender sa seminar magpuli sa harayong mga rehion na iniistaran asin pinagtatrabahohan ninda, dara ninda an mga literatura. An sabi ni Maria, “Naoogmang marhay ako na an mga banhi nin katotoohan nakaabot na ngonyan sa pinakahararayong parte kan Tuva!”—Ecl. 11:6.

[Mapa sa pahina 32]

(Para sa aktuwal na format, hilingon an publikasyon)

RUSYA

REPUBLIKA NIN TUVA