Magin Sarong Tunay na Parasunod ni Cristo
Magin Sarong Tunay na Parasunod ni Cristo
“An lambang kahoy na marahay nagbubunga nin marahay, alagad an lambang kahoy na raot nagbubunga nin daing pakinabang.”—MAT. 7:17.
1, 2. Paano an tunay na mga parasunod ni Cristo laen sa falsong mga Kristiano, nangorogna sa panahon na ini kan katapusan?
SI Jesus nagsabi na an mga naghihingakong naglilingkod sa saiya mamimidbid na laen sa saiyang tunay na mga parasunod paagi sa saindang mga bunga—an saindang mga katokdoan asin paggawe. (Mat. 7:15-17, 20) Sa katunayan, an mga tawo naiimpluwensiahan nanggad kan ilinalaog ninda sa saindang isip asin puso. (Mat. 15:18, 19) An mga tinotokdoan nin kaputikan nagbubunga nin “daing pakinabang,” mantang an mga tinotokdoan nin espirituwal na katotoohan nagbubunga nin “marahay.”
2 An duwang klase nin bunga malinaw na nagin risang-risa sa panahon na ini kan katapusan. (Basahon an Daniel 12:3, 10.) An falsong mga Kristiano may biribid na pagmansay dapit sa Dios asin sa parate may mapagsaginsagin na klase nin diosnon na debosyon, mantang an mga may espirituwal na pakarorop sinasamba an Dios “sa espiritu asin katotoohan.” (Juan 4:24; 2 Tim. 3:1-5) Pinagmamaigotan nindang ipaheling an arog-Cristong mga kualidad. Alagad kumusta kita personalmente? Mantang ineestudyaran mo an minasunod na limang midbidan nin tunay na Kristianismo, hapoton an saimong sadiri: ‘An sako daw na paggawe asin mga itinotokdo malinaw na kaoyon kan Tataramon nin Dios? Ginigibo ko daw na kaakit-akit an katotoohan para sa mga naghahanap kaiyan?’
Mamuhay Kaoyon kan Tataramon nin Dios
3. Ano an nagpapaogma ki Jehova, asin ano an kalabot digdi para sa tunay na mga Kristiano?
3 “Bakong gabos na nagsasabi sa sako, ‘Kagurangnan, Kagurangnan,’ makakalaog sa kahadean kan kalangitan,” an sabi ni Jesus, “kundi an naggigibo kan kabotan kan sakong Ama na nasa kalangitan.” (Mat. 7:21) Iyo, an nagpapaogma ki Jehova bako an paghihingako nin saro na sia Kristiano kundi an pagsagibo nia nin Kristianismo. Para sa tunay na mga parasunod ni Cristo, kalabot dian an saindang bilog na pamumuhay, kaiba na an saindang saboot dapit sa kuarta, sekular na trabaho, aling-alingan, kinabanon na mga kostumbre asin selebrasyon, saka pag-agoman asin iba pang relasyon sa kapwa tawo. Minsan siring, inaarog kan falsong mga Kristiano an kaisipan asin gibo-gibo kan kinaban, na paorog nang paorog na nagraraot sa huring mga aldaw na ini.—Sal. 92:7.
4, 5. Paano niato ikakaaplikar sa satong buhay an mga tataramon ni Jehova na nasa Malaquias 3:18?
4 Huli kaiyan, si propeta Malaquias nagsurat: “Maheheling nanggad giraray nindo an kalaenan kan matanos asin maraot, kan naglilingkod sa Dios asin kan dai naglingkod sa saiya.” (Mal. 3:18) Mantang hinohorophorop mo an mga tataramon na iyan, hapoton an saimong sadiri: ‘Ako daw arog kan mga tawo sa kinaban o laen nanggad sa sainda? Ako daw pirmeng naghihingoa na arogon an sakong kinabanon na mga kaibaiba, baga man sa eskuelahan o trabaho, o nagdadanay daw akong marigon sa mga prinsipyo sa Biblia, na nakikipangatanosan pa ngani kun angay?’ (Basahon an 1 Pedro 3:16.) Siempre, habo niatong magin garo nagpapakangmatanos, alagad kita maninigong magin laen nanggad sa mga dai namomoot asin dai naglilingkod ki Jehova.
5 Kun maheling nindo na may kaipuhan kamong bagohon, taano ta dai iyan ipamibi asin hingoahon na magkaigwa nin espirituwal na kosog paagi sa regular na pag-adal sa Biblia, pamimibi, asin pag-atender sa mga pagtiripon? Mientras na orog nindong iinaaplikar an Tataramon nin Dios, orog man kamong magbubunga nin “marahay,” kaiba na ‘an bunga nin mga ngabil na nagpapahayag sa publiko kan ngaran nin Dios.’—Heb. 13:15.
Suportaran an Kahadean nin Dios
6, 7. Kun mapadapit sa mensahe kan Kahadean, anong pagkakalaen an maheheling sa tunay asin sa falsong mga Kristiano?
6 Si Jesus nagsabi: ‘Dapat na ipahayag ko sa iba pang mga siudad an maogmang bareta kan kahadean nin Dios, huli ta dahel kaini ako isinugo.’ (Luc. 4:43) Taano an Kahadean nin Dios ta iyo an ginibo ni Jesus na pangenot na tema kan saiyang ministeryo? Aram nia na sia mismo bilang Hade kan Kahadean na iyan, kaiba kan binuhay liwat asin pinaniaki nin espiritung mga tugang nia, an matapos sa mga pinakadahelan kan pagsakit nin katawohan—an kasalan asin an Diablo. (Roma 5:12; Kap. 20:10) Huli kaini, pinagbotan nia an saiyang mga parasunod na ibalangibog an Kahadean na iyan sagkod sa katapusan kan presenteng sistema nin mga bagay. (Mat. 24:14) An mga tawong naghihingako sana na mga parasunod ni Cristo dai nakikikabtang sa gibohon na ini—an totoo, dai sinda puede. Taano? Huli sa kisiera tolong dahelan: Enot, dai ninda ikakahulit an dai ninda nasasabotan. Ikaduwa, an kadaklan sa sainda mayo nin kapakumbabaan asin kosog nin boot na kaipuhan tanganing atubangon an pag-olog-olog asin pagtumang na puedeng magin resulta kan paghuhulit sa saindang kapwa kan mensahe kan Kahadean. (Mat. 24:9; 1 Ped. 2:23) Asin ikatolo, an falsong mga Kristiano mayo kan espiritu nin Dios.—Juan 14:16, 17.
7 Sa ibong na lado, nasasabotan kan tunay na mga parasunod ni Cristo kun ano an Kahadean nin Dios asin kun ano an gigibohon kaiyan. Dugang pa, prioridad ninda sa buhay an intereses kan Kahadean, na ibinabalangibog iyan sa bilog na kinaban, paagi sa tabang kan espiritu ni Jehova. (Zac. 4:6) Regular daw kamong nakikikabtang sa gibohon na ini? Pinagmamaigotan daw nindong umoswag bilang parabalangibog kan Kahadean, na tibaad paagi sa paggamit nin mas dakol na oras sa ministeryo o pagigin mas epektibo dian? An nagkapira nagmaigot na paoswagon an kalidad kan saindang ministeryo paagi sa mas epektibong paggamit kan Biblia. “An tataramon nin Dios buhay asin mapuersa,” an isinurat ni apostol Pablo, na napagkatodan nang makipangatanosan basado sa Kasuratan.—Heb. 4:12; Gibo 17:2, 3.
8, 9. (a) Anong mga eksperyensia an nagtatampok kan kahalagahan kan paggamit kan Biblia sa satong ministeryo? (b) Paano kita magigin mas tuod sa paggamit kan Tataramon nin Dios?
8 Kan naghaharongharong, binasa nin sarong tugang na lalaki an Daniel 2:44 sa sarong Katolikong lalaki asin ipinaliwanag sa saiya kun paano an Kahadean nin Dios magtatao nin tunay na katoninongan asin katiwasayan. An lalaki nagsabi: “Talagang pinapahalagahan ko an pagbukas mo kan Biblia asin pagpaheling sa sako kan sinabi kan teksto imbes na pagsambit sana kaiyan sa sako.” Kan basahon nin sarong tugang na lalaki an sarong teksto sa sarong babae na Griegong Ortodokso, sia nagpalataw nin dakol na magayon na hapot. Sa kamugtakan man na ini, an tugang na lalaki, kaiba kan saiyang agom, nagsimbag na ginagamit an Biblia. Dangan, nagsabi an babae: “Aram daw nindo kun taano ta nagin andam akong makipag-olay sa saindo? Nagdigdi kamo sa sakong harong na may darang Biblia, asin binasa nindo iyan.”
9 Siempre, an satong mga babasahon importante asin maninigong ialok sa langtad. Minsan siring, an Biblia an satong pangenot na kasangkapan. Kaya, kun dai nindo napagkatodan na gamiton iyan nin regular sa saindong ministeryo, taano ta dai iyan gibohon na pasohan? Tibaad puede kamong pumili nin pirang pangenot na teksto na nagpapaliwanag kun ano an Kahadean nin Dios asin kun paano kaiyan reresolberan an espesipikong mga problema na ikinakahadit nin mga tawo sa saindong lugar. Dangan magin andam na basahon iyan sa paghuhulit nindo sa harong-harong.
May Pag-orgolyong Darahon an Ngaran nin Dios
10, 11. Mapadapit sa paggamit kan ngaran nin Dios, ano an pagkakalaen ni Jesus asin kan dakol na naghihingakong parasunod nia?
10 “‘Kamo an sakong mga saksi,’ an sabi ni Jehova, ‘asin ako an Dios.’” (Isa. 43:12) An nangongorog sa gabos na Saksi ni Jehova, si Jesu-Cristo, ibinilang na sarong onra an pagdara asin pagpamidbid kan ngaran nin Dios. (Basahon an Exodo 3:15; Juan 17:6; Hebreo 2:12.) Sa katunayan, huling ibinalangibog ni Jesus an ngaran kan saiyang Ama, sia inapod na “an Maimbod na Saksi.”—Kap. 1:5; Mat. 6:9.
11 Sa kabaliktaran, dakol na naghihingakong representante nin Dios asin kan saiyang Aki an dai nanggad iginalang an ngaran nin Dios, na hinale pa ngani iyan sa saindang mga bersion kan Biblia. Sa pagpaheling nin kaagid na pagtratar, sarong bago pa sanang pagboot sa mga obispong Katoliko an nagsabi na “an ngaran nin Dios sa pormang tetragrammaton na YHWH dai dapat gamiton ni pronunsiaron” sa panahon nin pagsamba. * Sala nanggad an siring na kaisipan!
12. Paano an mga lingkod ni Jehova orog pa nganing namidbid na konektadong marhay ki Jehova kan taon 1931?
12 Bilang pag-arog ki Cristo sagkod sa dakulang “panganoron nin mga saksi” na naenot sa saiya, may pag-orgolyong ginagamit kan tunay na mga Kristiano an ngaran nin Dios. (Heb. 12:1) Sa katunayan, kan taon 1931 an mga lingkod nin Dios orog pa nganing namidbid na konektadong marhay ki Jehova paagi sa pag-ako kan ngaran na Mga Saksi ni Jehova. (Basahon an Isaias 43:10-12.) Sa siring, sa espesyal na marhay na paagi, an tunay na mga parasunod ni Cristo nagin sarong ‘banwaan na inaapod sa ngaran nin Dios.’—Gibo 15:14, 17.
13. Paano kita makakapamuhay kaoyon kan satong ngaran na itinao nin Dios?
13 Paano kita personalmenteng makakapamuhay kaoyon kan daing kaagid na ngaran niato? An sarong paagi, dapat kitang maimbod na magpatotoo dapit sa Dios. “An gabos na nag-aapod sa ngaran ni Jehova maliligtas,” an isinurat ni Pablo. “Minsan siring, paano sinda mag-aapod sa saiya na dai ninda tinutubod? Paano man sinda matubod sa saiya na dai ninda nadangog? Paano man sinda makakadangog kun mayo nin parahulit? Paano man sinda maghuhulit kun dai sinda isinugo?” (Roma 10:13-15) Siring man, maninigo niatong mataktikang ibuyagyag an mga kaputikan sa relihion na nagpapakaraot sa satong Kaglalang, siring baga kan doktrina nin nagkakalayong impierno, na sa katunayan iinaatribwir sa Dios nin pagkamoot an maringis na mga karakteristiko kan Diablo.—Jer. 7:31; 1 Juan 4:8; ikomparar an Marcos 9:17-27.
14. Kan maaraman an personal na ngaran nin Dios, ano an nagin reaksion nin nagkapira?
14 Ipinag-oorgolyo daw nindo an pagdara kan ngaran kan saindong langitnon na Ama? Tinatabangan daw nindo an iba na mamidbid an banal na ngaran na iyan? Nadangog nin sarong babae sa Paris, Pransia, na aram kan Mga Saksi ni Jehova an ngaran nin Dios, kaya kan may makaolay siang Saksi sinabi nia na ipaheling sa saiya an ngaran na iyan sa Biblia nia. Kan mabasa nia an Salmo 83:18, dakula an nagin epekto sa saiya. Sia nagpoon na mag-adal sa Biblia asin ngonyan saro nang maimbod na tugang na naglilingkod sa ibang nasyon. An sarong babaeng Katoliko na nag-iistar sa Australia napahibi sa kagayagayahan kan sa kaenot-enote maheling nia sa Biblia an ngaran nin Dios. Sa laog nin dakol nang taon sagkod ngonyan, sia regular payunir. Kasuarin pa sana, an sarong babae sa Jamaica napaluha man sa kagayagayahan kan ipaheling sa saiya kan mga Saksi duman an ngaran nin Dios sa saiya mismong Biblia. Kaya ipag-orgolyo nindo an pagdara kan ngaran nin Dios asin, bilang pag-arog ki Jesus, ipahayag sa gabos an mahalagang marhay na ngaran na iyan.
“Dai Kamo Mamoot sa Kinaban”
15, 16. Paano minamansay nin tunay na mga Kristiano an kinaban, asin ano an mga maninigo niatong ihapot sa satong sadiri?
15 “Dai kamo mamoot sa kinaban o sa mga bagay na nasa kinaban. Kun an siisay man namomoot sa kinaban, an pagkamoot kan Ama mayo sa saiya.” (1 Juan 2:15) An kinaban asin an makalaman na espiritu kaiyan nagtutumang ki Jehova asin sa saiyang banal na espiritu. Huli kaini, an tunay na mga parasunod ni Cristo dai sana naglilikay na magin kabtang kan kinaban. Habo nindang mamoot sa kinaban, huling aram ninda an isinurat ni disipulo Santiago na “an pakikikatood sa kinaban pakikiiwal sa Dios.”—Sant. 4:4.
16 Depisil himateon an mga tataramon ni Santiago sa sarong kinaban na kadakol nin sugot. (2 Tim. 4:10) Kun siring, si Jesus namibi para sa saiyang mga parasunod: “Ako nakikimaherak sa saimo, bako na haleon sinda sa kinaban, kundi na bantayan sinda huli sa saro na marigsok. Sinda bakong kabtang kan kinaban, kun paanong ako bakong kabtang kan kinaban.” (Juan 17:15, 16) Hapoton an saimong sadiri: ‘Pinagmamaigotan ko daw na dai magin kabtang kan kinaban? Aram daw nin iba an sakong paninindogan dapit sa bakong sono sa Kasuratan na mga selebrasyon asin kostumbre saka sa mga siring kaiyan na tibaad dai nin paganong ginikanan alagad malinaw na nagpapaheling kan espiritu kan kinaban?’—2 Cor. 6:17; 1 Ped. 4:3, 4.
17. Ano an puedeng magpahiro sa mga sadiosan an puso na kumampi ki Jehova?
17 Sierto nanggad na huli sa satong basado sa Bibliang paninindogan dai kita magugustohan kan kinaban, alagad puede kaiyan na mapukaw an interes kan mga sadiosan an puso. Sa katunayan, kun naoobserbaran kan siring na mga indibiduwal na an satong pagtubod marigon na nakagamot sa Kasuratan asin na kalabot dian an satong bilog na pamumuhay, tibaad maghimate sinda paagi sa garo man sana pagsabi sa mga linahidan: “Maiba kami sa saindo, huli ta nabaretaan niamo na an Dios yaon sa saindo.”—Zac. 8:23.
Ipaheling an Tunay na Kristianong Pagkamoot
18. Ano an kalabot sa pagpaheling nin pagkamoot ki Jehova asin sa satong kapwa?
18 Si Jesus nagsabi: “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip” asin “kamotan mo an saimong kapwa nin siring sa saimo man sana.” (Mat. 22:37, 39) An pagkamoot na iyan (a·gaʹpe sa Griego) sarong moral na pagkamoot na kinokonsiderar an obligasyon, prinsipyo, asin pagigin tama, alagad sa parate kaiba dian an makosog na emosyon. Puede iyan na magin mainit asin makosogon. (1 Ped. 1:22) Iyan kabaliktaran nanggad nin kaimotan, huling iyan naheheling sa daing kaimotan na mga tataramon asin gibo.—Basahon an 1 Corinto 13:4-7.
19, 20. Magsaysay nin nagkapirang eksperyensia na nagpapaheling kan puersa nin Kristianong pagkamoot.
19 Huling an pagkamoot sarong bunga kan banal na espiritu nin Dios, nakakatabang iyan sa tunay na mga Kristiano na gibohon an dai kayang gibohon nin iba, arog baga kan paghale sa mga olang na huli sa rasa, kultura, asin politika. (Basahon an Juan 13:34, 35; Gal. 5:22) An mga arog-karnero napapahirong marhay kun naheheling ninda an siring na pagkamoot. Halimbawa, kan an sarong hoben na Judiong lalaki sa Israel mag-atender sa kaenot-enote sa Kristianong pagtiripon, sia nagngalas kan maheling an mga tugang na Judio asin Arabo na iribang nagsasamba ki Jehova. Bilang resulta, sia nagpoon nang regular na mag-atender sa mga pagtiripon asin nag-ako nin pag-adal sa Biblia. Nagpapaheling daw kamo nin siring na odok sa pusong pagkamoot sa saindong mga tugang? Asin naghihingoa daw kamo na maogmang akoon an mga bagohan na nag-aatender sa saindong Kingdom Hall, ano man an saindang nasyonalidad, kolor kan kublit, o kamugtakan sa sosyedad?
20 Bilang tunay na mga Kristiano, pinagmamaigotan niatong magpaheling nin pagkamoot sa gabos. Sa El Salvador, inaadalan kaidto sa Biblia nin sarong hoben na parahayag an sarong 87 anyos na babae na debotong Katoliko. Sarong aldaw, an babae nagkahelang nin grabe asin naospital. Kan sia magpuli, sia dinalaw asin dinarahan nin kakanon kan mga Saksi. Ginibo ninda ini sa laog nin haros sarong bulan. Mayo nin nagbisita sa saiya na karelihion nia. An resulta? Itinapok nia an saiyang mga imahen, naghale sa saiyang relihion, asin nag-adal giraray sa Biblia. Iyo, may puersa nanggad an Kristianong pagkamoot! Kaya kaiyan na motibaron an mga tawo nin orog pa kisa sa paghuhulit sana sa sainda.
21. Paano niato masesegurado an satong ngapit?
21 Dai na mahahaloy, sasabihon ni Jesus sa gabos na naghihingakong naglilingkod sa saiya: “Dai ko kamo noarin man namidbid! Rumayo kamo sa sako, kamong mga paragibo nin katampalasanan.” (Mat. 7:23) Kun siring, magpaheling kita nin mga bunga na nagtataong onra sa Ama sagkod sa Aki. “An gabos na nagdadangog sa mga tataramon kong ini asin naggigibo kaiyan,” an sabi ni Jesus, “ibabaing sa sarong tawong mapagmansay, na nagtogdok kan saiyang harong sa ibabaw kan dakulang gapo.” (Mat. 7:24) Iyo nanggad, kun kita magigin tunay na mga parasunod ni Cristo, kita mag-aako kan pag-oyon nin Dios, asin magigin segurado an satong ngapit, na garo baga nakatogdok sa dakulang gapo!
[Nota sa Ibaba]
^ par. 11 An nagkapira na modernong Katolikong publikasyon sa Ingles, kaiba na an The Jerusalem Bible, trinadusir an tetragrammaton na iyan na “Yahweh.”
Nagigirumdoman daw Nindo?
• Paano an tunay na mga parasunod ni Cristo namimidbid na laen sa falsong mga Kristiano?
• Sambiton an nagkapirang “bunga” na nagpapamidbid sa tunay na mga Kristiano.
• Sa pagpaheling nin Kristianong mga bunga, ano an mga pasohan na puede nindong gibohon?
[Mga Hapot Para sa Pag-adal]
[Ritrato sa pahina 13]
Napagkatodan daw nindong gamiton an Biblia nin regular sa saindong ministeryo?
[Ritrato sa pahina 15]
Aram daw nin iba an saindong paninindogan dapit sa bakong sono sa Kasuratan na mga selebrasyon?