Mga Hapot Hale sa mga Parabasa

Sa anong mga kamugtakan puedeng pag-isipan an pagpabautismo giraray?

Sa nagkapirang kamugtakan, tibaad gusto nin sarong bautisadong tawo na horophoropon an pagigin balido kan saiyang bautismo asin tibaad pag-isipan nia na magpabautismo giraray. Halimbawa, sa panahon kan saiyang bautismo, tibaad an saro igwa nin sekretong pamumuhay o may ginigibo na puede nia kutanang ikatiwalag kun sia balido nang nabautismohan. Makakapagdusay daw sia sa Dios sa arog kaidtong kamugtakan? An siring na indibiduwal makakagibo sana nin balidong pagdusay kun ipinondo na nia an paggawe na bakong sono sa Kasuratan. Kun siring, kun an saro nabautismohan mantang igwa nin arog kaiyan kaseryosong olang, puede nanggad niang pag-isipan kun kaipuhan an pagpabautismo giraray.

Kumusta man an sarong indibiduwal na dai naggigibo nin kasalan sa panahon kan saiyang bautismo alagad pagkatapos kaiyan may maraot na ginibo na nagin dahelan na magporma nin hudisyal na komite? Dangan, ipamugtak na sinabi nia na dai nia lubos na nasasabotan an saiyang ginigibo kan panahon kan saiyang bautismo asin na an saiyang bautismo bako talagang balido. Kun nakikipag-olay sa sarong nagkasala, an kamagurangan dai maninigong magbangon nin mga pagduda manongod sa saiyang bautismo asin dai maninigong maghapot kun baga sa pagmate nia balido an saiyang pagdusay asin bautismo. Total, nadangog nia an sarong diskurso na basado sa Kasuratan manongod sa kahulogan nin bautismo. Suminimbag sia na may pag-oyon sa mga hapot mapadapit sa pagdusay asin bautismo. Dangan sia nagsangli nin gubing asin aktuwal na ilinubog sa tubig. Kun siring, rasonableng maniwala na lubos niang nasabotan an pagkaseryoso kan saiyang ginigibo kaidto. Huli kaini, tatrataron sia kan kamagurangan bilang sarong bautisado.

Kun ibangon kan indibiduwal an isyu kan pagigin balido kan saiyang bautismo, puedeng darahon kan kamagurangan an saiyang atension sa The Watchtower na Marso 1, 1960, pahina 159 asin 160, asin Pebrero 15, 1964, pahina 123 sagkod 126, na dian detalyadong tinokar an pagpabautismo giraray. Sa katapustapusi, an pagpabautismo giraray sa nagkapirang kamugtakan (arog baga nin kakulangan nin igong pakasabot sa Biblia kan an saro magpabautismo) sarong personal na desisyon.

Ano an mga maninigong konsideraron nin mga Kristiano kun dapit sa iribang pag-erok sa sarong istaran?

An gabos nangangaipo nin istaran. Minsan siring, dakol na tawo ngonyan an mayo nin sadiring harong. Huli sa pinansial na situwasyon, problema sa salud, o iba pang dahelan, tibaad kaipuhan na iribang mag-istar an magpaparyente. Sa nagkapirang parte kan kinaban, an magpaparyente tibaad nagsusurusoan sa sarong kuarto na haros mayo na nin pribadong lugar.

Bakong responsabilidad kan organisasyon ni Jehova na magtao nin halabang lista nin mga susundon mapadapit sa kun ano an angay na istaran para sa gabos na kabilang sa pambilog na kinaban na kongregasyon. Dinadagka an mga Kristiano na konsideraron an mga prinsipyo sa Kasuratan tanganing madeterminaran kun baga an saindang areglo sa pag-istar inaako nin Dios o dai. Ano an nagkapira sa mga prinsipyong ini?

An sarong pangenot na dapat konsideraron iyo an magigin epekto sa sato asin sa satong espirituwalidad  kan pag-istar niato kaiba an ibang tawo. Sairisay an mga tawong ini? Sinda daw mga parasamba ki Jehova? Sinda daw namumuhay kaoyon kan mga pamantayan kan Biblia? “Dai kamo magpalagalag,” an isinurat ni apostol Pablo. “An maraot na pag-iriba nakakaraot sa marahay na mga ugale.”—1 Cor. 15:33.

Ipinapaliwanag kan Kasuratan na kinokondenar ni Jehova an pakikisaro asin pagsambay. (Heb. 13:4) Kaya an ano man na areglo sa pagtorog na nagtotogot sa mga bakong mag-agom asin bakong magkasekso na mag-ibanan na garo mag-agom malinaw na dai inaako nin Dios. Dai gugustohon nin sarong Kristiano na magdanay sa sarong lugar na dian kinokonsinte an imoralidad.

Dugang pa, sinasadol kan Biblia an gabos na nagmamawot kan pabor nin Dios na ‘dumulag sa pakikisaro.’ (1 Cor. 6:18) Kun siring, madonong para sa mga Kristiano na likayan an ano man na areglo sa pag-istar na puedeng magin dahelan na masugotan sinda na gumawe nin imoral. Kuanon niatong halimbawa an situwasyon kun saen an nagkapirang Kristiano nagtotorog sa saro sanang harong. An siring daw na areglo posibleng magresulta sa nakakatentar na mga situwasyon? Paano kun nanongod na an duwang bakong mag-agom iyo sana an nawalat sa harong huling an iba na nag-iistar dian temporaryong naghale? Siring man, magigin peligroso sa moral para sa duwa na daing agom pero may romantikong interes sa lambang saro na mag-istar sa saro sanang harong. Madonong nanggad na likayan an arog kaining mga situwasyon.

Kaagid kaiyan, bakong tama para sa dating mag-agom na nagdiborsio na padagos na mag-istar sa saro sanang harong. An saindang pagigin dating magkadayupot madali sanang magresulta sa imoral na paggawe.—Tal. 22:3.

An huri alagad mahalagang bagay man na dapat konsideraron iyo an pagmansay kan komunidad sa mga desisyon nin sarong Kristiano. An areglo sa pag-istar na sa paghona nin saro puede na alagad minaresulta sa negatibong orolay sa komunidad dapat tawan nin atension. Nungka niatong gugustohon na an satong paggawe magtao nin katuyawan sa ngaran ni Jehova. Arog kaini an sabi ni Pablo: “Dai kamo magin mga dahelan nin pagkasingkog sa mga Judio saka sa mga Griego patin sa kongregasyon nin Dios, kun paanong ako nagpapaoyon sa gabos na tawo sa gabos na bagay, na dai ko hinahanap an sadiri kong kapakanan kundi an sa dakol, tanganing sinda maligtas.”—1 Cor. 10:32, 33.

An paghanap asin pag-areglo nin angay na maiistaran tibaad magin depisil nanggad para sa mga nagmamawot na suportaran an matanos na mga pamantayan ni Jehova. Minsan siring, an mga Kristiano dapat na “padagos na seguradohon kun ano an inaako kan Kagurangnan.” Kaipuhan nindang siertohon na mayong malaswa na nangyayari sa laog kan saindang harong. (Efe. 5:5, 10) Sa paggibo kaini, an mga Kristiano kaipuhan na mamibi para sa paggiya nin Dios asin gibohon an gabos nindang mahihimo tanganing protehiran an pisikal asin moral na kapakanan nin lambang saro patin an marahay na ngaran ni Jehova.