Ano an Ihinahayag Dapit sa Saindo kan Saindong mga Pamibi?
Ano an Ihinahayag Dapit sa Saindo kan Saindong mga Pamibi?
“O Paradangog nin pamibi, sa saimo madorolok an gabos na klase nin tawo.”—SAL. 65:2.
1, 2. Taano ta may kompiansang makakapamibi ki Jehova an saiyang mga lingkod?
PIRMENG dinadangog ni Jehova an mga kahagadan kan saiyang maimbod na mga lingkod. Makakapagtiwala kita na dinadangog nia kita. Dawa kun sarabay na mamimibi sa Dios an minilyon na Saksi ni Jehova, madadangog pa man giraray nia an lambang saro sa sainda.
2 Huling may kompiansa na dinadangog nin Dios an saiyang mga pakiolay, an salmistang si David nag-awit: “O Paradangog nin pamibi, sa saimo madorolok an gabos na klase nin tawo.” (Sal. 65:2) Sinimbag an mga pamibi ni David huli ta sia maimbod na parasamba ki Jehova. Marahay gayod na ihapot niato sa satong sadiri: ‘Ipinapaheling daw kan sakong mga pagngayongayo na nagtitiwala ako ki Jehova asin na an dalisay na pagsamba iyo an pangenot sa sako? Ano an ihinahayag dapit sa sako kan sakong mga pamibi?’
May Kapakumbabaan na Dumolok ki Jehova
3, 4. (a) Ano an maninigong magin saboot niato kun kita minadolok sa Dios sa pamibi? (b) Ano an maninigo niatong gibohon kun riniribok kita nin “nakakapurisaw na mga kaisipan” huli sa magabat na kasalan?
3 Tanganing simbagon an satong mga pamibi, dapat na may kapakumbabaan kitang dumolok sa Dios. (Sal. 138:6) Maninigong hagadon niato ki Jehova na siyasaton nia kita, arog kan ginibo ni David kan sia magsabi: “Rekisaha ako, O Dios, asin midbida an sakong puso. Siyasata ako, asin arama an sakong nakakapurisaw na mga kaisipan, asin helinga kun baga igwa sa sako nin ano man na nakakaraot na dalan, asin giyahe ako sa dalan nin daing talaan na panahon.” (Sal. 139:23, 24) Apuera sa pamimibi, magpasiyasat man kita sa Dios asin magsunod sa hatol kan saiyang Tataramon. Puede kitang giyahan ni Jehova sa “dalan nin daing talaan na panahon,” na tinatabangan kitang lumakaw sa dalan na pasiring sa buhay na daing katapusan.
4 Paano kun riniribok kita nin “nakakapurisaw na mga kaisipan” huli sa sarong magabat na kasalan? (Basahon an Salmo 32:1-5.) An pagprobar na pugolan an napupurisaw na konsensia makakapaluya sa sato, siring sa poon nin kahoy na naaalang huli sa grabeng init. Huli sa saiyang kasalan, nawara an kagayagayahan ni David asin tibaad nagkahelang sia. Alagad naginhawahan nanggad sia kan ituga nia iyan sa Dios! Imahinara na sana an kagayagayahan ni David kan mamatean nia na ‘pinatawad na an saiyang pagrebelde’ asin sia pinatawad na ni Jehova. An pagtuga sa Dios puedeng magbunga nin kaginhawahan, asin an Kristianong kamagurangan makakatabang man na ikabalik an marahay na espirituwal na kamugtakan kan saro na napapasala.—Tal. 28:13; Sant. 5:13-16.
Magngayongayo sa Dios Asin Magpasalamat sa Saiya
5. Ano an kahulogan nin pagngayongayo ki Jehova?
5 Kun nahahadit nanggad kita huli sa ano man na dahelan, maninigo niatong iaplikar an hatol ni Pablo: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pagpasalamat ipahayag nindo sa Dios an saindong mga kahagadan.” (Fil. 4:6) An “pagngayongayo” nangangahulogan nin “mapakumbabang pakimaherak.” Maninigo niatong arangon an tabang asin paggiya ni Jehova nangorogna kun may peligro o persekusyon.
6, 7. Sa anong mga dahelan na maninigong iiba sa satong mga pamibi an pagpasalamat?
6 Minsan siring, kun kita namimibi sana kun may kaipuhan kita, ano an ihahayag kaiyan manongod sa satong mga motibo? Si Pablo nagsabi na maninigo niatong ipaaram sa Dios an satong mga kahagadan “na may pagpasalamat.” Igwa nanggad kita nin dahelan na ipahayag an mga saboot na kapareho kan ki David: “Saimo, O Jehova, an kadakulaan asin an pagkamakakamhan asin an kagayonan asin an kamahalan patin an dignidad; huli ta an gabos na bagay sa kalangitan asin sa daga saimo. Saimo an kahadean, O Jehova, an Saro na naglalangkaw man kan saimong sadiri bilang payo kan gabos. . . . O samuyang Dios, nagpapasalamat kami sa saimo asin inoomaw niamo an saimong magayon na ngaran.”—1 Cron. 29:11-13.
7 Nagpasalamat si Jesus sa Dios huli sa kakanon asin huli sa tinapay patin arak na ginamit sa Pamanggihan kan Kagurangnan. (Mat. 15:36; Mar. 14:22, 23) Apuera sa pagpahayag kan kaparehong pagpasalamat, maninigo kitang ‘magpasalamat ki Jehova’ huli sa “saiyang makangangalas na mga gibo sa mga aki nin mga tawo,” huli sa saiyang “matanos na hudisyal na mga desisyon,” asin huli sa saiyang tataramon, o mensahe, na yaon ngonyan sa Biblia.—Sal. 107:15; 119:62, 105.
Ipamibi an Iba
8, 9. Taano ta maninigo niatong ipamibi an mga kapwa Kristiano?
8 Daing duda na ipinapamibi niato an satong sadiri, alagad dapat na iiba niato sa satong mga pamibi an iba—dawa an mga Kristiano na dai niato aram an ngaran. Minsan ngani tibaad dai midbid ni apostol Pablo an gabos na may pagtubod duman sa Colosas, sia nagsurat: “Pirme kaming nagpapasalamat sa Dios na Ama kan satong Kagurangnan na Jesu-Cristo kun kami namimibi para sa saindo, mantang nabaretaan niamo an saindong pagtubod may koneksion ki Cristo Jesus asin an saindong pagkamoot para sa gabos na banal.” (Col. 1:3, 4) Ipinamibi man ni Pablo an mga Kristiano sa Tesalonica. (2 Tes. 1:11, 12) An siring na mga pamibi dakol an ihinahayag manongod sa sato asin kun paano niato minamansay an satong mga tugang sa pagtubod.
9 An satong mga pamibi para sa linahidan na mga Kristiano asin para sa kaiba nindang “ibang mga karnero” ebidensia kan pagmakolog niato sa organisasyon nin Dios. (Juan 10:16) Nakiolay si Pablo sa saiyang mga kapwa parasamba na mamibi na ‘itao logod sa saiya an kakayahan na magtaram sa pagpahayag kan sagradong hilom kan maogmang bareta.’ (Efe. 6:17-20) Personal daw niatong ipinapamibi an ibang Kristiano sa arog kaiyan na paagi?
10. Ano an posibleng magin epekto sa sato kun ipapamibi niato an iba?
10 An pagpamibi para sa iba tibaad makapabago kan satong saboot sa sainda. Kun ipapamibi niato an sarong tawo na partikularmenteng dai niato gusto, bako daw na posibleng mabago an satong saboot sa saiya? (1 Juan 4:20, 21) An arog kaining mga pamibi nagpapakosog asin nagpapaoswag nin pagkasararo sa satong mga tugang. Dugang pa, an siring na mga pamibi nagpaparisa na igwa kita nin arog-Cristong pagkamoot. (Juan 13:34, 35) An kualidad na iyan kabtang kan bunga kan espiritu nin Dios. Bilang indibiduwal, hinahagad daw niato an banal na espiritu, na nakikiolay ki Jehova na tabangan kitang ipaheling an bunga kaiyan na pagkamoot, kagayagayahan, katoninongan, pakatios, kabootan, karahayan, pagtubod, kahoyoan, asin pagpupugol sa sadiri? (Luc. 11:13; Gal. 5:22, 23) Kun iyo, maheheling sa satong mga sinasabi asin ginigibo na kita naglalakaw asin namumuhay segun sa espiritu.—Basahon an Galacia 5:16, 25.
11. Taano ta masasabi nindo na angay na pakiolayan an iba na ipamibi kita?
11 Kun maaraman niato na an satong mga aki natetentaran na magdaya sa mga test sa eskuelahan, maninigong ipamibi niato sinda asin itao man niato sa sainda an tabang na sono sa Kasuratan tanganing sinda gumawe nin may pagkasadiosan asin dai gumibo nin ano man na sala. Sinabihan ni Pablo an mga Kristiano sa Corinto: “Kami namimibi sa Dios na dai logod kamo maggibo nin sala.” (2 Cor. 13:7) An mapakumbabang mga pamibi na arog kaiyan nakakapaogma ki Jehova asin may marahay na ihinahayag dapit sa sato. (Basahon an Talinhaga 15:8.) Puede niatong pakiolayan an iba na ipamibi kita, arog kan ginibo ni apostol Pablo. “Padagos kamong mamibi para sa samo,” an isinurat nia, “huli ta kami nagtitiwala na kami igwa nin sadiosan na konsensia, mantang minamawot niamo na gumawe nin sadiosan sa gabos na bagay.”—Heb. 13:18.
May Iba Pang Ihinahayag an Satong mga Pamibi
12. Ano an maninigong magin mahalagang mga kabtang kan satong mga pamibi?
12 Ihinahayag daw kan satong mga pamibi na kita maogma asin maigot na mga Saksi ni Jehova? An sato daw na mga pagngayongayo sa pangenot nakasentro sa pagkuyog sa kabotan nin Dios, paghuhulit kan mensahe kan Kahadean, pagbindikar sa soberaniya ni Jehova, asin pagpakangbanal sa saiyang ngaran? Ini maninigong magin mahalagang mga kabtang kan satong mga pamibi, siring kan ipinaparisa kan modelong pamibi ni Jesus, na nagpopoon paagi sa mga tataramon na: “Ama niamo na nasa langit, pakangbanalon logod an saimong ngaran. Dumatong logod an kahadean mo. Gibohon logod an kabotan mo, kun paano sa langit, siring man sa daga.”—Mat. 6:9, 10.
13, 14. An satong mga pamibi naghahayag nin ano manongod sa sato?
13 An mga pamibi niato sa Dios naghahayag kan satong mga motibo, pinagkakainteresan, asin kamawotan. Aram ni Jehova kun anong klaseng tawo kita. An Talinhaga 17:3 nagsasabi: “An tunawan para sa plata asin an horno para sa bulawan, alagad ta si Jehova an parasiyasat sa mga puso.” Naheheling nin Dios kun ano an nasa puso niato. (1 Sam. 16:7) Aram nia kun ano an saboot niato manongod sa satong mga pagtiripon, ministeryo, asin espirituwal na mga tugang. Aram ni Jehova kun paano niato minamansay an “mga tugang” ni Cristo. (Mat. 25:40) Aram nia kun baga talagang minamawot niato an satong ipinapamibi o nag-ootro sana kita nin mga tataramon. Huling an mga tawo kan panahon ni Jesus may salang ideya manongod sa pamibi, sia nagsabi: “Kun namimibi, dai pagparaorootrohon an iyo man sanang mga bagay, arog kan ginigibo kan mga tawo kan mga nasyon, huli ta hinohona ninda na dadangogon sinda huli sa paggamit ninda nin dakol na tataramon.”—Mat. 6:7.
14 An mga sinasabi niato sa satong pamibi naghahayag man kun gurano nanggad kita nagsasarig sa Dios. “Ika [Jehova] nagin pailihan para sa sako,” an sabi ni David, “sarong makosog na torre sa atubangan kan kaiwal. Ako magigin bisita sa saimong tolda sa mga panahon na daing talaan; ako mapaili sa tagoan sa saimong mga pakpak.” (Sal. 61:3, 4) Kun ‘binibiklad nin Dios an saiyang tolda sa ibabaw niato’ sa piguratibong paagi, kita nagkakamit nin katiwasayan asin kan saiyang pagprotehir. (Kap. 7:15) Nakakaranga nanggad na rumani ki Jehova sa pamibi na marigon na nagtutubod na sia ‘nasa kampi niato’ durante nin ano man na pagbalo sa satong pagtubod!—Basahon an Salmo 118:5-9.
15, 16. An satong pamibi puedeng makatabang sa sato na mabatid an ano manongod sa satong pagmawot na maabot an mga pribilehio nin paglilingkod?
15 An sadiosan na pamibi ki Jehova dapit sa satong mga motibo makakatabang sa sato na mabatid kun ano an totoong motibo niato. Halimbawa, gustong-gusto daw niatong maglingkod na nasa katongdan nin pangangataman sa banwaan nin Dios huli ta talagang mapakumbaba kitang nagmamawot na makatabang asin gibohon an satong pinakamakakaya para sa pag-oswag kan intereses kan Kahadean? O posible daw na gusto niatong magkaigwa “kan enot na lugar” o mawot pa ngani niato na ‘magpakangkagurangnan’ sa iba? Dapat na bakong siring kaiyan sa tahaw kan banwaan ni Jehova. (Basahon an 3 Juan 9, 10; Lucas 22:24-27.) Kun igwa kita nin salang mga kamawotan, an pagigin sadiosan sa pamimibi ki Jehova Dios puedeng maghayag kaiyan asin makatabang sa sato na bagohon iyan bago pa iyan makagamot nin marigon.
16 An Kristianang mga agom tibaad may makosog na pagmawot na an saindang mga agom maglingkod bilang ministeryal na mga lingkod asin tibaad pag-abot nin panahon bilang mga paraataman, o kamagurangan. An mga Kristianang ini puedeng naghihiro kaoyon kan mga saboot na sinasabi ninda sa saindang personal na mga pamibi paagi sa pagmamaigot ninda mismo na magin arogan sa paggawe. Mahalaga ini, huling an pagtaram asin paggawe kan pamilya nin sarong lalaki may epekto sa kun paano sia minamansay sa kongregasyon.
Pagrepresentar sa Iba sa Pampublikong Pamibi
17. Taano ta marahay na nagsosolo kita kun namimibi nin personal?
17 Si Jesus parateng minarayo sa mga kadaklan tanganing mamibi nin solo sa saiyang Ama. (Mat. 14:13; Luc. 5:16; 6:12) Igwa kita kan kaparehong pangangaipo na magsolosolo. Kun kita kalmadong namimibi sa matoninong na mga kamugtakan, posibleng marhay na makakagibo kita nin mga desisyon na nakakapaogma ki Jehova asin para sa pinakaikakarahay niato sa espirituwal. Minsan siring, si Jesus namibi man sa publiko, asin marahay na pag-isipan kun paano ini magigibo sa angay na paagi.
18. Ano an nagkapirang punto na maninigong girumdomon nin mga tugang na lalaki kun irinerepresentar an kongregasyon sa pampublikong pamibi?
18 Sa satong mga pagtiripon, irinerepresentar nin maimbod na mga lalaki an kongregasyon sa pampublikong pamibi. (1 Tim. 2:8) Sa katapusan nin siring na pamibi, an mga kapagtubod maninigong makapagsabi nin “amen,” na an boot sabihon “mangyari logod.” Minsan siring, tanganing magibo iyan, dapat na oyon sinda sa sinabi sa pamibi. Mayo nin nakakabigla o bakong mataktikang mga tataramon sa modelong pamibi ni Jesus. (Luc. 11:2-4) Dugang pa, dai nia idinetalye an gabos na pangangaipo o problema nin lambang saro sa mga nagdadangog sa saiya. An personal na mga ikinakahadit angay na tema para sa pribadong pamibi, bakong sa pampublikong pamibi. Asin kun irinerepresentar an sarong grupo sa pamibi, maninigong likayan niato na magsambit nin kompidensial na mga bagay.
19. Paano kita maninigong gumawe durante nin pampublikong pamibi?
19 Kun kita irinerepresentar sa pampublikong pamibi, kaipuhan na magpaheling kita nin ‘pagkatakot sa Dios’ na may hararom na paggalang. (1 Ped. 2:17) Tibaad may angay na panahon asin lugar para sa paggawe na bakong maninigo sa Kristianong pagtiripon. (Ecl. 3:1) Halimbawa, ipamugtak ta baga na hinagad nin saro na mag-arabrasete o magkarapotan nin kamot an gabos sa grupo durante nin siring na pagpamibi. Ini tibaad dai magustohan nin nagkapira o makadisturbo sa sainda, kaiba an mga bisita na bako niatong kapagtubod. May mga mag-agom na tibaad magkapotan nin kamot sa paagi na daing gayo risa, alagad kun magkugosan sinda durante nin pampublikong pamibi, tibaad masingkog an mga makakaheling kan siring na paggawe. Tibaad sinda mag-isip o magkaigwa nin impresyon na nakasentro an atension kan mag-agom sa saindang romantikong relasyon imbes na sa hararom na paggalang ki Jehova. Kun siring, huli sa hararom na paggalang sa saiya, logod na ‘gibohon niato an gabos na bagay sa ikakamuraway nin Dios’ asin likayan an paggawe na makakadisturbo, makakabigla, o makakapasingkog sa siisay man.—1 Cor. 10:31, 32; 2 Cor. 6:3.
Ano an Ipapamibi?
20. Paano nindo ipapaliwanag an Roma 8:26, 27?
20 Kun beses, tibaad dai niato aram kun ano an sasabihon sa satong personal na mga pamibi. “An problema kun ano an maninigo niatong ipamibi segun sa kaipuhan niato dai niato aram,” an isinurat ni Pablo, “alagad an [banal na] espiritu mismo an nakikimaherak para sa sato na may mga pag-agrangay na dai masayod. Pero sia [an Dios] na nagsisiyasat kan mga puso nakakaaram kun ano an kahulogan kan espiritu.” (Roma 8:26, 27) Dakol na pamibi an ipinasurat ni Jehova sa Kasuratan. Inaako nia an ipinasabong na mga kahagadan na ini na garo man sana gikan sa sato asin kun siring sinisimbag nia iyan. Midbid kita nin Dios asin aram nia an kahulogan kan mga bagay na ipinasabi nia sa saiyang espiritu paagi sa mga kagsurat kan Biblia. Sinisimbag ni Jehova an satong mga pagngayongayo kun an espiritu “nakikimaherak,” o nangongoltanan, para sa sato. Alagad mientras na nagigin mas pamilyar kita sa Tataramon nin Dios, tibaad mas madali niatong naiisip an maninigo niatong ipamibi.
21. Ano an sisiyasaton niato sa sunod na artikulo?
21 Siring kan nanodan niato, an satong mga pamibi dakol an ihinahayag manongod sa sato. Halimbawa, puedeng ihayag kaiyan kun gurano na kita kadayupot ki Jehova asin kun gurano kita kapamilyar sa saiyang Tataramon. (Sant. 4:8) Sa sunod na artikulo, sisiyasaton niato an nagkapirang pamibi asin mapagngayongayong kapahayagan na nakasurat sa Biblia. An siring na pagsiyasat sa Kasuratan posibleng marhay na magkaigwa nin anong epekto sa satong pagdolok sa Dios sa pamibi?
Ano an Isisimbag Nindo?
• Ano an maninigong magin saboot niato kun kita minadolok ki Jehova sa pamibi?
• Taano ta maninigo niatong ipamibi an mga kapagtubod?
• An satong mga pamibi puedeng maghayag nin ano manongod sa sato asin sa satong mga motibo?
• Paano kita maninigong gumawe durante nin pampublikong pamibi?
[Mga Hapot Para sa Pag-adal]
[Ritrato sa pahina 4]
Regular daw nindong inoomaw asin pinapasalamatan si Jehova?
[Ritrato sa pahina 6]
An paggawe niato durante nin pampublikong pamibi maninigo na pirmeng nagtatao nin onra ki Jehova