“Magdanay Kamo sa Pagkamoot nin Dios”

“Magdanay kamo sa pagkamoot nin Dios, mantang kamo naghahalat sa pagkaherak kan satong Kagurangnan na Jesu-Cristo na nasa isip an buhay na daing katapusan.”—JUD. 21.

1, 2. Paano ipinapaheling ni Jehova an saiyang pagkamoot sa sato, asin paano niato naaaraman na dai nia kita automatikong pinapagdadanay sa saiyang pagkamoot?

IPINAPAHELING ni Jehova Dios an saiyang pagkamoot sa sato sa dai mabilang na paagi. Pero, daing duda na an pinakadakulang prueba kan pagkamoot ni Jehova iyo an probisyon na atang na pantubos. Dakulaon nanggad an pagkamoot nia sa katawohan kaya isinugo pa ngani nia digdi sa daga an saiyang namomotan na Aki tanganing magadan para sa sato. (Juan 3:16) Ginibo ini ni Jehova huli ta gusto nia na kita mabuhay sagkod lamang, asin gusto man nia na makinabang kita sa saiyang pagkamoot sagkod lamang!

² Minsan siring, puede daw niatong isipon na automatiko kitang papagdadanayon ni Jehova sa saiyang pagkamoot dawa ano man an pilion niatong gibohon? Dai. Huli ta sa Judas bersikulo 21, mababasa niato an sadol na ini: “Magdanay kamo sa pagkamoot nin Dios, mantang kamo naghahalat sa pagkaherak kan satong Kagurangnan na si Jesu-Cristo na nasa isip an buhay na daing katapusan.” An pananaram na “magdanay kamo sa pagkamoot nin Dios” nagpaparisa na may paghiro na kaipuhan niatong gibohon. Kun siring, ano an kaipuhan niatong gibohon tanganing magdanay sa pagkamoot nin Dios?

Paano Kita Makakapagdanay sa Pagkamoot nin Dios?

3. Ano an sinabi ni Jesus na mahalagang marhay tanganing magdanay sia sa pagkamoot kan saiyang Ama?

³ Manonompongan niato an simbag sa hapot na iyan sa mga tataramon mismo ni Jesus kan ultimong banggi kan saiyang buhay digdi sa daga. Sinabi nia: “Kun otobon nindo an sakong mga togon, magdadanay kamo sa sakong pagkamoot, kun paanong ako nag-otob sa mga togon kan Ama asin  nagdadanay sa saiyang pagkamoot.” (Juan 15:10) Malinaw nanggad, aram ni Jesus na mahalagang marhay an pagsunod sa mga togon ni Jehova tanganing mapagdanay an marahay na relasyon sa saiyang Ama. Ngonyan, kun iyan nagin totoo sa sangkap na Aki nin Dios, bako daw na iyan magigin totoo man sa sato?

4, 5. (a) Ano an pangenot na paagi na ikakapaheling niato na namomotan ta si Jehova? (b) Taano ta mayo kita nin ano man na dahelan na haboan an ideya nin pagkuyog sa mga togon ni Jehova?

⁴ Sa pangenot, ipinapaheling niato na namomotan ta si Jehova paagi sa pagkuyog sa saiya. Arog kaini an pagkasabi kaiyan ni apostol Juan: “Ini iyo an boot sabihon kan pagkamoot sa Dios, na kuyogon niato an saiyang mga togon; alagad ta an saiyang mga togon dai nakakapagabat.” (1 Juan 5:3) Totoo, an ideya nin pagkuyog dai pirmeng nagugustohan nin dakol na tawo sa kinaban ngonyan. Pero, mangnohon an mga tataramon na: “Alagad ta an saiyang mga togon dai nakakapagabat.” Dai ipinapagibo ni Jehova sa sato an sarong bagay na masakiton para sa sato.

⁵ Sa pag-ilustrar: Ipapaalsa mo daw sa sarong namomotan na katood an sarong bagay na aram mong magabaton para sa saiya? Siempre dai! Si Jehova mas maboot nanggad kisa sa sato asin mas mapagrisa nanggad dapit sa satong mga limitasyon. Inaasegurar sa sato kan Biblia na ‘ginigirumdom ni Jehova na kita kabokabo.’ (Sal. 103:14) Dai nia noarin man ipapagibo sa sato an dai niato kaya. Kaya mayo kita nin dahelan na haboan an ideya nin pagkuyog sa mga togon ni Jehova. Sa kabaliktaran, inaako niato na an pagkuyog sarong marahayon na oportunidad na ipaheling sa satong langitnon na Ama na talagang namomotan niato sia asin gusto niatong magdanay sa saiyang pagkamoot.

Sarong Espesyal na Balaog Hale ki Jehova

6, 7. (a) Ano an konsensia? (b) Iilustrar kun paano an konsensia makakatabang sa sato na magdanay sa pagkamoot nin Dios.

⁶ Sa komplikadong kinaban na kinabubuhayan niato, dakol na desisyon an kaipuhan na gibohon na kalabot an satong pagkuyog sa Dios. Paano kita makakaseguro na an mga desisyon na ini kaoyon kan kabotan nin Dios? Tinawan kita ni Jehova nin sarong balaog na makakatabang na marhay sa sato kun dapit sa pagkuyog. Iyan iyo an konsensia. Ano an konsensia? Iyan sarong espesyal na kakayahan na siyasaton an satong sadiri. Iyan garo sarong hokom sa laog niato, na nagpapangyari sa sato na pag-isipan an mga desisyon na napapaatubang sa buhay niato o horophoropon an mga paghiro na ginibo na niato asin helingon kun baga iyan marahay o maraot, kun baga iyan tama o sala.—Basahon an Roma 2:14, 15.

⁷ Paano niato epektibong magagamit an satong konsensia? Isip-isipa an sarong ilustrasyon. May sarong tawong nagbabaklay sa mahiwason na kaawagan. Mayo nin mga dalan, tinampo, o karatula. Pero, dirediretso siang nakaabot sa saiyang padudumanan. Paano? Igwa sia nin kompas. Iyan igwa nin dai maliliwat na marka kan apat na pangenot na direksion asin sarong magnetikong dagom na mapapanarigan na nakatokdo paamihanan. Kun mayo an saiyang kompas, malalagalag nanggad an nagbabaklay na ini. Kaagid kaiyan, an tawo na mayong konsensia sa parate malalagalag nanggad kun nagpoprobar na gumibo nin moral asin matanos na mga desisyon sa buhay.

8, 9. (a) Anong mga limitasyon kan satong konsensia an kaipuhan niatong girumdomon? (b) Ano an magigibo niato tanganing siertohon na an satong konsensia totoo nanggad na kapakipakinabang sa sato?

⁸ Pero arog kan kompas, an konsensia igwa nin mga limitasyon. Kun an sarong magnet irarani kan nagbabaklay sa saiyang kompas, an dagom kaiyan matokdo parayo sa amihanan. Kaagid kaiyan, kun tatawan niato nin sobrang importansia an mga kamawotan kan satong puso, ano an mangyayari? An konsensia puede nanggad na mabiribid kan satong maimot na mga tendensia. An Biblia nagpapatanid sa sato na “madaya an puso nin orog kisa sa ano pa man na bagay asin desesperado.” (Jer. 17:9; Tal. 4:23) Apuera kaini, kun an nagbabaklay mayo nin tama asin masasarigan na mapa, daing gayo o dai ngani nia mapapakinabangan an saiyang kompas. Kaagid kaiyan, kun dai kita mananarig sa segurado asin dai nagliliwat na paggiya kan Tataramon nin Dios, an Biblia, an satong konsensia puedeng magin haros daing pakinabang. (Sal. 119:105) Makamomondo, an dakol na tawo sa kinaban na ini nagtatao nin sobrang importansia sa mga kamawotan kan saindang puso, mantang daing gayo o dai ngani sinda nagtatao nin atension sa mga pamantayan na yaon sa Tataramon nin Dios. (Basahon an Efeso 4:17-19.) Iyan an dahelan kun taano ta  minsan ngani igwa sinda nin konsensia, kadakol na tawo an naggigibo nin grabe karaot na mga bagay.—1 Tim. 4:2.

⁹ Maninigo na determinado kita na dai noarin man magin siring kaiyan! Imbes, padagos niatong togotan an Tataramon nin Dios na tokdoan asin sanayon an satong konsensia tanganing ini magin totoo nanggad na kapakipakinabang sa sato. Kaipuhan na hinanyogon niato an satong konsensia na sinanay sa Biblia imbes na togotan iyan na madaog kan maimot na mga tendensia niato. Kadungan kaiyan, maninigo na hingoahon niato na igalang an konsensia kan satong namomotan na espirituwal na mga tugang. Ginigibo niato an gabos na paghihingoa na dai kita makapasingkog sa sainda, na ginigirumdom na an konsensia kan satong tugang tibaad mas sensitibo o mas estrikto kisa kan sa sato.—1 Cor. 8:12; 2 Cor. 4:2; 1 Ped. 3:16.

10. Anong tolong aspekto nin buhay an pag-oolayan niato ngonyan?

¹⁰ Pag-olayan niato ngonyan an tolong aspekto nin buhay na ikakapaheling niato an satong pagkamoot ki Jehova paagi sa pagkuyog. Siempre, kalabot an konsensia sa lambang saro sa mga iyan, alagad enot sa gabos, kaipuhan iyan na giyahan kan ipinasabong na mga pamantayan kan Biblia dapit sa paggawe. An tolong paagi na mamomoton niatong makukuyog si Jehova iyo an: (1) Namomotan niato an mga namomotan ni Jehova, (2) nagpapaheling kita nin paggalang sa autoridad, asin (3) nagmamaigot kitang magdanay na malinig sa pagheling nin Dios.

Kamotan an mga Namomotan ni Jehova

11. Taano ta maninigo niatong kamotan an mga namomotan ni Jehova?

¹¹ Enot, dapat niatong kamotan an mga namomotan ni Jehova. Kun manongod sa pakikiibaiba, an mga tawo garo espongha. May tendensia kitang sagomon kun baga, an ano man na nasa palibot niato. Aram na marhay kan satong Kaglalang na an pakikiibaiba puede nanggad na magin peligroso—asin puede nanggad na makatabang—sa bakong sangkap na mga tawo. Sa dahelan na iyan, itinao nia sa sato an madonong na hatol na ini: “Sia na naglalakaw na kaiba nin mga madonong magigin madonong, alagad sia na nakikiiba sa mga  mangmang mapaparaot.” (Tal. 13:20; 1 Cor. 15:33) Mayo sa sato an gustong ‘maparaot.’ An lambang saro sa sato gustong ‘magin madonong.’ Mayo nin siisay man na puedeng magpadonong pa ki Jehova, asin sia dai noarin man puedeng maparaot huli sa impluwensia nin siisay man. Pero, nagtatao sia nin magayon na halimbawa para sa sato kun dapit sa pakikiibaiba. Isipon nindo ini—siisay na bakong sangkap na mga tawo an pinipili ni Jehova bilang saiyang mga katood?

12. Anong klaseng mga katood an pinipili ni Jehova?

¹² An patriarkang si Abraham inapod ni Jehova na “sakuyang katood.” (Isa. 41:8) An tawong ini may pambihirang kaimbodan, katanosan, asin pagkamakinuyog—sarong tawong may pagtubod. (Sant. 2:21-23) Iyan an klase nin katood na pinipili ni Jehova. Siring kaiyan na mga tawo an gusto niang magin katood ngonyan. Kun pinipili ni Jehova an siring na mga katood, bako daw na mahalagang marhay na kita pumili man nin marahay na kairiba, na kita maglakaw kaiba nin mga madonong asin magin madonong?

13. Ano an makakatabang sa sato na makapili nin marahay na mga katood?

¹³ Ano an makakatabang sa saindo na makapili nin marahay na mga katood? An pag-adal sa mga halimbawa sa Biblia puedeng makamotibar sa sato. Isip-isipa an pagigin magkatood ni Rut asin kan saiyang panugangan na si Noemi, ni David asin Jonatan, o ni Timoteo asin Pablo. (Rut 1:16, 17; 1 Sam. 23:16-18; Fil. 2:19-22) An pagigin magkatood kan mga ini nagtalubo huli sa sarong dahelan na nakakalabi sa gabos na iba pa: Iyan nakabasar sa tunay na pagkamoot ki Jehova. Makakakua daw kamo nin mga katood na namomoot nanggad ki Jehova arog nindo? Makakasierto kamo na dakol nin siring kaiyan na klase nin potensial na katood sa Kristianong kongregasyon. An siring na mga katood dai kamo iimpluwensiahan na maparaot sa espirituwal na paagi. Imbes, tatabangan ninda kamo na magkuyog ki Jehova, magtalubo sa espirituwal, asin magtanom para sa espiritu. (Basahon an Galacia 6:7, 8.) Tatabangan ninda kamo na magdanay sa pagkamoot nin Dios.

Igalang an Autoridad

14. Anong mga dahelan an nagpapadepisil sa sato na magpaheling nin paggalang sa autoridad?

¹⁴ An autoridad kalabot sa ikaduwang paagi na ipinapaheling niato an satong pagkamoot ki Jehova. Dapat na magpaheling kita nin paggalang sa autoridad. Taano ta depisilon ining gibohon kun beses? Sarong dahelan, an mga tawo na nasa katongdan na may autoridad bakong sangkap. Dugang pa, kita mismo bakong sangkap. Nakikipaglaban kita sa minanang tendensia na magrebelde.

15, 16. (a) Taano ta mahalaga na igalang niato an mga pinagkatiwalaan ni Jehova kan paninimbagan na asikasohon an saiyang banwaan? (b) Anong mahalagang leksion an manonodan niato sa kun paano minansay ni Jehova an pagrebelde ki Moises kan mga Israelita?

¹⁵ Kun siring, tibaad isipon nindo, ‘Kun depisilon para sa sato na igalang an autoridad, taano ta kaipuhan pa niatong gibohon iyan?’ An simbag konektadong marhay sa isyu dapit sa soberaniya. Siisay an pipilion nindo bilang saindong soberano asin namamahala sa saindo? Kun pinili niato si Jehova bilang satong Soberano, kaipuhan na igalang niato an saiyang autoridad. Kun dai, totoo daw na masasabi niato na sia an Namamahala sa sato? Apuera kaini, sa parate ginagamit ni Jehova an saiyang autoridad paagi sa bakong sangkap na mga tawo na pinagkatiwalaan nia kan paninimbagan na asikasohon an saiyang banwaan. Kun marebelde kita sa mga tawong iyan, paano mamansayon ni Jehova an satong iginagawe?—Basahon an 1 Tesalonica 5:12, 13.

¹⁶ Halimbawa, kan an mga Israelita maggurumodgumod asin magrebelde ki Moises, minansay ni Jehova na sa saiya mismo sinda nagrerebelde. (Bil. 14:26, 27) An Dios dai nagliliwat. Kun marebelde man kita sa mga ibinugtak nia sa mga katongdan na may autoridad, kita nagrerebelde sa saiya!

17. Anong tamang saboot an maninigo niatong hingoahon na ipaheling sa mga nasa katongdan na may autoridad sa kongregasyon?

¹⁷ Ihinahayag ni apostol Pablo an tamang saboot na maninigo niatong ipaheling sa mga nasa katongdan na may paninimbagan sa Kristianong kongregasyon. Sia nagsurat: “Magin makinuyog kamo sa mga nangengenot sa saindo asin magin mapagpasakop, huli ta sinda nagbabantay sa saindong kalag bilang an mga maninimbag; tanganing ini magibo nindang may kagayagayahan asin bakong may pag-agagha, huli ta ini makakaraot sa saindo.” (Heb. 13:17) Totoo, kaipuhan an tunay na paghihingoa niato tanganing mapatalubo an siring na espiritu nin pagigin makinuyog asin  mapagpasakop. Pero, girumdomon na nagmamaigot kitang magdanay sa pagkamoot nin Dios. Bako daw na maninigo niatong gibohon an gabos na paghihingoa na makamtan an pasohan na iyan?

Magdanay na Malinig sa Pagheling ni Jehova

18. Taano ta gusto ni Jehova na kita magdanay na malinig?

¹⁸ An ikatolong paagi na ipinapaheling niato an satong pagkamoot ki Jehova iyo na nagmamaigot kitang magdanay na malinig sa saiyang pagheling. Sa parate, an mga magurang nagmamaigot na masegurado na malinig an saindang mga aki. Taano? Sarong dahelan, an pagigin malinig mahalagang marhay sa salud asin ikakarahay kan aki. Apuera kaini, an malinig na aki nagtatao nin marahay na impresyon sa pamilya, na naghahayag kan pagkamoot asin atension kan mga magurang. Sa kaagid na mga dahelan, gusto ni Jehova na kita magin malinig. Aram nia na an kalinigan mahalagang marhay sa satong ikakarahay. Aram man nia na an satong kalinigan igwa nin epekto sa saiya bilang satong langitnon na Ama. Iyan mahalagang marhay, huling an mga tawo puedeng maakit sa Dios na pinaglilingkodan niato dahel naririparo ninda na lataw an kalaenan niato sa kadaklan na tawo sa maramog na kinaban na ini.

19. Paano niato naaaraman na mahalaga an pisikal na kalinigan?

¹⁹ Sa anong mga paagi kita kaipuhan na magdanay na malinig? An totoo, sa gabos na bagay. Sa suanoy na Israel, lininaw ni Jehova sa saiyang banwaan na mahalagang marhay an pisikal na kalinigan. (Lev. 15:31) Kaiba sa Ley ni Moises an mga bagay na siring baga kan pagtalbong nin ati, paghugas nin mga lalagan, asin paghanaw nin mga kamot saka bitis, patin paglaba nin gubing. (Ex. 30:17-21; Lev. 11:32; Bil. 19:17-20; Deut. 23:13, 14) Ipinagirumdom sa mga Israelita na an saindang Dios na si Jehova banal—na nangangahulogan na “malinig,” “dalisay,” asin “sagrado.” An mga lingkod kan banal na Dios kaipuhan na magin banal man.—Basahon an Levitico 11:44, 45.

20. Sa anong mga paagi kita kaipuhan na magdanay na malinig?

²⁰ Kun siring, kaipuhan kitang magin malinig sa panglaog saka sa pangluwas. Nagmamaigot kitang magdanay na malinig an satong kaisipan. Maimbod niatong sinusunod an mga pamantayan ni Jehova dapit sa kalinigan sa moral, gurano man karaot an paggawe sa sekso kan mga tawo sa kinaban. An pinakamahalaga, pinagmamaigotan niatong magdanay na malinig an satong pagsamba, na linilikayan an ano man na impluwensia kan falsong relihion. Danay niatong ginigirumdom an ipinasabong na patanid na nakasurat sa Isaias 52:11: “Sumiblag kamo, sumiblag kamo, lumuwas kamo dian, dai kamo dumotdot nin ano man na maati; lumuwas kamo sa saiya, magdanay kamong malinig.” Ngonyan, nagdadanay kitang malinig sa espirituwal paagi sa dai man lamang pakikikabtang sa mga bagay na maati sa espirituwal segun sa pagmansay kan satong langitnon na Ama. Halimbawa, iyan an dahelan kun taano ta nag-iingat kita na dai makikabtang sa mga selebrasyon asin kapiestahan kan falsong relihion na popular na gayo sa kinaban ngonyan. Totoo, depisil magdanay na malinig. Alagad pinagmamaigotan kan banwaan ni Jehova na gibohon iyan huli ta nakakatabang ini sa sainda na magdanay sa pagkamoot nin Dios.

21. Paano kita makakasierto na magdadanay kita sa pagkamoot nin Dios?

²¹ Gusto ni Jehova na magdanay kita sa saiyang pagkamoot sagkod lamang. Alagad bilang indibiduwal, kaipuhan niato gabos na seguradohon na ginigibo niato an satong pinakamakakaya na magdanay sa pagkamoot nin Dios. Magigibo niato ini paagi sa pagsunod sa halimbawa ni Jesus asin pagpatunay kan satong pagkamoot ki Jehova paagi sa pagkuyog sa Saiyang mga pagboot. Kun gigibohon niato iyan, makakasierto kita na mayo nin “makakapasuhay sa sato sa pagkamoot nin Dios na yaon ki Cristo Jesus na satong Kagurangnan.”—Roma 8:38, 39.

Nagigirumdoman daw Nindo?

• Paano makakatabang sa sato an satong konsensia na magdanay sa pagkamoot nin Dios?

• Taano ta maninigo niatong kamotan an mga namomotan ni Jehova?

• Taano ta mahalagang marhay na igalang an autoridad?

• Gurano kahalaga sa banwaan nin Dios an kalinigan?

[Mga Hapot Para sa Pag-adal]

[Kahon/Ritrato sa pahina 20]

SARONG PUBLIKASYON NA NAG-EENGGANYAR NIN MARAHAY NA PAGGAWE

Durante kan 2008/2009 pandistritong kombension, ilinuwas an sarong 224-pahinang libro na may titulong “Magdanay Kamo sa Pagkamoot nin Dios.” Ano an katuyohan kan bagong librong ini? Iyan dinisenyo tanganing tabangan an mga Kristiano na maaraman asin mamotan an mga pamantayan ni Jehova, na sa pangenot nakasentro sa Kristianong paggawe. An maingat na pag-adal sa librong “Magdanay Kamo sa Pagkamoot nin Dios” mapararom kan satong marigon na pagtubod na an pamumuhay kaoyon kan mga pamantayan ni Jehova iyo an pinakamarahay na paagi nin pamumuhay ngonyan asin naggigiya iyan pasiring sa buhay na daing katapusan sa ngapit.

Orog pa dian, an librong ini dinisenyo tanganing tabangan kita na masabotan na an pagkuyog ki Jehova bakong pagabat. Sa kabaliktaran, iyan sarong paagi na ipinapaheling niato ki Jehova kun gurano nanggad niato sia kanamomotan. Huli kaini, papahiroon kita kan librong ini na hapoton an satong sadiri, ‘Taano ta kinukuyog ko si Jehova?’

Kun an nagkapira makamomondo na nasala sa pagbaya sa pagkamoot ni Jehova, sa pangkagabsan an dahelan iyo an paggawe, bakong doktrina. Kun siring, mahalagang marhay nanggad na pakosogon niato an satong pagkamoot asin pagpapahalaga sa mga ley asin prinsipyo ni Jehova na naggigiya sa sato sa aroaldaw na buhay niato! Nagtitiwala kami na matatabangan kan bagong publikasyon na ini an mga karnero ni Jehova sa bilog na kinaban na manindogan nin marigon sa kun ano an tama, patunayan na si Satanas putikon, asin orog sa gabos, magdanay sa pagkamoot nin Dios!—Jud. 21.

[Ritrato sa pahina 18]

“Kun otobon nindo an sakong mga togon, magdadanay kamo sa sakong pagkamoot, kun paanong ako nag-otob sa mga togon kan Ama asin nagdadanay sa saiyang pagkamoot”