Paghanap sa mga Kayamanan na “Maingat na Nakatago sa Saiya”

“Maingat na nakatago sa saiya an gabos na kayamanan na kadonongan asin kaaraman.”—COL. 2:3.

1, 2. (a) Anong suanoy na mga bagay an nadiskobre kan 1922, asin haen na iyan ngonyan? (b) An Tataramon nin Dios nag-aagda sa gabos na gibohon an ano?

PARATENG nagigin headline nin mga bareta kun may nadidiskobreng nakatagong mga kayamanan. Halimbawa, kan 1922, pakalihis nin dakol na taon nin maingat na gayong pagtrabaho sa masakit na mga kamugtakan, may pambihirang nadiskobre an Britanong arkeologo na si Howard Carter. Nanompongan nia an haros bilog pang linobngan ki Faraon Tutankhamen, na may laog na haros 5,000 na suanoy na bagay.

² Minsan ngani pambihira an nadiskobre ni Carter, an kadaklan sa suanoy na mga bagay na nanompongan nia yaon na ngonyan sa mga museo o sa pribadong mga koleksion. Puedeng igwa iyan nin historiko o artistikong halaga, alagad kadikit o mayo iyan nin epekto sa satong aroaldaw na buhay. Minsan siring, inaagda kita kan Tataramon nin Dios na hanapon an mga kayamanan na talagang may epekto sa sato. Inaagda an gabos, asin an balos mas bawi nanggad kisa sa ano man na materyal na kayamanan.—Basahon an Talinhaga 2:1-6.

3. Taano ta kapakipakinabang an mga kayamanan na isinasadol ni Jehova na hanapon kan mga nagsasamba sa saiya?

³ Estudyare an halaga kan mga kayamanan na isinasadol ni Jehova na hanapon kan mga nagsasamba sa saiya. Kaiba sa siring na mga kayamanan “an pagkatakot ki Jehova,” na puedeng magprotehir asin mag-ingat sa sato sa delikadong mga panahon na ini. (Sal. 19:9) Paagi sa pakanompong sa “mismong kaaraman nin Dios,” puedeng mapasato an pinakadakulang onra na puedeng kamtan nin siisay man na tawo—an dayupot asin personal na relasyon sa Kaharohalangkawe. Asin paagi sa itinatao nin Dios na kayamanan na kadonongan, kaaraman, asin pakabatid, mapanggana niatong maaatubang an mga problema asin kahaditan sa satong aroaldaw na buhay. (Tal. 9:10, 11) Paano niato mahahanap an siring kahalagang mga kayamanan?

Paghanap sa Espirituwal na mga Kayamanan

4. Paano niato manonompongan an mga kayamanan na ipinanuga nin Dios?

⁴ Bakong arog nin mga arkeologo asin iba pang eksplorador na parateng kaipuhan na maghanap nin mga kayamanan sa gabos na lugar, aram niato nin eksakto kun saen manonompongan an espirituwal na mga kayamanan. Arog nin sarong mapa nin kayamanan, itinotokdo sa sato kan Tataramon nin Dios an eksaktong lugar kun saen niato manonompongan an mga kayamanan na ipinanuga nin Dios. Sa pagtaram manongod ki Cristo, si apostol Pablo nagsurat: “Maingat na nakatago sa saiya an gabos na kayamanan na kadonongan asin kaaraman.” (Col. 2:3) Mantang binabasa niato an mga tataramon na iyan, puede niatong ihapot: ‘Taano ta maninigo niatong hanapon an mga kayamanan na iyan? Paano iyan “nakatago” ki Cristo? Asin paano niato iyan hahanapon?’ Tanganing maaraman an simbag, maingat niatong siyasaton an mga tataramon kan apostol.

5. Taano ta nagsurat si Pablo manongod sa espirituwal na mga kayamanan?

⁵ Isinurat ni Pablo an mga tataramon na iyan sa saiyang mga kapwa Kristiano sa Colosas. Sinabi nia sa sainda na sia maigot na naghihingoa para sa sainda tanganing ‘maranga an saindang puso asin sinda oroyon na mabogkos sa pagkamoot.’ (Basahon an Colosas 2:1, 2.) Taano ta siring na sana an pagmakolog nia? Malinaw nanggad, aram ni Pablo na an mga tugang duman puedeng naimpluwensiahan na kan nagkapira sa kairiba ninda na nagpapalakop nin nagkapirang pilosopiyang  Griego o nag-eengganyar na bumalik sa pag-otob sa Ley ni Moises. Marigon niang pinatanidan an mga tugang: “Mag-ingat kamo: tibaad may saro na makadara sa saindo bilang saiyang biktima paagi sa pilosopiya asin daing kamanungdanan na pandadaya segun sa tradisyon nin mga tawo, segun sa pundamental na mga bagay kan kinaban asin bakong segun ki Cristo.”—Col. 2:8.

6. Taano ta maninigo kitang magin interesado sa hatol ni Pablo?

⁶ Ngonyan, napapaatubang kita sa kaagid na mga impluwensia ni Satanas asin kan saiyang maraot na sistema. An kinabanon na mga pilosopiya, kaiba an sekular na kaisipan na nakasentro sa intereses nin tawo asin an teoriya nin ebolusyon, nakakaimpluwensia sa pag-iisip, moral, mga pasohan, asin estilo nin pamumuhay kan mga tawo. An falsong relihion may dakulang papel sa dakol na popular na selebrasyon nin kapiestahan. Pinapanigoan kan industriya nin aling-alingan an marigsok na mga hilig kan makasalan na laman, asin an kadaklan na laog kan Internet totoong peligroso para sa mga hoben asin gurang. An danay na pagkalantad sa mga ini asin sa iba pang kinabanon na mga uso madaling makaapektar sa satong mga saboot asin kaisipan dapit sa paggiya na itinatao ni Jehova, na mapangyari na humaluag an satong marigon na pangangapot sa tunay na buhay. (Basahon an 1 Timoteo 6:17-19.) Malinaw nanggad, kaipuhan na saboton niato an kahulogan kan mga tataramon ni Pablo sa mga taga Colosas asin isapuso an hatol nia kun habo niatong mabiktima kan tusong mga pakana ni Satanas.

7. Anong duwang bagay an sinabi ni Pablo na makakatabang sa mga taga Colosas?

⁷ Kun babalikan niato an mga tataramon ni Pablo sa mga taga Colosas, maririsa niato na pagkatapos niang sambiton an ikinakahadit nia, may sinabi siang duwang bagay na makakatabang sa sainda na maranga asin magkasararo sa pagkamoot. Enot, sinambit nia an “bilog na kasiertohan kan saindang pakasabot.” Kaipuhan na sinda biyong kombensido na tama an pakasabot ninda sa Kasuratan, tanganing an saindang pagtubod magin nakabasar sa seguradong pundasyon. (Heb. 11:1) Dangan, sinambit nia an “tamang kaaraman manongod sa sagradong hilom nin Dios.” Labi pa sa pundamental na kaaraman manongod sa katotoohan an kaipuhan ninda. Kaipuhan man nindang magkaigwa nin malinaw na pakasabot sa mas hararom na mga bagay nin Dios. (Heb. 5:13, 14) Marahayon nanggad na hatol para sa mga taga Colosas asin para sa sato ngonyan! Pero, paano kita magkakaigwa nin siring na kasiertohan asin tamang kaaraman? Itinao ni Pablo an simbag sa hararom na sinabi nia manongod ki Jesu-Cristo: “Maingat na nakatago sa saiya an gabos na kayamanan na kadonongan asin kaaraman.”

Mga Kayamanan na “Nakatago” ki Cristo

8. Ipaliwanag an kahulogan kan mga tataramon na “nakatago” ki Cristo.

⁸ Pagsinabing an gabos na kayamanan na kadonongan asin kaaraman “nakatago” ki Cristo, dai boot sabihon na iyan garo nakakandado, dai makukua nin siisay man. Imbes, nangangahulogan sana iyan na tanganing manompongan an mga kayamanan, dapat na kita maigot na marhay na maghingoa, asin dapat na isentro an satong atension ki Jesu-Cristo. Kaoyon ini kan sinabi ni Jesus manongod sa saiya mismo: “Ako iyo an dalan asin an katotoohan patin an buhay. Mayo nin makakaduman sa Ama kun bakong paagi sa sako.” (Juan 14:6) Iyo, tanganing manompongan an kaaraman nin Dios, dapat na aprobetsaran niato an tabang asin paggiya na itinatao ni Jesus.

9. Anong mga papel an iinasignar ki Jesus?

⁹ Apuera sa pagigin “an dalan,” sinabi ni Jesus na sia “an katotoohan patin an buhay.” Nagpaparisa ini na an papel nia bako sana nanggad bilang paagi tanganing makadolok sa Ama. Si Jesus igwa man nin mga papel na mahalagang marhay tanganing masabotan an katotoohan sa Biblia asin kamtan an buhay na daing katapusan. Totoo nanggad, nakatago ki Jesus an espirituwal na mga kayamanan na daing kapareho sa halaga, na naghahalat na madiskobre kan maingat na mga nag-aadal sa Biblia. Siyasaton niato an nagkapira sa mga kayamanan na direktang may epekto sa satong paglaom sa ngapit asin sa satong relasyon sa Dios.

10. Ano an manonodan niato manongod ki Jesus sa Colosas 1:19 asin 2:9?

¹⁰ “Yaon sa saiya an bilog na kapanoan kan kualidad nin Dios.” (Col. 1:19; 2:9) Huling nakaiba ni Jesus an saiyang langitnon na Ama sa laog nin haloyon na panahon, mas aram niang marhay kisa siisay man an personalidad asin kabotan nin Dios.  Sa bilog na ministeryo ni Jesus sa daga, itinokdo nia sa iba an itinokdo sa saiya kan saiyang Ama. Ipinaheling man nia sa saiyang mga gawe-gawe an mga kualidad na itinokdo sa saiya kan saiyang Ama. Kaya puedeng sabihon ni Jesus: “Sia na nakaheling sa sako nakaheling man sa Ama.” (Juan 14:9) An gabos na kadonongan asin kaaraman nin Dios nakatago, o yaon, ki Cristo, asin mayo na nin mas marahay na paagi na manodan niato an manongod ki Jehova apuera sa maingat na pag-adal kan gabos na kaya niatong manodan manongod ki Jesus.

11. Ano an koneksion ni Jesus sa mga hula sa Biblia?

¹¹ “An pagpatotoo ki Jesus iyo an katuyohan kan paghula.” (Kap. 19:10) An mga tataramon na iyan nagpaparisa na si Jesus an pangenot na may papel sa kaotoban kan dakol na hula sa Biblia. Poon sa enot na hula na sinabi ni Jehova, na nakasurat sa Genesis 3:15, sagkod sa mamuraway na mga bisyon sa libro nin Kapahayagan, an mga hula sa Biblia puede sanang masabotan nin tama kun eestudyaran an papel ni Jesus may koneksion sa Mesiyanikong Kahadean. Iyan an dahelan kun taano ta dakol sa mga hula sa Hebreong Kasuratan an masakit masabotan kan mga habong umako ki Jesus bilang ipinanugang Mesiyas. Iyan man an dahelan kun taano ta si Jesus ordinaryong tawo sana sa pagheling kan mga dai nagpapahalaga sa Hebreong Kasuratan, na igwa nin dakol na hula dapit sa Mesiyas. An kaaraman manongod ki Jesus nakakatabang sa banwaan nin Dios na masabotan an kahulogan kan mga hula sa Biblia na dai pa naootob.—2 Cor. 1:20.

12, 13. (a) Paanong si Jesus “an liwanag kan kinaban”? (b) Huling an mga parasunod ni Cristo pinatalingkas sa espirituwal na kadikloman, ano an obligasyon ninda?

¹² “Ako an liwanag kan kinaban.” (Basahon an Juan 8:12; 9:5.) Haloy pa bago mamundag si Jesus sa daga, si propeta Isaias naghula: “An banwaan na naglalakaw sa kadikloman nakaheling nin dakulang liwanag. Kun manongod sa mga nag-eerok sa daga na may mahibog na kadikloman, an liwanag mismo suminirang sa sainda.” (Isa. 9:2) Ipinaliwanag ni apostol Mateo na inotob ni Jesus an hulang iyan kan pinonan Niang maghulit asin magsabi: “Magsorolsol kamo, huli ta an kahadean kan kalangitan harani na.” (Mat. 4:16, 17) An ministeryo ni Jesus nakatabang sa mga tawo na magkaigwa nin espirituwal na kaliwanagan asin makatalingkas sa pagkaoripon sa falsong mga katokdoan sa relihion. “Ako nagdigdi bilang liwanag sa kinaban,” an sabi ni Jesus, “tanganing an lambang saro na  minatubod sa sako dai magdanay sa kadikloman.”—Juan 1:3-5; 12:46.

¹³ Pakalihis nin dakol na taon, sinabihan ni apostol Pablo an saiyang mga kapwa Kristiano: “Kamo kadikloman kaidto, alagad ngonyan kamo liwanag may koneksion sa Kagurangnan. Padagos kamong maglakaw bilang mga aki nin liwanag.” (Efe. 5:8) Huling pinatalingkas sa pagkaoripon sa espirituwal na kadikloman, an mga Kristiano may obligasyon na maglakaw bilang mga aki nin liwanag. Kaoyon ini kan sinabi ni Jesus sa saiyang mga parasunod sa Sermon sa Bukid: “Pasiranga an saindong liwanag sa atubangan nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” (Mat. 5:16) Pinapahalagahan daw nindong marhay an espirituwal na mga kayamanan na nanompongan nindo ki Jesus kaya irerekomendar nindo iyan sa iba, paagi sa tataramon sagkod sa saindong marahay na Kristianong paggawe?

14, 15. (a) Paano ginamit an mga karnero asin iba pang hayop may koneksion sa tunay na pagsamba kan mga panahon kan Biblia? (b) Taano ta si Jesus sarong kayamanan na daing kapareho sa saiyang papel bilang “Kordero nin Dios”?

¹⁴ Si Jesus “an Kordero nin Dios.” (Juan 1:29, 36) Sa bilog na Biblia, an mga karnero pirmeng ginagamit may koneksion sa kapatawadan nin kasalan asin sa pagdolok sa Dios. Halimbawa, pagkatapos na patunayan ni Abraham na andam niang idolot an aki niang si Isaac, sinabihan sia na dai nia pagkolgan si Isaac asin itinao sa saiya an sarong lalaking karnero bilang kasalida. (Gen. 22:12, 13) Kan an mga Israelita kaldahon sa Egipto, an mga karnero ginamit giraray sa mahalagang paagi, bilang kabtang na kan ‘paskua ni Jehova.’ (Ex. 12:1-13) Dugang pa, kahagadan sa Ley ni Moises an pag-atang nin manlaenlaen na hayop, kaiba an mga karnero asin kanding.—Ex. 29:38-42; Lev. 5:6, 7.

¹⁵ Mayo sa mga atang na iyan—an totoo, mayong atang na idinolot nin mga tawo—an makakatao nin permanenteng pagkabutas sa kasalan asin kagadanan. (Heb. 10:1-4) Sa ibong na lado, si Jesus “an Kordero nin Dios na naghahale kan kasalan kan kinaban.” Huli sa papel na ini ni Jesus, sia nagigin sarong kayamanan na mas mahalaga kisa sa ano man na materyal na kayamanan na nanompongan kasuarin man. Sa dahelan na iyan, marahay na magtao kita nin panahon tanganing maingat na pag-adalan an manongod sa pantubos asin magtubod sa marahayon na probisyon na iyan. Sa paggibo kaiyan, may paglaom kitang magkamit nin dakulaon na bendisyon asin balos—kamurawayan asin onra kaiba ni Cristo sa langit para sa “sadangoton na aripompon” asin buhay na daing katapusan sa Paraiso sa daga para sa “ibang mga karnero.”—Luc. 12:32; Juan 6:40, 47; 10:16.

16, 17. Taano ta mahalagang marhay na masabotan niato an papel ni Jesus bilang “Pangenot na Ahente asin Parasangkap kan satong pagtubod”?

¹⁶ Si Jesus an “Pangenot na Ahente asin Parasangkap kan satong pagtubod.” (Basahon an Hebreo 12:1, 2.) Sa Hebreo kapitulo 11, maheheling niato an mapuersang pagtokar ni Pablo manongod sa pagtubod, na kaiba an halipot na pakahulogan kaiyan asin ngaran nin arogan na mga lalaki asin babae na may pagtubod arog ni Noe, Abraham, Sara, asin Rahab. Nasa isip an gabos na ini, sinadol ni Pablo an saiyang mga kapwa Kristiano na “[magheling] nin maingat sa Pangenot na Ahente asin Parasangkap kan satong pagtubod, si Jesus.” Taano?

¹⁷ Minsan ngani may makosog na pagtubod sa panuga nin Dios an maimbod na mga lalaki asin babae na sinambit sa Hebreo kapitulo 11, dai ninda aram an gabos na detalye kun paano ootobon nin Dios an saiyang panuga paagi sa Mesiyas asin sa Kahadean. Huli kaiyan, bakong kompleto an saindang pagtubod. Sa katunayan, dawa an mga ginamit ni Jehova na magsurat kan dakol na hula dapit sa Mesiyas dai lubos na nasabotan an kahulogan kan isinurat ninda. (1 Ped. 1:10-12) Solamente paagi ki Jesus na an pagtubod puedeng magin sangkap, o kompleto. Mahalagang marhay nanggad na malinaw niatong masabotan asin  maaraman an papel ni Jesus bilang “Pangenot na Ahente asin Parasangkap kan satong pagtubod”!

Padagos na Maghanap

18, 19. (a) Sabihon an iba pang espirituwal na kayamanan na nakatago ki Cristo. (b) Taano ta maninigo na padagos kitang umasa ki Jesus tanganing manompongan an espirituwal na mga kayamanan?

¹⁸ Napag-olayan niato an pira sana sa mahalagang marhay na mga papel ni Jesus sa katuyohan nin Dios para sa pagligtas sa katawohan. Igwa nin iba pang espirituwal na kayamanan na nakatago ki Cristo. Kun manompongan niato iyan, magkakaigwa kita nin dakulang kaogmahan asin mga pakinabang. Halimbawa, inapod ni apostol Pedro si Jesus na “an Pangenot na Ahente nin buhay” asin “an bitoon sa aga” na nagsisirang. (Gibo 3:15; 5:31; 2 Ped. 1:19) Asin iinaplikar kan Biblia ki Jesus an terminong “Amen.” (Kap. 3:14) Aram daw nindo an kahulogan asin halaga kan mga papel na ini? Siring kan sinabi ni Jesus, “padagos na maghanap, asin makakakua kamo.”—Mat. 7:7.

¹⁹ Apuera ki Jesus, mayo na nin siisay man sa bilog na kasaysayan na an buhay panong marhay nin kahulogan asin konektadong marhay sa satong daing sagkod na ikakarahay. Nasa saiya an espirituwal na mga kayamanan na madaling makukua nin siisay man na bilog an pusong naghahanap kaiyan. Logod na magin kagayagayahan asin bendisyon para sa saindo an pakanompong sa mga kayamanan na “maingat na nakatago sa saiya.”

Nagigirumdoman daw Nindo?

• Sinasadol an mga Kristiano na hanapon an anong mga kayamanan?

• Taano ta angay pa man giraray para sa sato ngonyan an hatol ni Pablo para sa mga taga Colosas?

• Sabihon asin ipaliwanag an nagkapira sa espirituwal na mga kayamanan na “nakatago” ki Cristo.

[Mga Hapot Para sa Pag-adal]

[Mga Ritrato sa pahina 5]

An Biblia arog nin sarong mapa nin kayamanan na magiya sa sato sa kayamanan na “maingat na nakatago” ki Cristo