Sibot Asin Magayagaya sa Paglilingkod sa Dios

GUSTO ni Jehova na ika magin magayagaya. (Sal. 100:2) Bilang saro sa mga lingkod nia, posibleng marhay na ika sibot man. Tibaad bako ka man arog kaini kasibot kan idusay mo an saimong buhay sa Dios, alagad ngonyan tibaad nasasakitan ka huli sa sekular asin espirituwal na mga paninimbagan. Tibaad nakokonsensia ka pa ngani kun dai mo nagigibo an gabos na gusto mong gibohon. Paano ka magkakaigwa nin tamang pagkatimbang asin makakapagpadanay kan “kagayagayahan gikan ki Jehova”?—Neh. 8:10.

Ika nabubuhay sa delikadong mga panahon asin apektado nin dakol na kasakitan, kaya kaipuhan mong magin organisadong marhay. Mapadapit digdi, partikularmenteng mahalaga an nagkapira sa ipinasabong na mga hatol ni apostol Pablo: “Magmaan kamong marhay na an saindong paglakaw bakong bilang mga mangmang kundi bilang mga madonong, na binabakal an angay na panahon para sa saindong sadiri, huli ta an mga aldaw maraot.”—Efe. 5:15, 16.

Huli sa madonong na hatol na iyan, paano ka magibo nin realistikong mga pasohan para sa saimong sadiri asin magigin timbang sa personal na pag-adal, pag-asikaso sa pamilya, paglilingkod sa langtad, sekular na trabaho, asin iba pang mahalagang aktibidad?

Nagigirumdoman mo daw an kagayagayahan na naeksperyensiahan mo kan ika magdusay sa Dios asin magpabautismo? An kagayagayahan resulta nin kaaraman dapit ki Jehova asin sa mga katuyohan nia. Posibleng nagkaipo nin dakol na bulan nin maigot na pag-adal tanganing makamtan an pakasabot asin kagayagayahan na iyan. Alagad bawi nanggad an paghihingoa. Huli sa pag-adal na iyan nagin mas marahay an saimong buhay.

Tanganing mapagdanay an saimong kagayagayahan, kaipuhan mong padagos na magkakan sa espirituwal. Kun ika nasasakitan na magtagama nin panahon para sa pagbasa asin pag-adal sa Biblia, siyasaton an saimong iskedyul. Ika orog nanggad na magigin dayupot ki Jehova dawa sa pira sanang minutong pag-adal asin paghorophorop kada aldaw, saka seguradong makakakontribwir iyan sa saimong kagayagayahan.

An kadaklan sa mga lingkod nin Dios puedeng bumakal nin panahon hale sa bakong gayong mahahalagang bagay tanganing gamiton sa mahahalagang aktibidad. Hapoton an saimong sadiri, ‘Gurano kadakol na panahon an ginagamit ko sa pagbasa nin sekular na mga magasin o diaryo, pagheling nin mga programa sa TV, paghinanyog nin musika, o pagkaigwa nin sarong apisyon?’ Puedeng magin kawiliwili an siring na mga aktibidad basta pinagdadanay na timbang. (1 Tim. 4:8) Kun marealisar mo na bakong tama an paggamit mo nin panahon, gumibo nin mga lakdang na liwaton an saimong iskedyul.

 Si Adam, na may agom asin tolong aki saka sarong magurang sa kongregasyon, nagpaliwanag kan nakatabang sa saiya: “Pinagmaigotan kong mamuhay nin simple. Linikayan ko an mga apisyon na nagkakaipo nin dakol na panahon asin mga rogaring na nagkakaipo nin dakulang atension. Iyan bakong pamumuhay na nagpapainda sa sadiri—simpleng aling-alingan sana an pinipili ko.”

An paghorophorop sa marahay na mga resulta kan saimong mga desisyon puedeng makapakosog giraray sa saimong kagayagayahan asin makatabang sa saimo na magdanay na positibo. Halimbawa, si Mariusz, sarong magurang sa kongregasyon asin may tolong aki, nagsabi: “Kan ponan kong pag-adalan an Biblia, ako napano nin paglaom. Sa panapanahon, napapaatubang pa man giraray ako sa mga kadepisilan, na an kadaklan kaiyan si Jehova sana an nakakaaram. Alagad huli sa saiyang suporta, ako naglalaom sa ngapit na may kagayagayahan.”

Arog sa kamugtakan ni Mariusz, dai mahahale nin pagigin positibo an gabos na kahaditan. Alagad makakatabang iyan sa saimo na magkaigwa nin mas marahay na pagmate asin atubangon nin mas epektibo an mga kadepisilan sa buhay. Mababasa niato: “Maraot an gabos na aldaw kan nagsasakit nin makuri; alagad an saro na marahay an puso danay na may kapiestahan.” (Tal. 15:15) Horophoropon man an pagkamoot na ipinapaheling na sa saimo nin Dios. An siring na paghorophorop makakapatalubo kan saimong pagkamoot sa saiya asin makakapararom kan saimong diosnon na kagayagayahan.—Mat. 22:37.

Maorog an kagayagayahan nin pamilya kun sa saindang buhay ineenot ninda si Jehova asin an saiyang intereses. An pagpaheling nin Kristianong mga kualidad nakakaina sa dai pagkakaoyon asin nagreresulta sa mas dayupot saka mas nakakaogmang pag-iribanan nin pamilya. Sa siring, an saindong harong magkakaigwa nin tunay na katoninongan asin pagkasararo para sa bilog na pamilya.—Sal. 133:1.

An pakikikabtang sa espirituwal na mga aktibidad bilang pamilya nakakadagdag sa tunay na kagayagayahan. Si Mariusz nagpaliwanag: “Pinapahalagahan ko an panahon na kami nag-iiribanan bilang pamilya. Mapagsuportar na marhay an agom ko. Sagkod na posible, kaibanan ko sia baga man ako nasa ministeryo sa langtad o ako naglilinig sa istadyum bago kan mga kombension, asin iniibanan nia ako kun ako may pampublikong mga pahayag sa ibang mga kongregasyon. Napaparigon kaini an sakong boot.”

An Kasuratan nagboboot sa mga Kristiano na itao an materyal na mga pangangaipo kan saindang pamilya. (1 Tim. 5:8) Alagad kun dakolon nanggad na panahon asin kosog an nagagamit sa sekular na trabaho, puedeng mawaran ka nin kagayagayahan sa paglilingkod sa Dios. Ipamibi iyan ki Jehova. (Sal. 55:22) An nagkapira nagkongklusyon na an pag-enot sa Kahadean nin Dios nangangahulogan nin paghanap nin ibang trabaho. Dai maninigong togotan nin siisay man na Kristiano na mapabayaan an espirituwal na mga bagay, na orog na mahalaga, huli sa sarong trabaho na nagkakaipo nin dakolon na panahon asin kosog.—Tal. 22:3.

Puedeng makatabang sa saimo an pagsurat kan gabos na bentaha asin disbentaha kan posibleng magin trabaho o trabaho sa presente. Siempre, kawiliwili an pagkaigwa nin trabaho na nakakakontento asin halangkaw an sueldo. Pero, an trabaho mo daw sa presente nakakatabang sa saimo na mapaoswag an espirituwalidad kan saimong pamilya? Makatanosan na turotimbangon an gabos na bagay na kalabot dian, asin gumibo nin mga desisyon na magigin prioridad an saimong relasyon ki Jehova.

Kun an trabaho mo sa presente dai nakakatabang sa espirituwal na pag-oswag, kaipuhan mong gumibo nin pagbabago sa saimong kamugtakan. Dakol na Kristiano an naggibo nin dakulang mga pagbabago tanganing magkaigwa nin panahon para sa espirituwal na mga bagay. An sarong tugang na lalaki sa Polandia nag-estorya: “Sarong beses, napiritan akong maghale sa kompanyang pinagtatrabahohan ko dahel parate akong nagbibiahe huli sa trabaho. Mayo na ako kaidto nin igong panahon tanganing asikasohon nin tama an espirituwal na mga bagay o an sakong pamilya.” An trabaho nia sa presente dai na nagkakaipo nin dakol na panahon asin kosog.

Magin Magayagaya sa Pagtabang sa Iba

Sinabi ni Jesus na “igwang orog na kaogmahan sa pagtao kisa sa pag-ako.” (Gibo 20:35) Dakol nin oportunidad an mga Kristiano para sa siring na pagtao. Kun beses, an makikatood na paghuyom, pag-abrasa, o sinserong pagpasalamat mo sa pagpapagal nin saro sa teokratikong asignasyon tibaad iyo sana an kaipuhan tanganing ika asin sia magin magayagaya.

Dinagka ni apostol Pablo an mga kapwa Kristiano: “Magtaram na may pagranga sa mga kalag na nagmomondo nin makuri, suportaran an mga maluya.” (1 Tes. 5:14) An mga kalag na nagmomondo nin  makuri tibaad mag-isip na dai ninda kayang atubangon an mga problema kun sa sadiri sana nindang kosog. Matatabangan mo daw an mga arog ninda? Kun maheling mo na an saro sa saimong mga tugang nawawaran na nin kagayagayahan sa saiyang paglilingkod ki Jehova, pagmaigotan na parigonon sia. Mapaparigon ka man sa paggibo kaiyan. An nagkapirang problema dai kayang resolberan nin siisay man na tawo. Minsan siring, puede kang magpaheling nin sinserong pagmalasakit asin puede mong dagkahon an saimong tugang na magsarig sa dai noarin man nasusudyang suporta ni Jehova. Dai noarin man masusudya an mga naggigibo kaiyan.—Sal. 27:10; Isa. 59:1.

An saro pang praktikal na lakdang iyo na agdahon mo an saro na mayo nin kagayagayahan na ibanan ka sa ministeryo. Kan sugoon ni Jesus an 70 disipulo, ginibo nia iyan “nin manduwaduwa.” (Luc. 10:1) Kun siring, naniniwala ka daw na sia nagtao nin paagi na magparinigonan? Puede mo daw gamiton an paaging iyan tanganing tabangan an nagkapira ngonyan na magkaigwa giraray nin kagayagayahan?

An buhay pano nin lehitimong kahaditan. Pero, si Pablo nagsadol sa sato: “Danay kamong maggayagaya sa Kagurangnan. Sa giraray sasabihon ko, Maggayagaya kamo!” (Fil. 4:4) Huling namomotan mo an Dios, kinukuyog sia, asin nagmamaigot na marhay sa gibohon na itinatao nia sa saimo, nagkaigwa nin katuyohan an buhay mo. Iyan nagtatao sa saimo nin kagayagayahan. Dugang pa, tinatabangan ka ni Jehova na atubangon an saimong mga kasakitan asin problema.—Roma 2:6, 7.

Paagi sa mga mata nin pagtubod, aram niato kun gurano na kita kaharani sa ipinanuga ni Jehova na bagong kinaban. Kanigoan kadakol na bendisyon asin dahelan na maggayagaya an itatao kaiyan! (Sal. 37:34) Kaya puede kitang magin maogma, na dai linilingawan kun gurano kadakol kan bendisyon ni Jehova sa sato dawa ngonyan. Sa siring, ‘makakapaglingkod ka ki Jehova na may paggayagaya.’—Sal. 100:2.

[Diagram sa pahina 8]

(Para sa aktuwal na format, hilingon an publikasyon)

Tibaad kaipuhan mong liwaton kun paano mo binabarangabanga an saimong panahon tanganing ika magdanay na magayagaya

DIBERSION Asin PAG-ALING-ALING

HARONG Asin PAG-ASIKASO SA PAMILYA

TRABAHO

KRISTIANONG MGA PAGTIRIPON

PERSONAL NA PAG-ADAL

MINISTERYO

[Mga Ritrato sa pahina 10]

Ika daw nasa kamugtakan na tabangan an iba na magkaigwa giraray nin kagayagayahan?