Pampamilyang Pagsamba—Mahalaga Para sa Kaligtasan!

IMAHINARA kun magigin gurano kamakangingirhat an “guerra kan dakulang aldaw nin Dios na Makakamhan sa Gabos”! (Kap. 16:14) Sa malinaw na pananaram na may piguratibong kahulogan, si propeta Miqueas nagsurat: “An mga bukid magkakaturunaw . . . , asin an mga kababan magkakagaratak, siring sa taro huli sa kalayo, siring sa mga tubig na nagbobolos sa sarong bakilid.” (Miq. 1:4) Ano an kapahapahamak na kaaabtan kan mga dai naglilingkod ki Jehova? An Tataramon nin Dios nagsasabi: “An mga gagadanon ni Jehova sa aldaw na iyan seguradong hale sa sarong poro kan daga sagkod sa ibong na poro kan daga.”—Jer. 25:33.

Huli sa siring na mga patanid, marahay na hapoton kan mga payo nin pamilya—dakol sa sainda an nagsosolong magurang—an saindang sadiri manongod sa mga aki ninda na nasa edad nang mangatanosan, ‘Makakaligtas daw sinda sa pangkulminasyon na pangyayaring ini?’ Sinisierto kan Biblia na sinda makakaligtas kun sinda aktibo asin makosog sa espirituwal sono sa saindang edad.—Mat. 24:21.

An Kahalagahan nin Pagkaigwa nin Panahon Para sa Pampamilyang Pagsamba

Bilang magurang, seguradohon na ginigibo nindo an saindong bilog na makakaya tanganing padakulaon an saindong mga aki “sa disiplina asin pagtatanos nin isip gikan ki Jehova.” (Efe. 6:4) Mahalagang marhay an pag-adal sa Biblia kaiba kan saindong mga aki. Gusto niato na an satong hoben na mga aki magin arog kan mga Kristiano sa Filipos, na kinomendaran ni Pablo huli sa saindang gikan sa boot na pagkuyog ki Jehova. Sia nagsurat: “Mga namomotan ko, sa paagi na kamo danay na nagkuyog, bako sanang sa panahon na yaon ako, kundi orog pa nanggad ngonyan na mayo ako, padagos kamong maghingoa na makamtan an saindong kaligtasan na may takot asin pagtakig.”—Fil. 2:12.

Kinukuyog daw kan saindong mga aki an mga ley ni Jehova kun mayo kamo? Kumusta kun nasa eskuelahan sinda? Paano nindo matatabangan an saindong mga aki na makombensir dapit sa kadonongan kan mga ley ni Jehova tanganing magin giya ninda ini dawa kun mayo kamo?

Mapadapit digdi, an pampamilyang pagsamba may dakulang papel sa pagpakosog sa pagtubod kan saindong aki. Kun siring, estudyaran niato an tolong pangenot na paagi tanganing magin mapanggana an saindong pampamilyang pag-adal sa Biblia.

Magin Regular

Ipinaparisa kan Biblia na an mga anghel na aki nin Dios iniimbitaran sa atubangan nia sa itinalaan na mga panahon. (Job 1:6) Gibohon man nindo iyan sa saindong mga aki. Mag-iskedyul nin espesipikong aldaw asin oras para sa saindong banggi nin Pampamilyang Pagsamba, dangan sunodon iyan. Dugang pa, mag-iskedyul nin saro pang panahon para sa dai inaasahan na mga kamugtakan.

Mantang minalihis an mga bulan, dai magkaigwa nin saboot na puede man an paminsanminsan sanang pampamilyang pag-adal sa Biblia. Girumdomon, an saindong mga aki an pinakaimportante nindong mga inaadalan sa Biblia. Pero, gusto ni Satanas na mabiktima nia sinda. (1 Ped. 5:8) Kun an mahalagang bangging ini nin Pampamilyang Pagsamba gagamiton nindo sa pagheling nin telebisyon o sa iba pang bakong gayong importanteng aktibidad, magigin mapanggana si Satanas.—Efe. 5:15, 16; 6:12; Fil. 1:10.

Gibohon Iyan na Praktikal

An banggi nin Pampamilyang Pagsamba maninigo na magin orog pa sa pagkua sana nin kaaraman. Pagmaigotan na gibohon iyan na praktikal. Paano? Kun beses, pumili nin mga tema na may koneksion sa mga situwasyon na mapapaatubang sa saindong aki sa maabot na mga aldaw o semana. Halimbawa, taano ta dai iiba an mga pag-ensayo para sa ministeryo? Ikinakaogma kan mga hoben an paggibo nin mga bagay na dian matibay sinda. An pag-ensayo nin mga presentasyon asin pag-isip  nin mga paagi tanganing maatubang an mga pagkontra makakatabang sa sainda na magin mas kompiado mantang nakikikabtang sinda sa manlaenlaen na paagi nin paghuhulit kan Kahadean.—2 Tim. 2:15.

Puede man kamong magkaigwa nin mga pag-ensayo na makakatabang sa saindong mga aki na atubangon an impluwensia nin kairiba. An kapitulo 15 kan librong Questions Young People Ask—Answers That Work, Volume 2, puedeng gamiton bilang basehan para sa pag-orolay nin pamilya. An “Peer-Pressure Planner” sa pahina 132 asin 133 nagtatao nin mga suhestion asin nagtatao man nin mga oportunidad sa saindong aki na makaisip nin mga simbag na komportable sia. An mga tataramon sa ibaba kan pahina 133 nagdadagka sa mga hoben: “Kaiba an saindong magurang o maygurang na katood, ensayohon an saindong mga simbag.” Sa panapanahon, taano ta dai gibohon na kabtang kan saindong banggi nin Pampamilyang Pagsamba an siring na mga pag-ensayo?

An pampamilyang pagsamba nagtatao nin oportunidad na ikadoon nin mga magurang an mga pakinabang kan pagkaigwa nin espirituwal na mga pasohan. Mapadapit digdi, an Young People Ask, Volume 2, igwa nin marahayon na impormasyon sa kapitulo 38, na may titulong “What Will I Do With My Life?” Mantang pinag-oolayan an kapitulong iyan, tabangan an saindong aki na masabotan na an pinakamarahay na gibohon iyo na isentro nin saro an saiyang buhay sa paglilingkod ki Jehova. Pataluboon sa puso kan saindong aki an pagmawot na magpayunir, maglingkod sa Bethel, mag-adal sa Paadalan sa Ministeryal na Pagsasanay, o magmaigot na maabot an iba pang klase nin bilog na panahon na paglilingkod.

Mag-ingat: An nagkapirang magurang na marahay an intension nagkokonsentrar na marhay sa kun ano an gusto nindang maabot kan saindang aki kaya nababaliwala ninda an marahay na ginigibo nia ngonyan. Siempre, marahay na dagkahon an saindong mga aki na magkaigwa nin marahayon na mga pasohan arog baga kan paglilingkod sa Bethel asin pagmimisyonero. Minsan siring, sa paggibo kaiyan, mag-ingat na dai mapaanggot an saindong aki huli sa mga inaasahan nindo, na makakapaluya sa saiyang boot. (Col. 3:21) Pirmeng girumdomon na dapat na mamotan si Jehova kan saindong aki sa saiya mismong puso—bakong huli sa saindo. (Mat. 22:37) Kaya humanap nin mga paagi na komendaran an saindong aki sa marahay na ginigibo nia, asin labanan an tendensia na magkonsentrar sa dai nia ginigibo. Tabangan an aki na makapatalubo nin pagpapahalaga sa gabos na ginigibo ni Jehova. Dangan pabayaan sia na sia mismo an maghimate sa karahayan ni Jehova.

Gibohon Iyan na Nakakagayagaya

An ikatolong pangenot na paagi para sa mapangganang banggi nin Pampamilyang Pagsamba iyo na gibohon iyan na nakakagayagaya. Paano nindo ini magigibo? Tibaad kun beses puede nindong hinanyogon an saro sa mga audio drama o helingon asin pag-olayan an saro sa mga video na ginibo kan Mga Saksi ni Jehova. O puede nindong iribang basahon an sarong kabtang kan Biblia, na ipinapabasa sa lambang miembro kan pamilya an sinasabi kan mga karakter.

Igwa nin mga kabtang sa The Watchtower asin Awake! na nagtatao nin marahayon na basehan para sa pag-orolay nin pamilya. Halimbawa, puede nindong gamiton an kabtang sa pahina 31 kan lambang magasin na Awake!, na may titulong “How Would You Answer?” Kada ikaduwang bulan, an pampublikong edisyon kan The Watchtower  igwa nin proyekto sa pag-adal na “For Our Young People.” An mga proyektong ini kasarosalida kan serye na para sa mga aki na may titulong “Teach Your Children.”

An mga artikulo sa serye na “Young People Ask” sa Awake! partikular nang magigin interesante sa mga magurang nin mga hoben, siring man an librong Young People Ask, Volume 2. Kun ginagamit an librong iyan, dai paglipasan an kahon na “What Do You Think?” sa katapusan kan kada kapitulo. An kahon na iyan bako sanang para sa pagrepaso. An mga hapot sa kahon na iyan puedeng gamiton bilang outline para sa pag-orolay nin pamilya.

Pero, mag-ingat na dai pagpaoranan nin hapot an mga aki durante kan pampamilyang pag-adal. Halimbawa, dai pagpiriton an saindong aki na basahon nin makosog an isinurat nia sa mga pahinang may titulo na “My Journal” o sa ano man na iba pang kabtang kan libro na dinadagka an mga nagbabasa na sumimbag. Sa “A Note to Parents,” an libro nagsasabi sa pahina 3: “Tanganing an hoben na mga aki nindo madagka na isurat sa saindang libro kun ano talaga an nasa boot ninda, ipaheling na ibinibilang nindo na pribadong gamit ninda iyan. Paghaloyhaloy tibaad ipakipag-olay ninda sa saindo an dapit sa mga isinurat ninda.”

Kun pinapagdadanay nindong regular, praktikal, asin nakakagayagaya an saindong pampamilyang pagsamba, abundang bebendisyonan ni Jehova an saindong mga paghihingoa. An espesyal na panahon na ini para sa pamilya makakatabang sa mga namomotan nindo na magdanay na aktibo asin makosog sa espirituwal.

[Kahon sa pahina 31]

Magin Mapamaagi

“Sa pag-adal mi kaiba kan samong hoben na mga aking babae, ipinapakipag-olay ming mag-agom sa samong mga aki an pag-aadalan bilang pag-andam sa sarong pagtiripon kan kongregasyon dangan pinapagibo mi sinda nin drowing na nagsusumaryo kan leksion. Kun beses, iinaakto niamo an mga eksena sa Biblia o ineensayo an mga presentasyon para sa paglilingkod sa langtad. Pinapagdadanay niamo na an pag-adal angay sa saindang edad, interesante, positibo, asin maogma.”—J.M., Estados Unidos.

“Tanganing tabangan an aking lalaki kan sakong inaadalan sa Biblia na masabotan kun paano naggagamit nin rolyo kaidtong mga panahon kan Biblia, nag-print kami nin kopya kan libro nin Isaias pagkatanggal mi kan numero kan mga kapitulo asin bersikulo kaiyan. Sinurugpon mi an mga pahina kaiyan asin idinukot sa tubo an mang-ibong-ibong na poro. Dangan prinobaran kan aki na arogon an ginibo ni Jesus sa sinagoga sa Nazaret. An pagkasaysay sa Lucas 4:16-21 nagsasabi na ‘binukasan ni Jesus an rolyo ni Isaias asin nakua’ nia an kabtang na hinahanap nia. (Isa. 61:1, 2) Minsan siring, kan probaran kan aki na gibohon man iyan, nadepisilan siang hanapon an Isaias 61 sa halabang rolyong iyan na mayo nin mga numero kan kapitulo asin bersikulo. Huling napahanga sa kakayahan ni Jesus na gamiton an mga rolyo, an aki biglang napataram: ‘Matibayon man si Jesus!’”—Y.T., Hapon.

[Ritrato sa pahina 30]

An mga pag-ensayo makakatabang sa saindong mga aki na atubangon an impluwensia nin kairiba

[Ritrato sa pahina 31]

Pagmaigotan na gibohon na nakakagayagaya an banggi nin Pampamilyang Pagsamba