Maogmang Pagtao Hale sa Puso

KUN dapit sa pagtao, si apostol Pablo nagsurat: “Gibohon kan lambang saro an oyon sa napagdesisyonan nia sa saiyang puso,” asin sinabi pa nia: “Na bakong maraot sa boot o napipiritan, huli ta an Dios namomoot sa maogmang paratao.” (2 Cor. 9:7) Dai pinipirit ni Jehova an siisay man na magsuportar sa dalisay na pagsamba. Tinotogotan nia an saiyang mga lingkod na magpaheling nin debosyon paagi sa saindang boluntaryo asin maogmang pagtao. Sa bilog na kasaysayan, entusiastiko an reaksion kan saiyang banwaan. Estudyare an tolong halimbawa.

Pagkatapos na giyahan ni Jehova an mga Israelita paluwas sa Egipto, pinagbotan nia sinda na itogdok an tabernakulo. Kaipuhan an mga materyales, kaya dinagka an banwaan nin Israel na magkontribwir. Bilang reaksion, “an lambang saro na pinahiro kan saiyang puso” nagdara nin bulawan asin plata, mga alahas, asin iba pang materyales. An banwaan nagin bukang marhay an palad kaya pinakiolayan sinda paagi sa paisi na ipondo na an pagtao.—Ex. 35:5, 21; 36:6, 7.

Kan itotogdok na an templo pakalihis nin mga siglo, an banwaan nin Dios nagkaigwa giraray nin  oportunidad na ipaheling an saindang pagsuportar sa dalisay na pagsamba. Si Hadeng David nagtao nin dakulang personal na kontribusyon sa proyekto asin dinagka nia an iba na magtao man. Entusiastiko nindang ginibo iyan. An kontribusyon ngani na bulawan asin plata sana may halaga nang labing 100 bilyones na dolyar sa presenteng kantidad! An banwaan naggayagaya sa pagtao ninda nin gikan sa boot na mga dolot ki Jehova.—1 Cron. 29:3-9; 2 Cron. 5:1.

An magayagayang espiritu nin pagtao ipinaheling man kan enot na mga parasunod ni Jesu-Cristo. Kan aldaw nin Pentecostes 33 C.E., mga 3,000 an nabautismohan, na an dakol sa sainda bakong taga Jerusalem. Sa katuyohan na makapagdanay sa siudad an mga dukha tanganing makanood nin orog pa manongod sa saindang bagong pagtubod, nagkaigwa nin temporaryong pangongolekta nin kuarta. An mga tugang nagpabakal nin mga rogaring asin dinara ninda an kuarta sa mga apostol tanganing tabangan an mga nangangaipo. Siertong naogma nanggad si Jehova na maheling an siring na kapahayagan nin pagtubod asin pagkamoot!—Gibo 2:41-47.

Ngonyan, padagos na sinusuportaran nin mga Kristiano an dalisay na pagsamba paagi sa buka an palad asin maogmang pagtao kan saindang panahon, kosog, asin kuarta. Maheheling sa kaibang kahon an nagkapirang paagi na magigibo nindo ini.

[Kahon sa pahina 18, 19]

MGA PAAGI NIN PAGTAO NA PINIPILI NIN NAGKAPIRA

MGA KONTRIBUSYON SA PAMBILOG NA KINABAN NA GIBOHON

An dakol nagtatagama, o nagbabadyet, nin kantidad na ibinubugtak ninda sa mga kahon nin kontribusyon na may nakasurat na “Worldwide Work.”

Kada bulan, ipinapadara kan mga kongregasyon an kantidad na ini sa opisina kan Mga Saksi ni Jehova na naglilingkod sa saindang nasyon. An boluntad na mga donasyon na kuarta puede man na direktang ipadara sa Watch Tower Bible and Tract Society of the Philippines, Inc., P.O. Box 2044, 1060, Manila, o sa sangang opisina kan Mga Saksi ni Jehova na naglilingkod sa saindong nasyon. (An boluntaryong mga donasyon na espesipikong sinambit sa ibaba puede man na ipadara sa sangang opisina kan Mga Saksi ni Jehova na naglilingkod sa saindong nasyon.) An mga tseke na ipinapadara sa adres na nasa enotan maninigong gibohon na payable to “Watch Tower Society.” An mga alahas o iba pang mahalagang bagay puede man na idonar. An sarong halipot na surat na nagsasabing iyan direktang regalo maninigong iiba sa mga kontribusyon na ini.

AREGLO SA IPINAGKATIWALANG KUARTA NA KONDISYONAL NA DONASYON

Puedeng ipagkatiwala an kuarta sa Watch Tower Society tanganing magamit sa pambilog na kinaban na gibohon. Minsan siring, ibabalik an donasyon kun hagadon kan nagdonar. Para sa dugang pang impormasyon, makikomunikar tabi sa Treasurer’s Office sa adres na sinabi sa enotan.

PAGPLANO PARA SA PAG-ABULOY

Apuera sa direktang mga regalong kuarta, igwa nin iba pang paagi nin pagtao para sa kapakinabangan kan paglilingkod sa Kahadean sa bilog na kinaban. Kabale digdi an:

Insurance: An Watch Tower Society puedeng gibohon na benepisyaryo nin life insurance policy o plano sa pagretiro/pension.

Mga Deposito sa Bangko: An mga deposito sa bangko, sertipiko nin deposito, o indibiduwal na deposito sa pagretiro puedeng ipagkatiwala o gibohon na payable to Watch Tower Society pagkagadan kan nagdeposito, kaoyon kan lokal na mga kahagadan sa bangko.

Stocks Asin Bonds: An stocks asin bonds puedeng idonar sa Watch Tower Society bilang direktang regalo o an Watch Tower Society puedeng ilaag na benepisyaryo sa Transfer on Death.

Daga Asin Harong: An ikakapabakal na daga asin harong puedeng idonar magsalang paagi sa direktang pagregalo o, sa kaso nin residensial na rogaring, paagi sa pagreserba sa nagdonar nin propiedad sagkod na nabubuhay, asin sia puedeng magpadagos na mag-istar dian sagkod na sia nabubuhay. Makikomunikar sa sangang opisina sa saindong nasyon bago ibalyo sa ngaran kan Watch Tower Society an ano man na daga asin harong.

Gift Annuity: An gift annuity sarong areglo kun saen ibinabalyo nin saro an kuarta o securities sa designadong korporasyon na ginagamit kan Mga Saksi ni Jehova. Karibay kaiyan, an nagdonar, o saro na dinesignaran kan nagdonar, maresibi nin espesipikong annuity payment kada taon sagkod na nabubuhay. An nagdonar binabawasan sa buhis sa ginaganar para sa taon na naestablisar an gift annuity.

Mga Testamento Asin Kabuhayan na Ipinagkatiwala: An propiedad o kuarta puedeng ipamana sa Watch Tower Society paagi sa sarong testamento na ginibo sa legal na paagi, o an Watch Tower Society puedeng gibohon na benepisyaryo nin sarong kontrata sa kabuhayan na ipinagkatiwala. An kabuhayan na ipinagkatiwala na an nakikinabang sarong relihiosong organisasyon puedeng magtao nin nagkapirang bentaha sa pagbuhis.

Siring kan ipinaparisa kan terminong “pagplano para sa pag-abuloy,” an klaseng ini nin mga donasyon natural sanang nagkakaipo nin pagplano kan nagdonar. Tanganing tabangan an mga indibiduwal na gustong tawan nin pakinabang an pambilog na kinaban na gibohon kan Mga Saksi ni Jehova paagi sa sarong klase nin pagplano para sa pag-abuloy, sarong brosyur an inandam sa Ingles asin Kastila na may titulong Charitable Planning to Benefit Kingdom Service Worldwide. Isinurat an brosyur tanganing magtao nin impormasyon dapit sa laen-laen na paagi nin pagtao nin regalo magsalang ngonyan o paagi sa pamana pagnagadan. Pagkatapos na mabasa an brosyur asin maghapot sa sadiri nindang kinokonsulta sa ley o buhis, dakol an nakatabang sa pagsuportar sa satong relihioso asin humanitaryong mga aktibidad sa bilog na kinaban asin ginamit sa pinakalubos na paagi an mga benepisyo ninda sa buhis mantang ginigibo iyan. Puedeng makakua kan brosyur na ini paagi sa direktang paghagad nin kopya sa Charitable Planning Office.

Para sa dugang pang impormasyon, puede kamong makikomunikar sa Charitable Planning Office, magsalang paagi sa pagsurat o pag-apod sa telepono, sa adres na nakalista sa ibaba, o puede kamong makikomunikar sa sangang opisina kan Mga Saksi ni Jehova na naglilingkod sa saindong nasyon.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue

San Francisco del Monte

1105 Quezon City

Telepono: (02) 411-6090