Minamansay daw Nindo si Jehova Bilang Saindong Ama?

“KAGURANGNAN, tokdoi kami kun paano mamibi.” Kan an saro sa mga disipulo nia makiolay nin arog kaiyan, si Jesus suminimbag: “Kun kamo namimibi, magsabi kamo, ‘Ama, pakangbanalon logod an saimong ngaran.’” (Luc. 11:1, 2) Puede kutanang apodon ni Jesus si Jehova na ginagamit an kahangahangang mga titulo siring kan “an Makakamhan sa Gabos,” an “Kaharohalangkaweng Paratokdo,” “an Kaglalang,” “an Suanoy kan mga Aldaw,” asin “an Hadeng daing sagkod.” (Gen. 49:25; Isa. 30:20; 40:28; Dan. 7:9; 1 Tim. 1:17) Imbes, pinili ni Jesus an terminong “Ama.” Taano? Tibaad huli ta gusto niang dumolok kita sa pinakahalangkaw na Personahe sa uniberso kun paanong an sarong mapakumbabang aki minadolok sa sarong mamomoton na ama.

Pero, an nagkapirang indibiduwal nadedepisilan na isipon an Dios bilang saindang Ama. An sarong Kristiana na an ngaran Atsuko * nag-admitir: “Sa laog nin dakol na taon pagkatapos kan sakong bautismo, nagin depisil para sa sako na rumani ki Jehova asin mamibi sa saiya bilang sarong Ama.” Sa pagsambit sa sarong dahelan kan saiyang kadepisilan, sinabi nia, “Mayo akong natatandaan na panahon na pinahelingan ako nin kapadangatan kan sakong ama sa laman.”

Sa delikadong huring mga aldaw na ini, an “natural na kapadangatan” na inaasahan sa sarong ama kulang nang marhay. (2 Tim. 3:1, 3) Kaya bakong pambihira para sa mga indibiduwal na magkaigwa nin saboot na arog kan ki Atsuko. Minsan siring, puede niatong kosogan an satong boot huli ta igwa kita nin marahay na mga dahelan na mansayon si Jehova bilang satong mamomoton na Ama.

Si Jehova—Sarong Mamomoton na Paratao

Tanganing mansayon niato si Jehova bilang satong Ama, kaipuhan niato na mamidbid siang marhay. “Dai nin siisay man na lubos na nakakamidbid sa Aki kundi an Ama,” an sabi ni Jesus, “ni na an siisay man lubos na nakakamidbid sa Ama kundi an Aki asin an siisay man na boot kan Aki na pahayagan dapit sa saiya.” (Mat. 11:27) An sarong marahayon na paagi na mamidbid kun anong klaseng Ama si Jehova iyo an paghorophorop sa kun ano an ihinayag ni Jesus manongod sa tunay na Dios. Kun siring, ano an sinabi ni Jesus manongod sa Ama?

Sa pagmidbid ki Jehova bilang an Burabod kan saiyang buhay, sinabi ni Jesus: “Ako nabubuhay huli kan Ama.” (Juan 6:57) Utang man niato sa Ama an satong pag-eksister. (Sal. 36:9; Gibo 17:28) Ano an nagpahiro ki Jehova na magtao nin buhay sa iba? Bako daw na pagkamoot? Para sa siring na regalo, daing duwa-duwa na maninigo man niatong kamotan an satong langitnon na Ama.

An pinakadakulang prueba kan pagkamoot nin Dios sa katawohan iyo an saiyang probisyon na atang na pantubos ni Jesus. An aktong iyan nin pagkamoot nagpagin posible para sa makasalan na mga tawo na magkaigwa nin dayupot na relasyon ki Jehova paagi sa saiyang namomotan na Aki. (Roma 5:12; 1 Juan 4:9, 10) Asin huli ta an satong langitnon na Ama iyo an Paraotob kan saiyang mga panuga, makakasegurado kita na an gabos na namomoot asin nagkukuyog sa saiya sa kahurihurihi magkakamit “kan mamuraway na katalingkasan kan mga aki nin Dios.”—Roma 8:21.

An satong langitnon na Ama ‘pinapasirang man sa sato an saiyang saldang’ aroaldaw. (Mat. 5:45) Tibaad dai niato iniisip na dapat ipamibi an pagsirang kan saldang. Pero, kaipuhan asin ikinakaogma nanggad niato an mainit na sinag kaiyan! Dugang pa, an satong Ama iyo an mayong kapantay na Paratao, na nakakaaram kan satong materyal na mga pangangaipo bago pa man kita maghagad sa saiya. Kun siring, dai daw kita maninigong magtao nin panahon na obserbaran asin may pag-apresyar na horophoropon kun paano inaataman  kan satong langitnon na Ama an saiyang mga linalang?—Mat. 6:8, 26.

An Satong Ama—An “Mapagpadangat na Paraprotehir”

Inasegurar kan hula ni Isaias an suanoy na banwaan nin Dios: “An mga bukid mahihiro asin an mga bulod matatanyog, alagad an sakong pakikikatood nungka na mahihiro parayo sa saimo ni matatanyog an sakong tipan nin katoninongan, an sabi kan saimong mapagpadangat na paraprotehir na si Jehova.” (Isa. 54:10, The Bible in Living English) Dinudugangan nin puersa an puntong ini, an pamibi ni Jesus sa huring banggi kan saiyang buhay digdi sa daga nagpapatunay na si Jehova talagang sarong “mapagpadangat na paraprotehir.” Mapadapit sa saiyang mga disipulo, namibi si Jesus: “Sinda nasa kinaban asin ako madian sa saimo. Amang Banal, ingati sinda huli kan saimong ngaran.” (Juan 17:11, 14) Iniingatan asin pinoprotehiran ni Jehova an mga parasunod ni Jesus.

An sarong paagi na pinoprotehiran kita nin Dios sa mga pakana ni Satanas ngonyan iyo an pagtao nin napapanahon na espirituwal na pagkakan paagi sa “maimbod asin mapagmansay na oripon.” (Mat. 24:45) An pag-ako kan nakakapakosog na pagkakan na iyan mahalagang marhay tanganing ‘ikasulog niato an bilog na pangalasag hale sa Dios.’ Halimbawa, isip-isipa an “dakulang kalasag nin pagtubod,” na paagi kaiyan ‘masisigbo niato an gabos na naglalaad na busog kan marigsok.’ (Efe. 6:11, 16) An satong pagtubod nagpoprotehir sa sato sa espirituwal na kapahamakan asin sarong patotoo sa nagpoprotehir na kapangyarihan kan satong Ama.

Mas dakol pa kitang manonodan manongod sa pagpadangat kan satong langitnon na Ama paagi sa maingat na pag-estudyar kun paano guminawe an Aki nin Dios kan sia yaon sa daga. Mangnoha an pagkasaysay sa Marcos 10:13-16. Kinotar dian si Jesus na nagsabi sa saiyang mga disipulo: “Pabayae nindo na dumolok sa sako an saradang na aki.” Mantang pinapalibotan si Jesus kan mga aking idto, may kapadangatan niang kinugos asin binendisyonan sinda. Seguradong maheheling sa saindang mga lalawgon an kagayagayahan! Asin huli ta sinabi ni Jesus: “Sia na nakaheling sa sako nakaheling man sa Ama,” aram niato na gusto kan tunay na Dios na dumolok kita sa saiya.—Juan 14:9.

Si Jehova Dios iyo an daing limiteng Burabod nin pagkamoot. Sia an mayong kapantay na Paratao asin an mayong kaagid na Paraprotehir patin gusto niang rumani kita sa saiya. (Sant. 4:8) Kaya daing duda na si Jehova iyo an pinakamarahay na Ama na maiimahinar!

Nakikinabang Nanggad Kita!

Nakikinabang kita nin dakula paagi sa pagtitiwala niato ki Jehova bilang satong mamomoton asin mapagpadangat na Ama sa langit. (Tal. 3:5, 6) Nakinabang si Jesus sa lubos niang pagtitiwala sa saiyang Ama. “Dai ako nagsosolo,” an sabi ni Jesus sa saiyang mga disipulo, “kundi an Ama na nagsugo sa sako kaibanan ko.” (Juan 8:16) Si Jesus pirmeng segurado sa suporta ni Jehova. Halimbawa, kan sia bautismohan, nag-ako sia nin mamomoton na pag-asegurar giraray hale sa Ama, na nagpahayag: “Ini an sakong Aki, an namomotan, na sakong inoyonan.” (Mat. 3:15-17) Asin pirang segundo na sana bago sia magadan, si Jesus nagkurahaw: “Ama, sa saimong mga kamot ipinagkakatiwala ko an sakong espiritu.” (Luc. 23:46) An pagtitiwala ni Jesus sa saiyang Ama marigon pa man giraray siring kan dati.

Puedeng magin arog man kita kaiyan. Mantang si Jehova nasa kampi niato, ano an ikakatakot niato? (Sal. 118:6) Si Atsuko, na nasambitan sa kapinonan, natuod kaidto na magsarig sa sadiri niang kosog kun napapaatubang sa mga problema. Alagad ta pinonan niang pag-adalan an buhay asin ministeryo ni Jesus, na nagkokonsentrar partikularmente sa dayupot na relasyon nia sa saiyang langitnon na Ama. An resulta? “Nanodan ko kun ano an boot sabihon kan pagkaigwa nin sarong Ama asin kan pagsarig sa saiya,” an sabi ni Atsuko. Idinugang pa nia: “Naeksperyensiahan ko an tunay na katoninongan asin kaogmahan. Talagang mayo nin dahelan na kita mahadit sa ano man na bagay.”

Paano kita orog pang makikinabang sa pagmansay ki Jehova bilang satong Ama? An mga aki normal sanang namomoot sa saindang mga magurang asin gustong paogmahon sinda. Huli sa pagkamoot, an Aki nin Dios ‘danay na ginigibo an mga bagay na nakakapaogma sa saiyang Ama.’ (Juan 8:29) Siring man, an pagkamoot sa satong langitnon na Ama makakapahiro sa sato na gumawe nin may kadonongan asin ‘hayag na omawon’ sia.—Mat. 11:25; Juan 5:19.

 ‘Kinakapotan kan Satong Ama an Satong Toong Kamot’

An satong langitnon na Ama nagtao man nin sarong “paratabang”—an saiyang banal na espiritu. “Gigiyahan nia kamo sa gabos na katotoohan,” an sabi ni Jesus. (Juan 14:15-17; 16:12, 13) An banal na espiritu nin Dios puedeng gumiya sa sato sa mas malinaw na pakasabot dapit sa satong Ama. Puede kitang tabangan kaiyan na tumbahon an “mga bagay na marigonon an pagkaestablisar,” an boot sabihon, dati nang mga kaisipan, salang mga ideya, o biribid na mga punto de vista, na paagi kaiyan ‘dinadara an lambang kaisipan sa pagkabihag tanganing iyan magin makinuyog ki Cristo.’ (2 Cor. 10:4, 5) Kun siring, mamibi kita ki Jehova para sa ipinanugang “paratabang,” na may kompiansa na ‘an Ama sa langit matao nin banal na espiritu sa mga naghahagad sa saiya.’ (Luc. 11:13) Angay man na mamibi na tabangan kita kan banal na espiritu na orog pa nganing rumani ki Jehova.

An sarong aki nakakamate na sia ligtas, tiwasay, asin dai natatakot kun naglalakaw na kinakapotan kan saiyang ama. Kun totoong minamansay nindo si Jehova bilang saindong Ama, puede nindong isapuso an nakakarangang mga tataramon: “Ako, si Jehova na saimong Dios, nagkakapot sa saimong toong kamot, an Saro na nagsasabi sa saimo, ‘Dai ka matakot. Ako mismo an matabang sa saimo.’” (Isa. 41:13) Puede kamong magkaigwa kan makangangalas na pribilehio na ‘maglakaw’ kaiba nin Dios sagkod lamang. (Miq. 6:8) Padagos nindong gibohon an saiyang kabotan, asin maeeksperyensiahan nindo an pagkamoot, kagayagayahan, asin katiwasayan na minagikan sa pagmansay ki Jehova bilang saindong Ama.

[Nota sa Ibaba]