‘Itaram an Tataramon nin Dios na May Pagkapusoan’
‘Itaram an Tataramon nin Dios na May Pagkapusoan’
“Sinda . . . napano kan banal na espiritu asin nagtaram kan tataramon nin Dios na may pagkapusoan.”—GIBO 4:31.
1, 2. Taano ta maninigo kitang maghingoa na magin epektibo sa satong ministeryo?
TOLONG aldaw pagkagadan ni Jesus, sinabihan nia an saiyang mga disipulo: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” Bago sia nagsakat sa langit, sinugo kan binuhay liwat na si Jesus an saiyang mga parasunod na ‘gumibo nin mga disipulo sa mga tawo kan gabos na nasyon, na tinotokdoan an mga ini na otobon an gabos na bagay na ipinagboot nia sa sainda.’ Sia nanuga sa sainda na makakaiba ninda sia “sa gabos na aldaw sagkod sa pagtatapos kan sistema nin mga bagay.”—Mat. 24:14; 26:1, 2; 28:19, 20.
2 Bilang mga Saksi ni Jehova, aktibo kitang nakikikabtang sa gibohon na nagpoon kan enot pang siglo. Mayong ibang gibohon an makakapantay sa halaga kan nagliligtas nin buhay na gibohon na paghuhulit kan Kahadean asin paggibo nin mga disipulo. Kun siring, mahalagang marhay nanggad na magin epektibo kita sa satong ministeryo! Sa artikulong ini, pag-oolayan niato kun paano an pagigin ginigiyahan kan banal na espiritu nakakatabang sa sato na magtaram na may pagkapusoan kun kita nasa ministeryo. Ipapaheling sa sato kan duwang masunod na artikulo kun paano kita magigiyahan kan espiritu ni Jehova na ekspertong makapagtokdo asin danay na makapaghulit.
Kaipuhan Niato an Pagkapusoan
3. Taano an pakikikabtang sa paghuhulit kan Kahadean ta nagkakaipo nin pagkapusoan?
3 An itinao nin Dios sa sato na gibohon na pagbalangibog kan Kahadean sarong daing kaagid na pribilehio. Minsan siring, igwa man iyan nin mga kadepisilan. Minsan ngani may mga nag-aako tolos kan maogmang bareta kan Kahadean nin Dios, dakol an nagigin arog kaidtong mga nabuhay kan panahon ni Noe. “Dai sinda nagmangno sagkod na dumatong an baha asin iinanod sinda gabos,” an sabi ni Jesus. (Mat. 24:38, 39) Dangan may mga nag-oolog-olog o nagtutumang sa sato. (2 Ped. 3:3) An pagtumang tibaad maggikan sa mga nasa autoridad, sa mga kaeskuela o katrabaho, o sa haraning mga kapamilya pa ngani. Apuera kaini, may personal na mga kaluyahan man kita, arog nin pagkamasusupgon asin pagkatakot na sayumahan. Kadakol na bagay an puedeng magpadepisil sa satong paggamit kan “katalingkasan sa pagtaram” asin sa satong pagtaram kan tataramon nin Dios na may “pagkapusoan.” (Efe. 6:19, 20) An pagmamaigot na magtaram kan tataramon nin Dios nagkakaipo nin pagkapusoan. Ano an makakatabang sa sato na magkaigwa kaiyan?
4. (a) Ano an pagkapusoan? (b) Paano si apostol Pablo nagpakapusoan na magtaram sa mga taga Tesalonica?
4 An Griegong tataramon na trinadusir na “pagkapusoan” nangangahulogan nin “pagigin daing alangan sa pagtaram, prangka, deretso sa punto.” An tataramon na iyan puedeng mangahulogan man nin “kosog nin boot, kompiansa, . . . pagkadaing takot.” An pagkapusoan dai nangangahulogan nin pagigin pabiglabigla o daing modo. (Col. 4:6) Minsan ngani pusoan, gusto man niatong magkaigwa nin matoninong na relasyon sa gabos. (Roma 12:18) Dugang pa, mantang ihinuhulit niato an maogmang bareta kan Kahadean nin Dios, kaipuhan niato na magin pusoan pero mataktika tanganing malikayan niato na makolgan an boot nin iba na dai tinutuyo. Tunay nanggad, tanganing magin pusoan, may iba pang kualidad na kaipuhan niatong pagmaigotan na pataluboon. Minsan siring, tanganing mapatalubo an arog kaining pagkapusoan, dai kita puedeng magsarig sa sadiri sana niatong kakayahan o kosog. Pagkatapos na si apostol Pablo asin an saiyang kairiba ‘trataron nin daing galang sa Filipos,’ paano sinda “nagpakapusoan” na magtaram sa mga taga Tesalonica? “Paagi sa satong Dios,” an isinurat ni Pablo. (Basahon an 1 Tesalonica 2:2.) Kaya ni Jehova Dios na haleon an satong takot asin itao sa sato an kaagid na pagkapusoan.
5. Paano ni Jehova tinawan nin pagkapusoan si Pedro, Juan, asin an iba pang disipulo?
5 Kan si apostol Pedro asin Juan kuestionon kan “mga namamahala [sa banwaan] asin kan kamagurangan na lalaki saka kan mga eskriba,” sinda nagsabi: “Kun baga matanos sa pagheling nin Dios na maghinanyog sa saindo kisa sa Dios, kamo na mismo an maghokom. Alagad kun para sa samo, dai kami puedeng mag-ontok sa pagtaram dapit sa mga bagay na samong naheling asin nadangog.” Imbes na ipamibi sa Dios na logod mawara an pagpersegir, sinda asin an mga kapagtubod ninda nagngayongayo, na sinasabi: “Jehova, risaha an saindang mga patakot, asin itogot mo sa saimong mga oripon na padagos na magtaram kan saimong tataramon na may bilog na pagkapusoan.” (Gibo 4:5, 19, 20, 29) Paano sinimbag ni Jehova an saindang kahagadan? (Basahon an Gibo 4:31.) Tinabangan sinda ni Jehova na magpakapusoan paagi sa saiyang espiritu. Magigibo man iyan sa sato kan espiritu nin Dios. Kun siring, paano kita mag-aako kan espiritu nin Dios asin magigiyahan kaiyan sa satong ministeryo?
Magin Pusoan
6, 7. Ano an pinakadirektang paagi na akoon an banal na espiritu nin Dios? Magtao nin mga halimbawa.
6 An pinakadirektang paagi tanganing akoon an banal na espiritu nin Dios iyo an paghagad kaiyan. Sinabihan ni Jesus an mga nagdadangog sa saiya: “Kun kamo, minsan ngani maraot, tataong magtao nin marahay na mga regalo sa saindong mga aki, gurano pa daw an Ama sa langit na dai matao nin banal na espiritu sa mga naghahagad sa saiya!” (Luc. 11:13) Tunay nanggad, maninigo niatong danay na hagadon sa pamibi an banal na espiritu. Kun ikinakatakot niato an nagkapirang aspekto kan ministeryo, arog baga kan paghuhulit sa tinampo, impormal na paghuhulit, o paghuhulit sa komersial na teritoryo, puede niatong ipamibi ki Jehova na logod tawan kita kan saiyang espiritu asin tabangan kitang magkaigwa kan kinakaipuhan na pagkapusoan.—1 Tes. 5:17.
7 Iyan an ginibo kan Kristianang si Rosa. * Sarong aldaw kan nasa trabaho si Rosa, sarong maestra na kaibanan nia sa trabaho an nagbabasa nin report hale sa ibang eskuelahan manongod sa pagmaltrato sa mga aki. Napurisaw na gayo an maestra sa nabasa nia kaya napaagrangay sia, “Ano daw an mangyayari sa kinaban na ini?” Dai mapapalihis ni Rosa an siring na oportunidad na magpatotoo. Ano an ginibo nia tanganing magkaigwa nin kosog nin boot na magtaram? “Ipinamibi ko ki Jehova na logod tabangan ako kan saiyang espiritu,” an sabi ni Rosa. Sia nakatao nin marahayon na patotoo asin nakapag-areglo para sa sunod na pag-oolay. Estudyare man an nangyari sa singko anyos na si Milane, na nag-iistar sa Siudad nin Nueva York. Si Milane nagsabi: “Bago po ako mag-eskuela, kami ni mama ko pirmeng namimibi ki Jehova.” Ano an ipinapamibi ninda? Kosog nin boot para ki Milane tanganing sia makapanindogan asin makapagtaram manongod sa saiyang Dios! “Nakatabang ini ki Milane na ipaliwanag an saiyang paninindogan dapit sa mga kumpleanyo asin kapiestahan saka na dai makiayon kun sineselebrar iyan,” an sabi kan saiyang ina. Bako daw na ipinapaheling kan mga halimbawang ini na an pamibi nakakatabang na magin pusoan kita?
8. Ano an manonodan niato ki propeta Jeremias manongod sa pagigin pusoan?
8 Horophoropon man kun ano an nakatabang ki propeta Jeremias na magin pusoan. Kan nombrahan sia ni Jehova bilang propeta sa mga nasyon, si Jeremias nagsimbag: “Uya dai talaga ako tataong magtaram, huli ta ako aki pa.” (Jer. 1:4-6) Pero, pag-abot nin panahon, si Jeremias nagin desidido asin mapuersang marhay sa saiyang paghuhulit kaya minansay sia nin dakol bilang parakurahaw nin kapahamakan. (Jer. 38:4) Sa laog nin labing 65 taon, pusoan niang ibinalangibog an mga paghokom ni Jehova. Midbid siang marhay sa Israel huli sa saiyang pagkadaing takot asin kosog nin boot sa paghuhulit kaya pakalihis nin mga 600 na taon kan si Jesus magtaram na may pagkapusoan, inisip nin nagkapira na sia si Jeremias na nabuhay liwat. (Mat. 16:13, 14) Paano napangganahan ni propeta Jeremias, na nag-aalangan kan enot, an saiyang pagkamasusupgon? Sia nagsabi: “Sa sakong puso [an Tataramon nin Dios] nagin siring sa naglalaad na kalayo na nalalaom sa sakong mga tolang; asin ako napagal sa pagpugol kaiyan.” (Jer. 20:9) Iyo, an tataramon ni Jehova nagkaigwa nin puersa ki Jeremias asin nagpahiro sa saiya na magtaram.
9. Taano an Tataramon nin Dios ta puedeng magkaigwa nin epekto sa sato arog kan nagin epekto kaiyan ki Jeremias?
9 Sa surat ni apostol Pablo sa mga Hebreo, sia nagsabi: “An tataramon nin Dios buhay asin mapuersa asin mas matarom kisa sa arin man na espada na may duwang tarom asin minalagbas sagkod sa pagbulag kan kalag asin espiritu, saka kan mga pagsokmolan asin hotok kaiyan, asin nakakabatid kan mga kaisipan asin intension kan puso.” (Heb. 4:12) An mensahe, o tataramon, nin Dios puedeng magkaigwa nin epekto sa sato arog kan nagin epekto kaiyan ki Jeremias. Girumdomon na minsan ngani naggamit nin mga tawo tanganing isurat an Biblia, an laog kaiyan bakong kadonongan nin mga tawo, huling ipinasabong iyan nin Dios. Sa 2 Pedro 1:21, mababasa niato: “An hula dai kasuarin man dinara paagi sa kabotan nin tawo, kundi an mga tawo nagtaram hale sa Dios mantang sinda pinapahiro kan banal na espiritu.” Kun nagtatao kita nin panahon para sa makahulogan na personal na pag-adal sa Biblia, an satong isip napapano kan mensaheng ipinasabong kan banal na espiritu. (Basahon an 1 Corinto 2:10.) An mensaheng iyan puedeng magin “siring sa naglalaad na kalayo” sa laog niato, kaya dai niato makakayang sadirihon sana iyan.
10, 11. (a) Paano niato maninigong pag-adalan an Biblia kun gusto niatong magin pusoan sa pagtaram? (b) Sambiton an kisiera sarong lakdang na pinaplano mong gibohon tanganing paoswagon an kalidad kan saimong personal na pag-adal.
10 Tanganing magin mapuersa an epekto sa sato kan personal na pag-adal sa Biblia, maninigong gibohon iyan sa paaging naaabot kan mensahe kan Biblia an kairairaromi niato, na nagkakaigwa nin epekto sa satong panglaog na pagkatawo. Halimbawa, si propeta Ezequiel tinawan nin bisyon na dian sinabihan siang kakanon an rolyo nin sarong libro na may mapuersang mensahe na kaipuhan ipahayag sa banwaan na dai naghihimate. Kaipuhan ni Ezequiel na lubos na masabotan an mensahe asin gibohon iyan na kabtang nia. Paagi kaiyan, an pagpahayag kan mensahe magigin nakakaogmang marhay—siring sa namit nin tangguli.—Basahon an Ezequiel 2:8–3:4, 7-9.
11 An situwasyon niato ngonyan arog kan ki Ezequiel. Dakol ngonyan an habo talagang magdangog sa sinasabi kan Biblia. Kun gusto niatong magin maigot sa pagtaram kan tataramon nin Dios, mahalaga na pag-adalan niato an Kasuratan sa paagi na lubos niatong nasasabotan an mensahe kaiyan. Maninigo niatong gibohon na regular an satong pag-adal, bakong paminsanminsan sana. An satong pagmawot maninigong magin arog kan sa salmista na nag-awit: “Logod na an mga tataramon kan sakong ngoso asin an paghorophorop kan sakong puso magin nakakaogma sa saimo, O Jehova na sakong Gapo asin sakong Paratubos.” (Sal. 19:14) Mahalaga nanggad na magtao kita nin panahon na horophoropon an satong binabasa, tanganing an mga katotoohan sa Biblia makataros nanggad sa puso! Iyo nanggad, maninigo niatong pagmaigotan na paoswagon an kalidad kan satong personal na pag-adal. *
12. Taano an Kristianong mga pagtiripon ta nakakatabang sa sato na magiyahan kan banal na espiritu?
12 An saro pang paagi tanganing makinabang sa banal na espiritu ni Jehova iyo na “konsideraron niato an lambang saro tanganing mandagka sa pagkamoot asin sa marahay na mga gibo, na dai pagpabayaan an satong pagtorotiripon.” (Heb. 10:24, 25) An satong paghihingoa na magin regular sa Kristianong mga pagtiripon, maingat na paghinanyog, asin pag-aplikar kan nanonodan niato marahay na mga paagi tanganing magiyahan kan espiritu. Total, bako daw na an espiritu ni Jehova naggigiya paagi sa kongregasyon?—Basahon an Kapahayagan 3:6.
Mga Pakinabang nin Pagigin Pusoan
13. Ano an manonodan niato sa nagibong paghuhulit kan mga Kristiano kan enot na siglo?
13 An banal na espiritu an pinakamakapangyarihan na puersa sa uniberso, asin mapapakosog kaiyan an mga tawo na gibohon an kabotan ni Jehova. Sa impluwensia kaiyan, an mga Kristiano kan enot na siglo nakagibo nin pambihirang paghuhulit. Ihinulit ninda an maogmang bareta “sa gabos na linalang sa sirong nin langit.” (Col. 1:23) Kun ginigirumdom niato na an kadaklan sa sainda “daing inadalan asin ordinaryo,” nagigin risang-risa na may mas makosog na puersa na nagmotibar sa sainda.—Gibo 4:13.
14. Ano an makakatabang sa sato na magin “malaad sa espiritu”?
14 Kun namumuhay kita kaoyon kan paggiya kan banal na espiritu, namomotibar kitang otobon na may kosog nin boot an satong ministeryo. An gabos na pakinabang na resulta nin daing ontok na pamimibi na logod itao sa sato an espiritu, maigot asin makahulogan na personal na pag-adal, mapagngayongayong paghorophorop sa binabasa niato, asin regular na pag-atender sa Kristianong mga pagtiripon makakatabang sa sato na magin “malaad sa espiritu.” (Roma 12:11) Mapadapit sa “sarong Judio na an ngaran Apolos, na propiong taga Alejandria, sarong lalaking matibay magtaram, [na] duminatong sa Efeso,” an Biblia nagsasabi: “Mantang sia malaad sa espiritu, sia nagtaram asin nagtokdo nin tama kan mga bagay manongod ki Jesus.” (Gibo 18:24, 25) Kun kita ‘nagbabaga sa Espiritu,’ ikakapaheling niato an orog na pagkapusoan sa satong pagharongharong asin kun nagpapatotoo nin impormal.—Roma 12:11, An Banal na Biblia, Edisyon 1997.
15. Paano kita nakikinabang sa pagtaram na may orog na pagkapusoan?
15 May positibong epekto sa sato an orog na pagkapusoan sa pagpatotoo. Igwa kita nin mas positibong pananaw huli ta mas lubos niatong inaapresyar an kahalagahan asin pakinabang kan satong gibohon. Nag-oorog an satong entusiasmo huli ta nagigin mas magayagaya kita kun epektibo kita sa ministeryo. Asin nagigin mas maigot kita huling orog niatong nasasabotan an pagkaapurado kan paghuhulit.
16. Ano an maninigo niatong gibohon kun an satong kaigotan sa ministeryo nagluluya na?
16 Paano kun nawara na an satong kaigotan sa ministeryo o bako nang arog kan dati an satong entusiasmo dian? Kun siring, kaipuhan an sadiosan na pagsiyasat sa sadiri. Si Pablo nagsurat: “Padagos na baloon kun baga kamo nasa pagtubod, padagos na patunayan kun ano man nanggad kamo.” (2 Cor. 13:5) Hapoton an saimong sadiri: ‘Ako daw malaad pa sa espiritu? Hinahagad ko daw ki Jehova sa pamibi an saiyang espiritu? Ipinapaheling daw kan sakong mga pamibi na nagsasarig ako sa saiya tanganing magibo an saiyang kabotan? Iiniiba ko daw na sambiton an pagpasalamat para sa ministeryong ipinagkatiwala sa sato? Kumusta an sakong ugale sa personal na pag-adal? Gurano kadakol na panahon an ginagamit ko sa paghorophorop sa binabasa asin nadadangog ko? Kumusta daw an sakong pakikikabtang sa mga pagtiripon kan kongregasyon?’ An paghorophorop sa mga hapot na siring kaini makakatabang sa saindo na maaraman kun saen kamo may kaluyahan asin na itanos iyan.
Togotan an Espiritu nin Dios na Gibohon Kamong Pusoan
17, 18. (a) Gurano kalakop an ginigibong paghuhulit ngonyan? (b) Paano niato ikakapaheling an “lubos na katalingkasan sa pagtaram” sa pagpahayag kan maogmang bareta kan Kahadean nin Dios?
17 An binuhay liwat na si Jesus nagsabi sa saiyang mga disipulo: “Kamo mag-aako nin kapangyarihan kun dumatong na sa saindo an banal na espiritu, asin kamo magigin mga saksi ko sa Jerusalem asin sa bilog na Judea asin Samaria patin sagkod sa kaporoporohi kan daga.” (Gibo 1:8) An gibohon na pinonan kaidto lakop nang marhay ngonyan. Haros pitong milyon nang Saksi ni Jehova an naghahayag kan mensahe kan Kahadean sa labing 230 kadagaan, na naggagamit nin haros 1.5 bilyones na oras kada taon sa ministeryo. Nakakaogma nanggad na maigot na makikabtang sa dai na noarin man maootrong gibohon na ini!
18 Arog kan enot na siglo, ginigiyahan kan espiritu nin Dios an lakop sa globong paghuhulit ngonyan. Kun kita naghihimate sa paggiya kan espiritu, ipapaheling niato sa satong ministeryo an “lubos na katalingkasan sa pagtaram.” (Gibo 28:31) Kun siring, magpagiya nanggad kita sa espiritu mantang ipinapahayag niato an maogmang bareta kan Kahadean nin Dios!
[Mga Nota sa Ibaba]
^ par. 7 Sinalidahan an nagkapirang ngaran.
^ par. 11 Tanganing makinabang na marhay sa saindong pagbasa sa Biblia asin personal na pag-adal, helingon an mga kapitulo na may titulong “Magmaigot Ka sa Pagbasa” asin “May Balos an Pag-adal,” sa pahina 21-32 kan librong Makinabang sa Edukasyon sa Teokratikong Paadalan sa Pagmiministro.
Ano an Nanodan Nindo?
• Taano ta kaipuhan niatong magin pusoan sa pagtaram kan tataramon nin Dios?
• Ano an nakatabang sa enot na mga disipulo na magtaram na may pagkapusoan?
• Paano kita magigin pusoan?
• Paano kita nakikinabang sa pagigin pusoan?
[Mga Hapot Para sa Pag-adal]
[Ritrato sa pahina 7]
Paano an mga magurang makakatabang sa saindang mga aki na magin pusoan?
[Mga Ritrato sa pahina 8]
An halipot na pamibi makakatabang sa saimo na magpakapusoan sa ministeryo