Magin Makinuyog Asin Makosog an Boot Arog ni Cristo

“Kosogan nindo an saindong boot! Nadaog ko an kinaban.”—JUAN 16:33.

1. Gurano kalubos an pagkuyog ni Jesus sa Dios?

PIRMENG ginigibo ni Jesu-Cristo an kabotan nin Dios. Nungka niang inisip na dai kumuyog sa saiyang langitnon na Ama. (Juan 4:34; Heb. 7:26) Alagad dai nagin madali sa saiya na magin makinuyog huli sa saiyang kamugtakan sa daga. Poon sa kapinonan kan saiyang paghuhulit, an mga kaiwal ni Jesus, kaiba si Satanas mismo, nagmaigot na kombensiron, puersahon, o dayaon si Jesus na talikdan an saiyang kaimbodan. (Mat. 4:1-11; Luc. 20:20-25) An mga kaiwal na ini nagtao ki Jesus nin grabeng kakologan sa isip, emosyon, asin hawak. Sa katapustapusi, ipinagadan ninda sia sa hariging pasakitan. (Mat. 26:37, 38; Luc. 22:44; Juan 19:1, 17, 18) Sa gabos na ini asin sa ibong nin grabeng pagsakit, si Jesus nagdanay na “makinuyog sagkod sa kagadanan.”—Basahon an Filipos 2:8.

2, 3. Ano an manonodan niato sa pagkamakinuyog ni Jesus sa ibong kan pag-agi nia nin kasakitan?

² An eksperyensia ni Jesus bilang tawo sa daga  nagtokdo sa saiya nin bagong mga aspekto nin pagkuyog. (Heb. 5:8) Garo baga mayo nang dapat pang manodan si Jesus manongod sa paglilingkod ki Jehova. Total, sia dayupot na nakaibaiba ni Jehova sa halawigon na panahon asin nagin “pangenot na trabahador” nin Dios durante kan paglalang. (Tal. 8:30) Minsan siring, an saiyang pagtagal mismo na may pagtubod bilang tawo sa ibong nin pagsakit nagpatunay kan saiyang lubos na integridad. Si Jesus, an Aki nin Dios, nagtalubo sa espirituwal. Ano an manonodan niato sa saiyang eksperyensia?

³ Minsan ngani si Jesus sangkap na tawo, sia dai naghingoa nin solo na magdanay sa sangkap na pagkuyog. Inarang nia an tabang nin Dios tanganing magdanay na makinuyog. (Basahon an Hebreo 5:7.) Tanganing magdanay kitang makinuyog, kaipuhan man niato na magin mapakumbaba asin dayaday na mamibi. Sa dahelan na ini, hinatolan ni apostol Pablo an mga Kristiano: “Papagdanayon sa saindo an kaisipan na ini na yaon man ki Cristo Jesus,” na “nagpakumbaba asin nagin makinuyog sagkod sa kagadanan.” (Fil. 2:5-8) An ginibo ni Jesus nagpatunay na posible para sa mga tawo na magkuyog dawa sa tahaw nin maraot na sosyedad. Totoo, sangkap si Jesus, alagad kumusta an bakong sangkap na mga tawo arog niato?

Makinuyog Minsan Ngani Bakong Sangkap

4. Ano an kahulogan sa sato kan bagay na linalang kita na may sadiring kabotan?

⁴ Linalang nin Dios si Adan asin Eva na madonong na mga linalang asin may sadiring kabotan. Bilang mga naggikan sa sainda, kita man may sadiring kabotan. Ano an kahulogan kaiyan? Nangangahulogan iyan na puede kitang magdesisyon na gumibo nin marahay o gumibo nin maraot. Sa ibang pagtaram, tinawan kita nin Dios kan katalingkasan na pumiling magkuyog sa saiya o dai. An siring kadakulang katalingkasan may kaibang paninimbagan. Tunay nanggad, an satong mga desisyon dapit sa moral nangangahulogan nin buhay o kagadanan para sa sato. May epekto man iyan sa mga nasa palibot niato.

5. Ano an depisil para sa sato gabos, asin paano kita magigin mapanggana?

⁵ Huli sa minana niatong pagkabakong sangkap, bakong madali an pagkuyog. Bako pirmeng pasil na magkuyog sa mga ley nin Dios. Nagin depisil man ini ki Pablo. Sia nagsurat: “Nakakaheling ako sa mga kabtang kan sakong hawak nin saro pang ley na nakikilaban sa ley kan sakong isip asin dinadara akong bihag kan ley nin kasalan na yaon sa mga kabtang kan sakong hawak.” (Roma 7:23) Siempre, mas pasil na kumuyog kun mayong kalabot na sakripisyo, kolog, o kadepisilan. Alagad ano an reaksion niato kun magkasarongat an satong kamawotan na magin makinuyog saka “an mawot kan laman asin an mawot kan mga mata”? An negatibong mga kamawotan na ini bunga kan pagkabakong sangkap niato saka kan impluwensia kan “espiritu kan kinaban” sa palibot niato, asin makosogon iyan. (1 Juan 2:16; 1 Cor. 2:12) Tanganing malabanan iyan, dapat na ‘andamon niato an satong puso’ bago kita mapaatubang sa sarong krisis o sugot asin magin determinado kitang kumuyog ki Jehova, ano man an mangyari. (Sal. 78:8) Dakol kitang halimbawa sa Biblia kan mga nagin mapanggana huling talagang iinandam ninda an saindang puso.—Esd. 7:10; Dan. 1:8.

6, 7. Iilustrar kun paano makakatabang sa sato an personal na pag-adal sa paggibo nin madonong na mga desisyon.

⁶ An sarong paagi nin pag-andam kan satong puso iyo an mahigos na pag-adal kan Kasuratan asin mga babasahon na basado sa Biblia. Imahinara an saimong sadiri sa minasunod na situwasyon. Ipamugtak na iyan an banggi para sa saimong personal na pag-adal. Katatapos mo pa sanang arangon an espiritu ni Jehova na tabangan kang iaplikar an nanodan mo sa saiyang Tataramon. May plano kang magheling nin sarong partikular na pelikula sa TV sa masunod na banggi. Nabaretaan mo na magayon daa iyan; pero aram mo man na may mga eksena iyan na imoral asin madahas.

⁷ Hinorophorop mo an hatol ni Pablo sa Efeso 5:3: “An pakikisaro asin gabos na klase nin pagkamaati o kahanaban dai ngani masambitan dian sa saindo, siring sa maninigo sa mga banal.” Nagirumdoman mo man an sadol ni Pablo sa Filipos 4:8. (Basahon.) Mantang hinohorophorop mo an ipinasabong na hatol na ini, hinapot mo an saimong sadiri, ‘Kun tuyo kong isasapeligro an sakong puso asin isip sa siring na mga programa, sinusunod ko daw an halimbawa ni Jesus nin estriktong pagkuyog sa Dios?’ Ano an gigibohon  mo? Idadagos mo pa man daw giraray an pagheling kan pelikulang iyan?

8. Taano ta dapat niatong papagdanayon an halangkaw na mga pamantayan sa moral asin espirituwal?

⁸ Sala na ibaba niato an satong mga pamantayan sa moral asin espirituwal, na tibaad iniisip niato na igwa kita nin igong kosog na labanan an mga epekto kan maraot na pag-iriba, pati na an pakikiibaiba na puedeng paagi sa madahas asin imoral na aling-alingan. Imbes, dapat niatong protehiran an satong sadiri asin an satong mga aki sa nakakaraot na mga impluwensia kan espiritu ni Satanas. An mga naggagamit nin komputer nagmamaigot na marhay na an saindang komputer dai malaogan nin virus na puedeng makaraot sa mga file asin sa pagpunsionar kaiyan, saka kontrolon pa ngani an komputer patin gamiton iyan sa pagraot sa iba pang komputer. Bako daw na kita maninigo man na magin arog kaiyan kaalisto sa pagprotehir sa satong sadiri sa “mga katusohan” ni Satanas?—Efe. 6:11, nota sa ibaba.

9. Taano ta dapat na magin determinado kita aroaldaw na kuyogon si Jehova?

⁹ Haros aroaldaw, minsan paano kaipuhan niatong pumili kun baga kita mahiro o dai sa paagi na inooyonan ni Jehova. Tanganing magkamit nin kaligtasan, dapat niatong kuyogon an Dios asin mamuhay kaoyon kan saiyang matanos na mga prinsipyo. Paagi sa pagsunod sa halimbawa nin pagkuyog ni Cristo dawa “sagkod sa kagadanan,” ipinapaheling niato na tunay an satong pagtubod. Babalosan ni Jehova an satong kaimbodan. Si Jesus nanuga: “An makatagal sagkod sa katapusan iyo an maliligtas.” (Mat. 24:13) Malinaw nanggad, nangangaipo ini nin pagpatalubo nin tunay na kosog nin boot, arog kan ipinaheling ni Jesus.—Sal. 31:24.

Si Jesus—An Pangenot na Halimbawa nin Kosog nin Boot

10. Anong klaseng mga impluwensia an tibaad mapaatubang sa sato, asin ano an maninigo niatong gibohon?

¹⁰ Huling nakapalibot sa sato an kaisipan asin gawe-gawe kan kinaban na ini, kaipuhan niato an kosog nin boot tanganing dai kita maolakitan. An mga Kristiano napapaatubang sa mga impluwensia sa moral, sosyal, pinansial, asin nin relihion na puedeng magin dahelan na sumuway sinda sa matanos na mga dalan ni Jehova. Dakol an nakakaeksperyensia nin pagtumang kan pamilya. Sa nagkapirang nasyon, an mga institusyon sa edukasyon mas porsegidong nagpapalakop kan teoriya nin ebolusyon, asin nagdadakol an nagugusto sa ateismo. Sa atubang kan siring na mga impluwensia, dai kita puedeng magpabaya na sana. Dapat na humiro kita tanganing labanan iyan asin sa siring maprotehiran an satong sadiri. Ipinapaheling sa sato kan halimbawa ni Jesus kun paano kita magigin mapanggana.

11. Paano makakatao sa sato nin orog pang kosog nin boot an paghorophorop sa halimbawa ni Jesus?

¹¹ Sinabihan ni Jesus an saiyang mga disipulo: “Sa kinaban nagkakaigwa kamo nin kahorasaan, alagad kosogan nindo an saindong boot! Nadaog ko an kinaban.” (Juan 16:33) Dai sia noarin man nagpadaog sa impluwensia kan kinaban. Dai nia noarin man tinogotan an kinaban na papondohon sia sa paggibo kan sugo sa saiya na maghulit o na ibaba nia an saiyang mga pamantayan sa tunay na pagsamba asin tamang paggawe; maninigo na iyan man an gibohon niato. Sa pamibi, sinabi ni Jesus dapit sa saiyang mga disipulo: “Sinda bakong kabtang kan kinaban, kun paanong ako bakong kabtang kan kinaban.” (Juan 17:16) An pag-adal asin  paghorophorop sa halimbawa nin kosog nin boot ni Cristo makakatao sa sato kan kinakaipuhan na kosog nin boot na magdanay na siblag sa kinaban.

Makanood nin Kosog nin Boot ki Jesus

12-14. Magtao nin mga halimbawa kan pagpaheling ni Jesus nin kosog nin boot.

¹² Si Jesus nagpaheling nin dakulang kosog nin boot sa bilog na ministeryo nia. Sa paggamit kan saiyang autoridad bilang Aki nin Dios, sia daing takot na “naglaog sa templo asin pinalayas an gabos na nagtitinda asin nagbabakal sa templo, asin ibinalintong an mga lamesa kan mga pararibay nin kuarta asin an mga tukawan kan mga nagtitinda nin salampati.” (Mat. 21:12) Kan mag-abot an mga soldados tanganing arestaron si Jesus kan huring banggi nia sa daga, may kosog nin boot na nagpamidbid sia tanganing protehiran an saiyang mga disipulo, na nagsasabi: “Kun ako an hinahanap nindo, togotan nindong humale an mga ini.” (Juan 18:8) Dai nahaloy, sinabihan nia si Pedro na ibalik sa sarongan an saiyang espada, sa siring ipinapaheling na an gikanan kan kompiansa ni Jesus, bakong an mga armas sa daga, kundi si Jehova.—Juan 18:11.

¹³ Daing takot na ibinuyagyag ni Jesus an daing pagkamoot na falsong mga paratokdo kan panahon nia asin an salang mga katokdoan ninda. “Herak man sa saindo, mga eskriba asin mga Fariseo, mga parasaginsagin! huli ta pinipintoan nindo an kahadean kan kalangitan sa mga tawo,” an sabi sa sainda ni Jesus. “Liningawan nindo an mas magabat na mga bagay kan Ley, na iyo na ngani an hustisya asin pagkaherak patin kaimbodan. . . . Linilinigan nindo an luwas kan kopa asin kan pinggan, alagad sa laog iyan parano nin pananamsam asin pagpalabilabi.” (Mat. 23:13, 23, 25) Mangangaipo nin kaparehong kosog nin boot an mga disipulo ni Jesus huling sinda pepersegiron man asin an nagkapira sa sainda gagadanon kan mga namomoon sa falsong relihion.—Mat. 23:34; 24:9.

¹⁴ Si Jesus makosog an boot na nanindogan tumang sa mga demonyo. Sa sarong pangyayari, inatubang sia nin makosogon na lalaking sinaniban nin demonyo kaya mayo nin siisay man na kayang ikadena an tawong iyan. Daing takot na pinaluwas ni Jesus an dakol na demonyo na nagkontrol sa tawong iyan. (Mar. 5:1-13) Ngonyan, an Dios dai nagtao sa mga Kristiano nin kapangyarihan na gumibo nin siring na mga milagro. Pero, sa satong paghuhulit asin pagtotokdo, dapat man kitang makipaglaban ki Satanas, an saro na ‘buminuta sa isip kan mga dai nagtutubod.’ (2 Cor. 4:4) Arog ni Jesus, an satong mga armas “bakong sa laman, kundi makapangyarihan paagi sa Dios sa pagtumba sa mga bagay na marigonon an pagkaestablisar”—an nakagamot nin hararom alagad salang mga paniniwala sa relihion. (2 Cor. 10:4) Sa paggamit kan espirituwal na mga armas na ini, dakol kitang manonodan sa halimbawa ni Jesus.

15. Saen nakabasar an kosog nin boot ni Jesus?

¹⁵ An kosog nin boot ni Jesus nakabasar sa pagtubod, bakong sa pag-isog-isogan sana. Kita dapat na arog man kaiyan. (Mar. 4:40) Paano kita magkakaigwa nin tunay na pagtubod? Sa giraray, ginigiyahan kita kan halimbawa ni Jesus. Sia nagpaheling nin lubos na kaaraman asin kompiansa sa Kasuratan. Bilang armas, an ginamit ni Jesus bakong literal na espada kundi an espada kan espiritu, an Tataramon nin Dios. Sa dakol na beses, sinuportaran nia an saiyang mga katokdoan paagi sa pagsambit sa Kasuratan. Sa parate pinoponan nia an saiyang mga tataramon paagi sa pagsabing: “Nasusurat,” an boot sabihon, sa Tataramon nin Dios. *

16. Paano kita magkakaigwa nin orog na pagtubod?

¹⁶ Tanganing magkaigwa nin pagtubod na kayang tagalan an klase nin mga pagbalo na talagang kaiba na sa pagigin disipulo, dapat kitang magbasa asin mag-adal kan Biblia aroaldaw saka mag-atender sa Kristianong mga pagtiripon, na ilinalaog sa satong isip an mga katotoohan na iyo an  pundasyon kan pagtubod. (Roma 10:17) Dapat man niatong horophoropon—isip-isipon nin hararom—an satong nanonodan, na pinapataros iyan sa satong puso. Solamenteng an buhay na pagtubod an makakamotibar sa sato na humirong may kosog nin boot. (Sant. 2:17) Asin dapat kitang mamibi na logod tawan kita nin banal na espiritu huli ta an pagtubod kabtang kan bunga kan espiritu.—Gal. 5:22.

17, 18. Paano an sarong hoben na tugang na babae nagpaheling nin kosog nin boot sa eskuelahan?

¹⁷ Naeksperyensiahan nin sarong hoben na tugang na an ngaran Kitty kun paano nagtatao nin kosog nin boot an tunay na pagtubod. Poon sa pagkaaki, aram nia na dai nia maninigong ‘ikasupog an maogmang bareta’ sa eskuelahan, asin talagang gusto niang makatao nin marahay na patotoo sa mga kapwa nia estudyante. (Roma 1:16) Kada taon, ginigibo niang obheto na ipaabot sa iba an maogmang bareta, alagad nag-aalangan sia huli sa kawaran nin kosog nin boot. Pakalihis nin pirang taon, sia nagbalyo sa ibang eskuelahan. Sia nagsabi, “Ngonyan, mabawi ako sa mga oportunidad na pinalampas ko.” Ipinamibi ni Kitty na logod magkaigwa sia nin arog-Cristong kosog nin boot, pakamansay, asin tamang oportunidad.

¹⁸ Sa enot na aldaw kan klase, sinabihan an mga estudyante na saro-sarong magpamidbid. Nasambitan nin nagkapira an saindang relihion, na nagsasabi pa na bako man talaga sindang aktibo dian. Narealisar ni Kitty na ini na an oportunidad na ipinamibi nia. Kan sia na an magpamidbid, may kompiansa siang nagsabi, “Saro ako sa Mga Saksi ni Jehova, asin an sakong giya kun dapit sa espirituwal asin moral na mga bagay iyo an Biblia.” Mantang sia nagtataram, an nagkapirang estudyante nagtitiwitiwi. Alagad an iba naghinanyog asin kan huri naghapot. Ginamit pa ngani si Kitty kan saiyang maestra bilang marahay na halimbawa sa paninindogan para sa saiyang mga tinutubod. Ogmahon si Kitty na nakanood sia sa halimbawa nin kosog nin boot ni Jesus.

Magpaheling nin Arog-Cristong Pagtubod Asin Kosog nin Boot

19. (a) Ano an kalabot sa pagkaigwa nin tunay na pagtubod? (b) Paano niato mapapaogmang marhay si Jehova?

¹⁹ Narealisar man kan mga apostol na an saindang kosog nin boot dapat na nakabasar sa pagtubod. Nakimaherak sinda ki Jesus: “Dugangi an samong pagtubod.” (Basahon an Lucas 17:5, 6.) An pagkaigwa nin tunay na pagtubod bako sanang paniniwala na nag-eeksister an Dios. Kalabot dian an pagpatalubo nin hararom asin may pagtitiwalang relasyon ki Jehova, arog kan relasyon nin sarong sadit na aki sa maboot asin mamomoton na ama. Si Salomon pinasabngan na sumurat: “Aki ko, kun an saimong puso nagin madonong, maggagayagaya man an sakong puso. Asin an sakong mga bato maggagayagaya kun an saimong mga ngabil nagtataram nin katanosan.” (Tal. 23:15, 16) Sa kaparehong paagi, an satong may kosog nin boot na paninindogan para sa matanos na mga prinsipyo nakakapaogmang marhay ki Jehova, asin an pakaaram kaiyan nakakadugang sa satong kosog nin boot. Kun siring, pirme niatong arogon an halimbawa ni Jesus, na may kosog nin boot na naninindogan para sa katanosan!

[Nota sa Ibaba]

Ikakapaliwanag daw Nindo?

• Ano an makakatabang sa sato na magdanay na makinuyog minsan ngani kita bakong sangkap?

• Sa ano nakabasar an tunay na pagtubod, asin paano ini makakatabang sa sato na magin makosog an boot?

• Ano an magigin resulta kan pagigin makinuyog asin pagpaheling niato nin arog-Cristong kosog nin boot?

[Mga Hapot Para sa Pag-adal]

[Ritrato sa pahina 13]

‘Iinaandam daw nindo an saindong puso’ na labanan an mga sugot?

[Ritrato sa pahina 15]

Arog ni Jesus, puede niatong ipaheling an kosog nin boot na nakabasar sa pagtubod