Mga Hapot Hale sa mga Parabasa

Ano an manonodan niato sa Talinhaga 24:27?

Sa pagsadol sa sarong hoben na lalaki, an kagsurat kan Talinhaga nagsabi: “Andama an saimong gibohon sa luwas, asin andama iyan para sa saimo sa oma. Pagkatapos, itogdok mo man an saimong pamilya.” Anong punto an idinodoon sa ipinasabong na talinhagang ini? Na an lalaki maninigo na mag-andam nin tama bago magpakasal asin magpamilya, na aram an mga paninimbagan na kaiba sa siring na kapanugaan.

Kan nakaagi, an kahulogan kan bersikulong ini ipinapaliwanag kun beses na bako sanang sekular na trabaho an dapat asikasohon nin agom na lalaki asin ama kundi dapat na hingoahon man niang pakosogon, o parigonon, an saiyang pamilya, halimbawa paagi sa espirituwal na pagtotokdo. Minsan ngani totoo asin sono sa Kasuratan nanggad an ideyang iyan, garo baga bako iyan an pangenot na punto kan bersikulong ini. Taano ta bako? Isip-isipa an duwang dahelan.

Enot, an pagtogdok na sinasambit sa bersikulong ini dai nangangahulogan nin pagpakosog, o pagparigon, sa sarong nag-eeksister nang pamilya. Imbes, an punto kaiyan iyo an literal na pagtogdok nin harong. An tataramon na trinadusir na “itogdok” puede man na magin piguratibo, na nangangahulogan nin pagtogdok, o pag-establisar, nin pamilya—an boot sabihon, pag-agom asin pagkaigwa nin mga aki.

Ikaduwa, idinodoon kan bersikulong ini an tamang pagkasunodsunod sa paggibo nin mga bagay-bagay, na garo baga nagsasabing, “Enot gibohon mo ini; dangan gibohon mo iyan.” Kun siring, isinusuherir daw kan talinhagang ini na maninigo niatong enoton an mga paninimbagan sa sekular kisa sa espirituwal? Dai nanggad!

Kan mga panahon kan Biblia, kun gusto nin sarong lalaki na ‘itogdok an saiyang pamilya,’ o mag-establisar nin pamilya paagi sa pag-agom, kaipuhan niang hapoton an saiyang sadiri, ‘Andam na daw ako na mag-asikaso asin magsuportar sa magigin agom ko asin sa tibaad magigin mga aki mi?’ Bago magpamilya, kaipuhan niang asikasohon an saiyang mga oma o pananom. Sa siring, arog kaini an malinaw asin direktang pagkatradusir kan Today’s English Version sa bersikulong ini: “Dai ka magtogdok nin saimong harong asin dai ka mag-establisar nin harong sagkod na dai pa andam an saimong mga oma, asin sagkod na dai ka pa segurado na makakapaghanap-buhay ka.” Aplikado daw ngonyan an iyo man sanang prinsipyo?

Iyo. An sarong lalaki na gustong mag-agom kaipuhan na mag-andam nin tama para sa paninimbagan na iyan. Kun kaya kan saiyang hawak, kaipuhan siang magtrabaho. Siempre, an pagpapagal nin sarong lalaki tanganing asikasohon an saiyang pamilya maninigo na bako sanang para sa materyal na mga bagay. Ipinaparisa kan Tataramon nin Dios na an sarong lalaki na dai inaasikaso an pisikal, emosyonal, asin espirituwal na mga pangangaipo kan saiyang pamilya orog pa karaot kisa sa saro na dai nin pagtubod! (1 Tim. 5:8) Huli kaini, sa pag-andam para sa pag-agom asin pagpamilya, maninigo na hapoton nin hoben na lalaki an saiyang sadiri kan mga hapot na arog kaini: ‘Andam na daw ako na magsustento sa pamilya? Andam na daw ako na magin espirituwal na payo nin pamilya? Maootob ko daw an paninimbagan na konduktahan nin regular na pag-adal sa Biblia an sakong agom asin mga aki?’ Tunay nanggad na idinodoon kan Tataramon nin Dios an mahalagang marhay na mga paninimbagan na iyan.—Deut. 6:6-8; Efe. 6:4.

Kaya an sarong hoben na lalaki na naghahanap nin aagomon maninigo na maingat na pag-isipan an prinsipyong yaon sa Talinhaga 24:27. Siring man, marahay na hapoton nin sarong hoben na babae an saiyang sadiri kun andam na siang otobon an mga paninimbagan bilang agom asin ina. An sarong hoben na mag-agom puedeng hapoton an saindang sadiri nin kaagid na mga hapot kun iniisip an posibilidad na magpadakula nin mga aki. (Luc. 14:28) An pamumuhay kaoyon kan siring na ipinasabong na paggiya makakatabang sa banwaan nin Dios na malikayan an grabeng kamondoan asin na magkaigwa nin nakakakontentong buhay pampamilya.

[Blurb sa pahina 12]

Anong mga hapot manongod sa pag-agom an maninigong ihapot nin sarong hoben na lalaki sa saiyang sadiri?