Papagdanayon an Kagayagayahan sa Masakit na mga Panahon
Papagdanayon an Kagayagayahan sa Masakit na mga Panahon
“An gabos na nagpapaili sa saimo maggagayagaya; sinda magkukurahaw sa kagayagayahan sa panahon na daing talaan.”—SAL. 5:11.
1, 2. (a) Ano an nagkapirang bagay na dahelan nin grabeng kasakitan ngonyan? (b) Apuera sa mga kasakitan na parateng nangyayari sa gabos, ano an dapat tagalan nin tunay na mga Kristiano?
BAKONG libre an mga Saksi ni Jehova sa mga kasakitan na nangyayari sa katawohan sa pangkagabsan. Dakol sa banwaan nin Dios an nagin biktima nin krimen, guerra, asin iba pang inhustisya. An natural na mga kalamidad, kadukhaan, helang, asin kagadanan iyo an dahelan nin grabeng kasakitan. Angay sanang isinurat ni apostol Pablo: “Aram niato na an gabos na linalang padagos na nag-aaragrangay nin iriba asin nakokolgan nin iriba sagkod ngonyan.” (Roma 8:22) Biktima man kita kan sato mismong pagkabakong sangkap. Siring ki Hadeng David kan suanoy, masasabi man niato: “An sadiri kong mga sala nakasanop na sa sakong payo; siring sa magabat na pasan an mga iyan magabaton na para sa sako.”—Sal. 38:4.
2 Apuera sa mga kasakitan na parateng nangyayari sa gabos na tawo, an tunay na mga Kristiano may pasan na piguratibong hariging pasakitan. (Luc. 14:27) Iyo, arog ki Jesus, ikinakaongis asin pinepersegir an mga disipulo nia. (Mat. 10:22, 23; Juan 15:20; 16:2) Huli kaini, an pagsunod sa Cristo nangangaipo nin maigot na paghihingoa asin pagtagal mantang hinahalat niato an mga bendisyon kan bagong kinaban.—Mat. 7:13, 14; Luc. 13:24.
3. Paano niato naaaraman na an mga Kristiano dai kaipuhan na mamuhay na may kasakitan tanganing mapaogma an Dios?
3 Nangangahulogan daw ini na an tunay na mga Kristiano namumuhay na mayong kagayagayahan asin kaogmahan? An buhay daw niato pirme na sanang mamondo asin mapungaw sagkod na mag-abot an katapusan? Malinaw nanggad na gusto ni Jehova na kita magin maogma mantang hinahalat niato an kaotoban kan saiyang mga panuga. Paorootrong ilinaladawan kan Biblia na maogmang mga tawo an tunay na mga parasamba. (Basahon an Isaias 65:13, 14.) “An gabos na nagpapaili [ki Jehova] maggagayagaya; sinda magkukurahaw sa kagayagayahan sa panahon na daing talaan,” an sabi kan Salmo 5:11. Iyo, posibleng magkaigwa nin dakulang kagayagayahan, katoninongan nin isip, asin pagkakontento dawa kun may mga kasakitan. Repasohon niato kun paano makakatabang sa sato an Biblia na atubangon an mga pagbalo asin magin magayagaya pa man giraray.
Si Jehova—An “Maogmang Dios”
4. Ano an namamatean nin Dios kun isinisikwal an saiyang autoridad?
4 Halimbawa, isip-isipa si Jehova. Bilang Makakamhan sa Gabos na Dios, sia an may autoridad sa bilog na uniberso. Mayong kulang sa saiya asin dai nia kaipuhan an siisay man. Minsan siring, sa ibong kan saiyang nakakalabing marhay na kapangyarihan, siertong namondo si Jehova kan an saro sa saiyang espiritung mga aki magrebelde asin magin Satanas. Kan huri, an Dios seguradong naapektaran kan umayon sa pagrebelde an iba pang anghel. Isip-isipon man an kolog na namatean nin Dios kan tumalikod sa saiya si Adan asin Eva, an mga obra maestra kan saiyang mga linalang sa daga. Poon kaidto, binilyon sa mga naggikan sa sainda an nagsisikwal sa autoridad ni Jehova.—Roma 3:23.
5. Ano an nangorognang nakakakolog sa boot ni Jehova?
5 An pagrebelde ni Satanas nag-oorog pa. Sa laog nin mga 6,000 na taon, naoobserbaran ni Jehova an mga gibo nin idolatriya, kadahasan, paggadan, asin salang paggamit sa sekso. (Gen. 6:5, 6, 11, 12) Apuera kaiyan, nadadangog nia an makababaldeng mga kaputikan asin paglanghad. May beses na nakokolgan an boot nin Dios dawa kan mismong tunay na mga nagsasamba sa saiya. Ilinadawan kan Biblia an saro sa siring na situwasyon paagi sa mga tataramon na: “Kanigoan kaparate na sinda nagrebelde sa saiya sa kaawagan, pinakolog ninda an saiyang boot sa desierto! Asin paorootrong binabalo ninda an Dios, asin pinakolog ninda an boot pati kan Banal kan Israel.” (Sal. 78:40, 41) Siertong nakokolgan na gayo si Jehova kun isinisikwal sia kan saiyang mga lingkod. (Jer. 3:1-10) Malinaw nanggad na may maraot na mga nangyayari, asin nakokolgan na gayo si Jehova huli kaiyan.—Basahon an Isaias 63:9, 10.
6. Paano inaatubang ni Jehova an makolog sa boot na mga situwasyon?
6 Pero, dai makakaolang ki Jehova an kolog nin boot asin kamondoan. Kun nagkakaigwa nin mga problema, tolos-tolos na minahiro si Jehova tanganing mainaan an maraot na mga epekto kaiyan. Naggigibo man sia nin panghaloyan na mga solusyon tanganing pag-abot nin panahon maotob an katuyohan nia. Huli sa positibong mga aksion na ini, magayagayang inaantisipar ni Jehova an pagbindikar sa saiyang soberaniya asin an magigin mga bendisyon sa maimbod na mga nagsasamba sa saiya. (Sal. 104:31) Iyo, sa ibong kan kadakol na pagtuyaw sa saiya, si Jehova nagdadanay na “maogmang Dios.”—1 Tim. 1:11; Sal. 16:11.
7, 8. Kun nagkakaigwa nin mga problema, paano niato maaarog si Jehova?
7 Totoo, dai niato ikakakomparar an satong sadiri ki Jehova kun dapit sa satong kakayahan na resolberan an mga problema. Pero, maaarog niato si Jehova mantang inaatubang niato an mga problema. Normal sanang mamondo kun nagkakaigwa nin mga problema, alagad dai niato kaipuhan na magdanay na mamondo. Huling kita linalang segun sa ladawan ni Jehova, igwa kita nin kakayahan na mag-isip asin praktikal na kadonongan, na nakakatabang sa sato na analisaron an satong mga problema asin gumibo nin positibong aksion kun posible.
8 An sarong importanteng bagay na makakatabang sa sato na makaya an mga problema sa buhay iyo an pag-admitir na may mga bagay na dai nanggad niato kontrolado. An pagparahadit sa siring na mga bagay puedeng makadagdag sa pagkadesganar asin makahale kan mga kagayagayahan niato na konektado sa tunay na pagsamba. Pagkatapos na gumibo nin rasonableng mga solusyon sa sarong problema, pinakamarahay na dai na iyan pagparaisipon asin magkonsentrar sa mas mabungang mga gibohon. An masunod na mga pagkasaysay sa Biblia malinaw na nag-iilustrar kan puntong ini.
Mahalagang Marhay an Pagkarasonable
9. Paano si Ana nagpaheling nin pagkarasonable?
9 Estudyare an halimbawa ni Ana, na pag-abot nin panahon nagin ina ni Samuel na propeta. Nangluya an boot nia huli ta dai sia nagkakaaki. Sia tinuyatuya asin dinuhagi huli sa pagkabaog nia. Kun beses, nangluluyang gayo an boot ni Ana kaya sia nagpaparahibi asin dai nagkakakan. (1 Sam. 1:2-7) Durante kan saro sa mga pagdalaw nia sa santuaryo ni Jehova, nagin ‘may kapaitan an kalag ni Ana, asin nagpoon siang mamibi ki Jehova asin maghibi nin makuri.’ (1 Sam. 1:10) Pagkatapos na ipahayag ni Ana an saiyang mga saboot ki Jehova, dinolok sia ni Eli na halangkaw na saserdote asin ini nagsabi: “Lakaw sa katoninongan, asin itao logod kan Dios nin Israel an hinagad mo sa saiya.” (1 Sam. 1:17) Sa puntong ini, siertong narealisar ni Ana na ginibo na nia an gabos niang makakaya. Dai nia kontrolado an saiyang pagkabaog. Si Ana nagpaheling nin pagkarasonable. Dangan, sia “nagpadagos sa saiyang paglakaw asin nagkakan, asin an saiyang lalawgon bako nang hadit sa saiyang sadiring kamugtakan.”—1 Sam. 1:18.
10. Anong realistikong saboot an ipinaheling ni Pablo kan mapaatubang sia sa sarong problema na dai nia kayang resolberan?
10 Si apostol Pablo nagpaheling nin kaagid na saboot kan mapaatubang sa kasakitan. Sia nagkahelang na nakapurisaw na gayo sa saiya. Inapod nia iyan na “sarong tunok sa laman.” (2 Cor. 12:7) Ano man an helang na ini, ginibo ni Pablo an makakaya nia tanganing mahale iyan, na namimibi ki Jehova na logod makaginhawa. Pirang beses daw si Pablo na nakimaherak ki Jehova manongod sa bagay na iyan? Tolong beses. Kan ikatolong beses, ihinayag nin Dios ki Pablo na dai milagrosong mahahale an “tunok sa laman.” Inako ini ni Pablo asin nagkonsentrar sa lubos na paglilingkod ki Jehova.—Basahon an 2 Corinto 12:8-10.
11. Ano an papel nin pamibi asin pagngayongayo tanganing makaya an mga kasakitan?
11 Dai boot sabihon kan mga halimbawang ini na dai na kita maninigong mamibi ki Jehova manongod sa nakakapurisaw na mga bagay. (Sal. 86:7) Sa kabaliktaran, pinapakiolayan kita kan Tataramon nin Dios: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pagpasalamat ipahayag nindo sa Dios an saindong mga kahagadan.” Ano an magigin reaksion ni Jehova sa siring na mga pagngayongayo asin kahagadan? An Biblia nagsabi pa: “Asin an katoninongan nin Dios na labi sa gabos na kaisipan mag-iingat sa saindong puso asin sa saindong pag-isip paagi ki Cristo Jesus.” (Fil. 4:6, 7) Iyo, tibaad dai haleon ni Jehova an satong problema, alagad puede niang simbagon an satong mga pamibi paagi sa pag-ingat sa satong pag-isip. Pagkatapos na ipamibi an sarong problema, tibaad marealisar niato an peligro sa grabeng pagparahadit.
Ikaogmang Marhay an Paggibo kan Kabotan nin Dios
12. Taano ta kapahapahamak an pagigin pirmeng nangluluya an boot?
12 Ipinahayag kan Talinhaga 24:10: “Ika daw nangluya an boot sa aldaw nin kasakitan? An saimong kosog magigin kadikit.” An saro pang Talinhaga nagsabi: “Huli sa kakologan kan puso nagsasakit an espiritu.” (Tal. 15:13) An nagkapirang Kristiano nangluya an boot sagkod na ipinondo na ninda an saindang personal na pagbasa sa Biblia asin paghorophorop sa Tataramon nin Dios. An saindang mga pamibi nagigin mekanikal na sana, asin tibaad isuway ninda an saindang sadiri sa mga kapwa parasamba. Malinaw nanggad na puedeng magin kapahapahamak an pagigin pirmeng mamondo.—Tal. 18:1, 14.
13. Ano an nagkapirang aktibidad na makakatabang na mahale an pangluluya nin boot asin makakatao sa sato nin kagayagayahan?
13 Sa ibong na lado, an pagigin positibo makakatabang sa sato na magkonsentrar sa mga aspekto kan satong buhay na puedeng magin gikanan nin dakulang kaogmahan asin kagayagayahan niato. Si David nagsurat: “An paggibo kan boot mo, O Dios ko, iyo an ikinakaogma kong marhay.” (Sal. 40:8) Kun nagkakaigwa nin mga problema sa satong buhay, dai nanggad kita maninigong magpondo sa nakakapakosog na rutina nin pagsamba. Sa katunayan, an panglaban sa kamondoan iyo an pakikikabtang sa mga aktibidad na nagtatao nin kaogmahan. Si Jehova nagsasabi sa sato na ikakaogma niatong marhay an pagbasa sa saiyang Tataramon asin an regular na pagsiyasat dian. (Sal. 1:1, 2; Sant. 1:25) Paagi sa Banal na Kasuratan sagkod sa Kristianong mga pagtiripon, nag-aako kita nin “managom na mga tataramon” na makakaparigon sa sato asin makakapagayagaya sa satong puso.—Tal. 12:25; 16:24.
14. Anong garantiya hale ki Jehova an nagtatao sa sato nin kagayagayahan ngonyan?
14 An Dios nagtatao sa sato nin dakol na dahelan na magin magayagaya. Tunay nanggad na an saiyang panuga na kaligtasan sarong pangenot na gikanan nin kaogmahan. (Sal. 13:5) Aram niato na ano man an nangyayari sa sato ngonyan, pag-abot nin panahon tatawan nin Dios nin balos an mga maigot na naghahanap sa saiya. (Basahon an Eclesiastes 8:12.) Magayon na ipinahayag ni propeta Habacuc an siring na kombiksion kan sia magsurat: “Minsan ngani an higera tibaad dai magburak, asin tibaad mayo nin ani sa mga poon nin ubas; an gibo kan olibo tibaad dai nanggad mangyari, asin an hagdan-hagdan na daga mismo tibaad dai magtao nin kakanon; an mga karnero tibaad mapasuhay sa mga laoman, asin tibaad mayo nin mga baka sa mga toril; pero, kun para sa sako, ako magpapakagayagaya ki Jehova; maggagayagaya ako sa Dios nin sakong kaligtasan.”—Hab. 3:17, 18.
“Maogma an Banwaan na an Dios Iyo si Jehova!”
15, 16. Sabihon an nagkapirang balaog nin Dios na puede niatong ikaogma mantang hinahalat an mga bendisyon sa ngapit.
15 Mantang hinahalat niato an marahayon na ngapit na nakatagama sa sato, an kabotan ni Jehova iyo na ikaogma niato an marahay na mga bagay na itinatao nia sa sato. An Biblia nagsabi: “Naaraman ko na mayong orog karahay para sa sainda kisa sa maggayagaya asin gumibo nin marahay sa panahon na an saro nabubuhay; asin siring man na an lambang tawo kumakan asin uminom nanggad patin makaheling nin karahayan sa gabos niang kahigosan. Iyan an balaog nin Dios.” (Ecl. 3:12, 13) Kalabot sa “gumibo nin marahay” an paggibo nin karahayan sa iba. Si Jesus nagsabi na igwang orog na kaogmahan sa pagtao kisa sa pag-ako. Nagtatao nin hararom na pagkakontento an paggibo nin kabootan sa satong agom, mga aki, mga magurang, asin iba pang paryente. (Tal. 3:27) An pagigin mapagpadangat, mapag-istimar, asin mapagpatawad sa satong espirituwal na mga tugang nagbubunga man nin dakulang kagayagayahan, asin iyan nakakapaogma ki Jehova. (Gal. 6:10; Col. 3:12-14; 1 Ped. 4:8, 9) Asin tunay na nakakakontento an mapagsakripisyong pag-otob sa satong ministeryo.
16 An mga tataramon sa Eclesiastes na kinotar sa enotan nagsambit nin simpleng mga kaogmahan sa buhay, siring baga nin pagkakan asin pag-inom. Iyo, dawa nakakaeksperyensia nin mga pagbalo, puede niatong ikagayagaya an ano man na materyal na mga balaog na inaako niato ki Jehova. Apuera kaini, libre sana an pagheling sa magayonon na pagsolnop nin saldang, kawiliwiling tanawon, makangingising hiro kan mga ogbon nin hayop, asin iba pang ngangalasan sa naturalesa, pero iyan kahangahangang marhay asin nagtatao nin kagayagayahan sa sato. Mantang hinohorophorop niato an siring na mga bagay, nagtatalubo an satong pagkamoot ki Jehova, huling sia an Kagtao nin gabos na marahay na bagay.
17. Ano an magtatao sa sato nin lubos na pakaginhawa sa mga problema, asin mientras tanto, ano an nagtatao sa sato nin karangahan?
17 Sa katapustapusi, an satong pagkamoot sa Dios, pagkuyog sa saiyang mga togon, asin pagtubod sa atang na pantubos an magtatao sa sato nin lubos na pakaginhawa sa mga problema na huli sa pagkabakong sangkap nin buhay asin magiya sa sato pasing sa nagdadanay na kagayagayahan. (1 Juan 5:3) Mientras tanto, nararanga kita sa pakaaram na naheheling nanggad ni Jehova an gabos na bagay na nagpapasakit sa sato. Si David nagsurat: “Ako magigin magayagaya asin mag-oogma sa saimong mamomoton na kabootan, huling naheling mo an sakong kasakitan; naaraman mo an manongod sa mga kapurisawan kan sakong kalag.” (Sal. 31:7) Huling si Jehova napapahiro nin pagkamoot sa sato, ililigtas nia kita sa kapahamakan.—Sal. 34:19.
18. Taano ta maninigong mangibabaw an kagayagayahan sa banwaan nin Dios?
18 Mantang hinahalat niato an kaotoban kan saiyang mga panuga, arogon logod niato si Jehova, an maogmang Dios. Likayan logod niato na makaolang sa satong espirituwalidad an negatibong mga saboot. Kun magkaigwa nin mga problema, logod na giyahan kita nin kakayahan na mag-isip asin praktikal na kadonongan. Tatabangan kita ni Jehova na kontrolon an satong mga emosyon asin gumibo nin ano man na posibleng mga lakdang tanganing mainaan an maraot na mga epekto nin masakit na mga pangyayari. Ikaogma nanggad niato an marahay na mga bagay na hale sa saiya, sa pisikal sagkod espirituwal. Paagi sa pagdadanay na dayupot sa Dios, makakapaggayagaya kita huling “maogma an banwaan na an Dios iyo si Jehova!”—Sal. 144:15.
Ano an Nanodan Nindo?
• Kun napapaatubang sa mga problema, paano niato maaarog si Jehova?
• Paano makakatabang sa sato an pagkarasonable tanganing makaya an mga problema?
• Sa mga panahon nin kasakitan, paano niato ikakaogmang marhay an paggibo kan kabotan nin Dios?
[Mga Hapot Para sa Pag-adal]
[Mga Ritrato sa pahina 16]
Nakokolgan na gayo si Jehova huli sa maraot na mga nangyayari
[Credit Line]
© G.M.B. Akash/Panos Pictures
[Mga Ritrato sa pahina 18]
Tinatawan kita ni Jehova nin mga paagi tanganing mapagdanay an kagayagayahan