Papagdanayon sa Saindo an Kaisipan ni Cristo
Papagdanayon sa Saindo an Kaisipan ni Cristo
“Magkaigwa kamo kan kaparehong kaisipan na yaon ki Cristo Jesus.”—ROMA 15:5.
1. Taano ta maninigo niatong hingoahon na arogon an kaisipan ni Cristo?
“MADIA kamo sa sako,” an sabi ni Jesu-Cristo. “Makanood kamo sa sako, huli ta ako mahoyo asin may kababaan an puso, asin makakakua kamo nin kaginhawahan para sa saindong kalag.” (Mat. 11:28, 29) An maogmang imbitasyon na ini nagpapahayag nanggad kan mamomoton na kaisipan ni Jesus. Mayong tawo na maorog sa saiya bilang halimbawa na dapat sunodon. Minsan ngani sia an makakamhan na Aki nin Dios, nagpaheling si Jesus nin pakikidamay asin pagpadangat, nangorogna sa mga nangangaipo.
2. Anong mga aspekto kan kaisipan ni Jesus an pag-oolayan niato?
2 Sa artikulong ini asin sa duwa pang kasunod, pag-oolayan niato kun paano niato mapapatalubo asin mapapagdanay an kaparehong kaisipan ni Jesus saka maaarog an “isip ni Cristo” sa satong buhay. (1 Cor. 2:16) Sa pangenot makonsentrar kita sa limang aspekto: an kahoyoan asin kapakumbabaan ni Jesus, an saiyang kabootan, an saiyang pagkamakinuyog sa Dios, an saiyang kosog nin boot, asin an saiyang dai nasusudyang pagkamoot.
Makanood sa Kahoyoan ni Cristo
3. (a) Ano an sarong leksion sa kapakumbabaan na itinokdo ni Jesus sa saiyang mga disipulo? (b) Ano an nagin reaksion ni Jesus kan an saiyang mga disipulo magpaheling nin mga kaluyahan?
3 Si Jesus, an sangkap na Aki nin Dios, gikan sa boot na nagdigdi sa daga tanganing maglingkod sa tahaw nin bakong sangkap asin makasalan na mga tawo. An nagkapira sa sainda iyo an magadan sa saiya sa huri. Pero, pirmeng napagdanay ni Jesus an saiyang kagayagayahan asin pagpupugol sa sadiri. (1 Ped. 2:21-23) An ‘maingat na pagheling’ sa halimbawa ni Jesus makakatabang sa sato na arog man kaiyan an gibohon kun naaapektaran kita kan mga sala asin pagkabakong sangkap nin iba. (Heb. 12:2) Inagda ni Jesus an saiyang mga disipulo na ‘pasanon an saiyang sakal kaiba nia’ asin sa siring makanood sa saiya. (Mat. 11:29, nota sa ibaba) Ano an puedeng manodan ninda? An saro, si Jesus mahoyo, asin sia mapasensia sa saiyang mga disipulo sa ibong kan saindang mga sala. Kan banggi bago sia magadan, hinanawan ni Jesus an saindang mga bitis, sa siring tinotokdoan sinda nin leksion sa pagigin “may kababaan an puso” na nungka nindang malilingawan. (Basahon an Juan 13:14-17.) Sa huri, kan si Pedro, Santiago, asin Juan dai ‘nakapagdanay na mapagbantay,’ may kabootan na inako ni Jesus na igwa sinda nin kaluyahan. “Simon, nagtotorog ka?” an hapot nia. “Magdanay kamong mapagbantay asin namimibi, tanganing dai kamo mahulog sa sugot. Siempre, an espiritu nagmamawot, alagad an laman maluya.”—Mar. 14:32-38.
4, 5. Paano makakatabang sa sato an halimbawa ni Jesus kun ano an dapat na magin reaksion niato sa mga depekto nin iba?
4 Ano an reaksion niato kun an sarong kapagtubod mahilig makikompetensia, madaling makolgan an boot, o dai tolos naghihimate sa hatol kan kamagurangan o kan “maimbod asin mapagmansay na oripon”? (Mat. 24:45-47) Minsan ngani tibaad andam kitang akoon na normal sa kinaban ni Satanas an makalaman na mga ugale, puedeng magin masakit nanggad kun naheheling niato an siring na mga pagkabakong sangkap sa satong mga tugang. Kun madali kitang mauyam sa mga depekto kan iba, kaipuhan na hapoton niato an satong sadiri, ‘Paano ko daw mas ikakapaheling an “isip ni Cristo”?’ Pagmaigotan na girumdomon na si Jesus dai naanggot sa saiyang mga disipulo, dawa kan sinda nahelingan nin espirituwal na kaluyahan.
5 Estudyare an nangyari ki apostol Pedro. Kan agdahon ni Jesus si Pedro na maglugsad sa baroto asin maglakaw sa tubig pasiring sa Saiya, talagang nakalakaw si Pedro nin kadikit na distansia. Dangan nagheling si Pedro sa bagyo nin doros asin nagpoon na mag-irarom. Naanggot daw nin grabe si Jesus asin sinabihan sia: “Iyan an dapat sa saimo! Leksion na iyan sa saimo”? Dai! “Pagkaunat tolos kan kamot ni Jesus, kinapotan nia sia asin nagsabi sa saiya: ‘Ika na kakadikit an pagtubod, taano ta nagduduwaduwa ka?’” (Mat. 14:28-31) Kun halimbawang maheling niato an garo baga kakulangan nin pagtubod nin sarong tugang, puede daw niatong iunat, kun baga, an satong kamot asin tabangan sia na magkaigwa nin orog pang pagtubod? Saro nanggad iyan na leksion na maheheling sa may kahoyoan na ginibo ni Jesus ki Pedro.
6. Ano an itinokdo ni Jesus sa saiyang mga apostol manongod sa paghihingoang magin prominente?
6 Kalabot man si Pedro sa nagpapadagos na diriskutiran kan mga apostol manongod sa kun siisay an pinakahalangkaw sa sainda. Gusto ni Santiago asin Juan na an saro sa sainda magtukaw sa too ni Jesus asin an saro sa saiyang wala sa saiyang Kahadean. Kan maaraman iyan ni Pedro asin kan iba pang apostol, sinda naanggot na gayo. Aram ni Jesus na posibleng marhay na an ugaleng ini nakua ninda sa sosyedad na dinakulaan ninda. Pinarani nia sinda sa saiya asin sinabihan: “Aram nindo na an mga namamahala sa mga nasyon nagpapakangkagurangnan sa sainda asin an darakulang tawo nagkakapot nin autoridad sa sainda. Bakong siring kaini dian sa tahaw nindo; kundi an siisay man na boot na magin dakula sa saindo dapat na iyo an magin paralingkod sa saindo, asin an siisay man na gustong magin enot sa saindo dapat na iyo an magin oripon nindo.” Dangan sinambit ni Jesus an saiya mismong halimbawa: “Kun paanong an Aki nin tawo nagdigdi, bakong tanganing paglingkodan, kundi tanganing maglingkod asin itao an saiyang kalag bilang pantubos na karibay nin dakol.”—Mat. 20:20-28.
7. Paano an lambang saro sa sato makakakontribwir sa pagkasararo sa kongregasyon?
7 An paghorophorop sa mapakumbabang kaisipan ni Jesus makakatabang sa sato na ‘gumawe na mas hababa’ sa tahaw kan satong mga tugang. (Luc. 9:46-48) Iyan nakakakontribwir sa pagkasararo. Siring sa ama nin dakulang pamilya, gusto ni Jehova na an saiyang mga aki “mag-erok na magkairiba na may pagkasararo,” na magkasurundo. (Sal. 133:1) Namibi si Jesus sa saiyang Ama na magkasararo an gabos na tunay na Kristiano, tangani na “an kinaban makaaram na ika an nagsugo sa sako asin na ika namoot sa sainda siring kan pagkamoot mo sa sako.” (Juan 17:23) Sa siring, an pagkasararo niato nakakatabang na mamidbid kita bilang mga parasunod ni Cristo. Tanganing kamtan an siring na pagkasararo, dapat na kapareho ni Cristo an magin pagmansay niato sa mga pagkabakong sangkap nin iba. Si Jesus mapagpatawad, asin itinokdo nia na paagi sana sa pagigin mapagpatawad na makakaako kita nin kapatawadan.—Basahon an Mateo 6:14, 15.
8. Ano an manonodan niato sa halimbawa kan haloy nang mga lingkod nin Dios?
8 Dakol man an manonodan niato kun aarogon niato an pagtubod kan mga tugang na dakol na taon nang nag-aarog ki Cristo. Arog ni Jesus, parate nindang sinasabot an mga pagkabakong sangkap nin iba. Naaraman ninda na an pagpaheling nin arog-Cristong pagmalasakit bako sanang nakakatabang sa sato na “magpasan kan mga kaluyahan kan mga bakong makosog” kundi nakakakontribwir man sa pagkasararo. Apuera kaini, nakakadagka iyan sa bilog na kongregasyon na ipaheling an kaisipan ni Cristo. Iyan man an gusto ninda para sa saindang mga tugang kun paanong iyan man an gusto ni apostol Pablo para sa mga Kristiano sa Roma: “Itogot logod sa saindo kan Dios na nagtatao nin pakatagal asin karangahan na magkaigwa kamo kan kaparehong kaisipan na yaon ki Cristo Jesus, tanganing paagi sa sarong ngoso kamo oroyon na magpamuraway sa Dios asin Ama kan satong Kagurangnan na Jesu-Cristo.” (Roma 15:1, 5, 6) Iyo, an satong nagkakasararong pagsamba nagtatao nin kaomawan ki Jehova.
9. Taano ta kaipuhan niato an banal na espiritu tanganing maarog an halimbawa ni Jesus?
9 An pagigin “may kababaan an puso” ikinonektar ni Jesus sa kahoyoan, na kabtang kan bunga kan banal na espiritu nin Dios. Kun siring, sa pag-adal sa halimbawa ni Jesus, kaipuhan niato an banal na espiritu ni Jehova, tanganing maarog niato nin tama an halimbawang iyan. Maninigo niatong hagadon sa pamibi an banal na espiritu nin Dios asin magmaigot na pataluboon an mga aspekto kan bunga kaiyan—“pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpupugol sa sadiri.” (Gal. 5:22, 23) Paagi sa siring na pagsunod sa arogan nin kapakumbabaan asin kahoyoan na itinao ni Jesus, mapapaogma niato an satong langitnon na Ama, si Jehova.
May Kabootan an Pagtratar ni Jesus sa Iba
10. Paano nagpaheling nin kabootan si Jesus?
10 An kabootan kabtang man kan bunga kan banal na espiritu. Pirmeng may kabootan an pagtratar ni Jesus sa iba. Namatean kan gabos na sinserong naghahanap ki Jesus na sinda ‘maboot niang inako.’ (Basahon an Lucas 9:11.) Ano an manonodan niato sa kabootan na ipinaheling ni Jesus? An maboot na tawo mainamigo, maduminamay, asin marahay an boot. Arog kaiyan si Jesus. Sia naherak sa mga tawo “huli ta sinda naanitan asin nagkaralagalag siring sa mga karnero na mayong pastor.”—Mat. 9:35, 36.
11, 12. (a) Sabihon an sarong pangyayari na naheling sa gibo an pagmalasakit ni Jesus. (b) Ano an manonodan nindo sa halimbawa na sinambit digdi?
11 Ipinaheling man ni Jesus sa gibo an saiyang pagkaherak asin pagmalasakit. Estudyare an sarong halimbawa. Sa laog nin 12 taon, an sarong babae bakong normal an pag-awas nin dugo. Aram nia na segun sa Ley ni Moises, sia maati sa seremonyal na paagi asin pati na an siisay man na magduta sa saiya. (Lev. 15:25-27) Pero, an reputasyon asin pagtratar ni Jesus siertong nakakombensir sa saiya na kaya asin talagang papaomayan sia ni Jesus. Padagos niang sinasabi: “Kun tikwilon ko dawa an saiya sanang pang-ibabaw na mga gubing maoomayan ako.” Pakatapos na kosogan an saiyang boot, ginibo nia iyan asin tolos niang namatean na sia naomayan.
12 Aram ni Jesus na may nagduta sa saiya, asin sia nangalagkalag tanganing maheling kun siisay iyan. An babae, na posibleng marhay na natatakot maanggotan huling linapas nia an Ley, nagtatakig na huminuruhod sa pamitisan ni Jesus asin sinabi an bilog na katotoohan. Sinagwe daw ni Jesus an makaheherak asin nagsasakit na babaeng ini? Dai nanggad! “Aki,” an sabi nia na may pag-asegurar, “pinaomayan ka kan saimong pagtubod. Lakaw sa katoninongan.” (Mar. 5:25-34) Sierto nanggad na naranga siang madangog an siring na maboot na mga tataramon!
13. (a) Paano napapalaen an saboot ni Jesus kisa kan sa mga Fariseo? (b) Paano trinatar ni Jesus an mga aki?
13 Bakong arog kan matagas an puso na mga Fariseo, nungkang ginamit ni Cristo an saiyang autoridad tanganing orog pang pagabatan an iba. (Mat. 23:4) Sa kabaliktaran, maboot asin mapasensiang itinokdo nia sa iba an mga dalan ni Jehova. Si Jesus mapagpadangat na kaibaiba kan saiyang mga parasunod, na pirmeng mamomoton asin maboot, sarong tunay na katood. (Tal. 17:17; Juan 15:11-15) Dawa an mga aki pamugtak an boot ki Jesus, asin malinaw na pamugtak man an boot nia sa sainda. Dawa sibot siang marhay, ipopondo nia an saiyang ginigibo tanganing tawan nin panahon an mga aki. Sa sarong pangyayari, mantang nag-iisip pa man giraray na sinda importante arog kan mga namomoon sa relihion sa palibot ninda, an saiyang mga disipulo nagprobar na pugolan an mga tawo na darahon ki Jesus an saindang saradit na aki tanganing duotan nia. Dai nagustohan ni Jesus an ginibo kan saiyang mga disipulo. Sinabihan nia sinda: “Pabayae nindo na dumolok sa sako an saradang na aki; dai nindo sinda pagpugolan, huli ta an kahadean nin Dios para sa mga siring sa sainda.” Dangan, ginagamit an mga aki tanganing magtao nin praktikal na leksion, sia nagsabi: “Totoong sinasabi ko sa saindo, An siisay man na dai mag-ako sa kahadean nin Dios na arog sa sarong sadang na aki dai nanggad makakalaog dian.”—Mar. 10:13-15.
14. Anong mga pakinabang an nakukua nin mga aki sa marahay na atension sa sainda?
14 Isip-isipa nguna kun ano an mamamatean kan nagkapira sa mga aking idto kun sinda nasa edad na pakalihis nin dakol na taon, magigirumdoman ninda na ‘kinugos sinda ni Jesu-Cristo asin binendisyonan sinda.’ (Mar. 10:16) An mga aki ngonyan maogma man na gigirumdomon an kamagurangan asin an iba pa na nagpapaheling sa sainda nin tunay na interes. Mas mahalaga, kun an mga aki pinapahelingan nin siring na tunay na interes sa kongregasyon poon sa pagkaaki, manonodan ninda na an espiritu ni Jehova yaon sa saiyang banwaan.
Magpaheling nin Kabootan sa Bakong Maboot na Kinaban
15. Taano ta dai niato maninigong ipagngalas an kawaran nin kabootan ngonyan?
15 Dakol na tawo ngonyan an nag-iisip na mayo sinda nin panahon na magpaheling nin kabootan sa iba. Kun siring, sa eskuelahan, sa trabaho, mantang nagbibiahe, asin sa ministeryo, dapat na atubangon kan banwaan ni Jehova aroaldaw an espiritu kan kinaban. An daing kabootan na ugale puedeng ikadesganar niato, alagad dai niato maninigong ipagngalas iyan. Pinasabngan ni Jehova si Pablo na patanidan kita na sa buhay sa delikadong “huring mga aldaw” na ini, an tunay na mga Kristiano mapapaatubang sa mga tawong “mamomoton sa sainda man sana, . . . dai nin natural na kapadangatan.”—2 Tim. 3:1-3.
16. Paano niato mapapaoswag sa kongregasyon an arog-Cristong kabootan?
16 Sa ibong na lado, an nakakarepreskong kamugtakan sa laog kan tunay na Kristianong kongregasyon kabaliktaran kan sa bakong maboot na kinaban. Paagi sa pag-arog ki Jesus, an lambang saro sa sato puedeng makakontribwir sa marahay na kamugtakan na iyan. Paano niato iyan magigibo? Enot sa gabos, dakol na nasa kongregasyon an nangangaipo kan satong tabang asin pagparigon sa boot huling sinda may mga problema sa salud o iba pang depisil na mga kamugtakan. Sa “huring mga aldaw” na ini, tibaad nagdadakol an siring na mga problema, alagad iyan bako nanggad bago. Kan mga panahon kan Biblia, an mga Kristiano nagkaigwa man nin kaagid na mga problema. Huli kaiyan, an pagtabang angay pa man giraray ngonyan kun paanong angay iyan na gibohon kan mga Kristiano na nabuhay kaidto. Halimbawa, sinadol ni Pablo an mga Kristiano na “magtaram na may pagranga sa mga kalag na nagmomondo nin makuri, suportaran an mga maluya, magin matinios sa gabos.” (1 Tes. 5:14) Nangangahulogan ini na ipaheling niato sa gibo an arog-Cristong kabootan.
17, 18. Ano an nagkapirang paagi na maaarog niato an kabootan ni Jesus?
17 May paninimbagan an mga Kristiano na ‘maboot na akoon an saindang mga tugang,’ trataron sinda nin siring kan pagtratar sa sainda ni Jesus, na nagpapaheling nin tunay na pagmakolog sa mga tibaad dakol na taon nang kamidbid niato asin sa mga tibaad dai pa niato kamidbid. (3 Juan 5-8) Kun paanong si Jesus nagsadiring boot na magpaheling nin pagmalasakit sa iba, maninigo na iyo man kita, na pirmeng nakakarepresko sa iba.—Isa. 32:2; Mat. 11:28-30.
18 An lambang saro sa sato puedeng magpaheling nin kabootan paagi sa pagkaigwa nin aktibong interes sa ikakarahay kan iba. Humanap nin mga paagi asin oportunidad na gibohon iyan. Maghingoang tumabang! “Sa pagkamoot na sa magturugang magkaigwa kamo nin mamomoton na kapadangatan sa lambang saro,” an sadol ni Pablo, na nagsasabi pa: “Sa pagtao nin onra sa lambang saro mangenot kamo.” (Roma 12:10) Iyan nangangahulogan nin pagsunod sa halimbawa ni Cristo, na mamomoton asin maboot na tinatratar an iba, asin nakakanood na magpaheling nin “pagkamoot na mayo nin pagsaginsagin.” (2 Cor. 6:6) Arog kaini an pagkaladawan ni Pablo sa siring na arog-Cristong pagkamoot: “An pagkamoot matinios asin maboot. An pagkamoot bakong maimon, iyan dai nananagsag, dai nagigin maabhaw.” (1 Cor. 13:4) Imbes na magtanom nin raot nin boot sa satong mga tugang, himateon logod niato an konseho: “Magin maboot sa lambang saro, mapagmalasakit sa mamomoton na paagi, na lubos na nagpapatarawadtawadan kun paanong an Dios man lubos na nagpatawad sa saindo paagi ki Cristo.”—Efe. 4:32.
19. Ano an marahay na mga ibubunga kan pagpaheling nin arog-Cristong kabootan?
19 An pagmamaigot niatong mapatalubo asin ikapaheling an arog-Cristong kabootan sa gabos na panahon asin situwasyon magtatao sa sato nin nagsosopay na balos. An espiritu ni Jehova makakahiro nin daing olang sa kongregasyon, na matabang sa gabos na ikapaheling an mga aspekto kan bunga kan espiritu. Dugang pa, kun sinusunod niato an arogan na iwinalat ni Jesus asin tinatabangan an iba na gibohon man iyan, an satong maogma asin nagkakasararong pagsamba matao nin kagayagayahan sa Dios mismo. Kun siring, pirme kitang magmaigot na ipaheling an kahoyoan asin kabootan ni Jesus sa pagtratar niato sa iba.
Ikakapaliwanag daw Nindo?
• Paano ipinaheling ni Jesus na sia “mahoyo asin may kababaan an puso”?
• Paano si Jesus nagpaheling nin kabootan?
• Ano an nagkapirang paagi nin pagpaheling niato kan arog-Cristong kahoyoan asin kabootan sa bakong sangkap na kinaban na ini?
[Mga Hapot Para sa Pag-adal]
[Ritrato sa pahina 8]
Kun lumuya an pagtubod nin sarong tugang, siring kan nangyari ki Pedro, matabang daw kita?
[Ritrato sa pahina 10]
Paano kamo makakatabang na mamatean sa kongregasyon an kabootan?