Relihion​—Ako an Nagpili o an Sakong mga Magurang?

SA Polandia, dakol an nagsasabi sa mga Saksi ni Jehova, “Ini na an kinagimatan kong relihion; digdi na man ako magagadan.” Ipinaparisa kaiyan na, sa pagmansay ninda, an relihion ipinapamana sa sunod-sunod na henerasyon. Sa saindong lugar, igwa man daw nin siring na saboot dapit sa relihion? Ano an parateng nagigin resulta nin siring na pagmansay? An relihion nagigin na sanang pormalidad asin tradisyon nin pamilya. Puede man daw ining mangyari sa mga Saksi ni Jehova na nag-ako nin marahayon na espirituwal na pamana hale sa saindang mga magurang o apoon?

Dai iyan nangyari ki Timoteo, na giniyahan kan saiyang debotong ina asin lola na magtubod asin mamoot sa tunay na Dios. May kaaraman na si Timoteo sa banal na mga kasuratan “poon sa pagkaomboy.” Pag-abot nin panahon, kaiba kan saiyang ina asin lola, nakombensir si Timoteo na Kristianismo an totoo. Sia “nakombensir na tubodon” an mga nadangog nia sa Kasuratan mapadapit ki Jesu-Cristo. (2 Tim. 1:5; 3:14, 15) Kaya, minsan ngani ginigibo kan Kristianong mga magurang ngonyan an saindang pinakamakakaya na tabangan an mga aki ninda na magin lingkod ni Jehova, kaipuhan na pataluboon kan mga aki mismo an pagmawot na magin lingkod nia.—Mar. 8:34.

Kun an lambang saro gustong maglingkod ki Jehova huli sa pagkamoot asin papagdanayon an saiyang integridad ano man an mangyari, dapat siang makombensir na magtubod paagi sa nakakadagkang pangangatanosan. Dangan an saiyang pagtubod magigin marigon asin nakagamot na marhay.—Efe. 3:17; Col. 2:6, 7.

An Papel kan mga Aki

“Kaidto pa naniniwala na ako na an mga Saksi ni Jehova an may tunay na relihion,” an paliwanag ni Albert, * na nagdakula sa sarong pamilya na mga Saksi, “alagad nadedepisilan akong akoon an sinasabi ninda manongod sa kun paano ako maninigong mamuhay.” Kun ika sarong hoben, tibaad arog man sa saiya an saimong opinyon. Taano ta dai hingoahon na aramon kun ano an kalabot sa pamumuhay na gusto nin Dios para sa sato dangan ikaogmang marhay an paggibo kan kabotan nia? (Sal. 40:8) “Talagang namibi ako,” an sabi ni Albert. “Kan primero, nasakitan ako. Kinaipuhan kong magpumirit na mamibi. Minsan siring, dai nahaloy naniwala ako na puede akong magin mahalaga sa pagheling nin Dios kun pinagmamaigotan kong gibohon an tama. Pinakosog ako kaini na gumibo nin kinakaipuhan na mga pagbabago.” Paagi sa pagpatalubo nin personal na relasyon ki Jehova, magkakaigwa ka nin pagmawot na gibohon an kahagadan nia sa sato.—Sal. 25:14; Sant. 4:8.

Isip-isipa an sarong kawat na kinawat nindo, siring baga nin dama o partikular na isport. Kun dai nindo aram an mga regulasyon o bako kamong matibay magkawat kaiyan, tibaad magin  nakakalangkag iyan. Pero, kun manodan nindo an mga regulasyon asin magin matibay magkawat kaiyan, bako daw na aantisiparon nindo an sunod na kawat, na naggigibo pa ngani nin mga paagi na makakawat? Totoo man iyan sa Kristianong mga aktibidad. Kaya magsadiring boot na mag-andam para sa Kristianong mga pagtiripon. Aktibong makikabtang dian. Iyo nanggad, ano man an saindong edad, tibaad maparigon pa ngani nindo an iba paagi sa saindong halimbawa!—Heb. 10:24, 25.

Totoo man iyan kun sinasabi mo sa iba an manongod sa saimong pagtubod. Ini maninigo man na gibohon huli sa pagkamoot, bakong huli ta napipiritan sana. Hapoton an saimong sadiri: ‘Taano ta gusto kong sabihon sa iba an manongod ki Jehova? Ano an mga dahelan kun taano ta dapat kong mamotan sia?’ Kaipuhan mong mamidbid si Jehova bilang sarong mamomoton na Ama. Sia nagsabi paagi ki Jeremias: “Talagang hahanapon nindo ako asin makukua nindo ako, huli ta hahanapon nindo ako sa bilog nindong puso.” (Jer. 29:13, 14) Ano an tibaad kahagadan kaini sa saimo? “Dapat kong bagohon an sakong kaisipan,” an sabi ni Jakub. “Poon sa pagkaaki, ako nag-aatender sa mga pagtiripon asin nakikikabtang sa ministeryo, alagad an mga aktibidad na ini nagin garo baga rutina na sana. Talagang nagin aktibo ako sa katotoohan kaidto sanang mamidbid ko nin orog si Jehova asin makapatalubo nin personal na relasyon sa saiya.”

An marahay asin nakakapakosog na asosasyon konektado nanggad sa kun gurano nindo ikinakaogma an saindong ministeryo. “Sia na naglalakaw na kaiba nin mga madonong magigin madonong,” an sabi kan ipinasabong na talinhaga. (Tal. 13:20) Kaya, makikatood sa mga nagmamaigot na maabot an espirituwal na mga pasohan asin naoogma sa paglilingkod ki Jehova. Si Jola nagsabi: “Nakakaparigon an pakikiasosyar sa dakol na hoben na espirituwal an kaisipan. Pinonan ko nang makikabtang nin regular sa ministeryo na may dakulang kagayagayahan.”

An Papel kan mga Magurang

“Nagpapasalamat akong marhay sa sakong mga magurang sa pagtokdo sa sako manongod ki Jehova,” an sabi ni Jola. Iyo, an mga magurang puedeng magkaigwa nin makosog na impluwensia sa desisyon kan saindang mga aki. Si apostol Pablo nagsurat: “Kamo, mga ama, . . . padagos na padakulaon [an saindong mga aki] sa disiplina asin pagtatanos nin isip gikan ki Jehova.” (Efe. 6:4) An ipinasabong na sadol na ini malinaw na nagpapaheling na an papel kan mga magurang iyo na itokdo sa saindang mga aki an mga dalan ni Jehova, bakong an sa sainda. Imbes na ilaog sa isip kan saindong mga aki an gusto kutana nindong makamtan ninda, marahayon nanggad kun matatabangan nindo sinda na magin pasohan ninda na mamuhay kaoyon kan mga katuyohan ni Jehova!

Puede nindong itadom sa isip kan saindong mga aki an mga tataramon ni Jehova asin ‘magtaram kamo manongod dian kun kamo nagtutukaw sa saindong harong asin kun kamo naglalakaw sa dalan asin kun kamo naghihigda asin kun kamo minabangon.’ (Deut. 6:6, 7) “Pirme niamong pinag-oolayan an manlaenlaen na paagi kan bilog na panahon na ministeryo,” an paggirumdom ni Ewa asin Ryszard, na may tolong aking lalaki. An resulta? “Ginusto kan mga aki na magpalista sa Teokratikong Paadalan sa Pagmiministro mantang akion pa sinda, nagin mga parahayag, asin pag-abot nin panahon sinda mismo an nagdesisyon na magpabautismo. Kan huri, sinda nagpayunir asin may naglingkod sa Bethel.”

 Mahalaga nanggad an marahay na halimbawa nin mga magurang. Si Ryszard nagsabi, “Determinado kami na dai magkaigwa nin duwang klaseng pamumuhay, na iba an paggawe sa harong asin iba man sa kongregasyon.” Kun siring, hapoton an saimong sadiri: ‘Ano daw an naheheling sa sako kan sakong mga aki? Naheheling daw ninda na talagang namomotan ko si Jehova? An pagkamoot daw na ini naoobserbaran ninda sa sakong mga pamibi asin rutina nin personal na pag-adal? Naheheling daw ninda iyan sa sakong saboot dapit sa paglilingkod sa langtad, pag-aling-aling, asin materyal na mga bagay saka sa sinasabi ko manongod sa ibang mga miembro kan kongregasyon?’ (Luc. 6:40) Maoobserbaran kan mga aki an ginigibo mo sa aroaldaw asin maririsa ninda an ano man na pagkakalaen kan sinasabi asin kan ginigibo mo.

Mahalaga an disiplina sa pagpadakula sa mga aki. Minsan siring, an ipinasabong na Tataramon nin Dios nagsasabi sa sato na ‘patuodon an aki oyon sa dalan para sa saiya.’ (Tal. 22:6) Si Ewa asin Ryszard nagsabi, “Nagtatagama kami nin panahon na konduktahan nin kanya-kanyang pag-adal sa Biblia an lambang aki.” Siempre, an mga magurang an madesisyon kun kaipuhan nin kanya-kanyang pakikipag-adal sa lambang aki. Ano man an kamugtakan, an sarong aki kaipuhan na trataron bilang indibiduwal. Nangangaipo ini nin pagigin madaling makibagay asin pagigin rasonable. Halimbawa, imbes na basta na sana sabihon sa saindong mga aki na maraot an sarong kinabanon na musika, taano ta dai ipaheling sa sainda kun paano magibo nin madonong na mga desisyon, asin kun paano napapalabot an mga prinsipyo sa Biblia?

Puedeng aram nanggad kan saindong mga aki kun ano an inaasahan nindo sa sainda asin puedeng garo baga oyon man sinda sa mga gusto nindo. Pero, kaipuhan nindong aboton an saindang puso. Girumdomon, “an intension sa puso nin tawo siring sa hararom na katubigan, alagad an tawong mapagrisa iyo an masakdo kaiyan.” (Tal. 20:5) Magin mapagrisa, aramon an senyales nin ano man na tibaad nakatagong problema sa puso kan saindong mga aki, asin humiro tolos-tolos. Ipaheling na kamo nagmamakolog asin magpalataw nin angay na mga hapot, na dai nin ano man na isinasahot sa sainda. Pero, magin maingat na dai magparahapot nin sobra. An sinserong pagmakolog nindo makakaabot sa puso ninda asin makakatabang sa saindo na tabangan sinda.

An Papel kan Kongregasyon

Bilang saro sa mga lingkod nin Dios, puede daw nindong tabangan an mga hoben sa kongregasyon  na pahalagahan an espirituwal na pamanang naako ninda? Minsan ngani mga magurang an may paninimbagan sa pagsasanay sa saindang mga aki, an ibang mga miembro kan kongregasyon, nangorogna an kamagurangan, makakasuportar sa saindang paghihingoa. Partikularmenteng mahalaga na hingoahon na tabangan an mga aki na an ama o an ina bakong Saksi.

Ano an magigibo kan kamagurangan tanganing tabangan an mga hoben na mamotan si Jehova asin mamatean ninda na kaipuhan asin pinapahalagahan sinda? Si Mariusz, na naglilingkod bilang paraataman sa sarong kongregasyon sa Polandia, nagsabi: “An kamagurangan maninigong makikomunikar, makikomunikar, makikomunikar sa mga hoben. Iyan maninigo na bako sanang kun may maglataw na mga problema kundi sa ibang kamugtakan man—sa ministeryo, pagkatapos kan mga pagtiripon, o sa iba pang impormal na kamugtakan.” Taano ta dai hapoton an mga hoben kun ano an saboot ninda manongod sa kongregasyon? An siring na bukas na komunikasyon nakakatabang sa mga hoben na magin dayupot sa kongregasyon asin mamatean ninda na kabtang sinda kaiyan.

Kun kamo magurang sa kongregasyon, hinihingoa daw nindong mamidbid an mga hoben sa saindong kongregasyon? Minsan ngani naglilingkod na ngonyan bilang sarong magurang sa kongregasyon, si Albert, na sinambit sa enotan, nakaeksperyensia nin manlaenlaen na pagbalo kan sia hoben pa. Sia nagsabi, “Bilang hoben na adulto, kinaipuhan ko an personal na pagsongko sa sako bilang pagpastor.” An kamagurangan makakapaheling man nin personal na interes sa mga hoben paagi sa pagpamibi para sa saindang espirituwal na kapakanan.—2 Tim. 1:3.

Marahay para sa mga hoben na aktibong makikabtang sa mga aktibidad kan kongregasyon. Ta kun dai, tibaad magkonsentrar sinda sa pag-aabot nin kinabanon na mga pasohan. Kamong mga mas may edad, puede daw nindong ibanan sinda sa ministeryo asin magin katood ninda? Makiibaiba man sa mga hoben, na nagreresulta sa pagtitiwala asin pakikikatood. Nagigirumdoman ni Jola: “Sarong tugang na babaeng payunir an nagpaheling nin personal na interes sa sako. Sia an nakaibanan ko sa ministeryo kan kaenot-enoteng maglingkod ako na gikan na sa boot ko.

An Saindong Personal na Pagpili

Mga hoben, hapoton an saindong sadiri: ‘Ano an mga pasohan ko? Kun dai pa ako bautisado, pasohan ko daw iyan?’ An desisyon na magpabautismo maninigong gikan sa puso na pano nin pagkamoot ki Jehova, bako sa ano man na obligasyon na sono sa tradisyon nin pamilya.

Iyo, logod na magin tunay na Katood nindo si Jehova, asin magin kayamanan nindo an katotoohan. Ipinahayag ni Jehova paagi ki propeta Isaias: “Dai ka mangalagkalag, huli ta ako an saimong Dios.” Magigin kaibaiba nindo si Jehova sagkod na kamo katood nia. Tunay nanggad na papakosogon nia kamo asin ‘kakapotan nia kamo nin marigon sa saiyang toong kamot nin katanosan.’—Isa. 41:10.

[Nota sa Ibaba]

[Ritrato sa pahina 4]

Pagmaigotan na aramon an nasa puso kan saindong aki

[Ritrato sa pahina 6]

An desisyon na magpabautismo minagikan sa puso na pano nin pagkamoot ki Jehova