Arogon si Jesus—Maghulit na May Pagkapusoan
Arogon si Jesus—Maghulit na May Pagkapusoan
“Kami nagpakapusoan . . . na magtaram sa saindo kan maogmang bareta.”—1 TES. 2:2.
1. Taano ta nakakaakit na marhay an maogmang bareta kan Kahadean?
NAKAKAGAYAGAYA nanggad na makadangog nin maogmang bareta! Asin an pinakamarahay na bareta sa gabos iyo an maogmang bareta kan Kahadean nin Dios. Sinisierto sa sato kan maogmang bareta na ini na matatapos an kasakitan, helang, kolog, kamondoan, asin kagadanan. Iyan nagtatao nin paglaom na buhay na daing katapusan, naghahayag kan katuyohan nin Dios, asin nagpapaheling sa sato kun paano magkakaigwa nin mamomoton na relasyon sa saiya. Iisipon nindo na maggagayagaya an gabos na makakadangog kan baretang ini na ipinaabot ni Jesus sa katawohan. Pero makamomondo, bakong arog kaiyan an nangyari.
2. Ipaliwanag an sinabi ni Jesus: “Ako nagdigdi tanganing magpangyari nin pagkakabanga.”
2 Sinabihan ni Jesus an saiyang mga disipulo: “Dai kamo mag-isip na ako nagdigdi tanganing magdara nin katoninongan sa daga; ako nagdigdi tanganing magdara, bakong nin katoninongan, kundi nin espada. Huli ta ako nagdigdi tanganing magpangyari nin pagkakabanga, sa sarong lalaki tumang sa saiyang ama, asin sa sarong aking babae tumang sa saiyang ina, asin sa hoben na agom na babae tumang sa saiyang panugangan na babae. Sa katotoohan, an magigin mga kaiwal nin saro iyo an kasararo nia mismo sa harong.” (Mat. 10:34-36) Imbes na akoon an maogmang bareta, hinahaboan iyan nin kadaklan na tawo. Ginigibo nin nagkapira an saindang sadiri na mga kaiwal kan mga nagbabalangibog kaiyan, dawa pa sinda haraning mga kapamilya.
3. Sa paggibo kan satong asignasyon na maghulit, ano an kaipuhan niato?
3 Ibinabalangibog niato an kaparehong mga katotoohan na ibinalangibog ni Jesus, asin kun nadadangog iyan kan mga tawo, an reaksion ninda sa sato ngonyan kapareho kan reaksion sa saiya nin dakol na tawo kaidto. Mangyayari talaga ini. Si Jesus nagsabi sa saiyang mga disipulo: “An oripon bakong mas dakula kisa sa saiyang kagurangnan. Kun ako pinersegir ninda, kamo pepersegiron man ninda.” (Juan 15:20) Sa dakol na nasyon dai kita nakakaeksperyensia nin direktang persekusyon, alagad talagang nakakaeksperyensia kita nin pagmenos asin pagkadaing interes. Huli kaiyan, kaipuhan niato an pagtubod asin kosog nin boot tanganing makapadagos na may pagkapusoan sa satong paghuhulit kan maogmang bareta.—Basahon an 2 Pedro 1:5-8.
4. Taano ta kinaipuhan ni Pablo na ‘magpakapusoan’ sa paghuhulit?
4 Kun beses, tibaad nadedepisilan kang makikabtang sa ministeryo, o tibaad garo baga natatakot ka sa nagkapirang aspekto kaiyan. Kun iyo, bako sana ika an nakakamate kaiyan. Si apostol Pablo pusoan asin daing takot na parahulit na may hararom na pakasabot sa katotoohan, pero may mga panahon na pati sia nadepisilan na maghulit. Si Pablo nagsurat sa mga Kristiano sa Tesalonica: “Pakatapos na kami magsakit nguna asin trataron nin daing galang (siring kan aram nindo) sa Filipos, kami nagpakapusoan paagi sa satong Dios na magtaram sa saindo kan maogmang bareta nin Dios na may kaibang dakulang pagmamaigot.” (1 Tes. 2:2) Sa Filipos, si Pablo asin an kaiba niang si Silas hinampak kan mga autoridad, ibinilanggo, asin ibinugtak sa pandog. (Gibo 16:16-24) Dawa siring, si Pablo asin Silas “nagpakapusoan” tanganing padagos na makapaghulit. Paano man niato magigibo iyan? Tanganing masimbag iyan, estudyaran niato kun ano an nagpangyari sa mga lingkod nin Dios, kan mga panahon kan Biblia, na may pagkapusoan na magtaram kan katotoohan manongod ki Jehova, asin pag-adalan niato kun paano niato maaarog an halimbawa ninda.
Kinaipuhan an Pagkapusoan sa Pag-atubang sa mga Kaiwal
5. Taano ta pirmeng kaipuhan na magpakapusoan an mga maimbod ki Jehova?
5 Siempre, si Jesu-Cristo an pinakamarahay na halimbawa nin kosog nin boot asin pagkapusoan. Pero, poon sa kapinonan kan kasaysayan nin tawo, pirmeng kaipuhan na magpakapusoan an gabos na maimbod ki Jehova. Taano man? Kasunod kan pagrebelde sa Eden, ihinula ni Jehova na magkakaigwa nin pag-iiwal sa pag-oltanan kan mga naglilingkod sa Dios asin kan mga naglilingkod ki Satanas. (Gen. 3:15) An pag-iiwal na ini tolos na narisa kan si Abel, sarong matanos na tawo, gadanon kan saiyang tugang. Paghaloyhaloy, an pakikiiwal na iyan nangyari tumang ki Enoc, saro pang maimbod na tawong nabuhay bago kan Baha. Sia naghula na maabot an Dios kaiba an Saiyang banal na mga anghel tanganing maghokom sa mga bakong diosnon. (Jud. 14, 15) An mensaheng ini dai nanggad gusto nin kadaklan na tawo. An mga tawo naongis ki Enoc asin malinaw na gagadanon kutana ninda sia kun dai pa tinapos ni Jehova an saiyang buhay. Kanigoan na pagkapusoan an ipinaheling ni Enoc!—Gen. 5:21-24.
6. Taano ta kinaipuhan ni Moises na magpakapusoan sa pakikipag-olay ki Faraon?
6 Isip-isipa man an pagkapusoan na ipinaheling ni Moises sa pakikipag-olay ki Faraon, sarong namamahala na dai ibinilang na representante sana kan mga dios kundi sarong dios mismo, an aki kan dios na saldang na si Ra. Tibaad sinasamba nia an sadiri niang imahen, arog kan ginibo nin ibang mga Faraon. An tataramon ni Faraon an nasusunod; sia namamahala paagi sa dekreto. Huling makapangyarihan, arogante, asin matagas an payo, si Faraon dai tuod na sinasabihan kan iba kun ano an gigibohon nia. Sa tawong ini na si Moises, sarong mahoyong pastor, uminatubang nin paorootro—na dai ipinapaapod asin dai inaako. Asin ano an ihinula ni Moises? Mga damat na nandedestroso nin grabe. Asin ano an pirit na hinagad nia? Permiso na humale sa nasyon an pirang milyon na oripon ni Faraon! Kinaipuhan daw ni Moises na magpakapusoan? Iyo nanggad!—Bil. 12:3; Heb. 11:27.
7, 8. (a) Anong mga pagbalo an inagihan kan mga maimbod kan suanoy na panahon? (b) Ano an nakatabang sa mga maimbod kan mga panahon bago kan mga Kristiano na magin pusoan sa pagsuportar asin pagpalakop sa dalisay na pagsamba?
7 Durante kan suminunod na mga siglo, an mga propeta asin an iba pang maimbod na mga lingkod nin Dios padagos na may kosog nin boot na nanindogan para sa dalisay na pagsamba. An kinaban ni Satanas dai nagin maboot sa sainda. Si Pablo nagsabi: “Sinda ginapo, sinda binalô, sinda linagadi, sinda nagadan paagi sa espada, sinda naggurubing nin anit nin karnero, nin anit nin kanding, mantang sinda nasa kadukhaan, nasa kahorasaan, minamaltrato.” (Heb. 11:37) Ano an nakatabang sa maimbod na mga lingkod nin Dios na idto na makapanindogan nin marigon? Sa nagkapirang naenot na bersikulo, sinabi kan apostol kun ano an nagtao ki Abel, Abraham, Sara, asin sa iba pa nin kosog na makatagal. Sia nagsabi: “Dai ninda nakamtan an kaotoban kan mga panuga, alagad [huli sa pagtubod] iyan natanaw ninda sa harayo asin maogmang inako iyan.” (Heb. 11:13) Daing duda, an mga propeta na arog ni Elias, Jeremias, asin iba pang maimbod kan mga panahon bago kan mga Kristiano, na pusoan na nanindogan para sa tunay na pagsamba, natabangan man na magtagal paagi sa pagdanay na nakaturuhok sa mga panuga ni Jehova.—Tito 1:2.
8 An mga maimbod na idto kan mga panahon bago kan mga Kristiano naglaom sa sarong maogma asin magayon na ngapit. Sa pagbuhay liwat sa sainda, sa kahurihurihi sinda magigin sangkap asin “papatalingkason sa pagkaoripon sa kalapaan” paagi sa paglilingkod ni Cristo Jesus bilang saserdote asin kan saiyang 144,000 na katabang na saserdote. (Roma 8:21) Dugang pa, si Jeremias asin an iba pang pusoan na mga lingkod nin Dios kan suanoy na mga panahon nagkosog an boot huli sa garantiyang itinao ni Jehova, na maheheling sa saiyang panuga ki Jeremias: “Sierto na sinda makikilaban sa saimo, alagad dai sinda manggagana sa saimo, huling ‘ako nasa saimo,’ an sabi ni Jehova, ‘tanganing iligtas ka.’ ” (Jer. 1:19) Ngonyan, napapakosog man kita kun hinohorophorop niato an mga panuga nin Dios para sa satong ngapit asin an saiyang garantiya na poprotehiran kita sa espirituwal.—Tal. 2:7; basahon an 2 Corinto 4:17, 18.
An Pagkamoot Nagmotibar ki Jesus na Maghulit na May Pagkapusoan
9, 10. Sa anong mga paagi ipinaheling ni Jesus an pagkapusoan sa atubangan (a) kan mga namomoon sa relihion, (b) nin grupo nin mga soldados, (c) kan halangkaw na saserdote, (d) ni Pilato?
9 Ipinaheling kan satong Arogan, si Jesus, an saiyang pagkapusoan sa manlaenlaen na paagi. Halimbawa, minsan ngani ikinakaongis si Jesus kan mga igwa nin kapangyarihan asin impluwensia, dai nia pinaluya an puersa kan mensahe na gustong ipaaram nin Dios sa mga tawo. Daing takot na ibinuyagyag nia an makapangyarihan na mga namomoon sa relihion huli sa pagpakangmatanos ninda saka huli sa falsong mga katokdoan ninda. Dapat kondenaron an mga tawong idto, asin direkta sagkod malinaw na sinabi iyan ni Jesus sa sainda. Sa sarong pangyayari, sia nagsabi: “Herak man sa saindo, mga eskriba asin Fariseo, mga parasaginsagin! huli ta kamo kabaing nin mga lolobngan na pinaputi, na sa luwas magayon nanggad paghelingon alagad sa laog pano nin mga tolang kan mga gadan asin nin gabos na klaseng pagkamaati. Siring man kamo, sa luwas matanos nanggad sa pagheling kan mga tawo, alagad sa laog kamo pano nin pagsaginsagin asin katampalasanan.”—Mat. 23:27, 28.
10 Kan atubangon si Jesus nin grupo nin mga soldados sa hardin nin Getsemani, makosog an boot nia na nagpamidbid sa sainda. (Juan 18:3-8) Kan huri, sia dinara sa Sanhedrin asin kinuestion kan halangkaw na saserdote. Minsan ngani aram nia na an halangkaw na saserdote naghahanap nin sarahotan tanganing gadanon sia, daing takot na kinompirmar ni Jesus na Sia an Cristo sagkod an Aki nin Dios. Sinabi pa nia na maheheling ninda sia na “nagtutukaw sa too nin kapangyarihan asin minadatong na nasa mga panganoron nin langit.” (Mar. 14:53, 57-65) Dai nahaloy pakatapos kaiyan, si Jesus nakagapos na nagtindog sa atubangan ni Pilato, na puede kutanang magpatalingkas sa saiya. Alagad si Jesus nagdanay na daing girong sa mga akusasyon sa saiya. (Mar. 15:1-5) An gabos na ini nangaipo nin dakulang kosog nin boot.
11. Paano konektado sa pagkamoot an pagkapusoan?
11 Si Jesus nagsabi nanggad ki Pilato: “Ako namundag dahel kaini, asin dahel kaini ako nagdigdi sa kinaban, tanganing ako magpatotoo sa katotoohan.” (Juan 18:37) Isinugo ni Jehova si Jesus na maghulit kan maogmang bareta, asin si Jesus naogmang marhay na gibohon iyan huling namomotan nia an saiyang langitnon na Ama. (Luc. 4:18, 19) Si Jesus may pagkamoot man sa mga tawo. Aram nia na masakit an buhay ninda. Kaagid kaiyan, an satong pusoan asin daing takot na paghuhulit hararom na nakagamot sa pagkamoot sa Dios asin pagkamoot sa kapwa.—Mat. 22:36-40.
Pinapakosog Kita kan Banal na Espiritu na Maghulit na May Pagkapusoan
12. Ano an nagtao nin kagayagayahan sa enot na mga disipulo?
12 Sa suminunod na mga semana pagkagadan ni Jesus, an mga disipulo nagkaigwa nin dahelan na maggayagaya mantang idinadagdag ni Jehova sa sainda an mga naliligtas. Sa katunayan, sa saro sanang aldaw, may nabautismohan na mga 3,000 na Judio asin proselito hale sa dakol na nasyon na nagduman sa Jerusalem tanganing magselebrar nin Pentecostes! Sierto nanggad na pinag-orolayan ini sa Jerusalem! An Biblia nagsasabi: “An takot nagpoon na magdatong sa lambang kalag, asin dakol na ngangalasan asin tanda an nagpoon na mangyari paagi sa mga apostol.”—Gibo 2:41, 43.
13. Taano ta namibi an mga tugang na logod magin pusoan sinda, asin ano an resulta?
13 Sa grabeng kaanggotan, an mga namomoon sa relihion inarestar si Pedro asin Juan, ibinilanggo sinda nin magdamlag, asin pinagbotan sinda na dai magtaram manongod ki Jesus. Kan paluwason sinda, an duwa nagbareta sa mga tugang kun ano an nangyari, asin sinda gabos namibi manongod sa pagtumang na napapaatubang sa sainda, na nakikimaherak: “Jehova, . . . itogot mo sa saimong mga oripon na padagos na magtaram kan saimong tataramon na may bilog na pagkapusoan.” An resulta? “Sinda gabos napano kan banal na espiritu asin nagtaram kan tataramon nin Dios na may pagkapusoan.”—Gibo 4:24-31.
14. Paano kita tinatabangan kan banal na espiritu sa satong paghuhulit?
14 Mangnohon na an makapangyarihan na banal na espiritu ni Jehova an nagtabang sa mga disipulo na magtaram kan tataramon nin Dios na may pagkapusoan. Bako sa sato nakadepende an kosog nin boot na sabihon sa iba an katotoohan, pati na sa mga nagkokontra sa satong mensahe. Puedeng itao asin talagang itatao sa sato ni Jehova an saiyang banal na espiritu kun hahagadon niato iyan sa saiya. Sa tabang ni Jehova, ikakapaheling man niato an pagkapusoan na kaipuhan tanganing magin mapanggana sa atubangan nin ano man na pagtumang.—Basahon an Salmo 138:3.
An mga Kristiano Ngonyan Naghuhulit na May Pagkapusoan
15. Paano nababanga an mga tawo ngonyan huli sa katotoohan?
15 Sa satong panahon, siring kan mga nakaagi, padagos na nababanga an mga tawo huli sa katotoohan. An nagkapira naghihimate, mantang an iba dai nasasabotan ni inaapresyar an satong paagi nin pagsamba. May mga nagkikritika, nag-oolog-olog, o naoongis pa ngani sa sato, arog kan ihinula ni Jesus. (Mat. 10:22) Kun beses, kita nagigin punteriya nin salang impormasyon asin maraot an intension na propaganda paagi sa media. (Sal. 109:1-3) Pero, sa bilog na daga, an banwaan ni Jehova may pagkapusoan na nagpapahayag kan maogmang bareta.
16. Anong eksperyensia an nagpapaheling na an pagkapusoan puedeng makapabago sa pagmansay kan mga hinuhulitan niato?
16 An satong pagkapusoan puedeng magin dahelan na mabago an pagmansay kan mga tawo manongod sa mensahe kan Kahadean. An sarong Saksing babae sa Kyrgyzstan nag-estorya: “Mantang ako naghuhulit, an sarong kagharong nagsabi sa sako: ‘Nagtutubod ako sa Dios alagad bako sa Dios kan mga Kristiano. Kun magbalik ka pa sa trangkahan na ini, ipapakagat taka sa ayam ko!’ Nasa likod nia an dakulang bulldog na nakakadena. Alagad durante kan kampanya na pagdistribwir kan Kingdom News No. 37, na ‘Harani Na an Katapusan kan Falsong Relihion!,’ nagdesisyon akong balikan an harong na idto na naglalaom na may maabotan na iba pang miembro kan pamilya kan lalaki. Minsan siring, an iyo man sanang lalaki an nagbukas kan pinto. Namibi tolos ako ki Jehova dangan nagsabi: ‘Kumusta na kamo, nagigirumdoman ko an pag-oolay niato tolong aldaw na an nakaagi, asin nagigirumdoman ko man an ayam nindo. Alagad dai ko kayang lampasan kamo huli ta arog nindo, nagtutubod ako sa solamenteng tunay na Dios. Sa dai na mahahaloy kakastigohon nin Dios an mga relihion na naglalapastangan sa saiya. Dakol pa an manonodan nindo manongod dian kun babasahon nindo ini.’ Napangalas ako na inako kan lalaki an Kingdom News. Dangan nagpasiring na ako sa ibang harong. Pakalihis nin pira sanang minuto, an lalaki nagdadalagan na nagdolok sa sako kapot an Kingdom News. ‘Binasa ko ini,’ an sabi nia. ‘Ano an kaipuhan kong gibohon tanganing dai ko saparon an grabeng kaanggotan nin Dios?’” Naponan an sarong pag-adal sa lalaki, asin nagpoon na siang mag-atender sa Kristianong mga pagtiripon.
17. Paano an pagkapusoan nin sarong Saksing babae nakapakosog sa sarong natatakot na inaadalan sa Biblia?
17 An satong pagkapusoan makakadagka man sa iba na magin pusoan. Sa Rusya an sarong Saksing babae na nakasakay sa bus nag-alok nin magasin sa kapwa pasahero. Sa puntong iyan, sarong lalaki an nagbuhat sa tukawan nia, inagaw an magasin sa kamot kan tugang, kinurumos iyan, asin iinapon sa salog. Mantang minumuda sia nin makosog kan lalaki, pirit kaining hinagad an adres kan tugang asin pinatanidan sia na dai maghulit sa lugar na idto. An tugang namibi ki Jehova para sa tabang asin ipinagirumdom sa sadiri nia an mga tataramon ni Jesus: “Dai kamo matakot sa mga minagadan kan hawak.” (Mat. 10:28) Kalmado siang nagtindog asin nagsabi sa lalaki, “Dai ko itatao saimo an adres ko, asin padagos akong mahulit digdi.” Dangan nagbaba na sia sa bus. Dai aram kan tugang na saro palan sa inaadalan nia sa Biblia an nakasakay man sa bus na idto. An pagkatakot sa tawo an nakaolang sa inaadalan na iyan sa Biblia kaya dai sia nag-aatender sa Kristianong mga pagtiripon. Minsan siring, pagkatapos na maheling an pagkapusoan kan satong tugang, nagdesisyon sia na maatender na sia sa mga pagtiripon.
18. Ano an makakatabang sa saindo na maghulit na may pagkapusoan, arog ni Jesus?
18 Sa kinaban na ini na siblag sa Dios, kaipuhan na magpakapusoan tanganing makapaghulit arog ni Jesus. Ano an makakatabang sa saindo na magibo iyan? Tumanaw sa ngapit. Papagdanayon na makosog an pagkamoot nindo sa Dios asin sa kapwa. Mamibi ki Jehova para sa kosog nin boot. Pirmeng girumdomon na nungka kamong nagsosolo, huling si Jesus kaiba nindo. (Mat. 28:20) Papakosogon kamo kan banal na espiritu. Asin bebendisyonan saka susuportaran kamo ni Jehova. Kun siring, logod na magin makosog an boot niato asin magsabi: “Si Jehova an sakong paratabang; dai ako matatakot. Ano an magigibo sa sako nin tawo?”—Heb. 13:6.
Ano an Isisimbag Nindo?
• Taano ta kaipuhan na magpakapusoan an mga lingkod nin Dios?
• Kun dapit sa pagigin pusoan, ano an manonodan niato . . .
sa mga maimbod na nabuhay bago ki Cristo?
ki Jesu-Cristo?
sa enot na mga Kristiano?
sa mga kapwa Kristiano ngonyan?
[Mga Hapot Para sa Pag-adal]
[Ritrato sa pahina 21]
Daing takot na ibinuyagyag ni Jesus an mga namomoon sa relihion
[Ritrato sa pahina 23]
Tinatawan kita ni Jehova nin kosog nin boot na maghulit