An Pagkamoot ni Cristo Nagpapahiro sa Sato na Mamoot
An Pagkamoot ni Cristo Nagpapahiro sa Sato na Mamoot
“Si Jesus, huling namoot sa saiyang mga sadiri na yaon sa kinaban, namoot sa sainda sagkod sa katapusan.”—JUAN 13:1.
1, 2. (a) Taano ta pambihira an pagkamoot ni Jesus? (b) Anong mga aspekto nin pagkamoot an totokaron niato sa artikulong ini?
IPINAHELING ni Jesus an sangkap na halimbawa nin pagkamoot. An gabos manongod sa saiya—an saiyang pagtaram, an saiyang paggawe, an saiyang pagtotokdo, asin an saiyang kagadanan bilang atang—nagpatunay kan saiyang pagkamoot. Sagkod sa mismong katapusan kan saiyang buhay sa daga, ipinaheling ni Jesus an pagkamoot sa mga namidbid nia asin nangorogna sa mga disipulo nia.
2 An marahayon na halimbawa nin pagkamoot ni Jesus nagseserbing halangkaw na pamantayan na dapat suportaran kan saiyang mga parasunod. Nagmomotibar man iyan sa sato na magpaheling nin kaparehong pagkamoot sa satong espirituwal na mga tugang saka sa gabos na iba pa. Sa artikulong ini, pag-oolayan niato kun ano an manonodan ki Jesus kan kamagurangan sa kongregasyon manongod sa pagpaheling nin pagkamoot sa mga nakakagibo nin mga sala, dawa magabat na mga sala. Totokaron man niato kun paano an pagkamoot ni Jesus nagpapahiro sa mga Kristiano na gumibo nin positibong mga aksion sa panahon nin kasakitan, kalamidad, asin helang.
3. Sa ibong kan seryosong mga kaluyahan ni Pedro, paano sia trinatar ni Jesus?
3 Kan banggi bago magadan si Jesus, tolong beses siang dineharan kan mismong apostol nia na si Pedro. (Mar. 14:66-72) Pero, kan magbalik si Pedro, siring kan sinabi ni Jesus bago kaiyan, pinatawad sia ni Jesus. Ipinaniwala ni Jesus ki Pedro an magabat na mga paninimbagan. (Luc. 22:32; Gibo 2:14; 8:14-17; 10:44, 45) Ano an manonodan niato sa kaisipan ni Jesus sa mga igwa nin seryosong mga kaluyahan?
Ipaheling an Kaisipan ni Cristo sa mga Nagkasala
4. Sa anong situwasyon nangorognang kaipuhan na ipaheling an kaisipan ni Cristo?
4 Sa dakol na situwasyon na kaipuhan na magpaheling kan kaisipan ni Cristo, an saro na nangorognang nakakamondo iyo an kun may nakakagibo nin magabat na kasalan, baga man sa pamilya o sa kongregasyon. Makamomondo, mantang patapos na an huring mga aldaw kan sistema ni Satanas, an espiritu kan kinaban lalong naggagrabe an epekto sa moral. An maraot o indiperenteng kaisipan kan kinaban dapit sa moral puedeng makaolakit sa mga hoben sagkod gurang, na pinapaluya an saindang determinasyon na maglakaw sa hayakpit na dalan. Kan enot na siglo, an nagkapira kinaipuhan na itiwalag sa Kristianong kongregasyon, asin an iba sinagwe. Arog man kaiyan ngonyan. (1 Cor. 5:11-13; 1 Tim. 5:20) Minsan siring, kun an kamagurangan na nag-aasikaso kan mga bagay na ini nagpapaheling nin arog-Cristong pagkamoot, puede ining magkaigwa nin dakulaon na epekto sa nagkasala.
5. Paano maninigong arogon kan kamagurangan an kaisipan ni Cristo sa mga nagkasala?
5 Arog ni Jesus, dapat na suportaran kan kamagurangan an matanos na mga pamantayan ni Jehova sa gabos na panahon. Sa paggibo kaiyan, ipinapabanaag ninda an kahoyoan, kabootan, asin pagkamoot ni Jehova. Kun an saro talagang nagsosolsol, “nalugadan an puso” asin “nasasakitan an espiritu” huli sa saiyang sala, tibaad bakong depisil para sa kamagurangan na “pakarhayon giraray an tawong iyan sa espiritu nin kahoyoan.” (Sal. 34:18; Gal. 6:1) Alagad paano maninigong trataron an saro na palaban asin dai ngani nagbabasol?
6. Ano an dapat likayan kan kamagurangan sa pagtratar sa mga nagkasala, asin taano?
6 Kun dai inaako kan nagkasala an hatol na sono sa Kasuratan o naghihingoang ibasol sa iba an saiyang sala, tibaad maanggot an kamagurangan asin an iba pa. Huling aram ninda an danyos na nagibo na kan nagkasala, tibaad masugotan sindang ihayag an mismong namamatean ninda manongod sa mga ginibo asin saboot kan tawong iyan. Pero, an kaanggotan nakakadanyar asin dai nagpapabanaag kan “isip ni Cristo.” (1 Cor. 2:16; basahon an Santiago 1:19, 20.) Malinawon na pinatanidan ni Jesus an nagkapira kan panahon nia, alagad ni sarong beses dai sia noarin man nagsabi nin ano man na makaoongis o may intension na makakolog. (1 Ped. 2:23) Imbes, lininaw nia sa mga nagkasala na puede sindang magsolsol asin makabalik sa pabor ni Jehova. Tunay nanggad, an saro sa pangenot na mga dahelan na si Jesus nagdigdi sa kinaban iyo na “magligtas nin mga parakasala.”—1 Tim. 1:15.
7, 8. Ano an maninigong gumiya sa kamagurangan sa pagkapot nin hudisyal na mga bagay?
7 Paano an halimbawa ni Jesus mapadapit digdi maninigong makaapektar sa pagmansay niato sa mga dapat disiplinahon kan kongregasyon? Girumdomon na an sono sa Kasuratan na areglo para sa hudisyal na aksion sa laog kan kongregasyon nagpoprotehir sa aripompon asin tibaad makapahiro sa dinisiplinang nagkasala na magsolsol. (2 Cor. 2:6-8) Makamomondo na may nagkapira na habong magsolsol asin dapat na itiwalag, pero nakakaogmang maaraman na dakol sa sainda an sa huri minabalik ki Jehova asin sa saiyang kongregasyon. Kun an kamagurangan nagpapaheling nin arog-Cristong kaisipan, pinapangyayari ninda na magin mas madali para sa nagkasala na magsolsol asin sa kahurihurihi magbalik. Sa ngapit, tibaad dai na magirumdoman kan nagkapira sa dating mga nagkasalang ini an gabos na sono sa Kasuratan na hatol kan kamagurangan, alagad siertong magigirumdoman ninda na iginalang kan kamagurangan an saindang dignidad asin trinatar sinda na may pagkamoot.
8 Kun siring, dapat na ipaheling kan kamagurangan “an mga bunga kan espiritu,” nangorogna an arog-Cristong pagkamoot, dawa sa masakit na mga kamugtakan. (Gal. 5:22, 23) Maninigo na dai sinda noarin man maghidali na haleon sa kongregasyon an nagkasala. Dapat nindang ipaheling na gusto nindang magbalik ki Jehova an mga napapasala. Sa siring, kun an nagkasala magsolsol sa huri, arog kan ginigibo nin dakol, tibaad sia magpasalamat na marhay ki Jehova sagkod sa “balaog na mga lalaki” na pinagin mas madali para sa saiya na magbalik sa kongregasyon.—Efe. 4:8, 11, 12.
Pagpaheling nin Arog-Cristong Pagkamoot sa Panahon kan Katapusan
9. Magtao nin halimbawa kan pagpaheling ni Jesus nin pagkamoot sa saiyang mga disipulo sa praktikal na paagi.
9 Isinurat ni Lucas an sarong marahayon na halimbawa kan pagpaheling ni Jesus nin pagkamoot sa praktikal na paagi. Aram ni Jesus na, pag-abot nin panahon, sasalikopan kan Romanong mga soldados an siudad nin Jerusalem na nakatalaga sa kalaglagan, kaya mayong makakadulag. Huli kaiyan, mamomoton na pinatanidan nia an saiyang mga disipulo: “Kun maheling na nindo an Jerusalem na napapalibotan nin nagkakampong mga hukbo, dangan aramon nindo na harani na an paggaba sa saiya.” Ano an maninigo nindang gibohon? Si Jesus patienot na nagtao nin malinaw asin espesipikong mga instruksion. “Dangan an mga nasa Judea magpoon nang dumulag pasiring sa kabukidan, asin an mga nasa tahaw nia magruluwas, patin an mga nasa oma dai na magralaog sa saiya; huli ta ini mga aldaw nin pagtao nin maninigong hustisya, tanganing maotob an gabos na bagay na nasusurat.” (Luc. 21:20-22) Pagkatapos na palibotan kan Romanong mga hukbo an Jerusalem kan 66 C.E., sinunod kan mga makinuyog an mga instruksion na ini.
10, 11. Paano an pag-estudyar sa pagdulag kan enot na mga Kristiano hale sa Jerusalem makakatabang sa sato na magin andam sa pag-abot kan “dakulang kahorasaan”?
10 Kan sinda nagdudulag hale sa Jerusalem, an mga Kristiano kaipuhan na magpaheling nin arog-Cristong pagkamoot sa lambang saro, kun paanong si Cristo nagpaheling nin pagkamoot sa sainda. Sierto na kaipuhan nindang ihiras sa lambang saro an ano man na yaon sa sainda. Alagad an hula ni Jesus igwa pa nin kaotoban apuera sa pagkalaglag kan suanoy na siudad na iyan. Sia naghula: “Magkakaigwa nin dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.” (Mat. 24:17, 18, 21) Bago asin durante kan maabot na “dakulang kahorasaan” na iyan, tibaad makaeksperyensia man kita nin mga kasakitan asin kadaihan. An pagkaigwa kan kaisipan ni Cristo matabang sa sato na matagalan iyan.
11 Sa panahon na iyan, kakaipuhanon niato na sunodon an halimbawa ni Jesus, an pagpaheling nin daing kaimotan na pagkamoot. May koneksion digdi, si Pablo naghatol: “An lambang saro sa sato magpanigo sa saiyang kapwa sa kun ano an marahay para sa pagpakosog sa saiya. Huli ta dawa an Cristo dai nagpanigo sa saiyang sadiri . . . Ngonyan itogot logod sa saindo kan Dios na nagtatao nin pakatagal asin karangahan na magkaigwa kamo kan kaparehong kaisipan na yaon ki Cristo Jesus.”—Roma 15:2, 3, 5.
12. Anong klaseng pagkamoot an kaipuhan niatong pataluboon ngonyan, asin taano?
12 Si Pedro, na nag-ako kan pagkamoot ni Jesus, nagsadol man sa mga Kristiano na pataluboon an “bakong ipokritong kapadangatan na sa magturugang” asin na magpaheling nin “pagkuyog sa katotoohan.” Sinda dapat na ‘magkaminorootmootan nin makosog gikan sa puso.’ (1 Ped. 1:22) Ngonyan, orog kisa kasuarin man, kaipuhan niatong pataluboon an siring na arog-Cristong mga kualidad. Nadadagdagan na an mga panggigipit sa bilog na banwaan nin Dios. Mayo nin siisay man na maninigong magsarig sa ano man na kabtang kan daan na kinaban na ini, siring kan malinaw na pinapatunayan kan nangyari pa sanang pagkaribok sa sistema pinansial kan kinaban. (Basahon an 1 Juan 2:15-17.) Imbes, mantang parani nang parani an katapusan kan sistemang ini, kaipuhan na mas dumayupot kita ki Jehova asin sa lambang saro, na pinapatalubo an tunay na pakikikatood sa laog kan kongregasyon. Si Pablo naghatol: “Sa pagkamoot na sa magturugang magkaigwa kamo nin mamomoton na kapadangatan sa lambang saro. Sa pagtao nin onra sa lambang saro mangenot kamo.” (Roma 12:10) Asin idinoon pa iyan ni Pedro, na sinasabi: “Orog sa gabos, magkaigwa nin makosog na pagkamoot sa lambang saro, huli ta an pagkamoot nakakatahob sa dakol na kasalan.”—1 Ped. 4:8.
13-15. Paano an nagkapirang tugang nagpaheling nin arog-Cristong pagkamoot pagkatapos nin mga kalamidad?
13 Sa bilog na kinaban, midbid an Mga Saksi ni Jehova sa pagpaheling kan saindang arog-Cristong pagkamoot. Estudyare an mga Saksi na naghimate sa pangapodan na tumabang pagkatapos kan mga bagyo na nandestroso nin grabe sa dakol na lugar sa timog na parte kan Estados Unidos kan 2005. Huling napahiro kan halimbawa ni Jesus, labing 20,000 an nagboluntaryo, na an dakol binayaan an saindang komportableng harong asin seguradong trabaho tanganing tabangan an saindang nagsasakit na mga tugang.
14 Sa sarong lugar, huli sa bagyo luminangkaw an tubig sa dagat asin nakaabot sa rayong 80 kilometros sa daga, na may alon na sagkod 10 metros an langkaw. Kan magbaba an tubig, an un-tersio kan mga harong asin iba pang edipisyo na inagihan kaiyan biyong naraot. Ginamit kan mga Saksing boluntaryo hale sa nagkapirang nasyon an saindang kakayahan asin dinara ninda sa lugar na iyan an mga kasangkapan saka materyales sa pagtogdok, asin gikan sa boot na ginibo an ano man na trabahong kaipuhan. Duwang magtugang na babaeng balo an nag-impake kan saindang mga gamit sa sarong pik-ap asin nagmaneho nin labing 3,000 kilometros tanganing tumabang. Nagpawalat sa lugar na idto an saro sa magtugang, na nagtatabang sagkod ngonyan sa lokal na komite sa pag-ayuda asin naglilingkod bilang regular payunir.
15 Labing 5,600 na harong kan mga Saksi asin kan iba pa sa lugar na iyan an itinogdok liwat o hinirahay. Ano an namatean kan mga Saksi duman dapit sa pambihirang pagpaheling na ini nin pagkamoot sa sainda? An sarong tugang na babae na naraotan nin harong buminalyo sa sadit na harong na de rueda na nagtuturo an atop asin raot an kalan. An mga tugang nagtogdok nin simple alagad komportableng harong para sa saiya. Sa pagtindog sa atubangan kan saiyang maayos na bagong harong, sia napaluha huli sa pagpasalamat ki Jehova asin sa saiyang mga tugang. Sa dakol na iba pang pangyayari, an mga Saksi duman na naraotan nin harong nagdanay sa temporaryo nindang dagosan sa laog nin sangtaon o labi pa dawa tapos nang itogdok liwat an saindang harong. Taano? Tanganing an bago nindang harong magin dagosan kan mga nagtatabang sa pag-ayuda. Marahayon nanggad na halimbawa nin pagpaheling kan kaisipan ni Cristo!
Pagpaheling kan Kaisipan ni Cristo Para sa mga May Helang
16, 17. Sa anong mga paagi ikakapaheling niato an kaisipan ni Cristo para sa mga may helang?
16 Medyo kadikit sana sa sato an nakaeksperyensia na nin dakulang natural na kalamidad. Alagad haros gabos siertong makakaeksperyensia nin mga problema sa salud, magsalang sia mismo o an mga kapamilya nia. An kaisipan ni Jesus para sa mga may helang nagseserbing halimbawa para sa sato. An saiyang pagkamoot an nagpahiro sa saiya na maherak sa sainda. Kan darahon sa saiya kan mga tawo an mga may helang, “pinaomayan nia an gabos na may kamatean.”—Mat. 8:16; 14:14.
17 Ngonyan, an mga Kristiano mayo kan milagrosong kapangyarihan ni Jesus na magpaomay, alagad igwa man sinda kan mapagmalasakit na kaisipan ni Jesus para sa mga may helang. Paano iyan ipinapaheling? Bilang sarong prueba, ipinapaheling kan kamagurangan na igwa sinda kan kaisipan ni Cristo paagi sa paggibo nin mga areglo sa pagtabang sa mga may helang sa kongregasyon asin pagsierto na ikinakatao an tabang na iyan, na sa pundamental sinusunod an nasambitan sa Mateo 25:39, 40. * (Basahon.)
18. Paano ipinaheling nin duwang tugang na babae an tunay na pagkamoot sa iba, asin may anong mga resulta?
18 Siempre, an saro dai man kaipuhan na magin magurang sa kongregasyon tanganing makagibo nin marahay sa iba. Estudyare an nangyari sa 44 anyos na si Charlene, na may kanser asin sinabihan na sampulong aldaw na sana an saiyang buhay. Kan maheling an saiyang pangangaipo asin kun gurano kasakit para sa saiyang mapagpadangat na agom an pag-ataman sa saiya, duwang tugang na babae sa espirituwal, si Sharon asin Nicolette, an nagtao kan saindang bilog na panahon tanganing tabangan sia sa ultimong mga aldaw nia. An mga aldaw na iyan uminabot pa nin anom na semana, alagad ipinaheling kan duwang tugang na babae an saindang pagkamoot sagkod sa katapusan. “Masakit talaga kun aram mo na an saro dai na maoomayan,” an sabi ni Sharon. “Pero, pinakosog kami ni Jehova. Huli sa eksperyensiang iyan, kami nagin mas dayupot ki Jehova asin sa lambang saro.” An agom ni Charlene nagsabi: “Dai ko malilingawan an maboot asin praktikal na pagsuportar kan duwang mahal na tugang na ini. Huli sa saindang dalisay na motibo asin pagigin positibo, an huring pagbalong ini nagin mas madali para sa sakong maimbod na agom na si Charlene asin nakamate ako nin pisikal asin emosyonal na kaginhawahan na kinakaipuhan kong marhay. Daing sagkod akong magpapasalamat sa sainda. An saindang pagsakripisyo nagpakosog sa sakong pagtubod ki Jehova asin sa sakong pagkamoot sa satong bilog na kasararoan nin mga tugang.”
19, 20. (a) Anong limang aspekto kan kaisipan ni Cristo an napag-olayan niato? (b) Ano an determinado mong gibohon?
19 Sa seryeng ini nin tolong artikulo, napag-olayan niato an limang aspekto kan kaisipan ni Jesus asin kun paano niato maaarog an saiyang paagi nin pag-iisip asin paghiro. Magin kitang “mahoyo asin may kababaan an puso,” arog ni Jesus. (Mat. 11:29) Logod na magmaigot man kita na trataron an iba nin may kabootan, dawa kun naheheling an saindang mga pagkabakong sangkap asin kaluyahan. May kosog nin boot na kuyogon niato an gabos na kahagadan ni Jehova, dawa kun napapaatubang sa mga pagbalo.
20 Ultimo, magpaheling kita nin arog-Cristong pagkamoot sa gabos na tugang niato, siring kan ginibo mismo ni Cristo, “sagkod sa katapusan.” Paagi sa siring na pagkamoot, namimidbid kita bilang tunay na mga parasunod ni Jesus. (Juan 13:1, 34, 35) Iyo, “magpadagos logod an saindong pagkamoot na sa magturugang.” (Heb. 13:1) Dai ka magduwaduwa! Gamiton an saimong buhay tanganing omawon si Jehova asin tabangan an iba! Bebendisyonan ni Jehova an saimong sinserong paghihingoa.
[Nota sa Ibaba]
^ par. 17 Helingon an artikulong “Do More Than Say: ‘Keep Warm and Well Fed’” sa isyu kan The Watchtower na Oktubre 15, 1986.
Ikakapaliwanag daw Nindo?
• Paano ikakapaheling kan kamagurangan an kaisipan ni Cristo sa mga nagkasala?
• Taano ta an pag-arog sa pagkamoot ni Cristo nangorognang importante sa panahon na ini kan katapusan?
• Paano niato ikakapaheling an kaisipan ni Cristo para sa mga may helang?
[Mga Hapot Para sa Pag-adal]
[Ritrato sa pahina 17]
Gusto kan kamagurangan na magbalik ki Jehova an mga napapasala
[Ritrato sa pahina 18]
Paano nagpaheling nin kaisipan ni Cristo an mga Kristiano na naghale sa Jerusalem?
[Ritrato sa pahina 19]
Midbid an Mga Saksi ni Jehova sa pagpaheling nin arog-Cristong pagkamoot