“An Deretso nin Aki na Tumalubo sa Espirituwal”

KAN Disyembre 9, 2008, an Swedish Academy for the Rights of the Child nagkondukta nin napapalaen na seminar na may temang “An Deretso nin Aki na Tumalubo sa Espirituwal.” Dakol na opinyon an iprinesentar kan mga ispiker na nagrerepresentar sa Iglesia nin Sweden, iba pang mga denominasyon nin Kakristianohan, Islam, asin sa mobimientong humanista.

Kabilang sa mga ispiker an sarong klerigo na nagsabi: “An saro dai nanggad makakatao nin tunay asin timbang na deskripsion kan dakulang importansia kan mga pagkasaysay sa Biblia para sa espirituwalidad nin mga aki.” Paano napapanigoan kan mga salaysay sa Kasuratan an espirituwal na pangangaipo nin mga aki?

“An mga nakasurat na pagkasaysay nagtatao sa mga aki nin impormasyon para sa pribadong paghorophorop,” an sabi kan klerigo. Sinambit nia “an estorya ni Adan asin Eva, ni Cain asin Abel, ni David asin Goliat, kan pagkamundag ni Jesus, kan parasingil nin buhis na si Zaqueo, kan parabola kan gastador na aki, kan Samaritano na tataong makipagkapwa-tawo.” An mga ini sinambit bilang “nagkapira sa mga halimbawa na nagseserbing giya sa kaisipan [nin aki] sa mga eksperyensiang may dakulang epekto sa buhay na arog baga nin pagtraydor, pagpatawad, pagbayad sa kasalan, pagkaongis, pagkapasupog, pakipag-ulian, bakong maimot asin sa magturugang na pagkamoot.” Sinabi pa nia: “An mga pagkasaysay na ini nagseserbing arogan sa buhay na puedeng isagibo asin magin praktikal na eksperyensia.”

Totoo, sarong marahayon na bagay an pagdagka na basahon an Biblia. Minsan siring, talaga daw na kaya nin mga aki an “pribadong paghorophorop” sa binabasa ninda hale sa Kasuratan asin an paggibo nin tamang mga kongklusyon?

Dawa an mga adulto nangangaipo nin tabang na ikapaliwanag sa sainda an mga salaysay sa Kasuratan. Halimbawa, sinasabi sa sato kan Biblia an manongod sa sarong lalaki na dai nakakanompong nin tunay na espirituwalidad paagi sa “pribadong paghorophorop.” An lalaking idto sarong Etiopeng opisyal. Binabasa nia an hula ni Isaias alagad dai nasasabotan an kahulogan kaiyan. Huling gusto niang masabotan an mensahe kan propeta, maogma niang inako an paliwanag kan disipulong si Felipe. (Gibo 8:26-40) An Etiopeng idto dai napapalaen. Gabos kita—nangorogna an mga aki—nangangaipo nin detalyadong paliwanag sa mga salaysay kan Biblia.

Pinapatanidan kita kan Biblia: “An kalolongan nakagakod sa puso nin aki.” (Tal. 22:15) Kaipuhan nin mga aki an paggiya saka pagdirehir, asin an saindang mga magurang may paninimbagan na magtao sa sainda nin moral saka espirituwal na edukasyon basado sa Biblia patin sa kun ano an itinotokdo sa Kristianong kongregasyon. May deretso an mga aki sa siring na pagsasanay. Poon sa amay na edad, kaipuhan ninda nin tabang tanganing magkaigwa nin marigon na pundasyon sa Biblia para sa espirituwal na pagtalubo tanganing sinda magin ‘mga maygurang na huli sa paggamit napatuod an saindang kakayahan sa pagrisa na mamidbid an tama sagkod an sala.’—Heb. 5:14.