Pakamahalon an Saindong Kabtang sa Kongregasyon
Pakamahalon an Saindong Kabtang sa Kongregasyon
“Ibinugtak nin Dios an mga kabtang sa hawak, an lambang saro kaiyan, siring sa naoyonan nia.”—1 COR. 12:18.
1, 2. (a) Ano an nagpapaheling na an lambang saro sa kongregasyon puedeng magkaigwa nin kabtang na mapapahalagahan nia? (b) Anong mga hapot an pag-oolayan niato sa artikulong ini?
POON kan mga aldaw kan suanoy na Israel, an kongregasyon an nagin areglo ni Jehova sa espirituwal na pagpakakan sa saiyang banwaan asin sa paggiya sa sainda. Halimbawa, pagkatapos na daogon kan mga Israelita an siudad nin Ai, “binasa [ni Josue nin] makosog an gabos na tataramon kan ley, an bendisyon asin an maldisyon, sono sa gabos na nasusurat sa libro kan ley . . . sa atubangan kan bilog na kongregasyon nin Israel.”—Jos. 8:34, 35.
2 Kan enot na siglo C.E., sinabihan ni apostol Pablo an Kristianong magurang sa kongregasyon na si Timoteo na an Kristianong kongregasyon “pamilya nin Dios” asin “sarong harigi asin sulay kan katotoohan.” (1 Tim. 3:15) An “pamilya” nin Dios ngonyan iyo an pambilog na kinaban na kasararoan nin magturugang nin tunay na mga Kristiano. Sa kapitulo 12 kan saiyang enot na ipinasabong na surat sa mga taga Corinto, iinagid ni Pablo sa hawak nin tawo an kongregasyon. Sinabi nia na minsan ngani an lambang kabtang may laen na trabaho, an gabos kaipuhan. “Ibinugtak nin Dios an mga kabtang sa hawak,” an isinurat ni Pablo, “an lambang saro kaiyan, siring sa naoyonan nia.” Sinabi pa ngani nia na “an mga kabtang nin hawak na pinaghohona tang kulang nin onra, an mga ini pinapalibotan niato nin mas abundang onra.” (1 Cor. 12:18, 23) Huli kaini, an papel nin sarong tanos na tawo sa pamilya nin Dios dai nakakalabi ni mas hababa kisa kan sa saro pang maimbod na Kristiano. Magkalaen sana iyan. Kun siring, paano niato mahahanap an satong kabtang sa laog kan areglo nin Dios asin papakamahalon o papahalagahan iyan? Anong mga bagay an puedeng may epekto sa satong kabtang sa kongregasyon? Asin paano niato magigibo na ‘an satong pag-oswag maheling kan gabos na tawo’?—1 Tim. 4:15.
Pahalagahan an Satong Kabtang—Paano?
3. Ano an sarong paagi na mahanap an satong kabtang sa kongregasyon asin ikapaheling na pinakamamahal niato iyan?
3 An sarong paagi na mahanap an satong kabtang sa kongregasyon asin mapatunayan na pinakamamahal niato iyan iyo an lubos na pakikikooperar sa “maimbod asin mapagmansay na oripon” asin sa representante kaiyan na Namamahalang Grupo. (Basahon an Mateo 24:45-47.) Kaipuhan niatong siyasaton an reaksion niato sa paggiya sa sato na hale sa grupong oripon. Halimbawa, sa nag-aging mga taon nag-ako kita nin deretso sa puntong paggiya dapit sa paggubing asin pagpakarhay sa sadiri, pag-aling-aling, asin salang paggamit kan Internet. Maingat daw niatong hinihimate an marahay na hatol na ini tanganing maprotehiran kita sa espirituwal? Kumusta man an konseho na magkaigwa nin regular na rutina nin pampamilyang pagsamba? Isinasapuso daw niato an sadol na iyan asin nagtatagama daw kita nin sarong banggi para sa katuyohan na iyan? Kun kita daing agom, nagtatao daw kita nin panahon para sa personal na pag-adal sa Kasuratan? Bebendisyonan kita ni Jehova bilang indibiduwal asin bilang pamilya kun sinusunod niato an paggiya kan grupong oripon.
4. Ano an maninigo niatong pag-isipan kun naggigibo nin personal na mga desisyon?
4 An nagkapira tibaad mangatanosan na personal na desisyon na an mga bagay na arog baga nin pag-aling-aling asin paggubing saka pagpakarhay sa sadiri. Pero, para sa nagdusay na Kristiano na nagpapahalaga sa saiyang kabtang sa kongregasyon, an personal na gusto maninigo na bako sana an basehan kun nagdedesisyon. Nangorognang dapat na pag-isipan an punto de vista ni Jehova na ihinayag paagi sa saiyang Tataramon, an Biblia. An mensahe kaiyan maninigong magin ‘ilawan sa satong bitis, asin liwanag sa satong dalan.’ (Sal. 119:105) Madonong man na pag-isipan niato kun paano an satong mga desisyon sa personal na mga bagay magkakaigwa nin epekto sa satong ministeryo asin sa ibang mga tawo, sa laog sagkod sa luwas kan kongregasyon.—Basahon an 2 Corinto 6:3, 4.
5. Taano ta maninigo kitang magmaan tumang sa espiritu nin pagigin independiente?
5 “An espiritu na naghihiro ngonyan sa mga aki nin kasumbikalan” lakop na marhay kaya garo iyan aire na hinahangos niato. (Efe. 2:2) An espiritung iyan puedeng papag-isipon kita na dai niato kaipuhan an paggiya hale sa organisasyon ni Jehova. Siertong dai niato gustong magin arog ni Diotrefes, na habong ‘mag-ako nin ano man hale ki apostol Juan na may paggalang.’ (3 Juan 9, 10) Kaipuhan na magmaan kita na dai magkaigwa nin espiritu nin pagigin independiente. Sa tataramon man o sa gibo, nungka logod kitang magpaheling nin kawaran nin paggalang sa pinakapaagihan sa pagkomunikar na ginagamit ni Jehova ngonyan. (Bil. 16:1-3) Sa kabaliktaran, maninigo niatong pahalagahan an satong pribilehio na makikooperar sa grupong oripon. Asin bako daw na maninigong magmaigot kita na magin makinuyog asin mapagpasakop sa mga nangengenot sa satong lokal na kongregasyon?—Basahon an Hebreo 13:7, 17.
6. Taano ta maninigo niatong siyasaton an satong personal na mga kamugtakan?
6 An saro pang paagi na ikakapaheling niato na pinapahalagahan niato an satong kabtang sa kongregasyon iyo an maingat na pagsiyasat sa satong personal na mga kamugtakan asin paggibo kan bilog na makakaya niato na ‘pamurawayon an satong ministeryo’ asin magtaong onra ki Jehova. (Roma 11:13) May mga nakapagregular payunir. An iba nasa espesyal na bilog na panahon na paglilingkod arog nin mga misyonero, nagbibiaheng paraataman, asin miembro kan mga pamilyang Bethel sa bilog na kinaban. Dakol na tugang na lalaki asin babae an nagtatabang sa pagtogdok nin mga Kingdom Hall. An dakulang mayoriya kan banwaan ni Jehova ginigibo an pinakamakakaya ninda tanganing asikasohon an espirituwal na mga pangangaipo kan saindang pamilya asin nakikikabtang nin lubos sa ministeryo kada semana. (Basahon an Colosas 3:23, 24.) Makakapagtiwala kita na kun gikan sa boot na ipepresentar niato an satong sadiri sa paglilingkod sa Dios asin gigibohon niato an satong pinakamakakaya na paglingkodan sia nin bilog na kalag, pirme kitang igwa nin kabtang sa saiyang areglo.
Mga Bagay na May Epekto sa Satong Kabtang sa Kongregasyon
7. Ipaliwanag kun ano an puedeng magin epekto kan satong mga kamugtakan sa kabtang niato sa kongregasyon.
7 Mahalagang pakasiyasaton an satong mga kamugtakan huling sa sarong paagi, an satong kabtang sa kongregasyon nakadepende sa kun ano an kaya niatong gibohon. Halimbawa, an kabtang nin tugang na lalaki sa kongregasyon may nagkapirang pagkakalaen sa kabtang nin tugang na babae. An edad, salud, asin iba pang bagay nakakaimpluwensia man sa kaya niatong gibohon sa paglilingkod ki Jehova. “An kagayonan nin hoben na mga lalaki iyo an saindang kakosogan,” an sabi kan Talinhaga 20:29, “asin an kamurawayan nin gurang na mga lalaki iyo an saindang pagkaigwa nin uban.” An mas hoben na mga miembro kan kongregasyon tibaad mas dakol an magigibo sa pisikal na paagi huli sa saindang kosog nin pagkahoben, mantang an mga mas gurang kapakipakinabang na marhay sa kongregasyon huli sa saindang kadonongan asin eksperyensia. Kaipuhan man niatong girumdomon na an ano man na magigibo niato sa organisasyon ni Jehova nakadepende sa dai na kutana maninigong kabootan nin Dios.—Gibo 14:26; Roma 12:6-8.
8. Ano an koneksion kan pagmawot sa kun ano an ginigibo niato sa kongregasyon?
8 An sarong ilustrasyon manongod sa duwang magtugang na babae nagtatampok nin saro pang bagay na may epekto sa magigin kabtang niato sa kongregasyon. Pareho sinda naggradwar sa haiskul. Pareho an saindang mga kamugtakan. Ginibo kan saindang mga magurang an pinakamakakaya ninda tanganing dagkahon sindang duwa na magmaigot na magin regular payunir pagkagradwar. Pagkagradwar, an saro nagpayunir, mantang an saro pa nagkaigwa nin bilog na panahon na sekular na trabaho. Taano ta nagkalaen sinda? An dahelan iyo an pagmawot. Sa katapustapusi, ginibo kan lambang saro an gusto niang gibohon. Bako daw na totoo man iyan sa kadaklan sa sato? Kaipuhan na seryoso niatong pag-isipan kun ano an gusto niatong gibohon sa paglilingkod sa Dios. Puede daw niatong dugangan an satong pakikikabtang dian, dawa kun mangahulogan iyan nin pagliliwat sa satong mga kamugtakan?—2 Cor. 9:7.
9, 10. Ano an maninigo niatong gibohon kun kulang kita sa motibasyon na gumibo nin orog pa sa paglilingkod ki Jehova?
9 Paano kun kita kulang sana sa motibasyon na gumibo nin orog pa sa paglilingkod ki Jehova asin may tendensiang dai magin seryoso sa kongregasyon? Sa saiyang surat sa mga taga Filipos, si Pablo nagsabi: “An Dios an saro na, huli sa pinagmarahay nia, naghihiro sa laog nindo tanganing kamo magmawot sagkod humiro.” Iyo, si Jehova puedeng humiro sa sato asin magkaigwa nin epekto sa satong kabotan, o mga pagmawot.—Fil. 2:13; 4:13.
10 Kun siring, bako daw na maninigo niatong hagadon ki Jehova na logod magkaigwa kita kan pagmawot na gibohon an saiyang kabotan? Iyan mismo an ginibo ni Hadeng David kan suanoy na Israel. Sia namibi: “Ipaaram mo sa sako an saimong mga dalan, O Jehova; tokdoi ako kan saimong mga dana. Palakawa ako sa saimong katotoohan asin tokdoi ako, huli ta ika an sakuyang Dios nin kaligtasan. Sa saimo ako naglaom sa bilog na aldaw.” (Sal. 25:4, 5) Magigibo man niato an arog kaiyan paagi sa pagpamibi ki Jehova na logod magkaigwa kita nin pagmawot na gibohon an nakakapaogma sa saiya. Kun hinohorophorop niato kun ano an saboot ni Jehova Dios asin kan saiyang Aki manongod sa ginigibo niato sa paglilingkod sa sainda, an satong puso napapano nin pag-apresyar sa sainda. (Mat. 26:6-10; Luc. 21:1-4) An pakamate na iyan nin pagpasalamat makakapahiro sa sato na makimaherak ki Jehova na logod magkaigwa kita nin pagmawot na umoswag sa espirituwal. Si propeta Isaias nagtao nin halimbawa kan saboot na maninigo niatong pataluboon. Kan madangog nia an boses ni Jehova na naghapot: “Siisay an sakong susugoon, asin siisay an maduman para sa samo?” an propeta nagsimbag: “Uya ako! Sugoa ako.”—Isa. 6:8.
Umoswag—Paano?
11. (a) Taano ta may pangangaipo para sa mga tugang na lalaki na maghingoang aboton an mga paninimbagan sa organisasyon? (b) Paano puedeng maghingoa an sarong tugang na lalaki na aboton an mga pribilehio nin paglilingkod?
11 Huling 289,678 indibiduwal an nabautismohan sa bilog na kinaban durante kan 2008 taon nin paglilingkod, malinaw na igwa nin dakulang pangangaipo para sa mga tugang na lalaki na mangenot. Paano maninigong humiro an sarong tugang na lalaki huli sa pangangaipong ini? Sa simpleng pagtaram, paagi sa pagmamaigot na maabot an mga kualipikasyon para sa ministeryal na mga lingkod asin kamagurangan na sinasabi sa Kasuratan. (1 Tim. 3:1-10, 12, 13; Tito 1:5-9) Paano puedeng magmaigot an sarong tugang na lalaki na maabot an siring na mga kahagadan na sono sa Kasuratan? Paagi sa aktibong pakikikabtang sa ministeryo, mahigos na pag-asikaso sa saiyang mga asignasyon sa kongregasyon, pagmamaigot na paoswagon an kualidad kan saiyang mga komento sa Kristianong mga pagtiripon, asin pagpaheling nin personal na interes sa mga kapagtubod. Sa siring, ipinapaheling nia na pinakamamahal nia an saiyang kabtang sa kongregasyon.
12. Paano ikakapaheling nin mga hoben an saindang kaigotan para sa katotoohan?
12 Ano an puedeng gibohon nin hoben na mga tugang na lalaki, nangorogna an mga tinedyer, tanganing umoswag sa kongregasyon? Puede sindang maghingoang umoswag sa “kadonongan asin espirituwal na pakasabot” paagi sa pagkua nin kaaraman sa Kasuratan. (Col. 1:9) An pagigin mahigos na estudyante sa Tataramon nin Dios asin aktibong pakikikabtang sa mga pagtiripon kan kongregasyon siertong makakatabang na magibo iyan. An hoben na mga lalaki puede man na maghingoang makualipikar na lumaog sa “dakulang pinto na pasiring sa gibohon” sa manlaenlaen na klase nin bilog na panahon na paglilingkod. (1 Cor. 16:9) An pagkaigwa nin karera sa paglilingkod ki Jehova tunay nanggad na nakakakontentong paagi nin pamumuhay na nagbubunga nin abundang bendisyon.—Basahon an Eclesiastes 12:1.
13, 14. Sa anong mga paagi ikakapaheling nin mga tugang na babae na pinapahalagahan ninda an saindang papel sa kongregasyon?
13 Puede man na ipaheling nin mga tugang na babae na pinakamamahal ninda an saindang pribilehio na personal na magpartisipar sa kaotoban kan Salmo 68:11. Mababasa niato dian: “Si Jehova mismo an nagtataram; an mga babaeng nagsasabi kan maogmang bareta sarong dakulang hukbo.” An saro sa pinakalataw na mga paagi na ikakapaheling nin mga tugang na babae an saindang pagpasalamat para sa saindang kabtang sa kongregasyon iyo an pagpartisipar sa paggibo nin mga disipulo. (Mat. 28:19, 20) Sa siring, paagi sa lubos na pakikikabtang sa ministeryo asin gikan sa boot na pagsasakripisyo para sa gibohon na iyan, pinapatunayan nin mga tugang na babae na pinakamamahal ninda an saindang papel sa kongregasyon.
14 Sa pagsurat ki Tito, si Pablo nagsabi: “An mga gurang na babae magin . . . magalang sa hiro, . . . mga paratokdo nin karahayan; tanganing mapabalik ninda sa toltol na isip an hoben na mga babae na mamoot sa saindang agom na lalaki, mamoot sa saindang mga aki, magin toltol an isip, mabini, mga paratrabaho sa harong, marahay, nagpapasakop sa saindang agom na lalaki, tanganing an tataramon nin Dios dai mapagtaraman na may panglilibak.” (Tito 2:3-5) Puede nanggad na magin marahay na impluwensia sa kongregasyon an maygurang na mga tugang na babae! Paagi sa paggalang sa mga tugang na lalaki na nangengenot asin paagi sa paggibo nin madonong na mga desisyon sa mga bagay na arog baga nin paggubing asin pagpakarhay sa sadiri saka pag-aling-aling, sinda nagtatao nin marahay na halimbawa sa iba asin nagpapaheling nin dakulang pagpapahalaga sa sainda mismong kabtang sa kongregasyon.
15. Ano an puedeng gibohon nin sarong daing agom na tugang na babae tanganing makaya an kamondoan?
15 Kun beses, tibaad depisil para sa sarong daing agom na tugang na babae na mahanap an saiyang kabtang sa kongregasyon. Sarong tugang na babae na nakaeksperyensia kaini an nagsabi: “An pagigin daing agom puedeng mamondo kun minsan.” Kan hinapot sia kun paano nia nakakaya an situwasyon na iyan, sia nagsabi: “An pagpamibi asin pag-adal nakakatabang sa sako na mahanap giraray an sakong kabtang sa kongregasyon. Pinag-aadalan ko kun paano ako minamansay ni Jehova. Dangan naghihingoa akong makatabang sa iba sa kongregasyon. Nakakatabang ini sa sako na bako sanang an sadiri ko an pagparaisipon.” Oyon sa Salmo 32:8, sinabi ni Jehova ki David: “Magtatao ako nin sadol mantang ako nakaturuhok sa saimo.” Iyo, si Jehova may personal na interes sa gabos na lingkod nia, kaiba an daing agom na mga tugang na babae, asin tatabangan nia an gabos na mahanap an saindang kabtang sa kongregasyon.
Papagdanayon an Saindong Kabtang!
16, 17. (a) Taano ta an pag-ako niato sa imbitasyon ni Jehova na magin kabtang kan saiyang organisasyon iyo an pinakamarahay na desisyon na magigibo niato? (b) Paano niato mapapagdanay an satong kabtang sa organisasyon ni Jehova?
16 Mamomoton na dinagka ni Jehova an lambang saro sa saiyang mga lingkod na magkaigwa nin relasyon sa saiya. Si Jesus nagsabi: “Dai nin makakadolok sa sako kun dai sia dagkahon kan Ama na nagsugo sa sako.” (Juan 6:44) Sa gabos na binilyon na tawo sa daga, personal kitang inimbitaran ni Jehova na magin kabtang kan saiyang kongregasyon ngonyan. An pag-ako kan imbitasyon na ini an pinakamarahay na desisyon na ginibo niato kasuarin man. Nagtao iyan nin katuyohan asin kahulogan sa satong buhay. Asin kanigoan na kagayagayahan asin satispaksion an naeeksperyensiahan niato huling may kabtang kita sa kongregasyon!
17 “Jehova, namotan ko an erokan sa saimong harong,” an sabi kan salmista. Sia nag-awit man: “An sakuyang bitis matindog nanggad sa sarong patag na lugar; sa tahaw kan nagkakasararong mga kadaklan oomawon ko si Jehova.” (Sal. 26:8, 12) An tunay na Dios may itinagamang kabtang para sa lambang saro sa sato sa saiyang organisasyon. Paagi sa padagos na pagsunod sa teokratikong paggiya asin pagdadanay na sibot sa paglilingkod sa Dios, mapapagdanay niato an satong mahalagang marhay na kabtang sa areglo ni Jehova.
Nagigirumdoman daw Nindo?
• Taano ta rasonableng magkongklusyon na an gabos na Kristiano igwa nin kabtang sa kongregasyon?
• Paano niato ipinapaheling na pinapahalagahan niato an satong kabtang sa organisasyon nin Dios?
• Anong mga bagay an puedeng may epekto sa satong kabtang sa kongregasyon?
• Paano puedeng ipaheling nin Kristianong mga hoben asin adulto na pinakamamahal ninda an saindang kabtang sa areglo nin Dios?
[Mga Hapot Para sa Pag-adal]
[Mga Ritrato sa pahina 16]
Paano puedeng maghingoa an mga tugang na lalaki na maabot an mga pribilehio sa kongregasyon?
[Ritrato sa pahina 17]
Paano puedeng ipaheling nin mga tugang na babae na pinakamamahal ninda an saindang kabtang sa kongregasyon?