Kristianong mga Pamilya—Sunodon an Halimbawa ni Jesus!
Kristianong mga Pamilya—Sunodon an Halimbawa ni Jesus!
‘Si Cristo nagwalat sa saindo nin modelo tanganing sunodon nindo nin estrikto an saiyang mga lakad.’—1 PED. 2:21.
1. (a) Ano an nagin papel kan Aki nin Dios sa paglalang? (b) Ano an namamatean ni Jesus para sa katawohan?
KAN ginibo nin Dios an kalangitan asin an daga, kataed nia an saiyang panganay na Aki “bilang pangenot na trabahador.” An Aki nin Dios nakikooperar man sa saiyang Ama kan disenyohon asin lalangon ni Jehova an kadakol na manlaenlaen na hayop saka pananom digdi sa daga asin kan andamon Nia an Paraiso na magigin erokan kan mga linalang na ginibo sa ladawan ni Jehova asin kasugad nia. An Aki nin Dios, na kan huri namidbid sa ngaran na Jesus, igwa nin dakulang pagkamoot sa katawohan. “An mga bagay na [saiyang] ikinakaogma yaon sa mga aki nin mga tawo.”—Tal. 8:27-31; Gen. 1:26, 27.
2. (a) Paano itinatao ni Jehova an mga pangangaipo kan bakong sangkap na katawohan? (b) Ano an sarong kabtang nin buhay na dian nagtatao nin paggiya an Biblia?
2 Pagkatapos na magkasala an enot na tawong mag-agom, nagin mahalagang kabtang kan katuyohan ni Jehova an pagbalukat sa makasalan na katawohan. Itinao ni Jehova an atang na pantubos ni Cristo tanganing magin posible an pagbalukat na iyan. (Roma 5:8) Apuera kaini, itinao ni Jehova an saiyang Tataramon, an Biblia, na nagtatao nin giya sa tawo kun paano magigin mapanggana sa buhay sa ibong kan minanang pagkabakong sangkap. (Sal. 119:105) Sa saiyang Tataramon, nagtatao si Jehova nin paggiya tanganing tabangan an mga tawo na mapagdanay na makosog asin maogma an saindang pamilya. Mapadapit sa pag-agom, an libro nin Genesis nagsasabi na an lalaki dapat na “magdanay sa saiyang agom na babae asin sinda dapat na magin sarong laman.”—Gen. 2:24.
3. (a) Ano an itinokdo ni Jesus manongod sa pag-agom? (b) Ano an pag-oolayan niato sa artikulong ini?
3 Durante kan saiyang ministeryo sa daga, idinoon ni Jesus na an katuyohan kan pag-agoman magin permanente. Nagtokdo sia nin mga prinsipyo na kun iaaplikar, makakatabang sa mga miembro kan pamilya na malikayan an mga ugale asin paggawe na nagsasapeligro kan saindang pag-agoman o kan kaogmahan kan saindang pamilya. (Mat. 5:27-37; 7:12) Totokaron kan artikulong ini kun paanong an mga katokdoan ni Jesus asin an halimbawa na ipinaheling nia kan sia nasa daga makakatabang sa mga agom na lalaki, agom na babae, magurang, asin aki na mabuhay na maogma saka kontento.
Kun Paano Tinatawan nin Onra kan Kristianong Agom na Lalaki an Saiyang Agom
4. Ano an pagkakaagid kan papel ni Jesus asin kan papel kan Kristianong mga agom na lalaki?
4 Inasignaran nin Dios an agom na lalaki bilang payo kan pamilya, kun paanong si Jesus iyo an Payo kan kongregasyon. Si apostol Pablo nagsabi: “An agom na lalaki iyo an payo kan saiyang agom na babae kun paanong an Cristo iyo man an payo kan kongregasyon, mantang sia an paraligtas kan hawak na ini. Mga agom na lalaki, padagos nindong mamotan an saindong agom na babae, kun paanong namotan man kan Cristo an kongregasyon asin itinao an saiyang sadiri para dian.” (Efe. 5:23, 25) Tunay nanggad, an pagtratar ni Jesus sa saiyang mga parasunod nagseserbing pamantayan kun paano kaipuhan na trataron kan Kristianong mga lalaki an saindang agom. Pag-olayan niato an nagkapira sa mga paagi na ginamit ni Jesus an autoridad na itinao sa saiya nin Dios.
5. Paano ginamit ni Jesus an saiyang autoridad sa mga disipulo nia?
5 Si Jesus “mahoyo asin may kababaan an puso.” (Mat. 11:29) Sia alisto man sa paghiro. Dai nia noarin man pinabayaan an saiyang mga paninimbagan. (Mar. 6:34; Juan 2:14-17) Maboot siang nagtao nin hatol sa mga disipulo nia, dawa paorootro kun kaipuhan. (Mat. 20:21-28; Mar. 9:33-37; Luc. 22:24-27) Pero, dai sinda inanggotan o sinupog ni Jesus, ni ipinamate man nia sa sainda na dai sinda namomotan o dai ninda kayang gibohon an itinotokdo nia sa sainda. Imbes, inomaw asin minotibar nia an saiyang mga disipulo. (Luc. 10:17-21) Bakong makangangalas na nakua ni Jesus an paggalang kan saiyang mga disipulo huli sa mamomoton asin mapagmalasakit na pagtratar nia sa sainda!
6. (a) Ano an manonodan nin agom na lalaki sa paagi nin pagtratar ni Jesus sa saiyang mga disipulo? (b) Dinadagka ni Pedro an mga agom na lalaki na gibohon an ano?
6 An halimbawa ni Jesus nagtotokdo sa mga agom na lalaki na an Kristianong pagkapayo bakong katongdan para sa maringis na pagdominar. Imbes, iyan katongdan na may paggalang asin mapagsakripisyong pagkamoot. Dinagka ni apostol Pedro an mga agom na lalaki na arogon an pagigin mamomoton ni Jesus paagi sa ‘pakikiiba sa saindang agom sa siring na paagi, na tinatawan sinda nin onra.’ (Basahon an 1 Pedro 3:7.) Kun siring, paano puedeng gamiton nin agom na lalaki an saiyang autoridad na, kadungan kaiyan, tinatratar man an saiyang agom bilang saro na maninigong tawan nin onra?
7. Sa anong paagi matatawan nin onra kan agom na lalaki an saiyang agom? Iilustrar.
7 An sarong paagi na matatawan nin onra kan agom na lalaki an saiyang agom iyo an maingat na pagkonsiderar sa punto de vista asin saboot kan agom na babae bago maggibo nin mga desisyon na makakaapektar sa pamilya. Tibaad kaipuhan na magdesisyon mapadapit sa pagbalyo nin istaran o pagbago nin trabaho o mapadapit sa pangaroaldaw na mga bagay, arog baga kan kun saen mabakasyon o kun paano liliwaton an badyet kan pamilya tanganing makayanan an naglalangkaw na presyo nin mga barakalon. Huling maaapektaran an pamilya, makakarahay asin magigin maboot para sa agom na lalaki na konsideraron an opinyon kan agom nia, ta puedeng makatabang iyan sa saiya na makagibo nin timbang patin mas makonsiderasyon na desisyon, saka magigin mas madali para sa agom nia na suportaran sia. (Tal. 15:22) An Kristianong mga agom na lalaki na nagtatao nin onra sa saindang agom nagkakamit bako sanang kan pagkamoot asin paggalang kan saindang agom kundi, mas mahalaga, kan pag-oyon ni Jehova.—Efe. 5:28, 29.
Kun Paano Nagpapaheling nin Hararom na Paggalang an Agom na Babae sa Saiyang Agom
8. Taano ta dai dapat arogon an halimbawa ni Eva?
8 Si Jesus an sangkap na modelo kan Kristianang mga agom sa pagpasakop sa autoridad. Dakula nanggad an pagkakalaen kan pagmansay nia sa autoridad asin kan saboot na ipinaheling kan enot na agom na babae! Si Eva dai nagin marahay na modelo para sa mga agom na babae. Igwa sia nin payo na inasignaran ni Jehova asin ginamit Nia sa pagtao nin instruksion. Pero, dai iginalang ni Eva an areglong ini. Dai nia inako an instruksion na sinabi sa saiya ni Adan. (Gen. 2:16, 17; 3:3; 1 Cor. 11:3) Totoo, nadaya si Eva; pero maninigo kutanang kinonsulta nia an saiyang agom kun tama na himateon an tingog na nagsasabing nakakaaram daa kan ‘aram nin Dios.’ Imbes, sia nangahas na pangenotan an saiyang agom.—Gen. 3:5, 6; 1 Tim. 2:14.
9. Anong halimbawa nin pagigin mapagpasakop an itinao ni Jesus?
9 Sa kabaliktaran, si Jesus nagtao nin sangkap na modelo nin pagpasakop sa saiyang Payo. An saiyang saboot asin pamumuhay nagpapaheling na sia “dai nag-isip na mang-agaw, an boot sabihon, na sia makapantay sa Dios.” Sa kabaliktaran, “sia nagpakadai sa sadiri asin nagpakang-oripon.” (Fil. 2:5-7) Ngonyan, bilang namamahalang Hade, iyan pa man giraray an saboot ni Jesus. Mapakumbaba siang nagpapasakop sa saiyang Ama sa gabos na bagay asin sinusuportaran nia an Saiyang pagkapayo.—Mat. 20:23; Juan 5:30; 1 Cor. 15:28.
10. Paano masusuportaran nin agom na babae an pagkapayo kan saiyang agom?
10 Marahay na arogon si Jesus nin Kristianang agom paagi sa pagsuportar sa pagkapayo kan saiyang agom. (Basahon an 1 Pedro 2:21; 3:1, 2.) Estudyare an sarong situwasyon na may oportunidad siang gibohon ini. An saiyang aking lalaki nagpapaaram na mapartisipar sa sarong aktibidad na kaipuhan an permiso nin magurang. Huling an bagay na iyan dai pa napapag-olayan kan mga magurang, angay sana na ihapot kan ina, “Nagpaaram ka na ki Papa mo?” Kun dai pa, maninigong ipakipag-olay nia iyan sa saiyang agom bago gumibo nin ano man na desisyon. Dugang pa, lilikayan nanggad kan Kristianang agom na kontrahon an agom nia o kuestionon an opinyon kaini sa atubangan kan saindang mga aki. Kun dai sia oyon sa saiyang agom manongod sa sarong bagay, makikipag-olay sia sa saiyang agom na sinda sanang duwa.—Efe. 6:4.
An Halimbawa ni Jesus Para sa mga Magurang
11. Anong halimbawa an itinao ni Jesus para sa mga magurang?
11 Minsan ngani si Jesus dai nag-agom o nagkaigwa nin mga aki, sia marahayon na modelo para sa Kristianong mga magurang. Taano man? Mamomoton asin mapasensia niang tinokdoan an saiyang mga disipulo paagi sa tataramon asin halimbawa. Ipinaheling nia sa sainda kun paano isasagibo an isinugo nia sa sainda. (Luc. 8:1) An pagtratar ni Jesus sa mga disipulo nia nagtokdo sa sainda kun paano ninda dapat trataron an lambang saro.—Basahon an Juan 13:14-17.
12, 13. Ano an kaipuhan kun gusto nin mga magurang na dumakula an mga aki na may takot sa Dios?
12 May tendensia an mga aki na arogon an saindang mga magurang, iyan man marahay o maraot. Kaya, mga magurang, ihapot sa saindong sadiri: ‘Ano an ipinapasabot mi sa samong mga aki kun dapit sa kadakolan nin oras na ginagamit mi sa pagheling nin TV saka sa pag-aling-aling asin siring man sa samong pag-adal sa Biblia patin pakikikabtang sa paglilingkod sa langtad? Ano talaga an mga prioridad kan samong pamilya? Kami daw nagtatao nin marahay na halimbawa paagi sa pagsentro kan samong buhay asin mga desisyon sa tunay na pagsamba?’ An ley nin Dios dapat na yaon nguna sa puso mismo kan mga magurang kun gusto nindang dumakula an mga aki na may takot sa Dios.—Deut. 6:6.
13 Kun nagmamaigot an mga magurang na iaplikar an mga prinsipyo sa Biblia sa pangaroaldaw na mga bagay, maheheling ini kan mga aki ninda. Magkakaigwa nin puersa an mga tataramon asin pagtotokdo kan mga magurang. Minsan siring, kun marisa kan mga aki na dai sinusunod kan mga magurang an mga pamantayan na itinatao ninda sa mga aki, tibaad magkongklusyon sinda na an mga prinsipyo sa Biblia bako man talagang mahalaga o praktikal. Bilang resulta, tibaad dai malabanan kan mga aki an impluwensia kan kinaban.
14, 15. Anong mga prinsipyo sa buhay an maninigong pataluboon nin mga magurang sa saindang mga aki, asin ano an sarong paagi na magigibo ninda ini?
14 Nasasabotan kan Kristianong mga magurang na bako sanang pagtao nin materyal na mga pangangaipo an kalabot sa pagpadakula sa aki. Kun siring, bako nanggad madonong na tokdoan an aki na magmaigot na aboton an mga pasohan na para sana sa saiyang materyal na bentaha. (Ecl. 7:12) Tinokdoan ni Jesus an saiyang mga disipulo na tawan nin prioridad an espirituwal na mga prinsipyo sa buhay asin mga gibohon. (Mat. 6:33) Kun siring, bilang pag-arog ki Jesus, maninigo man na pagmaigotan kan Kristianong mga magurang na pataluboon sa saindang mga aki an pagmawot na aboton an espirituwal na mga pasohan.
15 An sarong paagi na magigibo ini kan mga magurang iyo an paghanap nin mga oportunidad na makaasosyar kan saindang mga aki an mga nasa bilog na panahon na paglilingkod. Isip-isipa kun gurano kanakakadagka sa mga tinedyer na makamidbid an mga payunir o an paraataman sa sirkito asin an saiyang agom. An nagdadalaw na mga misyonero, Bethelite, asin an mga nagtatrabaho sa internasyonal na pagtogdok puedeng entusiastikong mag-estorya manongod sa mga kagayagayahan nin paglilingkod ki Jehova. Daing duwa-duwa na an siring na mga bisita igwang ikakaestorya na interesanteng mga eksperyensia. An saindang halimbawa nin mapagsakripisyong paglilingkod puedeng makatabang na marhay sa mga aki nindo na makagibo nin madonong na mga desisyon, magkaigwa nin kaomaw-omaw na mga pasohan, asin kumua nin angay na edukasyon tanganing masuportaran an saindang sadiri sa bilog na panahon na paglilingkod.
Mga Aki—Ano an Makakatabang sa Saindo na Sunodon an Halimbawa ni Jesus?
16. Paano tinawan ni Jesus nin onra an saiyang mga magurang digdi sa daga asin an saiyang Ama sa langit?
16 Mga aki, si Jesus nagtatao man nin marahayon na halimbawa para sa saindo. Si Jesus ipinagkatiwala sa pangangataman ni Jose asin Maria, asin kinuyog nia sinda. (Basahon an Lucas 2:51.) Aram nia na, sa ibong kan pagkabakong sangkap ninda, ipinagkatiwala sa sainda nin Dios an paninimbagan na atamanon sia. Huli kaiyan, dapat sindang tawan nin onra. (Deut. 5:16; Mat. 15:4) Kan si Jesus nasa edad na, pirme niang ginigibo an mga bagay na nakakapaogma sa saiyang Ama sa langit. Iyan nangahulogan na kaipuhan niang labanan an sugot. (Mat. 4:1-10) Kun beses, kamong mga hoben tibaad garo gusto nindong sumuway sa saindong mga magurang. Kaya, ano an makakatabang sa saindo na sunodon an halimbawa ni Jesus?
17, 18. (a) Anong klaseng impluwensia an napapaatubang sa mga hoben sa eskuelahan? (b) Makakatabang sa mga hoben na malabanan an mga pagbalo kun gigirumdomon ninda an ano?
17 Posibleng marhay na an kadaklan sa mga kaeskuela mo kadikit o mayong pagpahalaga sa mga pamantayan kan Biblia. Tibaad probaran nindang piriton ka na magpartisipar sa kuestionableng mga aktibidad asin tuyatuyaon ka kun ika magsayuma. Binabansagan ka daw kan mga kaeskuela mo huli ta habo mong magpartisipar sa sainda sa nagkapirang aktibidad? Kun iyo, ano an reaksion mo? Aram mo na kun mapadaog ka sa takot asin aarogon mo an ginigibo kan kadaklan, mamomondo sa saimo an saimong mga magurang asin si Jehova. Ano an mangyayari sa saimo kun susunodon mo an saimong mga kaeskuela? Tibaad igwa ka nin nagkapirang pasohan, arog kan pagigin payunir o ministeryal na lingkod, pagigin Bethelite, o paglilingkod sa teritoryo na mas nangangaipo nin mga parahayag kan Kahadean. Makakatabang daw an pakikiibaiba sa saimong mga kaeskuela na maabot an saimong mga pasohan?
18 Kamong mga hoben sa Kristianong kongregasyon, napapaatubang daw kamo sa mga situwasyon na nababalo an saindong pagtubod? Ano an gigibohon nindo? Isipon nindo an saindong modelo, si Jesus. Dai sia nagpadaog sa sugot asin marigon siang nanindogan sa aram niang tama. Kun gigirumdomon nindo ini, magkakaigwa kamo nin kosog nin boot na malinaw na sabihon sa mga kaeskuela nindo na habo nindong makiiba sa sainda sa paggibo nin sarong bagay na aram nindong sala. Arog ni Jesus, papagdanayon na nakasentro an saindong isip sa bilog na buhay na oportunidad na magayagayang paglingkodan asin kuyogon si Jehova.—Heb. 12:2.
An Pinakaliabe sa Maogmang Buhay Pampamilya
19. Anong paagi nin pamumuhay an nagtatao nin tunay na kaogmahan?
19 An gusto ni Jehova Dios asin ni Jesu-Cristo iyo an pinakamarahay para sa katawohan. Dawa bako kitang sangkap, puede man kitang magin maogma. (Isa. 48:17, 18; Mat. 5:3) Si Jesus nagtokdo nin espirituwal na mga katotoohan na nagin basehan kan kaogmahan nin katawohan, alagad bako sana iyan an ipinaabot nia sa saiyang mga disipulo. Itinokdo man ni Jesus an pinakamarahay na paagi nin pamumuhay. Dugang pa dian, nagwalat sia nin praktikal na halimbawa nin timbang na pamumuhay asin timbang na kaisipan. Ano man an papel niato sa pamilya, gabos kita makikinabang sa pagsunod sa saiyang halimbawa. Kaya, mga agom na lalaki, mga agom na babae, mga magurang, asin mga aki, sunodon an halimbawa ni Jesus! An pag-ako sa mga katokdoan ni Jesus asin an pag-arog sa saiyang halimbawa totoo nanggad na iyo an pinakaliabe sa pagkamit nin nakakakontento asin maogmang buhay pampamilya.
Ano an Isisimbag Nindo?
• Paano maninigong gamiton kan mga agom na lalaki an autoridad na itinao sa sainda nin Dios?
• Paano maaarog kan agom na babae an halimbawa ni Jesus?
• Ano an manonodan kan mga magurang sa paagi nin pagtratar ni Jesus sa saiyang mga disipulo?
• Ano an manonodan kan mga hoben sa halimbawa ni Jesus?
[Mga Hapot Para sa Pag-adal]
[Ritrato sa pahina 8]
Bago maggibo nin desisyon na makakaapektar sa pamilya, ano an gigibohon nin mamomoton na agom na lalaki?
[Ritrato sa pahina 9]
Anong situwasyon an nagtatao nin oportunidad sa agom na babae na suportaran an pagkapayo kan saiyang agom?
[Ritrato sa pahina 10]
Inaarog nin mga aki an marahay na mga ugale kan saindang mga magurang