Pinapahalagahan daw Nindo an Ginibo ni Jehova sa Pagligtas sa Saindo?
Pinapahalagahan daw Nindo an Ginibo ni Jehova sa Pagligtas sa Saindo?
“Omawon si Jehova na Dios nin Israel, huli ta sia nagtao nin atension asin naggibo nin pagliligtas sa saiyang banwaan.”—LUC. 1:68.
1, 2. Paano puedeng iilustrar an pagigin seryoso kan presente niatong kamugtakan, asin anong mga hapot an pag-oolayan niato?
IMAHINARON na saro kamong pasyente sa ospital. Yaon kamo sa sarong kuarto na an gabos na pasyente parareho an kamatean, sarong helang na nakakagadan asin mayo nin aram na bolong. Kan mabaretaan nindo na may doktor na pinapangenotan an pagdiskobre nin bolong, kamo nagkaigwa nin paglaom. Naghahalat nanggad kamo nin ano man na bareta manongod dian. Sarong aldaw, nabaretaan nindo na may nadiskobre nang bolong! An doktor naggibo nin dakulaon na mga pagsasakripisyo tanganing madiskobre an bolong. Ano an magigin reaksion nindo? Segurado na dakulaon an paggalang asin pagpahalaga nindo sa tawong nagpagin posible na kamo asin an dakol na iba pa makaligtas sa kagadanan.
2 An senaryong iyan tibaad garo baga sobra man, alagad kita gabos talagang nasa arog kaiyan na situwasyon. An lambang saro sa sato nasa kamugtakan na mas grabe pa ngani kisa sa ilinadawan sa enotan. Kita nangangaipong marhay nin paraligtas. (Basahon an Roma 7:24.) Naggibo si Jehova nin dakulang pagsasakripisyo tanganing iligtas kita. Naggibo man nin dakulang pagsasakripisyo an saiyang Aki. Kun siring, estudyaran niato an apat na pundamental na hapot. Taano ta kaipuhan kitang iligtas? Ano an isinakripisyo ni Jesus tanganing iligtas kita? Ano an isinakripisyo ni Jehova? Asin paano niato ikakapaheling na pinapahalagahan niato an pagliligtas nin Dios?
Kun Taano ta Kaipuhan Kitang Iligtas
3. Paano ikakakomparar an kasalan sa sarong epidemya?
3 Oyon sa dai pa sana nahahaloy na pagkalkulo, an saro sa pinakagrabeng mga epidemya sa kasaysayan nin tawo iyo an trangkaso Española kan 1918, na guminadan nin manampulong milyon na tawo. An ibang mga helang mas nakakagadan. Tibaad mas dikit na tawo an apektado kaiyan, alagad an mayoriya nagagadan. * Minsan siring, paano kun ikokomparar niato an kasalan sa arog kaiyan na epidemya? Girumdomon an mga tataramon sa Roma 5:12: “Paagi sa sarong tawo an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.” Siento porsiento an apektado kan kasalan, huli ta an gabos na bakong sangkap na tawo nagkakasala. (Basahon an Roma 3:23.) Asin pira an nagagadan? Si Pablo nagsurat na an kasalan nagbubunga nin kagadanan “sa gabos na tawo.”
4. Ano an punto de vista ni Jehova sa lawig kan satong buhay, asin paano iyan napapalaen sa punto de vista nin dakol ngonyan?
4 Para sa dakol ngonyan, normal na sana an kasalan asin kagadanan. An kinakahaditan ninda iyo an inaapod ninda na mayo pa sa panahon na pagkagadan, alagad para sa sainda “natural” na sana an kagadanan na luway-luway na nakakaapektar sa mga tawo paagi sa paggurang. Madali sana nanggad na malingawan nin mga tawo an punto de vista kan Kaglalang. An satong buhay mas halipot nanggad kisa sa katuyohan nia na magin lawig kaiyan. An totoo, mayo nin tawo na nabuhay dawa sa laog nin “sarong aldaw” sa punto de vista ni Jehova. (2 Ped. 3:8) Sa siring, an Tataramon nin Dios nagsasabi na an satong buhay halipot arog nin panahon nin pagtubo nin doot o arog nin hinangos. (Sal. 39:5; 1 Ped. 1:24) Kaipuhan na pirme niatong girumdomon an punto de vistang iyan. Taano? Kun nasasabotan niato an pagigin grabe kan “helang” na nakakaapektar sa sato, mas maaapresyar niato an halaga kan “bolong”—an pagliligtas sa sato.
5. Ano an nagin epekto nin kasalan sa lambang saro sa sato?
5 Tanganing masabotan kun gurano kagrabe an kasalan asin an mga resulta kaiyan, dapat niatong hingoahon na masabotan an epekto kaiyan sa sato. Tibaad depisil iyan na masabotan sa primero huling dahel sa kasalan dai niato noarin man naeksperyensiahan an sangkap na buhay na yaon kan enot ki Adan asin Eva. Huling sangkap an isip asin hawak, puede nindang kontrolon an saindang kaisipan, pagmate, asin paghiro. Sa siring, mayong nakakaolang sa pag-oswag ninda bilang mga lingkod ni Jehova Dios, tanganing otobon an dakulaon na potensial ninda. Imbes, iinapon ninda an mahalagang marhay na regalong iyan. Paagi sa pagpili na magkasala ki Jehova, nawara sa sainda asin sa mga aki ninda an klase nin buhay na katuyohan ni Jehova para sa sainda. (Gen. 3:16-19) Kadungan kaiyan, pinapagsakit ninda an saindang sadiri asin kita kan grabeng “helang” na pinag-oolayan niato. Tama sanang kinondenar sinda ni Jehova. Alagad para sa sato, iinaalok nia an paglaom na maligtas.—Sal. 103:10.
Kun Ano an Ginibo ni Jesus sa Pagligtas sa Sato
6, 7. (a) Paano enot na ipinaheling ni Jehova na an satong kaligtasan mangangaipo nin dakulaon na pagsasakripisyo? (b) Ano an manonodan niato sa mga atang na idinolot ni Abel asin kan mga patriarka na nabuhay bago itinao an Ley?
6 Aram ni Jehova na kaipuhan an dakulaon na pagsasakripisyo tanganing iligtas an mga naggikan ki Adan asin Eva. Sa hula na nakasurat sa Genesis 3:15, naaraman niato an pagsasakripisyo na kalabot sa pagliligtas. Si Jehova matao nin “banhi,” sarong paraligtas, na iyo an biyong malaglag ki Satanas pag-abot nin panahon. Minsan siring, an paraligtas na iyan magsasakit sa paggibo kaiyan, na malulugadan sa bool sa piguratibong paagi. Iyan garo baga makolog asin nakakapaluya, alagad ano an boot sabihon kaiyan? Ano man nanggad an kaipuhan na tioson kan Pinili ni Jehova?
7 Tanganing iligtas an katawohan sa kasalan, an paraligtas kaipuhan na magtao nin paagi nin pagbayad sa kasalan tanganing ipakipag-ulian an mga tawo sa Dios paagi sa paghale kan mga epekto nin kasalan. Ano an kalabot dian? Kaidto pa igwa na nin mga nagpaparisa na kakaipuhanon an pag-atang. Kan an enot na maimbod na tawong si Abel magdolot nin mga atang na hayop ki Jehova, nakua nia an pag-oyon nin Dios. Kan huri, an may takot sa Dios na mga patriarka na arog ni Noe, Abraham, Jacob, asin Job nagdolot nin kaparehong mga atang, na nagpaogma sa Dios. (Gen. 4:4; 8:20, 21; 22:13; 31:54; Job 1:5) Pakalihis nin mga siglo, mas lininaw kan Ley ni Moises an manongod sa pag-atang.
8. Ano an ginigibo kan halangkaw na saserdote sa taonan na Aldaw nin Pagbayad sa Kasalan?
8 Kabilang sa pinakamahalagang mga atang na kahagadan kan Ley an idinodolot sa taonan na Aldaw nin Pagbayad sa Kasalan. Sa aldaw na iyan, an halangkaw na saserdote may sunod-sunod na simbolikong mga ginigibo. Sia nagdodolot nin mga atang ki Jehova para sa pagbayad sa mga kasalan—enot para sa grupo nin mga saserdote, dangan para sa mga tribo na bakong saserdote. An halangkaw na saserdote minalaog sa Kabanalbanaleng kuarto kan tabernakulo o templo, na dian sia sana an puedeng maglaog asin sa sarong aldaw sanang ini kan taon. Dian iwiniwirik nia an dugo kan mga atang sa atubangan kan kaban kan tipan. Sa ibabaw kan sagradong lalagan na iyan, kun beses minalataw an maliwanag asin makinang na panganoron, na nagrerepresentar sa presensia ni Jehova Dios.—Ex. 25:22; Lev. 16:1-30.
9. (a) Sa Aldaw nin Pagbayad sa Kasalan, siisay an ilinaladawan kan halangkaw na saserdote, asin ano an kahulogan kan idinodolot niang mga atang? (b) Sa ano naglaladawan an paglaog kan halangkaw na saserdote sa Kabanalbanale?
9 Si apostol Pablo pinasabngan na ihayag an kahulogan kan simbolikong mga ginigibong idto. Ipinaheling nia na an halangkaw na saserdote naglaladawan sa Mesiyas, si Jesu-Cristo, mantang an pagdolot kan mga atang nangangahulogan kan kagadanan ni Cristo bilang atang. (Heb. 9:11-14) An sangkap na atang na iyan matao nin tunay na kabayadan sa kasalan para sa duwang grupo nin mga tawo—an grupong saserdote na kompuesto kan 144,000 na linahidan nin espiritung mga tugang ni Cristo asin an “ibang mga karnero.” (Juan 10:16) Kun minalaog an halangkaw na saserdote sa Kabanalbanale, ilinaladawan nia an paglaog ni Jesus sa langit mismo tanganing ipresentar ki Jehova Dios an halaga kan atang na pantubos.—Heb. 9:24, 25.
10. An hula sa Biblia nagpapaheling na an Mesiyas makakaeksperyensia nin ano?
10 Malinaw nanggad, an pagliligtas sa mga naggikan ki Adan asin Eva magigin dakulaon na pagsasakripisyo. Kaipuhan na iatang kan Mesiyas an saiyang buhay! An mga propeta sa Hebreong Kasuratan iprinesentar an katotoohan na ini sa malinaw na pananaram. Halimbawa, si propeta Daniel direktang nagsabi na an “Mesiyas na Poon” “tataposon,” o gagadanon, tanganing “bayadan an sala.” (Dan. 9:24-26) Ihinula ni Isaias na an Mesiyas isisikwal, pepersegiron, asin gagadanon, o tutusokon, tanganing pasanon an mga kasalan kan bakong sangkap na mga tawo.—Isa. 53:4, 5, 7.
11. Paano ipinaheling kan Aki ni Jehova an pagigin andam na isakripisyo an saiyang sadiri para sa kaligtasan niato?
11 Bago sia nagdigdi sa daga, aram kan bugtong na Aki nin Dios kun anong pagsasakripisyo an gigibohon nia sa pagligtas sa sato. Sia kaipuhan na magsakit nin grabe dangan gagadanon. Kan itokdo sa saiya kan saiyang Ama an mga katotoohan na iyan, sia daw nagsayuma o nagrebelde? Sa kabaliktaran, sia andam na suminunod sa instruksion kan saiyang Ama. (Isa. 50:4-6) Siring man, mantang si Jesus nasa daga, makinuyog na ginibo nia an kabotan kan saiyang Ama. Taano? Nagtao sia nin sarong simbag paagi sa mga tataramon na ini: “Namomotan ko an Ama.” Nagtao sia nin saro pang simbag: “Mayo nin siisay man na may pagkamoot na orog pa kaini, na itao nin saro an saiyang kalag para sa saiyang mga katood.” (Juan 14:31; 15:13) Kaya an pagkamoot kan Aki ni Jehova igwa nin dakulang papel sa kaligtasan niato. Dawa ngani kinaipuhan niang isakripisyo an saiyang sangkap na buhay bilang tawo, sia naogmang gibohon iyan para sa kaligtasan niato.
Kun Ano an Ginibo ni Jehova sa Pagligtas sa Sato
12. An pantubos kapahayagan kan kabotan niisay, asin taano ta itinao nia iyan?
12 Bako si Jesus an nagdesisyon na itao an atang na pantubos o kun paano iyan itatao. Imbes, an paaging ini nin pagliligtas sarong pangenot na aspekto kan kabotan ni Jehova. Ipinarisa ni apostol Pablo na an altar sa templo, na dian idinodolot an mga atang, nagrerepresentar sa kabotan ni Jehova. (Heb. 10:10) Kaya an pagliligtas sa sato paagi sa atang ni Cristo sarong bagay na sa pangenot utang niato ki Jehova. (Luc. 1:68) Iyan kapahayagan kan saiyang sangkap na kabotan asin kan dakulang pagkamoot nia sa mga tawo.—Basahon an Juan 3:16.
13, 14. Paano makakatabang sa sato an halimbawa ni Abraham na pahalagahan an ginibo ni Jehova para sa sato?
13 Anong pagsasakripisyo an ginibo ni Jehova tanganing ipaheling an saiyang pagkamoot sa sato sa paaging ini? Depisil niatong masabotan iyan. Minsan siring, igwa nin salaysay sa Biblia na makakatabang sa sato na mas malinaw na masabotan an bagay na iyan. Ipinagibo ni Jehova sa maimbod na tawong si Abraham an sarong bagay na depisilon—idolot bilang atang an saiyang aking si Isaac. Bueno, si Abraham sarong mamomoton na ama. Sinabi sa saiya ni Jehova na si Isaac “an bugtong mong aki na namomotan mong gayo.” (Gen. 22:2) Pero, nasabotan ni Abraham na an paggibo kan kabotan ni Jehova mas importante pa ngani kisa sa pagkamoot nia ki Isaac. Si Abraham kuminuyog. Minsan siring, dai tinogotan ni Jehova si Abraham na gibohon an gigibohon Nia mismo pag-abot nin panahon. An Dios nagsugo nin anghel tanganing pugolan si Abraham bago nia mismo iatang an saiyang aki. Si Abraham nagin determinadong marhay na kuyogon an saiyang Dios sa depisil na pagbalong ini kaya segurado sia na an solamenteng paglaom nia na maheling liwat nin buhay an hoben na lalaki iyo an pagkabuhay liwat. Alagad lubos an saiyang pagtubod na gigibohon nin Dios an siring na pagbuhay liwat. Sa katunayan, sinabi ni Pablo na talagang inako liwat ni Abraham si Isaac paagi sa pagkabuhay liwat “sa simbolikong paagi.”—Heb. 11:19.
14 Maiimahinar daw nindo an namamatean na kolog ni Abraham mantang nag-aandam sia na iatang an saiyang Aki? Sa sarong parte, an eksperyensia ni Abraham nakakatabang na iladawan an namatean ni Jehova kan iatang an saro na inapod niang “an sakong Aki, an namomotan.” (Mat. 3:17) Pero, girumdomon na an kolog na namatean ni Jehova posibleng marhay na mas grabe. Sia asin an saiyang Aki maogmang nag-iba-iba sa laog nin minilyon, tibaad binilyon pa ngani, na taon. An Aki magayagayang nagtrabaho kaiba kan Ama bilang saiyang namomotan na marhay na “pangenot na trabahador” asin Representante sa Pagtaram, “an Tataramon.” (Tal. 8:22, 30, 31; Juan 1:1) Dai niato lubos maisip an tinagalan ni Jehova kan an saiyang Aki pinapasakitan, pinag-oolog-olog, dangan ginadan na garo kriminal. Dakulaon an ginibong pagsasakripisyo ni Jehova sa pagligtas sa sato! Kun siring, paano niato ikakapaheling na pinapahalagahan niato an pagliligtas na iyan?
Paano Nindo Ikakapaheling na Pinapahalagahan Nindo an Pagliligtas?
15. Paano kinompleto ni Jesus an dakulaon na akto nin pagbayad sa kasalan, asin ano an nagin posible huli kaini?
15 Kinompleto ni Jesus an dakulaon na akto nin pagbayad sa kasalan pagkatapos na sia buhayon liwat sa langit. Kan makaibanan nia giraray an saiyang namomotan na Ama, iprinesentar nia sa Saiya an halaga kan saiyang atang. Dakulaon na mga bendisyon an suminunod. An lubos na kapatawadan puede nang makamtan, enot para sa mga kasalan kan linahidan na mga tugang ni Cristo, dangan kan sa “bilog na kinaban.” Huli sa atang na iyan, ngonyan an gabos na sinserong nagsosolsol sa saindang mga kasalan asin nagigin tunay na mga parasunod ni Cristo puedeng magkaigwa nin malinig na kamugtakan sa atubangan ni Jehova Dios. (1 Juan 2:2) Paano iyan minaaplikar sa saindo?
16. Paano niato puedeng iilustrar kun taano ta maninigo niatong pahalagahan an pagliligtas na pinagin posible ni Jehova para sa sato?
16 Balikan niato an ilustrasyon sa enotan. Ipamugtak ta na an doktor na nakadiskobre kan bolong sa helang madolok sa mga pasyente sa saindong kuarto sa ospital, asin ini an iinaalok: An siisay man na pasyente na maako kan pagbolong asin masunod sa preskripsion na sistema nin pagkakan seguradong maoomayan. Paano kun an kadaklan sa mga kapwa nindo pasyente magsayumang sumunod sa instruksion kan doktor, na nakikidiskutir na depisilon an pagtumar kan bolong o pagsunod sa preskripsion na sistema nin pagkakan? Iyan man daw an gigibohon nindo, minsan ngani igwa kamo nin nakakakombensir na prueba na talagang nakakabolong iyan? Siempre bako! Daing duda na mapasalamat kamo para sa bolong dangan maingat nindong susunodon an mga instruksion kan doktor, na tibaad sinasabi pa ngani nindo sa iba an saindong desisyon. Orog pa nanggad dian, an lambang saro sa sato maninigo na magmawot na ipaheling ki Jehova kun gurano nanggad an pagpahalaga niato sa pagliligtas na pinagin posible nia paagi sa atang na pantubos kan saiyang Aki.—Basahon an Roma 6:17, 18.
17. Sa anong mga paagi ikakapaheling nindo an saindong pagpahalaga sa ginibo ni Jehova sa pagligtas sa saindo?
17 Kun pinapahalagahan niato an ginibo ni Jehova asin kan saiyang Aki sa pagligtas sa sato sa kasalan asin kagadanan, ipapaheling niato iyan. (1 Juan 5:3) Lalabanan niato an satong tendensia na magkasala. Nungka kitang magpadaog sa tuyong pagkakasala asin magkaigwa nin mapagsaginsagin na dobleng pamumuhay na parateng kasabay kaiyan. An siring na pamumuhay garo man sana pagsabing dai talaga niato pinapahalagahan o pinapasalamatan an pantubos. Imbes, ipapaheling niato an satong pagpahalaga paagi sa pagmamaigot na magdanay na malinig sa pagheling nin Dios. (2 Ped. 3:14) Ipapaheling niato iyan paagi sa pagsabi sa iba kan marahayon na paglaom na kaligtasan, tanganing magkaigwa man sinda nin malinig na kamugtakan sa atubangan ni Jehova asin nin paglaom para sa daing sagkod na ngapit. (1 Tim. 4:16) Seguradong bawi nanggad an gabos na panahon asin kosog na ikakatao niato sa pag-omaw ki Jehova asin sa saiyang Aki! (Mar. 12:28-30) Isip-isipa iyan! Maaasahan niato an panahon na kita biyong maoomayan sa kasalan. Puede kitang mabuhay na sangkap asin daing sagkod, na iyong katuyohan nin Dios na magin buhay niato—na gabos nagin posible huli sa ginibo ni Jehova sa pagligtas sa sato!—Roma 8:21.
[Nota sa Ibaba]
^ par. 3 Sinasabi na an naapektaran kan trangkaso Española mga 20 porsiento sagkod sa labing 50 porsiento kan populasyon kan kinaban kan panahon na iyan. An virus puedeng guminadan nin mga 1 sagkod 10 porsiento kan mga tawo na naapektaran kaiyan. Sa kabaliktaran, an Ebola virus mas bakong komun, alagad sa nagkapirang lugar na nagkaigwa kaiyan haros 90 porsiento kan mga apektado kaiyan an nagadan.
Ano an Isisimbag Nindo?
• Taano ta kaipuhan nindong marhay an pagliligtas?
• Ano an epekto sa saindo kan ginibong pagsasakripisyo ni Jesus?
• Ano an saboot nindo manongod sa regalo ni Jehova na pantubos?
• Namomotibar kamong gibohon an ano bilang balos sa mga probisyon ni Jehova para sa kaligtasan nindo?
[Mga Hapot Para sa Pag-adal]
[Ritrato sa pahina 27]
Sa Aldaw nin Pagbayad sa Kasalan, an halangkaw na saserdote nagin buhay na ladawan kan Mesiyas
[Ritrato sa pahina 28]
An pagigin andam ni Abraham na idolot an saiyang aki dakol an itinotokdo sa sato manongod sa mas dakula nanggad na pagsasakripisyo ni Jehova