Pagpapadanay nin Pagkakatood sa Daing Pagkamoot na Kinaban

“An mga bagay na ini ipinagboboot ko sa saindo, na kamo magkaminorootmootan.”—JUAN 15:17.

1. Taano ta kinaipuhan kan mga Kristiano kan enot na siglo na magdanay na dayupot na magkakatood?

DURANTE kan ultimong banggi ni Jesus sa daga, dinagka nia an saiyang maimbod na mga disipulo na magdanay na magkakatood. Amay pa kan bangging iyan, sinabi nia na an pagkamoot na ipinaheling ninda sa lambang saro an mapamidbid sa sainda bilang saiyang mga parasunod. (Juan 13:35) An mga apostol kaipuhan na magdanay na dayupot na magkakatood tanganing matagalan ninda an mga pagbalo sa ngapit asin maotob an gibohon na madali nang iasignar sa sainda ni Jesus. Sa katunayan, an mga Kristiano kan enot na siglo namidbid huli sa saindang makosog na debosyon sa Dios asin sa lambang saro.

2. (a) Determinado kita na gibohon an ano, asin taano? (b) Anong mga hapot an pag-oolayan niato?

² Ngonyan, nakakaogma nanggad na makabilang sa pambilog na kinaban na organisasyon na an mga miembro nagsusunod sa halimbawa kan mga Kristianong idto kan enot na siglo! Determinado kitang kuyogon an pagboot ni Jesus na magpaheling nin tunay na pagkamoot sa lambang saro. Minsan siring, durante kan huring mga aldaw na ini, an kadaklan bakong maimbod asin dai nagpapaheling nin natural na kapadangatan. (2 Tim. 3:1-3) An pakikikatood ninda sa parate paimbabaw asin  nang-aaprobetsar. Tanganing mapagdanay niato an satong midbidan bilang tunay na mga Kristiano, dai niato dapat arogon an siring na mga ugale. Kun siring, pag-olayan niato an mga minasunod: Ano an pundasyon nin marahay na pagkakatood? Paano kita magkakaigwa nin marahay na mga katood? Noarin niato kaipuhan na taposon an pakikikatood? Asin paano niato mapagdadanay an nakakapakosog na pagkakatood?

Sa Ano Nakabasar an Marahay na Pagkakatood?

3, 4. Sa ano nakabasar an pinakamakosog na pagkakatood, asin taano?

³ An pundasyon nin pinakamakosog na pagkakatood iyo an pagkamoot ki Jehova. Si Hadeng Salomon nagsurat: “Kun may saro na kayang daogon an nagsosolo, an duwa makakapanindogan tumang sa saiya. Asin an lubid na tinolotolo dai tolos mapapatod.” (Ecl. 4:12) Kun si Jehova an ikatolong lubid sa pagkakatood, magdadanay an pagkakatood na iyan.

⁴ Totoo, an mga dai namomoot ki Jehova puede man na magkaigwa nin nakakakontentong pakikikatood. Alagad kun an magkatood nagigin dayupot sa lambang saro huling pareho nindang namomotan an Dios, magigin makosog an saindang pagkakatood. Kun magkaigwa nin dai pagkasinabotan, tatrataron nin tunay na magkatood an lambang saro sa paagi na nakakapaogma ki Jehova. Kun poprobaran kan mga nagtutumang sa Dios na magkaigwa nin pagkabaranga, maaaraman kan mga kaiwal na ini na dai mararaot an pagkakatood kan tunay na mga Kristiano. Sa bilog na kasaysayan, pinatunayan kan mga lingkod ni Jehova na andam sindang magadan imbes na magtraydor sa lambang saro.—Basahon an 1 Juan 3:16.

5. Taano ta nagdanay nanggad an pagkakatood ni Rut asin Noemi?

⁵ Daing duda, puede kitang magkaigwa kan pinakanakakakontentong pagkakatood sa mga tawong namomoot ki Jehova. Estudyare an halimbawa ni Rut asin Noemi. An nagin pagkakatood kan mga babaeng ini kabilang sa pinakakahangahangang isinurat sa Biblia. Taano ta nagdanay nanggad an saindang pagkakatood? Ihinayag ni Rut an dahelan kan sabihon nia ki Noemi: “An saimong banwaan magigin sakong banwaan, asin an saimong Dios sakong Dios. . . . Siring logod an gibohon ni Jehova sa sako asin dugangan pa iyan kun may ibang bagay puera sa kagadanan na magpasuhay sa sakuya asin sa saimo.” (Rut 1:16, 17) Malinaw na si Rut asin Noemi parehong may hararom na pagkamoot sa Dios, asin tinogotan ninda an pagkamoot na ini na makaimpluwensia sa kun paano ninda tinatratar an lambang saro. Bilang resulta, parehong binendisyonan ni Jehova an mga babaeng ini.

Kun Paano Magkakaigwa nin Marahay na mga Katood

6-8. (a) An nagdadanay na pagkakatood resulta nin ano? (b) Paano puedeng kamo na an mag-enot tanganing magkaigwa nin mga katood?

⁶ Ipinapaheling kan halimbawa ni Rut asin Noemi na an marahay na pagkakatood bakong pagkanorongod sana. An pundasyon kaiyan iyo an pagkamoot nin lambang saro ki Jehova. Alagad an nagdadanay na pagkakatood resulta nin pagmamaigot asin pagsasakripisyo. Dawa an magturugang sa laog kan Kristianong mga pamilya na nagsasamba ki Jehova kaipuhan na maghingoang magin dayupot na magkakatood. Kun siring, paano kamo magkakaigwa nin marahay na mga katood?

⁷ Kamo na an mag-enot. Dinagka ni apostol Pablo an saiyang mga katood sa kongregasyon sa Roma na ‘sundan an dalan nin pagkamapag-istimar.’ (Roma 12:13) Kalabot sa pagsunod sa literal na dalan an sunod-sunod  na lakad. Siring man, kalabot sa pagigin mapag-istimar an sunod-sunod na saradit asin regular na gibo. Mayo nin siisay man na puedeng maglakaw para sa saindo sa dalan nin pagkamapag-istimar, sabi ngani. (Basahon an Talinhaga 3:27.) An sarong paagi na puede kamong magin mapag-istimar iyo na imbitaran sa sarong simpleng pagkakan an laen-laen na indibiduwal sa kongregasyon. Puede daw nindong gibohon na magin regular na kabtang kan saindong rutina an pagpaheling nin pagkamapag-istimar sa mga miembro kan saindong kongregasyon?

⁸ An saro pang paagi na kamo na an mag-enot tanganing magkaigwa nin mga katood iyo na agdahon an laen-laen na indibiduwal na makaiba nindo sa paghuhulit. Kun kamo naghuhulit sa sarong kagharong asin nadadangog nindo an saindong kaiba na nagtataram gikan sa puso manongod sa saiyang pagkamoot ki Jehova, natural sanang mas mapapadayupot kamo sa indibiduwal na iyan.

9, 10. Anong halimbawa an itinao ni Pablo, asin paano niato sia maaarog?

⁹ Pahiwason an saindong kapadangatan. (Basahon an 2 Corinto 6:12, 13.) Namatean na daw nindo na garo baga mayo ni saro sa saindong kongregasyon na puedeng magin katood nindo? Kun iyo, posible daw na linilimitaran nindo an saindong pagmansay kun siisay an puedeng magin katood nindo? Si apostol Pablo nagtao nin marahay na halimbawa sa pagpahiwas kan saiyang kapadangatan. May panahon kaidto na nungka niang iisipon na magkaigwa nin dayupot na pakikikatood sa mga bakong Judio. Minsan siring, sia nagin “apostol sa mga nasyon.”—Roma 11:13.

¹⁰ Dugang pa, dai linimitaran ni Pablo an saiyang pakikikatood sa saiya sanang mga kaedad. Halimbawa, sinda ni Timoteo nagin dayupot na magkatood minsan ngani dakula an lagwat kan edad ninda asin magkalaen an saindang pinaghalean. Ngonyan, pinapahalagahan na marhay nin dakol na hoben an saindang pakikikatood sa mga mas may edad nang miembro kan kongregasyon. “Igwa akong namomotan na marhay na amiga na labi nang 50 anyos,” an sabi ni Vanessa, na labi pa sanang 20 anyos. “Nasasabi ko sa saiya an ano man na nasasabi ko sa mga amiga na kaedad ko. Asin sia nagmamakolog na marhay sa sako.” Paano nagkakaigwa nin siring na pagkakatood? Si Vanessa nagsabi: “Kinaipuhan kong hanapon an pagkakatood na ini asin dai sana maghalat na umabot iyan sa sako.” Andam daw kamong makikatood sa mga bako nindong kaedad? Tatawan nanggad kamo ni Jehova nin balos sa saindong mga paghihingoa.

11. Ano an manonodan niato sa halimbawa ni Jonatan asin David?

¹¹ Magin maimbod. “An tunay na kaibaiba mamomoton sa gabos na panahon, asin tugang na namumundag para sa oras nin kasakitan,” an isinurat ni Salomon. (Tal. 17:17) Kan isinusurat an mga tataramon na iyan, tibaad an nasa isip ni Salomon iyo an nagin pakikikatood ki Jonatan kan saiyang ama na si David. (1 Sam. 18:1) Gusto ni Hadeng Saul na an saiyang aking si Jonatan an magmana kan trono nin Israel. Alagad inako ni Jonatan an katunayan na si David an pinili ni Jehova para sa pribilehiong ini.  Bakong arog ni Saul, si Jonatan dai nauri ki David. Dai nia ikinaanggot an pag-omaw na inako ni David, ni naniwala man sia sa pagpakaraot na pinalakop ni Saul manongod ki David. (1 Sam. 20:24-34) Kita daw arog ni Jonatan? Kun an satong mga katood nagkakaigwa nin mga pribilehio, kita daw naoogma para sa sainda? Kun sinda nagsasakit, sinda daw rinaranga asin sinusuportaran niato? Kun nakakadangog kita nin nakakaraot na tsismis manongod sa sarong katood, tolos daw niatong pinaniniwalaan iyan? O, arog ni Jonatan, maimbod daw niatong idinedepensa an satong katood?

Kun Noarin Kaipuhan na Taposon an Pagkakatood

12-14. Sa anong kadepisilan napapaatubang an nagkapirang inaadalan sa Biblia, asin paano niato sinda matatabangan?

¹² Kun an sarong inaadalan sa Biblia magpoon nang gumibo nin mga pagbabago sa saiyang estilo nin pamumuhay, tibaad madepisilan nanggad sia kun dapit sa pakikikatood. Tibaad may mga katood sia na ikinakaogma niang makaibaiba alagad sinda dai namumuhay kaoyon kan mga pamantayan kan Biblia sa moral. Kan nakaagi, tibaad regular siang nakikiibaiba sa sainda. Pero, ngonyan naheheling nia na an mga aktibidad ninda puedeng magin maraot na impluwensia sa saiya, asin naniniwala sia na kaipuhan niang limitaran an komunikasyon sa siring na mga katood. (1 Cor. 15:33) Dawa siring, tibaad isipon nia na kun sia dai makikiibaiba sa sainda, sia bakong maimbod.

¹³ Kun kamo sarong inaadalan sa Biblia na nasa situwasyon na ini, girumdomon na ikakaogma nin tunay na katood na kamo nagmamaigot na pakarhayon an saindong buhay. Tibaad booton pa ngani niang umiba sa saindo sa pag-adal manongod ki Jehova. Sa ibong na lado, an bakong tunay na mga katood “padagos na nagtataram na may panglilibak manongod sa saindo” huli ta dai kamo nakikiiba sa sainda “sa kaagid na karigsokan.” (1 Ped. 4:3, 4) An totoo, an mga katood na ini an bakong maimbod sa saindo, bakong an kabaliktaran.

¹⁴ Kun an mga inaadalan sa Biblia bayaan kan dating mga katood na mayo nin pagkamoot sa Dios, puedeng humiro an mga miembro kan kongregasyon na magin katood ninda. (Gal. 6:10) Personal daw nindong midbid an mga inaadalan sa Biblia na nag-aatender sa saindong mga pagtiripon? May mga panahon daw na nahihimo nindong magkaigwa nin nakakapakosog na pakikiasosyar sa sainda?

15, 16. (a) Ano an maninigong magin reaksion niato kun an sarong katood magpondo sa paglilingkod ki Jehova? (b) Paano niato mapapatunayan an satong pagkamoot sa Dios?

¹⁵ Pero, paano kun an sarong katood sa laog kan kongregasyon magdesisyon na talikdan si Jehova, na tibaad kaipuhan na itiwalag? Makamomondo nanggad an siring na situwasyon. Kan isinasaysay nin sarong tugang na babae an saiyang reaksion kan an sarong dayupot na amiga magpondo sa paglilingkod ki Jehova, sia nagsabi: “Garo baga may kulang na sa sako. An paghona ko makosog an pundasyon nia sa katotoohan, alagad bako palan. Inisip-isip ko kun baga naglilingkod sia kaidto ki Jehova tangani sanang paogmahon an saiyang pamilya. Dangan siniyasat ko liwat an sako mismong mga motibo. Naglilingkod daw ako ki Jehova huli sa tamang mga dahelan?” Paano nakapanggana an tugang na ini? “Itinao ko ki Jehova an pagabat sa sako,” an sabi nia. “Determinado akong ipaheling ki Jehova na namomotan ko sia bilang persona, bako sanang huli ta tinatawan nia ako nin mga katood sa laog kan saiyang organisasyon.”

¹⁶ Dai kita makakaasa na magdanay na katood nin Dios kun makampi kita sa mga mas gustong magin mga katood kan kinaban. Si disipulo Santiago nagsurat: “Ano dai nindo aram na an pakikikatood sa kinaban pakikiiwal sa Dios? An siisay man, kun siring, na boot na magin katood kan kinaban ginigibo an saiyang sadiri na kaiwal nin Dios.” (Sant. 4:4) Mapapatunayan niato an satong pagkamoot sa Dios paagi sa pagtitiwala na Sia matabang sa sato na makaya an pagkawara nin sarong katood kun kita maimbod sa Saiya. (Basahon an Salmo 18:25.) An tugang na babaeng nasambitan pa sana nagkongklusyon: “Naaraman ko na dai niato mapipirit an  saro na mamoot ki Jehova o sa sato. Total, iyan personal na desisyon.” Pero, ano an magigibo niato tanganing mapagdanay an nakakapakosog na pakikikatood sa mga nagdadanay na nasa laog kan kongregasyon?

Pagpapadanay nin Marahay na Pagkakatood

17. Paano nakikipag-olay sa lambang saro an marahay na magkatood?

¹⁷ An marahay na komunikasyon nagtataong buhay sa pagkakatood. Mantang binabasa nindo an mga pagkasaysay sa Biblia may koneksion ki Rut asin Noemi, David asin Jonatan, saka Pablo asin Timoteo, maririsa nindo na an marahay na magkatood prangkang nakikipag-olay sa lambang saro pero sa magalang na paagi. Mapadapit sa kun paano kita maninigong makipag-olay sa iba, si Pablo nagsurat: “An saindo logod na pagtaram danay na may kabootan, na tinimplahan nin asin.” An espesipikong pinanonongdan ni Pablo iyo an kun paano kita maninigong makipag-olay sa mga “nasa luwas,” an boot sabihon, sa mga bako niatong kapagtubod. (Col. 4:5, 6) Sierto nanggad na kun maninigo niatong igalang an mga daing pagtubod kun nakikipag-olay kita sa sainda, lalo nang maninigo niatong igalang an satong mga katood sa laog kan kongregasyon!

18, 19. Paano niato maninigong mansayon an ano man na hatol sa sato nin sarong Kristianong katood, asin anong halimbawa an ipinaheling sa sato kan kamagurangan sa Efeso?

¹⁸ Pinapahalagahan nin marahay na magkatood an opinyon nin lambang saro, kaya an pakikipag-olay ninda sa lambang saro kaipuhan na may kabootan sagkod pagkaprangka. An madonong na si Hadeng Salomon nagsurat: “An lana asin insenso iyo an nagpapagayagaya sa puso, siring man an hamis kan katood nin saro huli sa hatol kan kalag.” (Tal. 27:9) Siring daw kaiyan an pagmansay nindo sa ano man na hatol sa saindo nin sarong katood? (Basahon an Salmo 141:5.) Kun sabihon nin sarong katood na nahahadit sia sa sarong bagay na ginigibo nindo, ano an reaksion nindo? Minamansay daw nindo an sinabi nia bilang mamomoton na kabootan, o nakokolgan daw an boot nindo?

¹⁹ Si apostol Pablo nagkaigwa nin dayupot na relasyon sa kamagurangan sa kongregasyon sa Efeso. Posibleng marhay na midbid nia an nagkapira sa mga lalaking iyan kan enot sindang magin mga paratubod. Pero, kan ultimong pakipagtipon nia sa sainda, tinawan nia sinda nin prangkang hatol. Ano an nagin reaksion ninda? Dai nakolgan an boot kan mga katood ni Pablo. Imbes, pinahalagahan ninda an pagmakolog nia sa sainda, asin nagtangis pa ngani sinda sa pakaaram na sia dai na ninda maheheling giraray.—Gibo 20:17, 29, 30, 36-38.

20. Ano an gigibohon nin sarong mamomoton na katood?

²⁰ An marahay na mga katood dai sana nag-aako nin madonong na hatol kundi nagtatao man kaiyan. Siempre, kaipuhan na mamansayan niato kun noarin ‘kita dai makikilabot sa iba.’ (1 Tes. 4:11) Asin dapat man niatong masabotan na an lambang saro sa sato “maninimbag sa Dios para sa saiyang sadiri.” (Roma 14:12) Alagad kun kaipuhan, an sarong mamomoton na katood may kabootan na magpapagirumdom sa saiyang katood manongod sa mga pamantayan ni Jehova. (1 Cor. 7:39) Halimbawa, ano an gigibohon nindo kun marisa nindo na an sarong daing agom na katood nagkakaigwa nin romantikong interes sa sarong daing pagtubod? Dai daw nindo sasabihon na nahahadit kamo huling takot kamo na maapektaran an saindong pagkakatood? O kun dai intindihon kan katood nindo an saindong hatol, ano an gigibohon nindo? An sarong marahay na katood mapatabang sa mamomoton na mga pastor tanganing matabangan an saiyang katood na napapasala. An siring na lakdang nangangaipo nin kosog nin boot. Pero, dai permanenteng maaapektaran an pagkakatood na nakabasar sa pagkamoot ki Jehova.

21. Ano an tibaad magibo niato gabos kun beses, alagad taano ta mahalagang marhay na papagdanayon niato an makosog na pagkakatood sa laog kan kongregasyon?

²¹ Basahon an Colosas 3:13, 14. Kun beses, tibaad an satong mga katood ‘magkaigwa nin dahelan na magreklamo’ tumang sa sato, asin sinda tibaad may gibohon o sabihon man na makakapaanggot sa sato. “Kita gabos nasasala nin dakol na beses,” an isinurat ni Santiago. (Sant. 3:2) Minsan siring, an marahay na pagkakatood dai nasosokol sa kun gurano kita kaparateng nagkakasala sa lambang saro kundi kun gurano kita kalubos na nagpapatawad huli sa mga reklamong iyan. Mahalagang marhay nanggad na pakosogon niato an pagkakatood paagi sa prangkang pakikipag-olay asin lubos na pagpapatawad sa lambang saro! Kun ipinapaheling niato an siring na pagkamoot, iyan magigin “sangkap na bogkos nin pagkasararo.”

Ano an Isisimbag Nindo?

• Paano kita magkakaigwa nin marahay na mga katood?

• Noarin kaipuhan na taposon an pagkakatood?

• Ano an dapat niatong gibohon tanganing mapagdanay an makosog na pagkakatood?

[Mga Hapot Para sa Pag-adal]

[Ritrato sa pahina 18]

Sa ano nakabasar an nagdadanay na pagkakatood ni Rut asin Noemi?

[Ritrato sa pahina 19]

Kamo daw regular na nagpapaheling nin pagkamapag-istimar?