An Buhay na Daing Katapusan sa Daga—Paglaom na Itinao nin Dios

“An mga linalang ipinasakop sa kasayangan . . . basado sa paglaom.”—ROMA 8:20.

1, 2. (a) Taano ta mahalaga sa sato an paglaom na buhay na daing katapusan sa daga? (b) Taano ta dakol an nagdududa manongod sa buhay na daing katapusan sa daga?

TIBAAD nagigirumdoman nindo an kagayagayahan na namatean nindo kan enot nindong maaraman na sa harani nang ngapit, an mga tawo dai na magurang asin magagadan kundi mabubuhay sagkod lamang sa daga. (Juan 17:3; Kap. 21:3, 4) Naoogma gayod kamong sabihon sa iba an paglaom na iyan na sono sa Kasuratan. Total, an paglaom na buhay na daing katapusan mahalagang marhay na kabtang kan maogmang bareta na ihinuhulit niato. Nakakaapektar iyan sa mismong pananaw niato sa buhay.

² Sa pangkagabsan, dai iniintindi kan mga relihion nin Kakristianohan an paglaom na buhay na daing katapusan sa daga. Minsan ngani an Biblia nagtotokdo na an kalag nagagadan, an mayoriya kan mga iglesia nagtotokdo kan bakong sono sa Kasuratan na doktrina na an tawo igwa nin imortal na kalag na nagdadanay na buhay pagkagadan asin padagos na nabubuhay sa rona nin mga espiritu. (Ezeq. 18:20) Huli kaini, dakol an nagdududa manongod sa buhay na daing katapusan sa daga. Kun siring, tibaad ihapot niato: Talaga daw na sinusuportaran kan Biblia an paglaom na iyan? Kun iyo, kasuarin iyan enot na ihinayag nin Dios sa mga tawo?

“Ipinasakop sa Kasayangan . . . Basado sa Paglaom”

3. Paano nagin malinaw poon sa kapinonan kan kasaysayan nin tawo kun ano an katuyohan nin Dios para sa tawo?

³ An katuyohan ni Jehova para sa katawohan lininaw na sa mismong kapinonan kan kasaysayan nin tawo. Malinaw na sinabi nin Dios na si Adan mabubuhay sagkod lamang kun sia magigin makinuyog. (Gen. 2:9, 17; 3:22) Daing duda na naaraman kan enot na mga naggikan ki Adan na nawara na an pagkasangkap nin tawo, na pinatunayan nin naheheling na ebidensia. Linagan nin olang an laogan pasiring sa hardin nin Eden, asin an mga tawo naggugurang asin nagagadan. (Gen. 3:23, 24) Sa paglihis nin panahon, naglilîpot an lawig nin buhay nin tawo. Si Adan nabuhay nin 930 taon. An nakaligtas sa Baha na si Sem nabuhay sa laog sana nin 600 na taon, asin an aki niang si Arpaksad 438 taon. An ama ni Abraham na si Tera nabuhay nin 205 taon. An lawig nin buhay ni Abraham 175 taon, an aki niang si Isaac 180 taon, asin si Jacob nabuhay nin 147 taon. (Gen. 5:5; 11:10-13, 32; 25:7; 35:28; 47:28) Seguradong nasabotan nin dakol an kahulogan kan paglîpot na ini kan buhay nin tawo—nawara na an oportunidad na mabuhay na daing katapusan! Igwa daw sinda nin dahelan na maglaom na iyan makakamtan liwat?

4. Ano an basehan kan maimbod na mga tawo kan suanoy na panahon na magtubod na ibabalik nin Dios an mga bendisyon na nawara ni Adan?

⁴ An Tataramon nin Dios nagsasabi: “An mga linalang [na tawo] ipinasakop sa kasayangan . . . basado sa paglaom.” (Roma 8:20) Anong paglaom? Nasambitan sa pinakaenot na hula sa Biblia an sarong “banhi” na ‘malugad sa payo kan halas.’ (Basahon an Genesis 3:1-5, 15.) Para sa maimbod na mga tawo, an panugang Banhi na iyan nagin basehan para sa paglaom na dai lilingawan nin Dios an saiyang katuyohan para sa katawohan. Nagtao iyan sa mga tawo na arog ki Abel asin Noe nin dahelan na magtubod na ibabalik nin Dios an mga bendisyon na nawara ni Adan. Puedeng nasabotan  kan mga tawong ini na an ‘paglugad sa bool kan banhi’ may kalabot na pagpabolos nin dugo.—Gen. 4:4; 8:20; Heb. 11:4.

5. Ano an nagpapaheling na si Abraham igwa nin pagtubod sa pagkabuhay liwat?

⁵ Estudyare si Abraham. Kan sia baloon, ‘garo man sana idinolot ni Abraham si Isaac, an saiyang bugtong na aki.’ (Heb. 11:17) Taano ta andam siang gibohon ini? (Basahon an Hebreo 11:19.) Sia nagtutubod sa pagkabuhay liwat! Si Abraham igwa nin basehan sa pagtubod nia sa pagkabuhay liwat. Total, ibinalik ni Jehova an kakayahan ni Abraham na magkaaki asin ginibong posible na sia asin an agom niang si Sara magkaaki nin aking lalaki kan sinda gurang na. (Gen. 18:10-14; 21:1-3; Roma 4:19-21) Pinanugaan man ni Jehova si Abraham. Sinabi nin Dios sa saiya: “Maluwas paagi ki Isaac an aapodon na saimong banhi.” (Gen. 21:12) Kun siring, may marahay na mga dahelan si Abraham na maglaom na bubuhayon liwat nin Dios si Isaac.

6, 7. (a) Ano an ipinakipagtipan ni Jehova ki Abraham? (b) Paano nagtatao nin paglaom sa katawohan an panuga ni Jehova ki Abraham?

⁶ Huli sa pambihirang pagtubod ni Abraham, si Jehova nakipagtipan sa saiya mapadapit sa saiyang aki, o “banhi.” (Basahon an Genesis 22:18.) An pangenot na kabtang kan “banhi” iyo si Jesu-Cristo. (Gal. 3:16) Sinabi ni Jehova ki Abraham na an saiyang “banhi” papadakolon “siring kan mga bitoon sa kalangitan asin siring kan mga baybay na yaon sa baybayon”—bilang na dai aram ni Abraham. (Gen. 22:17) Minsan siring, kan huri ihinayag an bilang na iyan. Si Jesu-Cristo asin an 144,000, na mamamahala kaiba nia sa saiyang Kahadean, an minakompuesto kan “banhi.” (Gal. 3:29; Kap. 7:4; 14:1) Paagi sa Mesiyanikong Kahadean, ‘an gabos na nasyon sa daga magbebendisyon kan saindang sadiri.’

⁷ Posibleng dai nasabotan ni Abraham an lubos na kahulogan kan pakipagtipan ni Jehova sa saiya. Minsan siring, “hinahalat nia an siudad na may tunay na mga pundasyon,” an sabi kan Biblia. (Heb. 11:10) An siudad na iyan iyo an Kahadean nin Dios. Tanganing maako ni Abraham an mga bendisyon paagi sa Kahadean na iyan, kaipuhan na sia mabuhay giraray. An buhay na daing katapusan sa daga makakamtan nia paagi sa pagbuhay liwat sa saiya. Asin an buhay na daing sagkod makakamtan kan mga makakaligtas sa Armagedon o kan mga bubuhayon liwat.—Kap. 7:9, 14; 20:12-14.

“An Espiritu Pinupuersa Ako”

8, 9. Taano ta an libro nin Job bako sanang salaysay manongod sa mga pagbalo sa sarong tawo?

⁸ Sa pag-oltanan kan panahon na nabuhay an makoapo sa tuhod ni Abraham na si Jose asin an propetang si Moises, may tawong nabuhay kaidto na an ngaran Job. An libro sa Biblia na Job, na posibleng marhay na isinurat ni Moises, nagpapaliwanag kun taano ta itinogot ni Jehova na si Job magsakit asin kun ano an nagin resulta kaiyan sa saiya. Minsan siring, an libro nin Job bako sanang salaysay manongod sa mga pagbalo sa sarong tawo; iyan nakasentro sa mga isyu na may unibersal na importansia. An libro nagtatabang sa sato na marorop an katanosan ni Jehova sa paggamit nia kan saiyang soberaniya, asin ihinahayag kaiyan na kalabot sa isyu na pinalataw sa Eden an integridad asin oportunidad na mabuhay kan gabos na lingkod nin Dios sa daga. Minsan ngani dai nasabotan ni Job an isyung ini, dai nia tinogotan an tolo niang kairiba na papag-isipon sia na dai nia napagdanay an saiyang integridad. (Job 27:5) Ini tunay nanggad na magpapakosog sa satong pagtubod asin makakatabang sa sato na masabotan na puede niatong mapagdanay an satong integridad asin masuportaran an soberaniya ni Jehova.

⁹ Pakatapos na magtaram an tolong pararanga daa ni Job, ‘nagsimbag si Eliu na aki ni Baraquiel na Buzita.’ Ano an nagpahiro sa saiya na magtaram? “Ako napano nin mga tataramon,” an sabi nia. “An espiritu pinupuersa ako sa sakong tulak.” (Job 32:5, 6, 18) Minsan ngani an sinabi ni Eliu paagi sa pasabong naotob kan ikabalik an dating kamugtakan ni Job, an saiyang mga tataramon may kahulogan man para sa iba. Iyan nagtatao nin paglaom sa gabos na nagdadanay na may integridad.

10. Ano an nagpapaheling na an mensahe ni Jehova sa sarong indibiduwal kun beses igwa nin mas mahiwas na aplikasyon sa katawohan sa pangkagabsan?

¹⁰ Kun beses si Jehova nagtatao sa sarong indibiduwal nin mensahe na igwa man nin mas mahiwas na aplikasyon para sa katawohan sa  pangkagabsan. Maheheling ini sa hula ni Daniel may koneksion sa pangatorogan ni Hadeng Nabucodonosor nin Babilonya manongod sa pagpalod sa halangkawon na poon nin kahoy. (Dan. 4:10-27) Minsan ngani an pangatorogan na iyan naotob ki Nabucodonosor, iyan igwa nin mas dakula pa nanggad na kahulogan. Ipinaparisa kaiyan na an soberaniya nin Dios sa daga na ipinahayag paagi sa sarong kahadean sa linya ni Hadeng David ipapahayag giraray pakalihis nin peryodo nin panahon na 2,520 taon, na nagpoon kan 607 B.C.E. * An soberaniya nin Dios sa satong globo nagpoon na ipahayag giraray kan patukawon si Jesu-Cristo bilang langitnon na Hade kan taon 1914. Isip-isipa na sana kun paanong sa dai na mahahaloy ootobon kan pamamahala kan Kahadean an mga linalaoman kan makinuyog na katawohan!

“Dai Sia Pagpahiligon sa Kotkot!”

11. An mga tataramon ni Eliu nagpaparisa nin ano manongod sa Dios?

¹¹ Sa pagsimbag ki Job, si Eliu nagtaram manongod sa sarong ‘mensahero, sarong representante sa pagtaram, saro sa sangribo, tanganing sabihon sa tawo an saiyang katanosan.’ Paano kun an mensaherong ini ‘makimaherak sa Dios na mawili sia sa saiya’? Si Eliu nagsasabi: ‘Dangan pinapahelingan sia nin Dios nin pabor asin nagsasabi, “Dai sia pagpahiligon sa kotkot! Nakakua ako nin sarong pantubos! An saiyang kublit magin mas lumbod kisa kaidtong pagkahoben; bumalik sia sa mga aldaw kan saiyang kakosogan nin pagkahoben.”’ (Job 33:23-26) Ipinaparisa kan mga tataramon na iyan an pagigin andam nin Dios na umako nin “pantubos,” o “pantakop,” para sa mga tawong nagsosolsol.—Job 33:24, nota sa ibaba.

12. An mga tataramon ni Eliu nagtatao nin anong paglaom sa katawohan sa pangkagabsan?

¹² Dai gayod nasabotan ni Eliu an lubos na kahulogan kan pantubos, kun paanong dai lubos nasabotan kan mga propeta an gabos na isinurat ninda. (Dan. 12:8; 1 Ped. 1:10-12) Pero, an mga tataramon ni Eliu nagpapaheling kan paglaom na pag-abot nin panahon aakoon nin Dios an sarong pantubos asin papatalingkason nia an tawo sa maraot na epekto nin paggurang asin kagadanan. Iprinesentar kan mga tataramon ni Eliu an marahayon na oportunidad na buhay na daing katapusan. Ipinapaheling man kan libro nin Job na magkakaigwa nin pagkabuhay liwat.—Job 14:14, 15.

13. An mga tataramon ni Eliu igwa nin anong kahulogan para sa mga Kristiano?

¹³ Ngonyan, an mga tataramon ni Eliu padagos na nagkakaigwa nin kahulogan para sa minilyon na Kristiano na naglalaom na makaligtas sa pagkalaglag kan presenteng sistema nin mga bagay. An  mga may edad nang kabilang sa mga makakaligtas mabalik sa mga aldaw kan saindang kakosogan nin pagkahoben. (Kap. 7:9, 10, 14-17) Dugang pa, an oportunidad na maheling an mga bubuhayon liwat na ibinalik sa mga aldaw kan saindang pagkahoben padagos na ikinakaogmang marhay kan mga maimbod. Siempre, an imortalidad sa langit para sa linahidan na mga Kristiano sagkod an buhay na daing katapusan sa daga para sa “ibang mga karnero” ni Jesus nakadepende sa pagtubod sa atang na pantubos ni Cristo.—Juan 10:16; Roma 6:23.

Hinalon an Kagadanan Hale sa Daga

14. Ano an nagpapaheling na labi pa sa Ley ni Moises an kaipuhan tanganing an mga Israelita magkaigwa kan paglaom na buhay na daing katapusan?

¹⁴ An mga naggikan ki Abraham nagin independienteng nasyon kan sinda makipagtipan sa Dios. Kan itao sa sainda an Ley, si Jehova nagsabi: “Ootobon nindo an sakong mga reglamento asin an sakong hudisyal na mga desisyon, na kun gigibohon nin tawo, sia siertong mabubuhay man paagi kaiyan.” (Lev. 18:5) Minsan siring, huling dai ninda nasunod an sangkap na mga pamantayan kan Ley, an mga Israelita kinondenar kan Ley asin kinaipuhan na makabutas sa pagkakondenar na iyan.—Gal. 3:13.

15. Pinasabngan si David na isurat an manongod sa anong bendisyon sa ngapit?

¹⁵ Pakatapos ni Moises, pinasabngan ni Jehova an iba pang kagsurat kan Biblia na sambiton an paglaom na buhay na daing katapusan. (Sal. 21:4; 37:29) Halimbawa, tinapos ni salmista David an sarong salmo manongod sa pagkasararo kan tunay na mga parasamba sa Sion paagi sa mga tataramon na: “Dian ipinagboot ni Jehova na mamugtak an bendisyon, pati na an buhay sagkod sa daing talaan na panahon.”—Sal. 133:3.

16. Paagi ki Isaias, ano an ipinanuga ni Jehova manongod sa ngapit kan “bilog na daga”?

¹⁶ Pinasabngan ni Jehova si Isaias na maghula manongod sa buhay na daing katapusan sa daga. (Basahon an Isaias 25:7, 8.) Siring sa nakakapuot na “tahob”—sarong tamong—an kasalan asin kagadanan nagin grabeng pasakit sa katawohan. Sinisierto ni Jehova sa saiyang banwaan na an kasalan asin kagadanan hahalonon, o hahaleon, “sa bilog na daga.”

17. Anong makahulang papel kan Mesiyas an nagbubukas kan dalan pasiring sa buhay na daing katapusan?

¹⁷ Estudyare man an prosedimiento na sinasabi sa Ley ni Moises mapadapit sa kanding para ki Azazel. Sarong beses sa sarong taon, sa Aldaw nin Pagbayad sa Kasalan, ‘ipinapatong kan halangkaw na saserdote an duwa niang kamot sa payo kan buhay na kanding asin itinutuga dian an gabos na sala  kan mga aki ni Israel, asin ibinubugtak nia iyan sa payo kan kanding asin dadarahon kan kanding an gabos na sala ninda pasiring sa desierto.’ (Lev. 16:7-10, 21, 22) Ihinula ni Isaias an pagdatong kan Mesiyas, na kapareho kaiyan an magigin papel asin madara parayo kan “mga helang,” “kakologan,” asin “mismong kasalan nin dakol,” na sa siring binubukasan an dalan pasiring sa buhay na daing katapusan.—Basahon an Isaias 53:4-6, 12.

18, 19. Anong paglaom an itinatampok sa Isaias 26:19 asin Daniel 12:13?

¹⁸ Paagi ki Isaias, sinabihan ni Jehova an saiyang banwaan na Israel: “An saimong mga gadan magkakaburuhay. Sakuyang bangkay—sinda maburuhat. Magmata asin kumurahaw kamo na may kagayagayahan, kamong mga nag-eerok sa kabokabo! Huli ta an saimong ambon siring sa ambon nin malvas, asin minsan an mga daing kosog sa kagadanan papangyayarihon mismo kan daga na mamundag.” (Isa. 26:19) Malinaw na ipinapaheling sa Hebreong Kasuratan na igwa nin paglaom na pagkabuhay liwat asin buhay digdi sa daga. Halimbawa, kan si Daniel haros 100 anyos na, sinierto sa saiya ni Jehova: “Mapahingalo ka, alagad ika matindog para sa saimong kabtang sa katapusan kan mga aldaw.”—Dan. 12:13.

¹⁹ Huli sa paglaom na pagkabuhay liwat, si Marta nakapagsabi ki Jesus mapadapit sa saiyang gadan nang tugang: “Aram ko na sia mabangon sa pagbuhay liwat sa huring aldaw.” (Juan 11:24) Nabago daw an paglaom na ini huli sa mga katokdoan ni Jesus asin kan ipinasabong na mga isinurat kan saiyang mga disipulo? An buhay daw na daing katapusan sa daga iyo pa man giraray an paglaom na iinaalok ni Jehova sa katawohan? Pag-oolayan niato an simbag sa mga hapot na ini sa sunod na artikulo.

[Nota sa Ibaba]

Ikakapaliwanag daw Nindo?

• An mga linalang na tawo “ipinasakop sa kasayangan” basado sa anong paglaom?

• Ano an nagpapaheling na si Abraham igwa nin pagtubod sa pagkabuhay liwat?

• An mga tataramon ni Eliu ki Job nagtatao nin anong paglaom para sa katawohan?

• Paano idinodoon kan Hebreong Kasuratan an paglaom na pagkabuhay liwat asin buhay na daing katapusan sa daga?

[Mga Hapot Para sa Pag-adal]

[Ritrato sa pahina 5]

An mga tataramon ni Eliu ki Job nagtatao nin paglaom na an tawo papatalingkason sa maraot na epekto nin paggurang asin kagadanan

[Ritrato sa pahina 6]

Sinierto ki Daniel na ‘sia matindog para sa saiyang kabtang sa katapusan kan mga aldaw’