Nagigirumdoman daw Nindo?

Napahalagahan daw nindo an pagbasa kan dai pa sana nahahaloy na mga isyu kan An Torrengbantayan asin The Watchtower? Bueno, helingon kun masisimbag nindo an minasunod na mga hapot:

• Posible daw an pagkabuhay liwat kun magadan an aki mantang nasa matris pa?

An buhay nagpopoon sa pangingidam. Kaya ni Jehova na buhayon liwat an mga indibiduwal ano man an edad ninda huli ta “an gabos na bagay posible sa Dios.” (Mar. 10:27) Alagad dai direktang sinasabi kan Biblia kun baga bubuhayon nia liwat an mga aking nagadan mantang nasa matris pa.—4/15, pahina 12, 13.

• Taano ta makikinabang kita sa pag-obserbar sa mga tanga, kuneho sa kagapoan, doron, asin tuko?

An apat na ini nag-iilustrar sa natural na kadonongan. Sa siring, ibinabantog kaiyan an kadakulaan kan kadonongan nin Dios. (Tal. 30:24-28)—4/15, pahina 16-19.

• An 2009 ikasanggatos na taon nin anong importanteng pangyayari para sa Mga Saksi ni Jehova?

Kan 1909 an opisina prinsipal kan Watch Tower Bible and Tract Society, an legal na korporasyon para sa pagpublikar na ginagamit kan Mga Saksi ni Jehova, ibinalyo hale sa Pittsburgh, Pennsylvania, pasiring sa Brooklyn, Nueva York, na duman padagos na nagpupunsionar iyan.—5/1-E, pahina 22-24.

• Taano ta an Biblia paborableng nagtataram dapit sa pagsilensio?

Ipinapaheling kaiyan na an pagsilensio puedeng magin sarong tanda nin paggalang, sarong tabang sa paghorophorop, saka ebidensia nin pakamansay asin pakabatid. (Sal. 37:7; 63:6; Tal. 11:12)—5/15, pahina 3-5.

• Sa ano nagkakaparareho si John Wycliffe, William Tyndale, Robert Morrison, asin Adoniram Judson?

Gabos sinda namoot sa Tataramon nin Dios asin trinadusir iyan sa mga lenguahe na mababasa nin ordinaryong mga tawo. Iyan trinadusir ni Wycliffe asin Tyndale sa Ingles, ni Morrison sa Intsik, asin ni Judson sa Burmese (Myanmar).—6/1-E, pahina 8-11.

• Pirang hade sa Juda an nagpaheling nin pambihirang kaigotan para sa harong nin Dios?

Desinuebeng hade an namahala sa kahadean sa timog kan Juda, asin apat an nagpaheling nin siring kapambihirang kaigotan—si Asa, Josafat, Ezequias, asin Josias.—6/15, pahina 7-11.

• An gabos daw na linahidan na Kristiano sa daga nakikikabtang sa pagtao nin espirituwal na kakanon?

Dai. An gabos na linahidan nin espiritu nin Dios kabtang kan grupong maimbod asin mapagmansay na oripon, alagad an minakompuesto sa Namamahalang Grupo an nagdidirehir sa pagpakakan sa espirituwal.—6/15, pahina 22-24.

• Taano ta minawot na marhay kan mga soldados na Romano an panglaog na gubing ni Jesus?

An mga soldados na yaon kan gadanon si Jesus dai piniridaso an saiyang gubing. Sa parate, an siring na tunika ginigibo paagi sa pagpatong nin duwang pidaso nin tela asin pagtahi kaiyan, alagad an gubing ni Jesus mayo nin pinagdugtongan, na huli kaiyan nagin iyan mas mamahalon na gubing.—Hul.-Set., pahina 22.

• Taano ta masasabing pagkamoot an mahalagang pagkakalaen kan pagtratar ni Jesus sa mga tawo asin kan mga namomoon sa relihion?

Imbes na kamotan an ordinaryong mga tawo, minenos sinda kan mga namomoon na iyan. Dugang pa, dai ninda namotan an Dios. Namomotan ni Jesus an saiyang Ama asin sia napahiro nin pagkaherak sa mga tawo. (Mat. 9:36) Sia mamomoton, maduminamay, asin maboot sa sainda.—7/15, pahina 15.

• Taano ta an pagbadyet puedeng magin problema nin mag-agom, asin ano an makakatabang sa mga mag-agom na magin mapanggana?

An dai pagkakaoyon dapit sa kuarta sa parate may koneksion sa tiwala o takot, asin posibleng magkalaen an kamugtakan ninda sa buhay bago sinda nagin mag-agom. An apat na liabe tanganing magin mapanggana iyo an: Pag-adalan na magin kalmado kun nag-oolay manongod sa kuarta, pagkaoyonan kun paano gagamiton an ginaganar, isurat an badyet nin pamilya, asin magdesisyon kun siisay an maasikaso kan mga bagay-bagay na kalabot an kuarta.—8/1-E, pahina 10-12.