May Iskedyul daw Kamo Para sa Pag-adal sa Biblia?

KAN nakaaging taon, ipinaisi kan Namamahalang Grupo an sarong pagliliwat sa iskedyul kan pagtiripon kan kongregasyon na nagtao nin mas dakol na panahon para sa pag-adal asin pag-orolay sa Biblia bilang pamilya. Kun ika sarong payo nin pamilya, seguradohon na igwa kamo kan saimong agom asin mga aki nin makahulogan asin regular na pampamilyang pag-adal sa Biblia. Bobooton nin mga mag-agom na mayo nin aki na gamiton an panahon na ini tanganing magkaibanan na pag-adalan an Biblia. An daing agom na mga tugang na lalaki asin babae na mayo nin paninimbagan sa pamilya magagamit na marhay an panahon na ini para sa personal na pag-adal sa Biblia.

Dakol an nagpahayag nin pag-apresyar sa areglo na magkaigwa nin banggi nin Pampamilyang Pagsamba. Halimbawa, si Kevin, na sarong magurang sa kongregasyon, nagsurat: “An tataramon na ‘salamat’ bakong igo tanganing ipahayag an namamatean kan samong kongregasyon. Bilang kamagurangan, pinag-olayan niamo kun paano mi gagamiton an libreng bangging ini tanganing gibohon kun ano talaga an sinabi kan Namamahalang Grupo—mag-adal kaiba kan samong pamilya.”

Si Jodi, na an agom sarong magurang sa kongregasyon, nagsurat: “Igwa kami nin tolong aking babae, na 15, 11, asin 2 anyos. Kasuarin pa sana, nagbalyo kami sa kongregasyon na naggagamit nin pagtaram paagi sa senyas. Dakol na panahon asin paghihingoa an kaipuhan tanganing makapag-andam para sa gabos na pagtiripon. Ngonyan, huli sa pagliliwat na ini, igwa na kami nin dagdag na sarong banggi na nakakatabang sa samo na magkonsentrar sa pampamilyang pagsamba!”

Si John asin JoAnn, na sarong mag-agom na regular payunir, nagsurat: “Kaidto, bakong regular an samong pampamilyang pag-adal sa Biblia huli ta kaipuhan ming isingit iyan sa manlaenlaen na aktibidad kan kongregasyon. An bagong areglong ini balaog hale ki Jehova na nagpaparepresko sa sato sa espirituwal—kun ginagamit niato sa tamang paagi an panahon na iyan.”

Si Tony, na daing agom na tugang na lalaki na mga 25 anyos na, itinatagama an Martes na banggi para sa saiyang personal na pag-adal. Ginagamit nia an ibang panahon kan semana tanganing mag-andam para sa mga pagtiripon kan kongregasyon. Minsan siring, nagsabi si Tony, “Nangorognang inaantisipar ko an Martes.” Taano? “An bangging iyan an espesyal na panahon ko para ki Jehova.” Ipinaliwanag ni Tony: “Sa laog nin mga duwang oras, pinag-aadalan ko an mga tema na nagpapakosog sa relasyon ko ki Jehova. Huling igwa ako nin mas dakol na panahon sa pag-adal nahohorophorop ko an mga bersikulo sa Biblia na binabasa ko.” An resulta? “An hatol ni Jehova mas nakakatadom na marhay sa sakong puso ngonyan kisa kaidto.” Puede daw siang magtao nin halimbawa? “Sa librong Insight, nabasa ko an manongod sa pagigin magkatood ni David asin Jonatan. Dakol an nanodan ko sa pagigin bakong maimot ni Jonatan. An saiyang halimbawa nakatabang sa sako na maheling nin mas malinaw kun ano an kahulogan nin pagigin tunay na katood. Talagang inaantisipar ko na makadiskobre nin dakol pa kan siring na kayamanan kun Martes na banggi!”

Daing duda, an gabos na lingkod ni Jehova makikinabang na marhay kun an dagdag na panahon na itinao sa sainda ngonyan ginagamit ninda para sa makahulogan na pag-adal sa Biblia asin pampamilyang pagsamba.