Maogma Kamong Inaako sa Pinakamarahay na Paagi nin Pamumuhay!
Maogma Kamong Inaako sa Pinakamarahay na Paagi nin Pamumuhay!
“Pareho na kun kita mabuhay asin magadan, sadiri kita ni Jehova.”—ROMA 14:8.
1. Ano an itinokdo ni Jesus manongod sa pinakamarahay na paagi nin pamumuhay?
GUSTO ni Jehova na magkaigwa kita kan pinakamarahay na paagi nin pamumuhay. An mga tawo makakapamuhay sa laen-laen na paagi, alagad saro sanang paagi an pinakamarahay. An pinakamarahay na magigibo niato iyo an mamuhay kaoyon kan Tataramon nin Dios asin makanood sa saiyang Aki, si Jesu-Cristo. Tinokdoan ni Jesus an saiyang mga parasunod na sambahon an Dios sa espiritu asin katotoohan, saka pinagbotan nia sinda na gumibo nin mga disipulo. (Mat. 28:19, 20; Juan 4:24) Paagi sa pamumuhay kaoyon kan mga instruksion ni Jesus, napapaogma niato si Jehova asin nag-aako kita kan Saiyang bendisyon.
2. Kan enot na siglo, ano an reaksion nin dakol sa mensahe kan Kahadean, asin ano an boot sabihon kan pagigin kabilang sa “Dalan”?
2 Kun an mga “may tamang inklinasyon sa buhay na daing katapusan” nagigin paratubod asin magpabautismo, kita may marahay na mga dahelan na sabihon sa sainda, “Maogma kamong inaako sa pinakamarahay na paagi nin pamumuhay!” (Gibo 13:48) Durante kan enot na siglo kan satong Komun na Kapanahonan, rinibong tawo hale sa laen-laen na nasyon an nag-ako kan katotoohan asin nagpaheling nin hayag na ebidensia kan saindang debosyon sa Dios paagi sa pagpabautismo. (Gibo 2:41) An enot na mga disipulong iyan kabilang sa “Dalan.” (Gibo 9:2; 19:23) An pananaram na ini angay huling an mga nagin parasunod ni Cristo nagdadanay sa paagi nin pamumuhay na nakasentro sa pagtubod ki Jesu-Cristo asin pag-arog sa saiyang halimbawa.—1 Ped. 2:21.
3. Taano ta nagpapabautismo an mga lingkod ni Jehova, asin pira an nabautismohan sa nakaaging sampulong taon?
3 Sa huring mga aldaw na ini, pinaparikas an paggibo nin mga disipulo asin iyan ginigibo na sa labing 230 kadagaan. Durante kan nakaaging sampulong taon, labing 2,700,000 katawo an nagdesisyon na maglingkod ki Jehova asin magpabautismo bilang simbolo kan saindang pagdusay sa saiya. Iyan may promedyong labing 5,000 na indibiduwal kada semana! An desisyon na magpabautismo nakabasar sa pagkamoot sa Dios, kaaraman sa Kasuratan, asin pagtubod sa itinotokdo kaiyan. An bautismo sarong makahulogan na pangyayari sa satong buhay, huling iyan an kapinonan nin pagkaigwa nin dayupot na relasyon ki Jehova. Iyan pagpaheling man nin kompiansa na tatabangan nia kita na maimbod na maglingkod sa saiya, kun paanong tinabangan nia an saiyang mga lingkod kan suanoy na maglakaw sa saiyang dalan.—Isa. 30:21.
Taano ta Dapat Magpabautismo?
4, 5. Sambiton an nagkapira sa mga bendisyon asin pakinabang nin pagpabautismo.
4 Tibaad ika nagkua na nin kaaraman dapit sa Dios, naggibo na nin mga pagbabago sa saimong buhay, asin nakualipikar na bilang dai pa bautisadong parahayag. Kaomaw-omaw an siring na pag-oswag. Alagad ika daw nagdusay na sa Dios paagi sa pamibi asin nagmamawot nang magpabautismo? Huli sa pag-adal mo sa Biblia, posibleng marhay na aram mo na ngonyan na an saimong buhay maninigong nakasentro sa pag-omaw ki Jehova, bakong sa pagpaogma sana sa saimong sadiri o pagkamit nin materyal na mga rogaring. (Basahon an Salmo 148:11-13; Lucas 12:15) Kaya, ano an nagkapira sa mga bendisyon asin pakinabang nin pagpabautismo?
5 Bilang sarong nagdusay na Kristiano, an saimong buhay magkakaigwa kan pinakahalangkaw na katuyohan. Magigin maogma ka huling ginigibo mo an kabotan nin Dios. (Roma 12:1, 2) An banal na espiritu ni Jehova matabang sa saimo na magpaheling nin diosnon na mga kualidad siring kan katoninongan asin pagtubod. (Gal. 5:22, 23) Sisimbagon nin Dios an saimong mga pamibi asin bebendisyonan nia an mga paghihingoa mo na ioyon an saimong buhay sa saiyang Tataramon. An saimong ministeryo magigin magayagaya, asin an pamumuhay sa paaging inooyonan nin Dios mapakosog kan saimong paglaom na buhay na daing katapusan. Dugang pa, an pagdusay asin pagpabautismo magpapaheling na talagang gusto mo na magin saro sa mga Saksi ni Jehova.—Isa. 43:10-12.
6. Ano an ipinapahayag kan satong bautismo?
6 Paagi sa pagdusay kan satong sadiri sa Dios asin pagpabautismo, ipinapahayag niato na sadiri kita ni Jehova. “Sa katunayan, mayo sa sato nin nabubuhay para sa saiya sana, asin mayo nin nagagadan para sa saiya sana,” an isinurat ni apostol Pablo, “huli ta pareho na kun kita mabuhay, nabubuhay kita para ki Jehova, asin kun kita magadan, magagadan kita para ki Jehova. Kun siring, pareho na kun kita mabuhay asin magadan, sadiri kita ni Jehova.” (Roma 14:7, 8) An Dios nagtao sa sato nin dignidad paagi sa pagtao sa sato nin libreng kabotan. Kun marigon kitang nagdesisyon na mamuhay sa paaging ini huling namomotan niato an Dios, napapagayagaya niato an saiyang puso. (Tal. 27:11) An satong pagpabautismo simbolo kan pagdusay niato sa Dios sagkod kan pagpahayag niato sa publiko na si Jehova an Namamahala sa sato. Ipinapaheling kaiyan na nanindogan kita sa saiyang kampi sa isyu nin unibersal na soberaniya. (Gibo 5:29, 32) Huli kaiyan, si Jehova nasa kampi niato. (Basahon an Salmo 118:6.) An bautismo nagbubukas man kan dalan tanganing mag-ako kita nin dakol na iba pang espirituwal na bendisyon ngonyan asin sa ngapit.
Binendisyonan nin Mamomoton na Kasararoan nin Magturugang
7-9. (a) Anong pag-asegurar an itinao ni Jesus sa mga nagbaya kan gabos na bagay asin nagsunod sa saiya? (b) Paano naootob an panuga ni Jesus na nasa Marcos 10:29, 30?
7 Si apostol Pedro nagsabi ki Jesus: “Uya! Binayaan mi na an gabos na bagay asin nagsunod sa saimo; ano man nanggad an yaon para sa samo?” (Mat. 19:27) Gustong maaraman ni Pedro kun ano an magigin ngapit nia asin kan iba pang disipulo ni Jesus. Tanganing lubos nindang ikadusay an saindang sadiri sa paghuhulit kan Kahadean, dakula an mga isinakripisyo ninda. (Mat. 4:18-22) Anong pag-asegurar an itinao ni Jesus sa sainda?
8 Segun sa kaagid na pagkasaysay ni Marcos, ipinarisa ni Jesus na an saiyang mga disipulo magigin kabtang nin espirituwal na kasararoan nin magturugang. Sia nagsabi: “Dai nin siisay man na nagbaya sa harong o mga tugang na lalaki o mga tugang na babae o ina o ama o mga aki o mga oma huli sa sako asin huli sa maogmang bareta na dai magkakamit nin mananggatos ngonyan sa panahon na ini, mga harong asin mga tugang na lalaki asin mga tugang na babae asin mga ina asin mga aki patin mga oma, na may mga pagpersegir, asin sa madatong na sistema nin mga bagay buhay na daing katapusan.” (Mar. 10:29, 30) An mga Kristiano kan enot na siglo, arog ni Lidia, Aquila, Priscila, asin Gayo, kabilang sa mga nagpadagos sa saindang “mga harong” asin nagin “mga tugang na lalaki asin mga tugang na babae asin mga ina” para sa mga kapagtubod, arog kan ipinanuga ni Jesus.—Gibo 16:14, 15; 18:2-4; 3 Juan 1, 5-8.
9 An sinabi ni Jesus may mas dakulang kaotoban ngonyan. An “mga oma” na binayaan kan saiyang mga parasunod nanonongod sa mga pagbuhay na andam na isakripisyo nin dakol na Kristiano, kaiba na an mga misyonero, miembro kan pamilyang Bethel, internasyonal na mga lingkod, asin iba pa, tanganing paoswagon an intereses kan Kahadean sa laen-laen na nasyon. Dakol na tugang an nagbaya kan saindang harong tanganing pasimplehon an saindang buhay, asin kita naggagayagayang madangog an mga eksperyensia ninda na nagpapaheling kun paano sinda inataman ni Jehova asin kun paano nakapaogma sa sainda an paglilingkod sa saiya. (Gibo 20:35) Dugang pa, an gabos na bautisadong lingkod ni Jehova puedeng kamtan an bendisyon kan ‘paghanap nguna kan kahadean asin kan katanosan nin Dios’ bilang kabtang kan pambilog na kinaban na kasararoan nin magturugang.—Mat. 6:33.
Ligtas sa “Hilom na Lugar”
10, 11. Ano an “hilom na lugar kan Kaharohalangkawe,” asin paano kita makakalaog dian?
10 An pagdusay asin bautismo nagreresulta sa saro pang dakulang bendisyon—an pribilehio na mag-erok sa “hilom na lugar kan Kaharohalangkawe.” (Basahon an Salmo 91:1.) Saro ining piguratibong lugar na ligtas asin tiwasay—sarong kamugtakan na protektado sa espirituwal na peligro. Iyan “hilom na lugar” huling dai iyan aram kan mga tawo na mayo nin espirituwal na pagheling asin dai nagtitiwala sa Dios. Paagi sa pamumuhay kaoyon kan satong pagdusay asin paagi sa lubos na pagsarig ki Jehova, garo man sana sinasabi niato sa saiya: “Ika an sakuyang pailihan asin an sakuyang kuta, an sakuyang Dios, na sakuyang pagtitiwalaan.” (Sal. 91:2) Si Jehova Dios nagigin ligtas na erokan niato. (Sal. 91:9) Mahanap pa daw kita nin ibang lugar na malabi pa dian?
11 An pagigin nasa laog kan “hilom na lugar” ni Jehova nagpaparisa man na binendisyonan kita kan pribilehio na makapatalubo nin personal na relasyon sa saiya. Nagpopoon ini sa pagdusay asin bautismo. Pagkatapos kaiyan, pinapatalubo niato an satong relasyon sa Dios paagi sa pagdayupot sa saiya sa tabang nin pag-adal sa Biblia, odok sa pusong pamimibi, asin lubos na pagkuyog. (Sant. 4:8) Mayo na nin mas dayupot pa ki Jehova kundi si Jesus, na an pagsarig sa Kaglalang dai noarin man nagluluya. (Juan 8:29) Kun siring, dai niato noarin man pagdudahan si Jehova o an saiyang pagmawot asin kakayahan na tabangan kitang otobon an satong promesa nin pagdusay. (Ecl. 5:4) An espirituwal na mga probisyon na ginibo nin Dios para sa banwaan nia dai manenegaran na ebidensia na talagang namomoot sia sa sato asin gusto niang magin mapanggana kita sa paglilingkod sa saiya.
Pakamahalon an Satong Espirituwal na Paraiso
12, 13. (a) Ano an espirituwal na paraiso? (b) Paano kita puedeng makatabang sa mga bagohan?
12 An pagdusay asin bautismo nagbubukas man kan dalan tanganing makapag-erok kita sa maogmahon na espirituwal na paraiso. Iyan sarong daing kaagid na espirituwal na kamugtakan na dian nag-iiribanan an magkakapagtubod, na may matoninong na relasyon ki Jehova Dios asin sa lambang saro. (Sal. 29:11; Isa. 54:13) An kinaban mayo nin ano man na angay na ikakakomparar sa satong espirituwal na paraiso. Ini nangorognang risang-risa sa internasyonal na mga kombension, na dian an satong mga tugang hale sa dakol na nasyon, lenguahe, asin grupong etniko nagtitiripon na may katoninongan, pagkasararo, asin pagkamoot na sa magturugang.
13 An satong espirituwal na paraiso biyong kabaliktaran kan makamomondong gayong mga kamugtakan sa kinaban ngonyan. (Basahon an Isaias 65:13, 14.) Paagi sa pagbalangibog kan mensahe kan Kahadean, may pribilehio kita na imbitaran an iba na maglaog sa espirituwal na paraiso. Sarong bendisyon man na tabangan an mga bago pa sanang nakikiasosyar sa kongregasyon asin puedeng makinabang sa pagsasanay sa ministeryo. Sa pagdirehir kan kamagurangan, puedeng kitang magkapribilehio na tabangan an nagkapirang bagohan, kun paanong ‘ipinaliwanag nin mas tama ni Aquila asin Priscila an dalan nin Dios’ ki Apolos.—Gibo 18:24-26.
Padagos na Makanood ki Jesus
14, 15. Ano an marahay na mga dahelan niato na padagos na makanood ki Jesus?
14 May marahay na mga dahelan kita na padagos na makanood ki Jesus. Durante kan buhay ni Jesus bago sia nagin tawo, dai mabilang na milenyo an ginamit nia sa pagtrabaho kaiba kan saiyang Ama. (Tal. 8:22, 30) Aram nia na an pinakamarahay na paagi nin pamumuhay nakasentro sa paglilingkod sa Dios asin pagpapatotoo dapit sa katotoohan. (Juan 18:37) Malinaw ki Jesus na an ano man na ibang paagi nin pamumuhay maimot asin presente sana an iniisip. Aram nia na grabe an magigin pagbalo sa saiya asin gagadanon sia. (Mat. 20:18, 19; Heb. 4:15) Bilang satong Arogan, tinokdoan nia kita kun paano magdadanay na may integridad.
15 Dai nahaloy pakabautismohi ki Jesus, sinugotan sia ni Satanas na bayaan an pinakamarahay na paagi nin pamumuhay—alagad dai iyan nagin mapanggana. (Mat. 4:1-11) Itinotokdo kaini sa sato na ano man an ginigibo ni Satanas, mapagdadanay niato an satong integridad. Posibleng marhay na ipinopokus nia an saiyang atension sa mga mapabautismo saka sa mga bago pa sanang magpabautismo. (1 Ped. 5:8) An pagtumang tibaad maggikan sa mga kapamilyang marahay an intension alagad naimpormaran nin sala. Pero, an siring na mga pagbalo nagtatao sa sato nin mga oportunidad na ipaheling an marahay na Kristianong mga kualidad, arog baga nin paggalang asin pagkamataktika, kun sinisimbag niato an mga hapot asin kun nagpapatotoo kita. (1 Ped. 3:15) Kun siring, an mga eksperyensiang ini puedeng magkaigwa nin positibong epekto sa mga naghihinanyog sa sato.—1 Tim. 4:16.
Magdanay sa Pinakamarahay na Paagi nin Pamumuhay!
16, 17. (a) Anong tolong pundamental na kahagadan para sa buhay an nasa Deuteronomio 30:19, 20? (b) Paano sinuportaran ni Jesus, Juan, asin Pablo an isinurat ni Moises?
16 Mga 1,500 na taon bago si Jesus magdigdi sa daga, sinadol ni Moises an mga Israelita na pilion an pinakamarahay na paagi nin pamumuhay na posible kaidto. Sia nagsabi: “Kinukua ko an kalangitan asin an daga bilang mga saksi tumang sa saindo ngonyan, na ibinugtak ko an buhay asin kagadanan sa atubangan mo, an bendisyon asin an maldisyon; asin dapat na pilion mo an buhay tanganing makapagpadagos kang mabuhay, ika asin an saimong aki, paagi sa pagkamoot ki Jehova na saimong Dios, paagi sa paghinanyog sa saiyang tingog asin paagi sa pagdadanay sa saiya.” (Deut. 30:19, 20) An Israel nagin bakong maimbod sa Dios, alagad an tolong pundamental na kahagadan para sa buhay na sinabi ni Moises dai nagbabago. Inotro iyan ni Jesus asin kan iba.
17 Enot, ‘kamotan niato si Jehova na satong Dios.’ Ipinapaheling niato na namomotan niato an Dios paagi sa paghiro kaoyon kan saiyang matanos na mga dalan. (Mat. 22:37) Ikaduwa, ‘dapat niatong hinanyogon an tingog ni Jehova’ paagi sa pag-adal sa Tataramon nin Dios asin pagkuyog sa saiyang mga togon. (1 Juan 5:3) Nagkakaipo ini na regular kitang mag-atender sa Kristianong mga pagtiripon, na dian tinotokar an Biblia. (Heb. 10:23-25) Ikatolo, ‘dapat kitang magdanay ki Jehova.’ Ano man an mapaatubang sa sato, pirme kitang magtubod sa Dios asin magsunod sa saiyang Aki.—2 Cor. 4:16-18.
18. (a) Paano ilinadawan kan The Watch Tower an katotoohan kaidtong 1914? (b) Ano an maninigo niatong magin saboot sa liwanag nin katotoohan ngonyan?
18 Sarong bendisyon nanggad na mamuhay kaoyon kan katotoohan sa Biblia! Kan 1914, ipinublikar sa The Watch Tower an importanteng mga tataramon na ini: “Bako daw na kita sarong banwaan na binendisyonan asin maogma? Bako daw na maimbod an satong Dios? Kun an siisay man may aram na mas marahay, kuanon nia iyan. Kun an siisay man sa saindo may manompongan na mas marahay, naglalaom kami na sasabihan nindo kami. Mayo kami nin aram na mas marahay o kabanga man lamang an karahayan sa nanompongan mi sa Tataramon nin Dios. . . . Mayo nin dila o pluma na makakapagsaysay kan katoninongan, kagayagayahan, asin bendisyon na itinatao nin malinaw na kaaraman dapit sa tunay na Dios sa samong puso asin buhay. An Kasaysayan dapit sa Kadonongan, Hustisya, Kapangyarihan, asin Pagkamoot nin Dios lubos na nagpapanigo sa mga pagmawot kan samong isip sagkod puso. Dai na kami naghahanap nin orog pa. Mayo na nin mas mamawoton pa kisa orog pang luminaw sa samong isip an makangangalas na Kasaysayan na ini.” (The Watch Tower, Disyembre 15, 1914, pahina 377-378) Dai nagbabago an satong pag-apresyar sa espirituwal na liwanag asin katotoohan. Tunay nanggad, may orog pa ngani kitang dahelan ngonyan na maggayagaya na kita ‘naglalakaw sa liwanag ni Jehova.’—Isa. 2:5; Sal. 43:3; Tal. 4:18.
19. Taano an mga kualipikado nang magpabautismo ta maninigong gibohon iyan na dai nin pag-atraso?
19 Kun ika nagmamawot na ‘maglakaw sa liwanag ni Jehova’ alagad bako pang dusay asin bautisadong Kristiano, dai ka mag-atraso. Gibohon mo an ano man na kaipuhan tanganing maabot an mga kahagadan sa Biblia para sa bautismo—an daing kaagid na paagi tanganing ikapaheling an pag-apresyar sa ginibo nin Dios asin ni Cristo para sa sato. Itao mo ki Jehova an pinakamahalagang pagsasadiri mo—an saimong buhay. Ipaheling na gusto mo talagang gibohon an kabotan nin Dios paagi sa pagsunod sa saiyang Aki. (2 Cor. 5:14, 15) Mayong duda, iyan an pinakamarahay na paagi nin pamumuhay!
Ano an Isisimbag Nindo?
• Ano an isinisimbolisar kan satong bautismo?
• An pagdusay sa Dios asin bautismo nagreresulta sa anong mga bendisyon?
• Taano ta mahalagang marhay na makanood ki Jesus?
• Ano an makakatabang sa sato na magdanay sa pinakamarahay na paagi nin pamumuhay?
[Mga Hapot Para sa Pag-adal]
[Ritrato sa pahina 25]
Ipinapaheling kan saimong bautismo na pinili mo an pinakamarahay na paagi nin pamumuhay
[Mga Ritrato sa pahina 26]
Kamo daw ligtas sa “hilom na lugar”?