An Pamamahala ni Satanas Siertong Dai Magigin Mapanggana
An Pamamahala ni Satanas Siertong Dai Magigin Mapanggana
“Mayo nanggad nin mangyayaring marahay sa maraot.”—ECL. 8:13.
1. Taano ta nakakarangang bareta an maabot na paghokom sa mga maraot?
MAABOT an panahon na dapat hokoman an mga maraot. Dapat sindang manimbag sa mga ginibo ninda. (Tal. 5:22; Ecl. 8:12, 13) Nakakarangang bareta iyan, nangorogna para sa mga namomoot sa katanosan asin nagtagal nin inhustisya asin pagmaltrato na kagigibohan kan mga maraot. An pangenot sa mga maraot na hohokoman iyo an ama nin karatan, si Satanas na Diablo.—Juan 8:44.
2. Taano ta kaipuhan an panahon tanganing resolberan an isyu na pinalataw sa Eden?
2 Duman sa Eden, an sobrang pagtao ni Satanas nin importansia sa saiyang sadiri an dahelan kan pagsikwal nin mga tawo sa pamamahala ni Jehova. Bilang resulta, an satong enot na mga magurang uminiba ki Satanas sa pagkuestion sa deretso kan autoridad ni Jehova asin sinda nagin parakasala sa Saiyang pagheling. (Roma 5:12-14) Siempre, aram ni Jehova kun ano an magigin resulta para sa sainda kan saindang pagigin daing galang asin rebelyoso. Minsan siring, an dai malilikayan na resultang iyan kaipuhan na marisa nanggad kan gabos na intelihenteng linalang. Huli kaini, kaipuhan an panahon tanganing resolberan an isyu asin ipaheling sa nakakakombensir na paagi na talagang sala an mga rebelde.
3. Ano an satong paninindogan dapit sa mga gobyerno nin tawo?
3 Huling isinikwal nin mga tawo an pangangataman ni Jehova, kaipuhan nindang mag-establisar nin sadiri nindang mga klase nin gobyerno. Sa pagsurat sa mga kapagtubod sa Roma, inapod ni apostol Pablo an siring na mga gobyerno nin tawo na “superyor na mga autoridad.” Kan panahon ni Pablo, an superyor na mga autoridad sa pangenot iyo an gobyerno kan Roma na pinamahalaan ni Emperador Nero kan 54-68 C.E. Sinabi ni Pablo na an siring na superyor na mga autoridad “nasa saindang relatibong mga kamugtakan na itinogot nin Dios.” (Basahon an Roma 13:1, 2.) An boot daw sabihon ni Pablo iyo na superyor an pamamahala nin tawo kisa sa pamamahala nin Dios? Dai nanggad. Imbes, an sinasabi sana nia iyo na sagkod na itinotogot nin Dios na magdanay an pamamahala nin tawo, maninigong igalang nin mga Kristiano an “areglo nin Dios” asin akoon an siring na mga namamahala.
Sarong Dalan Pasiring sa Grabeng Kapahamakan
4. Ipaliwanag kun taano ta siertong dai magigin mapanggana an pamamahala nin tawo.
4 Pero, an pamamahala nin tawo na impluwensiado ni Satanas siertong dai magigin mapanggana. Taano? An sarong dahelan, iyan bakong basado sa kadonongan nin Dios. Solamenteng si Jehova an may sangkap na kadonongan. Sa siring, sia an solamenteng masasarigan na giya sa kun ano an kalabot sa mapangganang pamamahala. (Jer. 8:9; Roma 16:27) Bakong arog nin mga tawo, na sa parate nakakanood paagi sa pag-eksperimento, pirmeng aram ni Jehova an pinakamarahay na paagi nin paghiro. An ano man na pamamahala na dai nagsusunod sa saiyang paggiya siertong dai magigin mapanggana. Sa dahelan sanang iyan—dai na baga sambiton pa an kalabot na maraot na motibo—an alternatibong pamamahala ni Satanas paagi sa mga tawo siertong dai magigin mapanggana poon pa sa kapinonan.
5, 6. Ano an malinaw na dahelan kan pagtumang ni Satanas ki Jehova?
5 An sarong madonong na tawo sa pangkagabsan dai poponan an sarong gibohon na siertong dai magigin mapanggana. Kun iiinsistir nia na idagos iyan, marerealisar nanggad nia na sia sala. Dakol na beses nang napatunayan sa kasaysayan na mayong kamanungdanan an pagtumang sa makakamhan sa gabos na Kaglalang. (Basahon an Talinhaga 21:30.) Minsan siring, tinalikdan ni Satanas si Jehova huli sa sobrang pagtao nin importansia sa saiyang sadiri asin pagigin orgolyoso. Sa siring, tuyong pinili kan Diablo an dalan na masagkod sana sa grabeng kapahamakan.
6 Kan huri, an pagigin pangahas ni Satanas ipinaheling nin sarong namamahala sa Babilonya na nakarekord na naghahambog: “Masakat ako sa kalangitan. Ilalangkaw ko an sakuyang trono sa ibabaw kan mga bitoon nin Dios, asin matukaw ako sa ibabaw kan bukid nin katiriponan, sa kaporoporohi kan amihanan. Matukad ako sa ibabaw kan haralangkaw na lugar kan mga panganoron; gigibohon ko an sadiri ko na kabaing kan Kaharohalangkawe.” (Isa. 14:13-15) Dai nagin mapanggana an daing kamanungdanan na proyektong iyan kan namamahala, asin makasusupog an nagin katapusan kan dinastiya nin Babilonya. Kaagid kaiyan, sa dai mahahaloy si Satanas asin an saiyang kinaban biyong madadaog.
Taano ta Itinogot?
7, 8. Ano an nagkapirang pakinabang sa pagtogot ni Jehova na mag-eksister an karatan sa laog nin sarong panahon?
7 An nagkapira tibaad nag-iisip-isip kun taano ta dai inolang ni Jehova an mga tawo na kumampi ki Satanas asin sumunod sa alternatibong pamamahala na siertong dai magigin mapanggana. Bilang Dios na Makakamhan sa Gabos, sierto nanggad na kaya nia kutanang gibohon iyan. (Ex. 6:3) Minsan siring, dai nia ginibo iyan. Napahiro sia kan saiyang kadonongan na temporaryong dai olangon an pagrebelde nin tawo na huli kaiyan magkakaigwa kan pinakamarahay na resulta sa ngapit. Pag-abot nin panahon, mabibindikar si Jehova bilang an matanos asin mamomoton na Namamahala, saka makikinabang an maimbod na mga tawo sa desisyon nin Dios.
8 Dai kutana nanggad naeksperyensiahan kan pamilya nin tawo an kasakitan kun hinaboan ninda an mga alok ni Satanas asin nagsayumang magin independiente sa pamamahala nin Dios! Pero, an desisyon ni Jehova na togotan an mga tawo na pamahalaan an saindang sadiri sa laog nin sarong panahon nagtao nin mga pakinabang. Ikinatadom na marhay kaiyan sa mga indibiduwal, na tama an kamugtakan nin puso, an kadonongan nin paghinanyog sa Dios asin pagtiwala sa saiya. Sa nakaaging mga siglo, an mga tawo nag-eksperimento nin dakol na klase nin gobyerno, alagad ni saro kaiyan dai napatunayan na marahay. An katunayan na iyan nakakapakosog sa kombiksion nin mga nagsasamba sa Dios na an pamamahala ni Jehova iyo nanggad an pinakamarahay. Totoo, an pagtogot ni Jehova sa maraot na pamamahala ni Satanas nagresulta sa kasakitan nin katawohan, kaiba na an mga maimbod na nagsasamba sa Dios. Pero, an temporaryong pagtogot sa karatan nagtao man nin mga pakinabang para sa maimbod na mga nagsasambang ini.
Sarong Pagrebelde na Nagpapamuraway ki Jehova
9, 10. Ipaliwanag kun paano nagpapamuraway ki Jehova an pamamahala ni Satanas.
9 An pagtogot sa mga tawo na maimpluwensiahan ni Satanas asin pamahalaan an saindang sadiri dai nanggad nakaraot sa pamamahala ni Jehova. Kabaliktaran nanggad an nangyari! An kasaysayan nagpapatunay na tama si Jeremias kan sabihon nia, paagi sa pagpasabong, an manongod sa kawaran nin kakayahan nin mga tawo na pamahalaan an saindang sadiri. (Basahon an Jeremias 10:23.) Dugang pa, an pagrebelde ni Satanas nagtatao ki Jehova nin oportunidad na ipaheling an Saiyang marahay na mga kualidad sa mas risa nanggad na paagi. Paano man?
10 Huling naheheling niato an kapahapahamak na mga resulta kan pamamahala ni Satanas, orog pa ngani niatong naririsa an sangkap na mga kualidad ni Jehova. Paagi kaini, sia napapamuraway sa pagheling kan mga namomoot sa saiya. Iyo, garo baga masakit paniwalaan, pero sa katunayan an pamamahala ni Satanas nagpapamuraway sa Dios. Itinatampok kaiyan an pinakanangongorog na paagi na dian naresolberan ni Jehova an pagkuestion na ini sa saiyang soberaniya. Sa pag-ilustrar kan katotoohan na iyan, estudyaran niato sa halipot an nagkapira sa mga kualidad ni Jehova asin helingon niato kun paano an maraot na pamamahala ni Satanas nakapahiro ki Jehova na ipaheling an mga kualidad na ini sa dugang pang mga paagi.
11. Paano ikinapaheling an pagkamoot ni Jehova?
11 Pagkamoot. An Kasuratan nagsasabi sa sato na “an Dios pagkamoot.” (1 Juan 4:8) An paglalang mismo sa mga tawo kapahayagan kan pagkamoot nin Dios. Dugang pa, an makangingirhat asin makangangalas na pagkagibo sa sato nagpapatotoo sa pagkamoot nin Dios. Si Jehova mamomoton man na nagtao sa mga tawo nin magayon na erokan na yaon an gabos na kaipuhan para sa saindang kaogmahan. (Gen. 1:29-31; 2:8, 9; Sal. 139:14-16) Alagad kan magkasala an pamilya nin tawo, ipinahayag ni Jehova an saiyang pagkamoot sa bagong mga paagi. Paano? Kinotar ni apostol Juan si Jesus na nagsasabi: “An Dios namoot na gayo sa kinaban kaya itinao nia an saiyang Aking bugtong, tanganing an lambang nagtutubod sa saiya dai malaglag kundi magkaigwa nin buhay na daing katapusan.” (Juan 3:16) Igwa pa daw nin mas pambihirang paagi na ikinapaheling kutana nin Dios an pagkamoot sa katawohan kisa sa pagsugo sa saiyang Aking bugtong na magdigdi sa daga tanganing tuboson an mga nagkakasala? (Juan 15:13) An dakulang pagpaheling na ini nin pagkamoot nagin man sarong arogan para sa mga tawo, na nagtatao sa sainda nin oportunidad na ipaheling an mapagsakripisyong pagkamoot nin Dios sa aroaldaw na pamumuhay, arog ngani ni Jesus.—Juan 17:25, 26.
12. Sa anong paagi naheheling an kapangyarihan ni Jehova?
12 Kapangyarihan. Solamenteng an ‘Dios na Makakamhan sa Gabos,’ an may kapangyarihan na lumalang nin buhay. (Kap. 11:17; Sal. 36:9) Sa pagkamundag, an sarong tawo garo baga siring sa blangkong papel. Pagkagadan nia, an blangkong papel na iyan napano na nia nin mga desisyon, ginibo, eksperyensia sa bilog na buhay na nagmolde kan saiyang personalidad asin pagigin daing kaagid na indibiduwal. An impormasyon na iyan puedeng magdanay sa memorya ni Jehova. Sa itinalaan na panahon, puede giraray na ibalik ni Jehova an buhay nin indibiduwal, na yaon an kompletong partikular na mga karakteristiko nia. (Juan 5:28, 29) Sa siring, minsan ngani an kagadanan bakong orihinal na katuyohan nin Dios para sa mga tawo, nagtao iyan ki Jehova nin oportunidad na ipaheling na sia may kapangyarihan na buhayon liwat an mga gadan. Tunay nanggad na si Jehova ‘Dios na Makakamhan sa Gabos.’
13. Paanong an pagsakripisyo ni Jesus sarong pagpaheling nin sangkap na hustisya ni Jehova?
13 Hustisya. Si Jehova dai nagpuputik; dai man sia naghihiro na bakong makatanosan. (Deut. 32:4; Tito 1:2) Pirme siang nangangapot sa pinakahalangkaw na mga pamantayan nin katotoohan asin hustisya, dawa kun an paggibo kaiyan garo baga magigin disbentaha nia mismo. (Roma 8:32) Makologon nanggad para ki Jehova na maheling an saiyang namomotan na Aki na magadan sa hariging pasakitan na garo baga si Jesus sarong paralanghad! Pero, huli sa pagkamoot sa bakong sangkap na mga tawo, nagin andam si Jehova na itogot an makolog na pangyayaring ini tanganing suportaran an saiya mismong sangkap na pamantayan nin hustisya. (Basahon an Roma 5:18-21.) An kinaban na kadakol nin inhustisya nagtao ki Jehova nin oportunidad na ipaheling na sia mismo an may pinakanangongorog na hustisya.
14, 15. Ano an nagkapira sa mga paagi na ikinapaheling an pinakanangongorog na kadonongan asin pagpapasensia ni Jehova?
14 Kadonongan. Tolos-tolos pagkatapos na magkasala si Adan asin Eva, ihinayag ni Jehova an paagi na hahaleon nia an gabos na nagin maraot na epekto kan saindang pagrebelde. (Gen. 3:15) An siring na tolos-tolos na paghiro, saka an progresibong paghayag nia kan mga detalye kan katuyohan na ini sa saiyang mga lingkod, iyo an dahelan na naheheling na marhay an kadonongan ni Jehova. (Roma 11:33) Mayo nin makakaolang sa kakayahan nin Dios na mapangganang asikasohon an mga bagay-bagay. Sa kinaban na lakop an imoralidad, guerra, pagkabakong rasonable, kasumbikalan, kawaran nin pagkaherak, pagpaorog, asin pagsaginsagin, dakol an oportunidad ni Jehova na ipaheling sa saiyang mga linalang kun ano an tunay na kadonongan. Si disipulo Santiago nagsabi: “An kadonongan hale sa itaas enot sa gabos mabini, dangan mapagpatoninong, rasonable, andam na magkuyog, pano nin pagkaherak asin marahay na mga bunga, dai nagpapalaenlaen na may ipinapaorog, bakong mapagsaginsagin.”—Sant. 3:17.
15 Pagpapasensia Asin Pakatios. An mga kualidad ni Jehova na pagpapasensia asin pakatios haros dai kutana nagin lataw na marhay kun dai nia kinaipuhan na atubangon an mga pagkabakong sangkap, kasalan, asin pagkukulang nin tawo. An pagigin andam ni Jehova na gibohon iyan sa laog nin rinibong taon nagpapatunay na sia igwa kan sangkap na makangangalas na mga kualidad na ini, asin huli kaiyan maninigo kitang magpasalamat na marhay. Si apostol Pablo tama sanang nagsabi na maninigo niatong ‘ibilang na kaligtasan an pagpapasensia kan satong Kagurangnan.’—2 Ped. 3:9, 15.
16. Taano an pagigin andam ni Jehova na magpatawad ta sarong dahelan nin dakulang kagayagayahan?
16 Pagigin Andam na Magpatawad. Kita gabos nagkakasala, asin kita gabos nasisingkog nin dakol na beses. (Sant. 3:2; 1 Juan 1:8, 9) Maninigo nanggad kitang magpasalamat na si Jehova andam na magpatawad nin “bulaos”! (Isa. 55:7) Estudyare man an katotoohan na ini: Mantang namundag na makasalan asin bakong sangkap, nakakaeksperyensia kita nin dakulang kagayagayahan kun pinapatawad nin Dios an satong mga sala. (Sal. 51:5, 9, 17) Huling personalmente niatong naeeksperyensiahan an nakakaogmang karakteristikong iyan ni Jehova, napapakosog an satong pagkamoot sa saiya asin naeengganyar kita na arogon an saiyang halimbawa sa pagtratar niato sa iba.—Basahon an Colosas 3:13.
Kun Taano ta May Helang an Kinaban
17, 18. Sa anong mga paagi dai nagin mapanggana an pamamahala ni Satanas?
17 An bilog na sistema nin kinaban ni Satanas—sarong resulta kan pamamahala nia—paorootro asin pirmeng dai nagigin mapanggana sa nakaaging mga siglo. Kan 1991, an diaryong The European nagsabi: “May helang daw an kinaban? Iyo, igwa nanggad, alagad . . . bakong huli sa [sarong] akto nin Dios—an helang kan kinaban kagigibohan nin mga tawo na yaon dian.” Totoo nanggad iyan! Paagi sa impluwensia ni Satanas, an pinili kan satong enot na mga magurang iyo an pamamahala nin tawo imbes na an pamamahala ni Jehova. Paagi kaiyan, pinonan ninda an pamamahala na siertong dai magigin mapanggana. An kolog asin kasakitan na naeeksperyensiahan nin mga tawo sa bilog na kinaban mga tanda na an pamamahala nin tawo may grabeng helang.
18 An pamamahala ni Satanas nagpupukaw nin kaimotan. Minsan siring, nungkang madadaog nin kaimotan an pagkamoot, na iyo an basehan kan pamamahala ni Jehova. An pamamahala ni Satanas dai nagin mapanggana sa pagtao nin estabilidad, kaogmahan, o katiwasayan. Nabibindikar nanggad an pamamahala ni Jehova! May ebidensia daw kita kaiyan sa presenteng panahon? Igwa, arog kan maheheling niato sa sunod na artikulo.
Ano an Nanodan Niato Manongod sa Pamamahala Paagi sa Pagbasa kan . . .
• Roma 13:1, 2?
• Colosas 3:13?
[Mga Hapot Para sa Pag-adal]
[Mga Ritrato sa pahina 25]
Nungkang nakinabang an katawohan sa pamamahala ni Satanas
[Credit Lines]
Retrato kan U.S. Army
WHO na rinetrato ni P. Almasy
[Ritrato sa pahina 26]
Si Jehova may kapangyarihan na buhayon liwat an mga gadan
[Ritrato sa pahina 27]
An pagkamoot asin hustisya ni Jehova ipinaheling paagi sa pagsakripisyo kan saiyang Aki